Текст книги "Акафист святому мученику Вонифатию"

Акафист святому мученику Вонифатию

Рекомендовано к публикации Издательским Советом Русской Православной Церкви (ИС 13-317-2389)

Кондак 1

Избра́нный во́ине Христо́в, венце́м сла́вы украше́нный, му́ченической сме́ртию ве́чныя сме́рти изба́вивыйся, от мра́ка грехо́внаго отврати́выйся и к ве́чному све́ту прише́дый, приими́ моле́ние на́ше, в похвалу́ тебе́ приноси́мое, и нас изба́ви от се́тей лука́ваго врага́ на́шего, да тебе́ с ра́достию зове́м: Ра́дуйся, Вонифа́тие, му́чениче многострада́льный.

Икос 1

А́нгелом све́тлым, огнь муче́ний твои́х росо́ю благода́ти угаси́вшим, огражде́н был еси́, страда́льче Христо́в Вонифа́тие, да я́ко гре́шник нераска́янный не поги́бнеши и пред Го́сподем в оде́жде бра́чней предста́неши. Научи́ и нас облещи́ся в све́тлыя ри́зы свя́тости, тебе́ зову́щих:

Ра́дуйся, жизнь за Христа́ отда́вый; ра́дуйся, страда́ниям Его́ подража́вый.

Ра́дуйся, о́чи своя́ к Бо́гу обрати́вый; ра́дуйся, во́лю свою́ в добродете́лех укрепи́вый.

Ра́дуйся, ра́бе Христо́в ве́рный; ра́дуйся, святы́й коне́ц жития́ своего́ прие́мый.

Ра́дуйся, к покая́нию сердца́ обраща́яй; ра́дуйся ко Христу́, Пути́ и́стинному, приводя́яй.

Ра́дуйся, Ду́хом Святы́м просвеще́нный; ра́дуйся, собла́знами ми́ра сего́ не прельще́нный.

Ра́дуйся, зми́я лука́ваго посрами́вый; ра́дуйся, святы́х лик возвесели́вый.

Ра́дуйся, Вонифа́тие, му́чениче многострада́льный.

Кондак 2

Ви́дя многомяте́жие ми́ра сего́ и печа́ли земны́я, и сия́ вся я́ко прах вмени́в, к преми́рным возве́л еси́ ум твой, страда́льче Христо́в, на высоту́ благоразу́мия возше́д, Христа́ Бо́га пред все́ми испове́дал еси́, и ны́не ду́ши всех, во гресе́х погиба́ющих, к милосе́рдому Го́споду зове́ши, да во смире́нии пока́ются и во слеза́х умиле́нных Ему́ возопию́т: Аллилу́иа.

Икос 2

Ра́зум трезве́нием укрепи́л еси́ и страсте́й пла́мень покая́нием угаси́л еси́, Вонифа́тие преди́вный. От за́пада на восто́к из Ри́ма прише́л еси́ спострада́ти Го́споду Иису́су Христу́ наме́рение свято́е неся́, да благода́ть в тебе́ преизоби́лует, и нас ны́не в храм Бо́жий привле́кл еси́, тебе́ глаго́лющих:

Ра́дуйся, стра́сти побора́ти науча́яй; ра́дуйся, отча́янным наде́жду спасе́ния подава́яй.

Ра́дуйся, суету́ жи́зни земны́я позна́вый; ра́дуйся, страда́ния своя́ предсказа́вый.

Ра́дуйся, трезвя́щихся отра́до и одобре́ние; ра́дуйся, немощны́х во́лею укрепле́ние.

Ра́дуйся, я́ко тобо́ю от пиа́нства отвраща́емся; ра́дуйся, я́ко тобо́ю к Бо́гу обраща́емся.

Ра́дуйся, исцеле́ний исто́чниче неисчерпа́емый; ра́дуйся, чуде́с сокро́вище неоскудева́емое.

