Текст книги "Повесть временных лет"

В лето 6545. Заложи Ярослав город великый, у него же града суть Златая врата; заложи же и церковь святыя Софья, митрополью, и посемь церковь на Золотых воротех святыя Богородица благовещенье, посемь святаго Георгия манастырь и святыя Ирины. И при семь нача вера хрестьяньска плодитися и раширяти, и черноризьци почаша множитися, и манастыреве починаху быти. И бе Ярослав любя церковныя уставы, попы любяше повелику, излиха же черноризьце, и книгам прилежа, и почитая е́ часто в нощи и в дне. И собра писце многы и прекладаше от грек на словеньское писмо. И списаша книгы многы, ими же поучащеся вернии людье наслажаются ученья божественаго. Якоже бо се некто землю разореть, другый же насееть, ини же пожинають и ядять пищю бескудну, – тако и сь. Отець бо сего Володимер землю взора и умягчи, рекше крещеньемь просветив. Сь же насея книжными словесы сердца верных людий, а мы пожинаем, ученье приемлюще книжное.

Велика бо бываеть полза от ученья книжного; книгами бо кажеми и учими есмы пути покаянью, мудрость бо обретаем и въздержанье от словес книжных. Се бо суть рекы, напаяюще вселеную, се суть исходища мудрости; книгам бо есть неищетная глубина: сими бо в печали утешаеми есмы; си суть узда въздержанью. Мудрость бо велика есть, якоже и Соломон хваляше ю, глаголаше: «Аз, премудрость, вселих свет и разум и смысл аз призвах. Страх господень… мои свети, моя мудрость, мое утверженье, моя крепость. Мною цесарезе царствують, а силнии пишють правду. Мною вельможа величаются и мучители держать землю. Аз любящая мя люблю, ищющи мене обрящють благодать». Аще бо поищеши в книгах мудрости прилежно, то обрящеши велику ползу души своей. Иже бо книгы часто чтеть, то беседуеть с богомь или святыми мужи. Почитая пророческыя беседы, и еуангельская ученья и апостолская, и житья святых отець, въсприемлеть души велику ползу.

Ярослав же сей, якоже рекохом, любим бе книгам, и многы написав положи в святей Софьи церкви, юже созда сам. Украси ю́ златомь и сребромь и сосуды церковными, в ней же обычныя песни богу вздають в годы обычныя. И ины церкви ставляше по градом и по местом, поставляя попы и дая им от именья своего урок, веля им учити люди, понеже темь есть поручено богомь, и приходити часто к церквам. И умножишася прозвутери и людье хрестьяньстии. Радовашеся Ярослав, видя множьство церквий и люди хрестьяны, зело, а враг сетовашеться, побежаем новыми людьми хрестьяньскыми.

В лето 6546. Ярослав иде на ятвягы.

В лето 6547. Священа бысть церкы святыя Богородиця, юже созда Володимер, отець Ярославль, митрополитомь Феопемптом.

В лето 6548. Ярослав иде на Литву.

В лето 6549. Иде Ярослав на мазовшаны, в лодьях.

В лето 6550. Иде Володимер, сын Ярославль, на Ямь, и победи я. И помроша кони у вой Володимерь, яко и еще дышющим конем, съдираху хзы с них: толик бо бе мор в коних.

В лето 6551. Посла Ярослав сына своего Володимера на Грькы, и вда ему вои многы, а воеводьство поручи Вышате, отцю Яневу. И поиде Володимер в лодьях, и придоша в Дунай, и поидоша к Цесарюграду. И бысть буря велика, и разби корабли руси, и княжь корабль разби ветр, и взя князя в корабль Иван Творимиричь, воевода Ярославль. Прочии же вои Володимери вывержени быша на брег, числомь 6000, и хотящем поити в Русь, и не идяше с ними никтоже от дружины княжее. И рече Вышата: «Аз поиду с ними». И выседе ис корабля к ним, и рече: «Аще жив буду, то с ними, аще погыну, то с дружиною». И поидоша, хотяще в Русь. И бысть весть грьком, яко избило море русь, и посла царь, именемь Мономах, по руси олядий 14. Володимер же, видев с дружиною, яко идут по немь, вспятився, изби оляди гречьскыя, и взвратися в Русь, вседше в корабле свое. Вышату же яша с извержеными на брег, и приведоша я Цесарюграду, и слепиша руси много. По трех же летех, миру бывшю, пущен бысть Вышата в Русь к Ярославу. В си же времена вдасть Ярослав сестру свою за Казимира, и вдасть Казимир за вено людий 8 сот, яже бе полонил Болеслав, победив Ярослава.

В лето 6552. Выгребоша 2 князя, Ярополка и Ольга, сына Святославля, и крестиша кости ею, и положиша я в церкви святыя Богородица. В се же лето умре Брячислав, сын Изяславль, внук Володимерь, отець Всеславль, и Всеслав, сын его, седе на столе его, его же роди мати от вълхвованья. Матери бо родивши его, бысть ему язвено на главе его, рекоша бо волсви матери его: «Се язвено навяжи на нь, да носить е до живота своего», еже носить Всеслав и до сего дне на собе; сего ради немилостив есть на кровь-пролитье.

