Текст книги "Исцеление святыми местами"

Молитва четвертая

О великий угодниче Христов, страстотерпче и врачу многомилостивый, Пантелеимоне! Умилосердися надо мною, грешным рабом, услыши стенание и вопль мой, умилостиви небеснаго, верховнаго Врача душ и телес наших, Христа Бога нашего, да дарует ми исцеление от гнетущаго мя недуга. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи елеем милости твоея и исцели мя: да, здрав сый душею и телом, остаток дний моих, благодатию Божиею, возмогу провести в покаянии и угождении Богу и сподоблюся восприяти благий конец живота моего. Ей, угодниче Божий! Умоли Христа Бога, да предстательством твоим дарует ми здравие телу и спасение души моей. Аминь.

Акафист святому великомученику и целителю Пантелеимону

Во всякой болезни

Кондак 1

Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих: радуйся, великомучениче и целителю Пантелеимоне.

Икос 1

Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на небо, идеже со Ангелы и всеми святыми предстоя Престолу Господа Славы, молися о нас, земных, почитающих тя звании сими:

Радуйся, светлосте благочестия; радуйся, преславный светильниче Церкве.

Радуйся, мучеников пречестных украшение; радуйся, верных в непоколебимом терпении утверждение.

Радуйся, юности преизрядная похвало; радуйся, поборниче Христов, в мужестве неодоленный.

Радуйся, произрастший в мире, премирен явивыйся; радуйся, Ангеле во плоти, превосходяй смертных.

Радуйся, небожителю всеблаженный; радуйся, Божественнаго разума вместилище.

Радуйся, имже вера возвысися; радуйся, имже прелесть низложися.

Радуйся, великомучениче и целителю Пантелеимоне.

Кондак 2

Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.

Икос 2

Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Темже похваляюще дерзновение твое, глаголем ти сице:

Радуйся, угрозы Максимиана презревый; радуйся, советом нечестивых не покоривыйся.

Радуйся, насаждение истиннаго Богопочитания; радуйся, искоренение демонского служения.

Радуйся, неистовства мучителей изобличителю; радуйся, идольския прелести низложителю.

Радуйся, разгнавый нечестивых сборища; радуйся, пременивый тленная на небесная.

Радуйся, собеседниче невещественных Ангелов; радуйся, сликовствователю многострадальных святых.

Радуйся, имже сатана посрамися; радуйся, имже Христос прославися.

Радуйся, великомучениче и целителю Пантелеимоне.

Кондак 3

Силою Вышняго, дарованною тебе, и крепким терпением твоим обезсилил еси мучителеву дерзость, мужественный победоносче; огня, зверей и колеса не убоявся и мечем усечен во главу, венец победы приял еси от Христа Бога, взывая Ему: Аллилуиа.

Икос 3

Имущи обитель твоя вседрагую главу твою, богомудре страстотерпче, яко превеликое сокровище, радости исполняется о сем и, любовию воспевающи данную тебе от Бога благодать исцелений, благодарно зовет ти:

Радуйся, Никомидии светильниче всесветлый; радуйся, чтущей тя обители страже неусыпный.

Радуйся, имже охладе безбожие; радуйся, имже возрасте богопознание.

Радуйся, светлая страстотерпцев славо; радуйся, радостное православных слышание.

Радуйся, исцелений благодатный источниче; радуйся, дарований великих вместилище.

Радуйся, благовонное миро, облагоухающее души; радуйся, яко помогаеши призывающим тя.

Радуйся, слепым зрение даровавый; радуйся, хромым благошествие устроивый.

Радуйся, великомучениче и целителю Пантелеимоне.

Кондак 4

Бурею помышлений многобожия одержим, нечестивый царь смутися, уведев от завиствовавших тебе врачев, яко всякие неисцельные недуги целиши ты Именем Христа. Мы же, с веселием славяще дивнаго в тебе Бога, вопием Ему: Аллилуиа.

