Текст книги "Благослови, душа моя!.. Псалмы русских поэтов"

 
Якоже елень, ловцы утружденный,
Воды желает быти прохлажденный,
Тако аз, Боже, к Тебе воздыхаю,
зрети желаю.
Возжада душа моя ко живому
Богу святому и Богу крепкому,
Когда прииду к Нему и явлюся,
возвеселюся.
Слезы ми вместо хлеба тогда быша,
егда день и нощь врази мя просиша:
«Где Бог твой? Аще тебе не остави,
Того нам яви».
Сия помянух, таже веселихся,
Яко в дом Божий итти известихся,
До крова дивна, в гласе светла лика
шума велика.
О душе моя! Вскую ты скорбиши,
Мя смущаеши? На Бога да зриши,
Того исповем, Он ми Бог спаситель
и покровитель.
Во мне смятеся зело душа моя,
И воспомянух аз щедроты Твоя.
Яже Ты явил нам при Иордане,
в Ермонстей стране,
При горе мале. А скорбь скорбь глашает,
Что бездна бездну хлябий ся решает;
Волны Божия по мне преидоша,
всего сотроша.
Но уже чаю день тот приходити,
В онже ми хощет Бог милость явити;
Аз же и в нощи песнь воспою Ему,
Богу моему.
Молюся Богу живота моего,
Ты мой заступник, – аз реку до Него, –
Почто мя забы? Дух мой унывает,
враг ми стужает!
Внегда вся кости ми сокрушаху,
Тогда ми врази мои поношаху:
Где Бог твой? Рцы нам выну стужающе,
посмех деюще.
Но ты, о душе, вскую скорбна еси?
Уповай в Бозе, сущем на небеси,
Еще аз Ему имам воспевати,
за Бога знати.
 

 
Бог нам сила прибежище,
от волн скорбей пристанище.
Аще земля вся смутится,
наше сердце не боится.
Аще горы преложатся,
в сердце морско вовалятся,
душа наша не смутится,
в Бозе силном утвердится.
Воды быша возмущенны,
горы Богом потрясенны,
яже облак достизаху,
неподвижны от век бяху.
Град Господень веселится,
егда река близ точится,
и в нем Вышний освятил есть
селение, в нем же жил есть.
В среде града Бог витает,
тем недвижим той бывает,
утро тщится в помощь ему,
яко дому Бог своему.
Язык роди ся смятоша,
и царствия упадоша,
егда Вышний глас свой даше,
люте земля трепеташе.
Нас Господь сил заступает,
Иаковля чада знает.
Семо, роди, приидите,
Бога чюдна дела зрите,
Яже в мире сотворил есть,
брань на земли утолил есть.
Лук сокрушит, меч сломити,
имат, огнем щит спалити.
Приидите, разсмотряйте,
яко Аз Бог, познавайте:
во языцех вознесуся
и на земли прославлюся.
Господи сил с нами буди,
храни от бед своя люди,
Бог Иаковль защититель,
наш, в печалех утешитель.
 

 
Сион славный, на горах святых основанный,
любит Бог врата Его, град он преизбранный,
Паче всех Иаковлих селений преславных,
честных во мире бывших, в вецех онех давных.
Преславная о Тебе древле глаголанна,
граде Божий, и в книгах пророки преданна.
Помяну, глаголет Бог, Раав, Вавилона,
знающие мя, тии внидут до Сиона.
Се иноплеменницы и Тира граждане
тамо быша, с ними же и Ефиопляне.
Всякий человек речет: Сион ми есть мати,
он человеки Богу весть в себе раждати.
Вышний его основа, Господь известити
имать во книгах, людей и князей явити.
Сих бывших в нем, яко всех есть жилище в Тебе,
веселящихся светло, яко в мысленном небе.
 

