Текст книги "Mmino Wa Ngwedi (Kgokagano Ya Madi)"

Kgaolo ya 2

Envy a kwa phišo e theoga go yena bjalo ka letlalo la bobedi ge a fologa ditepisi. A leka go khutšiša mešifa ye ngangegilego gomme a leba lebatong la go bima. A tšea dikgato tše mmalwa ka lehlakoreng la Trevor, a kwa o kare o ka moleteng wa tša thobalano, ge dintlha tša menwana di kgoma letlalo la gagwe la go se apešwe gomme mebele ya go se tlwaelege e redimoga go yena.

Lebato la go bina le be le fifetše go feta la ditlelapo tše dingwe tšeo a bilego go tšona goba go di šomela gomme a hwetša gore o rata sephiri seo. E be e se baratani fela bao ba binago efela e le go kopakopana ga dihlopha tša mebele ya go fiša. Go kwa atmosfere ya go fapana, a emiša menwana ya gagwe ka go nanya le go dumelela dintla tša menwana ya gagwe di poraša go selaganya bao a sa ba tsebego ka leswiswing. Madi a kitima a latelwa ke go kiba ka gare ga gagwe ke mošito wa mmino wa go fiša.

A sa lebelela taba ya go itebanya le Trevor, a tšea sebakanyana a tswaletše mahlo gomme a sepela le mmino wo ka hlalošwago bjalo ka modumo wa kganyogo.

Ge a ekwa mekgomo ya thaloko e tiišetša, Envy a bula mahlo a gagwe gomme a ikhwetša a lebeletše dikgara tša banna ba mmalwa, ba bangwe ba laetša letlalo ka dihempe tša go se konopetšwe ba bangwe ba apere tša go ba tiiša tšeo e lego mmitša. Ga senke a lebelele le difahlego tša bona ka letšhogo la go lebanya mahlo le bona.

Ge a ekwa di mo tsena hlogong, a thoma go boela morago gomme a sena taba ge ba mo latela ka mmino wo wa mmitša. A kwa go tonya ga tšhipi ya kheitši ya go bina mokokotlong wa gagwe, a e lebelela ka go nanya mo lefelong leo le lennyane. Mahlo a gagwe a kopana le a lesogana la ka kheitšeng ge a gogela mosetsana yo a nago le yena fase go kwatama ka dikhuru ka tlase ga gagwe ka boemo bja boineelo.

Phapoši ka moka e be e bonala eke e a hwelela ge mahlo a bona a kopana le go swarana. Tsela yeo a bego a mo lebeletše ka yona go be go dira gore Envy a ikwe eke ke yena yo a ineelago. O be a na le mahlo a matalalerata ya aese ka nthokolo ye koto kudu go dikologa tlhaka ya gagwe. O be a sa gopole gore o kile a bona mahlo a go makatša goba a go tsenelela. A ka a lebelela ka gare diiri tše dintši gomme a se kgotsofale gomme seo sa mo tšhoša.

Tebelelo ya gagwe e be e efa Envy kgopolo ya gore o tseba gore o bogega bjang ka lepono. Tsela yeo mahlo a gagwe a bego a kitima le mmele wa gagwe gomme a ema mafelong a mangwe… a mo dira gore a ikwe o kare diatla tša gagwe di kgoma mafelo ao. Tumo ya go itahlela ka dipareng tša kheitše gomme a mo kgopele gore a robale le yena gona fao e be e le e ntši go ka e hlokomologa.

Ge a tloša tebelelo ya gagwe go tebelelo yeo e mo golegilego, Envy o ile a leka go ikgopotša gore a ka tloga lebatong la go bina ka nako efe goba efe ge a kgetha go dira bjalo.

Trevor o be a sa ipshine le ge a be leka go ya le modumo wa go bina le go kopana le batho ka mo a kgonago. Efela basetsana ba go fiša le go bina e be e se mabaka a nnete a go ba fao. O ile a tšwela pele go lebelela lesogana la ka kheitšeng ka gobane e be e le leswao la nnete la gagwe.

Leina la lesogana ke Devon Santos gomme e be e le motho wa mafelelo yo a bonwego a na le Kelly Foster; mosetsana wa mengwaga ye 20 yo a hweditšwego kgauswi le mmila wa ka morago beke ya go feta. O be a le ka kheitšeng yona yela bošego bja mafelelo ge a be a phela.

Go fihla gabjale o kwele gore motšwasehlabelo wa mmolai o sa tšo tlogela go šomela tlelapo ya tlase ga mmila ya go bitšwa Lesedi la Bošego. O šomile mo go Mmino wa Ngwedi bošego botee fela… bošego bjo a hlokofetšego ka bjona. Ga se lehu leo fela leo a le latelago efela e be e le ketapele. Motho yo a lahlilego setopo sa gagwe o netefaditše gore o se tlogela kgauswi le dikatse tša naga le mangau bjalo ka mpho.