В лето 6553. Заложи Володимер святую Софью Новегороде.

В лето 6554.

В лето 6555. Ярослав иде на мазовшаны, и победи я́, и князя их уби Моислава, и покори я Казимиру.

В лето 6556. В лето 6557.

В лето 6558. Преставися жена Ярославля княгыни.

В лето 6559. Постави Ярослав Лариона митрополитомь русина в святей Софьи, собрав епископы…

В лето 6560. Преставися Володимер, сын Ярославль старей, Новегороде, и положен бысть в святей Софьи, юже бе сам создал.

В лето 6561. У Всеволода родися сын, и нарече имя ему Володимер, от царице грькыне.

В лето 6562. Преставися великый князь русьскый Ярослав. И еще бо живущю ему, наряди сыны своя, рек им: «Се аз отхожю света сего, сынове мои; имейте в собе любовь, понеже вы есте братья единого отца и матере. Да аще будете в любви межю собою, бог будеть в вас, и покорить вы противныя под вы. И будете мирно живуще. Аще ли будете ненавидно живуще, в распрях и которающеся, то погыбнете сами, и погубите землю отець своих и дед своих, иже налезоша трудомь своимь великымъ; но пребывайте мирно, послушающе брат брата. Се же поручаю в собе место стол старейшему сыну моему и брату вашему Изяславу Кыев; сего послушайте, якоже послушасте мене, да той вы будеть в мене место; а Святославу даю Чернигов, а Всеволоду Переяславль, а Игорю Володимерь, а Вячеславу Смолинескъ». И тако раздели им грады, заповедав им не преступати предела братня, ни сгонити, рек Изяславу: «Аще кто хощеть обидети брата своего, то ты помагай, его же обидять». И тако уряди сыны своя пребывати в любви. Самому же болну сущю и пришедшю Вышегороду, разболеся велми, Изяславу тогда сущю…, а Святославу Володимери, Всеволоду же тогда сущю у отця, бе бо любим отцемь паче всея братьи, его же имяше присно у собе. Ярославу же приспе конець житья, и предасть душю свою богу, в суботу 1 поста святаго Феодора. Всеволод же спрята тело отца своего, възложьше на сани везоша и́ Кыеву, попове поюще обычныя песни. Плакашася по немь людье; и, принесше, положиша и́ в раце мороморяне, в церкви святое Софье. И плакася по немь Всеволод и людье вси. Живе же всех лет 70 и 6.

Начало княженья Изяславля Кыеве. Пришед Изяслав седе Кыеве, Святослав Чернигове, Всеволод Переяславли, Игорь Володимери, Вячеслав Смолиньске. В се же лето иде Всеволод на торкы зиме к Воиню и победи торкы. В семь же лете приходи Болушь с половьци, и створи Всеволод мир с ними, и возвратишася половци вспять, отнюду же пришли.

В лето 6564.

В лето 6565. Преставися Вячеслав, сын Ярославль, Смолиньске, и посадиша Игоря Смолиньске, из Володимеря выведше.

В лето 6566. Победи Изяслав голяди.

В лето 6567. Изяслав, Святослав и Всеволод высадиша строя своего Судислава ис поруба, сиде бо лет 20 и 4, заводивше кресту, и бысть чернцемь.

В лето 6568. Преставися Игорь, сын Ярославль. В семь же лете Изяслав, и Святослав, и Всеволод, и Всеслав созокупиша вои бещислены, и поидоша на коних и в лодьях, бещислено множьство, на торкы. Се слышавше торци, убояшася, пробегоша и до сего дне, и помроша бегаючи, божьимь гневомь гоними, ови от зимы, друзии же гладомь, ини же моромь и судомь божьим. Тако бог избави хрестьяны от поганых.

В лето 6569. Придоша половци первое на Русьскую землю воеват; Всеволод же изиде противу им месяца февраля в 2 день. И бившимся им, победиша Всеволода, и воевавше отъидоша. Се бысть первое зло от поганых и безбожных враг. Бысть же князь их Искал.

В лето 6570.

В лето 6571. Судислав преставися, Ярославль брат, и погребоша и́ в церкви святаго Георгия. В се же лето Новегороде иде Волхов вспять дний 5. Се же знаменье не добро бысть, на 4-е бо лето пожже Всеслав град.

В лето 6572. Бежа Ростислав Тмутороканю, сын Володимерь, внук Ярославль, и с ним бежа Порей и Вышата, сынь Остромирь, воеводы Новгородьского. И, пришед, выгна Глеба изь Тмуторокана, а сам седе в него место.

В лето 6573. Иде Святослав на Ростислава к Тмутороканю. Ростислав же отступи кроме из града, не убоявся его, но не хотя противу строеви своему оружья взяти. Святослав же пришед Тмутороканю, посади сына своего пакы Глеба, и взвратися опять. Ростислав же пришед, пакы выгна Глеба, и приде Глеб к отцю своему, Ростислав же седе Тмуторокани. В се же лето Всеслав рать почал.

