Текст книги "Гунилгэн хохтолин"

ДЮГАНӢДӮ

Агӣдӯ дюга илэл хава̄лтын кэтэ бивкӣл.

Сагды̄л илэл о̄мактава дӯннэвэ урикӣтъевэр бакавкӣл, нулгимӣл, ӈӣ-вэл кэргэндук хара̄нма о̄вкӣл, сагды̄л илэл самӈӣрва илавкӣл. Хутэлтын мӯе эмэвувкӣл. Дагадӯ бирака̄н бира-гу бисикин, ая бивкӣ. Олго̄кин дюганӣдӯ, куӈа̄ка̄рдӯ мӯе бакамӣ, кэсэ бивкӣ. Ю̄ктэе бакамӣ, чопкоё о̄кса̄л, мӯ дялупта̄н ала̄чиӈнара. Калакача̄рвэр, каларвар дялувукса̄л, мӯвэ одё̄дёнол, ма̄рилдулӣ агландулӣ-да бикӣттулэ̄ эксэвкӣл.

Урикӣттӯ гулувур дегдэдерэ. Бэел хара̄ндӯ се̄раӈилва о̄дяра, аса̄л по̄талва, саводалва аюсчара. Дю̄явар иливукса̄л, чайтывкӣл, девувкӣл. Э̄кун биӈнэрэн, тара девуӈнэрэ. Девмӣ этэксэ̄, куӈака̄р ня̄н-да̄т бэлэлиӈнэрэ. Сэктэлэ хара̄ндула̄ эмэвуӈнэрэ, аса̄тка̄р эниннунмэр хара̄нма сэктэдеӈнэрэ. Бэел бэеткэ̄рнун дю̄ва иливуӈнара. Аса̄л дюкча̄ оёлӣн тыксава элбэӈнэрэ. Тадук куӈака̄р о̄вувча̄ла̄ о̄мактала̄ дю̄ла̄ тэты̄лвэ, хуллалва, идыгэ̄лвэ, тыгэлвэ дюгӯӈнэрэ. Дю̄ до̄дӯн аят упкатва нэ̄вкӣл. Тадӯ аят мучуктэт ӈо̄дяран! Тадук орорво ты̄нивкӣл. Долболтоно орор тыма̄ннэдала̄н оӈконо̄вкӣл.

Энты̄лтын девгэ̄е ирӣвкӣл, кэргэнмэр улӣвкӣл. Энэл хэлӣнчэрэ амтылтын улгучэ̄мэ̄чивкӣл: о̄н эсӣ тырга ӈэнэчэ̄н, о̄н нулгирэ, э̄ва ичэрэ, до̄лдыра. Куӈака̄р э̄салтын сомисилла, а̄малла, дэрӯрэ – нулгимӣ хэгды хава̄.

Элэ нэлкинӣдӯ о̄кин нямӣл до̄чӣл бивкӣл, во̄тадӯ дявӯчаӈкитын. Нямӣл хэрэкэдӯ во̄тадӯ, хэрэкэл орор ге̄дӯ.

Нулгидемӣл, дюлэлӣ амӣ нёравкӣ, тадук аса̄л, аса̄тка̄р, атырка̄р, этыркэ̄р элгэвурдивэр бодовкӣл. Удялӣтын орорво, сэсинмэ бэел, омолгил, хуркэ̄кэ̄р илбэвкӣл.

Каӈкит4242
  Каӈки – быстро.


[Закрыть] нулгидевкэ̄, ве̄к ӈа̄тчэнэл4343
  Ӈа̄тмӣ – подзывать телят, оленей при перекочевке.


[Закрыть]: «Уку, кук!» Гороло̄ сурумӣ, кэӈгилэ̄рди коӈалбудянал4444
  Коӈа̄лбумӣ – звонить, бренчать.


[Закрыть], сэсинмэ ала̄чилиӈнара. Сагды̄л бэел са̄ӈнэрэ э̄ма орондӯ ко̄ӈа̄ктэлэ4545
  Ко̄ӈа̄ктэ – ботало, побрякушка.


[Закрыть] локомӣ. Гилгэлдӯ сэлэмэлвэ хэгдылвэ, тарил эпкӣл гороло дю̄лдук месо̄ра4646
  Месо̄мӣ – исчезнуть внезапно, образное слово.


