Текст книги "Ko`rinmas odam"

V bob
VIKARIYNING UYINI O‘G‘RI URDI

Vikariyning uyini o‘g‘ri urganini biz asosan vikariyning o‘zi va uning xotinidan eshitdik. Bu voqea arvoh kuni tong qorong‘isida yuz berdi. Har yili shu kuni Ayping klubi bayram qiladi. Missis Banting tun qorong‘isidagi sukunatda yotoqxonaning eshigi taraqlab yopilganini aniq eshitdi-yu, daf’atan uyg‘onib ketdi. Avvaliga u erini uyg‘otgisi kelmay, karavotda o‘tirib olib quloq sola boshladi. Ayol yalangoyoqlarning shapillab yurganini aniq eshitdi, go‘yo birov hojatxonadan chiqib, dahlizdan zinapoya tomon o‘tganday bo‘ldi. Shunda u iloji boricha ehtiyotlik bilan janob Bantingni uyg‘otdi. Janob Banting uyg‘onib, voqeani tushungach, chiroqni yoqib o‘tirmay, ko‘zoynagini taqdi-da, xotinining xalati va yengil shippagini kiyib yo‘lakka chiqdi. U pastdagi o‘z xonasida kimdir nimanidir titkilayotganini aniq eshitdi, keyin allakim qattiq aksirdi.

Shunda janob Banting yotoqxonaga qaytdi, uyidan arang topilgan eng e’timodli aslaha bo‘lmish kosovni qo‘liga oldi-da, tiq etgan tovush chiqarmaslikka harakat qilib, zinapoyadan ohista pastga tushdi. Missis Banting ham erining ketidan yo‘lakka chiqdi.

Soat to‘rtlar chamasi edi, qorong‘ilik siyraklashib borardi. Dahliz yorishib qolgan, lekin xonaning eshigi raxigina ko‘rinardi. Sukunatni janob Bantingning oyog‘i ostidagi zinapoyalarning sezilar-sezilmas g‘ijillagani-yu, xonadan eshitilayotgan ohista shitirlash buzardi, xolos. Keyin bir narsa «sharaq» etdi, stol tortmasi ochilgani eshitilib, qog‘ozlar shitirladi. Kimdir so‘kindi-da, gugurt chaqdi, xonaga sarg‘ish nur taraldi. Bu vaqtda janob Banting dahlizga tushgan bo‘lib, qiya ochiq turgan eshikdan tortmasi chiqarib qo‘yilgan yozuv stoli va uning ustidagi yonib turgan shamni ko‘rib qoldi. Biroq o‘g‘ri ko‘rinmasdi. Janob Banting yo‘lakda nima qilishini bilmay turardi, orqasidan esa qo‘rqib ketganidan rangi quv o‘chgan missis Banting zinapoyadan asta-sekin tushib kelardi. O‘g‘ri o‘zi yashayotgan hududdan bo‘lishi kerak degan ishonch janob Bantingning yuragiga birmuncha dalda berdi.

Keyin ular pulning jiringlashini eshitishdi va o‘g‘ri ro‘zg‘or uchun olib qo‘yilgan mablag‘ – yarim soverenlik ikki funt-u o‘n shilling pulni topib olganini anglashdi. Bu holat janob Bantingning kuchiga kuch qo‘shib yubordi. U kosovni mahkam ushlaganicha xonaga bostirib kirdi. Missis Banting ham erining ketidan qolmay, xonaga kirdi.

– Taslim bo‘l! – g‘azab bilan qichqirdi janob Banting va hayron bo‘lib to‘xtab qoldi: xonada hech zog‘ yo‘q edi.

Biroq bundan bir daqiqacha oldin, shak-shubhasiz, bu yerda kimdir yurgandi. Er-u xotin yarim daqiqacha dong qotib turdilar, keyin missis Banting darpardani ochib ko‘rdi, janob Banting bo‘lsa, engashib stolning ostiga qaradi-da, keyin kaminning ichiga nazar tashlab, kosov bilan uning quvurini titib ko‘rdi. Ular qog‘oz solinadigan savatni ham, ko‘mir solingan qutini ham tekshirib chiqishdi. Shundan so‘ng ular hayron bo‘lishib bir-birlariga baqrayganlaricha qarab qolishdi.

– O‘lay agar… – dedi janob Banting. – Ha, aytmoqchi, shamchi! – deb xitob qildi u, – shamni kim yoqdi?

– Quti-chi! – dedi missis Banting.

– Pullar qayoqqa ketdi?

Missis Banting shoshilib eshik tomon yurdi.

– Umrim bino bo‘lib bunaqangi…

Dahlizda allakim qattiq aksirdi. Ular xonadan yugurib chiqishdi, shu payt oshxonaning eshigi taraq etib yopilgani eshitildi.

