Текст книги "Большая книга знахаря. Рецепты, проверенные поколениями"

Об исцелении младенческого (родимец) у детей

Молитва святому великомученику Никите

О великий страстотерпче Христов и чудотворче, великомучениче Никито, припадающе ко святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: явя нам смиренным и грешным святое и многомощное твое заступление, се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити: но тебе молитвенника к Нему благоприятнаго предлагаем, и о твоем предстательстве взываем: испроси нам у Господа благопотребныя дары душам и телесем нашым: веру правую, спасения надежду несомненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносив, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на страшнем суде Христове: еще же, о страстотерпче Христов, у Царя небеснаго испроси мир, здравие и спасение и на враги победу и одоление, тишину и благоденствие, Христолюбивому воинству буди соратаи и помощник на враги, и всем людем православным яви твое святое заступление: болящыя исцели, скорбящыя утеши, бедствующим помози: ей, угодниче Божий и мучениче долготерпеливый! Не забуди святую обитель твою и вся живущыя в ней и подвизающыяся инокини же и мирския, но поспеши им во смирении и терпении носити иго Христово, и от всяких бед и искушений милостивне избави: всех убо нас приведи в тихое пристанище спасения, и наследники сподоби быти пресвятыми твоими молитвами: да славим и поем великия щедроты Отца и Сына и Святаго Духа, в Троице славимаго и поклоняемаго Бога, и твое святое заступление, во веки веков.

Также молятся великомученику и целителю Пантелеимону (см. «Об исцелении болезни очныя», с. 629).

о младенце неспящем

Молитва святым седми отрокам, иже во Ефесе: Максимилиану, Иамвлиху, Мартиниану, Иоанну, Дионисию, Ексакустодиану и Антонину

О пречуднии святии седмочисленнии отроцы, Ефеса, града похвало и всея вселенныя упование! Воззрите с высоты небесныя славы на нас, любовию память вашу чтущих, наипаче же на младенцы христианския, вашему заступлению от родителей своих препорученныя: низведите на ня благословение Христа Бога, рекшаго: оставите детей приходити ко Мне: болящыя убо в них исцелите, скорбящыя утешите: сердца их в чистоте соблюдите, кротостию исполните я, и в земли сердце их зерно исповедания Божия насадите и укрепите, во еже от силы в силу им возрастати: и всех нас, святей иконе вашей предстоящих, мощи же вашя с верою лобызающих и тепле вам молящихся, сподобите царствие небесное улучити, и немолчными гласы радования тамо прославляти великолепое имя Пресвятыя Троицы, Отца и Сына и Святаго Духа, во веки веков. Аминь.

Также молятся Ангелу Хранителю (см. «От головной боли», с. 630).

От разных детских болезней

Молитва святителю Иулиану Кеноманийскому

Святителю отче Иулиание, нетлением честных мощей твоих и многими благодеяниями, чудесно содеянными и содеваемыми тобою с верою к тебе притекающим, уверившеся, яко имаши велию благодать у Господа Бога нашего, всесмиренно припадаем вси и молимся тебе: Моли о нас Христа Бога нашего, да ниспослет всем, чтущим святую память тебе и усердно к тебе прибегающим, богатыя милости Своя: да утвердит во святей Своей православной Церкви живый дух правыя веры и благочестия, дух ведения и любве, дух мира и радости о Духе Святе, да вси члены ея, чисты от мирских искушений и плотских похотей и злаго действия злых духов, духом и истиною поклоняются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им ввереных, да неверующих просветят, неведущих наставят, сомневающихся вразумят и удостоверят, отпадших от православныя Церкве обратят в святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаявшихся и исправившихся утвердят в святости жизни: и тако всех введут указанным от Него путем в уготованное вечное царство святых Его. Ей святителю Божий, да устроиши молитвами твоими вся благая душам и телесам нашим: да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.

