Текст книги "Молитвенник"

Тропари воскресные

С Богородичными, кондаками, догматиками, прокимнами и аллилуиа

Первого гласа

Тропарь

Камени запечатану от Иудей, и воином стрегущим пречистое Тело Твое, воскресл еси тридневный Спасе, даруяй мирови жизнь. Сего ради силы небесныя вопияху Ти, Жизнодавче: слава Воскресению Твоему, Христе, слава Царствию Твоему, слава смотрению Твоему, едине Человеколюбче.

Богородичен

Гавриилу вещавшу Тебе, Дево, радуйся, со гласом воплощашеся всех Владыка в Тебе святем кивоте, якоже рече праведный Давид: явилася еси ширшая небес поносивши Зиждителя Твоего. Слава Всельшемуся в Тя, слава Прошедшему из Тебе, слава Свободившему нас рождеством Твоим.

Кондак

Воскресл еси яко Бог из гроба во славе, и мир совоскресил еси, и естество человеческое яко Бога воспевает Тя, и смерть исчезе, Адам же ликует, Владыко; Ева ныне от уз избавляема радуется зовущи: Ты еси Иже всем подая, Христе, воскресение.

На вечерни

Догматик – Богородичен: Всемирную славу от человек прозябшую и Владыку рождшую, небесную дверь воспоим Марию Деву, бесплотных песнь и верных удобрение. Сия бо явися небо и храм Божества. Сия преграждение вражды разрушивши, мир введе и Царствие отверзе. Сию убо имуще веры утверждение, поборника имамы из Нея рождшагося Господа. Дерзайте убо, дерзайте людие Божпп, ибо Той победит враги, яко всесилен.

На утрени

Прокимен: Ныне воскресну, глаголет Господь, положуся во спасение, не обинюся о нем.

На литургии

Прокимен: Буди, Господи, милость Твоя на нас, якоже уповахом наТя.

Стих: Радуйтеся, праведнии о Господе, правым подобает похвала.

Аллилуиа: Бог даяй отмщение мне и покоривый люди под мя.

Стих: Величаяй спасения царева и творяй милость Христу своему Давиду и семени его до века.

Второго гласа

Тропарь

Егда снисшел еси к смерти, Животе бессмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.

Богородичен

Вся паче смысла: вся преславная Твоя, Богородице, таинства, чистоте запечатанней и девству храниму, Мати позналася еси неложна, Бога рождши истиннаго: Того моли спастися душам нашим.

Кондак

Воскресл еси от гроба, всесильне Спасе, и ад видев чудо ужасеся, и мертвии восташа: тварь же видящи срадуется Тебе и Адам свеселится, и мир, Спасе мой, воспевает Тя присно.

На вечерни

Догматик – Богородичен: Прейде сень законнная, благодати пришедши, якоже бо купина не сгараше опаляема, тако Дева родила еси: вместо столпа огненнаго, праведное воссия солнце; вместо Моисея, Христос спасение душ наших.

На утрени

Прокимен: Восстани, Господи Боже мой, повелением имже заповедал еси, и сонм людей обыдет Тя.

Стих: Господи Боже мой, на Тя уловах, спаси мя.

На литургии

Прокимен: Крепость моя и пение мое Господь, и бысть мне во спасение.

Стих: Наказуя наказа мы Господь, смерти же не предаде мя.

Аллилуиа: Услышит тя Господь в день печали, защитит тя имя Бога Иаковля.

Стих: Господи, спаси царя и услыши ны, воньже аще день призовем Тя.

Третьего гласа

Тропарь

Да веселятся небесная, да радуются земная, яко сотвори державу мышцею Своею Господь, попра смертию смерть, первенец мертвых бысть: из чрева адова избави нас, и подаде мирови велию милость.

Богородичен

Тя, ходатайствовавшую спасение рода нашего, воспеваем, Богородице Дево: плотию бо от Тебе восприятою Сын Твой и Бог наш крестом восприим страсть, избави нас от тли яко Человеколюбец.

