Текст книги "Молитвы к 125 угодникам Божиим"

Елисавета, великая княгиня, преподобномученица
(1918; 5/18 июля; в воскресенье после 25 января новомуч.)

Преподобно мученице великой княгине Елисавете молятся о помощи в делах милосердия.

Молитва

О, святыя новомученицы Российския, великая княгине Елисавето и сестро ея крестовая, пречестная инокине Варваро, купно путь свой во мнозех муках скончавшия, евангельския заповеди делом во обители милосердия совершившия, веры ради православный подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко Победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем Христу, распинающе плоть свою со страстьми и похотьми. Сохраните нас от всякого зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.

Тропарь, глас 1

Смирением достоинство княжеское сокрывши, богомудрая Елисавето, сугубым служением Марфы и Марии Христа почтила еси. Милосердием, терпением и любовию себе пред очистивши, яко жертва праведная Богу принеслася еси. Мы же, чтуще добродетельное житие и страдания твоя, яко истинную наставницу усердно просим тя: святая мученице великая княгине Елисавето, моли Христа Бога спасти и просветити души наша.

Кондак, глас 2

Величие подвига веры кто повесть? Во глубине земли, яко в рай светлости, страстотерпица великая княгиня Елисавета со Ангелы во псалмех и пениих радовашеся и, убиение претерпевающи, о безбожных мучителех взываше: Господи, прости им грех сей, не ведят бо, что творят. Тоя молитвами, Христе Боже, помилуй и спаси души наша.

Величание

Величаем тя, страстотерпице святая великая княгине Елисавето, и чтим святую память твою, ты бо молиши за нас Христа Бога нашего.

Екатерина, великомученица
(305–313; 24 ноября/ 7 декабря)

Великомученице Екатерине молятся при трудных родах, о хороших женихах, о просвещении разума к изучению духовной грамоты, во время грома или града.

Молитва

О, святая великомученице Екатерино, избранный чистоты сосуде, столпе православия, надежная предстательнице наша, явившая нам саму вину умолити тя, подвижнице законная, святая на святей горе свято почивающая! Молим тя: приникши

свыше, вонми гласу моления нашего, призри на бедствие рабов твоих, просвети омрачение ума нашего, сотвори нас горняя мудрствовати, а не земная. Поспеши нам молитвами твоими, побеждати плотская похотения, пристрастия к миру и козни злых духов, на нас злобно воюющих: да твоим предстательством во дни жития сего свободни будем от враждебных их истязаний. О, премудрая дево! Даруй нам вся, яже к пользе прошения: можеши бо многая испросити у возлюбленнаго Жениха, Христа Бога нашего. Мы вемы, яко много может молитва праведнаго, поспешествуемая благоутробием Милосердаго Бога, Емуже слава, честь и благодарение, всегда, ныне и присно и во веки веков. Аминь.

Тропарь, глас 4

Добродетельми, яко лучами солнечными, просветила еси неверныя мудрецы: и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино: желанием востекла еси в Небесный чертог, к прекрасному Жениху Христу, и от Него царским венцем венчалася еси: Емуже со Ангелы предстоящи, за ны молися, творящия пречестную память твою.

Кондак, глас 2

Лик честный божественне, мучениколюбцы, воздвигните ныне, почитающе всемудрую Екатерину, сия бо в тризнищи Христа проповеда и змия попра, риторов разумом укротивши.

Величание

Величаем тя, страстотерпице Христова Екатерино, и чтим честное страдание твое, еже за Христа претерпела еси.

Елена, равноапостольная, царица
(327; 21 мая/3 июня; 6/19 марта)

На Руси равноапостольных царей Константина и его мать Елену почитают как покровителей льноводства. Благоверной царице Елене молятся о покровительстве посевам и о плодородии.

Молитва

О, предивнии и всехвальнии царие, святии равноапостольнии Константине и Елено! К вам, теплым заступником, возносим наши недостойныя молитвы, яко велие имате дерзновение ко Господу. Испросите у Него мир Церкви и всему миру благоденствие, начальником мудрость, пастырем попечение о пастве, пасомым смирение, старцем желанное упокоение, мужем крепость, женам благолепие, девственником чистоту, детем послушание, младенцем христианское воспитание, больным исцеление, враждующим примирение, обидимым терпение, обидящим страх Божий. Приходящим в храм сей и молящимся в нем святое благословение и всем вся по коегождо прошению полезная, да хвалим и поем Благодетеля всех Бога в Троице славимаго Отца и Сына и Святаго Духа, ныне и присно и во веки веков. Аминь.