Икос 4

Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и приемлюще скорая исцеления от всяких болезней, прославляху Бога и тебе величаху, всемилостиваго целителя своего, зовуще ти:

Радуйся, помазанный миром благодати; радуйся, храме Бога освященный. Радуйся, великая благочестивых славо; радуйся, твердая озлобляемых стено. Радуйся, мудрых превосходяй разумом; радуйся, верных осияваяй мысли. Радуйся, Божественных даров приятелище и многообразных нам милостей Господних источниче; радуйся, скорый помощниче страждущим. Радуйся, обуреваемых пристанище; радуйся, заблуждших наставниче. Радуйся, болящих туне врачуяй; радуйся, обильно исцеления источаяй. Радуйся, великомучениче и целителю Пантелеимоне.

Кондак 5

Чудо преславное сотвори тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызенно умершее отроча по молитве твоей ко Христу абие оживе и воста здраво. Познав убо Жизнодавца всех истиннаго Бога, с твердою верою воззвал еси Ему: Аллилуиа.

Икос 5

Узре свет слепый, емуже с призыванием Имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси.

Сего ради тебе, славному угоднику Божию и чудному врачу, взываем:

Радуйся, к Богу велие рачение имеяй; радуйся, присногорящий огню Божественныя любве.

Радуйся, деятельный послушателю священных поучений Ермолая; радуйся, последовавый советам матере твоея Еввулы.

Радуйся, яко вся раздал еси, да Христа приобрящеши; радуйся, любовь к миру любовию Божией победивый.

Радуйся, яко вместо сладких мира за Христа лютая страдания приял еси; радуйся, яко общник сотворился еси Страстем Христовым.

Радуйся, восторжествовавый над всеми стастьми; радуйся, украсивыйся благодатным безстрастием.

Радуйся, исполняяй радости притекающия к тебе; радуйся, туне исцеляяй всех благодатию Христовою.

Радуйся, великомучениче и целителю Пантелеимоне.

Кондак 6

Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда света истиннаго Христа, просвещающа всякаго человека, нечестиваго же царя и боги языческия укорив, чрез мечное усечение взыде к Немерцающему Свету на небеси пети Богу: Аллилуиа.

Икос 6

С светлым лицем представ судилищу цареву, дерзновенно взывал еси, преблаженне, во услышание всех: "Всецелебная сила моя и слава Христос есть истинный Бог, Владыка всех, мертвыя воскрешаяй и всяк недуг отгоняяй". За таковое исповедание ублажающе тя, глаголем:

Радуйся, уста громогласная Божества Христова; радуйся, языче медоточивый, вещаяй Его домостроительство.

Радуйся, ветие превысшаго Богословия; радуйся, сеятелю мудрый благочестия.

Радуйся, сладкозвучная веры свирель; радуйся, славный проповедниче Православия.

Радуйся, прежде смерти явивый дивная; радуйся, по смерти совершаяй чудная.

Радуйся, зрителю славы Христовой; радуйся, послушателю молящихся тебе.

Радуйся, подателю милости тоя требующим; радуйся, ходатаю благ почитающим память твою.

Радуйся, великомучениче и целителю Пантелеимоне.

Кондак 7

Миро излияся на душу твою, богомудрый целебниче, от Утешителя Духа; темже по смерти честныя мощи твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.

Икос 7

Егда узреша идольстии чтители многолетна расслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо нещадно, за Христа стружему и опаляему бывшу, со умилением зовем:

Радуйся, наслаждения земная презревый; радуйся, благ вещественных превысший.

Радуйся, яко вся красная мира сего нивочтоже вменил еси; радуйся, яко славу скоротекущую с себе отрясл еси.

Радуйся, неуловим пребывый ловлений Велиара; радуйся, победивый мучителей коварства.

Радуйся, не пощадивый за Христа жизни своея; радуйся, явивыйся врагом враждебныя плоти.

Радуйся, многобожия широту утеснивый; радуйся, Божественною силою идолы поправый.

Радуйся, острейшая стрело, язвящая враги; радуйся, предстателю заступаяй верующия.