 
Песни новы составляйте,
Господеви воспевайте,
вси на земли живущии
и в небесех вси сущии.
Имя Его прославляйте,
спасение возвращайте
во день всякий и чудеса
возносите под небеса.
Славу в людех возносите,
во языцех возвестите,
яко велий есть и хвален,
Господь в делех Своих славен.
Страшен есть над всеми боги,
яже мир сей имать многи.
Иже беси суть не бози,
во языцех зело мнози.
Господь же наш си руками
созда небо со звездами.
Красота честь пред ним яве,
дом Его леп, свят и в славе.
Принесите, вси языцы,
честь и славу всех Владыце:
имя Его прославляйте,
жертвы во честь приношайте.
В дворы Его приходите,
честь и поклон вси творите.
В дворе святом почитайте
Бога, Ему ся кланяйте.
Земля пред Ним да движится,
всяк, кто на ней, да страшится.
Вы в языцех возвестите,
яко Господь Царь есть рцыте;
Ибо весь мир Он уставил,
да не движим есть, уставил.
Судит людем правотою,
явит правду оным Свою.
Небо, светло веселися;
земле, в радость облецыся;
море да ся подвизает
и все, что в нем обитает.
Поля красна да смеются
и вся, яже в них пасутся;
древа вся да ликуют
и дубравы торжествуют.
Яко грядет Бог судити,
правду в мире сотворити,
истину си показати,
люди право управляти.
 

 
Восхвалите Господа, яко благ вовеки,
яко милость есть Его на вся человеки.
Да речет дом Иаковль: яко благ вовеки,
яко милость Его есть на вся человеки.
Да речет дом Ааронь: яко благ вовеки,
яко милость Его есть на вся человеки.
Всяк бояйся Бога рцы: яко благ вовеки,
яко милость Его есть на вся человеки.
От скорби призвах Бога, Он глас мой внушил есть,
обладание мое пространно явил есть.
Господь ми помощник есть, и не убоюся,
что ми смертный сотворит, никако страшуся.
Господь Бог ми помощник: презрю враги моя,
укрепит мя десница, Господи мой, Твоя.
Благо есть на Господа Бога уповати,
неже в людех надежду свою полагати.
Благо есть на Господа Бога уповати,
неже в князех надежду свою полагати.
Вси мя языцы окрест люте обступиша,
но именем Господним посрамлени быша.
Обшедше, обыдоша мене, но о Бозе
противляхся им: они в студе быша мнозе.
Яко пчелы сот, они мене обыдоша,
и яко огнь в тернии в сердцах ся разжгоша.
Аз именем Господним оным противляхся,
егда склонихся пасти, Богом восприяхся.
Господь Бог крепость моя бысть мне и пение,
Он во моей немощи бысть ми в спасение.
В селех праведних да есть благодарение
в гласе радования за то спасение.
Десница Бога жива силу сотворила,
рука Его десная мене возвышшила.
Не умру, но жив буду и имам вщати
дела Господня, яже изволил являти.
Казня мя, наказал есть, смерти же не дал есть:
яко дух мой надежду нань си возлагал есть
Отверзите мне врата правды, дабы внити
в ня и славу Господню свято возвестити.
Сия врата Господня, праведницы ими
внидут и жити имут вечно со святыми.
Исповемтися, Боже, яко внушил еси
и бысть ми во спасение Царствуяй в небеси.
Камень, иже зиждущым неключим явися,
той сам во главу углу благо приключися.
От Господа бысть сие, нашим же бывает
то предивно очесем, что Бог сотворяет.
Сей день, его же Господь изволи создати,
радость и веселие тщимся в онь стяжати.
О Господи! спаси же, Сам да поспешиши,
церковь избранных Твоих Сам да умножиши.
Благословен во имя Господне грядущий,
благословение нам Господне несущий.
Мы из дому Господня вас благословихом,
Бог Господь, явися нам, яве вам вместихом.
В учащающих праздник Богу составляйте,
даже до рог олтарниих церковь исполняйте.
Боже, Ты Бог мой еси, имам Тя хвалити:
Боже, Ты Бог мой еси, буду Тя славити.
Исповемтися, яко услышал мя еси,
и бысть ми в спасение Царствуяй в небеси.
Вси даждьте славу Богу, яко благ во веки,
яко милость Его есть на вся человеки.
 

 
Возведох очи моя к Тебе,
Боже, живущий в светлом небе.
Се, яко очи раб смотряют
в руку господей, пищи чают;
И яко раба весть вращати
очи к госпоже, дабы взяти
нуждная себе: тако к Богу
зрим, да обрящем милость многу.
Помилуй, Боже, Твоя люди,
помилуй, молим, щедр нам буди.
Во ничто есмы мы вмененни,
уничижений исполненни.
Найпаче, душа поношений
полна есть наша и презрений
от человеков гобзующих,
сердцы своими гордых сущих.
 

