Текст книги "Акафистник"

Кондак 10

Спаси́тельное прибе́жище от суе́т ми́ра преле́стнаго яви́ся жре́бий Твой земны́й, Свята́я вои́стину Гора́ Афо́нская, Богоро́дице Де́во, ознаменова́нная мно́гими Твои́ми чудесы́. Но и на вся́ком ме́сте с любо́вию призыва́ющих Тя услы́ши и заступи́, Сы́на же Твоего́ умоля́ти не преста́й, Всеблага́я, да не отсту́пна пребыва́ет благода́ть Его́ от мест, иде́же в собра́нии ве́рных пое́тся Ему́ хвале́бная песнь: Аллилу́иа.

Икос 10

Стена́ еси́ де́вственником, Преблагослове́нная Де́во, и столп кре́пок от лица́ вра́жия всем подви́жником благоче́стия: Тебе́ бо даде́ся ве́лия си́ла те́мныя а́дския си́лы побежда́ти и от искуше́ний их душепа́губных челове́ки избавля́ти, наипа́че же тех, и́же целому́дренно и свя́то на земли́ пребыва́ют. Сего́ ра́ди де́вства и целому́дрия рачи́тели согла́сно Тебе́ зову́т: Ра́дуйся, чистото́ю сия́ющая па́че со́лнца; ра́дуйся, де́вства нача́ло и освяще́ние. Ра́дуйся, кри́не, облагоуха́вший па́дшее челове́чество; ра́дуйся, во смире́нии Твое́м осене́нная благоволе́нием Всевы́шняго. Ра́дуйся, ве́рная Рабо́ Госпо́дня; ра́дуйся, я́ко Тя блажа́т вси ро́ди. Ра́дуйся, я́ко сотвори́ Ти вели́чие Си́льный; ра́дуйся, я́ко соца́рствуеши с Сы́ном Твои́м во сла́ве ве́чней. Ра́дуйся, хода́таице Бо́жия к лю́дем благоволе́ния; ра́дуйся, гре́шных к Бо́гу дерзнове́ние окриля́ющая. Ра́дуйся, неистощи́мый исто́чниче ми́лостей и щедро́т; ра́дуйся, преиспо́лненная сострада́ния к стра́ждущим. Ра́дуйся, христиа́ном Помо́щнице и милосе́рдая о гре́шных Предста́тельнице.

Кондак 11

Пе́ние на́ше, а́ще бы́ло бы и тьмочи́сленное, не довле́ло бы к досто́йному прославле́нию ми́лостей Твои́х, Преблагослове́нная Ма́ти Бо́жия, я́же непреста́нно излива́еши ро́ду на́шему; оба́че да не неблагода́рни яви́мся пред Тобо́ю, по си́ле на́шей похва́льная воспису́ем Ти с ве́рою и любо́вию и, воспомина́я неисче́тная чудотворе́ния Твоя́, вопие́м верхо́вному Творцу́ чуде́с Бо́гу: Аллилу́иа.

Икос 11

Светопода́тельными луча́ми чуде́с ико́на Твоя́, о Всеми́лостивая Влады́чице, на Святе́й Горе́ Афо́нстей и повсю́ду немерца́емо сия́ет и весь мир правосла́вный благода́тно просвеща́ет. Сего́ ра́ди гряду́т к ней от лет дре́вних на поклоне́ние правосла́вных собо́ри, умиле́нно воспева́я пред не́ю благохвале́ния Ти такова́я: Ра́дуйся, Царя́ Христа́ ми́ру яви́вшая; ра́дуйся, на ико́не Твое́й вку́пе с Ним изображе́нная. Ра́дуйся, клеще́ таи́нственная, Иса́иею прови́денная; ра́дуйся, купино́ неопали́мая, богови́дцем Моисе́ем предзри́мая. Ра́дуйся, руно́ ороше́нное Гедео́на; ра́дуйся, ча́ще приосене́нная, Авваку́мом воспе́тая. Ра́дуйся, две́ре затворе́нная, Иезеки́илю показа́нная; ра́дуйся, горо́ несеко́мая, Дании́лу явле́нная. Ра́дуйся, многообра́зне от проро́к предвозвеще́нная; ра́дуйся, проро́ческих рече́ний сбытие́ яви́вшая. Ра́дуйся, христиа́ном Помо́щнице и милосе́рдая о гре́шных Предста́тельнице.

Кондак 12

Благода́ти прича́стная Твоя́ ико́на, Богоро́дице Де́во, я́ко сокро́вище драгоце́нное, Це́ркви Христо́вой от Тебе́ подаде́ся, в ней бо обеща́лася еси́ с на́ми бы́ти до сконча́ния ве́ка, ре́кши о первонапи́санней Твое́й ико́не: «С не́ю благода́ть Моя́ и си́ла!» Ве́руем, Всепе́тая, я́ко не оскуде́ет глаго́л Твой сей, и я́ко во ико́не Твое́й святе́й на вся́цем ме́сте и зде с на́ми пребыва́еши, иде́же ве́рно пое́тся Сы́ну Твоему́ и Бо́гу хвале́бная песнь: Аллилу́иа.