Shamni keltir-chi, – dedi janob Banting va oldinga qarab yurdi. Ular kimdir shosha-pisha eshikning tambasini olib tashlayotganini aniq eshitishdi.

Oshxonaning eshigini ocha turib, janob Banting ko‘cha eshikning ochilayotgani va tongning g‘ira-shira yorug‘ida bog‘dagi ko‘katlar qorayib ko‘zga chalinganini ko‘rdi. Biroq keyinchalik u eshikdan hech kim chiqqani yo‘q, buni o‘z ko‘zim bilan ko‘rdim, deb yurdi. Eshik ochildi-yu, keyin taraqlab yopildi. Missis Banting olib kelayotgan sham lipillab, ravshanroq yondi. Ular oshxonaga qaytib kirishguncha oradan bir necha daqiqa vaqt o‘tdi.

U yerda ham hech kim yo‘q edi. Ular eshikni qaytadan tambalashdi, oshxonani, qaznoqni va idish-tovoq saqlanadigan xonani diqqat bilan ko‘zdan kechirishdi, nihoyat, yerto‘laga tushishdi. Biroq qanchalik sinchiklab axtarishmasin, hech kimni topisha olmadi.

Tong otganida vikariy bilan xotini juda antiqa libosda, hamon uylarining pastki qavatida, tamom bo‘layotgan shamning oldida o‘ylayverib boshlari qotgan holda o‘tirishardi.

– Umrim bino bo‘lib bunaqangi… – yigirmanchi marta derdi vikariy.

– Azizim, – deb uning gapini bo‘ldi missis Banting, – o‘sha Syuzi kelyapti. U oshxonaga o‘tib ketsin, keyin biz kirib kiyinaylik.

VI bob
QUTURGAN MEBEL

O‘sha kuni ertalab, ya’ni arvohlar kuni tong qorong‘isida hatto oqsoch qiz Milli ham uxlab yotarkan, janob va missis Xoll o‘rinlaridan turib, sezdirmasdan yerto‘laga tushishdi. Yerto‘lada ularning pivoni kuchli qilishga andak aloqador bo‘lgan ishlari bor edi.

Pastga tushishga ulgurmasidanoq missis Xoll yotoqxonalarida turgan sarsaparelli shishani unutganini esladi. Qilinajak ishning ustasi missis Xoll bo‘lganidan, shishani olib kelish uchun tepaga eri chiqdi.

Janob Xoll zinapoyaga chiqqach, ijarachi turadigan xonaning eshigi qiya ochiqligini ko‘rib hayron bo‘ldi. Yotoqxonaga kirib shishani xotini aytgan joydan topdi.

Biroq erto‘laga qaytib tushayotganda, ko‘cha eshigining tambalari ochib qo‘yilgani, eshik lo‘kidon bilangina berkitilganini payqab qoldi. Janob Xollning xayoliga bir gap keldi-yu, buni u darhol ijarachining qiya ochiq eshigi hamda Teddi Xenfrining shubhalari bilan taqqosladi. Chunki kechasi missis Xoll eshikni tambalayotganida, o‘zi sham ushlab turganini aniq eslardi. U hang-u mang bo‘lib to‘xtab qoldi, keyin qo‘lidagi shishasi bilan yuqoriga qaytib chiqdida, ijarachining eshigini taqillatdi. Ichkaridan javob bo‘lmadi. U yana bir bor taqillatdi-da, so‘ng eshikni lang ochib ichkariga kirdi.

Haqiqatan ham o‘zi o‘ylaganday bo‘lib chiqdi. Xonada hech zog‘ yo‘q bo‘lib, o‘rin taxi buzilmay turardi. Noma’lum kishining engil-boshi kresloda, karavot panjarasida palapartish osilib yotardi, uning bintlari va keng soyabonli shlyapasi ham karavotda osig‘liq turardi. Ijarachining boshqa kiyimi bo‘lmagani uchun bu hol hatto zehni uncha o‘tkir bo‘lmagan Xollga ham nihoyatda taajjublanarli holat edi.

U xona o‘rtasida dovdirab turarkan, pastdan, yerto‘ladan xotinining G‘arbiy Susseks aholisiga xos bo‘lgan chiyildoq ovozini eshitdi. Missis Xollning labi labiga tegmay bobillab gapirishi uning juda ham toqati toq bo‘lib ketganidan darak berardi.

– Jorj! – deb baqirardi ayol. – Kerakli narsani topdingmi?

U burilib xotini yoniga shoshildi.