Devon e be le o mongwe wa beng ba tlelapo ye, gammogo le bobuti ba gagwe ba babedi, Nick le Warren, le sesi wa bona a nnoši, Kat. Mabarebare a re ditlelapo tšeo tše pedi di na le phapano ya setu ye tšwelago pele gomme malapa ao a mabedi gabotse ke manaba go tloga mola botatago bona ba timelago mo mengwageng ye lesome ya go feta.

Trevor’s o ile a sesefatša mahlo a gagwe, ka ge a tseba lebaka la nnete la gore ke ka lebaka la eng go na le bonaba magareng ga ditlelapo. Ga se ditlelapo tša tlwaelo; Bafetogi ke beng ba tšona le go di sepetša. Tlelapo yeo Kelly a bego a šoma go yona e be sepetšwa ke dikatse tša naga. O tlogetše fao a tla go šomela mangau, efela a hlokofala letšatši la go latela. Seo ka nnete ga se seo o ka se hlokomologago.

Ge batho ba ka tseba gore bafetogi ba sebopego ba dula magareng ga a bona, ba tla tlala naga… efela ke kgale ba le karolo ya setšhaba ntle le gore sephiri se tšwele ntle. Ge fela ba ka obamela melao ya morafe wa batho, ga go na tlhokego ya go hlola tlhakahlakano ya bontši ka go ba tloša. Monagano wa batho o tla gomela mengwageng yela ya kgalekgale ge seo se ka hlaga.

Teori magareng ga taolo ya tše sa tlwaelegago tša ditirišano tša babaso tša CIA ke tša go šomana le seo ka tsela ya go swana le ye ba šomanago le UFO le tše ba kopnago natšo tša diAlien; yeo e bolelago maaka, go di uta le go di šireletša. Go na le dilo tše dintši tše dimpe kua kgakala ntle le bafetogi bao ba kgonago go tsenelana le batho gabotse… dibopiwa, tše dingwe tša kotsi tšeo batho ba dirago fela dimobi tša go tšhoša tše mpe ka tšona le tše dingwe tšeo batho ba sa tsebego selo ka tšona.

Efela ge batho ba thoma go timela goba go hlokofala, sehlopha sa gagwe se phatlaladitšwe go leka go hwetša gore go direga eng.

Ge a bona Devon a tlogela mosetsana ka kheitšeng ya gagwe gomme a batamela kgauswi le dipara go lebelela motho yo mongwe kua tlase, Trevor a šutiša tebelelo ya gagwe. O ile a kwa kgatelelo ya madi a gagwe e hlatloga ka magato a mmalwa ge a bona Envy a ithekgile ka kheitše yeo a dikologile ke masogana a go se tsebalege a mantši.

Gabotsebotse o dira eng fa? A tlogela babinimmogo ba gagwe ntle le go nagana gabedi gomme a eta a kgorometša lešaba a mo lebile.

Devon a rorela tlase ka mogolong wa gagwe ge mosetsana yo a gogago šedi ya gagwe a emiša diatla tša gagwe go itshwareletša ka dipara tša ka morago ga gagwe. O be a kgona go nkgelela phišo ya gagwe go bohle ka tlelapong ka bophara gomme e mmitša. A khupetša diatla tša gagwe ka tša gagwe. A dumelela menwana ya gagwe e lota matsogo a gagwe gabosana kua tlase ka dipara tša kheitše.

Ge Envy a sa re o lebelela sebini sela sa mmitša, motho yo mongwe a ngaparela letsogo le lengwe la gagwe gomme a le gogela fase gore le tloge kheitšeng. Dipounama tša gagwe tša bulega ge a bona gore ke mang, O be a lebetše Trevor ka botlalo. Maikutlo a le a tša thobalano a tloga gomme a befelwa gape ge a gopola gore ke ka lebaka la eng a tlile mo go Mmino wa Ngwedi sa mathomo… boitefeletšo.

“Gabotsebotse o dira eng fa?” Trevor a mo kgalema ka bogale, a leka go mo tloša fao kheitšeng le go phihlelelo ye kotsi ya Devon. Ge eba lengau ke mmolai, gona ka tsela yeo a bego a lebeletše Envy o mo swaya bjalo ka tebanya ya gagwe ya go latelela.

Envy a kgwahlišetša seatla a se phuthile ka go tiišetša mo godimo ga para ka gore o be a sa rate ka mo Trevor a akantšego go mo swara gampe. O itshwere o kare yena o dirile se sengwe sa phošo efela ke yena a dirago seo. A myemyela ka myemyelo e botse, “Ke tlile go bina… go no swana le wena.”

Dipounama tša Trevor tša sesefala ka ge a be a tseba gore o mmone a bina le basetsana ba bangwe, efela o be a sa kwešiše gore o be a ba diriša seo go iphihla. O be a se na taba le bona le maina a bona ga a tsebe. Yena le Envy ba lebeletšana ka mahlong metsotso ye mmalwa pele a goga moya.