Радуйся, великомучениче и целителю Пантелеимоне.

Кондак 8

Страннолепно являшеся тебе Господь, ободряя и соблюдая в мучениях за имя Его: во образе бо пресвитера Ермолая, клокочущее олово, в неже ввержен был еси, охлади, и в мори отрешив велий камень от выи твоея, изведе неврежденна на землю. Ты же паки представ пред царя, торжественне пел еси Христу Богу: Аллилуиа.

Икос 8

Весь умне на небеси водворяяся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая:

Радуйся, премудрости Божественныя исполненный; радуйся, промышления Божия о нас таинниче.

Радуйся, богомудренных умов услаждение; радуйся, боголюбивых душ увеселение.

Радуйся, пресветлый Христов бисере; радуйся, освященный душею и телом.

Радуйся, во дворех перворожденных на небеси вселивыйся; радуйся, в присноблаженных обитаяй чертозех.

Радуйся, света Троическаго зрителю; радуйся, в молитвах к Богу теплый о нас предстателю.

Радуйся, просвещение душам подаваяй; радуйся, скорбящим утешение ниспосылаяй.

Радуйся, великомучениче и целителю Пантелеимоне.

Кондак 9

Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.

Икос 9

Ветия многовещанныя не возмогут по достоянию восхвалити борения твоя, славный добропобедниче, како непобедимою силою Божиею юный леты победи древняго исконнаго врага и посрами идольскую прелесть. Мы же удивления исполненнии зовем ти:

Радуйся, радостное зрелище Ангелов; радуйся, благоговейное удивление человеков.

Радуйся, кровь за Христа излиявый и в смерти млеко источивый; радуйся, тело за Него мученической смерти предавый.

Радуйся, исповедничества правило; радуйся, доблий воине Царя царей.

Радуйся, тьмы державца победивый; радуйся победою твоею небесных и земных обвеселивый.

Радуйся, горняго мира обитателю блаженный; радуйся, дольняго мира мудрый странниче.

Радуйся, древо, украшенное плодами благодатных дарований; радуйся, носяй добропобедныя ветви.

Радуйся, великомучениче и целителю Пантелеимоне.

Кондак 10

Сострадания исполнен, яко истинный подражатель подателя милости Господа, честный страдальче, Пантелеимоном (си есть, всемилостивым) от Него преименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.

Икос 10

Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо непобедимому страстотерпцу зовем:

Радуйся, честное Христово избрание; радуйся, непорочное Богови благоухание.

Радуйся, твердый адаманте Церкве; радуйся, непоколебимый столпе, досязаяй до небесе.

Радуйся, звери видимыя укрощаяй; радуйся, драконов невидимых сокрушаяй.

Радуйся, обагренный твоею за Христа кровию, срастворенною млеком; радуйся, неувядаемыя приемый венцы.

Радуйся, радость причинивый Ангелом и человеком; радуйся, прославленный Богом на небеси и на земли.

Радуйся, небожителю, ликовствуяй с мученики; радуйся, насыщаяйся лицезрением Христа пресладким.

Радуйся, великомучениче и целителю Пантелеимоне.

Кондак 11

Песнь исходную приносим твоему за Христа заколению священному, в немже вместе с кровию млеко истече от тебе, великомучениче, и маслиничина, под неюже усечен был еси, исполнися вся целительных плодов. Темже Христу, дивно прославляющему славящие Его, тепле вопием: Аллилуиа.

Икос 11

Светозарная луча был еси, богомудре, во тьме многобожия сидящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим:

Радуйся, пресветлая звездо, на мысленней тверди блистающая; радуйся, луче, христоименитым людем светящая.

Радуйся, таинственно облиставаемый от Солнца Христа; радуйся, умне землю обтекаяй. Радуйся, селение красное Пресвятаго Духа; радуйся, сосуде пречестный, изливаяй исцеления.

Радуйся, чистоты сокровище; радуйся, милости тезоимените.

Радуйся, Царствия Небеснаго наследниче; радуйся, вечныя славы сопричастниче.

