Текст книги "Молитвослов для готовящихся к Исповеди и Причастию (с раздельными канонами)"

А́нгел вопия́ше Благода́тней: Чи́стая Дéво, ра́дуйся! И па́ки реку́: ра́дуйся! Твой Сын воскрéсе триднéвен от гро́ба и мéртвыя воздви́гнувый; лю́дие, весели́теся!

Свети́ся, свети́ся, но́вый Иерусали́ме, сла́ва бо Госпо́дня на Тебé возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоéго́.

В двунадесятые праздники читается задостойник праздника.]

Сла́ва, и ны́не: Го́споди, поми́луй. (Трижды.)

Го́споди Иису́се Христé, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных отéц на́ших и всех святы́х, поми́луй и спаси́ нас, я́ко Благ и Человеколю́бец. Ами́нь.

Когда хочешь возлечь на одр свой, читай следующие молитвы:

Молитва святого Иоанна Дамаскина

Влады́ко Человеколю́бче, не ужéли мне одр сей гроб бу́дет, или́ ещé окая́нную мою́ ду́шу просвети́ши днем? Се ми гроб предлежи́т, се ми смерть предстои́т. Суда́ Твоего́, Го́споди, бою́ся и му́ки безконéчныя, зло́е же творя́ не престаю́: Тебé Го́спода Бо́га моего́ всегда́ прогневля́ю, и Пречи́стую Твою́ Ма́терь, и вся Небéсныя си́лы, и свята́го А́нгела храни́теля моего́. Вем у́бо, Го́споди, я́ко недосто́ин есмь человеколю́бия Твоего́, но досто́ин есмь вся́каго осуждéния и му́ки. Но, Го́споди, или́ хощу́, или́ не хощу́, спаси́ мя. А́ще бо пра́ведника спасéши, ничто́же вéлие; и а́ще чи́стаго поми́луеши, ничто́же ди́вно: досто́йни бо суть ми́лости Твоея́. Но на мне грéшнем удиви́ ми́лость Твою́: о сем яви́ человеколю́бие Твоé, да не одолéет моя́ зло́ба Твоéй неизглаго́ланней благости и милосéрдию: и я́коже хо́щеши, устро́й о мне вещь.

Просвети́ о́чи мои́, Христé Бо́же, да не когда́ усну́ в смерть, да не когда́ речéт враг мой: укрепи́хся на него́.

Сла́ва: Засту́пник души́ моея́ бу́ди, Бо́же, я́ко посредé хожду́ сетéй мно́гих; изба́ви мя от них и спаси́ мя, Бла́же, я́ко Человеколю́бец.

И ны́не: Пресла́вную Бо́жию Ма́терь, и святы́х А́нгел Святéйшую, немо́лчно воспои́м сéрдцем и усты́, Богоро́дицу сию́ исповéдающе, я́ко вои́стинну ро́ждшую нам Бо́га воплощéнна, и моля́щуюся непреста́нно о душа́х наши́х.

Зна́менуй себя крестом и говори молитву Честно́му Кресту:

Да воскрéснет Бог, и расточа́тся врази́ Его́, и да бежа́т от лица́ Его́ ненави́дящии Его́. Я́ко исчеза́ет дым, да исчéзнут; я́ко та́ет воск от лица́ огня́, та́ко да поги́бнут бéси от лица́ лю́бящих Бо́га и зна́менующихся крéстным зна́мением, и в весéлии глаго́лющих: ра́дуйся, Пречестны́й и Животворя́щий Крéсте Госпо́день, прогоня́яй бéсы си́лою на Тебе́ пропя́таго Го́спода на́шего Иису́са Христа́, во ад сшéдшаго и попра́вшаго си́лу диа́волю, и дарова́вшаго нам Тебé Крест Свой Честны́й на прогна́ние вся́каго супоста́та. О, Пречестны́й и Животворя́щий Крéсте Госпо́день! Помога́й ми со Свято́ю Госпожéю Дéвою Богоро́дицею и со всéми святы́ми во вéки. Ами́нь.

Или кратко:

Огради́ мя, Го́споди, си́лою Честна́го и Животворя́щаго Твоего́ Креста́, и сохрани́ мя от вся́каго зла.

Молитва

Осла́би, оста́ви, прости́, Бо́же, прегрешéния на́ша, во́льная и нево́льная, я́же в сло́ве, и в дéле, я́же в вéдении и не в вéдении, я́же во дни и в нощи́, я́же во умé и в помышлéнии: вся нам прости́, я́ко Благ и Человеколю́бец.