Тропарь, глас 8

Креста Твоего образ на Небеси видев, и якоже Павел звание не от человек прием, во царех апостол Твой, Господи, царствующий град в руце Твоей положи: егоже спасай всегда в мире, молитвами Богородицы, Едине Человеколюбие.

Кондак, глас 3

Константин днесь, с материю Еленою, Крест являют всечестное древо, всех убо иудеов посрамление суще, оружие же на противныя верных царей: нас бо ради явися знамение велие и во бранех грозное.

Величание

Величаем вас, святии благоверный и равноапостольнии царие Константине и Елено, и чтим святую память вашу, вы бо святым Крестом всю вселенную просветили есте.

Ермоген, патриарх Московский и всея Руси, чудотворец, священномученик
(1612; 12/25 мая; 17 февраля/2 марта; 5/18 октября)

Священно мученику Ермогену, патриарху Московскому и всея Руси, молятся об избавлении от нашествия иноплеменных.

Молитва

О, великий угодниче Христов, святителю, отче наш Ермогене! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще. В древнюю годину искушений, всегда обышедше обыдоша страну нашу нечестивии врази, Господь яви тя Церкви Своей столпа непоколебима и людем российским пастыря добра, душу свою за овцы положивша и лютыя волки далече отгнавша. Ныне убо призри и на ны, недостойная чада твоя, умиленною душею и сокрушенным сердцем тебе призывающия. Крепость бо наша в нас оскуде, и вражия ловления и сети обыдоша нас. Помози нам, заступниче наш! Утверди нас в вере святей: научи нас всегда творити заповеди Божия и вся предания церковныя, от отец наших заповеданная. Пастырем нашим буди архипастырь, воином – вождь духовный, болящим – врач, печальным – утешитель, гонимым – заступник, юным – наставник, всем же благосердный отец и за вся теплый молитвенник: яко да молитвами твоими ограждаемы, непрестанно воспоем и прославим всесвятое имя Живоначальныя Троицы, Отца и Сына и Святаго Духа во веки веков. Аминь.

Тропарь на прославление, глас 4

Приспе день светлаго торжества, град Москва радуется, и с ним Русь Православная, ликовствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас, яко предстатель наш, великий Ермогене.

Тропарь на преставление, глас 4

Российския земли первопрестольниче и неусыпный о ней к Богу молитвенниче! За веру Христову и паству твою душу свою положив, страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.

Кондак, глас 6

Темницею и гладом изнуряемь, даже до смерти верен пребыл еси, блаженне Ермогене, малодушие от сердец людей твоих отгоняя и на общий подвиг вся призывая. Темже и нечестивых мятеж низложил еси и страну нашу утвердил еси, да вси вопием ти: радуйся, заступниче Российския земли.

Величание

Величаем тя, священномучениче Ермогене, и чтим святую память твою, ты бо молиши за нас Христа Бога нашего.

Зосима и Савватий Соловецкие, преподобные
(1566; 8/21 августа; 17/30 апреля; 27 сентября/10 октября)

Преподобным Зосиме и Савватию Соловецким молятся о помощи на море от бури и потопления, а также об успехах в бортничестве (пчеловодстве), перед выставкой пчел.

Молитва

О, преподобный отцы, велицыи заступницы и скории услышателие молитв, угодницы Божии и чудотворцы Зосимо и Савватие! Не забудите, яко обещастеся, посещати чада ваша. Аще бо и отыдосте от нас телом, но духом присно с нами пребываете. Молим убо вас, о преподобнии: избавите ны от огня и меча, от нашествия иноплеменников и междоусобныя брани, от тлетворных ветров и от внезапный смерти и от всех прилог бесовских, находящих на ны. Услышите нас грешных и приимите молитву сию и моление наше, яко кадило благовонное, яко жертву благоугодную, и души наша, злыми делы и советы и помыслы умерщвленныя, оживите. И якоже умершую отроковицу возстависте, и неисцельныя раны многих исцелисте, и от духов нечистых зле мучимыя избависте, тако и нас, содержимых во узах вражиих, изымите и от сетей диавола избавите, из глубины прегрешений изведите и милостивым вашим посещением и ходатайством от враг видимых и невидимых оградите ны, благодатию и силою Пресвятыя Троицы, всегда, ныне и присно и во веки веков. Аминь.

Тропарь, глас 4

Постническое и равноангельское житие ваше, преподобнии отцы Зосимо и Савватие, вселенней познаны сотвори вас, чудодеянии различными, богоноснии, просвещаете верою призывающия вы и чтущия честную память вашу.