Радуйся, предстателю бедствующим в мори житейстем; радуйся, безсребренниче, помогаяй призывающим тя с верою.

Радуйся, великомучениче и целителю Пантелеимоне.

Кондак 12

Благодати обилие приял еси, треблаженне, по обилию любве твоея ко Христу Богу, иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.

Икос 12

Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем:

Радуйся, благочестия трубо благозвучная; радуйся, мечу, посекаяй нечестие.

Радуйся, строганный на древе за Распростершаго руце Свои на древе крестнем; радуйся, яко опаляем за Него, прелести пещь погасил еси.

Радуйся, язвами твоими враги уязвивый; радуйся, кровию твоею токи идольския крове изсушивый.

Радуйся, в кипящее олово вверженный за Христа; радуйся, погруженный за имя Его в водах морских.

Радуйся, промышлением Божиим неврежден в сих пребывый; радуйся, яко чрез огнь и воду мучений вшел еси в покой небесный.

Радуйся, изливаяй неизсякаемыя струи милости верным; радуйся, благосострадательный врачу, исцеления благодатныя подаваяй.

Радуйся, великомучениче и целителю Пантелеимоне.

Кондак 13

О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых, и вечнаго мучения избавитися нам Господа умоли, да во Царствии Его выну воспеваем: Аллилуия.

Этот кондак читается трижды, затем 1-й икос «Ангела земнаго…» и 1-й кондак «Избранный страстотерпче…»

Молитва

О великий Христов угодниче и преславный целебниче, великомучениче Пантелеимоне!

Душею на небеси Престолу Божию предстояй и Триипостасныя Его славы наслаждаяйся, телом же и ликом святым на земли в Божественных храмех почиваяй и данною ти свыше благодатию различныя источаяй чудеса, призри милостивным твоим оком на предстоящия люди, честней твоей иконе умильно молящияся и просящия от тебе целебныя помощи и заступления; простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе ходатая милостива ко Владыце и молитвенника за ны грешныя призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас недостойных молящихся тебе и твоея помощи требующих. Буди нам в печалех утешитель, в недузех лютых страждущим врач, напаствуемым скорый покровитель, очесем недугующим прозрения датель, ссущим и младенцем в болезнех готовейший предстатель и исцелитель: исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих источника и дароподателя Бога, Единаго в Троице Святей славимаго Отца и Сына и Святаго Духа, ныне и присно и во веки веков. Аминь.

Так же о здравии своем и своих близких православные верующие возносят молитвы перед образом святой Мученицы Параскевы, нареченной Пятница:

Тропарь, глас 4-й: Премудрая и всехвальная Христова мученица Параскева, мужескую крепость приемши, женскую же немощь отвергши, диавола победи, и мучителя посрами, вопиющи и глаголющи: приидите, тело мое мечем ссецыте и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.

Кондак, глас 3-й: Всесвятое и непорочное мучение принесши, яко вино пречестное, безсмертному Жениху Христу, ангельское ликостояние возвеселила еси и победила еси демонския козни: сего ради тя честно верою чтим, мученице Параскево, многострадальная.

Молитва: О, святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице, идольския льсти обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная!

Молим тя, святая мученице: буди о нас печальница ко Христу Богу, Егоже преблаженнейшим зрением присно веселишися; моли Всемилостиваго, Иже словом очи слепым отверзе, да избавит нас от болезни очес наших, телесных вкупе и душевных, разжени твоими святыми молитвами темный мрак прибывший от грехов наших, испроси у Отца света благодати душевным и телесным очесем нашим, просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О, великая угоднице Божия! О, мужественнейшая дево! О, крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощни есмы. Моли Господа, чистая девице, моли Милосердаго, святая мученице, моли Жениха твоего; непорочная Христова невесто, да твоими молитвами пособствовани, мрака же греховнаго избывше, во свете истинныя веры и деяний Божественных внидем во свет вечный дне невечерняго, во град веселия приснаго, в немже ты ныне светло блистаеши славою и веселием безконечным, славословящи и воспевающи со всеми Небесными Силами Трисвятительное Единое Божество, Отца и Сына и Святаго Духа, ныне и присно и во веки веков. Аминь.

