Текст книги "Mmino Wa Ngwedi (Kgokagano Ya Madi)"

Kgaolo ya 3

Jason a gogela Envy ka matsogong a gagwe, “O nkolota go bina le nna.”

O be a thabela gore ga se mohuta wa go befelelwa moromiwa. Ge nkabe e se ka yena, nkabe a sa na le molekani… a nagana gore ke molekani wa go se tshepege efela ke lebaka leo a leditšego mogala sa mathomo. “Tshwarelo,” a hebahebetša ka tsebeng ya gagwe, ge a mo goga le go mo kgwahlišetša go yena gomme a thoma go sepela le mmino.

Envy a kgokološa mahlo a gagwe a mo lebalela ntle le go nagana gabedi. “Ga go sa go swabiša fa.” A mo phophola ka menwana ya gagwe mo mokokotlong ge a bina le yena. “Ke lokologile ebile ke hweditše mošomo o mongwe mo tshepedišong ye.”

A myemyela ge a lebelela go dikologa lebato la go bina gape. “Lefelo le le fapana gannyane le ditlelapo tše ke di šometšego efela ke nagana gore go tla kgahliša.”

Jason a se bolele selo lebakanyana ge a ekwa letlalo leo le khupeditšego matswele le theidimoga go seleganya bokapele bja hempe ya gagwe gomme a ikwa a ruruga. O be a thabišwa ke gore ga a tsebe seo a mo dirago sona, gape o na le maikutlo a gore ge a ka tseba o tla emiša seo.

“O ka nyaka go namela maswika ka Mokibelo mesong?” a sepetša diatla tša gagwe ka mahlakoreng a gagwe gomme a swara letheka la gagwe.

“Go namela maswika? Seo se kwagala e le boipshino. Ke kgale e le ruri,” Envy a dumela ka hlogo, mahlo a gagwe a tomoga ge Jason a mo gogela pele gomme a gahlana le selo se sengwe se setelele gape sa bothata se gateletšwe kgahlanong le boleta bja mpa ya gagwe. A goga moya ge mahlo a gagwe a lebelela godimo go gahlana le mahlo a gagwe.

“Chad o gokae?” a hemelana, a tseba gore o dirile seo gape. O be a sa ikemišetša seo. Jason e be e le gape e sa le motho wa mmamoratwa lefaseng ka bophara; sa mafelelo seo a tlogago a se nyaka ke go senya seo ka go robala le yena. O mo rata kudu go feta seo.

“La mafelelo ge ke lekola, o be a ntšhetša ditšhila tšela ka ntle,” Jason a hemelena ge a mmušetša go yena, A bea menwana ya gagwe ka tlase ga seledu sa gagwe gomme a emišetša mahlo a gagwe go yena. “Trevor ga a go swanela.”

“Chad ga se a mo golege akere?” Envy a botšiša, a swara Jason ka seatla gomme a mo iša ditepising. O ile a efoga poledišano yeo mengwagangwaga gomme ga se a ikemišetša go dira seo gabjale.

“Aowa, ke nagana gore go theisarwa ke kotlo ye lekanego… seo le go lahlegelwa ke wena. Chad o be a netefatša gore o tla hwetša tsela ya go ya koloing ya gagwe,” Jason a realo. Godimo ga detepisi a lemoga Chad a eme ka pareng kgauswi le lebati a ba letile. A swara seatla sa Envy, a mo lebiša ka thoko yeo.

Go ipona molato go be go dira gore kgara ya Envy e kwe bohloko. Gabotse ga se motho yo mobe, gomme seo a se dirilego go Trevor ke se sebe. Go bile bose sebakanyana efela gabjale motsotso wo o fetile. A iša mahlo a gagwe fase, a swaba le go lebelela buti wa gagwe.

Chad a lebelela Envy gatee gomme a tseba gore ke nako ya go mo iša gae. “Re ka sepela?” a botšiša, a tloga pareng.

“Nka go iša gae,” Jason a bolela, gomme a tlaleletša ka pela a re, “ge eba o nyaka go šala le nna lebakanyana.”

