Текст книги "Повесть временных лет"

Начало княжениа Всеволожа в Киеве. Всеволод же седе Кыеве на столе отца своего и брата своего, приим власть русьскую всю. И посади сына своего Володимера Чернигове, а Ярополка Володимери, придав ему Туров.

В лето 6587. Приде Роман с половци к Воину. Всеволод же ста у Переяславля и створи мир с половци. И взвратися Роман с половци вспять, и убиша и́ половци месяца августа 2 день. Суть кости его и доселе лежаче тамо, сына Святославля, внука Ярославля. А Олга емше козаре поточиша и́ за море Цесарюграду. Всеволод же посади посадника Ратибора Тмуторокани.

В лето 6588. Заратишася торци переяславьстии на Русь, Всеволод же посла на ня сына своего Володимера, Володимер же, шед, победи тркы.

В лето 6589. Бежа Игоревичь Давыд с Володаремь Ростиславичемь месяца мая 18 день. И придоста Тмутороканю, и яста Ратибора, и седоста Тмуторокани.

В лето 6590. Осень умре, половечьскый князь.

В лето 6591. Приде Олег из Грек Тмутороканю; и я Давыда и Володаря Ростиславича и седе Тмуторокани. И исече козары, иже беша светници на убьенье брата его и на самого, а Давыда и Володаря пусти.

В лето 6592. Приходи Ярополк ко Всеволоду на Велик день. В се же время выбегоста Ростиславича 2 от Ярополка, и пришедша прогнаста Ярополка, и посла Всеволод Володимера, сына своего, и выгна Ростиславича, и посади Ярополка Володимери. В се же лето Давыд зая грькы в Олешьи, и зая у них именье. Всеволод же, послав, приведе и́, и вда ему Дорогобужь.

В лето 6593. Ярополк же хотяше ити на Всеволода, послушав злых светник. Се уведав, Всеволод посла противу ему сына своего Володимера. Ярополк же, оставив матерь свою и дружину Лучьске, бежа в Ляхы, Володимеру же пришедшю Лучьску, и вдашася лучане, Володимер же посади Давыда Володимери, в Ярополка место, а матерь Ярополчю и жену его и дружину его приведе Кыеву, и именье взем его.

В лето 6594. Приде Ярополк из Ляхов, и створи мир с Володимеромь, и иде Володимер вспять Чернигову, Ярополк же седе Володимери. И переседев мало дний, иде Звенигороду. И не дошедшю ему града, и прободен бысть от проклятаго Нерадьця, от дьяволя наученья и от злых человек. Лежащю ему ту на возе, саблею с коня прободе и́, месяца ноямбря в 22 день. И тогда вздвигнувся Ярополк, выторгну из себе саблю, и возпи великым гласомь: «Ох, тот мя враже улови». Бежа Нерадець треклятый Перемышлю к Рюрикови, и Ярополка вземше отроци на конь перед ся, Радко, Внкина и инии мнози, несоша и́ Володимерю, а оттуду Кыеву. И изиде противу ему благоверный князь Всеволод с своима сынма, с Володимеромь и Ростиславомь, и вси боляре, и блаженый митрополит Иоан с черноризци и с прозвутеры. И вси кияне велик плачь створиша над нимь, со псалмы и песнми проводиша и́ до святаго Дмитрея, спрятавше тело его, с честью положиша и́ в раце мраморяне в церкви святаго апостола Петра, юже бе сам начал здати преже, месяца декабря в 5 день. Многы беды приим, без вины изгоним от братья своея, обидим, разграблен, прочее и смерть горкую приять, но вечней жизни и покою сподобися. Так бяше блаженый сь князь тих, кротк, смерен и братолюбив, десятину дая святей Богородици от всего своего именья тю вся лета, и моляше бога всегда, глаголя: «Господи боже мой! Приими молитву мою, и дажь ми смерть, якоже двема братома моима, Борису и Глебу, от чюжю руку, да омыю грехы вся своею кровью, и избуду суетнаго сего света и мятежа, сети вражии». Его же прошенья не лиши его благый бог: всприя благая она, их же око не виде, ни ухо слыша, ни на сердце человеку не взиде, еже уготова бог любящим его.

В лето 6595.

В лето 6596. Священа бысть церкы святаго Михаила манастыря Всеволожа митрополитомь Иваномь, а игуменьство тогда держащю того манастыря Лазреви. Того же лета иде Святополк из Новагорода к Турову жити. В се же лето умре Никон игумен Печерскый. В се же лето взяша болгаре Муром.