В си же времена бысть знаменье на западе, звезда превелика, луче имущи акы кровавы, въсходящи с вечера по заходе солнечнемь, и пребысть за 7 дний. Се же проявляше не на добро, посемь бо быша усобице многы и нашествие поганых на Русьскую землю, си бо звезда бе акы кровава, проявляющи крови пролитье. В си же времена бысть детищь вверьжен в Сетомль; его же детища выволокоша рыболове в неводе, его же позоровахом до вечера, и пакы ввергоша и́ в воду. Бяшеть бо сиць: на лици ему срамнии удове, иного нелзе казати срама ради. Пред симь же временемь и солнце пременися, и не бысть светло, но акы месяць бысть, его же невегласи глаголють снедаему сущю. Се же бывають снца знаменья не на добро, мы бо по сему разумеем, якоже древле, «при Антносе, в Иерусалиме случися внезапу по всему граду за 40 дний являтися на вздусе на коних рищющим, в оружьи, златы имущем одежа, и полкы обоя являемы, и оружьем двизающимся; се же проявляше нахоженье Антиохово, нашествие рати на Иерусалим. Посемь же при Нероне цесари в том же Иерусалиме восия звезда, на образ копийный, над градом: се же проявляше нахоженье рати от римлян. И паки сице же бысть при Устиньяне цесари, звезда восия на западе, испущающи луча, юже прозываху блистаницю, и бысть блистающи дний 20; посем же быст звездам теченье, с вечера до заутрья, яко мнети всем, яко падають звезды, и пакы солнце без лучь сьяше: се же проявляше крамолы, недузи человеком умертвие бяше. Пакы же при Маврикии цесари бысть сице: жена детищь роди без очью и без руку, в чересла бе ему рыбий хвост прирослъ; и пес родися шестоног; в Африкии же 2 детища родистася, един о 4-х ногах, а другый о двою главу. Посемь же бысть при Костянтине иконоборци цари, сына Леонова: теченье звездное бысть на небе, отторваху бо ся на землю, яко видящим мнети кончину; тогда же вздух взлияся повелику; в Сурии же бысть трус велик, земли раседшися трий поприщь, изиде дивно иземле мска, человечьскымь гласомь глаголющи и проповедающи наитье языка, еже и бысть: наидоша бо срацини на Палестиньскую землю. Знаменья бо в небеси, или звездах, ли солнци, ли птицами, ли етеромь чим, не на благо бывають; но знаменья сиця на зло бывають, ли проявленье рати, ли гладу, ли смерть проявляють.

В лето 6574. Ростиславу сущю Тмуторокани и емлющю дань у касог и у инех стран, сего же убоявшеся грьци, послаша с лестью котопана. Оному же пришедшю к Ростиславу и вверившюся ему, чтяшеть и́ Ростислав. Единою же пьющю Ростиславу с дружиною своею, рече котопан: «Княже! Хочю на тя пити». Оному же рекшю: «Пий». Он же испив половину, а половину дасть князю пити, дотиснувся палцемь в чашю, бе бо имея под ногтем растворенье смертное, и вдасть князю, урек смерть до дне семаго. Оному же испившю, котопан же, пришед Корсуню, поведаше, яко в сий день умреть Ростислав, якоже и бысть. Сего же котопана побиша каменьемь корсуньстии людье. Бе же Ростислав муж добль, ратен, взрастомь же леп и красен лицемь, и милостив убогым. И умре месяца февраля в 3 день, и тамо положен бысть в церкви святыя Богородица.

В лето 6575. Заратися Всеслав, сын Брячиславль, Полочьске, и зая Новгород. Ярославичи же трие, – Изяслав, Святослав, Всеволод, – совокупивше вои, идоша на Всеслава, зиме сущи велице. И придоша ко Меньску, и меняне затворишася в граде. Си же братья взяша Менеск, и исекоша муже, а жены и дети вдаша на щиты, и поидоша к Немизе, и Всеслав поиде противу. И совокупишася обои на Немизе, месяца марта в 3 день; и бяше снег велик, и поидоша противу собе. И бысть сеча зла, и мнози падоша, и одолеша Изяслав, Святослав, Всеволод, Всеслав же бежа. По семь же, месяца иуля в 10 день, Изяслав, Святослав и Всеволод, целовавше крест честный к Всеславу, рекше ему: «Приди к нам, яко не створим ти зла». Он же, надеявся целованью креста, перееха в лодьи черес Днепр. Изяславу же в шатер предъидущю, и тако яша Всеслава на Рши у Смолиньска, преступившее крест. Изяслав же привед Всеслава Кыеву, всади и́ в поруб с двема сынома.