Chad a kgona go bona tshepo e bonagala ka mahlong a Jason gomme a ipotšiša ge eba o dira selo sa go loka goba o iša mogwera wa gagwe wa potego tshenyegong. A kwa mogala o šikinyega lethekeng la gagwe gomme a o swara ka seatla, “Swara kgopolo yeo.” A bona gore ke ba setiši sa maphodisa, a leba lebating gore a kgone go ba kwa gabotse.

Envy o ile a pikitla mahlo a gagwe, a tseba ka mo bošego bjo bo šetšego bo makatša, a ba le maikutlo a gore Chad ba mmiditše mošomong. A mmogela ge a tsenya mogala ka morabeng ge a etla go bona.

“O tla ba gabotse le Jason?” Chad a botšiša. Ge a dumela ka hlogo, a bea monwana wa gagwe ka tlase ga seledu sa gagwe gomme a se emiša. “O dirile selo sa maleba ka Trevor ka fao lokologa, nka se boye gae go fihlela mesong, ka fao o se nkemele.”

Envy a myemyela gannyane ge a tloga. Ka bobedi ba kgomile seledu sa gagwe ka go swana gomme ba mmotša gore seo ke phošo ya Trevor e sego yena. O rata Jason ka gobane o swana le Chad gomme ke ka lebaka leo a ka se tsogego a dumeletše nyakego yeo ya go intšha le Jason ka nnete.

Ge Chad a se no tšwa ka mabati a ka pele, sellathekeng sa Jason sa thoma go lla. A retologa le go mmogela ge a araba, ka morago a šinyalala ge sefehlego se fetoganyana. O be a tseba gore o mošomong beke ye gomme a ipotšiša ka setu ge eba ke marentšara ao a mo tsomago gare ga bošego. Ka kgopolong ya gagwe, seo e ka se be selo se sebotse.

Ge mahlo a gagwe a kopana le a gagwe, o be a kgona go bona gore a wetše tlase ka manyami.

“Envy tshwarelo, Ke swanetše go sepela. Etla, ke tla go iša gae mo tseleng.” Jason a tsenya sellathekeng ka morabeng wa gagwe o kare se thomile go ba lenaba. O be a gopotše gore o tla hwetša metsotso ye mmalwa ya go ba noši le Envy ka tsela ye nngwe.

Envy a šunyalala ka gobane o be a tseba gore gae gona ga se mo a bego a lebile gona. “Ke leboga kabelo ya gago Jason, efela ke nagana gore ke hlotše mathata a go lekana bošegong botee. Ntle le fao, ke thoma go šoma gosasa mo ka fao ke tla šala fa gomme ka bogela bahlokomedi ba para.” A emiša magetla gomme a bea myemyelo ya go kgahliša dipounameng tša gagwe yeo e kwešago sefahlego sa gagwe bohloko, “Go tseba mang, Nka topa dikeletšo tše mmalwa ge ke le fa.”

Jason a dumela ka hlogo ka go gonona a tseba gore o swanetše go potlaka, “Go lokile, efela o na le nomoro ya ka ge o ntlhoka.”

Envy a mo emišetša seatla, “Ee go bjalo. Bjale eya mošomong. O šome ka maatla, o dire tšhelete, gomme o nkiše ditlelapong ka pela ka gore bjale ga ke na molekani.”

Jason a myemyela ka lethabo gomme a tšwa ka potlako lebating.

Envy a kwa go nolega mooko go mo tlalela, gomme myemyelo ya gagwe ya nyamalela, gomme a boela ka lebatong la go bina, a le lebelela gape pele a leba ka pareng. O ile a dula go se sengwe sa ditulo tša masethesethe gomme a thekga diku tša gagwe bogodimong bja para.

O dutše fao a lebeletše fase ka pareng metsotso ye mmalwa pele a lemoga bogodimo bja ponagalo bo thakgafaditšwe ka mabone a neon a fetolago mebala ka tatelano. Go be go na le bonnyane bja maswika a mmala o mosehla a tsentšwe ka gare ga Plexiglas ye koto yeo e kganyago o kare e khupeditšwe ka kgadimo. ‘Kgadimo’ yeo e hlakantšwe le Plexiglas ka tsela yeo, mo mabone ao e lego a maso gona, a be a bonagala bjalo ka dinaledi leratadimeng la seetša sa dinaledi.

