Текст книги "Помощь небесных покровителей. Полный сборник молитв на каждый день года (лето)"

30 июня/13 июля

Собор славных и всехвалъных 12-ти апостолов: Петра, Андрея, брата его; Иакова Зеведеева, Иоанна, брата его; Филиппа, Варфоломея, Фомы, Матфея, Иакова Алфеева, Иуды Иаковля или Фаддея; Симона Зилота и Матфия.

Прославление святителя Софрония, епископа Иркутского (1918).

Преподобного Петра, царевича Ордынского (Ростовского) (1290).

Обретение мощей преподобного Иллариона, затворника Троекуровского (1856).

Волынской (1709) и Балыкинской (1711) икон Божией Матери.

Владыко Всемогущий, Господи Боже наш, избравый возлюбленныя Своя ученики и апостолы на проповедь спасения всему миру, давый им власть отпущати грехи, приими ходатайства их о роде человеческом, егоже и судити с ними имаши, тех самых, яко другов Твоих, нам зело честных, дерзаем, недостойнии, в предстательство к Тебе, многопоспешествующее ко спасению душ наших приводити, молящи их усердно.

Святии первоверховнии апостоли Петре и Павле, евангелисти Христовы Иоанне Богослове и Матфее, первозванный учениче Андрее, водружением креста Россию благословивый, апостоли святии Иакове, брате Господень, со другим Иаковом, Филиппе, Варфоломее, Фомо, Симоне, Иудо и Матфие.

Вси святии Богоизбраннии апостоли, изряднейшии угодницы Христовы, безбожия искоренителие и веры истинныя насадители, помозите нам мощным вашим пред Господом ходатайством избавитися от всякаго зла и вражия лести, твердо сохраняти преданную вами веру Православную, в нейже вашим предстательством ни ранами, ни прещением, ни мором, ни коим гневом от Создателя своего умалени будем, но мирное зде поживем житие и сподобимся видети благая на земли живых, славяще Отца, и Сына, и Святаго Духа, Единаго в Троице славимаго и покланяемаго Бога, ныне и присно и во веки веков. Аминь.

Святии славнии и всехвальнии апостоли, начальнейшаго Архиерея исповедания нашего, Иисуса Христа, избрании ученицы и строителие таин Его: Петре и Павле, Иакове и Иоанне, Андрее и Матфее, Филиппе и Варфоломее, Фомо и Иакове, Иудо и Симоне, молите Христа Бога, да от шуияго мира сего пребывания деснаго во Царствии Своем сподобит предстояния, из сына противления сотворит мя сына спасения, да и аз совлекуся ветхаго человека и облекуся в новаго, созданнаго по Бозе в правде, преподобии и истине, и мя, в правду грех ради ненавидима, возлюбит и обитель во мне, недостойнем рабе Своем, достойну Себе сотворит, да в правоте веры путем тем ходя, доиду ко Отцу Небесному в наследие вечнаго достоинства и тамо, юже зде верою созерцаю, яснее во славе узрю и прославлю Святую Троицу в безконечныя веки. Аминь.

Апостолов первопрестольницы, и вселенныя учителие, Владыку всех молите, мир вселенней даровати и душам нашим велию милость.

Камень Христос каменя веры прославляет светло, учеников преизрядна, и с Павлом весь дванадесяточисленный собор днесь: ихже память совершающе верно, сих Прославлынаго прославляем.

Петра, вернии, каменя веры, похвалим и Павла Богомудраго, созывают бо всех праздновати верою, соборне вкупе вся дванадесяте, яко проповедники вере, просяща грехов оставления.

Величаем вас, святии дванадесяточисленнии апостоли, весь мир ученьми своими просветившия и вся концы ко Христу приведшия.