 
Аще не бы был Господь с нами, да вещают,
иже ся Израиля чада нарицают.
Аще не бы был в нас Бог, внегда всташа на ны
живы убо пожерл бы ны народ поганый.
Егда в ярости гнева на ны наступиша
скорби ны, яко вода, потопили быша.
Воду непостоянну прейде душа моя,
яко воды потока, беды ны объяша.
Благословен Бог, иже не изволил дати,
зубом их нас, яко лов, гладным растерзати.
Душа наша, якоже птица, избавися
от сети, мы свободни, а сеть сокрушися.
Помощь наша во имя Господа Святаго,
небо, землю и яже суть в них создавшаго.
 

 
Егда от Вавилона
плен бывший из Сиона
изволил Бог вратити,
в радости дал нам быти.
Уста песнь воспеваху,
языцы то ж деяху,
Вси рекут во языцех:
Бог велик в человецех.
Сих явлен: чудна дела
на земли в них содела;
велику вещь в нас яви,
в радости нас постави.
Господи, пленение
возврати в селение
Сиона, яко токи,
вод сладких в юг жестокий.
Да иже в слезах сеют,
в радости жати спеют:
ходяще бо хождаху
и слезы изливаху.
Семена метающе,
идяху рыдающе:
в радости да вратятся
снопы си да тешатся.
 

 
Да речет днесь Израиль: многажды со мною
от юности моея врази работою
Деяша борьбу, много от детства мя браша,
обаче надо мною победы не взяша.
На хребте моем они и язвы и бремя
тяжкое полагаху, злобне долго время.
Господь же праведнейший сосекл грешных выя,
за беззаконие их погубил есть злыя.
Ненавидцы Сиона вси да постыдятся,
со студом нестерпимым вспять да возвратятся.
Да будут, яко трава на здех растущая,
прежде восторжения своего сохнущая.
Ею же жнущий руки си не исполняет
и лона рукояти, иже собирает.
О ней же мимо ходя никто глаголаше
жнущим: благословенно да есть дело ваше.
О имени Господни вам благословляем,
обилия во плодех труд ваших желаем.
 

 
Из глубины из сердца возвах, Боже, к Тебе,
услыши глас мой, иже царствуеши в небе,
Да будут уши Твои ко мне приклоненны,
глас молитвы моея да будет внушенны.
Аще беззакония, Господи, назриши,
никто от нас постоит, яко сам то зриши,
Яко очищение у Тебе самаго,
пречиста и пресвята, суща единаго.
Ради имене свята Твоего, мой Боже,
терпе Тя душа моя и не изможе.
Терпех слова Твоего, дух мой уповаше
на Господа, иже ми еже быти даше.
От стражи утренния до темныя нощи
да чает от Господа Израиль помощи,
Ибо Господь людем си милость изливает,
избавление много от Него бывает.
А Господь Израиля имать избавити
от беззаконий его и щедр ему быти.
 

 
Господи, сердце мое
не бяше высокое,
ни очи вознесенни
бяху ми, но смиренни.
Не тщахся велик быти
и дивен ся явити;
аще же не смиряхся
духом, но возношахся,
Да буду отдоенну,
подобен, ослезенну,
еже плачь изливает,
к матери возглядает;
На мне месть сия буди.
Божии в Бозе люди
выну да уповают,
дондеже пребывают.
 

 
Хвали, душе моя, Бога твари всея,
до конца и жизни восхвалю моея.
Песнь Богу моему имам воспевати,
дондеже в существе даст ми пребывати.
Надежды во князех вси не полагайте,
в сынех человечих вы не уповайте.
Яко спасение в них не обитает;
изшедшу бо духу, плоть ся в прах вращает:
А помышления тогда исчезают,
ибо умышленных дел не содевают.
Блажен человек есть, ему же от Бога
Иаковля помощь, и надежда многа
На Господа жива, иже сотворил есть
небо, землю, море и вся исполнил есть:
На Господа, во век истину храняща
и суд обидимым людем си творяща,
Алчущым доволство пищи дающаго,
окованныя же люди решащаго.
Господь умудряет во людех слепыя,
возводит падшия, любит праведныя,
Господь хранит странных, сира же и вдову
восприяти имать десницу готову.
Путь человек грешных имать погубити,
Сам же имать вечно Царь превелий быти,
Бог твой, о Сионе, от рода и в роды,
Един Царь и Господь небесны породы.
 

 
Хвалите Бога в святых рабех Его
и в тверди небес, созданней от Него.
Хвалите Его в силах божественных
и величиих Его множественных.
Во гласе трубнем онаго хвалите,
в псалтире, в гуслех честь Ему творите.
Хвалите Его в лицех и тимпане,
хвалите Его в струнах и органе.
В доброгласных и кимвалех хвалите,
восклицания в кимвалех славите.
Всяк дух да хвалит все создавша Бога,
везде и всегда, слава Ему многа.
 

