Текст книги "Акафистник православной матери"

Икона Пресвятой Богородицы «Помощница в родах»

Акафист Пресвятой Богородице в честь иконы Ее, именуемой «Помощница в родах»

Кондак 1

Избранней от всех родов Предстательнице рода христианскаго, благодарственная пения приносим Ти, Богородице, о даровании чудныя иконы Твоея. Ты же, яко скорая и всемилостивая верных Заступница, не остави нас в скорбех, да зовем Ти:

Радуйся, Благодатная Помощнице в родах, на помощь к нам ускоряющая.

Икос 1

Ангел предстатель послан бысть рещи Богородице: «Радуйся!», егда Бог Слово воплощашеся во утробе Ея; и мы, грешнии, дивящеся явлению чудныя Ея иконы, с верою и надеждою вопием:

Радуйся, Дево, христиан похвало;

радуйся, яко Тя блажат вси роди.

Радуйся, скорби земныя со смирением претерпевшая;

радуйся, материнскую любовь нам являющая.

Радуйся, болезни рождения в радость претворяющая;

радуйся, Твоею любовию нас на Небеса возводящая.

Радуйся, чудным рождением Твоим праведных родителей Своих возвеселившая;

радуйся, сим весь мир радости исполнившая.

Радуйся, Благодатная Помощнице в родах, на помощь к нам ускоряющая.

Кондак 2

Видящи, Всенепорочная, во славе Сына Своего пребывающая, яко скорби и уныния в сердцах людей умножишася, благоволила еси явити икону Твою, чудесы ю прославляющи, да покрываеми Твоею любовию, с надеждою вопием Богу: Аллилуия.

Икос 2

Жизнодателя рождшая, Пресвятая Богородице, благодатное попечение о женах, родити имущих, прияла еси, да познаем, что есть воля Божия о нас благая и совершенная. Мы же, дивящеся свыше данному нам благодатному укреплению, со слезами радости вопием Ти:

Радуйся, вразумлением Твоим от грехов нас отвращающая;

радуйся, славою чудес Твоих верных разум озаряющая.

Радуйся, сердца наша любовию Твоею умягчающая;

радуйся, молитвами Твоими милосердие Сына Твоего к нам приклоняющая.

Радуйся, скорби наша утоляющая;

радуйся, жен христианских в родах не оставляющая.

Радуйся, и в духовнем рождении всех благословляющая;

радуйся, светом Сына Твоего всех просвещающая.

Радуйся, Благодатная Помощнице в родах, на помощь к нам ускоряющая.

Кондак 3

Силу сугубыя благодати явила еси, Владычице, чудотворному образу Твоему «Помощница в родах» именуемому, да вси, чада родити имущии, под осенение Твоея иконы с молитвою прибегают, Богу же вопиют: Аллилуия.

Икос 3

Имуще Тя, Заступнице усердная рода христианскаго, яко Матерь о чадех Своих пекущуюся, с верою и любовию к Тебе притекаем и молитвы наша пред иконою Твоею возносяще, вопием Ти сице:

Радуйся, явлением образа Твоего мглу лютых обстояний отгоняющая;

радуйся, православныя люди иконою Твоею утешающая.

Радуйся, болезни родити имущих облегчающая;

радуйся, любовь Твою всегда нам источающая.

Радуйся, в скорбех нас не оставляющая;

радуйся, любящим Сына Твоего молитвенное попечение дарующая.

Радуйся, на путь спасения наставляющая;

радуйся, злыя страсти наша укрощающая.

Радуйся, Благодатная Помощнице в родах, на помощь к нам ускоряющая.

Кондак 4

Бури житейския избегающе, в тихое пристанище под осенение Твоея иконы вернии притекают, наипаче же жены, родити чада имущия, мольбы своя пред тою возносят, Богу же, вся во благо устрояющему, зовут: Аллилуия.