[Закрыть]. Ко̄ӈа̄ктэл чучундук биӈкитын, тарит игин, кэӈгинин, игдымэр бивкӣ, сэлэмэдук о̄вча̄ симулат дылганин бивкӣ. Мо̄дук ка̄ӈа̄ллэвэ4747
  Ка̄ӈа̄ллэ – деревянное ботало, подвешиваемое на шею оленя.


[Закрыть] о̄ӈкитын. Амаскӣпты̄л коӈа̄ктэл хэрэкэл бичэ̄тын, тарилва одё̄деӈкитын. Церковнаил ня̄н биӈкитын, купилэ̄н гэрбиӈкитын.

Орорво тасчамӣ ургэпчу. Агидӯ аглан, мо̄саг, сигика̄гил, ма̄рил супирэл-дэ бивкӣл. Нулгисилмӣ, дӯннэвэ са̄рӣл илэл умунупивувкӣл. Тадӯ гулдымэ̄чивкӣл ӣлэ̄, о̄кин, э̄ма хоктолӣ нулгимӣ ая бидеӈэ̄н.

Этэе̄чимнӣлду ня̄н ургэпчу хавалмӣ. Удӯндӯ орор дюкча̄ла̄ самӈӣрдула̄ эвкӣл эмэрэ. Саӈӯнду4848
  Санӯн – прохлада.


[Закрыть] хунмиктэл, манмактал, иргактал-да ады̄кӯр бивкӣл. Болонӣдӯ орор дэгинӈэктэлвэ гэлэ̄ктэливкӣл. Саӈӯндӯ палаткалдула̄ ады̄кӯр орор, гилгэ̄л, татыгавча̄л дулумнул нямӣл, турукэе девдэ̄вэр эмэӈнэрэ. Куӈака̄р ӈа̄лэлдуквар турукэе бӯвкӣл. Орор турукэвэ чивувкӣл, куӈака̄р орорво, эӈнэкэ̄рвэ ала̄нчэвкӣл. Сэвденивчу тар бивкӣ!

Асӣ хава̄н агӣдӯ ня̄н кэтэ. Нуӈартын тыма̄ннэ ӯнэмэмэ дылача̄вэ арча̄дянал, иливкӣл, самӈӣрва, дюлкӯтчэнэл, илавкӣл, девгэе ирӣвкӣл, тэты̄е улливкӣл, нямӣсалва сиривкӣл, хутэлвэр ичэчивкӣл. Гунмӣ тэде̄т – асӣ агӣдӯ ве̄спа ӣнмэ ӈа̄лэлдӯви дявӯчадяран.

Куӈакар ня̄н агӣдӯ бэлэчивкӣл. Энинтын гундевкӣ: «Кэ, нэкэ̄кэр4949
  Нэкэ̄кэн – ласковое обращение к младшим членам семьи.


[Закрыть] тэгэкэллу, гороё эӈнэрэ хукулэ̄рэ, сунэ хэрэкэл илэл хэкимнэдерэ». Хутэлтын иливкӣл, хуллалвар тулискӣ ло̄ва̄ндӯ5050
  Ло̄ва̄н – жердь для того, чтобы вешать вещи, вялить мясо, рыбу.


[Закрыть] эдынмувдэ̄тын локовкӣл. Аятмар хава̄ – эӈнэкэ̄рвэ, нямӣлва дявамӣ. Хэрэкэлвэ орорво амака̄ дяваӈнаран, хэрэкэл гэлӯр бивкӣл, тарилва куӈака̄р дяваӈнара.

Куӈака̄р самӈӣр дагадӯтын эвӣдеӈнэрэ, эӈнэкэ̄рвэ, самӈӣрва ичэтчэнэл. Тадук девуксэ̄л, эниннунмэр нямӣлва сириливкӣл. Куӈака̄р бэлэчиӈнэрэ нуӈардӯтын. Мачарача̄ва нямӣва5151
  Мачарача̄ нямӣ – важенка (самка оленя), у которой накопилось достаточно молока для доения.


[Закрыть] ве̄спан укумнӣвэн эӈнэрэ сирра, эмэ̄ниӈнэрэ, амаргӯт эӈнэкэ̄нин укудэ̄н. Укумнӣвэ угундӯ нэ̄вкӣл, тыминин чайнун умивкӣл, ко̄рчикъе о̄вкӣл. Укумнӣвэ диктэнун девмӣ алапчутмар.

Орор долболтоно оӈконо̄синивкӣл. Орор сурурэктын, урикӣттӯ чэ̄румэ о̄вки. Тугӣ этэе̄тчэрэктын, тырганӣ илтэнэн.