Ра́дуйся, науча́яй при́сно возноси́ти ум наш к Бо́гу; ра́дуйся, обре́тый и́стинную от грехо́в свобо́ду.

Ра́дуйся, Вонифа́тие, му́чениче многострада́льный.

Кондак 3

Си́ла милосе́рдия Бо́жия неизрече́нна на тебе́ откры́ся, и́бо жития́ твоего́, му́чениче, ди́вное повествова́ние я́вно нам сказу́ет, ка́ко ве́лии гре́шницы ми́лостиво Отце́м на́шим Бо́гом прие́млютея, егда́ Ему́ покая́ние принесу́т. Та́ко и ты Бо́гу угоди́л еси́ и вме́сто го́рькия сме́рти ве́чную жизнь прия́л еси́; научи́ и нас Бо́гу пе́ти всегда́: Аллилу́иа.

Икос 3

Име́я ны́не ра́дость ве́чную в небе́сных селе́ниях, и нас гре́шных на земли́ не забыва́еши, му́чениче Христо́в Вонифа́тие. Мы же тружда́ющиися и обремене́ннии к тебе́ прибега́ем: не оста́ви нас, си́рых и неду́жных, по́мощи у тебе́ прося́щих, но мольбы́ на́ша на алта́рь небе́сный принеси́, да ра́достно тебе́ зове́м:

Ра́дуйся, бли́жняго, я́ко себе́ самаго́ возлюби́вый; ра́дуйся, во гресе́х се́рдце свое́ не ожесточи́вый.

Ра́дуйся, стра́нником и пу́тником со вся́ким тща́нием служи́вый; ра́дуйся, сего́ ра́ди но́щию сто́гны гра́да обходи́вый.

Ра́дуйся, бога́тыя милосе́рдию науча́яй; ра́дуйся, си́рыя и вдови́цы защища́яй.

Ра́дуйся, бе́дствующим и уни́женным до́брый предста́телю; ра́дуйся, за оби́димых и унижа́емых при́сный хода́таю.

Ра́дуйся, нестерпи́мою жа́ждою пиа́нства пали́мыя трезве́нием прохлажда́яй; ра́дуйся, вина́ ра́ди обнища́вшия к трезве́нию призыва́яй.

Ра́дуйся, же́ны рыда́ющия утеша́яй; ра́дуйся, сле́зы их ко Го́споду принося́яй.

Ра́дуйся, Вонифа́тие, му́чениче многострада́льный.

Кондак 4

Бу́ри грехо́вныя тебе́ не потопи́ша, ниже́ во́лны страсте́й покры́ша, му́чениче Христо́в: не поги́бл еси́, но ко Христу́ прише́л еси́ и жизнь свою́ я́ко же́ртву благово́нную Ему́, сладча́йшему Спаси́телю на́шему, прине́сл еси́. Моли́ся у́бо, да и мы, в жите́йстем мо́ре су́щии, к ти́хому приста́нищу, Го́споду Спаси́телю, притеце́м, во умиле́нии зову́ще: Аллилу́иа.

Икос 4

Слы́шим и мы ева́нгельскую при́тчу, ка́ко блу́дный сын на стране́ дале́че име́ние свое́ ижди́вше, от гла́да душе́внаго в себе́ прише́д, во объя́тия о́тчие притече́, в покая́нии зовы́й: «О́тче! Согреши́х на не́бо и пред тобо́ю». Та́ко и ты, му́чениче Вонифа́тие, не погуби́в себе́, но от роже́ц греха́ отврати́выйся, ко Христу́ обрати́лся еси́. Мы же, исправле́нию твоему́ ра́дующеся, пое́м ти си́це:

Ра́дуйся, глад кре́пок в рабо́те страсте́м испыта́вый; ра́дуйся, Христа́ Бо́га, я́ко хле́ба жива́го, взалка́вый.

Ра́дуйся, пречи́стыя Кро́ве Его́, я́ко и́стиннаго пита́ния, приобщи́выйся; ра́дуйся, я́ко пресла́вным му́чеником приложи́выйся.