Икос 4

Слышавше православнии людие о чудесех, от иконы Твоея «Помощница в родах» бываемых, возрадовашася зело, и всю надежду на Тя возлагающе, вопияху таковая:

Радуйся, семейства благочестивая благословляющая;

радуйся, миром и любовию сия ограждающая.

Радуйся, чад наших назирающая;

радуйся, благодатным Твоим покровом младенцев осеняющая.

Радуйся, юность нашу светом истины просвещающая;

радуйся, ум наш в горняя возносящая.

Радуйся, целомудрия Наставнице;

радуйся, чистоты Хранительнице.

Радуйся, Благодатная Помощнице в родах, на помощь к нам ускоряющая.

Кондак 5

Боготечная звезда явися икона Твоя, Богомати Пречистая, сущих в болезнех и скорбех радостию осиявающи, заблуждающих же на путь делания заповедей Сына Твоего и Бога наставляющи, Емуже благодарне вопием: Аллилуия.

Икос 5

Видевше токи чудес, от святыя иконы Твоея «Помощница в родах» источаемыя, вси вернии людие стекахуся к ней на поклонение. Ты же, Мати Божия, всем дары милости Твоея неоскудно подаеши от чудотворнаго Твоего образа, подвизающи вопити Тебе сице:

Радуйся, Мати милосердия и щедрот;

радуйся, Безплотнаго воплотившая.

Радуйся, Бога с человеки соединившая;

радуйся, верных Господеви сочетавшая.

Радуйся, несумненною надеждою сердца наша исполняющая;

радуйся, хладность душевную благодатию согревающая.

Радуйся, добродетелей стяжание;

радуйся, Божие к немощным благоволение.

Радуйся, Благодатная Помощнице в родах, на помощь к нам ускоряющая.

Кондак 6

Проповедающе чудеса Твоя, Богородительнице, от иконы Твоея «Помощница в родах» бываемая, молим Тя, Пречистая: избави вся жены, чревоносящия чада своя, от тяжкаго рождения, подвизающи их же и нас воспевати Богу: Аллилуия.

Икос 6

Возсия, Пречистая Богородице, чудная икона Твоя «Помощница в родах» родителем на утешение и всем нам на помощь и спасение. Сего ради, взирающе на ню, мольбы своя Тебе приносим, благодарно зовуще:

Радуйся, от внезапныя смерти всех избавляющая;

радуйся, мрачных духов далече от нас отгоняющая.

Радуйся, отступления наша любовию Твоею покрывающая;

радуйся, к долготерпению в скорбех и недузех нас призывающая.

Радуйся, истинно молитися нас научающая;

радуйся, вся благая прошения наша исполняющая.

Радуйся, благодарственныя дары не отвергающая;

радуйся, сердца благочестивых людей возвеселяющая.

Радуйся, Благодатная Помощнице в родах, на помощь к нам ускоряющая.

Кондак 7

Хотяй всем человеком спастися, Премилосердный Господь усынови нас Матери Своей: да будет печальным утешительницею, болящим целительницею, заблуждшим наставницею, да всех из глубины греховныя изведет, вопиющих: Аллилуия.

Икос 7

Дивна показал еси дела Твоя в Пречистей Матери Твоей, Господи, и дивну даровал еси нам Ея икону, да вси взирающии на сию, песненно превозносят Честнейшую Херувим и Славнейшую Серафим пении сими:

Радуйся, неприступнаго Божества селение;

радуйся, ангельское непрестанное удивление.

Радуйся, Божия милости и любве исполнение;

радуйся, Подательнице спасительнаго в родах вспоможения.

Радуйся, правды святыя Попечительнице;

радуйся, наша пред Сыном Твоим Споручнице.

Радуйся, неизменная наша Надеждо;

радуйся, тихое и доброе пристанище.

Радуйся, Благодатная Помощнице в родах, на помощь к нам ускоряющая.

Кондак 8

Странно и сумнительно неверующим слышати, како образ Твой святый, Богомати Пречистая, токи благодати источает. Мы же, о всех благодеяниих Твоих, от иконы Твоея бываемых, добре ведуще, благодарно вопием Богу: Аллилуия.