Святче Божий, святителю Христов, добрый пастырю словеснаго стада, человече Божий, новый чудотворче и неусыпный к Богу молитвенниче за страну сию, отче Софроние, призри с высоты Небесныя на нас, с верою и любовию покланяющихся образу твоему и честным останкам святых мощей, в наше утешение избывшим от всепоядающаго огня. Призри, святче Божий, и виждь наше нестроение и раздоры, нашу тугу, скорбь и сердечную болезнь, от лишения братския любве пребывающия. Испроси у Христа Бога коемуждо нам благодати смирения, познание своей греховности и самоукорения, да, внимающе кийждо своей совести, престанем осуждати ближняго, клеветати и поношати, но, соединившеся друг ко другу любовию, сподобимся мирно во смирении прочее время живота нашего пожити и улучити христианскую кончину. Да, совокупльшеся в будущей жизни со всеми святыми и с тобою, пастырю наш, прославим Единаго в Троице славимаго Бога, Отца, и Сына, и Святаго Духа во веки веков. Аминь.

От юности Христа возлюбил еси, блаженне Софроние, добре управил еси иноческия обители и, архиерейства саном почтен быв, упасл еси Иркутскую паству, темже и по преставлении дарования чудес от Бога приял еси и молиши Христа Бога избавити нас от бед и спасти души наша.

Скорый в бедах и скорбех заступниче, отче иерарше, страны Сибирския, святителю Софроние, на Небеси предстояй с первоиерархом Иркутския Церкви и всеми святыми, выну имаши благоволение Господа славы; призри на люди, притекающия к честным останкам святых мощей твоих, с верою и любовию слезно просящия твоея помощи и заступления, моли, Егоже проповедал еси людем Сибири, избавити я от находящих зол и наветов вражиих, просветити людие оляденевшая древле неверием сердца, даровати утверждение веры Христовы и спасти души наша.

Пастырей Начальнику, Христу, трудился еси, святителю Софроние, на пажити духовней северныя страны нашея, языцы монгольстии от прелести и скверны идольския избавляя, привел еси я к свету веры Христовы, и ныне со Ангелы Владычню престолу предстоя, моли непрестанно о всех нас, избавити ны от бед и спасти души наша.

Соименнаго мудрости иерарха, изрядное Церкве Иркутския украшение, отца нашего святителя Софрония любовию восхвалим вси вернии, той бо есть хранитель града и страны сея и молитвенник о душах наших.

Величаем тя, святителю отче Софроние, и чтим святую память твою, ты бо молиши за нас Христа Бога нашего.

О преподобне Петре царевиче, Ростовский чудотворче! Якоже из мрака языческаго во свет Евангельскаго учения Господь тя призва, тако умоли Его, да и нас по неизреченней Своей благости и человеколюбию измет всесильною Своею десницею из тьмы греховныя и осияет сердца наша к деланию Его Божественных заповедей. Якоже ты, избег мятежа мирских волнений, во ангелоподобное безпечальное житие сподобился еси достигнути, тако сподоби и нам, грешным, моря сего, влаемаго страстьми, пучину безмятежно преплыти, имея тя, отче, кормчаго о Господе нашем, и достигнути чистым покаянием ко пристанищу спасения вечнаго. И якоже имел еси споспешников тебе, верховных апостолов Петра и Павла, в созидании обители, тако подвигни их умилосердитися и о нас, недостойных, и даровати нам от сугубыя апостольския благости дерзновение ко Христу Богу. Веруем бо, яко аще мощи твоя святыя и сокровены в земли, но ты царствуеши со избранными Божиими на Небеси. Исходатайствуй убо, да и нам, грешным, молитвами твоими отверзется дверь Царствия Небеснаго в безконечныя веки. Аминь.