Ра́дуйся, на крыле́х трезве́ния к Бо́гу возлете́вый; ра́дуйся, се́рдце свое́ горе́ име́вый.

Ра́дуйся, ко Го́споду си́лой Животворя́щаго Креста́ прише́дый; ра́дуйся, я́ко прия́л еси́ вене́ц побе́ды.

Ра́дуйся, души́ на́шея сокро́вище нетле́нное; ра́дуйся Це́ркве на́шея украше́ние многоце́нное.

Ра́дуйся, красоты́ ми́ра сего́ отве́ргий; ра́дуйся, грехо́вную оде́жду с себе́ совлеки́й.

Ра́дуйся, Вонифа́тие, му́чениче многострада́льный.

Кондак 5

Богото́чную Кровь Христо́ву за всех нас недосто́йных и кровь му́ченическую за Христа́ пролия́нную па́мятующе, си́це тебе́ веща́ше Аглаи́да: «Сам ве́си, сколь мно́гими грехми́ оскверне́ни есмы́ и о бу́дущем жития́ на́шего небреже́м. Аз же от боже́ственнаго му́жа слы́шах, я́ко му́чеников мо́щи спасе́ние да́руют, и́же му́ченика я́ко храни́теля и хода́тая пред Бо́гом и́мать». И мы тебе́ глаго́лем: «Ты еси́ наш храни́тель и хода́тай пред Бо́гом на́шим, и́бо со А́нгелы предстои́ши престо́лу Пресвяте́й Тро́ице, поя́: Аллилу́иа.

Икос 5

Ви́дим ны́не и разуме́ем, ка́ко сии́ глаго́лы Аглаи́ды ду́шу твою́ пробуди́ша, и ты к воздержа́нию призва́л еси́ себе́, му́чениче Вонифа́тие, и нам помози́ подража́ти тебе́, да не поги́бнем в пучи́не беззако́ния потопля́еми, но ра́достно тебе́ зове́м:

Ра́дуйся, от страсте́й, я́ко от поги́бельнаго сна пробуди́выйся; ра́дуйся, от уз грехо́вных свободи́выйся.

Ра́дуйся, сомнева́ющихся в милосе́рдии Бо́жием обличе́ние; ра́дуйся, безконе́чныя ра́дости утвержде́ние.

Ра́дуйся, зовы́й нас к по́двигу воздержа́ния; ра́дуйся, ты бо зна́мением Креста́ посе́кл еси́ страсте́й взыгра́ние.

Ра́дуйся, стяжа́вый себе́ ве́чное име́ние; ра́дуйся, и нас пробужда́яй к труду́ спасе́ния.

Ра́дуйся, я́ко ви́нное весе́лие презре́л еси́; ра́дуйся, плотски́я ра́ны, я́ко безпло́тен, претерпе́л еси́.

Ра́дуйся, за испове́дание Христа́ от враго́в избие́нный; ра́дуйся, нестерпи́мым огне́м за Него́ опале́нный.

Ра́дуйся, Вонифа́тие, му́чениче многострада́льный.

Кондак 6

Пропове́дница поклоне́ния святы́м моще́м яви́ся Аглаи́да, госпожа́ твоя́, страда́льче Христо́в, егда́ посла́ тя на восто́к святы́я мо́щи му́чеников, за ве́ру Христо́ву пострада́вших, принести́, и́миже благодея́ния источа́ются оби́льно и ве́чное спасе́ние подае́тся всем, к му́ченическому ли́ку усе́рдно притека́ющим. Даждь и нам утеше́ние от Го́спода прия́ти, Ему́же а́нгельскую песнь прино́сим: Аллилу́иа.