В лето 6597. Священа бысть церкви Печерская святыя Богородица манастыря Феодосьева Иоаномь митрополитом, и Лукою Белогородьскымь епископомь, Исаиемь, Черниговьскым епископомь, при благородьнемь князи Всеволоде, державнем Русьскыя земля, и чаду его, Володимере и Ростиславе, воеводьство держащю кыевьскыя тысяща Яневи, игуменьство держащю Иоану. В се же лето преставися Иоан митрополит. Бысть же Иоан муж хытр книгам и ученью, милостив убогым и вдовицям, ласков же ко всякому, богату и убогу, смерен же и кроток молчалив, речист же, книгами святыми утешая печалныя, и сякого не бысть преже в Руси, ни по немь не будеть сяк. В се лето иде Янка в Грекы, дщи Всеволожа, реченая преже. И приведе Янка митрополита Иоана скопьчину, его же видевше людье вси рекоша: «Се навье пришел». От года бо до года пребыв, умре. Бе же сей муж не книжен, но умом прост и просторек. В се же лето священа бысть церкы святаго Михаила Переяславьская Ефремом, митрополитомь тоя церкы, юже бе создал велику сущю, бе бо преже в Переяславли митрополья, и пристрои ю́ великою пристроею, украсив ю́ всякою красотою, церковныими сосуды. Сий бо Ефрем бе скопець, высок телом. Бе бо тогда многа зданья вздвиже: докончав церковь святаго Михаила, заложи церковь на воротех городных во имя святаго мученика Феодора, и посемь святаго Андрея у церкве от ворот и строенье баньное камено, сего же не бысть преже в Руси. И град бе заложил камен, от церкве святаго мученика Феодора, и украси город Переяславьский здании церковными и прочими зданьи.

В лето 6599. Игумен и черноризци свет створше, реша: «Не добро есть лежати отцю нашему Феодосьеви кроме манастыря и церкве своея, понеже той есть основал церковь и черноризци совокупил». Свет створше, повелеша устроити место, идеже положити моще его…

В се же лето бысть знаменье в солнци, яко погыбнути ему, и мало ся его оста, акы месяць бысть, в час 2 дне, месяца маия 21 день. В се же лето бысть: Всеволоду ловы деющю звериныя за Вышегородом, заметавшим тенета и кличаном кликнувшим, спаде превелик змий от небесе, и ужасошася вси людье. В се же время земля стукиу, яко мнози слышаша. В се же лето волхв явися Ростове, иже вскоре погыбе.

В лето 6600. Предивно бысть чюдо Полотьске в мечте: бываше в нощи тутн, станяше по улици, яко человеци рищюще беси. Аще кто вылезяше ис хоромины, хотя видети, абье уязвен будяше невидимо от бесов язвою, и с того умираху, и не смяху излазити ис хором. Посемь же начаша в дне являтися на коних, и не бе их видети самех, но конь их видети копыта; и тако уязвляху люди полоцкыя и его область. Темь и человеци глаголаху, яко навье бьють полочаны. Се же знаменье поча быти от Дрьютьска. В си же времена бысть знаменье в небеси, яко круг бысть посреде неба превелик. В се же лето ведро бяше, яко изгараше земля, и мнози борове взгарахуся сами и болота; и многа знаменья бываху по местомь; и рать велика бяше от половець и отвсюду; взяша 3 грады: Песочен, Переволоку, Прилук, и многа села воеваша по обема странома. В се же лето воеваша половци ляхы с Василькомь Ростиславичемь. В се же лето умре Рюрик, сын Ростиславль. В си же времена мнози человеци умираху различными недугы, якоже глаголаху продающе корсты, яко «Продахом корсты от Филипова дне до мясопуста 7 тысячь». Се же бысть за грехы наша, яко умножишася греси наши и неправды. Се же наведе на ны бог, веля нам имети покаянье и встягнутися от греха, и от зависти и от прочих злых дел неприязнин.