Много молитв о здравии обращены к Пророку, Предтече и Крестителю Господню Иоанну.

Тропарь, глас 2-й: Память праведного с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Тем же за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость

Кондак, глас 5-й: Предтечево славное усекновение, смотрение бысть некое Божественное, да и сущим во аде Спасово проповесть пришествие; да рыдает убо Иродиа, беззаконное убийство испросивши: не закон бо Божий, ни живый век возлюби, но притворный, привременный.

Молитва: Крестителю Христов, проповедниче покаяния, кающагося не презри мене, но совокупляяся с вои небесными, молися ко Владыце за мене недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего: аз бо есмь вертеп злых дел, отнюдь не имеяй конца греховному обычаю; пригвожден бо есть ум мой земным вещем. Что сотворю, не вем, и к кому прибегну, да спасена будет душа моя? Токмо к тебе, святый Иоанне, благодати тезоимените, яко тя пред Господем, по Богородице, вем больша быти рожденных всех, ибо ты сподобился есй коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, падшагося многими грехи; обнови душу мою покаянием, яко вторым крещением, понеже обоего начальник еси: крещением омываяй грех, покаяние же проповедуяй во очищение коегождо дел скверных; очисти мя грехми оскверненнаго и понуди внити, аможе ничтоже скверно входит, во Царствие Небесное. Аминь.

Святителю Алексию, митрополиту Московскому, всея Руси чудотворцу

Тропарь, глас 8-й: Яко Апостолом сопрестольна и врача предобра, и служителя благоприятна, к раце твоей честней притекающе, святителю Алексие, богомудре чудотворче, сошедшеся любовию в память твою, светло празднуем, в песнех и пениих радующеся и Христа славяще, таковую благодать тебе даровавшаго исцелений и граду твоему великое утверждение.

Кондак, глас 8-й: Божественнаго и пречестнаго святителя Христова, новаго чудотворца Алексия. верно вси поюще, людие, любовию да ублажим, яко пастыря великаго, служителя же и учителя премудра земли Российстей: днесь в память его притекше, радостно возопием песнь Богоносному, яко имея дерзновение к Богу, многообразных нас избави обстояний, да зовем ти: радуйся, утверждение граду нашему.

Молитва: О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у Престола всех Царя и наслаждаяся света Единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко всемилостивому Владыце, молися паствы Христовы спасти люди, единородный ти язык: благостояние святых церквей утверди; архиереи благолепием святительства украси; монашествующия к подвигом добраго течения укрепи; царствующий град (сей и святую обитель сию) и вся грады и страны добре сохрани, и веру святую непорочну соблюсти умоли; мир весь предстательством твоим умири, от глада и пагубы избави ны, и от нападения иноплеменных сохрани; старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели и везде тепле призывающих тя и с верою притекающих к раце честных и многоцелебных мощей твоих, усердно припадающих и молящихся тебе; от всяких напастей и бед ходатайством твоим свободи, да зовем ти: богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райский, всезлатая уста слова, московская похвало, всея России украшение! Моли о нас Всещедраго и Человеколюбиваго Христа, Бога нашего, да в день страшнаго пришествия Его шуияго стояния избавит нас, и радости святых причастники сотворит со всеми святыми во веки. Аминь.

Священномученику Антипе, епископу Пергамскому

Тропарь, глас 4-й: И нравом причастник, и престолом наместник апостолом быв, деяние обрел еси, богодухновение, в видения восход: сего ради слово истины исправляя, веры ради пострадал еси даже до крове, священномучениче Антипо, моли Христа Бога спастися душам нашим.

Кондак, глас 4-й: Апостолов сопрестольник и святителей украшение был еси, блаженне. Мученически прославився, возсиял еси. Якоже солнце, всех просвещая, Антипо священне, разрушил еси безбожия нощь глубокую. Сего ради тя почитаем, яко Божественнаго суща священномученика и целеб подателя.