Икос 6

Возсия́л еси́ нам, я́ко звезда́ незаходи́мая, ди́вным житие́м твои́м, му́чениче преблаже́нне, и́го Христо́во ле́гкое и вседраго́е на себе́ прие́мый и спасе́ние получи́вый, пути́ бо благоче́стия без Христа́ Го́спода обрести́ ника́коже возмо́жно есть. Те́мже и нас моли́твами твои́ми в го́рняя оби́тели приведи́, тя восхваля́ющих си́це:

Ра́дуйся, зако́на Христо́ва скрижа́ль, Бо́гом начерта́нная; ра́дуйся, мо́литв ко Го́споду ми́ро благоуха́нное.

Ра́дуйся, пра́выя ве́ры Христо́вой сто́лпе о́гненный; ра́дуйся, честны́й ве́нче от за́поведей Бо́жиих, я́коже от ка́мений драги́х, устро́енный.

Ра́дуйся, трезве́ния ле́ствице небовосхо́дная; ра́дуйся, боле́зни и ра́ны врачу́яй грехо́вныя.

Ра́дуйся, я́ко от Го́спода Иису́са благода́ть и си́лу прия́л еси́; ра́дуйся, я́ко свет Христо́в нам возсия́вый.

Ра́дуйся, воздержа́нием от грехо́в освяща́ти пра́здники нас науча́яй; ра́дуйся, от сме́ртнаго вина́ нас охраня́яй.

Ра́дуйся, умерщвле́нныя страстьми́ све́том Христо́вым оживля́яй; ра́дуйся, ты́я к но́вому житию́ призыва́яй.

Ра́дуйся, Вонифа́тие, му́чениче многострада́льный.

Кондак 7

Хотя́ оты́ти от до́му своего́ в путь на восто́к, кончи́ну жития́ твоего́ предре́кл еси́, достохва́льне, Аглаи́де глаго́ля: «Госпоже́ моя́, приими́ мое́ те́ло, за Христа́ му́чимое, егда́ его́ принесу́т ти». В душе́ твое́й мысль за Христа́ пострада́ти име́вый, Ему́ сокрове́нно моли́лся еси́; и на́шу ве́ру укрепи́, да бу́дем гото́ви и мы ея́ ра́ди страда́ти, Го́споду пою́ще: Аллилу́иа.

Икос 7

Ди́вному и пресла́вному исправле́нию твоему́ не ве́руя, помы́сли лука́вое в се́рдце свое́м Аглаи́да, грехо́м бо хуле́ния оболга́ти тя хотя́ще, та́ко отвеща́ ти: «Ны́не не глумле́ния вре́мя, бра́те, но благогове́ния, ве́дый бу́ди, я́ко мо́щи святы́я и́маши носи́ти. Госпо́дь же да по́слет А́нгела Своего́ пред тобо́ю и напра́вит стопы́ твоя́ милосе́рдием Свои́м». Мы же чистоту́ се́рдца твоего́, ди́вный Вонифа́тие, зря́ще, вопие́м ти:

Ра́дуйся, святы́х моще́й почита́телю; ра́дуйся, благогове́ния о́браза нам пода́телю.

Ра́дуйся, безчи́нств храни́тися нам повеле́вый; ра́дуйся, вся, о ни́хже сы́нове ве́ка сего́ ра́дуются, презре́вый.

Ра́дуйся, изве́стный наш помо́щниче; ра́дуйся, святы́х мы́слей таи́нниче.

Ра́дуйся, всем борю́щимся с грехми́ покрови́телю; ра́дуйся, покая́ния на́шего пред Бо́гом поручи́телю.

Ра́дуйся, я́ко твои́ми моли́твами Госпо́дь оставля́ет прегреше́ния; ра́дуйся, помога́яй нам терпе́ти ско́рби и поноше́ния.

Ра́дуйся, лико́м а́нгельским сотвори́вый ра́дость и удивле́ние; ра́дуйся, духо́в зло́бы приведы́й в посрамле́ние.

Ра́дуйся, Вонифа́тие, му́чениче многострада́льный.