Кондак, глас 2

Христовою любовию уязвившеся, преподобнии, и Того крест на рамо вземше, понесли есте, божественне вооружившеся на невидимыя враги, и, непрестанныя молитвы, яко копие в руках, имуще, крепко победили есте бесовския ополчения; благодать Господню приемше целити недуги душ и телес притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобный отцы Зосимо и Савватие, монахов удобрение.

Молитва святому преподобному Савватию, Соловецкому чудотворцу

О, преподобие отче, угодниче Христов Савватие, всею душею Господа возлюбивый и удаливыйся в пустыню сию и течение подвига спасительнаго совершивый. О, верный рабе Царя Небеснаго, учителю добродетелей, образ смирения, гражданине пустынный, Ангелом собеседниче, небесный жителю, херувиме земный, человече небесный. О, свете немрачный отока Соловецкаго, паче же велие светило всея Церкви правоверных. Молюся ти, пречестне, аз многогрешный: услыши убогое мое моление раба твоего, вонми глаголом нечистых устен моих, твоея ныне помощи требующаго. Се бо враг прелукавый на всяко время тщится мя погубити, некий горько поглотити душу мою, и несть мне спасения, идеже помощь прияти, зане немощию плоти моея обложен еемь и страстьми весь долу преклонихся, не имам к Богу дерзновения. Ныне же точию к твоему повергаю себе заступлению: помилуй мя омраченнаго всеми злыми делы, воздеющи о мне всечестнеи руце ко Господу, о молитвенниче теплый, Савватие преподобный. За благоутробие щедрот Своих подаст ми грехов оставление и в день судный избавит мя вечнаго мучения и Царствию Своему сподобит благодатию Своею, Емуже буди всегда слава, честь и поклонение во веки. Аминь.

Тропарь, глас 3

Удалився мира и водворився в пустыни, добрым подвигом подвизався еси, злостраданием, и вниманием, и молитвами. Отонудуже и по смерти источавши исцеления, Савватие отче наш, моли Христа Бога спастися душам нашим.

Кондак, глас 2

Житейския молвы отбег и вселися в морский остров, премудре, и крест Господень на рамо взем, Христови последовал еси в молитвах и во бдениих, и в пощениих, злостраданием плоть свою изнуряя, Тем бысть иноком удобрение, иже любовию память твою празднующим, преподобие Савватие, моли непрестанно о всех нас.

Молитва святому преподобному Зосиме, Соловецкому чудотворцу (та же, что и преподобному Савватию, с переменой имени святого)

Тропарь, глас 4

Изволением Божественнаго разума вселился еси в пустыню, и тамо, вперив ум твой в Небесныя обители, равно Ангелом житие на земли пожив, в молитвах, и трудех, и пощениих образ был еси твоим учеником. Отонудуже Бог, видя твое благое изволение, умножи тебе чада в пустыни, слез твоих теченьми напояемей. Но, яко имея дерзновение к Богу, поминай стадо, еже собрал еси, мудре, и не забуди, якоже обещался еси, посещая чад твоих, Зосимо преподобие, отче наш.

Кондак, глас 8

Христовою любовию уязвився, преподобие, и Того Крест славный, на рамо взем, понесл еси, божественне вооружився, и непрестанныя молитвы, яко копие в руце имый, крепко ссекл еси бесовская ополчения. Тем зовем ти: радуйся, преподобие отче Зосимо, монахов удобрение.

Величание

Ублажаем вас, преподобнии отцы Зосимо и Савватие, и чтим святую память вашу, наставницы монахов и собседницы Ангелов.

Иаков Железноборовский, преподобный
(1442; 11/24 апреля и 5/18 мая)

Преподобному Иакову Железноборовскому молятся об исцелении от болей ног и от паралича.

Молитва

Преподобие и богоносне отче наш Иакове! Приими ныне нас, тебе усердно молящихся и припадающих ко всечестному и многоцелебному твоему гробу, идеже святое твое и многотрудное покоится тело. Духом же на Небесех предстоя Святей Троице со Ангелы и преподобных отцев лики, молися о нас, чадех твоих, отче, да избавимся от всяких скорбей, болезней, бед и обстояний, и благочестно поживем в настоящем житии, ходяще в заповедех и оправданиих Господних безпорочно, и да явимся последователи святому и равноангельскому житию твоему. Ей, преподобие отче, молим тя, испроси нам же и всем, с верою к тебе притекающим, грехов прощение, телесем здравие, исправление жития и вечное спасение, яко да твоим предстательством спасеннии, славу возсылати сподобимся в Троице славимому Богу, Отцу и Сыну и Святому Духу, ныне и присно и во веки веков. Аминь.

