Текст книги "Греческий молитвослов. Молитвы на всякое время дня, недели и года"

Молитвы ужина (вечери)

Сперва соверши три поклона с молитвами:

Бо́же, ми́лостив бу́ди мне гре́шному. (Поклон)

Созда́вый мя, Го́споди, поми́луй мя. (Поклон)

Без числа́ согреши́х, Го́споди, прости́ мя. (Поклон)

Перед ужином

Ядя́т убо́зии, и насы́тятся, и восхва́лят Го́спода взыска́ющии Его́, жива́ бу́дут сердца́ их в век ве́ка (Пс. 21: 27).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Трижды)

Осеняя пищу крестным знамением, скажи:

Христе́ Бо́же, благослови́ я́стие и питие́ рабу́ Твоему́ (или: рабо́м Твои́м), я́ко свят еси́ всегда́, ны́не и при́сно и во ве́ки веко́в. Ами́нь.

По окончании ужина

Бысть чре́во Твое́ свята́я трапе́за, иму́щая небе́снаго Хле́ба, Христа́ Бо́га на́шего, от Него́же всяк яды́й не умира́ет, я́коже рече́ всех, Богороди́тельнице, Пита́тель.

Возвесели́л ны еси́, Го́споди, в творе́ниих Твои́х, и в де́лех руку́ Твое́ю возра́дуемся (ср. Пс. 91: 5).

Зна́менася на нас свет лица́ Твоего́, Го́споди, дал еси весе́лие в се́рдце мое́м, от плода́ пшени́цы, вина́ и еле́а своего́ умно́жишася. В ми́ре вку́пе усну́ и почи́ю, я́ко Ты, Го́споди, еди́наго на упова́нии всели́л мя еси́ (Пс. 4: 7–9).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Трижды)

Благослове́н Бог, ми́луяй и пита́яй нас от свои́х бога́тых даро́в Свое́ю благода́тию и человеколю́бием всегда́, ны́не и при́сно и во ве́ки веко́в. Ами́нь.

Повечерие

Повечерие совершается после вечери (ужина).

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́

Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́, я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

Псалом 69

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущий ду́шу мою́, да возвратя́тся вспять и постыдя́тся хотя́щий ми зла́я. Да возвратя́тся а́бие стыдя́щеся глаго́лющий ми: бла́гоже, бла́гоже. Да возра́дуются и возвеселя́тся о Тебе́ вси и́щущий Тебе́, Бо́же, и да глаго́лют вы́ну «да возвели́чится Госпо́дь!» лю́бящий спасе́ние Твое́. Аз же нищ есмь и убо́г, Бо́же, помози́ ми: Помо́щник мой и Изба́витель мой еси́ Ты, Го́споди, не закосни́.

Славословие перед ночью

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоей. Го́споди, Царю́ Небе́сный, Боже О́тче Вседержи́телю, Го́споди Сы́не Единоро́дный Иису́се Христе́ и Святы́й Ду́ше. Го́споди Бо́же, Агнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седи́й одесну́ю Отца́, поми́луй нас. я́ко Ты еси́ еди́н Свят, Ты еси́ еди́н Госпо́дь Иису́с Христо́с, в сла́ву Бо́га Отца́. Ами́нь.

На вся́ку нощь благословлю́ Тя и восхвалю́ и́мя Твое́ во ве́ки, и в век ве́ка.

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Сподо́би, Го́споди, в нощь сию́ без греха́ сохраняйся нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки. Ами́нь. Бу́ди, Го́споди, ми́лость Твой на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твой во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

# Здесь можно прочитать канон на потребу, любой молебный канон Спасителю, Богородице или святым, акафист Богородице или любой другой акафист по выбору молящегося.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без нетле́ния Бо́га Сло́ва ро́ждшую, су́щую Богоро́дицу Тя велича́ем.

Молитвы Святой Троице

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, ймене Твоего́ ра́ди.

Го́споди, поми́луй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Молитва Господня

О́тче наш, И́же еси́ на Небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. я́ко Твое́ есть ца́рство и си́ла и сла́ва во ве́ки. Ами́нь.

# Здесь читаются тропари седмичные, праздника, из особых последований или настоящие тропари, глас 4:

Всем святым: Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от нас, но моли́твами их в ми́ре упра́ви живо́т наш.