– Jenni! – deb qichqirdi u, yerto‘laga tushiladigan zinapoya panjarasi ustidan engashib. – Xenfrining gapi to‘gri chiqib qoldi-ku. Ijarachimiz uyda yo‘q. Ko‘cha eshikning ham tambasi ochilib yotibdi.

Avvaliga missis Xoll gap nimada ekanini tushunmadi, keyin voqeaning qanchalik jiddiy ekanini fahmlagach, bo‘sh yotgan xonani o‘zi borib ko‘rmoqchi bo‘ldi. Hali ham shishani qo‘lidan qo‘ymagan janob Xoll oldinga tushib yo‘l boshladi.

– Uning o‘zi yo‘q, kiyimlari esa shu yerda, – dedi janob Xoll.

– Qipyalang‘och ahvolida qayerda sang‘ib yurganikin? Taajjub.

Ular yerto‘laning zinapoyasidan chiqayotganlarida, keyinchalik ma’lum bo‘lishicha, xuddi birov ko‘cha eshikni ochganday, so‘ng qaytadan yopib qo‘yganday tuyuldi, lekin eshikning yopiq turganini ko‘rib, er-u xotin o‘sha daqiqada bir-birlariga hech nima demadilar. Dahlizda missis Xoll erining oldiga o‘tdi-da, zinapoyaga birinchi bo‘lib chiqdi. Shu payt ularning yonida allakim aksirib yubordi. Olti pog‘ona pastda bo‘lgan Xoll xotinim aksirdi deb o‘yladi, xotini esa eri aksirganiga amin edi. Missis Xoll yuqoriga chiqib, eshikni lang ochdi-da, musofirning xonasini ko‘zdan kechira boshladi.

– Umrim bino bo‘lib bunaqasini ko‘rmaganman! – dedi u.

Shu mahal, uning shundoq yonginasida allakim tomoq qirib qo‘ydi, missis Xoll orqasiga o‘girildi-yu, hang-mang bo‘lib qoldi, chunki eri yigirma qadam chamasi narida, zinapoyaning yuqori pog‘onasida turgan edi. Buni ko‘rib, janob Xoll darrov xotinining yoniga keldi. Xotini esa engashib, yostiq va ko‘rpaning jildini paypaslab ushlab ko‘rdi.

– Sovuq, – dedi u, – uning bu yerdan chiqib ketganiga bir soatdan ko‘proq bo‘libdi, – Missis Xoll shu so‘zlarni aytib ulgurmasidanoq aqlga sira to‘g‘ri kelmaydigan qiziq bir hodisa yuz berdi: ko‘rpaning jildi o‘zidan-o‘zi g‘ijimlanib, karavotning panjarasi ustidan uchib o‘tdi. Allakimning qo‘li ko‘rpa bilan choyshabni g‘ijimlab, yerga olib tashlaganday bo‘ldi. Shundan so‘ng noma’lum kishining shlyapasi osig‘liq turgan joyidan sakrab ko‘tarildi-da, havoda yarim doira yasab borib, missis Xollning basharasiga urildi. Undan keyin o‘shanday tezlik bilan yuvinish idishi oldidagi sovun ham havoda g‘izillab uchdi; shundan so‘ng kreslo noma’lum kishining kostyumi bilan shimini silkib tushirdi-da, ijarachining o‘ziga o‘xshab qiqirlab kulganicha yonboshladi va oyoqlarini missis Xoll tomonga o‘girib, unga hamla qildi. Missis Xoll dod solib eshik tomonga o‘girildi, kresloning oyoqlari esa uning yelkasiga ohista tiralib, janob Xoll bilan ikkalasini xonadan itarib chiqardi. Eshik yopilib, qulfning sharaqlagani eshitildi. Kreslo bilan karavot, go‘yo g‘alabani nishonlagandek, yana bir oz raqs tushib turdi-da, keyin hamma yoq tinchib qoldi. Missis Xoll deyarli hushsiz holda erining qo‘liga osilib qoldi. Janob Xoll, baqiriq-chaqiriq va shovqin-surondan uyg‘onib ketgan Millining yordamida xotinini zo‘r-bazo‘r pastga olib tushib, unga dori ichirdi.

– Bu ins-jinslarning ishi, – dedi missis Xoll, nihoyat, o‘ziga kelib. – Bilaman, bu ins-jinslarning ishi. Men ular to‘g‘risida gazetada o‘qigan edim. G‘azetada yozishlaricha, stollar va stullar irg‘ishlab raqs tusha boshlarkan…

– Yana ozroq ich, – uning so‘zini bo‘ldi Xoll. – Sal o‘zingga kelasan.