В лето 6601, индикта 1 лето, преставися великый князь Всеволод, сын Ярославль, внук Володимерь, месяца априля в 13 день, а погребен бысть 14 день, недели сущи тогда страстней и дни сущю четвертку, в онь же положен бысть в гробе в велицей церькви святыя Софья. Сий бо благоверный князь Всеволод бе издетьска боголюбив, любя правду, набдя убогыя, вздая честь епископом и презвутером, излиха же любяше черноризци и подаяше требованье им. Бе же и сам вздержася от пьяньства и от похоти, темь любим бе отцемь своим, яко глаголати отцю к нему: «Сыну мой! Благо тобе, яко слышю о тобе кротость, и радуюся, яко ты покоиши старость мою. Аще ти подасть бог прияти власть стола моего, по братьи своей, с правдою, а не с насильемь, то егда бог отведеть тя от житья сего, да ляжеши, идеже аз лягу, у гроба моего, понеже люблю тя паче братьи твоее». Се же сбысться глагол отца его, якоже глаголал бе. Сему приимшю послеже всея братья стол отца своего, по смерти брата своего, седе Кыеве княжа. Быша ему печали болше паче, неже седящю ему в Переяславли. Седящю бо ему Кыеве, печаль бысть ему от сыновець своих, яко начаша ему стужати, хотя власти ов сея, ово же другие; сей же, омиряя их раздаваша власти им. В сих печали всташа и недузи ему, и приспеваше старость к сим. И нача любити смысл уных, свет творя с ними; си же начаша заводити и́ негодовати дружины своея первыя, и людем не доходити княже правды, начаша ти унии грабити, людий продавати, сему не ведущу в болезнех своих. Разболевшюся ему велми, посла по сына своего Володимера Чернигову. Пришедшю Володимеру, видев и́ велми болна суща, и плакася. Преседящю Володимеру и Ростиславу, сыну его меншему, пришедшю же часу, преставися тихо и кротко и приложися ко отцем своим, княжив лет 15 Кыеве, а в Переяславли лето, а в Чернигове лето. Володимер же плакався с Ростиславом, братом своим, спрятаста тело его. И собрашася епископи, и игумени, и черноризьци, и попове, и боляре, и простии людье, и вземше тело его, со обычными песнми положиша и́ в святей Софьи, якоже рекохом преже.

Володимер же нача размышляти, река: «Аще сяду на столе отца своего, то имам рать с Святополком взяти, яко есть стод преже отца его был». И, размыслив, посла по Святополка Турову, а сам иде Чернигову, а Ростислав Переяславлю. И минувшую велику дни, прешедши Праздней недели, в день антипаскы, месяца априля в 24 день, приде Святополк Кыеву. И изидоша противу ему кияне с поклоном, и прияша и́ с радостью, и седе на столе отца своего и строя своего. В се же время поидоша половци на Русьскую землю; слышавше, яко умерл есть Всеволод, послаша слы к Святополку о мире. Святополк же, не здумав с болшею дружиною отнею и строя своего, свет створи с пришедшими с ним, и изимав слы, всажа и́ вистобку. Слышавше же се половци, почаша зоевати. И придоша половци мнози и оступиша Торцийскый град. Святополк же пусти слы половецьскые, хотя мира. И не всхотеша половци мира, и ступиша половци воюючи. Святополк же поча сбирати вое, хотя на ня. И реша ему мужи смыслении: «Не кушайся противу им, яко мало имаши вой». Он же рече: «Имею отрок своих 700, иже могуть противу им стати». Начаша же друзии несмыслении глаголати: «Поиди, княже». Смыслении же глаголаху: «Аще бы их пристроил и 8 тысячь, не лихо ти есть: наша земля оскудела есть от рати и от продажь. Но послися к брату своему Володимеру, да бы ти помогл». Святополк же, послушав их, посла к Володимеру, да бы помогл ему. Володимерь же собра вои свои и посла по Ростислава, брата своего, Переяславлю, веля ему помагати Святополку. Володимеру же пришедшю Киеву, совокупистася у святаго Михаила, и взяста межи собою распря и которы, и уладившася, целоваста крест межи собою, половцем воюющим по земли, и реша има мужи смыслении: «Почто вы распря имата межи собою? А погании губять землю Русьскую. Последи ся уладита, а ноне поидита противу поганым любо с миром, любо ратью». Володимер хотяше мира, Святополк же хотяше рати. И поиде Святополк, и Володимер, и Ростислав к Треполю, и придоша к Стугне. Святополк же, и Володимер и Ростислав созваша дружину свою на свет, хотяче поступити черес реку, и начашадумати. И глаголаше Володимер, яко «Сде стояче черес реку, в грозе сей, створим мир с ними». И пристояху совету сему смыслении мужи, Янь и прочии. Кияне же не всхотеша совета сего, но рекоша: «Хочем ся бити; поступим на ону сторону реки». И взлюбиша свет сь и преидоша Стугну реку. Бе бо наводиилася велми тогда. Святополк же, и Володимер и Ростислав, исполчивше друлшну, поидоша. И идяше на десней стороне Святополк, на шюей Володимер, посреде же бе Ростислав. И, минувше Треполь, проидоша вал. И се половци идяху противу, и стрелци противу пред ними; нашимь же ставшим межи валома, поставиша стяги свои, и поидоша стрелци из валу. И половци, пришедше к валови, поставиша стягы свое, и налегоша первое на Святополка, и взломиша полк его. Святополк же стояше крепко, и побегоша людье, не стерпяче ратных противленья, и послеже побеже Святополк. Потомь наступиша на Володимера, и бысть брань люта; побеже и Володимер с Ростиславом и вои его. И прибегоша к реце Стугне, и вбреде Володимер с Ростиславом, и нача утапати Ростислав пред очима Володимерима. И хоте похватити брата своего и мало не утопе сам. И утопе Ростислав, сын Всеволожь. Володимер же пребред реку с малою дружиною, – мнози бо падоша от полка его, и боляре его ту падоша, – и перешед на ону сторону Днепра, плакася по брате своем и по дружине своей, и иде Чернигову печален зело. Святополк же вбеже в Треполь, и затворися ту, и бе ту до вечера, и на ту ночь приде Киеву. Половци же, видевше одолевше, пустиша по земли воююче, а друзии взвратишася к Торцьскому. Си же ся злоба сключи в день Взнесенья господа нашего Иисуса Христа, месяца мая в 26. Ростислава же, искавше, обретоша в реце, и, вземше, принесоша и́ Киеву, и плакася по немь мати его, и вси людье пожалиша си по немь повелику, уности его ради. И собрашася епископи и попове и черноризци, песни обычныя певше, положиша и́ у церкви святыя Софьи у отца своего. Половцем же оседящем Торцьскый, противящим же ся торком и крепко борющимся из града, убиваху многы от противных. Половци же начаша налегати и отъимаху воду, и изнемагати начаша людье в граде водною жажею и голодом. И прислаша торци к Святополку, глаголюще: «Аще не пришлеши брашна, предатися имамы». Святополк же посла им, и не бе лзе вкрастися в град множьствомь вой ратных. И стояша около града недель 9, и разделишася надвое: едини сташа у града, рать борюще, а друзии поидоша Кыеву, и пустиша на вороп межи Кыев и Вышегород. Святополк же выиде на Желаню, и поидоша противу собе обои, и съступишася, и укрепися брань. И побегоша наши пред иноплеменьникы, и падаху язвени пред врагы нашими, и мнози погыбоша, и быша мертви, паче неже у Трьполя. Святополк же приде Киеву сам третин, а половци возвратишася к Торцьскому. Быша си злая месяца иуля в 23. Наутрия же в 24, в святою мученику Бориса и Глеба, бысть плачь велик в граде, а не радость, грех ради наших великих и неправды, за умноженье безаконий наших.