Икос 12

Пою́ще чудеса́ Твоя́, Богоро́дице, припа́даем усе́рдно ко святе́й ико́не Твое́й, лобыза́ем ю́ с серде́чною любо́вию и, я́ко при́сно су́щей с на́ми, мо́лим Ти ся: воззри́ на ны милосе́рдием Твои́м, Ма́ти Бо́жия и, я́коже Тя зрим ны́не на ико́не изображе́нную, та́ко сподо́би нас узре́ти Тя в час гро́зный сме́ртный, от руки́ диа́воли нас исхища́ющую и в Ца́рствие Христо́во приводя́щую ны держа́вною десни́цею Твое́ю, да Тебе́ благода́рственно взыва́ем: Ра́дуйся, по Бо́зе пе́рвое на́ше прибе́жище и покро́ве; ра́дуйся, Ма́тернею любо́вию Твое́ю весь мир христиа́нский объе́млющая. Ра́дуйся, во свято́м житии́ ве́рныя утвержда́ющая; ра́дуйся, благу́ю христиа́нскую кончи́ну им подаю́щая. Ра́дуйся, от вла́сти лю́таго мироде́ржца упова́ющия на Тя избавля́ющая; ра́дуйся, на мыта́рствах возду́шных заступа́ющая сла́вящих Тя. Ра́дуйся, врата́ ра́йская нам отверза́ющая; ра́дуйся, Ца́рствие Небе́сное лю́бящим Тя хода́тайствующая. Ра́дуйся, во сла́ве небе́сней приседя́щая Сы́ну Твоему́ и Бо́гу; ра́дуйся, во обще́ние сла́вы Его́ и чту́щия Тя вводя́щая. Ра́дуйся, теле́с на́ших здра́вие; ра́дуйся, душ на́ших спасе́ние. Ра́дуйся, христиа́ном Помо́щнице и милосе́рдая о гре́шных Предста́тельнице.

Кондак 13

О Всепе́тая Ма́ти, ро́ждшая святы́х Святе́йшее Сло́во, от а́нгел воспева́емая на небеси́ и от челове́к сла́вимая на земли́! Приими́ ми́лостиво сие́ ма́лое моле́ние на́ше, и да́руй душе́вное спасе́ние и теле́сное здра́вие всем, ве́рно чту́щим Тя и пою́щим Бо́гу: Аллилу́иа.

Этот кондак читается трижды, затем икос 1-й «Арха́нгел Гаврии́л…» и кондак 1-й «Избра́нней Бо́гом…»

Молитва

О Пресвята́я и Преми́лостивая Влады́чице Богоро́дице! Припа́дая к святе́й ико́не Твое́й, смире́нно мо́лимся Тебе́: вонми́ гла́су моле́ния на́шего, виждь ско́рби, виждь беды́ на́ша и, я́ко любвеоби́льная Ма́ти, потщи́ся на по́мощь нам безпомо́щным, умоли́ Сы́на Твоего́ и Бо́га на́шего, да не погуби́т нас за беззако́ния на́ша, но яви́т нам человеколю́бно Свою́ ми́лость. Испроси́ нам, Влады́чице, у бла́гости Его́ теле́сное здра́вие и душе́вное спасе́ние, и ми́рное житие́, земли́ плодоно́сие, возду́ха благорастворе́ние, и благослове́ние свы́ше на вся блага́я дела́ и начина́ния на́ша, правосла́вному во́инству на́шему на вся враги́ побе́ду и одоле́ние. И я́коже дре́вле призре́ла еси́ ми́лостиво на смире́нное славосло́вие послу́шника афо́нскаго, воспева́вшего Тя пред пречи́стою ико́ною Твое́ю, и посла́ла еси́ к нему́ а́нгела научи́ти его́ пе́ти песнь небе́сную, е́юже славосло́вят Тя а́нгели, та́ко и ны́не приими́ на́ше усе́рдное молитвосло́вие, Тебе́ приноси́мое. О Цари́це Всепе́тая! Простри́ ко Го́споду Богоно́сныя Твоя́ ру́це, и́миже Богомладе́нца Иису́са Христа́ носи́ла еси́, и умоли́ Его́ изба́вити нас от вся́каго зла. Яви́, Влады́чице, Твою́ ми́лость к нам: боля́щия исцели́, скорбя́щия уте́ши, бе́дствующим помози́ и сподо́би нас благоче́стно житие́ сие́ земно́е соверши́ти, христиа́нскую непосты́дную кончи́ну получи́ти и Небе́сное Ца́рствие насле́дити Ма́терним хода́тайством Твои́м к ро́ждшемуся от Тебе́ Христу́ Бо́гу на́шему, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.