Икос 8

Все упование свое жены, родити чада имущия, на Тя, Владычице, возлагают. Приклонися убо к немощем человеческим – кто бо нас от рова погибели изведет, аще не Ты, о Богомати? Сего ради пред Твоим пречистым образом вопием Ти тако:

Радуйся, отчаянных надеждо;

радуйся, скорбящих утешение.

Радуйся, обуреваемых пристанище;

радуйся, болящих исцеление.

Радуйся, немощных подкрепление;

радуйся, унывающих ободрение.

Радуйся, вдов заступление;

радуйся, сирых призрение.

Радуйся, Благодатная Помощнице в родах, на помощь к нам ускоряющая.

Кондак 9

Всякаго естества ангельскаго превысшая явилася еси, Пресвятая Дево: Бога бо зачала еси плотию, Невместимаго всеми вместила еси во утробе Твоей; темже, яко Матерь Божию величающе Тя, вопием о Тебе Создателю нашему: Аллилуия.

Икос 9

Ветии человечестии недоумеют восхвалити по достоянию славное, Владычице, иконы Твоея явление, ниже мы, грешнии, от скверных устен наших возможем принести достойное похваление Тебе, Заступнице нашей. Обаче, неисчетная чудеса, иконою Твоею являемая, видевше, радующеся вопием Ти:

Радуйся, благочестия Наставнице;

радуйся, в добрых делех Помощнице.

Радуйся, добрыя обеты приемлющая;

радуйся, благим намерениям способствующая.

Радуйся, злая начинания разрушающая;

радуйся, вражия козни расторгающая.

Радуйся, всему благому вход отверзающая;

радуйся, чадородие благословляющая.

Радуйся, Благодатная Помощнице в родах, на помощь к нам ускоряющая.

Кондак 10

Спасти хотящи многия жены, чада раждающия, от обдержащих их болезней и напастей, чудную икону Твою, Богомати, даровала еси, еяже ради козни диавольския разрушаются, смертоносныя болезни отступают, недузи ослабевают, да вси, видяще являемую Тобою милость, вопиют со умилением Богу: Аллилуия.

Икос 10

Стена еси и прибежище, Богомати, людем страждущим и всем усердно к Тебе прибегающим. Сего ради от лет древних вси скорбящии и обремененнии, всю надежду на Тя возлагающе, к помощи Твоей притекают, пред честною иконою вопиюще Тебе сице:

Радуйся, прославляющих Тя от бед избавляющая;

радуйся, не чтущих Тя посрамляющая.

Радуйся, чудесы Твоими всех просвещающая;

радуйся, моления наша во благо исполняющая.

Радуйся, яко невидимых врагов от нас отгоняеши;

радуйся, яко от видимых врагов нас избавляеши.

Радуйся, ищущих Твоего предстательства спасающая;

радуйся, матери и чада сугубою любовию Твоею покрывающая.

Радуйся, Благодатная Помощнице в родах, на помощь к нам ускоряющая.

Кондак 11

Пение всеумиленное приими от нас, Небесная Царице, и молитву, приносимую Тебе, услыши: к Тебе бо в напастех и скорбех прибегаем и пред Тобою в бедах наших слезы проливаем и молим: помози нам, и приими сию жертву Твоих рабов, зовущих: Аллилуия.

Икос 11

Светоприемная свеща истиннаго Света сущим нам на земли явльшися, Богородительнице, души просвещаеши чтущих Твоея иконы явление, в вере наставляеши, и младенцев во утробах матерей охраняеши, и молишися о всех поющих Ти сицевая:

Радуйся, ненадеющихся несумненною надеждою возвеселяющая;

радуйся, свеще, у престола Божия присно горящая.

Радуйся, лампадо, елеем Божественным светящая;

радуйся, вход в Царство Небесное нам, грешным, отверзающая.