Молитва

Ненави́дящих и оби́дящих нас прости́, Го́споди Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасéнию прошéния и жизнь вéчную. В нéмощех су́щия посети́ и исцелéние да́руй. И́же на мо́ри упра́ви. Путешéствующим спутешéствуй. Служа́щим и ми́лующим нас грехо́в оставлéние да́руй. Заповéдавших нам недосто́йным моли́тися о них поми́луй по вели́цей Твоéй ми́лости. Помяни́, Го́споди, прéжде усо́пших отéц и бра́тий на́ших и упоко́й я, идéже присеща́ет свет лица́ Твоего́. Помяни́, Го́споди, бра́тий на́ших пленéнных и изба́ви я от вся́каго обстоя́ния. Помяни́, Го́споди, плодонося́щих и добродéлающих во святы́х Твои́х цéрквах, и даждь им я́же ко спасéнию прошéния и жизнь вéчную. Помяни́, Го́споди, и нас, смирéнных и грéшных и недосто́йных раб Твои́х, и просвети́ наш ум свéтом ра́зума Твоего́, и наста́ви нас на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Приснодéвы Мари́и, и всех Твои́х святы́х: я́ко благословéн еси́ во вéки веко́в. Ами́нь.

Исповедание грехов повседневное

Испове́даю Тебе́ Го́споду Бо́гу моему́ и Творцу́, во Святе́й Тро́ице Едйному, сла́вимому и покланя́емому, Отцу́, и Сы́ну, и Свято́му Ду́ху, вся моя́ грехи́, я́же содéях во вся дни живота́ моего́, и на вся́кий час, и в настоя́щее врéмя, и в прешéдшия дни и но́щи, дéлом, сло́вом, помышлéнием, объядéнием, пия́нством, тайноядéнием, праздносло́вием, уны́нием, лéностию, прекосло́вием, непослуша́нием, оклевета́нием, осуждéнием, небрежéнием, самолю́бием, многостяжа́нием, хищéнием, неправдоглаго́ланием, скверноприбы́тчеством, мшелои́мством, ревнова́нием, за́вистию, гнéвом, памятозло́бием, нéнавистию, лихои́мством и всéми мои́ми чу́вствы: зрéнием, слу́хом, обоня́нием, вку́сом, осяза́нием и про́чими мои́ми грехи́, душéвными вку́пе и телéсными, и́миже Тебé Бо́га моего́ и Творца́ прогнéвах, и бли́жняго моего́ онепра́вдовах; о сих жалéя, ви́нна себé Тебé Бо́гу моему́ представля́ю, и имéю во́лю ка́ятися: то́чию, Го́споди Бо́же мой, помози́ ми, со слеза́ми смирéнно молю́ Тя: прешéдшая же согрешéния моя́ милосéрдием Твои́м прости́ ми, и разреши́ от всех сих, я́же изглаго́лах пред Тобо́ю, я́ко Благ и Человеколю́бец.

Когда отходишь ко сну, произноси:

В ру́це Твои́, Го́споди Иису́се Христé, Бо́же мой, предаю́ дух мой: Ты же мя благослови́, Ты мя поми́луй и живо́т вéчный да́руй ми. Ами́нь.

Канон покаянный ко Господу нашему Иисусу Христу

Канон, глас 6-й

Песнь 1

Я́ко по су́ху пешешéствовав Изра́иль, по бéздне стопа́ми, гони́теля фарао́на ви́дя потопля́ема, Бо́гу побéдную песнь пои́м, вопия́ше.

Поми́луй мя, Бо́же, поми́луй мя.

Нынt е приступихt аз грешt ный и обремененt ный к Тебé, Влады́це и Бо́гу моему́; не смéю же взира́ти на нéбо, то́кмо молю́ся, глаго́ля: даждь ми, Го́споди, ум, да пла́чуся дел мои́х го́рько.

Поми́луй мя, Бо́же, поми́луй мя.

О го́ре мне грéшному! Па́че всех человéк окая́нен есмь, покая́ния несть во мне; даждь ми, Го́споди, слéзы, да пла́чуся дел мои́х го́рько.

Сла́ва: Безу́мне, окая́нне человéче, в лéности врéмя губи́ши; помы́сли житиé Твоé, и обрати́ся ко Го́споду Бо́гу, и пла́чися о дéлех твои́х го́рько.

И ны́не: Ма́ти Бо́жия Пречи́стая, воззри́ на мя грéшнаго, и от сéти диа́воли изба́ви мя, и на путь покая́ния наста́ви мя, да пла́чуся дел мои́х го́рько.

Песнь 3

Несть свят, я́коже Ты, Го́споди Бо́же мой, вознесы́й рог вéрных Твои́х, Бла́же, и утверди́вый нас на ка́мени исповéдания Твоего́.

Поми́луй мя, Бо́же, поми́луй мя.