Акафист
Пресвятой Богородице в честь иконы Ея «Неопалимая Купина»
(празднование 4/17 сентября)

Кондак 1

Взбра́нной Воево́де, Пречи́стой и Богообра́дованной Де́ве Богоро́дице, огнезра́чныя ико́ны Своея́ явле́нием обра́довавшей Це́рковь Христо́ву и е́ю от о́гненнаго запале́ния защища́ющей ве́рныя, похва́льное возглаша́ем пе́ние, Ты же, о Богома́ти, Купина́ Неопали́мая на́ми имену́емая, я́ко иму́щая держа́ву непобеди́мую и милосе́рдие мно́гое, ускори́ на по́мощь к нам, тре́бующим Твоего́ заступле́ния, и от вся́ких бед свободи́ зову́щих Ти: Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Икос 1

А́нгелов Цари́це и всея́ тва́ри Влады́чице Госпоже́ Богоро́дице, от а́нгельских лико́в горе́ прие́млющая хвале́бное пе́ние, сподо́би и нас, земны́х и пе́рстных, возноси́ти к Тебе́ гла́сы хвалы́, благодаре́ния за премно́гую ми́лость Твою́ к ро́ду челове́ческому. И а́ще недосто́йны есми́ пе́ти Тя по достоя́нию, оба́че Ты, я́ко Блага́я, не возгнуша́йся на́ших недовле́ющих похва́л и, я́ко Сын Твой две ле́пте вдови́цы ми́лостивно прия́т, та́ко любоблагоутро́бно услы́ши нас, со умиле́нием Тебе́ вопию́щих: Ра́дуйся, Огнь Божества́ во чре́ве Твое́м неопа́льно носи́вшая; ра́дуйся, Спаси́теля па́дшему челове́честву ро́ждшая. Ра́дуйся, си́лу а́дову пречи́стым рождество́м Твои́м упраздни́вшая; ра́дуйся, Ада́ма и Е́ву дре́вняго прокля́тия свободи́вшая. Ра́дуйся, вочелове́чению еди́наго от Тро́ицы непоро́чно послужи́вшая; ра́дуйся, Творца́ небесе́ и земли́ безсе́менно воплоти́вшая. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 2

Ви́дя Моисе́й на Сина́и купину́ огне́м горе́вшую и не сгора́вшую ужасе́ся, и се бысть глас к нему́ Боже́ственный от купины́: «Иззу́й сапоги́ от ногу́ твое́ю: ме́сто бе, на не́мже ты стои́ши, земля́ свя́та есть». Сего́ послу́шающе и мы, смире́ннии, та́инство воплоще́ния Бо́га Сло́ва от Пречи́стыя Де́вы, чу́дом неопали́мыя купины́ прообразова́нное, испове́дуем и со стра́хом поклоня́емся ме́сту явле́ния Бо́жия, зову́ще Зижди́телю вся́ческих: Аллилу́иа.

Икос 2

Ра́зум челове́ческий не мо́жет пости́гнуть та́инства смотре́ния Бо́жия, от сложе́ния ми́ра искупле́ние па́дшего челове́чества предопредели́вшаго в сове́те предве́чном Триипоста́снаго Божества́, оба́че Ду́хом Святы́м вдохнове́ннии, святи́и Бо́жии проро́ци издале́че предзря́ще чу́до чуде́с, я́ко Творе́ц ра́бий зрак восприи́мет, спасти́ хотя́ де́ло рук Свои́х от поги́бели ве́чныя, возвеща́ху проо́бразы и проро́чествы нело́жными иму́щее соверши́тися искупле́ние ро́да челове́ча обетова́нным Искупи́телем. Ему́же Ты, Всечи́стая, плоть взаимода́вши, сподо́билася еси́ бы́ти Ма́терию Го́спода Твоего́, внуша́ющаго нам вопи́ти к Тебе́: Ра́дуйся, огнезра́чная пала́то на херуви́мах седя́щаго; ра́дуйся, светоно́сная ло́жнице серафи́мом повелева́ющаго. Ра́дуйся, о́дре Царя́ вели́каго верху́ горы́ небе́сныя; ра́дуйся, престо́ле одушевле́нный Облада́ющаго го́рними и до́льними. Ра́дуйся, киво́те освяще́нный Божества́, Свята́я святы́х бо́льший; ра́дуйся, ста́мно всезлата́я, в ней же ма́нна спаси́тельная угото́вася, плоть и кровь Боже́ственнаго А́гнца. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 3

Си́лою Всевы́шняго де́йствующи, Влады́чице преблага́я, си́лу естества́ о́гненнаго укроща́еши свято́ю ико́ною Твое́ю, и мно́га чудеса́ е́ю соде́лываеши во вселе́нной. Те́мже род христиа́нский ублажа́ет Тя гла́сы хвале́бными и в беда́х внеза́пных, наипа́че же во вре́мя о́гненнаго запале́ния к Тебе́ моли́твенно притека́ет, прие́мля по́мощь от Тебе́ благовре́менну. Сего́ ра́ди благода́рственно вопие́м просла́вльшему Тя Царю́ Сла́вы Христу́: Аллилу́иа.