Се бо на ны бог попусти поганыя, не яко милуя их, но нас кажа, да быхом ся востягнули от злых дел. Симь казнить ны нахоженьемь поганых; се бо есть батог его, да негли встягнувшеся вспомянемъся от злаго пути своего…

Половци воеваша много, и взвратишася к Торцьскому, и изнемогоша людье в граде гладомь и предашася ратным. Половци же, приимше град, запалиша и́ огнем, люди разделиша и ведоша в веже к сердоболем своим и сродником своим; много роду хрестьяньска: стражюще, печални, мучими, зимою оцепляеми, в алчи и в жажи и в беде, опустневше лици, почерневше телесы; незнаемою страною, языком испаленым, нази ходяще и боси, ногы имуще сбодены терньем; со слезами отвещеваху друг к другу, глаголюще: «Аз бех сего города», и други: «А яз сея вси»; тако съупрашаются со слезами, род свой поведающе и вздышюче, очи возводяще на небо к вышнему, сведущему тайная.

Да никтоже дерзнеть рещи, яко ненавидими богомь есмы! Да не будеть! Кого бо тако бог любить, якоже ны взлюбил есть? Кого тако почел есть, якоже ны прославил есть и взнесл? Никого же! Им же паче ярость свою вздвиже ка ны, яко паче всех почтени бывше, горее всех сдеяхом грехы. Якоже паче всех просвещени бывше, владычню волю ведуще, и презревше, в лепоту паче инех казними есмы. Се бо аз грешный и много и часто бога прогневаю, и часто согрешаю по вся дни.

В се же лето преставися Ростислав, сын Мьстиславль, внук Изяславль, месяца октямбря в 1 день; а погребен бысть ноямбря в 16, в церкви святыя Богородиця Десятиньныя.