В лето 6576. Придоша иноплеменьници на Русьску землю, половьци мнози. Изяслав же, и Святослав и Всеволод изидоша противу им на Льто. И бывши нощи, подъидоша противу собе. Грех же ради наших пусти бог на ны поганыя, и побегоша русьскыи князи, и победиша половьци…

Изяславу же со Всеволодом Кыеву побегшю, а Святославу Чернигову, и людье кыевстии, прибегоша Кыеву, и створиша вече на торговищи, и реша, пославшеся ко князю: «Се половци росулися по земли; дай, княже, оружье и кони, и еще бьемся с ними». Изяслав же сего не послуша. И начаша людие говорити на воеводу на Коснячька; идоша на гору, с веча, и придоша на двор Коснячков, и не обретше его, сташа у двора Брячиславля и реша: «Поидем, высадим дружину свою ис погреба». И разделишася надвое: половина их иде к погребу, а половина их иде по Мосту; си же придоша на княжь двор. Изяславу же седящю на сенех с дружиною своею, начаша претися со князем, стояще доле.

Князю же из оконця зрящю и дружине стоящи у князя, рече Тукы, брат Чюдинь, Изяславу: «Видиши, княже, людье възвыли; посли, ат Всеслава блюдуть». И се ему глаголющю, другая половина людий приде от погреба, отворивше погреб. И рекоша дружина князю: «Се зло есть; посли ко Всеславу, ат призвавше лестью кооконцю, пронзуть и́ мечемь». И не послуша сего князь. Людье же кликнуша и идоша к порубу Всеславлю. Изяслав же, се видев, со Всеволодом побегоста з двора, людье же высекоша Всеслава ис поруба, в 15 день семтября, и прославиша и́ среде двора княжа. Двор жь княжь разграбиша, бещисленое множьство злата и сребра, кунами и белью. Изяслав же бежа в Ляхы.

Посемь же половцем воюющим по земле Русьсте, Святославу сущю Чернигове, и половцем воюющим около Чернигова, Святослав же собрав дружины неколико, изиде на ня ко Сновьску. И узреша половци идущь полк, пристроишася противу. И видев Святослав множьство их, и рече дружине своей: «Потягнем, уже нам не лзе камо ся дети». И удариша в коне, и одоле Святослав в трех тысячах, а половець бе 12 тысяче; и тако бьеми, а друзии потопоша в Снови, а князя их яша рукама, в 1 день ноября. И взвратишася с победою в град свой Святослав.

Всеслав же седе Кыеве. Се же бог яви силу крестную: понеже Изяслав целовав крест и я и́; темже наведе бог поганыя, сего же яве избави крест честный. В день бо Въздвиженья Всеслав, вздохнув, рече: «О кресте честный! Понеже к тобе веровах, избави мя от рва сего». Бог же показа силу крестную на показанье земле Русьстей, да не преступають честнаго креста, целовавше его; аще ли преступить кто, то и зде прииметь казнь и на придущемь веце казнь вечную. Понеже велика есть сила крестная: крестомь бо побежени бывають силы бесовьскыя, крест бо князем в бранех пособить, в бранех крестом согражаеми вернии людье побежають супостаты противныя, крест бо вскоре избавляеть от напастий призывающим его с верою. Ничтоже ся боять беси, токмо креста. Аще бо бывають от бес мечтанья, знаменавше лице крестомь, прогоними бывають. Всеслав же седе Кыеве месяць 7.

В лето 6577. Поиде Изяслав с Болеславомь на Всеслава; Всеслав же поиде противу. И приде Белугороду Всеслав, и бывши нощи, утаився кыян, бежа из Белагорода Полотьску. Заутра же видевше людье князя бежавша, взвратишася Кыеву, и створиша вече, и послашася к Святославу и к Всеволоду, глаголюще: «Мы уже зло створили есмы, князя своего прогнавше, а се ведеть на ны Лядьскую землю, а поидета в град отца своего; аще ли не хочета, то нам неволя: зажегше град свой, ступим в Гречьску землю». И рече им Святославъ: «Ве послеве к брату своему; аще поидеть на вы с ляхы губити вас, то ве противу ему ратью, не даве бо погубити града отца своего; аще ли хощеть с миром, то в мале придеть дружине». И утешиста кыяны. Святослав же и Всеволод посласта к Изяславу, глаголюща: «Всеслав ти бежал, а не води ляхов Кыеву, противна бо ти нету; аще ли хощеши гнев имети и погубити град, то веси, яко нама жаль отня стола». То слышав Изяслав, остави ляхы и поиде с Болеславом, мало ляхов поим; посла же пред собою сына своего Мьстислава Кыеву. И пришед Мьстислав, исече кияны, иже беша высекли Всеслава, числом 70 чади, а другыя слепиша, другыя же без вины погуби, не испытав. Изяславу же идущю к граду, изидоша людье противу с поклоном, и прияша князь свой кыяне; и седе Изяслав на столе своемь, месяца мая в 2 день. И распуща ляхы на покорм, и избиваху ляхы отай; и взвратися в Ляхы Болеслав, в землю свою. Изяслав же взгна торг на гору и прогна Всеслава ис Полотьска, посади сына своего Мьстислава Полотьске; он же вскоре умре ту. И посади в него место брата его Святополка, Всеславу же бежавшю.

В лето 6578. Родился у Всеволода сын, и нарекоша именем Ростислав. В се же лето заложена бысть церкы святаго Михаила в монастыре Всеволожи.