Икос 3

Иму́щи любо́вь ве́лию к лю́дем иску́пленным честно́ю Кро́вию Сы́на Твоего́ и Бо́га, Богома́ти Пречи́стая, прия́ла еси́ от Него́ власть стро́ити и покрыва́ти род христиа́нский: Ты бо гре́шником еси́ спору́чница покая́ния их пред Творце́м, ненаде́жным наде́ждо спасе́ния, бе́дствующим ско́рая по́моще, поги́бшим взыска́ние держа́вное и вся́кому ми́ру покро́в. Тебе́, милосе́рдой и благолюби́вой засту́пнице на́шей за любо́вь любо́вию воздаю́ще, смиренному́дренне глаго́лем: Ра́дуйся, ра́досте всеми́рная, е́юже сле́зы отъе́млются от оче́с стра́ждущих и скорбя́щих; ра́дуйся, прибе́жище благооти́шное, в не́мже спаса́ются обурева́емии бу́рею страсте́й жите́йскаго мо́ря. Ра́дуйся, умоли́тельнице всемогу́щая пра́ведно дви́жимаго на нас гне́ва Бо́жия; ра́дуйся, пла́мень огня́ угаша́ющая росо́ю моли́тв Твои́х пред Престо́лом Вседержи́теля. Ра́дуйся, от гро́ма и мо́лнии соблюда́ющая предста́тельством Твои́м небе́сным; ра́дуйся, по́мощь Твою́ святу́ю благовре́менно подаю́щая вся́кой душе́, ве́рно Тебе́ моля́щейся. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 4

Бу́ря о́гненная егда́ на́йдет на нас внеза́пно и пла́мень гра́ды и ве́си на́ша обы́мет, тогда́, Госпоже́ Всеми́лостивая, ускори́ на по́мощь к нам безпо́мощным и ико́ною Твое́ю честно́ю защити́ и изба́ви нас от о́гненнаго наказа́ния, его́же сотвори́хомся досто́йни грех ра́ди на́ших, Тебе́ бо гре́шнии и́мамы засту́пницу непосты́дную, на Тя упова́ние на́ше возлага́ем и прославля́юще си́лу моли́тв Твои́х ро́ждшемуся от Тебе́ Спа́су ми́ра зове́м: Аллилу́иа.

Икос 4

Слы́шим и ви́дим чудеса́ ве́лия от ико́ны Твоея́ быва́емая, Цари́ца на́ша всеблага́я, ю́же дарова́ла еси́ нам во утеше́ние и защи́ту в несча́стиях: се бо и всепояда́ющий огнь изнемога́ет в си́ле свое́й, пред си́лою благода́тною Твоего́ пречи́стаго о́браза, я́коже мно́гажды ви́дехом и испыта́хом, Неопали́мую Купину́ Тя имену́юще в изображе́нии сего́ Твоего́ о́браза, и пред ним Тебе́ воспева́юще гла́сы хвале́бными си́це: Ра́дуйся, моли́твенница неусыпа́ющая ко Христу́ Бо́гу, на ми́лость к нам Его́ преклоня́ющая; ра́дуйся, ка́ру Бо́жию за беззако́ния на́ша от глав на́ших отводя́щая. Ра́дуйся, ри́зою Твое́ю честно́ю от вся́ких несча́стий нас сохраня́ющая; ра́дуйся, Ма́терним покро́вом щедро́т Твои́х жили́ща на́ша от огня́ и гро́ма соблюда́ющая. Ра́дуйся, всеми́лостивая услы́шательнице гла́сов на́ших моле́бных в ско́рби и обстоя́нии; ра́дуйся, держа́вная скоропомо́щнице на́ша во дни тя́жких испыта́ний. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 5

Боготе́чная звезда́, ико́на Твоя́ всечестна́я, Богоро́дице Де́во, во всем ми́ре чуде́с мно́жеством благода́тно сия́ет и просвеща́ет ду́ши и сердца́ челове́ческия к позна́нию ве́лия Твоего́ милосе́рдия, и́мже род христиа́нский покрыва́еши и заступа́еши, я́ко Ма́ти благосе́рдная. О сем ра́дующеся благодари́м Христа́ Бо́га, Тебе́, Ма́терь Свою́ по пло́ти, и нам в Ма́терь по ду́ху дарова́вшаго, и зове́м Ему́ во умиле́нии глубо́цем: Аллилу́иа.

Икос 5

Ви́дим ико́ну Твою́, Влады́чице, я́ко вои́стину купину́ неопали́мую, во огни́ несгора́ющую, и прису́тствием свои́м жили́ща челове́ческия в пла́мени несгора́емыми соде́лывающую: Тебе́ бо даде́ся благода́ть свы́ше, си́лу естества́ во чре́ве Твое́м неопа́льно вмести́вшей, сея́ же благода́ти и пречи́стый о́браз Твой прича́стен показа́ся, те́мже от ве́рных Неопали́мая Купина́ наименова́ся, его́же мы че́ствуем благоле́пно, и Тебе́ хвале́бно вопие́м: Ра́дуйся, свеще́ неугаси́мая, в моли́твах за нас у Престо́ла Го́спода присногоря́щая; ра́дуйся, огне́м любве́ Бо́жия и на́ша хла́дная сердца́ воспламеня́ющая. Ра́дуйся, се́нию моли́тв Твои́х зной страсте́й на́ших прохлажда́ющая; ра́дуйся, в час ско́рби и недоуме́ния по́мыслы душеполе́зныя нам ниспосыла́ющая. Ра́дуйся, во вре́мя безпо́мощия на́шего, егда́ бе́дствуем и не и́мамы помога́ющаго, на по́мощь к нам ускоря́ющая; ра́дуйся, в годи́ну несча́стий внеза́пных держа́вною руко́ю Твое́ю от поги́бели нас исхища́ющая. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 6