Кондак

Воскресл еси из гроба, Щедре, и нас возвел еси от врат смертных: днесь Адам ликует, и радуется Ева, вкупе же и пророци с патриархи воспевают непрестанно Божественную державу власти Твоея.

На вечерни

Догматик – Богородичен: Како не дивимся Богомужному рождеству Твоему, пречестная, искушения бо мужескаго не приемши всенепорочная; родила еси без отца сына плотию прежде век от Отца рожденнаго без матере, никакоже претерпевшаго изменения или смешения или разделения, но обою существу свойство цело сохраньшаго. Тем же Мати Дево Владычице, Того моли спастися душам, православно Богородицу исповедающих Тя.

На утрени

Прокимен: Рцыте во языцех, яко Господь воцарися: ибо исправи вселенную, яже не подвижится.

На литургии

Прокимен: Пойте Богу нашему, пойте, пойте цареви нашему, пойте.

Стих: Вси языцы, воскликните Богу гласом радования.

Аллилуиа: На Тя, Господи, уловах, да не постыжуся во век.

Стих: Буди ми в Бога защитителя и в дом прибежища, еже спасти мя.

Четвертого гласа

Тропарь

Светлую воскресения проповедь от Ангела уведевше Господни ученицы, и прадеднее осуждение отвергше, Апостолом хвалящеся глаголаху: испровержеся смерть, воскресе Христос Бог, даруяй мирови вел ию милость.

Богородичен

Еже от века утаенное и Ангелом несведомое таинство, Тобою, Богородице, сущим на земли явися Бог в неслитном соединении воплощаем, и крест волею нас ради восприим: имже воскресив первозданнаго, спасе от смерти души наша.

Кондак

Спас и Избавитель мой из гроба, яко Бог, воскреси от уз земнородныя и врата адова сокруши, и яко Владыка воскресе тридневен.

На вечерни

Догматик – Богородичен: Иже Тебе ради Богоотец пророк Давид песненно о Тебе провозгласи, величия Тебе сотворшему: предста царица одесную Тебе. Тя бо Матерь, Ходатаицу живота показа; без отца из Тебе вочеловечитися благоволивый Бог, да свой паки обновит образ истлевший страстьми. И заблуждшее горохищное обрет овча, на рамо восприим, ко Отцу принесет и своему хотению с небесными совокупит силами, и спасет Богородице, мир, Христос имеяй велию и богатую милость.

На утрени

Прокимен: Воскресни, Господи, помози нам и избави нас имене Твоего ради.

На литургии

Прокимен: Яко возвеличишася дела Твоя, Господи, вся премудростию сотворил еси.

Стих: Благослови, душе моя, Господа, Господи Боже мой, возвеличился еси зело.

Аллилуиа: Наляцы и успевай, истины ради и кротости и правды.

Стих: Возлюбил еси правду и возненавидел еси беззаконие.

Пятого гласа

Тропарь

Собезначальное слово Отцу и Духови, от Девы рождшееся на спасение наше, воспоим вернии, и поклонимся, яко благоволи плотию взыти на крест и смерть претерпети, и воскресити умершия, славным воскресением Своим.

Богородичен

Радуйся, двере Господня непроходимая, радуйся, стено и покрове прибегающих к Тебе, радуйся, необуреваемое пристанище и неискусобрачная, рождшая плотию Творца Твоего и Бога: молящи не оскудевай о воспевающих и кланяющихся Рождеству Твоему.

Кондак

Ко аду, Спасе мой, сошел еси, и врата сокрушивый яко всесилен, умерших яко Создатель совоскресил еси и смерти жало сокрушил еси, и Адам от клятвы избавлен бысть, Человеколюбче: темже вси зовем: спаси нас, Господи.

На вечерни

Догматик – Богородичен: В Чермнем мори неискусобрачныя невесты образ наиисася иногда. Тамо Моисей разделитель воды, зде же Гавриил служитель чудесе; тогда глубину шествова немокренно Израиль, ныне же Христа роди бессеменно Дева. Море по прошествии Израилеве пребысть непроходно, Непорочная по Рождестве Еммануилеве пребысть нетленна. Сый и прежде сый, явлейся яко человек, Боже, помилуй нас.