Молитва: О, преславный священномучениче Антипо и скорый помощниче христианом в болезнех! Верую от всея души и помышления, яко дадеся тебе от Господа дар болящия врачевати и разслабленныя укрепляти, сего ради к тебе, яко благодатному врачу болезней, аз немощный (или немощная) прибегаю и, твой досточтимый образ со благоговением лобызая (или лобызающи), молюся: твоим предстательством у Царя Небеснаго испроси мне болящему (или болящей) исцеление от удручающия мя зубныя болезни, аще бо и недостоин (или недостойна) есмь тебе благостнейшаго отца и приснаго заступника моего: но ты, быв подражатель человеколюбия Божия, сотвори мя достойна (или достойну) твоего заступления чрез мое обращение от злых дел к благому житию: уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако тихое и безмолвное житие пожив (или поживши) во всяком благочестии и чистоте, сподоблюся со всеми святыми славити Всесвятое имя Отца и Сына и Святаго Духа. Аминь. Первоверховному апостолу Петру

Тропарь, глас 4-й: Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость.

Кондак, глас 2-й: Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой; болезни бо онех и смерть приял еси паже всякого бесплодия. Едине сведый сердечная.

Молитва: О, святый Петре, великий апостоле, самовидче и сотаинниче Божий, всемощною десницею Учителя твоего из вод волнующихся приятый и от конечнаго потопления свободивыйся! Не забуди и нас убогих, в тине греховней погрязших и волнами житейскаго моря обуреваемых: подаждь нам твою руку крепкую, помози нам и удержи нас от потопления во страстех, похотех, лжах и клеветах. Сотвори и ты с нами милость, тебе от Господа явленную, да не в сомнении и маловерии изгибнем. Научи нас, учителю наш, проливати слезы покаяния, да плачем горько о деяниих наших в веце сем. И аще твоя слезы, в покаянии излиянныя, милостию Своею покры Господь и Учитель твой, испроси и нам, со дерзновением апостольским, прощения во гресе ежечаснаго, от Христа отреченныя злыми помыслы и делы нашими. Да тихое и безмолвное житие поживем в веце сем до часа, в оньже имать призвати нас века Господь, наш Судия нелицеприятный. Ты же, о всехвальный апостоле, не отвержи вопля нашего и стенаний к тебе, но заступи нас пред Христом твоим Учителем, да непрестанно славим Его милосердие к нам, со Отцем и Святым Духом, во веки веков. Аминь.

Традиционно женщины в своих хворях просят помощи у преподобного Давида Гареджийского

Тропарь, глас 8-й: В тебе, отче, известно спасеся еже по образу: приим бо Крест последовал еси Христу, и дея учил еси презирати убо плоть, преходит бо, прележати же о души, вещи бессмертней. Темже и со ангелы срадуется, преподобне Давиде, дух твой.

Кондак (из акафиста): О, великий богоугодниче и чудотворче, блаженнейший авва Давиде Гареджели! Гора еси ты небесная, и се мы, долу преклоненные и удаленные от тебе грехми нашими, но душею и сердцем прилепленные тебе, возсылаем со дерзновением сие малое хвалебное пение. Приими воздыхания наша и умоли, милосерде, всех Творца помиловати и спасти ны от огня геенскаго и прещения по грехам нам достойнаго, наипаче же по велицей милости Его наследовати Царствия Небеснаго, идеже выну благодаряще воспевати: Аллилуиа.