Пропове́дует Це́рковь Христо́ва чудеса́ Твоя́, Богороди́тельнице, я́ко песка́ морска́го и звезд небе́сных мно́жае суть; от восто́ка бо и до за́пада хва́льно и́мя Твое́ чудесы́ и несть гра́да или́ страны́ иде́же не соверши́ся Тобо́ю де́йство си́лы Бо́жия во избавле́ние и спасе́ние, просвеще́ние и исцеле́ние люде́й христоимени́тых, наипа́че же чрез ико́ны Твоя́ святы́я обы́кла еси́ чудотвори́ти, излива́ющи от них струи́ ми́лости и щедро́т бе́дствующему и боля́щему челове́честву. Сего́ ра́ди славосло́вим Тя гла́сы пе́сний духо́вных и вопие́м Сы́ну Твоему́ и Бо́гу на́шему: Аллилу́иа.

Икос 6

Возсия́ла еси́ в светоли́тии боже́ственныя сла́вы, Де́во Богоотрокови́це, Младе́нца и предве́чнаго Го́спода Иису́са Христа́ на руку́ Твое́ю держа́щи и ли́ком сил а́нгельских окружа́ема, я́коже Тя ви́дим на ико́не изображе́нную, Моисе́йскую Неопали́мую Купину́ та́инственно пронарече́нную, от нея́же дары́ благода́тныя ве́рным да́руеши, от огня́ и гро́ма спаса́еши, неду́жные врачу́еши, скорбя́щии утеша́еши и всем вся блага́я и душеполе́зная ниспосыла́еши во е́же пе́ти Тебе́ гла́сы немо́лчными си́це: Ра́дуйся, о Не́йже ра́дуется и торжеству́ет а́нгельский собо́р и челове́ческий род; ра́дуйся, Ея́же сла́ва превосхо́дит похвалы́ земны́я и небе́сныя. Ра́дуйся, от го́рних высо́т всю вселе́нную Ма́тернею любо́вию Твое́ю надзира́ющая; ра́дуйся, юдо́ль земну́ю многоско́рбную благодея́нии Твои́ми посеща́ющая. Ра́дуйся, неисче́тною благосты́нею Твое́ю не оставля́ющая презре́нныя и отве́рженныя; ра́дуйся, сердобо́лием Твои́м от ро́ва поги́бельнаго исхища́ющая безнаде́жных. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 7

Хотя́ Госпо́дь яви́ти любо́вь Свою́ к лю́дям, иску́пленным Его́ Кро́вию, дарова́ нам в покро́в и защи́ту Ма́терь Свою́ пренепоро́чную и Сию́ сотвори́ прибе́жище благооти́шное вся́кой души́ христиа́нстей, скорбя́щей и озло́бленней, по́мощи и ми́лости тре́бующей. Ве́дуще у́бо таково́е милосе́рдное служе́ние Твое́ ро́ду челове́ческому, Влады́чице Всеблага́я, к Тебе́ о́чи на́ша в ско́рбех возво́дим и ру́це моле́бно простира́ем, утеше́ния от Тебе́ еди́ныя прося́ще, да спасе́ши нас предста́тельством Твои́м от скорбе́й вре́менных и ве́чных и сподо́биши на земли́ живы́х в ра́дости святы́х пе́ти Бо́гу: Аллилу́иа.

Икос 7

Ди́вно просла́вила еси́ чудесы́ ико́ну Твою́ святу́ю, Неопали́мая Купина́ имену́емую, Богороди́тельнице Де́во, е́юже гра́ды и ве́си от запале́ния о́гненнаго и молниено́снаго гро́ма соблюда́еши и до́мы ве́рных благословля́еши, в ни́хже че́ствуется благогове́йно пречи́стаго ли́ка Твоего́ подо́бие. Сего́ ра́ди, я́ко дар многоце́нен, о́браз Твой благода́тный ра́достно прие́млем, достодо́лжным поклоне́нием почита́ем и Тя по до́лгу ублажа́ем благохвале́нии си́ми: Ра́дуйся, алава́стре врачева́ния на всяк неду́г врачевство́ содержа́щий; ра́дуйся, мирополо́жнице благоуха́ния Христо́ва, облагоуха́вшая па́дшее челове́чество. Ра́дуйся, у́зы грехо́вныя разреша́ющая ка́ющимся гре́шником; ра́дуйся, плени́цы страсте́й сокруша́ющая подвиза́ющимся о чистоте́. Ра́дуйся, дев младопита́тельнице и матере́й ти́хое весе́лие; ра́дуйся, вдов засту́пнице и сиро́т благосе́рдное призре́ние. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 8