– Eshikni qulfla, – dedi missis Xoll. – Hushyor bo‘l, endi uni uyga kiritma. Men hamisha undan shubhalanardim… Nega g‘aflatda qoldim-a! Ko‘zi ko‘rinmasdi, boshi bint bilan chirmab tashlangan edi, yakshanba kuni bo‘lsa-yu, cherkovga sira bormasdi. Shishalarining son-sanog‘i yo‘q!.. Kiroyi odam uchun shuncha shishaning nima keragi bor! U mebelga insjinslarni kiritibdi… Aziz va ko‘hna mebellarim! Men jajjigina qizaloq vaqtimda onajonim ana shu kresloda o‘tirishni yaxshi ko‘rardi. Endi kelib-kelib uni menga qarshi qo‘zg‘alganiga hayron qolasan kishi…

– Doridan yana bir tomchi ich, Jenni, – dedi Xoll, – asabing bugun juda qattiq buzilib ketdi.

Soat besh bo‘ldi, tong yorishib ko‘chalarga quyosh nur socha boshladi. Er-u xotin Millini ro‘paralarida yashaydigan temirchi janob Sendi Uojersni aytib chiqish uchun yuborishdi.

– Xo‘jayinim sizga salom aytdilar, – dedi Milli temirchiga.

– Bizning uydagi mebellarga bir balo bo‘ldi. Kirib bir ko‘rib chiqasizmi-a?

Janob Uojers juda bilimdon va zehni o‘tkir odam edi. U Millining hikoyasini jiddiy qabul qildi.

– O‘lay agar, bu sehr-jodu-ku! – Bunday ijarachiga faqatgina tuyoq kamlik qiladi, xolos.

U janob Xollnikiga tashvishli bir qiyofada keldi. Janob va missis Xoll u bilan yuqori qavatga chiqmoqchi bo‘lishdi, biroq temirchi bunday qilishga shoshilmadi. U suhbatni dahlizda davom ettirishni afzal ko‘rdi. Xakstersning do‘konidan gumashta chiqib, do‘konning deraza va eshiklarini ocha boshladi. Uni yuz bergan voqeaning muhokamasida ishtirok qilishga taklif etishdi. Oradan bir necha daqiqa o‘tgach, janob Xakstersning o‘zi ham yetib keldi. Anglosaksonlar parlamentiga xos bo‘lgan ruh bu yerda ham o‘zini yaqqol namoyish qildi, ya’ni ko‘p gapirildi-yu, lekin amaliy ishga kirishilmadi.

– Avval faktlarga oydinlik kiritaylik, – deb o‘z fikrini o‘tkazishga harakat qilardi janob Sendi Uojers. – Xonaning eshigini buzib kirishimiz to‘g‘ri bo‘larmikin, yo‘qmi, ana shu masalani muhokama qilaylik. Qulflangan eshikni har mahal ham buzish mumkin, biroq eshik buzilgandan keyin uni buzilmagan deb isbot qilib bo‘lmaydi-da.

Lekin qo‘qqisdan, hammani ajablantirib, ijarachining eshigi o‘z-o‘zidan ochildi. Shunda ular yuqoriga qarab, o‘ranib-chirmanib olgan noma’lum kishining o‘zidan ham vahimali ko‘zoynagini yaltiratib zinapoyadan tushib kelayotganini ko‘rdilar. U qaqqayib qadam tashlaganicha, zinapoyadan asta tushib keldi-da, dahlizdan o‘tib to‘xtadi.

– Anavini qaranglar, – dedi u qo‘lqopli barmog‘ini bigiz qilib.

Odamlar u ko‘rsatgan tomonga qarab, yerto‘la eshigi oldida turgan quti to‘la shishani ko‘rdilar. Noma’lum kishi esa mehmonxonaga kirdi-yu, qo‘qqisdan zarda bilan eshikni taraqlatib yopib oldi.

Bir daqiqacha hech kim churq etib og‘iz ochmadi. Hamma sukut saqlab bir-biriga boqardi.

– Ochig‘ini aytsam, bezbetlik ham evi bilan… – deb gap boshlagan Uojers jumlani tugatolmay qoldi.

– Sizning o‘rningizda men bo‘lganimda, oldiga borib «bu nima qiliq o‘zi?» deb surishtirgan bo‘lardim, – dedi Xaksters Xollga. – Men bu qilg‘ilig‘ini izohlab berishini talab qilardim.

Shunday qilish zarurligini janob Xollga tushuntirish uchun ancha-muncha vaqt sarf bo‘ldi. Nihoyat, Xoll eshikni taqillatib ochdi-da, gap boshladi:

– Kechirasiz…

– Tuyog‘ingizni shiqillatib qoling! – deb baqirdi noma’lum kishi darg‘azab bo‘lib. – Eshikni yoping!

Shuncha muhokama shu bilan tugadi.