В лето 6579. Воеваша половци у Растовьця и у Неятина. В се же лето выгна Всеслав Святополка ис Полотьска. В се же лето победи Ярополк Всеслава у Голотичьска. В си же времена приде волхв, прелгден бесом; пришед бо Кыеву глаголаше, сице поведая людем, яко на пятое лето Днепру потещи вспять и зем тям преступати на ина места, яко стати Гречьскы земли на Руской, а Русьскей на Гречьской, и прочим землям изменитися. Его же невегласи послушаху, вернии же смеяхуться, глаголюще ему: «Бес тобою играеть на пагубу тобе». Се же и бысть ему: в едину бо нощь бысть без вести.

Беси бо подътокше на зло вводять; посем же насмисаются, ввергъше и́ в пропасть смертную, научивше глаголати, якоже се скажем бесовьское наущенье и действо.

Бывши бо единою скудости в Ростовьстей области, встаста два волхва от Ярославля, глаголюща, яко «Ве свеве, кто обилье держить». И поидоста по Волзе; кде приидуча в погост, ту же нарекаста лучьшие жены, глаголюща, яко «Си жито держить, а си мед, а си рыбы, а си скору». И привожаху к нима сестры своя, матере и жены своя. Она же в мечте прорезавше за плечемь, вынимаста любо жито, любо рыбу, и убивашета многы жены, и именье их отъимашета собе. И придоста на Белоозеро, и бе у нею людий инех 300. В се же время приключися прити от Святослава дань емлющю Яневи, сыну Вышатину; поведаша ему белозерци, яко два кудесника избила уже многы жены по Волзе и по Шексне, и пришла еста семо. Ян же, испытав, чья еста смерда, и уведев, яко своего князя, послав к ним, иже около ею суть, рече им: «Выдайте волхва та семо, яко смерда еста моя и моего князя». Они же сего не послушаша. Янь же поиде сам без оружья, и реша ему отроци его: «Не ходи без оружья, осоромять тя». Он же повеле взяти оружья отроком, и беста 32 отрока с нимь, и поиде к ним к лесу. Они же сташа, исполчившеся, противу. Яневи же идущю с топорцем, выступиша отних 3 мужи, придоша к Яневи, рекуще ему: «Вида идеши на смерть, не ходи». Оному повелевшю бити я́, к прочим же поиде. Они же сунушася на Яня, един грешися Яня топором. Янь же, оборотя топор, удари и́ тыльемь, повеле отроком сечи я́. Они же бежаша в лес, убиша же ту попина Янева. Янь же, вшед в град к белозерцем, рече им: «Аще не имете волхву сею, не иду от вас и за лето». Белозерци же, шедше, яша я, и приведоша я к Яневи. И рече има: «Что ради погубиста толико человек?» Онема же рекшема, яко «Ти держать обилье, да аще истребиве сих, будеть гобино; аще ли хощеши, то пред тобою вынемеве жито, ли рыбу, ли ино что». Янь же рече: «Поистине лжа то; створил бог человека от земле, сставлен костьми и жылами от крове; несть в немь ничтоже и не весть ничтоже, но токмо един бог весть». Она же рекоста: «Ве веве, како есть человек створен». Он же рече: «Како?». Она же рекоста: «Бог мывся в мовници и вспотився, отерся вехтем, и верже с небесе на землю. И распреся сотона с богомь, кому в немь створити человека. И створи дьявол человека, а бог душю во нь вложи. Темже, аще умреть человек, в землю идеть тело, а душа к богу». Рече има Янь: «Поистине прельстил вас есть бесъ; коему богу веруета?» Она же рекоста: «Антихресту». Он же рече има: «То кде есть?» Она же рекоста: «Седить в бездне». Рече има Янь: «Какый то бог, седя в бездне? То есть бес, а бог есть на небеси, седяй на престоле, славим от ангел, иже предстоять ему со страхом, не могуще на нь зрети. Сих бо ангел свержен бысть, его же вы глаголета антихрест, за величанье его низвержен бысть с небесе, и есть в бездне, якоже то вы глаголета, жда, егда придеть бог с небесе. Сего им антихреста, свяжеть узами и посадить и́, ем его, с слугами его и иже к нему верують. Вама же и сде муку прияти от мене, и по смерти тамо». Онема же рекшема: «Нама бози поведають, не можеши нама створити ничтоже». Он же рече има: «Лжють вама бози». Она же рекоста: «Нама стати пред Святославомь, а ты не можеши створити ничтоже». Янь же повеле бити я и поторгати браде ею. Сима же тепенома и браде ею поторгане проскепом, рече има Янь: «Что вама бози молвять?» Онема же рекшема: «Стати нама пред Святославом». И повеле Янь вложити рубль в уста има и привязати я к упругу, и пусти пред собою в лодье, и сам по них иде. Сташа на устьи Шексны, и рече има Янь: «Что вам бози молвять?» Она же реста: «Сице нама бози молвять, не быти нама живым от тобе». И рече има Янь: «То ти вама право поведали». Она же рекоста: «Но аще ны пустиши, много ти добра будеть; аще ли наю погубиши, многу печаль приимеши и зло». Он же рече има: «Аще ваю пущю, то зло ми будет от бога; аще ль вас погублю, то мзда ми будеть». Ирече Янь повозником: «Ци кому вас кто родин убьен от сею?» Они же реша: «Мне мати другому сестра, иному роженье». Он же рече им: «Мьстите своихъ». Они же поимше, убиша я и повесиша я на дубе: отмьстье приимша от бога по правде. Яневи же идущю домови, в другую нощь медведь възлез, угрыз ею и снесть. И тако погыбнуста наущеньемь бесовьскым, инем ведуща, а своеа пагубы на ведуче. Аще ли быста ведала, то не быста пришла на место се; идеже ятома има быти; аше ли и ята быста, то почто глаголаста: «Не умрети нама», оному мыслящю убити я? Но се есть бесовьское наученье; беси бо не ведять мысли человечьскыя, но влагають помысл в человека, тайны не сведуще. Бог един свесть помышленья человечьская, беси же не сведають ничтоже; суть бо немощни и худи взоромь.