В лето 6602. Сотвори мир Святополк с половци и поя собе жену дщерь Тугорканю, князя половецкаго. Том же лете приде Олег с половци ис Тмутороконя, и приде Чернигову, Володимер же затворися в граде. Олег же приде к граду и пожже около града, и манастыре пожже. Володимер же створи мир с Олгом, и иде из града на стол отень Переяславлю; а Олег вниде в град отца своего. Половци же начаша воевати около Чернигова, Олгови не взбраняющю, бе бо сам повелел им воевати. Се уже третьее наведе поганыя на землю Русьскую, его же греха дабы и́ бог простил, зане же много хрестьян изгублено бысть, а друзии полонени и расточени по землям. В се же лето придоша прузи на Русьскую землю, месяца августа в 26, и поедоша всяку траву и многа жита. И не бе сего слышано в днех первых в земли Русьсте, яже видеста очи наши, за грехы наша. В се же лето преставися епископ Володимерскый Стефан, месяца априля в 27 день, в час 6 нощи, быв преже игумен Печерьскому манастырю.

В лето 6603. Идоша половци на Грькы с Девгеневичем, воеваша по Гречьстей земли; и цесарь я́ Девгенича, и повеле и́ слепити. В то же лето придоша половци, Итларь и Кытан, к Володимеру на мир. Приде Итларь в град Переяславль, а Кытан ста межи валома с вои; и вда Володимер Кытанови сына своего Святослава в тали, а Итларь бысть в граде с лепшею дружиною. В то же время бяше пришел Славята ис Кыева к Володимеру от Святополка на некое орудие; и начаша думати дружина Ратиборя со князем Володимером о погубленьи Итларевы чади. Володимеру же не хотяищ сего створити, отвеща бо: «Како се могу створити, роте с ними ходив». Отвещавше же дружина, рекоша Володимеру: «Княже! Нету ти в том греха; да они, всегда к тобе ходяче роте, губять землю Русьскую и кровь хрестьяньску проливають бесперестани». И послуша их Володимер, и в ту нощь посла Володимер Славяту с неколикою дружиною и с торкы межи валы. И выкрадше первое Святослава, потом убиша Кытана и дружинуего избиша. Вечеру сущю тогда суботному, а Итлареви в ту нощь лежащю у Ратибора на дворе с дружиною своею и не ведущю, что ся над Кытаномь створи. Наутрия же, в неделю, заутрени сущи године, пристрои Ратибор отрокы в оружьи, и истобку пристави истопити им. И присла Володимер отрока своего Бяндюка по Итлареву чадь, и рече Бяндюк Итлареви: «Зовет вы князь Володимер, рекл тако: обувшеся в тепле избе и заутрокавше у Ратибора, приедите ко мне». И рече Итларь: «Тако буди». И яко влезоша в истобку, тако запрени быша. Взлезше на истобку, прокопаша верх, и тако Ольбег Ратиборичь приим лук свой и наложив стрелу, удари Итларя в сердце, и дружину его всю избиша. И тако зле испроверже живот свой Итларь, в неделю сыропустную, в час 1 дне, месяца февраля в 24 день. Святополк же и Володимер посласта к Ольгови, веляща ему поити на половци с собою. Олег же обещався с нима, и пошед, не иде с нима в путь един. Святополк же и Володимер идоста на веже, и взяста веже, и полониша скоты и коне, вельблуды и челядь, и приведоста я в землю свою. И начаста гнев имети на Олга, яко не шедшю ему с нима на поганыя. И посласта Святополк и Володимер к Олгови, глаголюще сице: «Се ты не шелесиснами на поганыя, иже погубилисуть землю Русьскую, а се у тобе есть Итларевичь: любо убий, любо и́ дай нама. То есть ворог нама и Русьстей земли». Олегь же сего не послуша, и бысть межи ими ненависть.

В се же лето приидоша половци к Гургеву, и стояша около его лето все, и мало не взяша его. Святополк же омири я. Половци же приидоша за Рось, гюргевци же выбегоша и идоша Кыеву. Святополк же повеле рубити город на Вытечеве холму, в свое имя нарек Святополчь город, и повеле епископу Марину с гургевци сести ту, и засаковцем, и прочим от инех град; а Гюргев зажгоша половци тощь. Сего же лета исходяща, иде Давыд Святославичь из Новагорода Смолиньску; новгородци же идоша Ростову по Мьстислава Володимерича. И поемше ведоша и́ Новугороду, а Давыдови рекоша: «Не ходи к нам». И пошед Давыд, воротися Смолиньску, и седе Смолиньске, а Мьстислав Новегороде седе. В се же время приде Изяслав, сын Володимерь, ис Курска к Мурому. И прияша и́ муромци, и посадника я Олгова. В се же лето придоша прузи, месяца августа в 28, и покрыша землю, и бе видети страшно, идяху к полунощным странам, ядуще траву и проса.