Стра́нно есть ви́дети, я́ко ико́на Твоя́, Влады́чице, на дске напи́санная и по естеству́ своему́ о́гненному де́йству подве́рженная, си́лу пачеесте́ственную явля́ет и прису́тствием свои́м си́лу огня́ укроща́ет. Познаю́ще в сем си́лу Бо́жию и Твои́х моли́тв де́йство, велича́ем возвели́чившаго Тя Зижди́теля вся́ческих Бо́га, во отра́ду и утеше́ние нам дарова́вшаго о́браз Твой чудотво́рный и сим спаса́ющаго нас от о́гненнаго запале́ния, да при́сно зове́м Ему́ благода́рственно и хвале́бно: Аллилу́иа.

Икос 8

Весь мир христиа́нский сла́вит и́мя Твое́, Преблагослове́нная Мари́е Богоро́дице, и вся́кому ве́рному сла́достно и уте́шительно есть взира́ти на пречи́стаго ли́ка Твоего́ подо́бие, и́мже обы́кла еси́ явля́ти мно́гая и пресла́вная чудеса́. Се и мы, смире́ннии, Твою́ святу́ю ико́ну ви́дяще, боголе́пно ей поклоня́емся и с любо́вию ю́ лобыза́ем, ча́юще от нея́ по́мощи и заступле́ния Твоего́ держа́внаго, наипа́че во вре́мя безпо́мощия на́шего, егда́ грех ра́ди на́ших о́гненное запале́ние на ны на́йдет внеза́пно, да спаса́еми Тобо́ю от поги́бельнаго пла́мени благода́рными усты́ Тебе́ вопие́м: Ра́дуйся, нерукотворе́нная ски́ния Бо́га Сло́ва, херуви́мы превы́сшая и серафи́мы превосходя́щая святы́нею и чистото́ю; ра́дуйся, о́блаче ле́гкий Со́лнца пра́вды, и́мже Небе́сный к те́мным прии́де, да на не́бо с Собо́ю возведе́т. Ра́дуйся, ра́йския две́ри отве́рзшая па́дшему челове́честву рождество́м Твои́м святы́м; ра́дуйся, не́бо и зе́млю воеди́но совоку́пльшая во е́же пе́ти Тебе́ и ро́ждшемуся от Тебе́ немо́лчныя хвалы́. Ра́дуйся, Боже́ственный исто́чниче, во́ду жи́зни источи́вший, от него́же пию́щии ктому́ не умира́ют; ра́дуйся, грозд спасе́ния возрасти́вшая благослове́нная лоза́, вино́ безсме́ртия иска́пающий челове́ком. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 9

Вся́ку похвалу́ превосхо́дит сла́ва Твоя́, преблагослове́нная и препросла́вленная Ма́терь Го́спода на́шего; недоумева́ют бо и уми́ безпло́тнии пе́ти Тя по достоя́нию, тем па́че же нам, земны́м и пе́рстным, сие́ неудо́бно есть, оба́че любо́вию к Тебе́ побежда́емии, дерза́ем приноси́ти Тебе́ поси́льное пе́ние хвалы́ и благодаре́ния за премно́гую ми́лость Твою́ к ро́ду челове́ческому, его́же возлюби́ла еси́ и ему́же благотвори́ти не престае́ши, подвиза́ющи всяк во́зраст ве́рных взыва́ти ро́ждшемуся от Тебе́ Спа́су Христу́: Аллилу́иа.

Икос 9

Вети́и челове́честии изнемога́ют пости́гнути ве́лию та́йну Твоего́ присноде́вства, Богороди́тельнице, ю́же утаи́ Госпо́дь от прему́дрых ве́ка сего́ и ве́рою откры́ смире́нным и благогове́йным, пытли́ваго испыта́ния чу́ждым, от ни́хже правосла́вно и несумне́нно до рождества́ и в рождестве и по рождестве́ Де́ва пропове́дуешися. Приими́ у́бо, о Ма́ти и Де́во, и на́ше о сем испове́дание вседуше́вное и укрепи́ нас после́довати Тебе́ житие́м непоро́чным и серде́чною чистото́ю, да возмо́жем благоуго́дно воспева́ти к Тебе́ пе́сни сицевы́я: Ра́дуйся, кри́не белосне́жный де́вства и чистоты́, неувяда́емо цвету́щий горе́; ра́дуйся, к де́вству и чистоте́ неви́димо руково́дствующая живу́щих до́ле. Ра́дуйся, ма́терство и де́вство в Себе́ чу́дно сочета́вшая; ра́дуйся, во обою́ непоро́чно и свя́то Себе́ соблю́дшая; ра́дуйся, и́ноческих ли́ков предводи́тельнице в де́встве благоуго́днем; ра́дуйся, де́вственных полко́в нача́льнице в чистоте́ души́ и те́ла. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 10

Спасе́ние челове́ческое устроя́я еди́н от Тро́ицы воплоти́тися от Тебе́ изво́ли, Богоневе́сто Влады́чице, естество́ челове́ческое просла́вив седе́нием одесну́ю Отца́ на Престо́ле Божества́, я́ко Сын Единоро́дный, То́йже и Сын Твой по пло́ти бысть и Тебе́ с Собо́ю просла́ви сла́вою, превы́сшею вся́кия сла́вы, ея́же добро́тою осеня́ема, не забыва́еши ми́лостивно род челове́ческий, но моли́твенно предста́тельствуеши пред Творцо́м, в Тро́ице Еди́нем, о всех ве́рно пою́щих Ему́ славосло́вия песнь: Аллилу́иа.