ТЫМАНӢДӮ

Дюганӣ, ӯнэ тыманӣ. Бирадӯ оллол симутчара. Эе̄ндулӣ лэ̄лбиктэ5252
  Лэ̄лбиктэ – кочковатое болото.


[Закрыть] чӯкалдулӣн гуткэ̄чэ̄н деринэдерэн5353
  Деринэмӣ – блестеть.


[Закрыть], ӯгэ̄5454
  Ӯгэ̄ – волна, рябь на воде.


[Закрыть] ӯгэ̄дерэн. Эр аракӯка̄н эдын эдыллэн, чӯка ӯгэ̄дӯ качус-качуналлан, тарит мӯ хэминэллэн5555
  Хэминэмӣ – покрываться рябью (о воде).


[Закрыть]. Чипича̄ка̄р, ма̄рилдулӣ дэгӣктэденэл, чипича̄лла. Кукты арунан, тар нимнэнкӣви аюсчаракин, кукэ̄кчэ̄н эсикэ̄кэ̄н дэгчэ̄ элэ̄: «Ӈӣ-кэ эдӯ чӯнмӣлва5656
  Чӯнмӣ – шишка (кедровая, еловая), семя.


[Закрыть] дӯннэлэ̄ бурӣтчэрэн?». Аят ичэтмӣ, дягда гарадӯн улукӣ э̄куна-вал бэругэдерэн5757
  Бэругэмӣ – разведовать, искать.


[Закрыть], тура̄кӣл игды дылганматын до̄лдыкса̄, тала̄ дэгӣллэн.

Агӣдук орор, нямӣ эӈнэкэ̄нунми ю̄рэ тадук бираткӣ эврэ. Тымалтанӣдӯ саӈӯпчу бивкӣ, орор гиллэмэвэ, дӯчамава мӯвэ умна̄рэ.

Эдын тамнаксава бурирэн. Амуттӯ мӯдыгӣ5858
  Мӯдыгӣ – утка.


[Закрыть] мӯдыгӣткэ̄рнунми ичэвуллэн. Ге̄дӯ амуттӯ, оре̄дянал, умнэ̄ты̄л5959
  Умӈэ̄ты̄ – чайка.


[Закрыть] дэгӣктэдерэ.

Ме̄лилча̄л хуюкур кулика̄р. Лирбӣрин6060
  Лирбӣрӣн – пушистый (о шерсти, о волосах).


[Закрыть] сороптун дегиктэллэн. Ӣриктэл, дылача̄ дӯннэвэ нямалгиракин, тутуктэлчэ̄л. Манмактал киӈиндерэ. Дэгиктэллэ ло̄рур6161
  Ло̄рун, ло̄рукӣ – бабочка.


[Закрыть], аракӯка̄нди, лэпурэлдивэр давсидянал, силэксэ̄вэ ӈэ̄лэтчэнэл, чуктыл алапчӯ чӯксэвэтын умда̄вэр до̄вкӣл.

Тар урэкэ̄ндӯ гулувун дегдэллэн. Тадӯ урикӣт, илэл тыма̄тнэдук хавалилча̄л. Аса̄тка̄ка̄н бираткӣ, аракӯка̄н икэ̄нмэ давла̄денэ, калакача̄ндиви киӈисо̄дяна6262
  Киӈисо̄мӣ – образное слово, бренчать.


[Закрыть], эвдерэн. Хоктодӯви гуде̄ипчулвэ чукты̄лва ичэтчэрэн. Мӯдӯ ханянми ичэксэ̄, аса̄тка̄н инемӯсинэн. Инектэллэн сэвде̄нденэ, инектэнин купилэ̄гэчӣн урэстэн. Улта эр инектэнмэн ча̄скӣ-бугаткӣ суруврэн, гороло̄ до̄лдывда̄н. Аса̄тка̄н хаӈнака̄ндиви мӯлӣ таптастан, ӯгэ̄ аса̄тка̄н ханянман муруктэт6363
  Муруктэт – обойти вокруг чего-либо.


[Закрыть] суруврэн …

ДО̄ЛЧАТКАЛ

 
До̄лчаткал – он минӈӣ эвэды̄ тӯрэ̄н ӣгдыдяран,
О̄н бира оёлӣн дылача̄ ю̄дерэн,
О̄н гиллэндерӣ амут, бираяка̄н чургиндяра,
Улта урэлӣ до̄лдывдяран!
До̄лчаткал, о̄н орордӯ илэл нулгидерэ,
Ко̄ӈа̄ктэ юргиндерэн6464
  Эргэнмӣ – звучать.