Кондак 8

Стра́нно тебе́ бысть язы́ческое и́долом служе́ние, и ты, святы́й му́чениче, в Тарс прише́д, не преклони́л еси́ коле́н пред бога́ми чу́ждыми, но апо́столом показа́лся еси́ ревни́тель. Те́мже моли́ся за ны, да возгори́мся и мы огне́м любве́ ко Влады́це Христу́, пою́ще всегда́: Аллилу́иа.

Икос 8

Весь распали́лся еси́ ре́вностию свято́ю, хуле́ния на Го́спода не терпя́, и испо́лнился еси́ Ду́ха Бо́жия, ослепле́ние и безу́мие покланя́ющихся ло́жным бога́м облича́я. Сего́ ра́ди царь нечести́вый казнь наведе́ на тя, му́чениче, го́рькую, бичми́ нестерпи́мо бия́ и ра́ны нанося неисце́льныя. Мы же похвалу́ пое́м:

Ра́дуйся, злове́рия обличи́телю дерзнове́нный; ра́дуйся, в пра́вду Бо́жию я́ко в броню́ облече́нный.

Ра́дуйся, я́ко ко́сти твоя́ от ран за Христа́ обнажа́хуся; ра́дуйся, я́ко чистота́ души́ твоея́ тогда́ откры́шася.

Ра́дуйся, я́ко насле́довал еси́ небе́сная селе́ния; ра́дуйся, я́ко и ны́не облича́еши злых челове́к на Христа́ хуле́ния.

Ра́дуйся, за Христа́ о́стрыми тростьми́ пробода́емый; ра́дуйся, са́да ра́йскаго цве́те неувяда́емый.

Ра́дуйся, я́ко зла́то горни́лом язв очище́нный; ра́дуйся, за Христа́ уда́ренный.

Ра́дуйся, кончи́ною свое́ю Бо́гу угоди́вый; ра́дуйся, да́же до сме́рти му́ченической Его́ возлюби́вый.

Ра́дуйся, Вонифа́тие, му́чениче многострада́льный.

Кондак 9

Всего́ себе́ Го́споду Бо́гу преда́в, страстоте́рпче Христо́в, егда́ нечести́вый царь повеле́ раскры́ти уста́ твоя́ и о́лово кипя́щее вли́ти, ру́це своя́ воздви́гл еси́ к не́бу, та́ко моля́ся: «Го́споди, Бо́же мой, Иису́се Христе́, укрепи́вый мене́ в му́ках, пребу́ди и ны́не со мно́ю, моя́ страда́ния обле́гчи и не оста́ви мене́ одоле́ну бы́ти лука́вым кня́зем». Тем и нас любви́ ко Христу́ науча́еши, пою́щих Бо́гу: Аллилу́иа.

Икос 9

Вити́и суему́дрении да реку́т нам, ка́ко о́лово разжже́нное горта́ни твоея́ не опали́, ниже́ ина́го вреда́ тебе́ сотвори́, му́чениче Вонифа́тие. От Го́спода бо зна́мения побе́ды над мучи́телем проси́л еси́ и сие́ зна́мение тебе́ дано́ бысть. Сего́ ра́ди вси чудя́щеся восклица́ху: «Ве́лий есть, Иису́се Христе́, ве́руем в Тя, Го́споди». Мы же сла́вим тя, му́чениче, си́це:

Ра́дуйся, я́ко тобо́ю ве́рнии просвеща́ются; ра́дуйся, я́ко тобо́ю от посты́дныя сме́рти избавля́ются.

Ра́дуйся, во еди́нем Христе́ утеше́ние полага́яй; ра́дуйся, во страда́ниях призыва́ти Бо́га науча́яй.

Ра́дуйся, я́ко мучи́телие тебе́ не превозмого́ша; ра́дуйся, я́ко стра́сти тебе́ не поборо́ша.

Ра́дуйся, ты бо те́рния грехо́в в себе́ попали́л еси́; ра́дуйся, ты бо огне́м неопале́н пребы́л еси́.

Ра́дуйся, при́сно живы́й страстоте́рпче ра́достный; ра́дуйся, моли́твенниче наш бла́гостный.