Молитва св. великомученице Параскеве Молитва первая

Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя, и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею Ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты именем Господа нашего Иисуса Христа и силою молитвы твоея в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возженным чрез Ангела Божия, попаливши неистовых беззаконников, много народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, восшедши душею твоею на небеса в чертог возделеннаго твоего жениха Христа, Царя славы, радостно сретшаго тя сим небесным гласом: «радуйтеся, праведнии, яко мученица Параскева увенчася!» Темже и мы, днесь сошедшеся в храм, посвященный имени твоему святому, приветствуем тя, многострадальная, и взирающе на святую твою икону, со умилением вопием ти, всечестная Параскево: вемы, яко велие имаши дерзновение ко Господу, умоли убо Его Человеколюбца и о нас предстоящих и молящихся ти, да подаст Он и нам, якоже тебе, терпение и благодушие в бедах и скорбных обстояниих. Возлюбленному же нашему отечеству да ниспошлет святое Свое благословение и мир, и всем православным христианом да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели: да очистит нас грешных от всякия скверны и порока: да оградит нас святыми Своими Ангелами, да заступит, сохранит и помилует всех святою Своею благодатию и соделает наследниками и причастниками небеснаго Своего царствия. И тако улучивше спасение твоими святыми молитвами, предстательством и заступлением, всеславная невесто Христова Параскево, прославим вси пресвятое и великолепое имя дивнаго во святых Своих истиннаго Бога, Отца, Сына и Святаго Духа, всегда, ныне и присно и во веки веков. Аминь.

Вторая

О святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице идольския льсти обличительнице, евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная! Молим тя, святая мученице: буди о нас печальница ко Христу Богу, Егоже преблаженнейшим зрением присно веселишися: моли Всемилостиваго, Иже словом очи слепым отверзе, да избавит нас от болезни очес наших, телесных вкупе и душевных, разжени твоими святыми молитвами мрак прибывший от грехов наших, испроси у Бога светов свет благодати душевным и телесным очесем нашим, просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О великая угоднице Божия! О мужественнейшая дево! О крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощни есмы. Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами пособствовани, мрака же греховнаго избывше, во свете истинныя веры и деяний божественных внидем во свет вечный дне невечерняго, во град веселия приснаго, в немже ты ныне светло блиставши славою и веселием безконечным, славословящи и воспевающи со всеми небесными силами трисиятельное единое божество, Отца и Сына и Святаго Духа, ныне и присно и во веки веков.

Молитва св. праведному Симеону Богоприимцу

О великий угодниче Божий и богоприимче Симеоне! призри на мя грешнаго, ко святей иконе твоей припадающа и просяща твоего заступления и помощи. Скорбь бо обдержит мя от обстоящих мя ныне бед и зол, и утешения не имам многоболезненней души моей. Исках бо помощи от человек, и не обретеся. Вопиях ко Господу, и не услыша мя, зане прогневах пречистую благость Его беззаконьми моими, ни множеством многих грехов моих преогорчих человеколюбною утробу Его. И кто ми ныне помощь явит, кто ми скорбь утолит, кто даст отраду и успокоение многомятежней души моей. К тебе, великий угодниче Божий, прибегаем грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих и твоего заступления и помощи требующих. Моли убо человеколюбца Господа, яко да простив ми безчисленная моя прегрешения, не отвратит милость Свою от мене, но яко благо и сострадателен, явит и мне безконечное Свое милосердие, и в лютем напастей и бед моих озлоблении подаст ми всесильную помощь Свою, и преогорченней души моей ослабу, мир, укрепление, утешение и успокоение дарует. Ей, великий угодниче Божий! Вознеси богоноснии руце твои ко иже на объятиих твоих носитися извольшему Христу Богу нашему, и моли благость Его, да не отринет моления сердца моего, недостоинства ради моего, но да явит мне благовремение милость свою, во славу безконечных щедрот Своих и многомощнаго предстательства твоего, о нем же подобает Ему всякая слава и благодарение, купно со Отцем и Пресвятым Его Духом, ныне и присно и во веки веков.