В лето 6000 и 604. Святополк и Володимер посласта к Олгови глаголюща сице: «Поиди Кыеву, да поряд положим о Русьстей земли пред епископы, и пред игумены, и пред мужи отець наших, и пред людми градьскыми, да быхом оборонили Русьскую землю от поганых». Олег же всприим смысл буй и словеса величава, рече сице: «Несть мене лепо судити епископу, ли игуменом, ли смердом». И не всхоте ити к братома своима, послушав злых светник. Святополк же и Володимер рекоста к нему: «Да се ты ни на поганыя идеши, ни на свет к нама, то ты мыслиши на наю и поганым помагати хочеши, а бог промежи нами будеть». Святополк же и Володимер поидоста на Олга Чернигову; Олег же выбеже из Чернигова, месяца мая в 3 день, в суботу, Святополк же и Володимер гнаста по нем, Олег же вбеже в Стародуб и затворися ту. Святополк же и Володимер оступиста и́ в граде, и бьяхутся из города крепко, а си приступаху к граду, и язвени бываху мнози от обоих. И бысть межю ими брань люта, и стояше около града дний 30 и 3, и изнемагаху людье в граде. И вылезе Олегь из града, хотя мира, и вдаста ему мир, рекше сице: «Иди к брату своему Давыдови, и придета Киеву на стол отець наших и дед наших, яко то есть старейшей град в земли во всей, Кыев; ту достойно снятися и поряд прложити». Олег же обещася се створити, и на семь целоваша крест.

В се же время приде Боняк с половци к Кыеву, в неделю от вечера, и повоева около Кыева, и пожже на Берестовемь двор княжь. В се же время воева Куря с половци у Переяславля, и Устье пожже, месяца мая 24 день. Олег же выйде и Стародуба, и приде Смолиньску, и не прияша его смолняне, и иде к Рязаню. Святополк же и Володимер поидоста в свояси. Сего же месяца приде Тугоркан, тесть Святополчь, к Переяславлю, месяца мая 30 и ста около града, а переяславьци затворишася в граде. Святополк же и Володимер поидоста на нь по сей стороне Днепра, и придоста к Зарубу, и ту перебродистася, и не очютиша их половци, богу схраншю их, и, исполчившеся, поидоста к граду; гражане же узревше, ради быша, и поидоша к нима, а половци стояху на оной стороне Трубежа, исполчившеся. Святополк же и Володимер вбредоста в Трубежь к половцем, Володимер же хоте нарядити полк, они же не послушаша, но удариша в коне к противным. Се видевше половци и побегоша, а наши погнаша в след ратных, секуще противьныя. И сдея господь в т день спасенье велико: месяца иулия в 19 день побежени быша иноплеменници, и князя их убиша Тугоркана и сына его и ини князя; мнози врази наши ту падоша. На заутрье же налезоша Тугоркана мертвого, и взя и́ Святополк, акы тьстя своего и врага; и привезше и́ к Кыеву погребоша и́ на Берестовемь, межю путем, идущим на Берестово, и другымь, в манастырь идущим. И в 20 того же месяца, в пяток, час дне, приде второе Боняк безбожный, шелудивый, отай, хыщник, к Кыеву внезапу, и мало в град не въехаша половци, и зажгоша болонье около града, и взвратишася на манастырь, и вжгоша Стефанов манастырь, и деревне, и Герьманы. И придоша на манастырь Печерьскый, нам сущим по кельям почивающим по заутрени, и кликнуша около манастыря, и поставиша стяга два пред враты манастырьскыми, нам же бежащим задом манастыря, а другим взбегшим на полати. Безбожные же сынове Измаилеви высекоша врата манастырю и поидоша по кельям, высекающе двери, и изношаху, аще что обретаху в кельи; посемь вжгоша дом святыя владычице нашея Богородице, и придоша к церкви, и зажгоша двери, яже к угу устроении, и вторыя же к северу, ивлезшев притвор у гроба Феодосьева, емлюще иконы, зажигаху двери и укаряху бога и закон нашь. Бог же терпяше, еще бо не скончалися бяху греси их и безаконья их, темь глаголаху: «Кде есть бог их? Да поможеть им и избавить я!» И ина словеса хулная глаголаху на святыя иконы, насмихающеся, не ведуще, яко бог кажеть рабы своя напастми ратными, да явятся яко злато искушено в горну: хрестьяном бо многыми скорбьми и напастьми внити в царство небесное, а сим поганым и ругателем на семь свете приимшим веселье и пространьство, а на ономь свете приимуть муку, с дьяволом уготовании огню вечному. Тогда же зажгоша двор Красный, его же поставил благоверный князь Всеволод на холму, нарецаемем Выдобычи: то все оканнии половци запалиша огнемь. Темже и мы, последующе пророку Давыду, вопьем: «Господи боже мой! положи я́ яко коло, яко огнь пред лицемь ветру, иже попаляеть дубравы, тако поохенеши я́ бурею твоею, исполни лица их досаженья». Се бо оскверниша и пожгоша святый дом твой, и манастырь матере твоея, и трупье раб твоих. Убиша бо неколако от братья нашея оружьемь безбожнии сынове Измаилеви, пущени бо на казнь хрестьяном.