Молитва: О, всесветле, богохвальне авва Давиде, святче Божий! Ты силою благаго законоположения явился еси нам, конями лукавого связанных и обуреваемых, яко наставник в покаянии и помощник в молитве. Того ради дано тебе множество даров благодати и чудотворения, разрешения грех наших и прегрешений оставление, болезней исцеление и диавольских наветов отгнание. Темже твоею отеческою милостию в богоцарственном разумении, многотрудными молитвами и моленьми твоими, наипаче же непрестанным твоим заступлением о нас, да восставит Господь Бог ны, во грех впадшия, силою Своею непобедимою на всякого видимого и невидимого врага, дабы благодаряще совершая святую память твою, желанием возжелали мы поклонятися Превечному Богу в Троице Единому, Отцу и Сыну и Святому Духу, ныне и присно и во веки веков. Аминь.

Священномученику Ипатию, епископу Гангрскому

Тропарь, глас 4-й: Изволением Божественнаго разума / вперив ум свой в Небесныя обители / и равно Ангелом житие пожив на земли, / сего ради мучения красоты венец на своем версе утвердив, / священномучениче Ипатие, / моли Христа Бога / спастися душам нашим.

Другой тропарь, глас 3-й: В прекрасном Церкве Апостольския вертограде из юна возраста всесильною десницею Божиею насадился еси, богоблаженне отче Ипатие, и в ней, яко верен превосвященник, верно Богоначальное и Всетворящее Троическое Единство проповедал еси во вселенском Собрании, Духа же святаго в добродетелех исполнен быв, велия чудеса сотворив, мучением за веру Христову скончався, пришел еси в Небесный град, идеже Трипостасного Бога зря, моли о чествующих тя, да в Горнем Иерусалиме со святыми жити сподобимся.

Кондак, глас 2-й: Римскому отечеству светильник, богозарными лучами концы светя, ныне просвети твое празднество поющия, Ипатие, прося свыше мира и грехов оставления, молитвами защити ны, Ипатие многострадальне.

Другой кондак, глас 2-й: Обитель Триипостасного Божества, достоблаженне отче Ипатие, быв во вселенную Всетворца Бога воскликнул еси. Благодарственне же чудодействуя, вшел еси в Небесныя обители, тамо моли Всесвятую Троицу, молим тя, исцели телеса и души наша в богосозданную нашу красоту.

Молитва: Трисолнечного Света светозарная звездо, вводящая в мир Трисолнечный Свет апостольскими твоими, богоевангельскаго проповедания священноучении, священномучениче, иерарше Христов, Богоблаженне Ипатие. Ты приял еси от Святые Троицы равноапостольную благодать, серафимскую в горечестии к Богу любовь, яко же верховнейший апостолов Петр, и херувимскую многоочитую во учении премудрость, яко же вторый Павел. Просветивый премудрым твоим благочестия учением тьмочисленныя народы, присноусердно подражая всемирнаго Учителя, Господа Бога и Спаса нашего Иисуса Христа. Его же ради всесмиренно молю богоподражательное отеческое твое благоутробие: призри милостивно богосветлыми очима твоима на сущее недостоинство мое, яко всечадолюбивый по Бозе отец, и присноусердный нашего спасения наставниче, и всех в Горних правонеизменный строитель, адамантная Православию стена и пресветлый столп, вводящий второноваго Израиля во всепросветлейший Горний Сион. Потщися вскоре помоществовати на бранех воинству нашему. Проси же присно у Святыя Троицы всем православным христианом мира и тишины, душевного спасения и многолетняго в телеси здравия, воздуха благорастворения, земли благоплодия, неплодствующим благочадия, и в законе Господнем воспитания, и всех благих умножения. А после жития коемуждо жизни сея сподоби святыми твоими молитвами улучити христианскую кончину благу, непостыдну и мирну, со всепреподобнейшим исповеданием и со причастием Святых Бессмертных Небесных и Животворяхцих Христовых Тайн, и с молитвомаслием беспрепятное воздушных мытарств прошествие, наследие со святыми всерадостныя присносущныя жизни, в ней же купно со ангельскими чинми непрестанныя хвалы вознесем Отцу со Единородным Его Сыном и с Пресвятым, Благим и Животворящим Его Духом, и тебе, великое твое отеческое милостивое заступление, ныне, и присно, и во веки веков. Аминь. Cвятому преподобному Иринарху, затворнику Ростовскому