Икос 10

Стена́ еси́ де́вственным лико́м и и́ноческим собо́ром, Богоро́дице Де́во, всем усе́рдно к Тебе́ в моли́твах притека́ющим, ико́ну же Твою́ святу́ю благогове́йно че́ствующим; Тебе́ бо еди́ней дарова́ся от Го́спода благода́ть всеми́рнаго заступле́ния и ве́рных в де́встве и чистоте́ утвержде́ния. Те́мже непоро́чнаго жити́я рачи́телие под Ма́терний покро́в Твой от бу́ри страсте́й прибега́ют и благооти́шие душе́вное нахо́дят, согла́сно Тебе́ взыва́юще: Ра́дуйся, и́ноков и и́нокинь благочести́вых изря́дная покрови́тельнице и те́плая к Бо́гу о них хода́таице; ра́дуйся, та́йных среди́ ми́ра рабо́в Бо́жиих всегда́шняя помо́щнице и в по́двизех духо́вных руководи́тельнице. Ра́дуйся, ю́ных наста́внице целому́дрия и воздержа́ния; ра́дуйся, ста́рцев благогове́йных упое́ние и отра́до. Ра́дуйся, домы́ и семе́йства христиа́нския осеня́ющая благи́м Твои́м покро́вом; ра́дуйся, всяк во́зраст ве́рных сподобля́ющая Твоего́ благосе́рднаго попече́ния. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 11

Пе́ние хвале́бное прино́сит Тебе́ немо́лчно Свята́я Христо́ва Це́рковь, Всепе́тая Влады́чице, возвеща́ющи ми́лости Твоя́ и чудеса́, и́миже обогати́ся вся вселе́нная. Вои́стину, кто бо, я́ко Ты скоропослу́шлив есть к моли́твенным проше́ниям на́шим? Но и са́мая проше́ния обы́кла еси́ предваря́ти, ми́лующи и ущедря́ющи тре́бующих по́мощи Твоея́ святы́я, ея́же не лиши́ и нас смире́нных, в час сей пою́щих во сла́ву и́мени Твоего́ и вопию́щих Бо́гу: Аллилу́иа.

Икос 11

Светоза́рная Твоя́ ико́на, Богома́ти Пречи́стая, просвеща́ет потемне́нныя грехми́ ду́ши на́ша сия́нием Боже́ственных чуде́с, в ни́хже познае́м Бо́жия всемогу́щества си́лу и Твое́ милосе́рдие неисче́тное, при́сно гото́вое спосо́бствовати нам в покая́нии и обраще́нии от злых дел на путь спасе́ния. Мо́лим у́бо Тебя́, Всеблага́я, не оста́ви нас заблужда́ти в де́брях грехо́в и страсте́й, но приведи́ к ти́хому приста́нищу благоче́стнаго и богоуго́дного жити́я, да возмо́жем досто́йно приноси́ти Тебе́ сия́ песнопе́нныя дары́: Ра́дуйся, враги́ на́ша неви́димыя запина́ющая бо́дренною Твое́ю моли́твою; ра́дуйся, сим не попуска́ющая облада́ти на́ми наси́лием сме́ртнаго сего́ телесе́. Ра́дуйся, я́ко бе́си и́мене Твоего́ свята́го боя́тся и трепе́щут; ра́дуйся, я́ко ико́на Твоя́ честна́я вся́ку си́лу диа́волю прису́тствием свои́м прогоня́ет. Ра́дуйся, подви́жников благоче́стия укрепля́ющая в бра́ни духо́вной со врага́ми спасе́ния челове́ческаго; ра́дуйся, в час кончи́ны помога́ющая любо́вь и ве́ру к Тебе́ иму́щим. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 12

Благода́ти Бо́жия прича́стну испове́дуем Твою́ святу́ю ико́ну, Богоблагода́тная Де́во, и све́тло торжеству́ем пра́здник ея́ явле́ния во о́бразе со неопали́мыя купины́ сея́ я́вльшися, то́жде и де́йство показу́ет свои́ми чудесы́, от о́гненнаго пла́мени сохраня́ющи и соблюда́ющи жили́ща на́ша свои́м прису́тствием. Сию́ у́бо, я́ко щит и забра́ло, иму́ще Тебе́, Помо́щницу на́шу держа́вную хвала́ми пе́сненными ублажа́ем и ро́ждшемуся от Тебе́ Спаси́телю на́шему вопие́м: Аллилу́иа.