На утрени

Прокимен: Воскресни, Господи, Боже мой, да вознесется рука Твоя, яко Ты царствуеши во веки.

На литургии

Прокимен: Ты, Господи, сохраниши ны и соблюдеши ны от рода сего и во век.

Стих: Спаси мя, Господи, яко оскуде преподобный.

Аллилуиа: Милости Твоя, Господи, во век воспою, в род и род возвещу истину Твою усты моими.

Стих: Зане рекл еси: в век милость созиждется, на небесех уготовится истина Твоя.

Шестого гласа

Тропарь

Ангельския силы на гробе Твоем, и стрегущии омертвеша, и стояше Мария во гробе, ищущи пречистаго Тела Твоего. Пленил еси ад, не искусився от него; сретил еси Деву, даруяй живот, воскресый из мертвых., Господи, слава Тебе.

Богородичен

Благословенную нарекий Твою Матерь, пришел еси на страсть вольным хотением, воссияв на кресте, взыскати хотя Адама, глаголя Ангелом: срадуйтеся Мне, яко обретеся погибшая драхма; вся мудре устроивый, Боже наш, слава Тебе.

Кондак

Живоначальною дланию умершия от мрачных удолий Жизнодавец воскресив, всех Христос Бог, воскресение подаде человеческому роду: есть бо всех Спаситель, воскресение и живот, и Бог всех.

На вечерни

Догматик – Богородичен: Кто Тебе не ублажит, Пресвятая Дево? Кто ли не воспоет Твоего пречистаго рождества? Безлетно бо от Отца воссиявый Сын Единородный. Той же от Тебе чистыя пройде, неизреченно воплощся. Естеством Бог сый и естеством быв человек нас ради. Не во двою лицу разделяемый, но во двою естеству неслитно познаваемый. Того моли, Чистая, всеблаженная, помиловатися душам нашим.

На утрени

Прокимен: Господи, воздвигни силу Твою и прииди во еже спасти нас.

На литургии

Прокимен: Спаси, Господи, люди Твоя и благослови достояние Твое.

Стих: К Тебе, Господи, воззову, Боже мой, да не премолчиши от мене.

Аллилуиа: Живый в помощи вышняго, в дворех Бога небеснаго водворится.

Стих: Речет Господеви: заступник мой еси и прибежище мое, Бог мой, и уповаю на Него.

Седьмого гласа

Тропарь

Разрушил еси крестом Твоим смерть, отверзл еси разбойнику рай. Мироносицам плач преложил еси, и Апостолом проповедати повелел еси: яко воскресл еси, Христе Боже, даруяй мирови велию милость.

Богородичен

Яко нашего воскресения сокровище, на Тя, надеющияся, Всепетая, от рова и глубины прегрешений возведи: Ты бо повинныя греху спасла еси, рождши, яже прежде рождества Дева, и в рождестве Дева, и по рождестве паки пребываеши Дева.

Кондак

Не к тому держава смертная возможет держати человеки: Христос бо сниде сокрушая и разоряя силы ея: связуемь бывает ад, Пророцы согласно радуются, предста, глаголюще Спас сущим в вере: изыдите, вернии, в воскресение.

На вечерни

Догматик – Богородичен: Мати убо позналася еси паче естества, Богородице: пребыла же еси Дева, паче слова и разума, и чудесе рождества Твоего сказати язык не может. Преславну бо сущу зачатию, Чистая, непостижен есть образ рождения: идеже бо хощет Бог, побеждается естества чин. Тем же Тя вси Матерь Божию ведуще, молимтися прилежно: моли спастися душам нашим.

На утрени

Прокимен: Воскресни, Господи Боже мой, да вознесется рука Твоя, не забуди убогих Твоих до конца.

На литургии

Прокимен: Господь крепость людем Своим даст, Господь благословит люди Своя миром.