[Закрыть], эӈнэкэ̄н эӈтэдерэн,
Сапка ӈа̄лэт усэндэ̄вчэ̄ ма̄вут
мӯссэдерӣ орон иелвэн дяваран.
 
 
Самӈӣн улукталӣ6565
  Улукта – обрыв, крутой берег.


[Закрыть] ю̄дерэн,
Илэл дылгантын, куӈака̄р инентын
Уӈтувун э̄ривунин до̄лдывдяран,
Улгурил, нимӈака̄р, давла̄вур!
Амаскӣпты̄т икэ̄денэл, аса̄л уллидерэ,
О̄дяӈа̄лвэ гуде̄илвэ унталва,
Кумала̄рвэ, коколлолво,
Элэ уняптӯртын ӈа̄лэлдӯтын киӈидерэ.
 
 
Упкат эвэды̄дӯ тӯрэ̄ндӯ бисин.
До̄лчаткал аямамат!
Эмӣ са̄рэ, алагӯвкал, са̄лмӣ ичэдеӈэ̄с —
Хэрэкэ эрӣн синдулэ̄ эмэдеӈэ̄н!
 

Дукуран Торпушонок Лилия Михайловна,

бикӣттӯ Стрелка-Чунядӯ Красноярскай крайдӯ бидери.

Гэрби

 
– О̄н гэрбис, дылача̄ка̄н гарпан?
– Ариша.
– Минӈӣ гэрбив Степан.
– Э̄да̄ви-ка соӈолинни?
– Гэрбидукис… Тугӣ акинми гэрбитэчэ̄н,
Нуӈанман кусӣн девчэ̄н.
– Экэл соӈоро.
Хуӈту гэрбие гакал.
Дюгэтчэӈэ̄с гэрбиви?
Кэ, сӣнмакэл: Владимир, Николай, Илья…
– Илья аятмар.
– Аса̄тка̄н – Ильядук хуна̄т,
Бэеткэ̄н – Ильядук омолги.
Гудей…
– Кусӣндук мучӯмӣ, гэрбиви дюгэтчэм.
Дӯннэви дысӯттэ̄ви сурурэн,
Инямӯдяна, найдадянэ6666
  Найдамӣ – надеяться.


[Закрыть], ая̄вденэ.
Эчэ мучӯра кусӣндук, сокоривча̄.
Этэ̄н балдыра Ильядук омолги.
Этэ̄н балдыра Ильядук хуна̄т …
 

О̄макта анӈанӣ

 
О̄макта анӈанӣ эмэрэн!
Упкат илэл ала̄тчэрэ,
Аяка̄нэ, кутукэ̄нэ
Упкат илэл гэлэ̄дерэ!
 
 
О̄макта анӈанӣ эмувдеӈэ̄н
Куӈака̄рдӯ – урувсинэ,
Ӣлмакталдӯ – ая̄вуна.
Сагды̄ка̄рдӯ – дё̄нмукӣтвэ.
 
 
О̄макта анӈанӣ эмувдеӈэ̄н
Кутье – бэю̄ктэмнӣлдӯ.
Одё̄врӣ кутуе – аса̄тка̄рдӯ.
Орочӣл бидэ̄тын – эвэнкӣлдӯ!
Тогоко̄нты, эвӣденэ, дегдэдегин!
 

Иеӈнэ бикӣт

 
О̄кин до̄лдыча̄в эсим дёнчара,
Городӯ-гу, дагадӯ-гу эвэнкӣл бидерэ.
Мэ̄нӈӣвэр бинӣвэр, мэ̄нӈӣвэр тӯрэ̄нмэр эчэ̄л омӈоро.
Орочӣл, тэгэ̄чӣл итымка̄дерэ.
Ӣдӯ тар бикӣчитын? Ӈӣ са̄рэн?
Гундерэ: “Иеӈнэ”.
О̄н тала̄ исмӣ?
Тугӣ ма̄та̄лнун бидечэ̄вун.
Тӯрэ̄нмэр омӈодёно, ниӈтэлвэр сокордёно.
Амты̄лты удялтын эдынди эдынмувчэ̄л. Омӈовчо̄л…
Тӯрэ̄нми о̄н эдеӈэ̄с омӈоро?
Ӣдӯ тар бикӣчитын? Ӈӣ са̄рэн?
Гундерэ: “Иенгра”. О̄н исмӣ?
Тадӯ бэюмӣмнӣл орорди нулгидерэ.
Тадӯ куӈака̄р самӈӣрва иладяра.
Тадӯ аса̄л о̄салвэ ӣдерэ.
Одё̄врӣл тэткэ̄лвэ уллидерэ.
Бисин – бисин таргачӣн Дӯннэ!
Иеӈнэ бикӣт. Бакам! Исим!
Эдӯ эвэнкӣл эвэды̄тчэрэ.
Эдӯ эвэнкӣл орорво дявӯчадяра.
Эдӯ-тадӯ ко̄ӈа̄ктал киӈгикэ̄ндерэ.
Эдӯ тэткэ̄л чиктычӣл, ирэ̄ксэдук о̄вча̄л гудейкэ̄кэ̄р.
Бисин – бисин таргачӣн Дӯннэ!
Иеӈнэ бикӣт. Бакам! Исим!
 