О преподобне отче. Петре царевичу! Ты душею на небеси престолу Божию предстоиши и Троичныя славы наслаждаешися, телом же на земли в божественнем храме сем почиваеши и данною ти свыше благодатию различная чудеса источаеши. Призри милостивым оком на предстоящия честней раце твоей люди и просящия умильно твоея помощи. Се бо мы безмерными согрешении праведный гнев Божий на себе наведохом, и всякия милости недостойни сотворихомся: темже не смеюще возвести очес наших к высоте небесней, ниже вознести молебный глас ко Господу, сердцем сокрушенным и духом смиренным тебе в ходатайство и на помощь призываем. Испроси у Господа Церкви благостояние, воздуха благорастворение, земли плодоносие. Избави же всех, верою несумненною к Богу приходящих и к раце мощей твоих притекающих, от всяких бед душевных и телесных: буди печальным утешитель, недугующим врач, напаствуемым помощник, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий, и исходатайствуй всем, твоея помощи требующим, вся ко спасению полезная. Яко да твоими молитвами наставляеми, путь маловременнаго жития нашего на земли безбедно совершим, и вечный покой на небеси улучивше, прославим купно с тобою всех благих Подателя, в Троице славимаго Бога, Отца и Сына и Святаго Духа, ныне и присно и во веки веков. Аминь.

Отечества своего, блаженне Петре, удалився, и богомерзкую веру отнюд возненавидев, и от мглы греховныя изшед, и от тьмы во свет прииде, и вселися еси во славный и многонародный град Ростов, в немже житие честно пожив, церковь во имя святых апостол Петра и Павла воздвиг Христовою благодатию, и сию чудными иконами, яко невесту, украсив, святителя же и князя и вся люди житием своим удивив. Темже и по смерти твоей Христос даром чудес обогати тя. Поминай нас, чтущих пресветлую память твою, преподобне отче Петре, и моли Христа Бога спастися душам нашим.

Явися велие солнце Христовой Церкви, просвещая учения светлостьми, всечестне, яко черпалом златым, от кладезя неископаннаго чудес почерпл еси, от источника неистощимаго, на память успения твоего пришедшим, всеблаженне Петре, ныне всем подаваеши грехов прощение, славо преподобным.

Ублажаем тя, преподобне отче Петре, и чтим святую память твою, наставниче монахов и собеседниче Ангелов.

О священная главо, преподобне отче, преблаженне авво Иларионе!

Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли, отче священный, за ны, дети твоя духовныя, яко имеяй дерзновение к Небесному Царю: не премолчи за ны ко Господу и не презри нас, верою и любовию чтущих тя. Поминай нас недостойных у престола Вседержителя и не престай моляся о нас ко Христу Богу: яко дана тебе благодать молитися за ны. Не мним бо тя мертва суща: аще бо телом и преставился еси от нас, но и по смерти жив сый пребывавши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со Ангельскими воинствы, со безплотными лики, достойно веселится. Ведущи убо тя и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, глада и пагубы избавление, душам же нашим спасение. Умоли Всещедраго Владыку, да угасит пламень страстей наших и низпослет росу благодати Своея на иссохшия сердца наша, да и мы молитвами твоими плод духовный принесем и сподобимся странствие земное непостыдно скончати и в Отечестве Небеснем часть со святыми улучити, да славим и поем Всесвятое имя Отца и Сына и Святаго Духа, во веки веков. Аминь.

О предивный угодниче Божий, преподобне и Богоносне отче наш Иларионе, Троекуровский затворниче и чудотворче, земли Липецкия славо и похвало! Чрез все житие твое неуклонно Богу последовав, любве ради к Нему мнози подвизи, скорби и болезни понесл еси и еще на земли храм честен Святаго Духа чистотою души твоея соделался еси. Темже дар рассуждения и совета, дар прозорливости, дар изцеления и чудотворения еще в земной твоей жизни в изобилии от Господа приял еси. Ведуще велие твое пред Богом дерзновение, с верою и любовию к тебе притекаем и усердно молим тя: испроси у Господа Вседержителя миру умирение, жития христианскаго на Руси утверждение, от глада и пагубы избавление, душам же нашим спасение. Умоли Всещедраго Владыку, да угасит пламень страстей наших и низпослет росу благодати Своея на иссохшия сердца наша, да и мы молитвами твоими плод духовный принесем и сподобимся странствие земное непостыдно скончати и в Отечестве Небеснем часть со святыми улучити, да славим и поем Всесвятое имя Отца и Сына и Святаго Духа, во веки веков. Аминь.