A khunamela fase kgauswi le tsebe ya gagwe, a hebahebetša, “nka hlaloša.” O be a sa nyake go mmotša gore gabotsebotse ke yena mang, go no swana le buti wa gagwe wa hlogo ya bothata Chad, o be a tšhoga gore o tla nagana gore o a mo diriša go kgona go tsena ka dipareng tšeo a di šomelago.

“Etla hle,” a leka gape go mo tloša go tebelelo ya Devon yeo e fišago. O ile a lebelela Devon gape gomme ge tebelelo e be e bolaya nkabe madi a faletše gona fao lebatong. Le yena a mmušetša tebelelo yeo gomme a bušetša šedi ya gagwe go molekani wa gagwe.

Envy a šikinya hlogo go yena. O be a nagana gore o tla leka go hlaloša. “Ke tlile go bina. Nka bina le masogana ao a go loka, goba o ka thoma go sepela gomme wa bina le rena.” A emiša ntšhi ya leihlo la gagwe e botse, o kare ga a na bothata le yena.

Trevor a retolla hlogo ya gagwe ka go nanya gomme a lebelela ka godimo ga legetla la gagwe go masogana a go duma a sa le fao a emetše go bona ge ba ka hwetša monyetla. “Tlogang fa,” a ba botša, ka segalo sa go tšhoša, ge a batamela kgauswi le Envy. Ge eba o nyaka go bina, gona ka modimo, o tla bina le yena.

Envy a ngota molomo efela ka sephiring a ipotšiša ge eba o dira seo ka lebaka la mona mola yena a be a bina le basetsana ba bangwe ba babedi ka kgoketšo. “Ga o nthabiše.” Mafelelong a tlogela para yeo go sepetša diatla tša gagwe mmeleng wa gagwe, a ntšha theisara ye nnyane ka mokotleng wa gagwe, gomme ka morago a sepetša diatla tša gagwe dithapeng tša gagwe.

Devon a ema thwii, a lebeletše mosetsana wa meriri ye mehubedu o monnyane yo a sa gogago šedi ya gagwe a nnoši. O be a sa rate monkgo wa lesogana leo le nyakago go mo tšea. O nkga bjalo ka muši wa powere ya sethunya wa kgale gomme seo se ra gore o na le sebetša se utamilego go gongwe mo go yena. O ile a fihlelela le go notlolla kheitše, a botša sebini sa mosetsana gore se ikhutšenyana.

A kgoma tsebe ya gagwe ka monwana. Devon a theeletša buti wa gagwe ge a mmotša ka kgokagano ya poledišano ya go se bonagale gore mosetsana yo a lego kheitšeng ya gagwe o na le theisara gomme o be a na le dipeakanyo tša go e diriša go lesogana le lengwe. A lebelela go selaganya lebato la go binela go ya go lebone le leso leo le thumašago ditepisi a bona Nick a eme fao a ikemišeditše go ba tsena gare, ge go hlokagala.

E be e le Warren go kgokagano ya poledišano, ka fao Devon a kwešiša gore buti wa gagwe o mogolo o be a bogetše go tšwa go khamera ya pono ya bošego yeo e fegilwego ka tlase ga mosepelo wa katse ka godimo ga gagwe.

Ge a lebelela tlase go diatla tša gagwe tše dinnyane gabjale di phophola mmele wa lesogana. Devon a kwa nyakego ka bjako ya go kgaola hlogo ya lesogana leo, seo ke pele a bona go kganya ga silibera ge seatla sa gagwe se lebile lethekeng la lesogana. Dipounama tša gagwe tša mo lemoša ka sepoko sa go myemyela gomme a akanya go se tsene gare gabjale.

“E re ke šomane le se,” Devon a hebahebetša ka go kgokagano ya poledišano.

Chad le Jason ba myemyela ka tsebo ya gore e loketše go ya kua tlase, gomme ba kitimela ditepising tša go ya lebatong la go bina.

Trevor a lemoga ka pejana gore Envy ga se a mmotše gore o tla fa, goreng a ipona molato? “Ke botšišitše gore o nyaka eng fa,” a boeletša, gomme gabjale lentšu la gagwe le be le sa šikinyege, ge a mmatamela. Mosepelo o mobe, o nyakile go lahlegelwa ke tlhaologanyo, ka ge madi a gagwe a ile a kitimela mo pele, seo sa mo dira gore a thatafale la mathomo mola a fihlago ka gare ga tlelapo ye.

Envy a kgoromeletša mmele wa gagwe go yena go mo goketša gore a kgone go boela morago ka potlako. “Ke tlile go go fa se sengwe,” a araba gomme a bea kganyogo ya phišo ka moka yeo a ekwago go tšwa lebatong la go bina ka mahlong a gagwe go mo lahletša.

“Ke tshepa gore e sepelelana le selo sa go swana le seo ke go beetšego sona,” Trevor a tsetla, ge a ekwa seatla sa gagwe se mo swara mo pele.