Яко и се скажем о взоре их и о омраченьи их. В си бо времена, в лета си, приключися некоему новгородцю прити в Чюдь, и приде к кудеснику, хотя волхвованья от него. Он же по обычаю своему нача призывати бесы в храмину свою. Новгородцю же седящю на порозе тоя же храмины, кудесник же лежаше оцепев, и шибе им бес. Кудесник же, встав, рече новгородцю: «Бози не смеють прити, нечто имаши на собе, его же боятся». Он же помянув на собе крест, и отшед постави кроме храмины тое. Он же нача опять призывати бесы. Беси же, метавше имь, поведаша, что ради пришел есть. Посемь же поча прашати его: «Что ради боятсяего, егоже се носим на собе креста?» Он же рече: «То есть знаменье небеснаго бога, его же наши бози боятся». Он же рече: «То каци суть бози ваши, кде живуть?». Он же рече: «В безднах. Суть же образом черни, крилаты, хвосты имуще; всходять же и под небо, слушающе ваших богов. Ваши бо бози на небеси суть. Аще кто умреть от ваших людий, то взносим есть на небо; аще ли от наших умираеть, то носим к нашим богом в бездну». Якоже и есть; грешници бо в аде сут, ждуще мукы вечныя, а праведници в небеснемь жилище водваряются со ангелы.

Сиця ти есть бесовьская сила, и лепота, и немощь. Темже прелщають человекы, веляще им глаголати виденья, являющеся им, несвершеным верою, являющеся во сне, инем в мечте, и тако волхвуют наученьемь бесовьскым. Паче же женами бесовьская волъшвенья бывають; искони бо бес жену прелсти, си же – мужа, тако в си роди много волхвують жены чародейством, и отравою, и инеми бесовьскыми козньми. Но и мужи прелщени бывають от бесов невернии, яко се в первые роды, при апостолех бо бысть Симон волхв, иже творяше волшьствомь псом глаголати человечьски, и сам пременяшется, ово стар, ово молод, ово ли и иного пременяше во иного образ, в мечтаньи. Сице творяше Аньний и Мамврий, волшвеньемь чюдеса противу Моисиови, но вскоре не взмогоста противу Моисиови, но и Куноп творяше мечтанье бесовьско, яко и по водам ходити, и ина мечтанья творяше, бесомь лстим, на пагубу собе и инем.

Сиць бе волхв встал при Глебе Новегороде; глаголеть бо людем, творяся акы бог, и многы прельсти, мало не всего града, глаголашеть бо, яко «Проведе вся»; и хуля веру хрестьянскую, глаголашеть бо, яко «Переиду по Волхову пред всеми». И бысть мятежь в граде, и вси яша ему веру, и хотяху погубити епископа. Епископ же, взем крест и облекся в ризы, ста, рек: «Иже хощеть веру яти волхву, то да идеть за нь; аще ли веруеть кто, то ко кресту да идеть». И разделишася надвое: князь бо Глеб и дружина его идоша и сташа у епископа, а людье вси идоша за волхва. И бысть мятежь велик межи ими. Глеб же, возма топор под скутом, приде к волхву и рече ему: «То весн ли, что утро хощеть быти, ичто лидовечера?». Он же рече: «Проведе вся». И рече Глеб: «То веси ли, что ти хощеть быти днесь?» «Чюдеса велика створю», рече. Глеб же, вынемь топор, ростя и́, и паде мертв, и людье разидошася. Он же погыбе теломь, и душею предався дьяволу.