VII bob
NOMA’LUM KISHINING FOSH QILINISHI

Noma’lum kishi mehmonxonaga ertalab soat besh yarimlarda kirib, u yerda taxminan peshingacha ishladi. Mehmonxonaning darpardalari tushirilgan, eshik ichkarisidan qulflangan edi.

Xollning ishi o‘ngidan kelmagach, ortiq hech kim yurak yutib u yerga kirishga jur’at etmadi. Shu vaqt mobaynida noma’lum kishi hech nima yemagan bo‘lsa kerak, uch marta qo‘ng‘iroq chaldi, uchinchi safarida esa u jahl bilan uzoq chaldi, biroq hech kim unga javob bermadi.

– Qarab tursin hali, men unga «tuyog‘ingizni shiqillatib qoling»ni ko‘rsatib qo‘yaman, – po‘ng‘illardi qo‘ng‘iroqlarga javoban missis Xoll.

Vikariyning uyida kechasi yuz bergan mojaro haqidagi ovoza tarqalib bo‘lgandi va odamlar har ikkala voqea orasida allaqanday aloqadorlik bor deb hisoblashardi. Xoll Uojers bilan birga maslahatlashish uchun sudya janob Sheklforsning uyiga jo‘nadi. Yuqoriga chiqishga hech kimning yuragi dov bermasdi. Shu vaqt mobaynida musofir nima ish bilan mashg‘ul bo‘lgani ma’lum emas. Goho u xonaning u burchagidan bu burchagiga yurardi, uning xonasidan ikki marotaba so‘kinish, qog‘ozlarning sharillab yirtilgani va shishaning singani eshitildi.

Vahimaga tushgan, lekin sinchkovligi ichiga sig‘mayotgan odamlar to‘dasi tobora ko‘payib borardi. Missis Xaksters ham to‘daga kelib qo‘shildi.

Oradan bir oz vaqt o‘tgach, bayram munosabati bilan qora kostyum va oq pikedan galstuk taqib, yasanib olgan bir talay o‘ktam yigitchalar yetib kelishdi-da, bema’ni savollar bera boshlashdi. Archi Xarker hammadan ko‘ra dovyurakroq chiqib qoldi: u hovliga kirib, tushirib qo‘yilgan darparda ostidan ichkariga mo‘ralashga urindi. U hech narsa ko‘ra olmadi, lekin ko‘ryapman deb ishora qildi. Aypinglik yosh-yalanglardan yana ba’zi birlari uning yoniga borishdi.

Bayram kuni havo iliq va ochiq keldi. Qishloq ko‘chasida o‘nlarcha do‘konchalar va otishni mashq qiladigan «tir»lar paydo bo‘ldi, temirchilik ustaxonasi oldidagi o‘tloqda sarg‘ish-jigarrang bilan ola-bula qilib bo‘yalgan arava turardi, ularning yonida g‘alati kiyingan allaqanday odamlar norjil yong‘og‘i otish musobaqasini o‘tkazish uchun asbob hozirlashardi. Erkaklar zangori jun jemfer kiygan, ayollar esa oq peshband taqib, o‘sha vaqtda keng rasm bo‘lgan katta jig‘a sanchilgan shlyapa kiyib olgan edilar. «Qizil bug‘u» qovoqxonasining xo‘jayini Uojer va minilgan velosipedlarni olib-sotish bilan ham shug‘ullanadigan etikdo‘z janob Jeggeres ko‘cha uzra milliy bayroq hamda qirol bayroqchalaridan yasalgan (ular qirolicha Viktoriyaning yubileyi bayramidan qolgan edi) chambaraklarni ko‘ndalang qilib tortishmoqda edi.

Derazalarning pardalari tushirilgan, g‘ira-shira mehmonxonada, aftidan, och qolib, zardasi qaynagan musofir o‘rab-chirmab olgan bintlari ichida issiqda hansirab, irkit shishalarni jiringlatar va zangori ko‘zoynagi ostidan bir varaq qog‘ozga qaragani holda derazasi oldiga yig‘ilgan bolalarni bo‘ralab so‘kar edi. Burchakdagi kaminning yonida besh-oltita singan shishaning parchalari yotar, havoni esa dimog‘ni chatnatib yuboradigan xlor hidi tutib ketgan edi. Buni o‘z ko‘zi bilan ko‘rgan kishilarning hikoyasidan bizga ma’lum bo‘lgan narsalar ana shular, chunki ular kirgan mahalda xona shu ahvolda ekan.

Peshinga yaqin musofir mehmonxonaning eshigini daf’atan ochdi-da, ichkilik sotiladigan peshtaxta oldida uymalashib turgan uch-to‘rt odamga tikilganicha ostonada to‘xtadi.