“Etla re hwetše seo,” Envy a tsitsila, ge a gatelela theisara kgahlanong le mapele a gagwe a thatafetšego gomme a e gogela morago ge a roromela le go wela fase ka dikhuru ntle le modumo. “Ijoo!” Envy a ngota molomo gomme a bea theisara ka potlako ka mokotleng wa gagwe pele a tšhabela ka lehlakoreng le lengwe. Sa mafelelo se a nyakaga go se dira ke go ikhwetša a sa eme fao le Trevor ge a boelwa ke mmatla a go emelela.

Ge Envy a sepela ka lebatong la go binela la go fifala, motho yo mongwe a mo goga ka letsogo a mo kgwahlišitše. O be a nagana gore ke buti wa gagwe; ga se a lebelela godimo ka nako yeo efela a mo latela ka tshepo. Ge a re ke lebelela godimo, lebati le lennyane la bulega gomme a kgoromeletšwa go lona.

Envy ga se a be le nako ya go retologa pele le tswalelwa gomme la notlelwa ka morago ga gagwe. Lebone la go se bontšhe botse le be le panyapanya ka godimo ga hlogo le laetša monithara wa TV gomme le lesogana leo le bego le le ka khaeitšeng. O ile a bula molomo wa gagwe go bolela, efela a mo tswalela.

“Ke nagana gore go tla ba kaone ge o ka bogela mošomo wa gago wa diatla ka polokegong ya kantoro. “Devon a myemyela, ge a mo šupetša se sengwe sa diširo.

Envy o ile a lebelela seširo a nagana gore ge a bona Trevor a itshwere mapele o tla sega… efela, seo sa mo dira gore a mo kwele bohloko. Seo se dirile gore a kwe pelo ya gagwe eke e wele ka dikgato tše mmalwa. Ge a mmona a ekwa bohloko, o ile a kwa a thaba gore monithara ga o na modumo go seo a bego a se bolela ka gore ka nnete ga a nyake go tseba gore o be a reng.

A bogela ka setu ge Chad le Jason ba bonagala go tšwa lešabeng gomme ba mo thuša tseleng ka moka ya go ya lebatong la ka godimo. A ka bolela gore ba be ba reng, efela ge Trevor a kgorometša Chad go yena ka maatla a mantši go feta ka mo a swanetšego ka morago ga metsotso ya go theisiwa, mahlo a gagwe a lebelela lebating a ikemišeditše go fofela morago pele yo mongwe wa bona a gobala.

Ge sebini se šikinya hlogo ya gagwe ka temošo ge a eme magareng ga gagwe le lebati, Envy a lebelela morago go monithara a makatšwa ke go bona Jason a swara Trevor ka go mo tiiša ka matsogo gomme Chad a bea dihakisi go yena.

A ikwa a ipefelelwa ka go itira ngwana, a thoma go leba lebating go yo botša Chad gore a tlogele Trevor. Gape, seatla sa kgwahliša letsogo la gagwe. A le lebelela a gana go lebantšha mahlo le yena, mola go le molaleng gore ke molato wa gagwe wa go thoma seo. Go ipona molato gwa oketša pefelo ya gagwe gomme gwa mpshafatša maatla a gagwe

“Ka morago ga go mpona ke theisa lesogana, o nagana gore seo ke kgopolo ye botse?” A gogela mahlo a gagwe go yena gomme a leka gore a se lahlegelwe ke mohemo ka tšhušumetšo yeo. Bjale ka ge a mmatemetše, mahlo a gagwe a be a tloga a makatša go feta ge a le ka morago ka dipara tša kheitše.

“E kaba masogana ao ke bomang, efela o ka nyaka gore ba mo ntšhetše ka ntle ga tlelapo pele o boela morago go bina.” Devon a mo lemoša gape, a bona ge lelekabje le mo tšhuma ka mahlong a gagwe. O be a bona gore o tloga a nyaka go yo phološa lesogana leo a le gobaditšego… e sego gore o na le maikemišetšo a go mo dumelela. “Leina la gago ke mang?”

“Goreng?” Envy a goga letsogo la gagwe leo a le swerego. “Gore o kgone go botša beng gore ba nkiletše go tla tlelapong?”

“Ga go bjalo,” Devon a kwa kgopolo yeo e sa mo sware gabotse. “Efela o ka nyaka go swara theisara ka morabeng wa gago bošego ka moka.” A mmogela ge a lebelela morago go monithara go bona gore motšwasehlabelo wa gagwe o tlogile.

‘Akgaa,’ A goga moya ka monagano, ge a ithekga ka lebati a ekwa go duma ga mmino ka kota yeo. A loma pounama ya ka tlase a tseba gore o fihlile magomong. A gopola lebaka le lengwe la go mo dira gore a tle mo go Mmino wa Ngwedi bošegong bjo gomme a ipotšiša ge eba ke nako ya maleba ya go tsoma mošomo. Goreng a sa diriše monyetla wo? A dumela ka monaganong. “A o tseba ge eba ba thwala fa?”