Тропарь, глас 4

Небеснаго желая, земная возненавидел еси и, взем крест свой, последовал еси Христу и от Него прием дарования чудес, исцеляти недужныя; но яко имея дерзновение ко Святей Троице, испроси православным здравие и спасение, на враги же победу, и не забуди, посещая чад своих, припадающих к целебному гробу твоему, Иакове преподобие, отче наш.

Кондак, глас 8

Сердечная очи, досточудне, ко Господу вперив и телесныя страсти исторгая, неболезненную жизнь в болезнях восприял еси, преподобие, болезням же лютым даеши исцеление просящим с верою у тебе, темже молим тя, досточудне, исцели наша болезни душевныя и телесныя, да зовем ти: радуйся, Иакове Богомудре, отче наш.

Величание

Ублажаем тя, преподобне отче Иакове, и чтим святую память твою, наставниче монахов и собеседниче Ангелов.

Илия пророк
(IX в. до Р.Х.; 20 июля/2 августа)

Пророку Илии молятся о даровании дождя, во время грома или града.

Молитва

О, прехвальный и пречудный пророче Божий Илие, просиявый на земли равноангельным житием твоим, пламеннейшею ревностию по Господе Бозе Вседержителе, еще же знамении и чудесы преславными, таже, по крайнему благоволению к тебе Божию, преестественно восхищенный на огненней колеснице с плотню твоею на небо, сподоблынийся беседовати с преобразившимся на Фаворе Спасителем мира, и ныне в райских селениих выну пребываяй и предстояй Престолу Небеснаго Царя! Услыши нас, грешных и непотребных, в час сей предстоящих пред святою твоею иконою и усердно прибегающих к ходатайству твоему. Моли о нас Человеколюбца Бога, да подаст нам дух покаяния и сокрушения о гресех наших, и всесильною Своею благодатию да поможет нам оставити пути нечестия, преспевати же во всяком деле блазе; да укрепит нас в борьбе со страстьми и похотьми нашими; да всадит в сердце наше дух смирения и кротости, дух братолюбия и незлобия, дух терпения и целомудрия, дух ревности к славе Божией и спасению ближних. Упраздни молитвами твоими, пророче, злыя обычаи мира, паче же погибельный и тлетворный дух века сего, заражающий христианский род неуважением к Божественней православней вере, к уставам Святыя Церкве и к заповедем Господним, непочтением к родителем и властем предержащим, и низвергающий людей в бездну нечестия, развращения и погибели. Отврати от нас, пречудне пророче, предстательством твоим праведный гнев Божий и избави вся грады и веси отечества нашего от бездождия и глада, от страшных бурь и землетрясений, от смертоносных язв и болезней, от нашествия врагов и междоусобныя брани. Укрепи твоими молитвами, преславне, предержащия власти наша в велицем их многотрудном подвизе народоправления, благопоспешествуй им во всех благих деяниях и начинаниях к водворению мира и правды в стране нашей. Пособствуй христолюбивому воинству во бранех со врагами нашими. Испроси, пророче Божий, от Господа пастырем нашим святую ревность по Бозе, сердечное попечение о спасении пасомых, мудрость во учении и управлении, благочестие и крепость во искушениих, судиям испроси нелицеприятие и бескорыстие, правоту и сострадание к обидимым, всем начальствующим попечение о подчиненных, милость и правосудие, подчиненным же покорность и послушание ко властем и усердное исполнение своих обязанностей, да тако в мире и благочестии поживше в сем веце, сподобимся причастия вечных благ в Царствии Господа и Спаса нашего Иисуса Христа, Емуже подобает честь и поклонение, со Безначальным Его Отцем и Пресвятым Духом, во веки веков. Аминь.

Тропарь, глас 4

Во плоти Ангел, пророков основание, вторый предтеча пришествия Христова, Илиа славный, свыше пославый Елисееви благодать недуги отгоняти и прокаженныя очищати, темже и почитающим его точит исцеления.

Кондак, глас 2

Пророче и провидче великих дел Бога нашего, Илие великоимените, вещанием твоим уставивый водоточныя облаки, моли о нас Единаго Человеколюбца.

Величание

Величаем тя, святый славный пророче Божий Илие, и чтим еже на Небеса на колеснице огненней, преславное восхождение твое.

Иоаким и Анна, родители Пресвятой Девы Марии
(9/22 сентября)

Праведным Богоотцам Иоакиму и Анне молятся о разрешении от неплодства и бесчадия, о покровительстве посевам и о плодородии.