– Missis Xoll! – deb qichqirdi u.

Allakim missis Xollni chaqirib kelish uchun istaristamas o‘rnidan turdi.

Ko‘p o‘tmay yuzida qat’iy ifoda bilan bir oz entikkan missis Xoll yetib keldi. Janob Xoll hali qaytmagan edi. Missis Xoll hamma narsani yaxshilab o‘ylab ko‘rgan bo‘lib, qo‘lida kichkinagina patnis ko‘tarib keldi. Patnisda to‘lanmagan qarzlarning ro‘yxati bor edi.

– Qarzlarni to‘lamoqchimisiz? – deb so‘radi qovoqxona bekasi.

– Nima uchun menga nonushta bermadingiz? Nega menga ovqat tayyorlamadingiz va qo‘ng‘iroqlarimga javob bermadingiz? Nima, meni ovqatsiz ham yashayveradi deb o‘ylayapsizmi?

– Xo‘sh, nega o‘zingiz qarzni to‘lamadingiz? – deb e’tiroz bildirdi missis Xoll. – Men mana shuni bilmoqchiman.

– Bundan to‘rt kun burun aytdim-ku sizga, pul yuborishlarini kutyapman deb…

– Men bo‘lsam, kechagina sizga hech qanaqangi pul yuborishlarini kutmoqchi emasligimni aytgan edim. Besh kundan beri haq to‘lamaganingizdan keyin nonushta kechikyapti deb do‘ng‘illashga hech qanday o‘rin yo‘q.

Ijarachi boloxonador qilib so‘kinib qo‘ydi.

– Hoy, og‘zingizga qarab gapiring! – dedi peshtaxta yonida turganlardan biri.

– Mumkin bo‘lsa, janob, so‘kinishlarini o‘zlari uchun asrab qo‘ysalar, – dedi missis Xoll.

Ijarachi jim bo‘lib, ostonada turib qoldi. U shu turishida achchig‘i qistagan g‘avvosga o‘xshab ketardi. Qovoqxonadagilarning hammasi missis Xollning qo‘li baland kelganini sezib turishardi. Noma’lum kishining keyingi gaplari bu fikrning to‘g‘riligini tasdiqladi.

– Mana qarang, jonginam… – deb gap boshladi u.

– Men sizning jonginangiz emasman, – javob qildi missis Xoll.

– Aytyapman-ku, menga hali pul yuborishgani yo‘q…

– E qanaqasiga pul yuborishardi! – dedi missis Xoll.

– Lekin hozir cho‘ntagimda bir oz…

– Uch kun avval bir tiyinim ham yo‘q degan edingiz-ku.

– Hozir undan ko‘ra ko‘proq topdim.

– Oho! – degan tovush eshitildi peshtaxta oldidan.

– Qayerdan pul topganingizni bilsak bo‘ladimi? – dedi missis Xoll.

Bu gap musofirga yoqmadi chogi, u depsindi.

– Bu bilan nima demoqchisiz? – so‘radi u.

– Bu pul sizga qayoqdan kelib qolganini bilmoqchiman, xolos, – dedi missis Xoll. – Sizga nonushta tayyorlashdan, umuman, siz uchun biron narsa qilishdan avval, men anglamaydigan, hech kim ham tushunmaydigan, lekin hammamiz ham anglashni istaydigan ba’zi bir narsalarni izohlab berishingizni so‘rardim. Men yuqoridagi kresloni nima qilganingizni, nega xonangiz bo‘m-bo‘sh bo‘lib qolgani-yu, keyin qanday qilib qaytadan u yerga kirib olganingizni bilmoqchiman. Ijarachilarimning hammasi eshikdan kirib, eshikdan chiqishadi: uyimda shunday tartib o‘rnatilgan. Siz bo‘lsangiz, boshqacha yo‘l tutyapsiz, men esa xonaga qanday kirib-chiqishingizni bilgim keladi. Yana…

Noma’lum kishi birdaniga qo‘lqopli qo‘lini ko‘tarib, mushtini tugdi-da, yer tepinib «to‘xtang!» – deb baqirdi, baqirganda ham shunday jazavaga tushib baqirdiki, missis Xoll shu ondayoq jim bo‘lib qoldi.

