Читать книгу "ODOBLI BOLA"

Ochil Tohir
Rostgo‘y bola

ODOBLI BOLA

 
Bobojonim, bobojon,
Sizni yaxshi ko‘raman.
Oldingizda doim men
Odob saqlab turaman.
 
 
Chaqirsangiz, labbay deb,
Qarshingizga yelaman.
Shirin konfetlar berib,
Erkalaysiz, bilaman.
 
 
Buyursangiz biron ish,
Men yalqovlik qilmayman.
Og‘rir boshim yoki tish,
Deb bahona qilmayman.
 

OYPOSHSHA

 
– Oyi,– dedi Oyposhsha,
Ushladim, mana, pashsha,
Shundan fil yasab bering,
Qilay men bir tomosha.
 
 
– Sendan aylanay o‘zim,
Bu mumkin emas, qizim,
Buni eplolmas odam,
Bu – onalik chin so‘zim.
 
 
– Xo‘sh, unda nega har dam,
Tushunmayman sira ham,
Pashshadan fil yasaydi,
Deydilar sizni dadam.
 

ARAZCHI QIZ

 
Buvijonim har doim
Boqib menga muloyim,
Ohista sochim silab,
Derlar meni erkalab:
 
 
– Sen asal-novvot, qizim,
Ko‘nglimga quvvat qizim.
Osmondagi yulduzim,
Oppoq, yorug‘ kunduzim.
 
 
Bog‘imda gul-g‘unchamsan,
Mening shirmoy kulchamsan.
Rostmi, deb buvim so‘zi,
Oldimga qo‘yib ko‘zgu.
 
 
Uzoq boqib turdim men,
U yoq, bu yoq yurdim men.
Undan uzmay ko‘zimni,
Kuzatdim men o‘zimni.
 
 
Buvim sanab, birma-bir
Aytganin topmay axir,
O‘pkalab men oynadan,
Chiqib ketdim xonadan.
 

BILAG‘ON DAVRON

 
Qafasdagi maymunga
Yaqinroq borib Davron,
Tikilib turar unga,
Bo‘lganicha lol-hayron.
 
 
Der: Boshdan-oyoq o‘zin
Bo‘yabdi qizil rangga.
Zo‘rg‘a ilg‘aysiz ko‘zin,
G‘alati-ya, qarang-a…
 
 
Oyisi deydi mayin:
– Boshqa maymun do‘stini
Qo‘rqitay, deb atayin
Bo‘yagan-da o‘zini.
 
 
O‘yga cho‘mdi Davronjon,
Der: Tushundim so‘zingiz,
Qo‘rqitay deb dadamni
Bo‘yarkansiz yuzingiz.
 

SUHBAT

 
– Bolam, gaplarimga quloq os,
Odobsizlik qilmasang buncha.
Astagina menga aytsang bas,
Tiling bor-ku!
Qo‘ling cho‘zguncha.
 
 
– Oyi, aslo emasman tixir,
Uzatishga majburman qo‘lim.
Vazadagi mevaga axir,
Nima qilay, yetmasa tilim?
 

BAYRAM QO‘SHIG‘I

 
Yoshlik – bu misli bahor,
Atrofda gul, ranggo-rang.
Quvonchdan dillar yayrar,
Jo‘r bo‘lib qo‘shiq, ohang.
 
 
Bu davradan zavq olib,
Qalblar toshar sururdan.
Do‘stlik doimo g‘olib,
Ko‘ksimiz to‘lar g‘ururdan.
 

MASALGA NAZIRA

 
Baroqvoy bolasiga
Qilarkan pand-nasihat.
It degan balosidan
Uzoq yurgin, der faqat.
 
 
Uning bizlardan boshqa
Qiladigan ishi yo‘q.
Doim balodir boshga,
Hayt, deydigan kishi yo‘q.
 
 
Rostini aytsam, bolam,
It emas, xira pashsha.
Itlar qavmi shu mudom,
Ishi «quv-qoch» hamisha.
 
 
To‘g‘risi, aynir ko‘nglim,
Gar eshitsam otini.
Uzun bo‘lsaydi qo‘lim,
Quritardim zotini.
 

TULKINING SO‘ZI

 
Nomimdir ayyor tulki,
Mug‘ombirligim shulki,
Asrash uchun jonimni,
To‘q tutmayman qornimni.
Bilaman, hayvon borki,
Bir-biridan ko‘p farqi.
Biri ojiz, biri zo‘r,
Biri to‘q, biri bazo‘r
Kun ko‘rar, bunga sabab –
Yurmas holiga qarab.
Ko‘rsa shudgorda quyruq,
Nafs berar unga buyruq.
Deyman, bo‘l o‘zdan hazir,
Ammo gap qilmas ta’sir.
 