Ишьли бо суть си от пустыня Етривьскыя, межю встокомь и севером; ищьли же суть их колен 4: торкмене, и печенези, торци, половци. Мефодий же сведетельствуеть о них, яко 8 колен пробегли суть, егда исече Гедеон, да 8 их бежа в пустыню, а 4 исече. Друзии же глаголють: сыны Амоновы; се же несть тако: сынове бо Моавли хвалиси, а сынове Аммонови болгаре, а срацини от Измаиля творятся сарини, и прозваша имя собе саракьше, рекше: сарини есмы. Темже хвалиси и болгаре суть от дочерю Лотову, иже зачаста от отца своего, темьже нечисто есть племя их. А Измаиль роди 12 сына, от них же суть торкмени, и печенези, и торци и кумани, рекше половци, иже исходять от пустыне. И по сих 8 колен к кончине века изидуть заклепении в горе Александром Македоньскым нечистыя человекы…

Се же хощю сказати, яже слышах преже сих 4 лет, яже сказа ми Гюрятя Роговичь новгородець, глаголя сице, яко «Послах отрок свой в Печеру, люди, иже суть дань дающе Новугороду. И пришедшю отроку моему к ним, и оттуду иде в Югру. Югра же людье есть язык нем, и соседять с Самоядью на полунощных странах. Югра же рекоша отроку моему: «Дивьно мы находихом чюдо, его же не есмы слышали преже сих лет, се же третьее лето поча быти: суть горы заидуче в луку моря, им же высота ако до небесе, и в горах тех кличь велик и говор, и секуть гору, хотяще высечися; и в горе той просечено оконце мало, и туде молвять, и есть не разумети языку их, но кажють на железо и помавають рукою, просяще железа; и аще кто дасть им ножь ли, ли секиру, и они дають скорою противу. Есть же путь до гор тех непроходим пропастьми, снегом и лесом, темже не доходим их всегда; есть же и подаль на полунощии». Мне же рекшю к Гюряте: «Си суть людье заклепении Александром, Македоньскым цесаремь», якоже сказаеть о них Мефоди Патарийскый, глаголя: «Александр, царь Макидоньский, взиде на всточныя страны до моря, наричемое Солнче место, и виде ту человекы нечистыя от племене Афетова, их же нечистоту видев: ядяху скверну всяку, комары, и мухы, коткы, змие, и мертвець не погребаху, но ядяху, и женьскыя изворогы и скоты вся нечистыя. То видев Александр убояся, еда како умножаться и осквернят землю, и загна их на полунощныя страны в горы высокия; и, богу повелевшю, ступишася о них горы великия, токмо не ступишася о них горы на 12 локот, и ту створишася врата медяна, и помазашася сунклитом; и аще хотят взяти, не взмогуть, ни огнем могуть ижещи; вещь бо сунклитова сица есть: ни огнь можеть вжещи его, ни железо его приметь. В последняя же дни по сих изидут 8 колен от пустыня Етривьскыя, изидуть и си сквернии языкы, иже сут в горах полунощных, по повеленью божию».