Радуйся, свете лучезарный, пути жизни нам указующий;

радуйся, храме одушевленный, всех нас освящающий.

Радуйся, любовию Твоею всех объемлющая;

радуйся, покровом Твоим всех покрывающая.

Радуйся, Благодатная Помощнице в родах, на помощь к нам ускоряющая.

Кондак 12

Благодать Божия, присущая святей иконе Твоей, «Помощница в родах» именуемой, Богомати Владычице, влечет к ней всех, помощи Твоея просящих, и не тщи отходят они от сего источника многообразных Твоих милостей и щедрот, но вся душам и телесем благопотребная неоскудно получают, аще по Бозе все упование на Тя возложат, поюще: Аллилуия.

Икос 12

Поюще Твоя чудеса, бывшая в древняя и настоящая времена, хвалим Тя, Богородице, яко твердую Предстательницу нашу: веруем бо, яко испросиши у Сына Твоего благая вечная и временная всем с любовию вопиющим Тебе сице:

Радуйся, скорбящих Радосте;

радуйся, погибших Взыскание.

Радуйся, Всеблагая Скоропослушнице;

радуйся, грешных Споручнице.

Радуйся, Неопалимая Купино;

радуйся, Нерушимая Стено.

Радуйся, Живоносный Источниче;

радуйся, Цвете Неувядаемый.

Радуйся, Благодатная Помощнице в родах, на помощь к нам ускоряющая.

Кондак 13

О Всепетая Мати, Помощнице в родах, рождшая всех святых Святейшее Слово! Нынешнее наше приемши приношение, от всякия избави напасти всех, и будущия изми муки о Тебе вопиющих: Аллилуия.

Этот кондак читается трижды, и снова 1-й икос и 1-й кондак:

Икос 1

Ангел предстатель послан бысть рещи Богородице: «Радуйся!», егда Бог Слово воплощашеся во утробе Ея; и мы, грешнии, дивящеся явлению чудныя Ея иконы, с верою и надеждою вопием:

Радуйся, Дево, христиан похвало;

радуйся, яко Тя блажат вси роди.

Радуйся, скорби земныя со смирением претерпевшая;

радуйся, материнскую любовь нам являющая.

Радуйся, болезни рождения в радость претворяющая;

радуйся, Твоею любовию нас на Небеса возводящая.

Радуйся, чудным рождением Твоим праведных родителей Своих возвеселившая;

радуйся, сим весь мир радости исполнившая.

Радуйся, Благодатная Помощнице в родах, на помощь к нам ускоряющая.

Кондак 1

Избранней от всех родов Предстательнице рода христианскаго, благодарственная пения приносим Ти, Богородице, о даровании чудныя иконы Твоея. Ты же, яко скорая и всемилостивая верных Заступница, не остави нас в скорбех, да зовем Ти:

Радуйся, Благодатная Помощнице в родах, на помощь к нам ускоряющая.

Молитва

Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе во чреве носящую Сына Твоего и Бога нашего, Господа Иисуса Христа: аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему, и умиленно сей лобызающе, молим Тя, Всемилостивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их, от тяжкаго недуга и горькия скорби избави. Даруй им здравие и благопомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих. Услыши нас в день скорби, пред иконою Твоею припадающих, и в день радости и избавления приими благодарная хваления сердец наших. Вознеси мольбы наша ко Престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша, прославим Тя, милосердную Заступницу и верную Надежду рода нашего, во веки веков. Аминь.

Текст акафиста приводится по следующему изданию: Акафист Пресвятой Богородице в честь иконы Ея «Помощница в родах». – Херсон, 2011. – По благословению архиепископа Херсонского и Таврического Иоанна. Акафист на момент издания не имеет общецерковного утверждения.