Мученикам: И́же во всем ми́ре му́ченик Твои́х, я́ко багряни́цею и ви́ссом, кровьми́ Це́рковь Твоя́ украси́вшися, те́ми вопие́т Ти, Христе́ Бо́же: лю́дей Твои́м щедро́ты Твоя́ низпосли́, мир жи́тельству[47]47
  Государству (христианскому).


[Закрыть]Твоему́ да́руй, и душа́м на́шим ве́лию ми́лость.

Слава, кондак об усопших, глас 8: Со святы́ми упоко́й, Христе́, ду́ши раб Твои́х, иде́же несть боле́знь, ни печа́ль, ни воздыха́ние, но жизнь безконе́чная.

И ныне, Богородичен: Моли́твами, Го́споди, всех святы́х и Богоро́дицы, Твой мир даждь нам и поми́луй нас, я́ко еди́н щедр.

Го́споди, поми́луй. (40 раз)

Молитва на всякий час суток

И́же на вся́кое вре́мя и на вся́кий час на Небеси́ и на земли́ покланя́емый и сла́вимый, Христе́ Бо́же, долготерпели́ве, многоми́лостиве, многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ, Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми Ангелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум неприступный Твоей сла́вы, я́ко благослове́н еси́ во ве́ки веко́в. Ами́нь. Честне́йшую Херуви́м и сла́внейшую без сравне́ния Серафи́м, без нетле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Трижды)

Отпуст общий

Го́споди Иису́се Христе́, Бо́же наш, моли́тв ради Пречистыя Твоея Матере, преподобных и богоносных оте́ц на́ших и всех святы́х, поми́луй нас, яко благ и Человеколюбец. Ами́нь.

Молитва молебная ко Пресвятей Богородице, Павла, монаха Евергетидской обители[48]48
  Вместо этой и следующих молитв можно при желании прочитать любые молитвы из привычного вечернего правила.


[Закрыть]

Нескве́рная, небла́зная, нетле́нная, пречи́стая, чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м Рождество́м соедини́вшая, и отри́нувшееся естество́ ро́да на́шего небе́сным совоку́пльшая, я́же ненаде́жных еди́на наде́жда, и бори́мых по́моще, гото́вое заступле́ние к Тебе́ притека́ющих, и всех христиа́н прибе́жище.

Не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зума ле́ностию[49]49
  Из-за расслабленности воли.


[Закрыть] сласте́й жития́ раба́ бы́вша; но я́ко человеколюби́ваго Бо́га Ма́ти человеколю́бие умилосе́рдися о мне гре́шней и блу́цнем, и приими́ мое́, е́же от скве́рных усте́н приноси́мое Тебе́ моле́ние, и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне человеколю́бныя утро́бы Своей бла́гости, и презре́в моя́ безчи́сленная прегреше́ния, обратя́т мя к покая́нию, и Свои́х за́поведей де́лателя иску́сна явя́т мя. И предста́ни мне при́сно, я́ко ми́лостивая, и милосе́рдая, и благолюбя́вая, в настоя́щем у́бо жития́ те́плая Предста́тельнице и Помо́щнице, сопротя́вных наше́ствия отгоня́ющи, и ко спасе́нию наставля́ющи мя; и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в дале́че от ней отгоня́ющи; в стра́шный же день суда́ ве́чныя мя избавля́ющи му́ки, и неизрече́нныя сла́вы Твоего́ Сы́на и Бо́га на́шего насле́дника мя показу́ющи. ю́же и да улучу́, Влады́чице моя́, Пресвята́я Богоро́дице, Твоя́м хода́тайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спа́са на́шего Иису́са Христа́. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Пресвяты́м и Благя́м и Животворя́щим Его́ Ду́хом ныне и при́сно и во ве́ки веко́в. Ами́нь.

Молитва ко Господу нашему Иисусу Христу, Антиоха, монаха Пандекта

И даждь нам, Влады́ко, на сон гряду́щим, поко́й те́ла и души́, и сохрани́ нас от мра́чнаго сна грехо́внаго, и от вся́каго те́мнаго и нощна́го сладостра́стия: укроти́ стремле́ния страсте́й, угаси́ разжже́нныя стре́лы лука́ваго, я́же на ны льсти́вно дви́жимыя: пло́ти на́шея воста́ния утоли́, и вся́кое земно́е и веще́ственное на́ше мудрова́ние успи́. И да́руй нам, Бо́же, бодр ум, целому́др по́мысл, се́рдце трезвя́щееся, сон лего́к и вся́каго сатанина́ мечта́ния измене́н[50]50
  Избавлен.