От лихорадки и горячки

Молитва преподобному Марону Пустыннику

О возлюбленная и священна главо, преподобие и Богоносне отче наш Мароне! Назирай свыше милостивно нас грешных, и молися всещедрому Владыце и всех благ подателю Богу о соблюдении державы и спасении во Господе нашем Иисусе Христе: буди же молебник и о нас недостойных, ко всеблагому Господу честнии твои руце простри, и от Него милость и щедроты испроси, имиже от всех бед и лютых болезней нас сохрани, и от всяких страстей свободи, такожде от нестерпимыя и неутишимыя огневицы и трясавицы молитвами твоими избави нас, и от нападения бесов, от видимых и невидимых врагов соблюди, и согрешением нашым прощение испроси, и спасены Христу нас представи, во еже в день страшнаго суда с радостию предстати нам пред лицем неизреченныя славы его, и милостивное призвание в царство небесное от Него услышати, и в неизреченней радости преславную Его лица доброту узрети, благодатию и человеколюбием Господа Бога и Спаса нашего Иисуса Христа: яко держава его благословена и препрославлена, со безначальным Его Отцем и с пресвятым и благим и животворящим Его Духом, ныне и присно и во веки веков.

Молитва преподобному Василию Новому

О священная главо, преподобие отче, преблаженне авво Василие! Не забуде убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуде посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю:

не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребывавши. Не отступай от нас духом, сохраняя нас от стрел вражьих и всякия прелеси бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится. Ведуще убо тя в истину и по смерти жива суща, тебе припадаем и тебе молимся: молися о нас всесильному Богу, о пользе душ наших, и испроси нам время на покаяние, да не возбрано прейдем от земли на небо, от мытарств же горьких, бесов воздушных князей и от вечныя муки да избавимся, и небеснаго царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его духом, ныне и присно и во веки веков.

Также молятся св. праведному Артемию Веркольскому (см. «Об исцелении от грыжи», с. 656).

Об исцелении от грыжи

Св. праведному Артемию Веркольскому Молитва первая

Святый угодниче Божий, Артемий праведный хранителю присный святыя обители, твоим именем украшенныя, и всея северныя страны пред Богом заступниче! Призри милостивно на усердную молитву нас грешных, и твоим благомощным предстательством прощение согрешений наших у Господа испроси, преспеяние же в вере и благочестии, и от козней диавольских ограждений исходатайствуй нам. Наипаче же моли Господа, да во здравии и непременяемем благополучие сохранить православный народ наш, да подаст же и всем людем, державе нашей мир, тишину и нелицемерное послушание, да сподобит всех нас по христианстей кончине небесное царствие получити, идеже вси праведнии купно с тобою славят Отца и Сына и Святаго Духа во веки веков.

Вторая

О великий угодниче Божий, святый праведный Артемие, святыя обители, твоим именем красующияся, покровителю сильный о нас ко Господу ходатай, зде живущих иноков твоея обители благодетелю, и всех с верою и любовию притекающих к раце чудотворных мощей твоих добрый слушателю! Призри милостивно на убогую молитву нас грешных и непотребных, и твоим всемощным предстательством испроси нам у Господа прощения грехов, в вере и благочестии преспеяние и от козней супостата, ищущаго нас погубити, ограждение. Даруй братству твоему обители смирения и кротости, любовь и послушание вседушное, служение и житие благоговейное и иноческаго общежития доброе соблюдение, да Господи не постыдно работающе, духом же горяще, и в непрестанней молитве о благотворителех наших живых и усопших преспевающе, вернии раби Господа явимся. Моли Господа, да церковь православная, яко ветроград благонасажденный, утверждается и множится, и богатный плоды веры и благочестие да сотворит. Моли Господа, да хранит во здравии, душевнем спасении и во всем благопоспешении православный народ наш. Моли Господа о милости и благодатных щедротах святейшему правительствующему синоду, и всему освященному причту, и всем православным христианам, да ходатайством и заступлением Преблагословенныя Владычицы нашия Богородицы мирное и богоугодное житие зде поживем, и по мирней христианстей кончине преславнем царствии милости Царя Небесе и Земли сподобимся, славити Отца и Сына и Святаго Духа, ныне и присно и во веки веков.