Стих: Принесите Господеви, сынове Божии, принесите Господеви, сыны овни.

Аллилуиа: Благо есть исповедатися Господеви и пети имени Твоему, Вышний.

Стих: Возвещати заутра милость Твою, и истину Твою на всяку нощь.

Восьмого гласа

Тропарь

С высоты снисшел еси Благоутробне, погребение приял еси тридневное, да нас свободиши страстей, животе и воскресение наше, Господи, слава Тебе.

Богородичен

Иже нас ради рождейся от Девы и распятие претерпев, Благий, испровергий смертию смерть, и воскресение явлей яко Бог, не презри, яже создал еси рукою Твоею: яви человеколюбие Твое, Милостиве, приими рождшую Тя Богородицу, молящуюся за ны, и спаси, Спасе наш, люди отчаянныя.

Кондак

Воскрес из гроба, умершия воздвигл еси и Адама воскресил еси, и Ева ликует во Твоем воскресении, и мирстии концы торжествуют еже из мертвых восстанием Твоим, Многомилостиве.

На вечерни

Догматик – Богородичен: Царь небесный за человеколюбие на земли явися, и с человеки поживе: от Девы бо чистыя плоть приемый, и из Нея прошедший с восприятием: Един есть Сын, сугуб естеством, но не ипостасию, тем же совершенна того Бога и совершенна человека воистинну проповедающе, исповедуем Христа, Бога нашего: Его же моли, Мати безневестная, помиловатися душам нашим.

На утрени

Прокимен: Воцарится Господь во век. Бог Твой, Сионе, в род и род.

На литургии

Прокимен: Помолитеся и воздадите Господеви, Богу нашему.

Стих: Ведом во Иудеи Бог, во Израили велие имя Его.

Аллилуиа: Приидите, возрадуемся Господеви, воскликнем Богу Спасителю нашему.

Стих: Предварим лице Его во исповедании, и во псалмех воскликнем Ему.

Тропари дневные

С кондаками, прокимнами, аллилуиа и причасти

В понедельник

Тропарь, гл. 4

Небесных воинств архистратизи, молим вас присно мы недостойнии, да вашими молитвами оградите нас кровом крыл невещественный вашея славы, сохраняюще нас припадающих прилежно и вопиющих: от бед избавите нас, яко чиноначальницы вышних сил.

Кондак, гл. 2

Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко бесплотных архистратизи.

На литургии

Прокимен, гл. 4: Творяй Ангелы Своя духи, и слуги Своя пламень огненный.

Стих: Благослови, душе моя, Господа, Господи Боже мой, возвеличился еси зело.

Аллилуиа, гл. 5. Хвалите Господа вси Ангели Его, хвалите Его вся силы Его.

Стих: Яко той рече, и быша: Той повеле, и создашася.

Причастен: Творяй Ангелы Своя духи, и слуги Своя пламень огненный.

Во вторник

Тропарь, гл. 2

Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Тем же за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.

Кондак, гл. 3

Пророче Божий и Предтече благодати, главу твою яко шипок священнейший от земли обретше, исцеления всегда приемлем: ибо паки, якоже прежде, в мире проповедуеши покаяние.

На литургии

Прокимен, гл. 7: Возвеселится праведник о Господе и уповает на Него.

Стих: Услыши, Боже, глас мой, внегда молити ми ся к Тебе.

Аллилуиа, гл. 4: Праведник яко финике процветет, яко кедр, иже в Ливане, умножится.

Стих: Насаждени в дому Господни, во дворех Бога нашего процветут.

Причастен: В память вечную будет праведник, от слуха зла не убоится.

В среду

Тропарь, гл. 1

Спаси, Господи, люди Твоя и благослови достояние Твое, победы благоверным людем Твоим на сопротивныя даруя, и Твое сохраняя крестом Твоим жительство.