Внегда́ поста́влени бу́дут престо́ли на Суди́щи Стра́шнем, тогда́ всех человéк дела́ облича́тся, го́ре та́мо бу́дет грéшным, в му́ку отсыла́емым; и то вéдущи, душé моя́, пока́йся от злых дел твои́х.

Поми́луй мя, Бо́же, поми́луй мя.

Пра́ведницы возра́дуются, а грéшнии воспла́чутся, тогда́ никто́же возмо́жет помощи́ нам, но дела́ на́ша осу́дят нас; тéмже прéжде конца́ пока́йся от злых дел твои́х.

Сла́ва: Увы́ мне великогрéшному, и́же дéлы и мы́сльми оскверни́вся, ни ка́пли слез имéю от жестосéрдия; ны́не возни́кни от земли́, душé моя́, и пока́йся от злых дел твои́х.

И ны́не: Се, взыва́ет, Госпожé, Сын Твой, и поуча́ет нас на до́брое, аз же грéшный добра́ всегда́ бéгаю; но Ты, Ми́лостивая, поми́луй мя, да пока́юся от злых мои́х дел.

Седален, глас 6-й

Помышля́ю день стра́шный и пла́чуся дея́ний моих лука́вых: ка́ко отвеща́ю Безсмéртному Царю́, или́ ко́им дерзновéнием воззрю́ на Судию́, блу́дный аз? Благоутро́бный О́тче, Сы́не Единоро́дный и Ду́ше Святы́й, поми́луй мя.

Сла́ва, и ны́не: Богоро́дичен: Свя́зан мно́гими ны́не плени́цами грехо́в и содержи́мь лю́тыми страстьми́ и беда́ми, к Тебé прибега́ю, моему́ спасéнию, и вопию́: помози́ ми, Дéво, Ма́ти Бо́жия.

Песнь 4

Христо́с моя́ си́ла, Бог и Госпо́дь, честна́я Цéрковь боголéпно поéт, взыва́ющи от смы́сла чи́ста, о Го́споде пра́зднующи.

Поми́луй мя, Бо́же, поми́луй мя.

Широ́к путь зде и уго́дный сла́сти твори́ти, но го́рько будет в послéдний день, егда́ душа́ от тéла разлуча́тися бу́дет: блюди́ся от сих, человéче, Ца́рствия ра́ди Бо́жия.

Поми́луй мя, Бо́же, поми́луй мя.

Почто́ убо́гаго оби́диши, мзду наéмничу удéржуеши, бра́та Твоего́ не лю́биши, блуд и го́рдость го́ниши? Оста́ви у́бо сия́, душé моя́, и пока́йся Ца́рствия ра́ди Бо́жия.

Сла́ва: О безу́мный человéче, доко́ле углеба́еши, я́ко пчела́, собира́ющи бога́тство Твоé?

Вско́ре бо погибнет, я́ко прах и пéпел: но бо́лее взыщи́ Ца́рствия Бо́жия.

И ны́не: Госпожé Богоро́дице, поми́луй мя грéшнаго, и в добродéтели укрепи́, и соблюди́ мя, да на́глая смерть не похи́тит мя негото́ваго, и доведи́ мя, Дéво, Ца́рствия Бо́жия.

Песнь 5

Бо́жиим свéтом Твои́м, Бла́же, у́тренюющих Ти ду́ши любо́вию озари́, молю́ся, Тя вéдети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Поми́луй мя, Бо́же, поми́луй мя.

Воспомяни́, окая́нный человéче, ка́ко лжам, клевета́м, разбо́ю, нéмощем, лю́тым зверéм, грехо́в ра́ди порабощéн еси́; душé моя́ грéшная, того́ ли восхотéла еси́?

Поми́луй мя, Бо́же, поми́луй мя.

Трепéщут ми у́ди, всеми бо сотвори́х вину́: очи́ма взира́яй, уши́ма слы́шай, язы́ком зла́я глаго́ляй, всего́ себé геéнне предая́й; душé моя́ грéшная, сего́ ли восхотéла еси́?

Сла́ва: Блудника́ и разбо́йника ка́ющася прия́л еси́, Спа́се, аз же еди́н лéностию грехо́вною отягчи́хся и злым дело́м порабо́тихся; душé моя́ грéшная, сего́ ли восхотéла еси?

И ны́не: Ди́вная и ско́рая помо́щнице всем человéком, Ма́ти Бо́жия, помози́ мне недосто́йному, душа́ бо моя́ грéшная того́ восхотé.

Песнь 6

Житéйское мо́ре, воздвиза́емое зря напа́стей бу́рею, к ти́хому приста́нищу Твоему́ притéк, вопию́ Ти: возведи́ от тли живо́т мой, Многоми́лостиве.