<1680>

Архимандрит Герман (1640-е – 1682)

* * *

 
Господи, воззвах к Тебе, услыши мя,
егда воззову к Тебе, сам призри мя.
Руку моею милостивно приими,
молебные воздеяния воньми.
Аще бо не Ты мене услышиши,
на моления моя Сам призриши,
Мне несть к тому прибежища инаго,
о Тебе бо сокрушаю врага злаго,
Накажи мя, Праведный, сам в милости,
ангельский и всех царю, во благости,
Христе, туне мук вечных возроди мя,
Моление мое да исправится,
от Тебе в кадило да ухается,
Любовию яко жертву всеприятну,
яви милость яко и заизрядну.
Спасителя нигде же обретаю,
яко Тя единого Бога знаю.
Прегрешеньми бо аще и связахся,
ибо веры никогда отлучахся.
Со гневом бо аще назриши наш грех,
абие мал обрящется во всех сих.
Христе, воскресением обнови мя.
 

Феофан Прокопович (1681–1736)

 
Всяк себе в помощь Вышняго предавый
живет под кровом Божией державы.
Той везде радость обретаяй многу
веселым гласом возопиет к Богу:
Ты мой заступник, Ты мой и щит твердый,
в Тебе надежда, Ты Бог милосердый!
О, блажен еси, в Бозе уповая,
Он бо от тебе отвратит вся злая,
Измет от сети ловец злонадежных
и предочистит от словес мятежных.
Он своих рамен и своих крыл щитом
тебе покрыет пред всяким наветом.
Истина Его, аки страж оружный,
тебе отвсюду оградит в час нужный.
Не страшен тебе нощный вран и стрелы,
ими же сеет злый случай в день белый;
Ни бледый призрак, в тьме людей страшащий,
ниже бес черный, в полудни ходящий.
И будет егда от обоей страны
тысяща и тьмы упадет на брани,
Но к тебе в той час и время то злое
не приближится бедство ни малое.
А над врагами узриши твоими
достойную казнь, сам сый невредимый.
Богу бо себе вручая Твоему,
имаши Бога в крепость незыблему.
Не прийдет к тебе зло люто до зела,
рана твоего не угрызнет тела.
Велит бо Своим слугам велелепным
стрещи тя везде оком неусыпным.
На руках возьмут и на всяком пути
не дадут тебе ног твоих преткнути.
Стренет иногда аспид, зверь нелепый,
или василиск, или лев свирепый,
На тых безвредно будеши ступати
и по змиевых хребтах шествовати.
Слыши Самого неложное слово,
тебе ко всякой помощи готово:
«В Моей он силе надежду имеет,
и сила Моя оного покрыет.
Познай Мя, Бога, Аз готов внимати,
егда Мя будешь на помощь взывати.
С ним есмь во скорби и подам избаву
и еще к тому неложную славу,
И дам век ему долгий и пространный
и введу его в живот обещанный».
 

 
Кто крепок на Бога уповая,
той недвижим смотрит на вся злая;
Ему ни в народе мятеж бедный,
ни страшен мучитель зверовидный,
Не страшен из облак гром парящий,
ниже ветр, от южных стран шумящий,
Когда он, смертного страха полный,
финнобалтицкие движет волны.
Аще мир сокрушен распадется,
сей муж ниже тогда содрогнется;
В прах тело разбиет падеж лютый,
а духа не может и двигнути.
 
 
О Боже, крепкая наша сило,
Твое единого сие дело,
Без Тебе и туне мы ужасны,
при Тебе и самый страх нестрашный.
 