Ka bjako galase ya bonala ka pele ga gagwe e swerwe ke seatla sa menwana ye metelele. Manala a be a pentilwe ka mmala o mohubedu, ka medipa ye meso go bapela le manala a menwana ya palamonwana, yeo e swanago le maswao a mongwapo.

Envy a lebelela godimo ka makalo go mosadi yo a lego ka pele ga gagwe. O be a na le meriri ye metelele, e tatagane gannyane ye meso le tebelelego ye botse yeo e dirilego gore Envy a ponyaponye. O be a le botse go feta tekanyo. Letlalo la gagwe e le letsotho ya go ruthufala gomme mahlo a gagwe e le a mmala wa botalalerata bja go makatša, E sego talalerata ya go bonagala yeo a e bonego go Devon, efela ya go batamela fao.

“Ntlo e tla lefela.” a bolela gomme a kgoromeletša seno kgauswi. “Bahlokomedi ba para ba hwetša dino tša mahala gomme buti wa ka o sa tšo go go thwala akere?” a myemyela, a nyaka go tseba mosetsana yo a retolotšego hlogo ya buti wa gagwe ka pela gakaaka. Seo se be se sa tshwenye, efela Devon ga a ke a hlokomela basetsana gakaalo ka gobane o dula a dikologile ke makgolokgolo a bona bošego bjo bongwe le bjo bongwe. Efela mosetsana yo o šikintše kheitše ya gagwe.

Envy a šunyalalela seno motsotswana gomme a bolela maaka, “Ke be ke sa tlile go go botšiša ka seo.” A lebelela Kat. “Ke a leboga,” gomme a mo fa myemyelo ya go se hlake. “Go ka se kweše bohloko,” a emiša komiki gomme a e galampela pele a e bušetša morago pareng ka mahlo a go tomoga.

“Ijoo,” Envy a sega, ge a emišetša seatla sa gagwe ka pele ga dipounama tša gagwe. “Ke eng seo?”

Kat a myemyela, “Ke seno sa go kgethega sa ntlo gomme o tla be o se fa batho gosasa bošego. Se bitšwa Phišo.” A se mmotše gore se na le senotagi sa go lekana le go dira gore motho wa tlwaelo a tagwe ka pela. Gantši se otara ke dikabatho ka lebaka la metapolisime wa go šoma ka lebelo, go nyakega se sengwe sa bogale kudu gore ba tagwe.

“Ke tseba go dira tšohle efela ke a amogela gore ga senke ke kwe ka seo. Se kwagala bjalo ka lebele la senotagi ka botlalo ka gare… Go-Taga-ga-Ngwedi?” Ge Kat a šikinya hlogo Envy a šunyalalela galase, a e topa gomme a e dupelela. “Ke timetše. Efela mphe ya bohwefonyana gomme ke nagana gore ke tla fetoga Mosadi wa Dragom ka go no hema lelakabje le,” a realo, a bušetsa galase morago.

“Ipshine ka yona. Bošegong bjo, o ka e bitša nyakišišo ya mošomo,” Kat a sega gomme a tlatša galase gape, a tseba gore ya mathomo e swanetše go ba e šetse e tagile Envy. Go na le ditlamorago tše dingwe tša seno se. O be a se na nnete ya gore ke eng, efela se šoma gape bjalo ka kgodišo ya tumo ya thobalano go basetsana ba bantši. Ke ka lebaka leo a se bitšago Phišo.

“Ba bangwe ba re ke kalafo ya bošego bjo bobe.” A dumela ka hlogo, a laetša gore Envy a se nwe.

Envy a galampela motswako wo wa go fiša gomme a kwa go duma ga go tšwa go seno sa mathomo go kwagala. A iša seno seo fase ka go nanya, a se bea ka boleta mo pareng gomme a bea seatla sa gagwe godimo ga galasana yeo.

“Ke nagana gore seo ke magomo a ka,” a hemelana ka tebogo, ge mešifa ya gagwe ya go gatelelega e thoma go iketla. “Se na le eng ka gare?”