Поми́луй мя, Бо́же, поми́луй мя.

Житиé на земли́ блу́дно пожи́х и ду́шу во тьму преда́х, ны́не у́бо молю́ Тя, Ми́лостивый Влады́ко: свободи́ мя от рабо́ты сея́ вра́жия, и даждь ми ра́зум твори́ти во́лю Твою́.

Поми́луй мя, Бо́же, поми́луй мя.

Кто твори́т такова́я, я́коже аз? Я́коже бо свиния́ лежит в калу́, та́ко и аз греху́ служу́. Но Ты, Го́споди, исто́ргни мя от гну́са сего и даждь ми сéрдце твори́ти за́поведи Твоя́.

Сла́ва: Воспряни́, окая́нный человéче, к Бо́гу, воспомяну́в своя согрешéния, припа́дая ко Творцу́, слезя́ и стеня́; Той же, я́ко милосéрд, даст ти ум зна́ти во́лю Свою́.

И ны́не: Богоро́дице Дéво, от ви́димаго и неви́димаго зла сохрани́ мя, Пречи́стая, и приими́ моли́твы моя́, и донеси́ я Сы́ну Твоéму́, да даст ми ум твори́ти во́лю Его́.

Кондак

Душé моя́, почто́ греха́ми богатéеши, почто́ во́лю диа́волю твори́ши, в чесо́м надéжду полага́еши? Преста́ни от сих и обрати́ся к Бо́гу с пла́чем, зову́щи: милосéрде Го́споди, поми́луй мя грéшнаго.

Икос

Помы́сли, душé моя́, го́рький час смéрти и Стра́шный Суд Творца́ Твоего́ и Бо́га: А́нгели бо гро́знии по́ймут тя, душé, и в вéчный огнь введу́т; у́бо прéжде смéрти пока́йся, вопию́щи: Го́споди, поми́луй мя грéшнаго.

Песнь 7

Росода́тельну у́бо пещь содéла А́нгел преподо́бным отроко́м, халдéи же опаля́ющее велéние Божие, мучи́теля увеща вопи́ти: благословéн еси, Бо́же отéц на́ших.

Поми́луй мя, Бо́же, поми́луй мя.

Не надéйся, душé моя́, на тлéнное бога́тство и на непра́ведное собра́ние, вся бо сия́ не вéси кому́ оста́виши, но возопи́й: поми́луй мя, Христé Бо́же, недосто́йнаго.

Поми́луй мя, Бо́же, поми́луй мя.

Не упова́й, душé моя́, на телéсное здра́вие и на скоромимоходя́щую красоту́, ви́диши бо, я́ко си́льнии и млади́и умира́ют, но возопи́й: поми́луй мя, Христé Бо́же, недосто́йнаго.

Сла́ва: Воспомяни́, душé моя́, вéчное житиé, Ца́рство Небéсное, угото́ванное святы́м, и тьму кромéшную и гнев Бо́жий злым, и возопи́й: поми́луй мя, Христé Бо́же, недосто́йнаго.

И ны́не: Припади́, душé моя́, к Бо́жией Ма́тери и помоли́ся Той, есть бо ско́рая помо́щница ка́ющимся, умо́лит Сы́на Христа́ Бо́га, и поми́лует мя недосто́йнаго.

Песнь 8

Из пла́менé преподо́бным ро́су источи́л еси́ и пра́веднаго жéртву водо́ю попали́л еси́, вся бо твори́ши, Христé, то́кмо éже хотéти. Тя превозно́сим во вся вéки.

Поми́луй мя, Бо́же, поми́луй мя.

Ка́ко не и́мам пла́катися, егда́ помышля́ю смерть, ви́дех бо во гро́бе лежа́ща бра́та моего́, безсла́вна и безобра́зна? Что у́бо ча́ю, и на что надéюся? То́кмо даждь ми, Го́споди, прéжде конца́ покая́ние. (Дважды.)

Сла́ва: Вéрую, я́ко прии́деши суди́ти живы́х и мéртвых, и вси во своéм чи́ну ста́нут, ста́рии и млади́и, влады́ки и кня́зи, дéвы и свящéнницы; где обря́щуся аз? Сего́ ра́ди вопию́: даждь ми, Го́споди, прéжде конца́ покая́ние.

И ны́не: Пречи́стая Богоро́дице, приими́ недосто́йную моли́тву мою́, и сохрани́ мя от на́глыя смéрти, и да́руй ми прéжде конца́ покая́ние.

Песнь 9

Бо́га человéком невозмо́жно ви́дети, на Него́же не смéют чи́ни А́нгельстии взира́ти; Тобо́ю же, Всечи́стая, яви́ся человéком Сло́во Воплощéнно. Его́же велича́юще, с Небéсными во́и Тя ублажа́ем.