В лето 6580. Пренесоша святая страстотерпця Бориса и Глеба. Совокупившеся Ярославичи: Изяслав, Святослав, Всеволод; митрополит же тогда бе Георги, епископ Петр Переяславьскый, Михаил Гургевьский, Феодосий же игумен Печерьскый, Софроний святаго Михаила игумен, Герман игумен святаго Спаса, Никола игумен Переяславьскый, и вси игумени, и створше праздник, праздноваша светло, и преложиша я в новую церковь, юже сдела Изяслав, яже стоить и ныне. И вземше первое Бориса в древяне раце Изяслав, Святослав, Всеволод, вземше на рама своя, понесоша, предъидущем черноризцем, свеща держаще в руках, и по них дьякони с кадилы, и посемь презвитери, и по них епископи с митрополитом; по сих с ракою идяху. И принесше в новую церковь, отверзоша раку, исполнися благоуханья церкы, воня благы; видевше же се, прославиша бога. И митрополита ужасть обиде, бе бо нетверд верою к нима; и пад ниць, просяше прощенья. Целовавше мощи его, вложиша и́ в раку камену. Посем же вземше Глеба в раце камене, вставиша на сани и, емше за ужа, везоша и́. Яко быша в дверех, ста рака и не иде. И повелеша народу възвати: «Господи помилуй», и повезоша и́. И положиша я месяца мая 2 день. И отпевше литургию, обедаша братья на скупь, кождо с бояры своими, с любовью великою. И бе тогда держа Вышегород Чюдин, а церковь Лазорь. Посем же разидошася всвояси.

В лето 6581. Вздвиже дьявол котору в братьи сей Ярославичих. Бывши распри межи ими, быста с себе Святослав со Всеволодомь на Изяслава. Изиде Изяслав ис Кыева, Святослав же и Всеволод внидоста в Кыев, месяца марта 22, и седоста на столе на Берестовомь, преступивша заповедь отню. Святослав же бе начало выгнанью братню, желая болшее власти; Всеволода бо прелсти, глаголя, яко «Изяслав сватится со Всеславом, мысля на наю; да аще его не вариве, имать нас прогнати». И тако взостри Всеволода на Изяслава, Изяслав же иде в ляхы со именьем многым, глаголя, яко «Симь налезу вои». Еже все взяша ляхове у него, показавше ему путь от себе. А Святослав седе Кыеве прогнав брата своего, преступив заповедь отню, паче же божью. Велий бо есть грех преступати заповедь отца своего: ибо исперва преступиша сынове Хамови на землю Сифову, и по 400 лет отмьщенье прияша от бога, от племене бо Сифова суть евреи, иже избивше Хананейско племя, всприяша свой жребий и свою землю. Пакы преступи Исав заповедь отца своего, и прия убийство; не добро бо есть преступати предела чюжего. В се же лето основана бысть церкы Печерьская игуменомь Феодосьемь и епископомь Михаиломь, митрополиту Георгию тогда сущю в Грьцех, Святославу Кыеве седящю.

В лето 6582. Феодосий, игумен печерьскый, преставися…

В лето 6583. Почата бысть церкы Печерьская над основаньемь Стефаномь игуменомь; из основанья бо Феодосий почал, а на основании Стефан поча; и кончана бысть на третьее лето, месяца иуля 11 день. В се же лето придоша сли из немець к Святославу; Святослав же, величаяся, показа им богатьство свое. Они же видевше бещисленое множьство, злато, и сребро, и паволокы, и реша: «Се ни в что же есть, се бо лежить мертво. Сего суть кметье луче. Мужи бо ся доищють и болше сего». Сице ся похвали Иезекий, царь июдейск, к послом царя асурийска, его же вся взята быша в Вавилон; тако и по сего смерти все именье расыпася разно.

В лето 6584. Ходи Володимер, сын Всеволожь, и Олег, сын Святославль, ляхом в помочь на чехы. Сего же лета преставися Святослав, сын Ярославль, месяца декабря 27, от резанья желве, и положен Чернигове у святаго Спаса. И седе по немь Всеволод на столе, месяца генваря в 1 день.