Нищету Христову возлюбивши, дом и сродники твоя оставил еси, преподобне отче наш Иларионе, тем же приял еси мзду трудов твоих на небесех, идеже ликуя со Ангелы, моли спастися душам нашим.

Днесь светло ликует обитель Троекуровская, яко множество скорбящих обретает утешение, на твоя молитвы надеющеся, преподобне Иларионе всеблаженне, ты бо еси земли Липецкой похвало и утверждение.

Ублажаем тя, преподобне отче наш Илларионе, и чтим святую память твою, наставниче монахов и собеседниче Ангелов.

Приими, Всеблагомощная, Пречистая Госпоже, Владычице Богородительнице, сия честныя дары, Тебе единей прикладныя, от нас, недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, Херувимов светлейши и Серафимов честнейши сущая. И ныне, Всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и от всякаго обстояния и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков. Аминь.

Заступнице земли Российския от нашествия свейскаго и непрестанная за нас Молитвеннице, мир земли и душам нашим у Господа испроси, да святится в нас имя Божие во веки.

Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Волынская-Каплуновская» молятся о защите от иноплеменных, о сохранении России.

Некогда от шведов град Твой защитившая, о, Мати Божия, милосердие нам явила еси, праведный гнев и прещение Божие от земли Российския отвративши, и тако во области северстей Твоего всечестнаго лика прославила еси, видимыя слезы о прадедах наших, от супостат воюемых, изливающи. Таже здравие слепым и бесным от сея иконы многажди подавала еси, и предстательством Твоим мор на человеки бывший и язю на скоты пришедшую прекратила еси. Ты и ныне струи милосердия всем с несумненною верою во Твою всесильную помощь прибегающим изливаеши. Вонми убо молению нашему, и путь нашего земнаго скитания управи, в жизнь вечную сей приводящи. Темже и люди церковныя от сетей лжепророков и лжеучителей, вземлющихся на разум Божий, сохрани, и всем нам чистоту помышлений подаждь, Аще бо слезы и моления наша не довлеют прегрешений наших очистити, но к сим да приложится Твое всесильное предстательство, на неже уповающе, воспеваем Отца и Сына и Святаго Духа, ныне и присно и во веки веков. Аминь.

О Мати Божия, некогда от нашествия иноверных свеев в великой беде Отечеству нашему бывшу явила всемощное заступление прославлением в стране Северстей всечестнаго лика Твоего, именуемаго Балыкинским, и зримыми на нем слезами очес Твоих умолила Сына Твоего и Бога нашего даровати православным христианом преславную победу и одоление на супостата. Ты, Премилосердная Мати, и в мимошедшия дни во граде Орле, во очию нашею, пред пречистым образом Твоим даровала исцеление страждущей от духа нечистаго девице, возвратив ю родителем здраву и невредиму. Ты, скорая Помощнице в бедах человеческих, услышала вопль матери детища, с высоты жилища внезапу спадша, и возставила е здраво и безвредно. Ты, неиссякаемый источниче чудес и щедрот, принесенной к дивному образу Твоему отроковице, зело разслабленной, благоизволила даровати скорое исцеление, укрепив плесне ея к желанному хождению. Ты, Всемощная Царице Небесе и земли, воздвигла от неисцельнаго недуга младенцев, ихже родители притекоша к Тебе с верою и любовию. Ты, Подательнице мира душам нашим, избавила юношу от свирепеющих страстей и преклонила злонравие его ко благонравию и покорению родителем. Ты неоскудно изливала струи Своей милости на всех притекающих к пресвятому образу Твоему в душевных скорбех, телесных недузех и житейских напастех. Вонми, о Всеблагая, и нынешнему усердному молению нашему: управи пути земнаго странствия нашего к мирному и благодетельному житию, украси жительство наше благими обычаи, загради всесильною дланию Твоею уста лжеучителей, вземлющихся на Разум Божий, тлящих обычаи православных предков наших и развращающих умы и сердца юных чад наших, посли нам во вся дни жития нашего имети чистоту помыслов и сердечных движений. Сама, о Всепетая, заступи и имиже веси судьбами спаси и введи нас в прерадостные обители Сына Твоего и Бога нашего. Аминь.