Mohlokomedi wa para wa mosadi a mo laetša lebotlelo le lephepole. “Se šetše se tswakilwe gomme ke motswako wa sephiri wo makgolo a o hlamilego, ka fao nka se go botše.” A sega, ge Envy a ngota molomo, “Ka fao go tla ba bonolo go se dira ge motho yo mongwe a se otara.”

Kat a lebelela fase ka pareng gomme a bona bareki ka moka ba gagwe ba hlokometšwe ke bathuši ba thwetšwego, ka fao a ithekga ka khaonthara. “Goreng o sa mpotše ka lesogana lela le lesehla leo o tlilego le lona?”

Mahlo a Envy a laetša lethabo, “O nagana gore buti wa ka o a fiša?”

Kat a emiša magetla, o be a nyaka lebaka la gore a lebale gape, ka ge a tseba gore ke kgale mola a ilego a ba le boipshino bofe goba bofe gomme ke lebaka leo Quinn a bego a le monaganong wa gagwe kudu matšatši a. “Gabotse, ee! ke nyaka go tseba gore o dira eng bošego gore ke kgone go ba le yena,” a araba, ka go ponya leihlo ge ba abelana sephiri.

Kgopolo ya Chad a ebela ka moagong wa khirišo a jewa ke bodutu ya selaganya ka kgopolong ya Envy gomme a emanyana. Se ke seo se mo loketšego. “Gabotse, o rata go namela maswika, ka dinako tše dingwe o dira kofi ya go baba ya go lekana go ka itshepetša, ntshepe ke bone seo se hlaga, gomme ka mehla o rata go sepela mašego. Efela ga a tsebe ka mo a ka swarago mosetsana gabotse: Envy a mmotša ka go ponya leihlo.

Kat a šunyalala gomme a emelela thwii, “Ga a swane le mosesi yo a tlago ka morago ga gago.”

A lebelela Trevor, a dupelela pefelo yeo e sa lego ka gare ga gagwe. Sa mathomo, ga a rate lesogana le ka gobane o tlile ka pareng ya gagwe a nyakišiša eng ga ke tsebe. Efela gabjale, ga a mo rate ka ge Chad a sa mo rate… o kgolwa kahlolo ya Chad ka gobane go molaleng gore o rata sesi wa gagwe.

Envy a tšutšubana gomme a lebelela godimo ge seatla sa boima se wela legetleng la gagwe. Akgaa, mola a be a thoma go iketla le go lebala seo a se dirilego, se mo khukhunetša ka morago ga gagwe gomme sa mo loma. Mathomong o no mo lebelela, a sa tsebe ge eba a kwe gampe goba a no befelwa. Kudu, o be a nolegile mooko mola a lebeletše monna yo a mo atlilego makga a mantši.

“Re swanetše go bolela,” Trevor a bolela, gabonolo ka mo a kgonago. “Gona bjale!” Go lokile, o be a se fase ka mo a bego a nagana… akgaa.

Envy a mo kgorometša ge a thoma go tšea seatla sa gagwe a mo goga go tloga mo pareng. “Ke nagana gore re boletše go lekana… ga go bjalo? Gomme ke kwa gore ke swanetše go go lemoša gore ke sa na le theisara.” A mo fa tebelelo ya tšhupetšo pele a iša mahlo a gagwe tlase go mapele a gagwe.

Trevor a tloša letsogo la gagwe gore seatla sa gagwe se lekelele ka pela ga lefelo leo gomme a boela morago. “Aowa hle, Ke be nyaka go bolela le wena fela Envy.”

“Gabotse, ga ke tsebe ge eba ke nyaka go bolela le wena,” Envy a hemelana, o kare o tena ke kgopolo yeo. “Ga ke ikamanye le boramaaka ba go se tshepagale.”

Trevor a myemyela, “O swanetše go bolela le Chad ka nako ye nngwe gona. O tseba....” O ile a šutha ka lebelo efela Trevor a mo phaketša, ke ge a mo swara lenakaila dikgatonyana go tloga lerameng la gagwe gomme a le kgwahlišetša. “Ke be ke nagana gore go ntheisara go be go lekane.”