Кондак, гл. 4

Вознесыйся на крест волею, тезоименитому Твоему новому жительству щедроты Твоя даруй, Христе Боже, возвесели силою Твоею благоверныя люди Твоя, победы дая им на супостаты, пособие имущим Твое оружие мира, непобедимую победу.

На литургии

Прокимен песнь Богородицы, гл. 3: Величит душа моя Господа, и возрадовася дух мой о Бозе, Спасе моем.

Стих: Яко призре на смирение рабы Своея, се бо отныне ублажат мя вси роди.

Аллилуиа, гл. 8: Слыши, дщи, и виждь, и приклони ухо твое.

Стих: Лицу твоему помолятся богатии людстии.

Причастен: Чашу спасения прииму и имя Господне призову.

В четверг

Тропари, гл. 4

Апостоли святии, молите милостиваго Бога, да прегрешений оставление подаст душам нашим.

Гл. 4

Правило веры и образ кротости, воздержания учителя яви тя стаду Твоему, яже вещей истина: сего ради стяжал еси смирением высокая, нищетою богатая, Отче священноначальниче Николае, моли Христа Бога спастися душам нашим.

Кондаки, гл. 2

Твердыя и Боговещанныя проповедатели, верх ученик Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, едине сведый сердечная.

Гл. 3

В Мирех, святе, священнодействитель показался еси: Христово бо, преподобие, Евангелие исполнив, положил еси душу твою о людех Твоих и спасл еси неповинныя от смерти: сего ради освятился еси, яко великий таинник Божия благодати.

На литургии

Прокимен, гл. 8: Во всю землю изыде вещание их, и в концы вселенныя глаголы их.

Стих: Небеса поведают славу Божию, творение же руку Его возвещает твердь.

Аллилуиа, гл. 1: Исповедят небеса чудеса Твоя, Господи, ибо истину Твою в церкви святых.

Стих: Бог прославляем в совете святых, велий и страшен есть над всеми окрестными Его.

Причастен: Во всю землю изыде вещание их, и в концы вселенныя глаголы их.

В пятницу

Тропарь, гл. 1

Спаси, Господи… (как в среду).

Кондак, гл. 4

Вознесыйся… (как в среду).

На литургии

Прокимен, гл. 7: Возносите Господа Бога нашего и поклоняйтеся подножию ногу Его, яко свято есть.

Стих: Господь воцарися, да гневаются людие.

Аллилуиа, гл. 1: Помяни сонм Твой, егоже стяжал еси исперва.

Стих: Бог же Царь наш прежде века, содела спасение посреде земли.

Причастен: Спасение соделал еси посреде земли, Боже.

В субботу

Тропари, гл. 2

Апостоли, мученицы и пророцы, святителие, преподобнии и праведнии, добре подвиг совершившии и веру соблюдший, дерзновение имуще ко Спасу, о нас Того, яко блага, молите спастися, молимся, душам нашим.

Помяни, Господи, яко благ, рабы Твоя, и елика в житии согрешиша, прости: никтоже бо безгрешен, токмо Ты, могий и преставленным дати покой.

Кондак, гл. 8

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная.

Яко начатки естества насадителю твари вселенная приносит Ти, Господи, Богоносныя мученики: тех молитвами в мире глубоце Церковь Твою, жительство Твое Богородицею соблюди, Многомилостиве.

На литургии

Прокимен, гл. 8: Веселитеся о Господе и радуйтеся, праведнии.

Стих: Блажени, ихже оставишася беззакония и ихже прикрышася греси.

И умершим, гл. 6: Души их во благих водворятся.

Аллилуиа, гл. 4: Воззваша праведнии, и Господь услыша их, и от всех скорбей их избави их.

Стих: Многи скорби праведным, и от всех их избавит я Господь.

Стих: Блажени, яже избрал и приял еси, Господи, и память их в род и род.

Причастен: Радуйтеся праведнии о Господе, правым подобает похвала.

Другой: Блажени, яже избрал и приял еси, Господи, и память их в род и род.

Прокимны дневные на вечерне

В субботу вечером

Прокимен, гл. 6: Господь воцарися, в лепоту облечеся.