 
O‘rmon, to‘qay sultoni
Sherning uzundir qo‘li,
Aytsam gapning dangalin,
Bo‘lolmas ammo tulki.
Yo‘lda ko‘p tuzoq-qopqon
Tushgaydir nafsi o‘pqon.
 

 
Mana olaylik, bo‘ri,
O‘lja deb qurir sho‘ri.
Ortiga qaytmas chunki,
Tingla, xoh qo‘ling silki,
Bo‘lmasang gar ehtiyot,
Silliq emasdir hayot.
Ahil bizning qavmimiz,
Juda nozik ta’bimiz.
Qilmaymiz o‘zni ko‘z-ko‘z,
Hamda ortiqcha gap-so‘z.
Hayvonning har xil turqi,
O‘ziga xosdir xulqi.
Mendan olmayin ulgi,
Bo‘lishar mudom kulgi.
Yerga urib nomimni,
Bulg‘amang siz shonimni.
Chiranmasin hayvonlar,
Aslo tulki bo‘lolmaslar.
 

* * *

 
Qirqta hiylam bo‘lsa ham,
Kelavermas doim qo‘l.
Dushmanga ko‘rinmaslik –
Yashash uchun qulay yo‘l.
 

OSHQOVOQ

 
Oshqovoqjon, oshqovoq,
Demasman hech «bo‘sh qovoq».
Palaging tez o‘ssa ham,
Sen emassan beboshvoq.
 
 
Poliz ekini aro,
Qishda o‘zingsan sara.
Sen – vitamin, darmonsan,
Yemaganga armonsan.
 

 
Bizga shifokor opa:
– Yurakka eng zo‘r davo,
Mag‘zi bo‘lgaydir shifo.
Urug‘i ham bebaho,
 
 
O‘tkir qilar ko‘zingni,
Tetik qilar o‘zingni.
Bo‘lsin bu sizga saboq,
Ko‘p yeng, deydi oshqovoq.
 
 
Shu bois bizlar har yil
Tomorqaga muttasil,
Qilmayin qosh-u qovoq,
Ko‘p ekamiz oshqovoq.
 

HUNAR – ZAR

 
– Hunar bu – zar, tugamas hech ham,
Bolam, rizqing bo‘ladi butun.
Egallagin kasb-hunar sen ham,
Bobojonim uqtirar har kun.
 
 
Mana, dadang yaxshi duradgor.
Yasar o‘zi eshik va romni.
Shunday hunar o‘rgansang agar,
Qurarding eng chiroyli tomni.
 
 
So‘zlarimni tingla, quloq sol,
Bilgin shuni, yalqovlik yomon.
Kasb-hunarni egalla darhol,
Qadrlidir hunarli inson.
 

QADRDON MAKTAB

 
«O‘qing, o‘qing, olingiz ta’lim,
Siznikidir kelajak, iqbol».
Jon kuydirar bizga muallim,
Mushtoq, deya yorug‘ istiqbol.
 
 
Qalbda tuydim sinoat sehrin,
Kelajakka chorlar bir ovoz.
Qanot bo‘lib ustozlar mehri,
Orzularim qilmoqda parvoz.
 
 
Umid bilan yo‘lga chiqdim men,
Sadoqatdir ko‘nglimning rozi.
Ahdim qat’iy, shimarganman yeng,
Qilmoq uchun Vatanni rozi.
 
 
Xayr maktab, ta’lim dargohi,
Ham ertangi kunga Assalom.
Yoritadi ilm charog‘i
Hayotimni, qalbimni mudom.
 
 
Qayda bo‘lmay, qay bir go‘shada,
Shuurimda sen bergan saboq.
Shoshqaloq vaqt, yillar o‘tsa-da,
Yo‘l ko‘rsatar sen yoqqan mayoq.
 

QUTLUG‘ DARGOH

«Gulxan» jurnalining 90 yilligiga

 
Varaqlayman, qo‘limda «Gulxan»,
Bolalikdan mayog‘im – o‘zing.
Mehring tuyib har lahza, har on,
O‘sdim tinglab men dono so‘zing.
 
 
To‘qson yoshli bola jurnalim,
Sen doimo navqiron, yoshsan.
Doim bizga berursan ta’lim,
Mangu so‘nmas porloq quyoshsan.
 
 
G‘ofur*, Oybek* va Mirtemirning*
Sahifangda izlari bordir.
Daholarning sanay qay birin,
Zulfiya*ning so‘zlari bordir.
 
 
Erkin Vohid*, Abdulla Orif*,
Xudoyberdi* va Nosir* bobo
Maktabingda bo‘ldilar orif,
Sen chorlaysan kel deb, marhabo.
 
 
Saida*-yu Shukur Xolmirzo*,
Madad b

...

конец ознакомительного фрагмента