Ра́дуйся, я́ко тобо́ю очеса́ грехми́ ослепле́нныя отверза́ются; ра́дуйся, я́ко по́мощию твое́ю печа́ли на ра́дость прелага́ются.

Ра́дуйся, Вонифа́тие, му́чениче многострада́льный.

Кондак 10

Спасе́н бы́ти восхоте́в, пла́менне возжела́л еси́ до конца́ за Го́спода пострада́ти, му́чениче Вонифа́тие, Ему́же и возопи́л еси́: «Го́споди, Го́споди, Бо́же мой, сподо́би мя ми́лостей Твои́х и бу́ди ми помо́щник, да за беззако́ния моя́, безу́мно соде́янныя, враг не прегради́т ми пути́ к небеси́: приими́ с ми́ром ду́шу мою́, вчини́ мя с му́чениками, кровь за Тя проли́вшими и ве́ру до конца́ соблю́дшими», и ны́не вопию́щими Ти: Аллилу́иа.

Икос 10

Стена́ кре́пкая, ко́зньми врага́ неодоле́нная, пребы́л еси́ до конца́, му́чениче Христо́в. Егда́ же глава́ твоя́ от телесе́ отсече́на бысть, о, чудесе́! А́бие кровь и мле́ко из ра́ны тоя́ истеко́ша, я́ко и неве́рным, чу́до сие́ зря́щим, Христа́ просла́вити и с на́ми зва́ти тебе́:

Ра́дуйся, я́ко муче́ния твоя́ зря́ще, мно́жество люде́й ко Христу́ обрати́шася; ра́дуйся, я́ко тебе́ ра́ди на кня́зя зло́бы они́ устреми́шася.

Ра́дуйся, твоя́ бо кончи́на просвети́ умы́ помраче́нныя; ра́дуйся, твоя́ бо сла́вная смерть воскреси́ со́вести во гресе́х погребе́нныя.

Ра́дуйся, нераска́янных гре́шников обличе́ние; ра́дуйся, во́лей рассла́бленных от вина́ исцеле́ние.

Ра́дуйся, в нощи́ неве́дения блужда́ющих вразумле́ние; ра́дуйся, злата́я у́дице, из глубины́ грехо́в влеку́щая ко спасе́нию.

Ра́дуйся, я́ко от Бо́га в моли́твах услы́шан был еси́; ра́дуйся, я́ко в Небе́снем Ца́рствии всели́лся еси́.

Ра́дуйся, порфи́рою от крове́й твои́х облече́нный; ра́дуйся, я́ко зри́ши ны́не свет неизрече́нный.

Ра́дуйся, Вонифа́тие, му́чениче многострада́льный.

Кондак 11

Пе́ние немо́лчное прино́сиши Го́сподеви, му́чениче Вонифа́тие, с му́ченическими ли́ки Пресвяте́й Тро́ице предстоя́, за Ню́же себе́ преда́л еси́, да и мы, ду́ши своя́, а́ки неве́сты украси́вше, нетле́нному Жениху́ Христу́ предста́вим со свяще́нною пе́снею: Аллилу́иа.

Икос 11

Свет любве́ и по сме́рти возсия́л еси́, Вонифа́тие ди́вный, егда́ бо дру́зи твою́ усече́нную главу́ обре́тше, пла́кахуся го́рько, глаго́люще: «Ра́бе Христо́в, забу́ди нам грех непра́веднаго осужде́ния и безрассу́дных руга́ний на́ших». Тогда́ лик твой, я́ко луча́ми живы́ми просвети́ся, проще́ние им явля́я. Сего́ ра́ди с любо́вию тебе́ зове́м:

Ра́дуйся, име́яй уста́ кро́тости сладковеща́нныя; ра́дуйся, любве́ вмести́лище простра́нное.

Ра́дуйся, о тебе́ бо весели́тся Це́рковь со свои́ми ча́ды; ра́дуйся, ты бо прише́л еси́ к Вы́шнему Небе́сному Гра́ду.