[Закрыть]. Возста́ви же нас во вре́мя моли́твы утвержде́ны в за́поведех Твои́х, и па́мять суде́б Твои́х в себе́ тве́рду иму́щих. Всено́щное славосло́вие нам да́руй, во е́же пе́ти и благослови́ти и сла́вити пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва Богородице

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Молитва святого Иоанникия

Упова́ние мое́ Оте́ц, прибе́жище мое́ Сын, покро́в мой Дух Святы́й; Тро́ице Свята́я, сла́ва Тебе́.

Помянник краткий[51]51
  При желании может быть заменен на Помянник вседневный, см. стр. 441.


[Закрыть]

Ненави́дящих и оби́дящих нас прости́, Го́споди Человеколюбие. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же в мо́ри упра́ви. Путеше́ствующим спутеше́ствуй. Благове́рным прави́телем на́шим спобо́рствуй. Служа́щим и ми́лующим нас грехо́в оставле́ние да́руй. Запове́давших нам, недосто́йным, моли́тися о них поми́луй по вели́цей Твое́й ми́лости. Помяни́, Го́споди, пре́жде усо́пшия отцы́ и бра́тию на́шу, и упоко́й я́, иде́же присеща́ет свет лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь им я́же ко спасе́нию проше́ния и жизнь ве́чную. Помяни́, Го́споди, и нас, смире́нных и гре́шных и недосто́йных раб Твои́х, и просвети́ наш ум све́том ра́зума Твоего́, и наста́ви нас на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х, яко благослове́н еси́ во ве́ки веко́в. Ами́нь.

# Если идет пост, в завершение повечерия положи три земных поклона с молитвой святого Ефрема Сирина, разделенной на три части:

Го́споди и Влады́ко живота́ моего́, дух пра́здности, уны́ния, любонача́лия и праздносло́вия не даждь ми. (Поклон)

Дух же целому́дрия, смиренному́дрия, терпе́ния и любве́ да́руй ми, рабу́ Твоему́. (Поклон)

Ей, Го́споди Царю́, да́руй ми зре́ти моя́ прегреше́ния и не осужда́ти бра́та моего́, я́ко благослове́н еси́ во ве́ки веко́в. Ами́нь. (Поклон)

Затем 12 поясных поклонов с молитвой мытаря: Бо́же, ми́лостив бу́ди мне гре́шному.

И снова один земной поклон с молитвой святого Ефрема Сирина целиком:

Го́споди и Влады́ко живота́ моего́, дух пра́здности, уны́ния, любонача́лия и праздносло́вия не даждь ми. Дух же целому́дрия, смиренному́дрия, терпе́ния и любве́ да́руй ми, рабу́ Твоему́. Ей, Го́споди Царю́, да́руй ми зре́ти моя́ прегреше́ния и не осужда́ти бра́та моего́, я́ко благослове́н еси́ во ве́ки веко́в. Ами́нь. (Поклон)

Перед сном, целуя свой нательный крест, скажи:

Огради́ мя, Го́споди, си́лою Честно́го и Животворя́щаго Твоего́ Креста́ и изба́ви мя от вся́каго зла.

И осенив свое ложе крестным знамением, отходя ко сну, скажи:

В ру́це Твои́, Го́споди Иису́се Христе́ Бо́же мой, предаю́ ду́шу и те́ло мое́: Ты же мя благослови́, Ты мя поми́луй и живо́т ве́чный да́руй ми. Ами́нь[52]52
  Молитва приводится в редакции греческого молитвослова.


[Закрыть].

Из молитвословий недельного круга

В воскресенье на вечерне

Стихиры умилительные ко Господу, глас 1

Вся́ приве́л еси́ Твои́м Сло́вом и Ду́хом за бла́гость, Го́споди, та́же сотвори́л еси́ слове́сное мя́ живо́тно, да Твое́ свято́е сла́влю, Всеси́льне, и́мя. Аз же наипа́че сту́дными мои́ми де́лы всегда́ безче́ствую[53]53
  Бесчещу (Твое имя).


[Закрыть]: но пощади́, молю́ся.

Позна́й твое́, окая́нная душе́, боже́ственное благоро́дие[54]54
  Благородное происхождение от Бога.


[Закрыть] и оте́чество нетле́нное, и тщи́ся всегда́ благодея́ньми сие́ достига́ти: ничто́же от тле́нных да плени́т тя́, го́рния ча́сти еси́, те́ло же – земля́ и тле́ется, да не победя́т ху́ждшее лу́чшия.