Икос 12

Пое́м Тя, Богороди́тельнице, еди́ну наде́жду и упова́ние на́ше, испове́дуем ми́лости Твоя́, не таи́м чуде́с Твои́х, прославля́ем неисче́тную бла́гость Твою́ к ро́ду христиа́нскому, благословля́ем и́мя Твое́ свято́е, е́же вои́стинну ми́ро излия́нное есть лю́бящим Тя, благоуха́нием духо́вным исполня́ющее благочести́выя ду́ши. Облагоуха́й у́бо и нас, Влады́чице, смердя́щих страстьми́ грехо́вными, и сподо́би чи́стым се́рдцем и нескве́рными усты́ взыва́ти к Тебе́: Ра́дуйся, ми́ро источа́ющая сла́достное и душеспаси́тельное, и́мже умаща́ются сердца́ боголюби́вая; ра́дуйся, неду́ги душе́вныя и теле́сныя врачу́ющая еди́ным прикоснове́нием к ико́не Твое́й святе́й. Ра́дуйся, Води́тельнице Блага́я, на путь благоугожде́ния и спасе́ния направля́ющая ка́ющихся гре́шников; ра́дуйся, ле́ствицею доброде́телей возводя́щая подви́жников Христо́вых ко врата́м Ца́рствия Небе́снаго. Ра́дуйся, смире́нных и терпели́вых страда́льцев венча́ющая утеше́нием благода́тным; ра́дуйся, изгна́нных и гони́мых безви́нно услажда́ющая предвкуше́нием блаже́нства ра́йскаго. Ра́дуйся, Благода́тная, Купино́ Неопали́мая, о́гненнаго запале́ния нас избавля́ющая.

Кондак 13

О Всепе́тая Ма́ти, ро́ждшая всех святы́х Святе́йшее Сло́во, и Неопали́мая Купина́ от нас недосто́йных имену́емая! Вонми́ гла́су моле́ний и пе́ний на́ших, пред свято́ю ико́ною Твое́ю усе́рдно Тебе́ возноси́мому, и те́плою моли́твою Твое́ю ко Го́споду огня́ вре́меннаго и ве́чнаго изба́ви нас, хва́лящих и́мя Твое́ и прославля́ющих чудеса́ Твоя́, Сы́ну же Твоему́ и Бо́гу на́шему вопию́щих: Аллилу́иа.

Этот кондак читается трижды, затем 1-й икос «А́нгелов Цари́це…» и 1-й кондак «Взбра́нной Воево́де…»

Молитва

О Пресвята́я и Преблагослове́нная Ма́ти сладча́йшаго Го́спода на́шего Иису́са Христа́! Припа́даем и поклоня́емся Тебе́ пред свято́ю и пречестно́ю ико́ною Твое́ю, е́юже ди́вная и пресла́вная чудеса́ содева́ющи, от о́гненнаго запале́ния и молниено́снаго гро́ма жили́ща на́ша спаса́еши, неду́жныя исцеля́еши и вся́ко благо́е проше́ние на́ше во бла́го исполня́еши. Смире́нно мо́лим Тя, всеси́льная ро́да на́шего засту́пнице, сподо́би ны, немощны́я и гре́шныя, Твоего́ Ма́терняго уча́стия и благопопече́ния. Спаси́ и сохрани́, Влады́чице, под кро́вом ми́лости Твоея́ богохрани́мую страну́ на́шу, вла́сти и во́инство ея́, Це́рковь Святу́ю, храм сей (или: оби́тель сию́) и вся ны, припа́дающия к Тебе́ с ве́рою и любо́вию и умиле́нно прося́щия со слеза́ми Твоего́ заступле́ния. Ей, Госпоже́ всеми́лостивая, умилосе́рдися на нас, обурева́емых грехми́ мно́гими и не иму́щих дерзнове́ния ко Христу́ Бо́гу проси́ти Его́ о поми́ловании и проще́нии, но Тебе́ предлага́ем к Нему́ на умоле́ние, Ма́терь Его́ по пло́ти; Ты же, Всеблага́я, простри́ к Нему́ Богоприе́мнеи ру́це Твои́ и предста́тельствуй за нас пред бла́гостию Его́, прося́щи нам проще́ния прегреше́ний на́ших, благочести́ваго ми́рнаго жития́, благи́я христиа́нския кончи́ны и до́браго отве́та на Стра́шнем Суде́ Его́. В час же гро́знаго посеще́ния Бо́жия, егда́ огне́м возгора́ются до́мы на́ша или́ молниено́сным гро́мом устраша́еми бу́дем, яви́ нам ми́лостивное Твое́ заступле́ние и держа́вное вспоможе́ние, да спаса́еми всеси́льными Твои́ми ко Го́споду моли́твами, вре́меннаго наказа́ния Бо́жия зде избе́гнем и ве́чное блаже́нство ра́йское та́мо унасле́дуем и со все́ми святы́ми воспое́м пречестно́е и великоле́пое и́мя покланя́емыя Тро́ицы, Отца́ и Сы́на и Свята́го Ду́ха, и Твое́ ве́лие к нам милосе́рдие во ве́ки веко́в. Ами́нь.