Молитва

О, преславнии Христовы праведницы, святии Богоотцы Иоакиме и Анно, предстоящий Небесному Престолу Великаго Царя и велие дерзновение к Нему имущии, яко от Преблагословенныя Дщери вашея, Пречистыя Богородицы и Приснодевы Марии, воплотитися изволившему! К вам, яко многомощным предстателем и усердным о нас молитвенником, прибегаем мы, грешнии и недостойнии. Молите благость Его, яко да отвратит от нас гнев Свой, по делом нашим праведно на ны движимый, и да

безчисленныя прегрешения наша презрев, обратит нас на путь покаяния и на стези заповедей Своих да утвердит нас. Таже молитвами вашими в мире живот наш сохраните и во всех благих благое поспешение испросите, вся яже к животу и благочестию потребная нам от Бога дарующе, от всяких напастей и бед и напрасный смерти предстательством вашим нас избавляюще, и от всех враг видимых и невидимых защищающе, яко да тихое и безмолвное житие поживем во всяком благочестии и чистоте, и тако в мире временное сие житие прешедше в вечный достигнем покой, ид еже вашим святым умолением да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков. Аминь.

Тропарь, глас 2

Праведных Твоих Иоакима и Анны, Господи, память празднующе, теми молим Тя: спаси души наша.

Кондак, глас 2

Радуется ныне Анна, неплодства разрешившися соуз, и питает Пречистую, созывающи вся воспети Даровавшаго от чрева ея человеком едину Матерь и Неискусомужную.

Иоанн Богослов, апостол, евангелист
(98-117; 8/21 мая, 26 сентября/9 октября; 30 июня/13 июля)

Апостолу Иоанну Богослову молятся при изучении иконописания, об успехах в рыболовстве и о добрых отношениях в семье.

Молитва

О, великий апостоле, евангелисте громогласный, Богослове изящнейший, тайновидче непостижимых откровений, девственниче и возлюбленный наперсниче Христов Иоанне, приими с свойственным тебе милосердием нас грешных, прибегающих под твое сильное заступление и покровительство! Испроси Всещедраго Человеколюбца Христа и Бога нашего, Иже пред очесы твоими излиял есть Кровь Свою дражайшую за нас, непотребных рабов Своих, да не помянет беззаконий наших, но да помилует нас, и да сотворит с нами по милости Своей: да дарует нам здравие душевное и телесное, всякое благоденствие и изобилие, научая нас обращати вся оная в славу Его, Творца, Спасителя и Бога нашего. По кончине же временныя жизни нашея да избегнем мы, святый апостоле, немилосердных истязаний, на воздушных мытарствах нас ожидающих, но да достигнем под твоим руководством и покровительством горняго онаго Иерусалима, егоже славу во откровении ты зрел еси, а ныне наслаждаешися оныя радости, обещанный избранным Божиим. О, великий Иоанне, сохрани вся грады и страны христианския, весь сию, храм сей, посвященный твоему имени, служащих и молящихся в нем, от глада, губительства, труса и потопа, огня, меча, нашествия иноплеменных и междоусобныя брани, избави от всякия беды и напасти, и молитвами твоими отврати от нас праведный гнев Божий, и испроси нам Его милосердие! О, великий и непостижимый Боже, Альфо и Омего, источниче и предмете нашея веры! Се на умоление Тебе предлагаем святаго Иоанна, егоже Ты сподобил еси познати Тебе, неисповедимаго Бога, в неизреченнем откровении. Приими его о нас ходатайство, даруй нам исполнение прошений наших, во славу Твою: а паче всего соверши нас духовным совершенством, к наслаждению жизни нескончаемыя, в Небесных Твоих обителех. О, Небесный Отче, создавый вся Владыко, Душе духов, Всесильный Царю! Коснися перстом Твоим сердец наших, да и они, растаявше, яко воск пролиются пред Тобою, и бренная тварь духовна сотворится, в честь и славу Отца и Сына и Святаго Духа. Аминь.

Тропарь, глас 2

Апостоле, Христу Богу возлюбленне, ускори избавити люди безответныя, приемлет тя припадающа, Иже падша на перси приемый. Егоже моли, Богослове, и належащую мглу языков разгнати, прося нам мира и велия милости.

Кондак, глас 2

Величия твоя, девственниче, кто повесть? Точиши бо чудеса и изливавши исцеления, и молишися о душах наших, яко Богослов и друг Христов.

Величание

Величаем тя, апостоле Христов и евангелисте Иоанне Богослове, и чтим болезни и труды твоя, имиже трудился еси во благовестии Христове.