Envy a lebelela, ge a leka go goga seatla sa gagwe efela o be a se swere a se tiišitše kudu. “O se tliše buti wa ka ka gare ga se. E be e se yena yo ke bego ke etšwa le yena gomme ka mo hwetša a šila dilo tša gagwe ka maragong a mosetsana yo mongwe mo lebatong la go bina, mola yo mongwe a le ka morago a leka go mo fihlelela.”

Trevor a tšutšubana gomme a tlogela lenakaila la gagwe. A kwešiša seo a se bolelago ge a di bea ka tsela yeo. Seo ga se phumule taba ya gore Jason ke yena a beakantšego se gore se bonagale gampe go feta ka mo go lego, gomme Chad go tlaleletša se ga a gona kgauswi. Ga se a mmotše gore o tla fa ka gobane ga a mo nyake kgauswi le tlelapo ye.

Nnete e tseneletše ge nkabe ba tseba… gape le Chad. o nagana gore ke lephodisa la go iphihla efela ga go bjalo. O be a šoma le CIA bjalo ka karolo ya Sehlopha sa Dinyakišišo tša Tšeo e sego tša Tlwaelo… PIT. O be a beilwe fao ka lebaka la batho bao ba lahlegilego bao ba begwago beke ka beke… seo, godimo ga dipolao ka moka.

Go bonala gore ge bontši bja bona ba lahlega lefelong le, ka mehla eba ka morago ga bošego ba ile dipareng. E sego para e fela. Efela tše dingwe tša diketapele tša gagwe tše kaone di šupa Mmino wa Ngwedi. Gomme gabjale palo ya dinkhu eya godimo.

Ba matlafatšo ya molao le FBI ba nyakišišitše dipolao ka bobona pele ba di tliša go karolo ya gagwe. Trevor.o be a sa kwa bohloko ge ba ile ba emela gore ba tloše dikgonagalo tše dingwe ka moka pele molato o hwetša tsela ya ona go ba wa godimo gomme o fihla ditesekeng tša karolo ya tše sa tlwaelegago.

O be a šomile le PIT lebaka le letelele bjalo ka ge a, go swana le bohle ba a šomago le bona, kgona go bona molato go swana le wo o sa le kgole. O be a sa nyake Envy go felela go swana le bao ba lahlegilego gomme ke ka lebaka leo a lekilego go dira gore maphelo a gagwe a mabedi a fapane.

“Ke a tseba gore se ke phošo ya ka, ka kgopelo etla ka ntle ka koloing gomme re bolele pele o nthaga. O ka mpha sebaka seo ka morago ga go ntheisara? O šetše o hweditše tefeletšo ya gago.” Trevor a batamela gape. O be a ka se amogele karabo ya gore aowa gomme o tshepa gore Envy o tseba seo gabotse gomme a ineele.

Kat a itira o kare o raloka ka lengina la gagwe ge a boela morago efela o be a kgotla konopi ya kgokagano ya poledišano. “Envy, o gabotse?” a botšiša, a tseba gore ke seo Devon a tla nyakago go se kwa.

Devon o be a sa tšo apara hempe ya gagwe ge a ekwa kgokagano ya poledišano e lla makga a mmalwa. “Bolela ka go elela,” a realo, gomme a kwa lentšu la Kat le botšiša Envy ge eba o gabotse. Tebelelo ya Devon ya leba monitareng wo laetšago lehlakore le legolo la para mo Kat a šomago. Devon a rogana ge a bona monna yola wa go theisarwa ke Envy a boile gape.

“Setlaela,” a akgofa a fetša go konopetša hempe ya gagwe le go e tsenya ka borokgong, pele a tloga ka kantorong.

Envy a lebelela Kat ka go dumela ka hlogo ka kgonono, “Ke tla ba fa ka iri ya bošupa gosasa bošego. Ke leboga dino.”

Kat o be a bonala a tshwenyegile, “O na le nnete ya gore o tla ba gabotse?” a botšiša ka boleta. A duma ge Devon a ka akgofa ka gobane ka morago ga go nwa dino tše pedi tša Phišo, e ka no se be kgopolo e botse go Envy go tloga le moratani wa gagwe wa kgale go yo ba le tulo ya tshwarelano.