Гряди́, всеокая́нная душе́ моя́, ко Преблаго́му те́плыми слеза́ми приступи́: соде́янная тобо́ю пре́жде суда́ твоего́ вся́ испове́дуй, и ми́лостива Созда́теля, окая́нная, себе́ соде́лай, и проще́ние испроси́, пре́жде да́же две́ри не заключи́т тебе́ Госпо́дь.

И стихиры святым бесплотным Ангелам, глас 3

Ли́ки безпло́тных, Го́споди, соста́вил еси́, бога́тство явля́я все́м Твоея́ бла́гости: и приве́л еси́ от небытия́ во е́же бы́ти, па́че ума́ сла́ву Твою́ ны́не сла́вящих гла́сы немо́лчными.

Ве́лия а́нгел Твои́х, Христе́, си́ла: безтеле́сни бо су́ще ми́р проти́чут[55]55
  Обтекают.


[Закрыть], сохраня́юще це́ркви си́лою, я́же от Тебе́, Влады́ко, и Тебе́ мо́лятся о вселе́нней. Добро́ту трисо́лнечную Твою́ еди́нственную зря́ще Си́лы, Тебе́ служа́щия, явля́ют вторы́я све́тлости[56]56
  Т. е. сияют отраженным светом.


[Закрыть]су́щим в ми́ре, и о́бщно сия́юще, подаю́т на́м боже́ственныя све́тлости.

Слава, и ныне: Богородичен: Все́ми владя́щая тварьми́, Пречи́стая, лю́те облада́ем страстьми́ ум мой свободи́ те́плым Твои́м предста́тельством и ма́тернею моли́твою, и порабо́ти мя Сы́ну и Бо́гу Твоему́.

Тропарь святым Небесным Силам, глас 4

Небе́сных во́инств Архистрати́зи, мо́лим вас при́сно мы недосто́йнии, да ва́шими моли́твами оградите́ нас кро́вом крил невеще́ственныя ва́шея сла́вы, сохраня́юще ны припа́дающия приле́жно и вопию́щия: от бед изба́вите ны, я́ко чинонача́льницы вы́шних сил.

Слава, и ныне: Богородичен: Воспита́вшейся во хра́ме во свя́тая святы́х, оде́янней ве́рою и прему́дростию и безме́рным де́вством Архистрати́г Гаврии́л принесе́ с небесе́ целова́ние[57]57
  Приветствие.


[Закрыть] и е́же «ра́дуйся!». Ра́дуйся, Благослове́нная, ра́дуйся, Препросла́вленная, Госпо́дь с Тобо́ю.

Отпуст дня

Го́споди Иису́се Христе́, Бо́же наш, моли́тв ра́ди Пречи́стыя Твоей Ма́тере, предста́тельствы честны́х Небе́сных Сил безпло́тных, святы́х и пра́ведных богооте́ц Иоаки́ма и Анны и всех святы́х, поми́луй и спаси́ нас, я́ко благ и Человеколю́бец.

В понедельник на утрене

Канон покаянный ко Господу нашему Иисусу Христу, творение Иосифово, и святым небесным бесплотным Ангелам, творение Феофаново, глас 6

Песнь 1

Ирмос: Чу́вственный фарао́н потопле́н бысть со всево́инством, Изра́иль же проше́д посреде́ мо́ря, вопия́-ше: Го́сподеви Бо́гу на́шему пойм, я́ко просла́вися.

Поми́луй мя, Бо́же, поми́луй мя.

Впа́дшаго, Христе́, разбо́йников в ру́де лука́вых, и я́звами душетле́нными исполу́ ме́ртва бы́вша, состра́стия еле́ем уврачева́в уще́дри мя, да Тя прославля́ю.

Поми́луй мя, Бо́же, поми́луй мя.

Я́ко согреши́х мно́го, верте́п бых разбо́йником: рожде́йся в верте́пе Христе́, слез ту́чу да́руй ми и очи́сти, я́ко да Свято́му Ду́ху Твоему́ це́рковь бу́ду.

Святи́и Ангели, моли́те Бо́га о нас.

Небе́сных лико́в восхваля́я кра́сное благоле́пие, тех све́тлыми мо́лниями просвети́тися вопию́: молю́ Тя, Христе́, еди́наго благоутро́бнаго.