Devon o ile a se itshware ge myemyelo ye nnyane e phatlalala go selaganya dipunama tša gagwe. Ke seo a ka se nyakago go mo tsentšha ka kheitšeng lebakanyana gore a leke go ntšha mollo ka gare ga gagwe, “A o a bina?” a botšiša ka tshepo.

Mahlo a Envy a tomoga ge a gopola a mmogetše ka kheitšeng gomme dirope tša gagwe tša tlala malakabje… efela ka manyani, le marama a gagwe a laetša seo. “Aowa,” a hebahebetša, ka lentšu la makgwakgwa. “E sego go bina. Ke hlokomela para mo ditlelapong tše dingwe lefelong le gomme ke be ke tlile go tsenya kgopelo ge ke le fa.”

“Ka maswabi,” Devon a myemyela, ge a batamela pele gomme a bula terowara ya teseke. A goga foromo ya dikgopelo gomme a mo fa yona. Efela ga se a hlwa a mmotša leina la gagwe, efela ge a ka mo dira gore a tlatše foromo yeo, gona o tla ba le tshedimošo ka moka yeo a e nyakago. Gomme o be a nyaka go netefatša gore ga a šomele Lebone la Bošego.

O be a lapišitšwe ke bona ba go romela batho fa go ba hlolela. E be e le Quinn yo a fedišitšego dikamano magareng ga dikatse tša naga le mangau, ka fao dikatse tša naga di ka ba tlogela ba nnoši, ka mo go lego ka gona.

Yo mongwe kua go Lebone la Bošego o rometše motho wa mafelelo yo ba mo thwetšego, gomme gabjale ka gore o bolailwe, dikatse tša naga di nyaka dikarabo go Mmino wa Ngwedi… gape le maphodisa. Ka mahlatse, bošego botee bjo a šomilego fa, o kgopetše gore a bewe ka kheitšeng le yena.

Devon a goga setulo ka tlase ga teseke a tseba gore tsela ya ka pejana ya go mo dira gore a dule sebaka ke go mo fa se a se nyakago. “O ka e tlatša gona bjale. Mogongwe o ka ba le mošomo o mongwe mafelelong a bošego bjo.”

Envy a dula fase gomme a lebelela morago go monithara a nyenyebetše. “O nagana gore mong wa lefelo o mpone ke theisara Trevor? a loma pounama ya ka tlase ya gagwe, a ipona ka monaganong gore go be go le bjang. “Ke duma ge nkabe ke sa dira seo.”

Devon a ithekga ka setulo sa gagwe o kare o lebeletše monithara le yena. A bea diponama tša gagwe kgauswi le thinana ya tsebe ya gagwe a botšiša, “Ge mong wa lefelo a ka be a go bone gomme a go botsiša ka seo, o be o tla reng?” A goga moya ka go nanya, ge monkgo wa gagwe o mo aparetša o tšhuma madi a gagwe.

Envy a thoma go retološa hlogo ya gagwe go lebelela godimo efela a ema. Maikutlo ao a hlolago ka go ba kgauswi a phatlaletše go selaganya magetla le go ya ka lehlakorng la molala wa gagwe. “Ke be ke nyaka go rumulana.” A hema, a ekwa phišo e leba gape kua tlase ga gagwe. Lesogana le kotsi go dikwi tša gagwe. O be a sa tsebe gore a retologe gomme a mo latswe goba a kitime go itšhireletša.

Sekhutlo sa pounama ya Devon sa laetša myemyelo efela a se šikenyege mo a lego, “Ka fao, o sepela gohle o theisara masogana ka dinako tšohle ntle le lebaka?” O be a ekwa go kukega ditho ga gagwe go eya godimo gomme go dira gore borokgo bja gagwe bo thatafale ka go se iketle.

“Aowa,” Envy o be a thabišwa ke go mo ntšha tseleng gomme a tšea pene ya enke mo foletareng ye nnyane ka pele ga gagwe gomme a thoma go tlatša foromo. “Ke fela bao e ba swanelago,” a araba, a sa nyake go bolela ka seo.

Devon a emelela thwii gomme a lwantšha tumo ya go mo gogela ka ntle ga setulo gomme a mo dudiša tesekeng ya ka pele ga gagwe. Ge go le bjalo, o be a šetše a phophola moriri wa gagwe wa silika magareng ga menwana ya gagwe mo e wetšego ka morago ga setulo.

O ile a homola ge a tlatša foromo ya kgopelo gomme a e bala ka legetla la gagwe a lebeletše lentšu le lengwe le le lengwe. Envy Sexton, gomme ditlelapo tša dikatse tša naga le divamphaya ka tebogo di be di se gona lenaneong la ditlelapo tše a di šomelago. O a tseba gore ge a ka letša mogala a ka mo lokolla go bontši bja dinako tša gagwe ka go botša ditlelapo tšeo go mo ntšha šetšuleng. O be a sa ikwe go ka abelana le bona ka phaga ye nnyane.