Envy a dumela ka hlogo gape, ka nako ye a fa myemyelo ya lethabo, “Go tla loka. efela nka se bolele seo ka Trevor.”

Trevor a obelela seatla sa gagwe ge a fologa setulo efela Envy a se efoga gomme a leba lebating, a mo tlogela a eme fao. Trevor a šunyalela Kat pele a šala Envy morago go ya ka ntle.

Devon a hwetša tsela ya gagwe ka gare ga mebele ye tšitlanego, a namela ditepisi tše pedi ka nako e tee a leba pareng mo Kat a mo emetšego. “O gokae?” a nyaka go tseba, ge tebelelo ya gagwe e nyaka gohle.

“Ba tšwele ka lebati,” o ile a mo obelela gomme a mo swara ka letsogo, ge a thoma go retologa gomme a tlaleletša ka pela a re, “O nwele dino tše pedi tša Phišo pele a tšwelela.” A mo laetša sefahlego ge Devon a ngunaguna. “Hei, ke be ke nagana gore ke go direla monyetla, e sego yena. Bjale etšwa o ye go mo hwetša gomme o se boye o lekeleditše diatla.”

Kat a nyenyebala ge Devon a etšwa ka lebelo ka pareng gomme a leba lebating. Ka go kwa gagwe ga go se tlwaelege, o be a mo kwa gore o a mo roga ge a tswalela lebati ka maatla ka morago ga gagwe.

“Trevor o sepela gabotse go feta motho yo a sa tšwago go theiswarwa mo go se nago monna yo a nyakago go theisarwa gona.”

Lentšu la Nick la kwagala ka morago ga Kat, la mo dira gore a fofe. O be a sa kgotlelele myemyelo ye e lego dipounameng tša gagwe, “O bolela metlae. Ga se a… e sego fao… o dirile eng?” Ge Nick a dumela ka hlogo, Kat ka bjako a ba le tlhompho ya mohlokomedi wa para yo moswa, “Ke nagana gore ke tla mo rata.”

“Ke nagana gore Devon le yena o a mo rata,” Nick a swayaswaya, ge a tloga.

Ga go yo a lemogilego ge Kane a etšwa ka lebati la ka pele a eya lefelong la go phaka. O ile a myemyela ka go tseba gore o fetile Nick makga a mmalwa gomme lengau ga se le šikenyege le gatee. “Ke rata maleatlana,” Kane a ngunanguna, ge a ikhupetša ka bošego.

*****

Tabatha a bula mahlo le go balabala ge a bona gore ke nako mang. O šomile bošego ka moka le mesong efela gomme o be a tseba gore o šaletše gomme a ka se šomiše seo bjalo ka lebaka la go tšwa bolaong. A phethoga, gomme a goga mapai a khupetša hlogo ya gagwe gomme a tšwela pele go ya nageng ya ditoro. Ka go hloka mahlatse, naga ya ditoro e be e no ba boikgopolelo bja gagwe.

Lebati la phapoši ya gagwe ya borabalelo la bulega gomme Tabatha a hlodimela ka tlase ga mapai. Mogwera wa gagwe yo a dulago le yena le go ba mogwera wa potego, Kriss o be a myemyela bjalo ka segaswi. “O thabišitšwe ke eng gakaalo,” a botšiša. “Ga o tsebe gore go kgahlanong le molao wa tlhago ya batho go thaba gakaalo ge o tsoša motho yo mongwe bošego bjo bokaaka?”

Kriss o be a swere mmaka wa Tinkerbell o tletše kofi. “Ke tla ke swere mpho le tshepišo ya dijo.” A mo fa myemyelo ye botse. A ka petšha ka tšhelete gore ga senke a je selo mo diiring tše masomepedi-nne tša go feta gomme o ile go lokiša seo.

Tabatha o ile a tloša mapai ge a ekwa monkgo wa kofi o hwetša tsela ya wona go feta tšhireletšo ya gagwe. “O a apea goba o hweditše tša otlela o fete fa gape?”