 
Кто любит Бога, не ревнуй лукавым,
Ниже завиди грешникам неправым,
Ибо исчезнут, яко трава, вскоре,
Яже зелена при утренней зоре
И цвет ей красен, скрепленный росою,
Потом увянет, посечен косою.
А ты как начал, так твори благое,
Да на сей земли время немалое
Даст ти в богатстве Бог земном пожити
И чад любимых на ней населити.
Та твоя сладость и утеха многа
Буди, всем сердцем уповай на Бога,
Ему все нужды объяви смиренно,
И, как сын отца, проси умиленно.
Он, чего просишь зде, услышит горе
И твои нужды, щедр, исполнит вскоре,
И добродетель, юже творишь втайне,
И правду явит, да узрится крайне.
Так яко вещи, ко зрению трудны,
Всяк видит ясно при светлом полудни.
Паки глаголю: не ревнуй лукаву,
Хотя и спеет от славы во славу,
И аще бы был и всегда счастливый,
Ты о том желчен не будь и гневливый;
Да не погрешишь, худо рассуждая,
Что благим токмо случаются злая.
Се бо Судии вышнего гнев правый
Разорит вскоре всяк совет лукавый,
И скоро – где был, грешника нечиста
Будешь искати, да не сыщешь места.
А тихий духом и муж терпеливый
Наследит землю в покое счастливый.
Правда есть, грешный его презирати
Будет и зубом нань злым скрежетати;
Но и Бог ему посмеется выну,
Понеже видит злу его кончину;
Будет и меч свой грешный изостряти
И лук стрелами тугий натягати,
Дабы бедного убить непорочно,
Но та вся работа будет безпрочна,
Понеже сердце меч пронзит самого
И лук, сокрушен, не успеет много.
Лучше праведну имение мало,
Еже праведно тщание собрало,
Нежели многи корысти излишны,
Их же зле собрал с обидою грешный;
Ибо сим будет скорая премена,
И не дождутся ни внука, ни сына;
А имение праведных малое
Укрепит Господь и умножит втрое,
Дабы от сынов до внуков сторично
Их преходило в наследие вечно.
Когда грешницы погибнут от глада,
Сих и в зло время сыты будут чада.
Враг Божий только подымется в гору,
Как дым и пара исчезнет в ту ж пору;
А пока живет, хотя и богатый,
То непрестанно будет занимати;
Супротив того, праведник и нищий
Будет и ближним уделяти пищи;
Кто его, злобный, будет проклинати,
Тот и сам будет от Бога проклятый.
Стопы праведных Господь управляет
И все промыслы и пути их знает.
Не будут, хотя падут, поврежденны,
От силы вышней всегда укрепленны,
Даже по старость не видех из млада
Любящих Бога, умерших от глада,
Не видех, дабы оных дети милы,
Просяще хлеба, по миру бродили.
Всех без коварства любит и попросту
И дает взаймы потребным без росту,
Не щадит скудным и последней лепты,
Аки вдовицы с Сидонской Сарепты;
Не оскудеет, пока жити станет,
А после его и внукам останет.
Того ради перестань, иже творишь злое,
И начни за то творити благое,
Да будешь богатств праведных причастен
И на сей земли в век глубокий счастен.
Видишь, Господни како судьбы правы,
Как никогда же любящих остави,
А нечестивых потребляет имя,
Дабы злых плевел не остало семя.
У добрых людей премудрое слово
В устах на правду всякую готово,
И закон Божий, в сердце изваянный,
Как ноги правит дела их избранны;
Сопротив того, клеветник лукавый,
Таковой правых ненавидя славы,
Будет лживые соплетати сети,
Как бы невинных злобно умертвити;
Но сих десница сохранит державна,
Да объявится лжа на суде явна.
Дай только сроку, буди терпеливый,
Ты на сей земле так будешь счастливый,
Что твое славно еще узрит око,
Как казнит злобных гнев Божий жестоко.
Я не одного видел истукана
Гордого, яко кедр с горы Ливана,
И только прошел (сие правда иста),
Искал, где он был, и не сыскал места.
То лучше быть в жизни незлобиву
И просту иметь душу, а не криву.
Когда таковых по старость из млада
Бог хранит мирных, яко отец чада, –
Егда лукавы всегдашней боязни,
Ей же трепещут, не убегнут казни;
И то не диво, что Бог заступает
Праведных в скорби и им помогает,
Что Его к простым щедрота излишна,
Что их спасает от обиды грешна,
Ибо всем сердцем те нань уповают
И, кроме Его, иного не знают.
 

1730?