Envy a fetša go tlatša foromo gomme a thoma go emelela efela Devon a bea seatla sa gagwe legetleng la gagwe go mo swarelela fao. A akgofa a tšea pampiri go yena gomme a leba lebating.

“Dula fao. Ke tla boa ka morago ga metsotso ye mmalwa ka karabo,” Devon a swara setswaledi efela a emanyana ge a bolela.

“Leina la gago ke mang?” Envy a botšiša, a ipotšiša ge eba ga se a swanela go fa mong pampiri yeo ka boyena. le go ka botšišwa dipotšišo.

“Devon Santos,” a araba, gomme a tšwela ka ntle ga lebati a timelela pele a ka mo emiša.

O be a tseba gore Nick o eme ka ntle ga lebati ka gore o kwa monkgo wa gagwe. A fa Nick pampiri, Devon a mo tsebiša, “Re na le mohlokomedi wa para yo mongwe.” A ema ge Nick a lebelela pampiri yeo a tseba gore gore buti wa gagwe o lebelela dilo tša go swana le tšeo a šetšego a di lekotše. Nick o kopane le sehlotswana sa divamphaya gomme vamphaya e tee e šwahletše ka gare gomme seo se sentše maikutlo a bošego a gagwe. O hloile divamphaya le motho ofe goba ofe yo e lego lešilo go ka ba le bona. Ka ge a sa bone taetšo efe goba efe ya gore mosetsana yo o amana le bona le go nkgelela go tsogelwa ke ditho ga buti wa gagwe mo mosetsana yo a go hlotšego, Nick a akanya gore Devon a rarolle ditaba tša gagwe.

Mafelelong a mo neela foromo yeo, “O mmotše gore a tlogele theisara gae.” Nick a lebela buti wa gagwe lebakanyana pele a tlaleletša ka go re, “Kat o re lesogana leo a le theiselego ke moratiwa wa gagwe gomme lesogana leo le mo gogilego ka dihakisi ke buti wa gagwe.”

“Lesogana leo la gagwe le be le na le sethunya. Ke be ke se nkgelela.” Devon a iša magetla godimo, le ge mahlo a gagwe a sesefala, “Mogongwe e be e se molekani wa go loka.”

“O swanelwa ke go ba le tlhokomelo go yena.” Nick a šikinya hlogo ya gagwe, ka ge a bona kganyogo ka mahlong a buti wa gagwe. “Ge eba o a mo nyaka, gona taolo ke ya gago ge a le fa.” Nick a tšitlanya meno ge a ekwa monkgo wa vamphaya. Ntle le lentšu, a kitimela ditepising.

Envy a lebelela gohle ka letšhogonyana gomme a bona elebeitha yeo a sa e lemogago pejana. A emiša ntšhi ya leihlo la gagwe ge a lemoga gore e diriša khipete e sego konopi ye bonolo. A bethantšha pene tesekeng a ipotšiša gore o tla ema go fihla neng. O be a sa nyaka go hwetša ge eba Chad o golegile Trevor goba e be e le go mo ntšha ka tlelapong.

O ile a lebelela go dikologa teseke go dira gore a se gopole selo lebakanyana. Ke monyakišiši wa tlhago go swana le buti wa gagwe, le ge Chad a leka go uta seo. Nnete ke gore, Chad a ka ba letseka le legolo. O boditše bohle gore yena e no ba lephodisa efela seo ga se nnete le gatee. Ke moetapele wa makgonthe wa sehlopha sa SWAT.

Mafelelong a lebelela fase go pampiri yeo a e topilego ka phošo. E be e le setlankana sa tša thekišo. Tebelelo ya gagwe ya lebelela tshedimošo ya direkwa go bona leina la mo fase. A lahla karolwana yeo ya pampiri mo tesekeng. Devon Santos… a ye heleng. Ke yo mongwe wa beng ba fa gomme o dira gore a nagane gore ke yena sebini fela.

Ka nako yeo lebati la kantoro la bulega gomme Devon a tsena. “O nyaka go thoma neng?”

*****

Nick a kitima go selaganya lebato la go binela gomme a namela ditepisi tša go ya mojako. A kgorometša lebati ka maatla go feta ka mo go nyakegago gomme a lebelela monna yo a lekago go nyaka go tshela moletakgoro. Ka ge bontši bja baletakgoro e le bafetogi, ba kgona go nkgelela divamphaya le ge go se na maswao a ka ntle.

Dikwi tša selehono tša vamphaya ya tlwaelo mo motsesetoropong di bonala di etšwa go lešaba la Goth. Mo dikgweding tše mmalwa tša go feta, gabjale, go ka lekana ba lesome ba apere disutu tša kgwebo goba diaparo tša tlelapo tša ka mehla ba ile ba leka go tsena. Ke ka lebaka leo ba tshepago monkgo go feta pogego. Molao wa mathomo… ga go vamphaya ye tla fetago ntle le tumelelo ya mong.