В лето 6585. Поиде Изяслав с ляхы, Всеволод же поиде противу ему. Седе Борис Чернигове месяца мая 4 день, и бысть княженья его 8 дний, и бежа Тмутороканю к Романови. Всеволод же иде противу брату Изяславу на Волынь, и створиста мир, и пришед Изяслав седе Кыеве, месяца иуля 15 день, Олег же, сын Святославль, бе у Всеволода Чернигове. В лето 6586. Бежа Олег, сын Святославль, Тмутороканю от Всеволода, месяца априля 10. В се же лето убьен бысть Глеб, сын Святославль, в Заволочии. Бе же Глеб милостив убогым и страннолюбив, тщанье имея к церквам, тепл на веру и кроток, взором красен. Его же тело положено бысть Чернигове за Спасом, месяца иуля 23 день. Седящю Святополку в него место Новегороде, сыну Изяславлю, Ярополку седящю Вышегороде, а Володимеру седящю Смолиньске, приведе Олег и Борис поганыя на Русьскую землю, и поидоста на Всеволода с половци. Всеволод же изиде противу има на Сжице, и победиша половци русь, и мнози убьени быша ту: убьен бысть Иван Жирославичь, и Тукы, Чюдинь брат, Порей, и ини мнози, месяца августа в 25. Олег же и Борис придоста Чернигову, мняще одолевше, а земле Русьскей много зло створше, проливше кровь хрестьяньску, ея же крове взищеть бог от руку ею, и ответ дати има за погубленыа душа хрестьяньскы. Всеволод же приде к брату своему Изяславу Киеву, целовавшася и седоста. Всеволод же исповеда вся бывшая. И рече ему Изяслав: «Брате! Не тужи. Видиши ли, колико ся мне сключи: первое, не выгнаша ли мене и именье мое разграбиша? И пакы, кую вину вторую створил бех? Не изгнан ли бех от ваю, брату своею? Не блудил ли бех по чюжим землям, именья лишен бых не створих зла ничтоже? И ныне, брате, не туживе. Аще будеть нама причастье в Русскей земли, то обема; аще лишена будеве, тооба. Аз сложю главу свою за тя». И се рек, утеши Всеволода, и повеле сбирати вои от мала до велика. И поиде Изяслав с Ярополком, сыном своим, и Всеволод с Володимером, сыном своим. И поидоша к Чернигову, и черниговци затворишася в граде. Олег же и Борис не бяста. Черниговцем же не отворившимся, приступиша ко граду. Володимер же приступи ко вратом всточным, от Стрежени, и отя врата, и взяша град околний, и пожгоша и́, людем же вбегшим в днешний град. Изяслав же и Всеволод слышаста, яко идеть Олег и Борис противу, Изяслав же и Всеволод уранивше, поидоста от града противу Олгови. Рече же Олег к Борисови: «Не ходиве противу, не можеве стати противу четырем князем, но посливе с молбою к стрыема своима». И рече ему Борис: «Ты готова зри, аз им противен всем»; похвалився велми, не ведый, яко бог гордым противится, смереным даеть благодать, да не хвалиться силный силою своею. И поидоста противу, и бывшим им на месте у села на Нежатине ниве, и сступившимся обоим, бысть сеча зла. Первое убиша Бориса, сына Вячеславля, похвалившагося велми. Изяславу же стоящю в пешцих, и внезапу приехав един, удари и́ копьем за плече. Тако убьен бысть Изяслав, сын Ярославль. Продолжене бывши сечи, побеже Олег в мале дружине, и одва утече, бежа Тмутороканю. Убьен бысть князь Изяслав месяца октямбря в 3 день. И вземше тело его, привезоша и́ в лодьи, и поставиша противу Городьцю, изиде противу ему весь город Кыев, и взложивше тело его на сани, повезоша и́, с песнми попове и черноризци понесоша и́ в град. И не бе лзе слышати пенья во плачи велице и вопли; плака бо ся по немь весь град Киев, Ярополк же идяше по немь, плачася с дружиною своею: «Отче, отче мой! Что еси пожил бес печали на свете семь, многы напасти приим от людий и от братья своея? Се же погыбе не от брата, но забрата своего положи главу свою». И, принесше, положиша тело его в церкви святыя Богородица, вложивше и́ в раку мраморяну. Бе же Изяслав муж взором красен и телом велик, незлобив нравом, криваго ненавиде, любя правду. Не бе бо в немь лсти, но прост муж умом, не вздая зла за зло. Колико бо ему створиша кияне: самого выгнаша, а дом его разграбиша, и не взда противу тому зла. Аще ли кто дееть вы: сечець исече, то не сь то створи, но сын его. Пакы же брата его прогнаста и́, и ходи по чюжей земли, блудя. И седящю ему пакы на столе своемь, Всеволоду пришедшю побежену к нему, не рече ему: «Колико от ваю приях?», не вдасть зла за зло, но утеши, рек: «Елма же ты, брате мой, показа ко мне любовь, введе мя на стол мой и нарек мя старейшину собе, се аз не помяну злобы первыя, ты ми еси брат, а я тобе, и положю главу свою за тя», еже и бысть. Не рече бо ему: «Колико зла створиста мне, и се ноне тобе ся сключи», не рече: «Се кроме мене», но на ся перея печаль братню, показая любовь велику, свершая апостола, глаголюща: «Утешайте печалныя». По истине, аще что створил есть в свете семь, етеро согрешенье, отдасться ему, занеже положи главу свою за брата своего, не желая болшее волости, ни именья хотя болша, но за братню обиду. О сяковых бо господь рече: «Да кто положить душю свою за другы своя». Соломон же рече: «Братья в бедах пособива бывають». Любы бо есть выше всего. Яко же Иоан глаголеть: «Бог любы есть, пребываяй в любви, в бозе пребываеть, и бог в немь пребываеть». О семь свершается любы, да достоянье имам в день судный, да якоже он есть, и мы есмы в мире семь. Боязни несть в любви, но свершена любы вон измещеть боязнь, яко боязнь мученье имать. «Бояй же ся несть свершен в любви. Аще кто речеть: любьлю бога, а брата своего ненавижю, ложь есть. Не любяй бо брата своего, его же видить, бога, его же не видить, како можеть любити? Сию заповедь имам от него, да любяй бога любить брата своего». В любви бо все свершается. Любве ради и греси расыпаются. Любве бо ради сниде господь на землю и распятся за ны грешныя, взем грехы наша, пригвозди на кресте, дав нам крест свой на прогнанье ненависти бесовьское. Любве ради мученици прольяша крови своя. Любве же ради сий князь пролья кровь свою за брата своего, свершая заповедь господню.