Икона Пресвятой Богородицы «Помощница в родах»

Икона Пресвятой Богородицы «Млекопитательница»

Акафист Пресвятой Богородице в честь иконы Ее, именуемой «Млекопитательница»

Кондак 1

Избранней от дщерей человеческих Материю быти Христа Бога нашего принесем от любве нашея песни хвалебныя; Ты же, Сына Божия неизреченно родившая и яко Младенца млеком питавшая, сохрани нас, поющих Тя, от обышедших нас зол, скорбей и напастей, да зовем Ти немолчно:

Радуйся, Богородице Дево Млекопитательнице, милостию Твоею нас присно питающая.

Икос 1

Ангелов лицы в вертеп приникнувше и узревше тамо Деву чистую, Сына млеком питающую, возопиша Тебе, Благословенней:

Радуйся, рождшая мира Творца;

радуйся, питающая Питателя вселенныя.

Радуйся, пеленами повивающая Повивающаго небо облаки;

радуйся, дланьми носящая на Херувимех носимаго.

Радуйся, яко Детищ мал Тобою родися;

радуйся, яко Младенец плачущ и мирови радость даяй Тобою в мир прииде.

Радуйся, Богородице Дево, Млекопитательнице, милостию Твоею нас присно питающая.

Кондак 2

Видящи Святая Дева при персех Своих Богомладенца лежаща, глагола Ему: како возмогу Тя питати, Творца Моего, Ему же вся воинства небесная вопиют: Аллилуия.

Икос 2

Разумная вся тварь недоразумевает, како и Дева пребываеши, и Младенца млеком питаеши. Обаче, неизреченному таинству сему верующе, благоговейно взываем:

Радуйся, Дево неблазная;

радуйся, Девице прекрасная.

Радуйся, жен украшение;

радуйся, Мати чистая.

Радуйся, дев правило;

радуйся, Благословенная в женах.

Радуйся, Богородице Дево, Млекопитательнице, милостию Твоею нас присно питающая.

Кондак 3

Сила Вышняго осени Тя, Богородице Дево, и подаде Ти крепость повити и питати, Егоже вси концы земли величают и поют Ему песнь великую: Аллилуия.

Икос 3

Имущи дерзновение велие к Рожденному от Тебе, призри на скорби и беды, нас обышедшия, умоли Питаемаго Тобою за ны грешныя и недостойныя, да избавльшеся от лютых напастей, возглаголем Ти тако:

Радуйся, рождшая сладчайшее Утешение наше;

радуйся, произрастившая Благословеннаго благодатию.

Радуйся, Мати наша всеблагая;

радуйся, чадами Твоими нас нарекшая.

Радуйся, благонадежное наше прибежище;

радуйся верных небурное пристанище.

Радуйся, Богородице Дево, Млекопитательнице, милостию Твоею нас присно питающая.

Кондак 4

Буря скорбей и напастей обдержит ны, трепещем, да не потонем в мори житейстем, но явися нам, яко голубица Ноева, ветвь надежды подающи нам, вопиющим Богу: Аллилуия.

Икос 4

Слышащи жена благоразумная глаголы живота вечнаго, Сыном Твоим вещаемыя, прослави Тя, вопиющи Ему: «Благословенно чрево, носившее Тя, и сосца, питавшая Тя»; темже приими и наша немощныя похвалы сицевыя:

Радуйся, бисере драгий, всечудная Мати;

радуйся, велия в женах.

Радуйся, ветвь присноцветущая;

радуйся, животе, приемляй Сокровище освящения.

Радуйся, чаше златая, Христа, небесную Манну, носящая;

радуйся, Хлебом Жизни нас возраждающая.

Радуйся, Богородице Дево, Млекопитательнице, милостию Твоею нас присно питающая.

Кондак 5

Богоносныя руце Твоя, Всепетая, простри к нам немощным, воздвигни нас унылых, спаси отчаянных, да в радости душевной, ничимже смущаемой, вопием Сыну Твоему: Аллилуия.

Икос 5

Виде Тя в Дусе богоглаголивый Исаия, яко имаши, Дева сущи, во чреве прияти Рожденнаго из Тебе, возгласи Ти:

Радуйся, Предвечнаго рождшая;

радуйся, яко Тобою с нами Бог бывает.