“O nyaka eng fa?” Nick a botšiša, a leka go kwagala ka seprofešenale ka lebaka la babogedi ba bona ba batho. Monna yo a sekamišetša hlogo ya gagwe ka thoko gomme a fa myemyelo ye mpe yeo e dirilego gore diteng tša gagwe di bofagane.

“Ke nyaka go tsena ka gare.” Raven a realo, ge ditlhaka tša mahlo a gagwe di gola, a diriša maatla a gagwe go swarelela mang goba mang yo a kgonago go wela ka tlase ga maleatlana a divamphaya.

Nick a mo lebelela ka go iša mahlo godimo le fase. Lesogana le be le na le meriri ye meso ya go balafatšiwa mo dintlheng ka bopinki yeo e lego tlase sefahlegong sa gagwe. E be e le yo moswa; go ka lekana megwaga ye masomepedi-hlano, ka letlalo le lesehla le mothaladi wa leihlo wo boima go dikologa mahlo a gagwe. Dipounama tša gagwe di tloditšwe ka setlolamelomo se seso, le manala a gagwe a pentilwe ka boso.

“Tshwarelo morena …” Nick a sa šikinyege a lebeletše mosepelo o mongwe le o mongwe wa vamphaya. Go sa kgathalege gore ke wa bogolo bjo bokaakang goba mengwaga, divamphaya di kotsi kudu gomme o se akanyetše fase.

“Raven, mpitše Raven,” monna a araba, a ipotšiša gore o ka rumula lengau go fihla kae.

“Tshwarelo Raven, go tletše.” Nick a hlaloša, ge a khuparetša menwana ya gagwe go dikologa sethumya sa gagwe sa go thunya gabedi, seo se lego ka morabeng wa gagwe wa paki ya letlalo. Se tsentšwe dipulete tša silibera tša go tlatšwa ka meetse a kgalalelo. Dikhutlo tša dipounama tša gagwe tša šupa myemyelo ya bosathane, ge a ekwa bogale bja legong bja mphaka wa boswarelelo bja lerapo tšeo di kgomagantšwego le letsogo la gagwe.

“Bjale goreng batho bao ba sa eme mothalading?” Raven a botšiša, ge mmalanyana wa gauta o fetoga ka ditlhakeng tša mahlo a lengau.

Nick a myemyela efela go kwagala eke o lomaganya meno a gagwe. “Ba na le dipeeletšo.”

Mahlo a Raven a phadima ka leboneng le lennyane metsotswana a bonala eke a kgadima kudu ka mollo wa ka gare. Nick a fologa ditepisi tše tharo tša go lebana le mmila gomme a ipea magaremg ga Raven le lešaba la batho, gomme a khunamela kgauswi le tsebe ya Raven.

“Gabjale tloga, vamphaya,” a hebahebetša gabonolo efela ka go tonya, ge a gatelela ntlha ya mpha wa legong kgahlanong le dithapa tša Raven mo go se nago yo a o bonago. “Ga o tsene ka gare.”

Nick a ema thwii gomme a phutha matsogo a gagwe ka pele ga gagwe gore go be ka pejana go mo hlaba ka mphaka. “Tshwarelo morena, ipshine ka bošego.”

Raven a myemyela gape, efela ka nako ye ka lethabo, “Joo, ke ikemišeditše seo.”

A tloga lebating gomme a thoma go sepelela tlase mmileng a loketše diatla tša gagwe ka merabeng ya ditšene tše ntsho tša gagwe le go letša molodi. Ge lengau le be le khuname go mo hebahebetša ka tsebeng, Raven o ile a bona mong wa gagwe a feta a tsena ka tlelapong, Ke kgale a sa bone Kane. Gabotse, ke la mathomo mo dibekeng tše mmalwa, le ge e le gore o be a ekwa mahlo a gagwe a go tsenelela makga a mantši.

Seo se makaditšego Raven ke gore Kane o tsene ka legolong la manaba ka boyena. Mong wa gagwe o ile a mmotša ka kanegelo ya go bolokwa a phela ke moetapele wa sehlopha sa mangau. Naa mogongwe o na le leano la gagwe?

‘Ba go rwešitše molato mong wa ka, efela ka nako ye ke tla netefatša gore madi a ka diatleng tša rena.’ Raven a hebahebetša a nnoši pele a hlakahlakana le meriti. O a tseba gore a ka se eme sebaka. O sa kwa monkgo wa motšwasehlabelo wa gagwe wa mafelelo ge monkgo o fofa le moya go ya go Mmino wa Ngwedi.

*****

Kat a lebelela ge Chad le Jason ba thuša molekani wa go hloka mahlatse go mo ntšhetša ka ntle ga tlelapo… ka dihakisi. Ba hlwela ba bolela gore go rata go tseba go bolaile katse, efela o swanetše go hwetša seo ba akantšego go se dira ka yena. Ntle le se sengwe, e no ba go dira gore a se tshwenyege ka seo bošego ka moka.