Поми́луй мя, Бо́же, поми́луй мя.

Ны́не к вам прибега́ю, А́нгели, Арха́нгели и вся Небéсныя си́лы, у Престо́ла Бо́жия стоя́щии, моли́теся ко Творцу́ своему́, да изба́вит ду́шу мою́ от му́ки вéчныя.

Поми́луй мя, Бо́же, поми́луй мя.

Ны́не пла́чуся к вам, святи́и патриа́рси, ца́рие и проро́цы, апо́столи и святи́тели и вси избра́ннии Христо́вы: помози́те ми на судé, да спасéт ду́шу мою́ от си́лы вра́жия.

Сла́ва: Ны́не к вам воздежу́ ру́це, святи́и му́ченицы, пусты́нницы, дéвственницы, пра́ведницы и вси святи́и, моля́щиися ко Го́споду за весь мир, да поми́лует мя в час смéрти моея́.

И ны́не: Ма́ти Бо́жия, помози́ ми, на Тя си́льне надéющемуся, умоли́ Сы́на Своего́, да поста́вит мя недосто́йнаго одесну́ю Себé, егда́ ся́дет судя́й живы́х и мéртвых. Ами́нь.

Молитва

Влады́ко Христé Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебé прегреши́вшему, слéзы умилéния; сраствори́ моему́ тéлу от обоня́ния Животворя́щаго Тéла Твоего́ и наслади́ ду́шу мою́ Твоéю Честно́ю Кро́вию от го́рести, éюже мя сопроти́вник напои́; возвы́си мой ум к Тебé, до́лу пони́кший, и возведи́ от про́пасти поги́бели; я́ко не и́мам покая́ния, не и́мам умилéния, не и́мам слезы́ утéшительныя, возводя́щия ча́да ко своему́ наслéдию. Омрачи́хся умо́м в житéйских страстéх, не могу́ воззрéти к Тебé в болéзни, не могу́ согрéтися слеза́ми, я́же к Тебé любвé. Но, Влады́ко Го́споди Иису́се Христé, сокро́вище благи́х, да́руй мне покая́ние всецéлое и сéрдце люботру́дное во взыска́ние Твоé, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви менé; изы́ди на взыска́ние моé, возведи́ к па́жити Твоéй и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Божéственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.

Канон молебный ко Пресвятой Богородице, поемый во всякой скорби душевной и обстоянии

Творение Феостирикта монаха

Тропарь Богородице, глас 4-й

К Богоро́дице прилéжно ны́не притецéм, грéшнии и смирéннии, и припадéм, в покая́нии зову́ще из глубины́ души́: Влады́чице, помози́, на ны милосéрдовавши, потщи́ся, погиба́ем от мно́жества прегрéшений, не отврати́ Твоя́ рабы́ тщи, Тя бо и еди́ну надéжду и́мамы. (Дважды.)

Сла́ва, и ны́не: Не умолчи́м никогда́, Богоро́дице, си́лы Твоя́ глаго́лати, недосто́йнии: а́ще бо Ты не бы предстоя́ла моля́щи, кто бы нас изба́вил от толи́ких бед; кто же бы сохрани́л до ны́не свобо́дны; не отсту́пим, Влады́чице, от Тебé, Твоя́ бо рабы́ спаса́еши при́сно от вся́ких лю́тых.

Канон, глас 8-й

Песнь 1

Во́ду прошéд я́ко су́шу, и еги́петскаго зла избежа́в, изра́ильтянин вопия́ше: Изба́вителю и Бо́гу на́шему пои́м.

Пресвята́я Богоро́дице, спаси́ нас.

Мно́гими содержи́мь напа́стьми, к Тебé прибега́ю, спасéния иски́й: о Ма́ти Сло́ва и Дéво, от тя́жких и лю́тых мя спаси́.

Пресвята́я Богоро́дице, спаси́ нас.

Страстéй мя смуща́ют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.

Сла́ва: Спа́са ро́ждшую Тя и Бо́га, молю́, Дéво, изба́витися ми лю́тых: к Тебé бо ны́не прибега́я, простира́ю и ду́шу и помышлéние.

И ны́не: Неду́гующа тéлом и душéю, посещéния Бо́жественнаго и промышлéния от Тебé сподо́би, еди́на Богома́ти, я́ко блага́я, Блага́го же Роди́тельница.

Песнь 3

Небéснаго кру́га Верхотво́рче, Го́споди, и Цéркве Зижди́телю, Ты менé утверди́ в любви́ Твоéй, жела́ний кра́ю, вéрных утверждéние, еди́не Человеколю́бче.