Ра́дуйся, в сме́рти свое́й апо́столом ра́вный; ра́дуйся, ре́вностию по Бо́зе пресла́вный.

Ра́дуйся, жите́йския мо́лвы облича́яй и злы́я сплете́ния; ра́дуйся, всех нас от вра́жия избавля́яй ловле́ния.

Ра́дуйся, ты бо защища́еши непра́ведно гони́мыя; ра́дуйся, пред престо́лом Госпо́дним лампа́до неугаси́мая.

Ра́дуйся, по за́поведи Христо́вой и враго́в люби́вый; ра́дуйся, злосло́вие и клеветы́ ни во что же вмени́вый.

Ра́дуйся, Вонифа́тие, му́чениче многострада́льный.

Кондак 12

Благода́ть исцеле́ний точа́щия мо́щи твоя́, егда́ к Ри́му приближа́хуся, А́нгел Госпо́день яви́ся Аглаи́де, глаго́ля: «Бы́вшаго ти дре́вле раба́, ны́не же на́шего бра́та и сослуже́бника приими́, я́коже влады́ку, и упоко́й до́бре, да греси́ твои́ оста́вятся»; той бо с на́ми ны́не в небесе́х пое́т Всевы́шнему Бо́гу: Аллилу́иа.

Икос 12

Пою́ще чудеса́ твоя́, храм ди́вный созда́ тебе́, во́ине Христо́в, Аглаи́да, в не́мже и мо́щи твоя́ положи́ и сама́ бога́тство ни́щим разда́вши и пятьна́десят лет в по́двизех поста́ и покая́ния пожи́вши, ли́ка святы́х дости́же. Те́мже, велича́юще чудеса́ твоя́, прославля́ем тя си́це:

Ра́дуйся, ду́шу свою́ сотвори́вый, я́ко храм Бо́гу прекра́сный; ра́дуйся, чу́дных Бо́жиих дел кни́го я́сная.

Ра́дуйся, от внеза́пныя сме́рти избавля́яй; ра́дуйся, ско́рбныя жены́ от злых пиа́ниц огражда́яй.

Ра́дуйся, па́дшия к воста́нию от грехо́в призыва́яй; ра́дуйся, свет чистоты́ им подава́яй.

Ра́дуйся, ты бо укроща́еши страсте́й огне́вицу; ра́дуйся, тобо́ю бо оставля́ем грехо́вную темни́цу.

Ра́дуйся, ма́лая ча́да от собла́знов ми́ра соблюда́яй; ра́дуйся, ты́я Христо́ву уче́нию наставля́яй.

Ра́дуйся, ве́стниче тре́звости, во ве́ки просла́вленный; ра́дуйся, уго́дниче Христо́в, при́сно почита́емый.

Ра́дуйся, Вонифа́тие, му́чениче многострада́льный.

Кондак 13

О преди́вный му́чениче Христо́в Вонифа́тие, приими́ от нас сие́ ма́лое похва́льное приноше́ние, е́же пред ико́ною твое́ю коле́на прекло́ньше и ру́це свои́ к тебе́ просте́рше, тебе́ ны́не про́сим: да́руй нам твое́ пред Го́сподем заступле́ние, наипа́че же погиба́ющим от пиа́нства бра́тиям на́шим исцеле́ние низпосли́, жития́ блага́го нача́ло положи́ти всех нас сподо́би, да спасе́ние улучи́вше моли́твами твои́ми, во ве́ки восхва́лим Бо́га, пою́ще Ему́: Аллилу́иа.

Этот кондак читается трижды.

Икос 1

А́нгелом све́тлым, огнь муче́ний твои́х росо́ю благода́ти угаси́вшим, огражде́н был еси́, страда́льче Христо́в Вонифа́тие, да я́ко гре́шник нераска́янный не поги́бнеши и пред Го́сподем в оде́жде бра́чней предста́неши. Научи́ и нас облещи́ся в све́тлыя ри́зы свя́тости, тебе́ зову́щих:

Ра́дуйся, жизнь за Христа́ отда́вый; ра́дуйся, страда́ниям Его́ подража́вый.