“Ke apeile, ke go leboga kudu,” Kriss a bolela, ka go mo gegea gomme a mo ntšhetša leleme.

“Bušetša selo seo morago, ga ke tsebe gore e be e le gokae.” O be a mo kgoela gomme a tšea mmaka ka diatleng tša gagwe. O tsebile Kriss mengwaga ya go lekana ye mehlano gomme a tla go dula le yena mengwaga ye mebedi ya go feta ka morago ga go hwetša lengwalo la dithuto la Borentšara. E be e le sebini tlelapong ya banna ba go apola ya go fiša ka LA gomme ba kopana ge bagwera ba gagwe Envy, le buti wa Envy Chad, ba ile ba mo iša fao ka letšatši la gagwe la matswalo la mengwaga ye masomepedi-tee

Tabatha o sa sega ka mo Chad a ilego a bethwa bošegong bjo efela lephodisa la se e tšeye gampe. go be go tletše ditagwa, basadi ba go thakgala le masogana a go ratana ka seng. O ile a fiwa šedi ye ntši ge ba hwetša gore ke lephodisa gape gomme taba ya dihakisi ya bolelwa.

Efela seo e be se taba ye kgolo ya bošego bjo. A tswalela mahlo, a e bona gape ka leihlo la monagano wa gagwe, o kare e sa tšo hlaga maabane.

Kriss o ile a tla go bona tafoleng ya bona, lebakanyana,

go nwa gomme a feleletša a kgopetše dihakisi go yo bina ka tšona. Ka pejana a ba sebini sa mmamoratwa sa Tabatha ge a swara seatla sa gagwe gomme a mo iša sefaleng. O be a ratega kudu go dibini ka moka gomme a kgona e le ruri.

O na le mmele wa mešifa, e sego kudu efela wa go bontšha gore a ka emela ntwa ya gagwe. Mmele wa gagwe e be e le o mosesane gomme o loketše go bina mo mengwageng ye mentši gomme moriri wa gagwe o mosehla o dula o hlakahlakane efela gabotse, o kare o be a eme ka gare ga phefo ya ledimo gomme a e phumula ka sefafatši sa moriri pele e ka wela fase. Mahlo a gagwe a matsotho a boleta ka mehla a mo makatša ka go tsenelela ga ona. Monna yo a ka emiša sephethesephethe ka mahlo ao. O bone seo se hlaga.

O ile a montšha tlhalošo ya nnete ya go bina ka go hlohlola tša thobalano, gomme a fediša mmino ka go mmušetša tafoleng ya bona gomme a kgokaganya yena le Envy ka dihakisi. O ile a ponyetša Chad leihlo o kare o mo tlogelela mpho ya thobalano ka boraro. Ba ile ba sega ka moka ka leina la pontšho.

O be a ipshina kudu gomme a botša Chad le Envy gore ba ka tloga ge ba ikemišeditše gomme yena o tla namela thekisi moragonyana. O tla boa ka iri ya pele ya masa, gomme ba dirile seo.

Ka morago ga ge ba sepetše, Tabatha a ya ka ntle go yo ipshina ka selo se tee sa sephiri seo a se fihlelago bagwera ba gagwe. Gantši o dira seo ge a tšhogilenyana goba a tagilwe. A sepelela kgole le lebone la mabati a ka pele, A hwetša lefelo la go fifala ka lefelong la go phaka gomme a ithekga ka leboto la ditena gomme a thumaša sekerete sa gagwe, a thuntšhetšha muši ka tatelano wo mošweu bošegong bja moya wa go fola.

A gopola a mmona gabotse go selaganya lefelo la go phaka a mo lebeletše ka go fifala. O be a le botse go swana le sebini seo a kopanego le sona ka tlelapong… ba be ba ka phenkgišana ka thaetlele yeo. A ponyaponya gomme ka bjako mo dikgatong tše mmalwa, ka legoswi le tee a betha leboto kgahlanong le setena ka thoko ga hlogo ya gagwe, a gatelela moriri wa gagwe o motelele wo mosehla go sona gore a se šikenyege.