Пресвята́я Богоро́дице, спаси́ нас.

Предста́тельство и покро́в жи́зни моея́ полага́ю Тя, Богороди́тельнице Дéво: Ты мя окорми́ ко приста́нищу Твоему́, благи́х вино́вна, вéрных утверждéние, еди́на Всепéтая.

Пресвята́я Богоро́дице, спаси́ нас.

Молю́ Дéво, душéвное смущéние и печа́ли моея́ бу́рю разори́ти: Ты бо, Богоневéстная, нача́льника тишины́ Христа́ родила́ еси́, еди́на Пречи́стая.

Сла́ва: Благодéтеля ро́ждши до́брых вино́внаго, благодея́ния бога́тство всем источи́, вся бо мо́жеши, я́ко си́льнаго в крéпости Христа́ ро́ждши, Богоблажéнная.

И ны́не: Лю́тыми неду́ги и болéзненными страстьми́ истяза́ему, Дéво, Ты ми помози́: исцелéний бо неоску́дное Тя зна́ю сокро́вище, Пренепоро́чная, неиждива́емое.

Спаси́ от бед рабы́ Твоя́, Богоро́дице, я́ко вси по Бо́зе к Тебé прибега́ем, я́ко неруши́мей стенé и предста́тельству.

При́зри благосéрдием, всепéтая Богоро́дице, на моé лю́тое телесé озлоблéние, и исцели́ души́ моея́ болéзнь.

Тропарь, глас 2:

Молéние тéплое и стена́ необори́мая, ми́лости исто́чниче, ми́рови прибéжище, прилéжно вопиéм Ти: Богоро́дице Влады́чице, предвари́, и от бед изба́ви нас, еди́на вско́ре предста́тельствующая.

Песнь 4

Услы́шах, Го́споди, смотрéния Твоего́ та́инство, разумéх дела́ Твоя и просла́вих Твоé Божество́.

Пресвята́я Богоро́дице, спаси́ нас.

Страстéй мои́х смущéние, ко́рмчию ро́ждшая Го́спода, и бу́рю утиши́ мои́х прегрешéний, Богоневéстная.

Пресвята́я Богоро́дице, спаси́ нас.

Милосéрдия Твоего́ бéздну призыва́ющу пода́ждь ми, Я́же Благосéрдаго ро́ждшая и Спа́са всех пою́щих Тя.

Пресвята́я Богоро́дице, спаси́ нас.

Наслажда́ющеся, Пречи́стая, Твои́х дарова́ний, благода́рственное воспева́ем пéние, вéдуще Тя Богома́терь.

Сла́ва: На одрé болéзни моея́ и нéмощи низлежа́щу ми, я́ко благолюби́ва, помози́, Богоро́дице, еди́на Приснодéво.

И ны́не: Надéжду и утверждéние, и спасéния стéну недви́жиму иму́ще Тя, Всепéтая, неудо́бства вся́каго избавля́емся.

Песнь 5

Просвети́ нас повелéнии Твои́ми, Го́споди, и мы́шцею Твоéю высо́кою Твой мир пода́ждь нам, Человеколю́бче.

Пресвята́я Богоро́дице, спаси́ нас.

Испо́лни, Чи́стая, весéлия сéрдце моé, Твою́ нетлéнную даю́щи ра́дость, весéлия ро́ждшая Вино́внаго.

Пресвята́я Богоро́дице, спаси́ нас.

Изба́ви нас от бед, Богоро́дице Чи́стая, вéчное ро́ждши избавлéние, и мир, всяк ум преиму́щий.

Сла́ва: Разреши́ мглу прегрешéний мои́х, Богоневéсто, просвещéнием Твоея́ свéтлости, Свет ро́ждшая Божéственный и превéчный.

И ны́не: Исцели́, Чи́стая, души́ моея́ неможéние, посещéния Твоего́ сподо́бльшая, и здра́вие моли́твами Твои́ми пода́ждь ми.

Песнь 6

Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя́ испо́лнися, и живо́т мой а́ду прибли́жися, и молю́ся я́ко Ио́на: от тли, Бо́же, возведи́ мя.

Пресвята́я Богоро́дице, спаси́ нас.

Смéрти и тли я́ко спасл есть, Сам Ся изда́в смéрти, тлéнием и смéртию моé естество́ я́то бы́вшее, Дéво, моли́ Го́спода и Сы́на Твоего́, враго́в злодéйствия мя изба́вити.

Пресвята́я Богоро́дице, спаси́ нас.

Предста́тельницу Тя живота́ вем и храни́тельницу твéрду, Дéво, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли страстéй мои́х изба́вити мя.