Ра́дуйся, о́чи своя́ к Бо́гу обрати́вый; ра́дуйся, во́лю свою́ в добродете́лех укрепи́вый.

Ра́дуйся, ра́бе Христо́в ве́рный; ра́дуйся, святы́й коне́ц жития́ своего́ прие́мый.

Ра́дуйся, к покая́нию сердца́ обраща́яй; ра́дуйся ко Христу́, Пути́ и́стинному, приводя́яй.

Ра́дуйся, Ду́хом Святы́м просвеще́нный; ра́дуйся, собла́знами ми́ра сего́ не прельще́нный.

Ра́дуйся, зми́я лука́ваго посрами́вый; ра́дуйся, святы́х лик возвесели́вый.

Ра́дуйся, Вонифа́тие, му́чениче многострада́льный.

Кондак 1

Избра́нный во́ине Христо́в, венце́м сла́вы укра́шенный, му́ченической сме́ртию ве́чныя сме́рти изба́вивыйся, от мра́ка грехо́внаго отврати́выйся и к ве́чному све́ту прише́дый, приими́ моле́ние на́ше, в похвалу́ тебе́ приноси́мое, и нас изба́ви от се́тей лука́ваго врага́ на́шего, да тебе́ с ра́достию побе́дною зове́м: Ра́дуйся, Вонифа́тие, му́чениче многострада́льный.

Молитва первая

О, многострада́льный и всехвальный му́чениче Вонифа́тие! Ко твоему́ заступле́нию ны́не прибега́ем, моле́ний нас, пою́щих тебе́, не отве́ржи, но ми́лостивно услы́ши нас. Виждь бра́тию и се́стры на́ша, тя́жким неду́гом пиа́нства одержи́мыя, виждь того́ ра́ди от ма́тери своея́, Це́ркве Христо́вой, и ве́чнаго спасе́ния отпа́дающия.

О, святы́й му́чениче Вонифа́тие, косни́ся се́рдца их да́нною ти от Бо́га благода́тию, ско́ро возста́ви от паде́ний рехо́вных и ко спаси́тельному воздержа́нию приведи́ их. Умоли́ Го́спода Бо́га, Его́же ра́ди страда́л еси́, да прости́в нам согреше́ния на́ша, не отврати́т ми́лости Своея́ от сыно́в Свои́х, но да укрепи́т в нас трезве́ние и целому́дрие, да помо́жет Свое́ю десни́цею трезвя́щимся спаси́тельный обе́т свой до конца́ сохрани́ти во дни и нощи́, о Нем бо́дрствующе и о Нем до́брый отве́т на стра́шнем суди́лище да́ти. Приими́, уго́дниче Бо́жий, моли́твы ма́терей, о ча́дех свои́х сле́зы пролива́ющих, жен честны́х, о муже́х свои́х рыда́ющих, чад си́рых и убо́гих, от пиа́ниц оста́вленных, всех нас, к ико́не твое́й припа́дающих, и да прии́дет сей вопль наш моли́твами ко Престо́лу Всевы́шняго дарова́ти всем по моли́твам их здра́вие и спасе́ние душ и теле́с, наипа́че же Ца́рство Небе́сное. Покры́й и соблюди́ нас от лука́ваго уловле́ния и всех козне́й вра́жиих, в стра́шный час исхо́да на́шего помози́ прейти́ непреткнове́нно возду́шныя мыта́рства и моли́твами твои́ми изба́ви ве́чнаго осужде́ния. Умоли́ же Го́спода дарова́ти нам к оте́честву на́шему любо́вь нелицеме́рную и непоколеби́мую, пред врага́ми Це́ркве Святы́я ви́димыми и неви́димыми, да покры́ет нас ми́лость Бо́жия в несконча́емыя ве́ки веко́в. Ами́нь.