Но мы на предняя взвратимся, якоже бяхом преже глаголали. Олгови обещавшюся ити к брату своему Давыдови Смолинску, и прити з братом своим Кыеву и обряд положити, и не всхоте сего Олег створити, но пришед Смолинску и поим вои, поиде к Мурому, в Муроме тогда сущю Изяславу Володимеричю. Бысть же весть Изяславу, яко Олег идеть к Мурому, посла Изяслав по вое Суздалю, и Ростову, и по белоозерци, и собра вои многы. И посла Олег слы свое к Изяславу, глаголя: «Иди в волость отца своего Ростову, а то есть волость отца моего. Да хочю, ту седя, поряд створити со отцемь твоим. Се бо мя выгнал из города отца моего. А ты ли ми зде хлеба моего же не хощеши дати?» И не послуша Изяслав словес сих, надеяся на множество вой, Олег же надеяся на правду свою, яко прав бе в семь, и поиде к граду с вои. Изяслав же исполчися пред градом на поли. Олег же поиде к нему полком, и сступишася обои, и бысть брань люта. И убиша Изяслава, сына Володимеря, внука Всеволожа, месяця семтября в 6 день; прочии же вои побегоша ови черес лес, друзии в город. Олег же вниде в город, и прияша и́ горожане. Изяслава же вземше, положиша и́ в манастыря святаго Спаса, и оттуда перенесоша и́ Новугороду, и положиша и́ у святые Софье, на левей стороне. Олег же, по приятьи града, изима ростовци, и белоозерци и суздалце и покова, и устремися на Суждаль. И пришед Суждалю, и суждалци дашася ему. Олег же омирив город, овы изима, а другыя расточи, и именья их отъя. Иде Ростову, и ростовци вдашася ему. И перея всю землю Муромску и Ростовьску, и посажа посадникы по городом, и дани поча брати. И посла к нему Мьстислав сол свой из Новагорода, глаголя: «Иди ис Суждаля Мурому, а в чюжей волости не седи. И аз пошлю молится з дружиною своею к отцю своему, и смирю тя со отцемь моим. Аще и брата моего убил еси, то есть недивьно, в ратех бо и цари и мужи погыбають». Олег же не всхоте сего послушати, но паче помышляше и Новгород переяти. И посла Олег Ярослава, брата своего, в стороже, а сам стояше на поли у Ростова, Мьстислав же сдумав с Новгородци, и послаша Добрыню Рагуиловича перед собою в стороже; Добрыня же первое изима даньникы. Уведав же Ярослав се, яко изимани данници, Ярослав же стояше на Медведици в сторожих, и побеже той нощи, и прибеже к Олгови и поведа ему, яко идет Мстислав, а стороже изимани, и поиде к Ростову. Мстислав же приде на Волгу и поведаша ему, яко Олег вспятился к Ростову, и Мстислав поиде по нем. Олег же приде к Суждалю, и слышав, яко идет по нем Мстислав, Олег же повеле зажещи Суждаль город, токмо остася двор манастырьскый Печерьскаго манастыря и церкы, яже тамо есть святаго Дмитрея, юже бе дал Ефрем и с селы. Олег же побеже к Мурому, а Мстислав приде Суждалю, и седя ту посылаше к Олгови, мира прося, глаголя: «Аз есм мний тебе, слися к отцю моему, а дружину, юже еси заял, вороти; а яз тебе во всем послушаю», Олег же посла к нему, с лестью хотя мира; Мстислав же, имы лсти веры, и распусти дружину по селом. И наста Феодорова неделя поста, и приспе Феодорава субота, а Мстиславу седящю на обеде, приде ему весть, яко Олег на Клязме, близь бо бе пришел без вести. Мстислав же ему им веру, не постави сторожовъ; но бог весть избавляти благочестивыя своя от льсти. Олег же установися на Клязме, мня, яко, бояся его, Мстислав побегнеть. К Мстиславу же собрашася дружина в т день и в другый, новгородци, и ростовци, и белозерци. Мстислав же ста пред градом, исполчив дружину, и не поступи ни Олег на Мстислава, ни Мстислав на Олга и стояста противу собе 4 дни. И приде Мстиславу весть, яко «Послал ти отець брата Вячеслава с половци». И приде Вячеслав в четверг по Феодоровы недели, в пост. И в пяток приде Олег, исполчивъся, к городу, а Мстислав поиде противу ему с новгородци и с ростовци. И вдасть Мстислав стяг Володимерь половчину, именем Кунуй, и вдав ему пешьце, и постави и́ на правемь криле. И завед Кунуй пешьце, напя стяг Володимерь, и узре Олег стяг Володимерь, и убояся, и ужас нападе на нь и на вое его. И поидоша к боеви противу собе, и поиде Олег противу Мстиславу, а Ярослав поиде противу Вячеславу. Мстислав же перешед пожар с новгородци, и сседоша с коней новгородци, и сступишася на Кулачьце, и бысть брань крепка, и нача одалати Мстислав. И виде Олег, яко поиде стяг Володимерь, нача заходити в тыл его, и убоявся побеже Олег, и одоле Мстислав. Олег же прибеже к Мурому, и затвори Ярослава Муроме, а сам иде Рязаню. Мстислав же приде Мурому, и створи мир с муромци, и поя своя люди, ростовци и суждалци, и поиде к Рязаню по Олзе. Олег же выбеже из Рязаня, а Мстислав, пришед, створи мир с рязании, и поя люди своя я же бе заточил Олег. И посла к Олгови, глаголя: «Не бегай никаможе, но пошлися к братьи своей с молбою не лишать тя Русьскые земли. И аз пошлю к отцю молится о тобе». Олег же обещася тако створити. Мстислав же взвратився вспять Суждалю, оттуду поиде Новугороду в свой град, молитвами преподобнаго епископа Никыты. Се же бысть исходящю лету 6804, индикта 4 на полы.