Сла́ва: Я́ко стéну прибéжища стяжа́хом, и душ всесовершéнное спасéние, и простра́нство в ско́рбех, Отрокови́це, и просвещéнием Твои́м при́сно ра́дуемся: о Влады́чице, и ны́не нас от страстéй и бед спаси́.

И ны́не: На одрé ны́не немощству́яй лежу́, и несть исцелéния пло́ти моéй; но, Бо́га и Спа́са ми́ру и Изба́вителя неду́гов ро́ждшая, Тебé молю́ся, Благо́й: от тли неду́г возста́ви мя.

Кондaк, глас 6:

Предста́тельство христиа́н непосты́дное, хода́тайство ко Творцу́ непрело́жное, не прéзри грéшных молéний гла́сы, но предвари́, я́ко Блага́я, на по́мощь нас, вéрно зову́щих Ти; ускори́ на моли́тву, и потщи́ся на умолéние, предста́тельствующи при́сно, Богоро́дице, чту́щих Тя.

Иный кондaк, глас тот же:

Не и́мамы ины́я по́мощи, не и́мамы ины́я надéжды, ра́зве Тебé, Пречи́стая Дéво. Ты нам помози́, на Тебé надéемся, и Тобо́ю хва́лимся, Твои́ бо есмы́ рабы́, да не постыди́мся.

Стихира, глас тот же: Не ввéри мя человéческому предста́тельству, Пресвята́я Влады́чице, но приими́ молéние раба́ Твоего́: скорбь бо обдержи́т мя, терпéти не могу́ дéмонскаго стреля́ния, покро́ва не и́мам, нижé где прибéгну, окая́нный, всегда́ побежда́емь, и утешéния не и́мам, ра́зве Тебé, Влады́чице ми́ра, упова́ние и предста́тельство вéрных, не прéзри молéние мое, полéзно сотвори́.

Песнь 7

От Иудéи дошéдше о́троцы, в Вавило́не иногда́, вéрою Тро́ическою пла́мень пéщный попра́ша, пою́ще: отцéв Бо́же, благословéн еси́.

Пресвята́я Богоро́дице, спаси́ нас.

На́ше спасéние я́коже восхотéл еси́, Спа́се, устро́ити, во утро́бу Дéвыя всели́лся еси́, Ю́же ми́ру предста́тельницу показа́л еси́: отéц на́ших Бо́же, благословéн еси́.

Пресвята́я Богоро́дице, спаси́ нас.

Воли́теля ми́лости, Его́же родила́ еси́, Ма́ти чи́стая, умоли́, изба́витися от прегрешéний и душéвных скверн, вéрою зову́щим: отец на́ших Бо́же, благословéн еси́.

Сла́ва: Сокро́вище спасéния и исто́чник нетлéния, Тя ро́ждшую, и столп утверждéния, и дверь покая́ния, зову́щим показа́л еси́: отéц на́ших Бо́же, благословéн еси́.

И ны́не: Телéсныя сла́бости и душéвныя неду́ги, Богороди́тельнице, любо́вию приступа́ющих к кро́ву Твоему́, Дéво, исцели́ти сподо́би, Спа́са Христа́ нам ро́ждшая.

Песнь 8

Царя́ Небéснаго, Его́же пою́т во́и А́нгельстии, хвали́те и превозноси́те во вся вéки.

Пресвята́я Богоро́дице, спаси́ нас.

По́мощи, я́же от Тебé, трéбующия не прéзри, Дéво, пою́щия и превознося́щия Тя во вéки.

Пресвята́я Богоро́дице, спаси́ нас.

Неможéние души́ моея́ исцеля́еши и телéсныя болéзни, Дéво, да Тя просла́влю, Чи́стая, во вéки.

Сла́ва: Исцелéний бога́тство излива́еши вéрно пою́щим Тя, Дéво, и превознося́щим неизречéнное Твоé рождество́.

И ны́не: Напа́стей Ты прило́ги отгоня́еши и страстéй нахо́ды, Дéво: тéмже Тя поéм во вся вéки.

Песнь 9

Вои́стинну Богоро́дицу Тя исповéдуем, спасéннии Тобо́ю, Дéво чи́стая, с безпло́тными лики́ Тя велича́юще.

Пресвята́я Богоро́дице, спаси́ нас.

То́ка слез моих не отврати́ся, Я́же от вся́каго лица́ вся́ку слéзу отъéмшаго, Дéво, Христа́ ро́ждшая.

Пресвята́я Богоро́дице, спаси́ нас.

Ра́дости моé сéрдце испо́лни, Дéво, Я́же ра́дости приéмшая исполнéние, грехо́вную печа́ль потребля́ющи.

Пресвята́я Богоро́дице, спаси́ нас.