Некогда угрожавшему Отечеству нашему от полчищ свеев Ты, Мати Божия, явила милосердие и отвратила праведный гнев и прещение Сына Твоего и Бога нашего от земли Российския прославлением в области Северския Твоего всечестнаго лика, именуемаго Балыкинским. Видя скорби верных православных русских христиан, Ты, сердобольная Мати, проливала видимыя слезы о наших предках! Ты дала прозреть девице! Ты возстановила всеми оставленную в болезни! Ты уврачевала раны тела и души пораненной! Ты исхитила из когтей велиара девицу! Ты укротила мор людей и язю скотов! Ты неоскудно изливаешь струи милостей всем, прибегающим с несумненною верою в Твою всесильную помощь! Вонми же молению нашему! Управи пути нашего земнаго скитания и дай нам тихое пристанище по нашем преставлении! Украси нашу жизнь добрыми и благочестивыми обычаями! Удержи Твоею всесильною рукою лжепророков и лжеучителей, вземлющихся на Разум Божий! Пошли нам чистоту помышлений и чувствований! О Госпоже, наши слезы не довлеют загладить наши прегрешения. Ободри нас, укрепи и веди, аможе хощеши! Аминь.

Заступнице земли Российския от нашествия свейскаго и непрестанная за нас Молитвеннице, мир земли и душам нашим у Господа испроси, да святится в нас имя Божие во веки.

Притцем вси, ближнии и дальнии, к Балыкинскому чудотворному образу Божия Матере и умиленно возопием: радуйся, земли Российския Заступнице от Свейскаго нашествия и всем притекающим к Тебе Помощнице!

Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Пред иконой Пресвятой Богородицы «Балыкинская» молятся об исцелении от беснования, болезней глаз и слепоты, об избавлении от моровых поветрий и нашествия иноплеменных.

Июль

1/14 июля

Бессребреников Космы и Дамиана, в Риме пострадавших (284).

Возвращение мощей преподобного Иоанна Рылъского (1469).

К вам, святии безсребреницы и чудотворцы Космо и Дамиане, яко к скорым помощником и теплым молитвенником о спасении нашем мы, недостойнии, преклонше колена, прибегаем и, припадающе, усердно вопием: не презрите моления нас грешных, немощных, во многая беззакония впадших и по вся дни и часы согрешающих. Умолите Господа, да пробавит нам, недостойным рабом Своим, великия и богатыя Своя милости, избавьте нас от всякия скорби и болезни, вы бо прияли есте от Господа и Спаса нашего Иисуса Христа неоскудную благодать исцелений, ради твердыя веры безмезднаго врачевания и мученическия кончины вашея. Паки, припадающе, прилежно молим: испросите нам от Господа вся благополезная, яже в животе нашем временнем, наипаче же ко спасению вечному належащая, да сподобимся молитвами вашими улучити кончину христианскую, безболезненну, непостыдну, мирну, и да избавимся от козней диавольских и вечныя муки, безконечнаго же и блаженнаго Царствия Небеснаго наследницы будем. Ей, угодницы Божии, не престайте молящеся за ны, с верою к вам притекающия, аще бо по множеству грехов наших и несмы достойни милосердия вашего, обаче вы, вернии подражателие человеколюбия Божия суще, сотворите, да принесем плоды достойны покаяния и в вечный покой достигнем, хваляще и благословяще дивнаго во святых Своих Господа и Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне и присно и во веки веков. Аминь.