От болей в пояснице

Молитва преподобному Серафиму, Саровскому чудотворцу

О пречудный отче Серафиме, великий Саровский чудотворче, всем прибегающим к тебе скоропослушный помощниче! Во дни земнаго жития твоего никтоже от тебе тощ и неутешен отъиде, но всем в сладость бысть видение лика твоего и благоуветливый глас словес твоих. К сим же и дар исцелений, дар прозрения, дар немощных душ врачевания, обилен в тебе явися. Егда же призва тя Бог от земных трудов к небесному успокоению, николиже любовь твоя преста от нас, и невозможно есть исчислити чудеса твоя умножавшаяся, яко звезды небесныя: се бо по всем концем земли нашея людем Божиим являешися и даруеши им исцеления. Темже и мы вопием ти: о претихий и кроткий угодниче Божий, дерзновенный к Нему молитвенниче, николиже призывающия тя отреваяй, вознеси о нас благомощную твою молитву ко Господу сил, да укрепит державу благовернаго царя нашего, да дарует нам вся благопотребная в жизни сей и вся к душевному спасению полезная, да оградит нас от падений греховных и истинному покаянию научит нас, во еже безпреткновенно внити нам в вечное небесное царство, идеже ты ныне в незаходимей сияеши славе, и тамо воспевати со всеми святыми живоначальную Троицу до скончания века. Аминь.

Также см. молитву Серафиму Саровскому в разделе «О помощи при мысленной брани, против бесов», с. 633.

В скорбях и напастях

Молитва святому архангелу Михаилу

О святый Михаиле архангеле, светлообразный и грозный небеснаго Царя воеводо, прежде страшнаго суда ослаби ми покаятися от грехов моих, от сети ловящих избави душу мою и приведи ю к сотворшему ю Богу, седящему на херувимех, и молися о ней прилежно, да твоим ходатайством послет ю в место покойное: о грозный воеводо небесных сил, предстателю всех у престола Владыки Христа, хранителю твердый всем человеком и мудрый оружниче, крепкий воеводо небеснаго Царя, помилуй мя грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольскаго, и сподоби мя непостыдно предстати Создателю нашему в час страшнаго и праведнаго суда Его. О всесвятый великий Михаиле архистратиже, не презри мене грешнаго, молящагося тебе о помощи и заступлении твоем в веце сем и в будущем, но сподоби мя тамо купно с тобою славити Отца и Сына и Святаго Духа во веки веков.

Молитва святому великомученику Георгию Победоносцу

Святый, славный и всехвальный великомучениче Христов Георгие! Собраннии во храме твоем и пред иконою твоею святою покланяющиися людие молим тя, известный желания нашего ходатаю: моли с нами и о нас умоляемаго от Своего благосердия Бога, да милостивно услышит нас просящих Его благостыню, и не оставит вся нашa ко спасению и житию нуждная прошения, и да укрепит же данною тебе благодатию во бранех православное воинство, и силы возстающих враг наших да низложит, да постыдятся и посрамятся, и дерзость их да сокрушится, и да уведят, яко мы имамы божественную помощь: и всем в скорби и обстоянии сущым многомощное яви твое заступление: умоли Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа, и твое исповедуем предстательство, ныне и присно и во веки веков.

Молитва святителю Стефану, епископу Пермскому

О Богоосвященный и равноапостольный святителю Христов Стефане, новый Боговедения проповедниче и просветителю великопермских во идолопоклонстве живших людей, ко истинному евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательныи к небесному Сиону наставниче и руководителю, образе благонравия всем благочестно жити желающым, благоискусный мысленнаго корабля, чрез море мира сего к небесному пристанищу плавающаго, правителю, дивный во иерарсех, увенчанный Божественною благодатию, всероссийский светильниче, великий чудотворче и молитвенниче теплый! К тебе, во умилении душ и сокрушении сердец наших, мы окаяннии и грешнии благонадежно притекаем, и пред чудотворным твоим гробом, в немже святыя мощи твоя почивают (или: пред святым и чудотворным твоим образом), вопием, просяще смиреннии помощи твоея и теплаго ко преблагому Богу ходатайства, да твоими Богоприятными молитвами испросиши нам от Него человеколюбную милость, оставление многих наших согрешений, душам и телесем здравие со спасением: да благоволит же Господь твоими молитвами безбедно в мире сем ходити нам до скончания жития нашего, во время же разлучения нашего от жизни сея дух наш ангелы Своими святыми в покаянии и мире милостивно да приимет, яко да от мрачных и злоковарных и лютых духов демонских на воздусе прошедше невозбранно, к Нему непостыдно предстанем, и поклонимся, и безсмертныя и блаженныя жизни сподобимся со всеми святыми во веки веков.

Также молятся святому мученику Трифону (см. «О прогнании лукавых духов от человека», с. 639).