 
Аще из земли престанут реки
Истекати
И начнут моря брег свой великий
Преступати,
А падше небо землю покриет
Всю звездами,
Воздух, в огнь пришед, воссвирепеет
Молниями –
То ниже тогда благость Вышняго
Многомощна
Предаст праведна в руки грешнаго
Беспомощна,
Ни душ избранных Всеблагой Отец
В злой печали
Оставит, дабы, лишенны, в конец
Погибали.
А моя едва не поползнулась
Нога слизка,
Егда Божьей мерить коснулась
Судьбы сблизка
И плохим умом Промысл безмерный
Рассуждати,
Коим раздает Творец всемирный
Благодати.
Гневом завистным сердце кипело
От ревности,
Егда сим внешним оком смотрело
Полных злости
И потопленных во водах темных
Злобы зельны, –
Как процветают, сих благих земных
Изобильны;
Как с добрым счастье непостоянно
И неверно –
Сим служит всегда, яко связанно,
Весьма смирно,
Слепа фортуна ведет их, здравых,
Як стоока,
В старость глубоку по путех правых
Без порока.
Егда праведным сердце снедают
Злы болезни –
Сии в радости век провождают
И дни жизни;
Чуждая печаль, беды, напасти
И кручина
Им веселия и новой сласти
Суть причина.
Уж лишних богатств дом их пространный
Не вмещает –
Счастия своего ни дух высокий
Обымает;
Роскошь надежду их и охоту
Утрудила,
Но не чрез сию самых щедроту
Насытила;
В таковом счастии полны гордости
И надменны,
Самолюбием жестоким в злости
Ослепленны,
Свиньею смотрят на люди равны,
Как скотины,
И давят бедных, сильно злонравны,
Без причины;
Стращать грозными меньших словами
Не довольны,
Что ядом уст их и клеветами
Земли полны, –
Уже коснулась языка злого
Злоба многа
Небес и смеет и на самого
Лгати Бога;
Сие егда зрит праведник в мире,
Озлобленный,
Не дивно, что весь шатнется в вере,
Изумленный,
И речет в себе: «Есть ли Бог? или
Сущ, не видит,
Иль громовые потерял стрелы
И, тощ, сидит,
Когда грешный в сем и в том свете
Изобильный.
Не есть праведен в своем совете
Бог всесильный!
Всуе живется в краткой сей жизни
Беспорочно,
И с кротостью терпеть болезни
Есть непрочно».
Но егда ум свой обратит паки
На советы,
Бога боится чрез сии знаки
Погрешити,
Да не сих вменит як овец стада
Заколенна,
Их же Он своя нарече чада
Возлюбленна;
В том сумнительстве праведный Давид
Весь смущенный,
Егда трудился, да вины узрит
Утаенны.
Скрытых советов исследить дела
Не возможе,
Пока обратил ум свой в светила
Твоя, Боже!
И тамо узрел конец сих, славных
В счастья цвете,
Коя премена ждет их, злонравных,
На сем свете.
И се ты, Боже, сих гордых рога
Сокрушаешь,
Их славу и честь смирным под ноги
Повергаешь,
А прелести их платишь, прав, грозно,
И в сей жизни
И в оном веце ощутят поздно
Злы болезни,
Кроме совести, яже их мучит
Всегда тайно,
Паче тиранов лютых, и скучит
Чрезвычайно.
Гнев Твой праведный гонит их везде
Непрестанно,
Пока с богатством исчезнут отзде
Окаянно,
Яко сон, иже мечтами спящих
Устрашает,
А потом, вмале оставя бдящих,
Исчезает.
Дондеже и аз сия постигох,
Как скотина
Бых неразумен, знати не могох,
Кая вина
Зельного счастья грешных, от Тебе
Отверженных.
И уж едва не почтох себе
Меж прельщенных.
Но Твоей руки тайная сила
Мя держала,
Промыслов Твоих скрытые дела
Мне являла.
Се ныне познах, что ничто слава
Небес вышних
Без Тебе, ничто земли держава
Есть у грешных.
Все мое тело, в злых изможденно,
Унывает,
К Тебе в сердце, в злых утружденно,
Воздыхает.
Ты моя буди един довольна
Часть, о Боже!
Без Тебе небо и земля полна
Мне ничто же,
Когда безбожных, иже Тя, Отца
Всех, не знают,
И лживых богов за Тебе, Творца,
Почитают,
Как либо в свете сем суть счастливы,
Погубиши
И в конец чрез гнев зело страшный
Потребиши, –
Буду за сладость тогда едину
Почитати,
Тебе любити и на Тя выну
Уповати,
И прославляти Твой совет скрытый,
Весьма правый,
И Твои хвалы в жизни сей пети,
Боже славы!
Ты Бог, и мирне иже не дремлешь,
Как Вил глухий,
Егда грешников вскоре отъемлешь
Злобных духи
И хранишь Твоих сынов избранных
В злой печали,
Дабы Тя, Творца всех сих дел странных,
Прославляли.
 

1730?