Стих: Облечеся Господь в силу и препоясася.

Стих: Ибо утверди вселенную, яже не подвижится.

Стих: Дому Твоему подобает святыня, Господи, в долготу дний.

В воскресенье вечером

Прокимен, гл. 8: Се ныне благословите Господа, вси раби Господни.

Стих: Стоящии во храме Господни, во дворех дому Бога нашего.

В понедельник вечером

Прокимен, гл. 4: Господь услышит мя, внегда воззвати ми к Нему.

Стих: Внегда призвати ми, услыша мя Бог правды моея.

Во вторник вечером

Прокимен, гл. 1: Милость Твоя, Господи, поженет мя вся дни живота моего.

Стих: Господь пасет мя и ничтоже мя лишит, на месте злачне, тамо всели мя.

В среду вечером

Прокимен, гл. 5: Боже, во имя Твое спаси мя, и в силе Твоей суди ми.

Стих: Боже, услыши молитву мою, внуши глаголы уст моих.

В четверг вечером

Прокимен, гл. 6: Помощь моя от Господа, сотворшаго небо и землю.

Стих: Возведох очи мои в горы, отнюдуже приидет помощь моя.

В пятницу вечером

Прокимен, гл. 7: Боже, заступник мой еси Ты, и милость Твоя предварит мя.

Стих: Изми мя от враг моих, Боже, и от восстающих на мя, избави мя.

Тропари, кондаки и проч. Из триоди постной

Неделя мытаря и фарисея

Все воскресное гласа, кроме кондака сего, гл. 4:

Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.

Неделя блудного сына

Все воскресное гласа, кроме кондака сего, гл. 3:

Отеческия славы Твоея удалихся безумно, в злых расточив, еже ми предал еси богатство. Темже Ти блуднаго глас приношу: согреших пред Тобою, Отче щедрый, приими мя кающася, и сотвори мя яко единаго от наемник Твоих.

Суббота мясопустная

Родительская суббота

Тропарь, гл. 8

Глубиною мудрости человеколюбно вся строяй, и полезное всем подаваяй, едине Содетелю, упокой, Господи, души раб Твоих: на Тя бо упование возложиша Творца и Зиждителя и Бога нашего.

Кондак, гл. 8

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная.

На литургии

Прокимен, гл. 6: Души их во благих водворятся.

Стих: К Тебе, Господи, воздвигох душу мою, Боже мой.

Аллилуиа, гл. 6: Блажени, яже избрал и приял еси, Господи, и память их в род и род.

Причастен: Блажени, яже избрал и приял еси, Господи, и память их в род и род.

Неделя мясопустная

Тропарь: воскресен гласа

Кондак, гл. 1

Егда приидеши, Боже, на землю со славою, и трепещут всяческая: река же огненная пред судищем влечет, книги разгибаются, и тайная являются: тогда избави мя от огня неугасимаго и сподоби мя одесную Тебе стати, Судие Праведнейший.

На литургии

Прокимен, гл. 3: Велий Господь, и велия крепость Его, и разума Его несть числа.

Стих: Хвалите Господа, яко благ псалом.

Аллилуиа, гл. 8: Приидите, возрадуемся Господеви, воскликнем Богу, Спасителю нашему.

Суббота сыропустная

Память всех, в посте просиявших

Тропарь, гл. 4

Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.

Кондак, гл. 8

Яко благочестия проповедники, и нечестия обуздатели, Богоносных собор уяснил еси, подсолнечную осиявающия в мире совершенном: тех молитвами Тебе славящия и величающия сохрани, поющия Ти, Господи, аллилуиа.

На литургии

Прокимен, гл. 4: Восхвалятся преподобнии во славе и возрадуются на ложах своих.

Стих: Возношения Божия в гортани их, и мечи обоюду остры в руках их.

Аллилуиа, гл. 2: Насаждени в дому Господни, во дворех Бога нашего процветут.

Причастен: Радуйтеся, праведнии, о Господе, правым подобает похвала.