Mahlo a gagwe a go makatša a phadima ka malakabje a silibera gomme Tabatha a tšidifala gona fao, e sego ka gore o mo tšidifaditše, efela ka gobane lesogana leo e be e se motho. O dirile dilo tše pedi go hlatsela seo… seo goba motho yo mongwe o tšhetše se sengwe ka senong sa gagwe mola a sa lebelela. Godimo ga seo, ka bokgauswi o be a bonala bjalo ka tlhalošo ya kotsi ya tša thobalano. O ile a inamela pele ka go nanya gomme a gogela moya ka teng sebaka gape ka maatla.

Kriss o ile a kwa Dean a le kgauswi gomme a fologa sefala ka garegare ga tiro, a ekwa go batamela ga maikemišetšo a ntwa a monna yo mongwe. A se leke go apara, gomme a tšwa ka lebati la ka thoko kgole le mo Dean a gateletšego Tabatha lebotong. Ka potlako, ya be o beile letsogo lethekeng la Dean gomme letsogo le lengwe le mo swere mogolong ka go tiiša, ge a tloša monna yo ka go nanya kgole le mogwera wa gagwe yo moswa.

Tabatha o ile a ipotšiša ge eba o lahlegelwa ke nako ge a ponyaponya nako le nako. Ga se a bone Kriss ge a etla.

Dean o ile a ithekga ka Kriss, o kare o amogela go gokarwa efela tlhagišo ya sefahlego sa gagwe e se ya segwera le gatee, ge a re, “Monkgo wa gago o tletše gohle mo go yena.”

Kriss a leka go uta mollo wa silibera wo tšhošetšago go fofela ka mahlong a gagwe, ge a kgwahlišetša tshwaro ya gagwe go Dean efela a lebelela Tabatha gomme a mo laela, “Go lokile Tabatha. Boela ka gare.”

Segalo sa lentšu la Kriss sa mo kgadimotša go tebelelo ya gagwe. Tabatha a kitimela mojakong efela pele a o batamela, a boela morago gomme a iphihla ka morago ga dikoloi tše dingwe lefelong la go phaka a sa nyake go tlogela Kriss a nnoši le Mna Kotsi.

Ga go selo seo se ilego sa meakanyetša seo a se hlatsetšego bošegong bjo. Ka mabone a lefelo la go phaka ao a laetšago meriti mo diteneng tša moago, a bogela ge meriti ya go fifala ya maphego e phatlalala mo mekokotlong ya bona bobedi, ge ba katana. O be a sa bone maphego ka nnete efela o be a tseba gore a gona ka gobane meriti ya bona e be e ekišetša mesepelo ya bona.

O be a ekwa mantšu a bona a bogale ge ba kgakgana efela ka polelo yeo a sa kago a ekwa pele. Kriss mafelelong a gatelela sefahlego sa monna yola yo mongwe kgahlanong le setena gomme a mo swarelela fao motsotswana a hebahebetša se sengwe kgauswi le tsebe ya gagwe.

Dean a mo kgoromeletša morago gomme ka bjako a ba ka godimo, ba dikološana gomme a bethantšha Kriss le leboto, ka nako ye ba lebeletšane. Tabatha a emelela koloing yeo a bego a khutile ka morago ga yona, a ikemišeditše go thuša Kriss. A ema ka tlalelo ge seatla sa Dean se eya ka morago ga molala wa Kriss go swara bokamorago bja hlogo ya gagwe mola a gateletše mmele wa gagwe go yena gore a se šikinyege.

Katlano ya go latela e be e sa tšwe ka lehlakoreng le tee. Ke ka nako yeo ya go atlana ge Kriss a bula mahlo a gagwe a go phadima gomme a mmona a eme fao a ba bogetše go swana le mmogedi wa go lwala.

Tabatha o ile a retologa ka bjako gomme a kitimela mabating a tlelapo. Go kabe go fetile iri ka morago ga ge Kriss a ile a dula fase setulong sa ka pareng kgauswi le yena… ka nako ye a apere. O ile a topa seno sa gagwe gomme a se galampela pele a retologa gomme a mo lebelela ka mahlong a gagwe a matsotho ya boleta.