Святи́и Ангели, моли́те Бо́га о нас.

Украше́й Сло́вом и и́же из Тебе́ Всесвяты́м Ду́хом а́нгельския ли́ки, Тебе́ ю́же всех Вину́ ле́ти устро́ил еси́ тех, я́ко всеси́лен.

Слава, и ныне: Богородичен: Твоего́ прие́мши Соде́теля, я́ко Сам восхоте́, из безсе́меннаго Твоего́ чре́ва па́че ума́ воплоща́ема, Чи́стая, тва́рем вои́стинну яви́ся Влады́чица.

Песнь 3

Ирмос: На тве́рдем ве́ры Твоея́ ка́мени помышле́ние посади́в души́ моея́, утверди́, Го́споди: Тя бо и́мам, Бла́же, прибе́жище и утвержде́ние.

Поми́луй мя, Бо́же, поми́луй мя.

Пока́ятися Христо́ви обеща́хся, и от злых ника́коже отступа́ю: что́ бу́ду, слепото́ю обложе́н мно́гою? Сы́не Бо́жий, Ты мя уще́дри.

Поми́луй мя, Бо́же, поми́луй мя.

Помышля́ю Бо́жие долготерпе́ние, изжи́в жизнь в ле́ности окая́нный, и бою́ся, да не внеза́пу посече́ние сме́ртное предвари́т мя.

Святи́и Ангели, моли́те Бо́га о нас.

Е́же вся́кое слове́сное естество́ от не су́щих хоте́нием соде́лавшее Естество́[58]58
  Природа (Божественная), сотворившая (одним) волеизъявлением из небытия всякую разумную природу.


[Закрыть] трисвяты́ми гла́сы пое́тся в трие́х Ли́цех и славосло́вится ве́рно.

Святи́и Ангели, моли́те Бо́га о нас.

Источа́я Ты благо́е, Влады́ко вся́ческих, и бога́тне излива́я, прича́стием[59]59
  По причастию (а не по природе).


[Закрыть] благи́я безпло́тныя ли́ки а́нгельския показа́л еси, Человеколюбие.

Слава, и ныне: Богородичен: Даде́ся отпуще́ние нам Тебе́ ра́ди, Богоро́дице: зако́на бо Влады́ка из Тебе́ вопло́щься, стра́сти нас ра́ди претерпе́в, всех изба́вил есть.

Песнь 4

Ирмос: Покры́ла есть Небеса́ доброде́тель Твоя́, Христе́, и Твоего́ хвале́ния Го́споди, вся испо́лнишася.

Поми́луй мя, Бо́же, поми́луй мя.

Не осуди́ нас согреши́вших Ти мно́го: но обы́чною Твое́ю, Влады́ко, ми́лостию уще́дри.

Поми́луй мя, Бо́же, поми́луй мя.

Путь сый живота́, Спа́се, смертоно́сных путе́й греха́ уклоня́тися ми при́сно сподо́би.

Святи́м А́нгели, моли́те Бо́га о нас.

Тли неприя́тное[60]60
  Недоступное для тления.


[Закрыть] естество́ иму́ще, боже́ственнейший уми́ Твой честны́й престо́л обстоя́т, безсме́ртия Тя исто́чник насле́довавший, Человеколюбие.

Святи́м Ангели, моли́те Бо́га о нас.

От Свята́го Ду́ха освяща́еми а́нгельстии собе́ри, на зло пребыва́ют недви́жими, я́же к пе́рвому Благо́му восхожде́нии обожа́еми.

Слава, и ныне: Богородичен: Кля́тва разори́ся прама́тере Тебе́ ра́ди, Богома́ти: Ты бо нам, Пречи́стая Всенепоро́чная, благослове́ния Исто́чник приснотеку́щ родила́ еси́.

Песнь 5

Ирмос: Свет возсия́вый ми́ру, Христе́, просвети́ се́рдце ми, от но́щи Тебе́ зову́щу, и спаси́ мя.

Поми́луй мя, Бо́же, поми́луй мя.

И́же от Иессе́ова ко́рене прозя́б Христе́, изсуши́ прозябе́ния страсте́й мои́х, всажда́я во мне страх Твой.

Поми́луй мя, Бо́же, поми́луй мя.

Воздыха́ние я́коже мыта́рь стяжи́м и злых отсту́пим, я́ко да воздыха́ния убежи́м ве́чнующаго.