О̄н эвэнкӣл чайвэ са̄ча̄тын
(Нимӈака̄н)

Городӯ, со̄т городӯ, Ура̄ӈкай-бэе ӣндечэ̄н-бидечэ̄н, Бэю̄рвэ ва̄дерӣ гэрбичӣ. Урэрдулӣ, биралдулӣ нулгиктэдечэ̄н, бэю̄ктэдечэ̄н. О̄н-ка нулгиктэдеӈэ̄с энэ орорво дявӯчадярэ? О̄н-ка ӈинакина а̄чин бэю̄ктэдеӈэ̄с? Бэю̄рвэ ва̄дерӣ со̄ со̄ниӈ бичэ̄н. Бэю̄рвэ ва̄дерӣ со̄ кутучӣ бичэ̄н. Ӈӣ нуӈандӯн эчэ̄н тэрэ̄рэ. Эмукин, эрӯвэ энэ са̄рэ, бидечэ̄н. Бэю̄нмэ ва̄вкӣ, тогово улӣвкӣ. Тадук акиндӯви туювкӣ, уллэвэ уло̄вкӣ, сэ̄ксэчӣвэ девувкӣ.

О̄кин-мал хоктодӯ лӯчады̄ Со̄ниӈма бакалдыран. Са̄лдыма̄тта.

– О̄н гэрбис? Ӣдук ӈэнэденни? Ӣлэ̄ ӈэнэденни? – Бэю̄рвэ ва̄дерӣ ха̄нӈӯктаран.

– О̄н гэрбис? Ӣдук ӈэнэденни? Ӣлэ̄ ӈэнэденни? – ха̄нӈӯктаран лӯчады̄ Со̄ниӈ.

Са̄лдыма̄тта. Тадук туркулдырэ, мӣрэлдырэ, дылма̄тта. Тырганӣ ӣлтэнэн, долбонӣ ӣлтэнэн. Ӈӣ-дэ эвкӣ давды̄ра.

– Кэ! Дэрумкӣгэт!

Тогово иларэ. Тадук лӯчады̄ Со̄ниӈ Иван гэрбич̄и мӯвэ хую̄врэн, э̄мава-ка чӯкава нэ̄рэн. Бэю̄рвэ ва̄дерӣ амтаттан – со̄ ая. Чинэ̄н6767
  Чинэ̄ – сила.


[Закрыть] ӣдук-вэл эмэрэн. Со̄ниӈ Иван гунэн: ”Эри чай”. Тадук чӯкава ичэвкэ̄нэн.

”Экэл гунэ. – Бэю̄рвэ ва̄дерӣ со̄ниӈ гунэн. – Упкат эри чӯкавэ са̄дерэ, упкат ичэчэ̄тын.”

Тариптыдук Ура̄ӈкай – бэе эр чайвэ, гэрбиденэ ”Иван-чай,” умилча̄н.

Эдук дюлэ̄скӣ эвэнкӣл эр чайвэ са̄ча̄тын. Чайты̄дяра. Эвэнкӣл са̄ллэ: э̄мата̄нэл чаил бивкӣл. Чӯкавэ “Иван-чай”гунмурӣвэ э̄мата̄нал чӯкалди – чабрецит, суптылэ̄т, ӈоклӣ авданнадин, сиптылэ̄ авданнадин умундӯ нэ̄нэл, —хуювувкӣл.

Дукуран Волкова Валентина Гавриловна,

бикӣттӯ Ленинскайдӯ Алданскай райондӯ Саха Республикадун бидерӣ