– Mening kim ekanligimni va nima ish bilan shug‘ullanayotganligimni tushunmaysiz, – dedi u. – Hozir sizga ko‘rsataman. Xudo haqi, ko‘rsataman! – Shu so‘zlarni aytarkan, u qo‘lini basharasiga olib borib, shu zahoti tortib oldi. Yuzining o‘rtasida qopqora bo‘lib chuqurlik ochilib qoldi. – Mana, ushlang, – shunday deb musofir missis Xoll tomon qadam tashladi-da, uning qo‘liga allanimani tutqizdi. Uning o‘zgarib ketgan basharasidan ko‘z uza olmagan missis Xoll u tutqizgan narsani beixtiyor qo‘liga oldi. Keyin olgan narsasining nima ekanini ko‘rgach, dod deb yubordi-da, uni yerga uloqtirib, orqasiga tisarila boshladi. Polga burun – noma’lum kishining pushti rang, yaltiroq burni yumalab ketdi.

Keyin musofir ko‘zoynagini olgan edi, yig‘ilganlarning hammasi hayratdan baqrayib qolishdi. U shartta shlyapasini yechdi-da, g‘azab bilan bakenbardi hamda bintlarni yulqib tashlay boshladi. Bakenbardi bilan bintlar darrov ko‘chib qo‘ya qolmadi. Kishilar dahshatdan tirrakday qotib qolishdi.

– Yo alhazar! – deb yubordi allakim.

Nihoyat, bintlar uzilib tushdi.

Shu mahal yig‘ilganlarning ko‘z o‘ngida namoyon bo‘lgan manzara kutilgandan ham ko‘ra dahshatliroq edi. Ajablanib og‘zini ochib turgan missis Xoll o‘takasi yorilib baqirib yubordi-yu, eshik tomon yugurdi. Hamma irg‘ib o‘rnidan turib ketdi. Odamlar jarohat, mayib-majruhlikni, ya’ni ko‘z bilan ko‘rish mumkin bo‘lgan dahshatli manzarani kutishgandi, biroq bunday qarasalar, hech nima yo‘q. Bintlar bilan yasama soch o‘sha yerda turgan odamlarning yuziga tegay deb qovoqxona peshtaxtasiga kelib tushdi. Hamma bir-birini bosib-yanchib zinapoya oldidan ura qochdi, chunki mehmonxona ostonasida tuturuqsiz gaplar gapirib, paltosining yoqasigacha odam shaklida bo‘lgan bir ko‘laga turardi, undan yuqorida esa hech nima yo‘q edi. Ha, ha, hech nima yo‘q edi! Ayping aholisi «Aravakash» qovoqxonasidan kelayotgan qiy-chuv, shovqin-suronni eshitdi va u yerda o‘tirgan odamlarning zing‘illab qochib chiqishayotganini ko‘rdi. Xaloyiq missis Xollning yiqilgani va janob Teddi Xenfri unga qoqilib ketmay deb ustidan sakrab o‘tganini ko‘rdi. Keyin ular shovqin-suronni eshitib, oshxonadan yugurib chiqqan va birdaniga boshsiz musofirga duch kelgan Millining dahshatli chinqirig‘ini eshitdilar.

So‘ng oqsoch qiz birdan jim bo‘lib qoldi.

Shundan keyin ko‘chadagilarning hammasi – qandolatfurush, merganbozlik do‘konining egasi va uning yordamchisi, arg‘imchoqlarning xo‘jayini, bolalar va qizchalar, qishloq oliftalari, mahalliy oyimchalar, munkaygan chollar va fartuk tutgan lo‘lilar qovoqxona tomon yopirilishdi. Oradan bir daqiqa ham o‘tmay, missis Xollning qovoqxonasi oldida qirqqa yaqin kishi to‘plandi, olomon tobora ko‘payib borar, hamma shovqin-suron qilar, ovozlarini barala qo‘yib baqirar, chinqirar, savol so‘rashar, undoq emasmikan, mundoq emasmikan, deb «fol» ochishardi. Hech kim bir-birining gapiga quloq solmas, hamma baravariga gapirardi – haqiqiy qiyomat-qoyimning o‘zginasi edi. Bir necha kishi deyarli behush yotgan missis Xollni o‘rnidan turg‘izib, uni suyab turishardi. Qiy-chuv orasida voqeaga shohidlardan biri boshqalardan ko‘ra qattiqroq baqirishga urinib, aqlga to‘g‘ri kelmaydigan narsalarni gapirardi.

– Jodugar!

– U nima qilib qo‘ydi o‘zi?

– Oqsochni yarador qildi.

– Ularga pichoq olib yugurdi, chog‘i.

– Quruq so‘z emas, haqiqatan ham boshsiz ekan.

– Boshsiz deyapmiz-ku, axir!

– Bo‘lmagan gap, biror fokus-mokus bo‘lsa kerak.

– Bintlarni yechgan zahoti…

Ochiq turgan eshikdan mo‘ralamoqchi bo‘lgan olomondan jonli pona hosil bo‘lgandi. «Pona»ning qovoqxona tomondagi «qirra»sida eng dovyurak kishilar turardi.