A tšwela ntle ka lebati la ka thoko, a ema meriting ge a ba latela, Ka dikwi tša gagwe tša go kgona go kwa, o be a ka no se batamele kudu go kwa seo ba se bolelago.

Chad le Jason ba thibela Trevor magareng ga koloi ya gagwe le ya maphodisa gore molekani wa go lahlwa a se boele ka tlelapong go ya go Envy. Chad a tloša dihakisi a tseba gabotse gore a ka se mo golege ntle le lebaka la maleba… ntle le ge Trevor a ka mo kgorometša.

”Ke tshepa gore ke wena o mmoditšego gore ke fa!” Trevor a ngunanguna go Jason. “O se nagane gore ga se ke lemoge gore o a mo nyaka. O be o palelwa ke go ntšha nko ya gago ditabeng tše, ga go bjalo?”

Chad o ile a beletša letsogo la gagwe ka ntle ge Jason a tšea kgato ya go ya pele ya go tšhošetša. “Jason, ke e swere go tloga fa. Goreng o sa boele morago le go bona ge eba o ka hwetša Envy? Ga ke mo nyake mo ntle go fihlela Trevor a tloga.”

“O ka se nthibele go boela morago, ke a šoma! Trevor a bolela ntle le go nagana.”

“Ee, re bone seo o be o se šomela,” Jason o be a hunne diatla ka mathoko a gagwe, efela ka tebelelo yeo e mo šupilego go tšwa go Chad, o be a tseba gore bokaone ke gore a boele ka gare pele Trevor a ka se be noši wa dihakisi bošegong bjo. a retologa, gomme a lahlela tshwayotshwayo ye nngwe ka legetla gore Trevor a mo kwe, “O tla re hwetša lebatong la go bina… re gokarelane.”

Trevor a kitimela pele efela Chad a mo kgoromeletša koloing ya gagwe. Chad ka go makala, a hwetša Trevor a tiile go feta ka mo a bogegago gomme ba katana. “Ke go lemošitše go se robale le sesi wa ka ntle le ge o ka mmotša gore ke wena mang ka nnete le lebaka la gore goreng o dula o le ditlelapong. Akgaa monna. Envy o nagana gore o no ba lesogana la go raloka ka batho. Ge o be o nyaka go mo kgahliša, gona o swanetše go mmotša nnete. Selo se tee seo a sa se kgotlelelego ke boramaaka. Kudu ge eba ba mmotša maaka.”

Kat a sesefatša tebelelo ya gagwe go Trevor. Seo se bolela go reng?

“O tseba gabotse ka mo ke tsebago gore ge nka mmotša gore ke šoma ka go iphihla, o tla ipotšiša gore ga ke mo šomiše ge ke dula ditlelapong le yena.” Trevor a rora, ge a itokiša efela a sa leke go boela morago ka tlelapong gape. Ge a ka diriša maatla a gagwe a nnete Chad o tla ba setopo gomme Trevor a ka se fapane le batho bao a ba tsomago.

Tsebo yeo e ile ya kgona go iša matswalo a gagwe fase sebakanyana go laola dikgopolo tša gagwe efela o be a tenegile. “O ntheisile!”

“Seo se be se go swanetše ka lebaka la gore o phela bophelo bja tlase, molekani wa go se tshepagale. Hei, ke seo o se hwetšago ka go se mmotše nnete. Bošego bja gago bo fedile mo ntle le ge o ka ya go tsoma dipara tše dingwe. Ntle le fao, Envy o sa na le theisara,” Chad a myemyela. “Ke go eletša gore o mo tlogele a nnoši bošego bjo ka moka… goba go kaone, go mo tlogela bophelong bja gagwe ka moka ge o sa mmotše nnete.”

Trevor a lomantšha meno efela a se bolele selo. Chad o be a ka se mmotše gore a tlogele Envy, efela go mo dira gore a iše maswafo fase ebile keletšo ya bohlale.

“Go lokile, efela seo,” a šupa tlelapo, “ga se lefelo la go bolokega leo sesi wa gago a swanetšego go ba go lona gomme o tseba seo!” A bula lebati la koloi ya gagwe ka maatla, la gapeletša gore Chad a katakate go efoga gore le mmethe. A le tswalela ka maatla ka morago ga gagwe, go mo tšere metsotswana pele a ka letša mathaere go tšwa ka mo lefelong la go phaka.

Ge Trevor a le kgojana kua tlase ga tsela mo Chad a se sa bonago le mabone a koloi ya gagwe, a swara sellathekeng sa gagwe a tsenya nomoro ya motho yo mongwe yo a mo kolotago se sengwe. A ema kgauswi le lebenkele la kgauswi gomme a phaka ka morago ga theraka ya go rwala merwalo gore a se lemogege.