Святи́и А́нгели, моли́те Бо́га о нас.

На престо́ле херуви́мсте ви́дев Тя проро́к, Всеви́дче, Зижди́теля и Бо́га седя́ща, зна́меньми Твоему́ науча́ется влады́честву и госпо́дьству.

Святи́и А́нгели, моли́те Бо́га о нас.

Тьма́ми Дании́л и ты́сящами А́нгел Тебе́ окружа́ема, Влады́ко, зря совоку́плена челове́ческому зра́ку, держа́ве Твоей сла́вы тайнонаучи́ся.

Слава, и ныне: Богородичен: Красе́н добро́тою Твой Сын яви́ся, па́че сыно́в земноро́дных, Всепе́тая Влады́чице: Сло́во бо есть И́же над все́ми Бо́га, а́ще и естество́ человече́ское из Тебе́ прия́т.

Песнь 6

Ирмос: Ки́том пожре́н грехо́вным, вопию́ Тебе́, Христе́, яко проро́ка из истле́ния мя свободи́.

Поми́луй мя, Бо́же, поми́луй мя.

Воочи́вый слепы́я, Христе́, души́ моей отве́рзи о́чи: я́ко да свет Твой узрю́ и страсте́й тьмы изба́влюся.

Поми́луй мя, Бо́же, поми́луй мя.

Вод животво́рных покая́ния испо́лнену ду́шу мою́ сотвори́, Ще́дре, ре́ки слез да́руя ми.

Святи́и А́нгели, моли́те Бо́га о нас.

Ума́ чистото́ю зря Иа́ков на ле́ствице низходя́ща А́нгелы Твоя́, Влады́ко, издале́ча Твоему́ науча́шеся во пло́ти прише́ствию я́вственнейше.

Святи́и А́нгели, моли́те Бо́га о нас.

Разуме́в боже́ственное А́нгелов и све́тлое ополче́ние, ра́довашеся уго́дник Твой, Влады́ко, Изра́иль, благочи́нно ликовству́ющее[61]61
  Буквально: ритмично танцующее.


[Закрыть] и Твою́ неизрече́нную сла́ву обстоя́щее.

Слава, и ныне: Богородичен: Гор небе́сных вои́стинну превы́шши а́нгельских сил показа́ся гора́ я́вственная – утро́ба Твоя́, Отрокови́це Влады́чице, вмести́вши лучу́ Божества́.

Песнь 7

Ирмос: Преподо́бных Твои́х отроко́в песнь услы́шавый, и пещь горя́щую ороси́вый, благослове́н еси́, Го́споди Бо́же оте́ц на́ших.

Поми́луй мя, Бо́же, поми́луй мя.

От зе́льныя зло́бы умо́м ослепи́хся, и не воззре́х на свет покая́ния: Христе́ Спа́се мой, спаси́ мя.

Поми́луй мя, Бо́же, поми́луй мя.

Дерза́я на Твое́ благоутро́бие, припа́даю Ти, Ще́дре, прося́ зол мои́х разреше́ния: не пре́зри мя, Влады́ко.

Святи́м Ангели, моли́те Бо́га о нас.

Красото́ю светле́етеся, всесвяти́и Ангели Вседержи́теля, приближа́ющеся неизрече́нней сла́ве Христо́вей, и любо́вию всегда́ пою́ще Ему́: благослове́н еси́, Бо́же оте́ц на́ших.

Святи́м Ангели, моли́те Бо́га о нас.

Мы́сленно о Тебе́, Влады́ко, обраща́ющеся Ангели, непости́жное светоявле́ние Твое́ прие́млют присносу́щне, пою́ще и глаго́люще всегда́: благослове́н еси́, Бо́же оте́ц на́ших.

Слава, и ныне: Богородичен: С Тобо́ю, Благослове́нная, Госпо́дь, безпло́тный Гаврии́л рече́; истле́вшее бо естество́ обнови́ти хотя́, во чре́во Твое́ всели́ся, Чи́стая. Благослове́нна, я́же Бо́га пло́тию ро́ждшая.

Песнь 8

Ирмос: Преподо́бнии Твой о́троцы в пещи́ херуви́мы подража́ху, трисвяту́ю песнь воспева́юще: благослови́те, по́йте и превозноси́те Го́спода.

Поми́луй мя, Бо́же, поми́луй мя.