– U ostonada turgandi. Birdan qiz chinqirib yubordi, u o‘girilib qaradi, qiz bo‘lsa, ura qochib qoldi. U qizning ketidan quvib ketdi. Bir daqiqada hamma ish saranjom bo‘ldi. Shundan so‘ng u bir qo‘lida pichoq, ikkinchisida bir bo‘lak non bilan orqasiga qaytdi-da, xuddi bir narsaga qarab turgandek to‘xtab qoldi. Hozirgina bo‘ldi shu ish. U anovi eshikka kirib ketdi. Sizga aytyapman-ku: unda bosh degan narsadan nom-u nishon yo‘q. Bir daqiqacha oldinroq kelganingizda, o‘zingiz…

Orqa qatorda harakat boshlandi. Hikoyachi jim bo‘ldi-da, jangovar qiyofada uy tomon kelayotgan kichkinagina to‘daga yo‘l berib, chetga chiqdi. To‘daning boshida qip-qizarib ketgan janob Xoll shaxdam qadam tashlardi, keyin politsiyachi Bobbi Jeffers va nihoyat, ehtiyot yuzasidan eng orqaga o‘tib olgan Uojers kelardi. Ularning qo‘lida noma’lum kishini qamoqqa olish haqida buyruq bor edi.

Odamlar bir-birlariga gal bermay, ularni so‘nggi yangiliklardan xabardor qilardilar, biri bir narsa deb qichqirsa, ikkinchisi tamoman boshqa narsani aytardi.

– Boshi bormi yoki yo‘qligidan qat’iy nazar, – dedi Jeffers, – menga uni qamoqqa olish to‘grisida buyruq berishdi, men ana shu buyruqni ado etaman.

Janob Xoll zinapoyadan chiqib to‘g‘ri mehmonxonaga bordi-da, eshikni ochdi.

– Politsiya kapitani, – dedi u, – qani o‘z burchingizni ado eting.

Mehmonxonaga avval Jeffers, uning orqasidan Xoll va oxirida Uojers kirdi. Nim qorong‘ilikda ular bir qo‘lida yeb tugatilmagan non, ikkinchi qo‘lida pishloq tutgan boshsiz musofirni ko‘rdilar; uning ikkala qo‘lida ham qo‘lqop bor edi.

– Mana, u, – dedi Xoll.

– Yana bu qanaqasi bo‘ldi? – degan zardali ovoz eshitildi yoqa ustidagi bo‘shliqdan.

– Men to shu kungacha sizga o‘xshagan odamni ko‘rmagan edim, afandim, – dedi Jeffers. – Lekin boshingiz bormi yoki yo‘qmi, baribir, buyruqda «tutib kelinsin!» deyilgan, xizmat burchi esa men uchun…

– Yaqinlashmang! – bir qadam orqaga chekinib qichqirdi musofir.

U shu zahoti non bilan pishloqni polga uloqtirdi. Janob Xoll stol ustidagi pichoqni o‘z vaqtida olishga zo‘rg‘a ulgurdi. Noma’lum kishi chap qo‘lqopini yechib, u bilan Jeffersning basharasiga bir urdi. Jeffers buyruq haqidagi gaplarni darhol to‘xtatib, bir qo‘li bilan ko‘rinmas qo‘lning panjasidan tutib, ikkinchi qo‘li bilan ko‘rinmaydigan bo‘yniga chang soldi. Shu mahal u oyog‘iga qattiq bir tepki yedi-yu, og‘riqdan voy-voylab yubordi, lekin o‘ljasini qo‘yib yubormadi. Xoll darvozabon rolini bajarayotgan Uojersga stol ustidan pichoq uzatib, o‘zi Jeffersga yordam bermoqchi bo‘ldi. Shiddatli olishuv mahalida muxoliflar stulga borib urilishdi, stul taraqlab bir tarafga surilib ketdi va har ikkalasi polga yiqildi.

– Oyog‘idan ushlang uni, – deb pishilladi Jeffers, tishlarini g‘ijirlatib.

Uning amrini bajarmoqchi bo‘lgan janob Xoll ko‘kragiga qattiq bir tepki yeb, bir daqiqa chamasi o‘ziga kelolmay turdi, janob Uojers esa boshsiz kishining Jeffersdan ustun kela boshlaganini ko‘rib, qo‘lida pichoq bilan eshik tomonga chekindi va u yerda janob Xaksters hamda qonun va tartib qo‘riqchisiga yordamga shoshilayotgan sidderbrijlik izvoshchiga to‘qnash keldi. Shu daqiqada tokchadagi shishalar polga to‘kilib chil-chil sindi-yu, uy qo‘lansa hidga to‘ldi.