Радуйся, пророчеств сбытие;

радуйся, пророков веселие.

Радуйся, всего мира чаяние;

радуйся, рода нашего утешение.

Радуйся, Богородице Дево, Млекопитательнице, милостию Твоею нас присно питающая.

Кондак 6

Проповедницы присноглаголемии Твоего милосердия суть чудеса многообразная, источаемая от иконы Твоея святыя, яже обильно нам даровала еси, да покланяющеся Тебе и Богомладенцу Христу, вопием гласы хвалебными: Аллилуия.

Икос 6

Возсия во обители Саввы Освященнаго, яко солнце светозарное, всечестная икона Твоя, Млекопитательница именуемая, пред неюже преподобный со иноки выну прославляху Тя, вопиюще:

Радуйся, обители нашея пречудное украшение;

радуйся, от врагов видимых и невидимых твердое заступление и защищение.

Радуйся, молениям нашим присно внемлющая;

радуйся, прошения наша благоутробно приемлющая.

Радуйся, горестная воздыхания наша утишающая;

радуйся, слезы наша отирающая.

Радуйся, Богородице Дево, Млекопитательнице, милостию Твоею нас присно питающая.

Кондак 7

Хотя преподобный Савва отыти в жизнь вечную, пророчески рече, яко по мнозех днех приидет во обитель сию царев сын, ему тезоименитый, сей приимет святую икону Владычицы во благословение и воспоет радуяся: Аллилуия.

Икос 7

Новый угодник Савва, святитель Сербския земли, прииде во обитель древнюю, и прият по словеси преподобнаго святую икону, и принесе ю на гору Афонскую во обитель Хиландарскую, вси же насельницы ея радостно взываху ко Владычице мира:

Радуйся, присно о нас грешных промышляющая;

радуйся, николиже нас убогих забывающая.

Радуйся, милость Твою тысящекратно во святых чудотворных иконах Твоих обновляющая;

радуйся, новая знамения щедрот Твоих ныне изливающая.

Радуйся, любящих и чтущих Тя зело возлюбившая;

радуйся, молящих Ти ся николиже посрамляющая.

Радуйся, Богородице Дево, Млекопитательнице, милостию Твоею нас присно питающая.

Кондак 8

Странное чудо и недоразумеваемое есть неверным и суемудренным, како от иконы Твоея чудеса истекают; мы же, многократными милостьми в сем утвержденнии, пети Господу Богу, даровавшему таковую Помощницу роду христианскому, дерзаем: Аллилуия.

Икос 8

Весь мир видимый и невидимый блажит Тя, Богородице Дево, яко усердную Заступницу нашу, присно помогающую нам, в море бед и скорбей погибающим, да Тебе, единей нашей надежде, вопием:

Радуйся, Сына Твоего за нас грешных умоляющая;

радуйся, в бедах и обстояниих скоро помогающая.

Радуйся, молений наших скорое услышание;

радуйся, горестей жития нашего верное услаждение.

Радуйся, веру нашу укрепляющая;

радуйся, крест жизни нашея понести нам помогающая.

Радуйся, Богородице Дево, Млекопитательнице, милостию Твоею нас присно питающая.

Кондак 9

Всяко ублажая Тя, Всеблагая, Иоанн Дамаскин рече, яко удобее молчание, неже пети Тя, но любовию понуждаемии, восхваляем Тя и поем Сыну Твоему песнь великую: Аллилуия.

Икос 9

Витийствовати не хощем, но с любовию и слезами притекаем к Тебе, яко Матери чадолюбивой, и из глубины сердца вопием:

Радуйся, Радосте наша неизреченная;

радуйся, Утешение наше несказанное.

Радуйся, домов наших ограждение;

радуйся, чад наших покрове.

Радуйся, младенцев воспитание;

радуйся, юных от путей гибельных охранение.

Радуйся, Богородице Дево, Млекопитательнице, милостию Твоею нас присно питающая.