Поревнова́х немилосе́рднаго бога́таго нра́вом, и презира́ю обнища́вший ми ум, пред две́рьми покая́ния огное́нный зло́бою, Христе́: да не во огнь мя по́слеши негаси́мый.

Поми́луй мя, Бо́же, поми́луй мя.

Зиме́ и в суббо́ту до́брых пра́здности[62]62
  В зимнее время и в субботу (день покоя) – т. е. в отсутствие добрых дел.


[Закрыть] да не от жития́ мя по́ймеши негото́ва, зи́му грехо́вную утоли́вый, Ще́дре: но обраще́ние боже́ственное пода́ждь ми.

Святи́и А́нгели, моли́те Бо́га о нас.

Я́коже Елисее́в дре́вле Твоего́ уго́дника во́инствы безпло́тными огради́л еси́: та́кожде и ны́не, Христе́, це́рковь Твою́ огради́, Тебе́ превозносящую во вся ве́ки.

Святи́и А́нгели, моли́те Бо́га о нас.

Изба́витися от прегреше́ний моли́теся, А́рхистрати́зи боже́ственнии, я́ко предстоя́ще престо́лу гро́зному, любо́вию сла́вящим и превознося́щим Христа́ во ве́ки.

Слава, и ныне: Богородичен: Я́ко Ма́тери и Де́ве, радуйся, Тебе́ вопие́м с Гаврии́лом боже́ственным, Богора́д ованная: Сло́во бо нам Бо́жие пло́тию родила́ еси́, Его́же превозно́сим во вся ве́ки.

Песнь 9

Ирмос: Е́же ра́дуйся от А́нгела приймшая, и ро́ждшая Созда́теля Своего́, Де́во, спаса́й Тя велича́ющия.

Поми́луй мя, Бо́же, поми́луй мя.

Ио́сиф у́бо целому́дрствовав, пшеницода́вец позна́н бысть: аз же блу́дствуя, гла́дом одержи́мь есмь доброде́тельных дея́ний.

Поми́луй мя, Бо́же, поми́луй мя. я́ко Петр пока́явся, Христе́, сле́зы приношу́, я́ко мыта́рь воздыха́ю, я́ко блу́дный из глубины́ зову́: согреши́х, прости́ мя.

Святи́м А́нгели, моли́те Бо́га о нас.

Дави́дом проро́ком Твои́м я́ко преста́ти сотвори́л еси́ Твоя́ люди поража́юща ору́жием Ти А́нгела, та́ко, Щедре, пода́ждь мир, Христе́, всем це́рквам, належа́щее ны́не облегча́я искуше́ние[63]63
  Имеется в виду вторая волна иконоборчества (815–843 гг.).


[Закрыть],я́ко многоми́лостив.

Святи́м А́нгели, моли́те Бо́га о нас.

Ви́дев люде́й Твои́х, Христе́, озлобле́ние[64]64
  Бедствие (имеется в виду то же, что и в предыдущем тропаре).


[Закрыть], я́ко врач душ же и теле́с исцели́ мольба́ми, Влады́ко, Твои́х служи́телей, ны́не о́крест стоя́щих Тебе́ всех Царя́ и гла́сы непреста́нными я́ко Бо́га славосло́вящих Тя.

Слава, и ныне: Богородичен: Нача́ла, А́рха́нгели, Госпо́дьствия и Серафи́ми, Си́лы, Вла́сти и А́нгели, Престо́ли с многоочи́тыми Херуви́мы ны́не препросла́вленное Рождество́[65]65
  Порождение (т. е. Христа).


[Закрыть] Твое́ чту́ще, Тя, Ма́ти Де́во, благогове́йно при́сно сла́вят.

Эксапостиларий святым Небесным Силам

Не́бо звезда́ми украси́вый я́ко Бог, и Твои́ми Ангелы всю зе́млю просвети́вый, Соде́телю всех, пою́щия Тя спаса́й.

Слава, и ныне: Богородичен: Сла́дость Ангелов, скорбя́щих ра́дость, христиа́н Предста́тельница, Де́во Ма́ти Госпо́дня, заступи́ нас и изба́ви ве́чных мук.

Отпуст дня

Го́споди Иису́се Христе́, Бо́же наш, моли́тв ра́ди Пречи́стыя Твоея́ Ма́тере, предста́тельствы честны́х Небе́сных Сил безпло́тных, святы́х и пра́ведных богооте́ц Иоаки́ма и Анны и всех святы́х, поми́луй и спаси́ нас, я́ко благ и Человеколю́бец.