Приста́нище и предста́тельство к Тебé прибега́ющих бу́ди, Дéво, и стена́ неруши́мая, прибéжище же и покро́в и весéлие.

Сла́ва: Свéта Твоéго заря́ми просвети́, Дéво, мрак невéдения отгоня́ющи, благовéрно Богоро́дицу Тя исповéдающих.

И ны́не: На мéсте озлоблéния нéмощи смири́вшагося, Дéво, исцели́, из нездра́вия во здра́вие претворя́ющи.

Стихиры, глас 2-й

Вы́шшую небéс, и чи́стшую свéтлостей со́лнечных, изба́вльшую нас от кля́твы, Влады́чицу ми́ра пéсньми почти́м.

От мно́гих мои́х грехо́в немощству́ет тéло, немощству́ет и душа́ моя́: к Тебé прибега́ю Благода́тней, надéжде ненадéжных, Ты ми помози́.

Влады́чице и Ма́ти Изба́вителя, приими́ молéние недосто́йных раб Твои́х, да хода́тайствуеши к Ро́ждшемуся от Тебé. О Влады́чице ми́ра, бу́ди Хода́таица!

Поéм прилéжно Тебé песнь ны́не всепéтой Богоро́дице ра́достно, со Предтéчею, и всéми святы́ми, моли́ Богоро́дице, éже ущéдрити ны.

Вся А́нгелов во́инства, Предтéче Госпо́день, апо́столов двоенадеся́тице, святи́и вси с Богоро́дицею, сотвори́те моли́тву, во éже спасти́ся нам.

Молитвы ко Пресвятой Богоро́дице

Цари́це моя́ преблага́я, надéждо моя́ Богоро́дице, прия́телище си́рых и стра́нных предста́тельнице, скорбя́щих ра́досте, оби́димых покрови́тельнице! Зри́ши мою́ беду́, зри́ши мою́ скорбь: помози́ ми я́ко нéмощну, окорми́ мя я́ко стра́нна. Оби́ду мою́ вéси, разреши́ ту, я́ко во́лиши: я́ко не и́мам ины́я по́мощи ра́зве Тебé, ни ины́я предста́тельницы, ни благи́я утéшительницы, то́кмо Тебé, о Богома́ти, я́ко да сохрани́ши мя и покры́еши во вéки веко́в. Ами́нь.

К кому́ возопию́, Влады́чице? К кому́ прибéгну в го́рести моéй, а́ще не к Тебé, Цари́це Небéсная?

Кто плач мой и воздыха́ние моé прии́мет, а́ще не Ты, Пренепоро́чная, надéждо христиа́н и прибéжище нам грéшным? Кто па́че Тебé в напа́стех защити́т? Услы́ши у́бо стена́ние моé, и приклони́ у́хо Твоé ко мне, Влады́чице Ма́ти Бо́га моего́, и не прéзри менé, трéбующаго Твоея́ по́мощи, и не отри́ни менé грéшнаго. Вразуми́ и научи́ мя, Цари́це Небéсная; не отступи́ от менé раба́ Твоего́, Влады́чице, за ропта́ние моé, но бу́ди мне Ма́ти и засту́пница. Вруча́ю себé ми́лостивому покро́ву Твоему́: приведи́ мя грéшнаго к ти́хой и безмятéжной жи́зни, да пла́чуся о гресéх мои́х. К кому́ бо прибéгну пови́нный аз, а́ще не к Тебé, упова́нию и прибéжищу грéшных, надéждою на неизречéнную ми́лость Твою́ и щедро́ты Твоя́ окриля́емь? О Влады́чице Цари́це Небéсная! Ты мне упова́ние и прибéжище, покро́в и заступлéние и по́мощь. Цари́це моя́ преблага́я и ско́рая засту́пнице! Покры́й Твои́м хода́тайством моя́ прегрешéния, защити́ менé от враг ви́димых и неви́димых; умягчи́ сердца́ злых человéк, возстаю́щих на мя. О Ма́ти Го́спода моего́ Творца́! Ты еси́ ко́рень дéвства и неувяда́емый цвет чистоты́. О Богороди́тельнице! Ты пода́ждь ми по́мощь немощству́ющему плотски́ми страстьми́ и болéзнующему сéрдцем, еди́но бо Твоé и с Тобо́ю Твоего́ Сы́на и Бо́га на́шего и́мам заступлéние; и Твои́м пречу́дным заступлéнием да изба́влюся от вся́кия беды́ и напа́сти, о Пренепоро́чная и Пресла́вная Бо́жия Ма́ти Ма́рие. Тéмже со упова́нием глаго́лю и вопию́: ра́дуйся, благода́тная, ра́дуйся, обра́дованная, ра́дуйся, преблагословéнная, Госпо́дь с Тобо́ю.