Текст книги "Помощь небесных покровителей. Полный сборник молитв на каждый день года (зима)"

Величаем вас, святии апостоли, весь мир ученьми своими просветившия и вся концы ко Христу приведшия.

5/18 января

Навечерие Богоявления (Крещенский сочельник). День постный.

Возвращашеся иногда Иордан река милотию Елиссеевою, вознесшуся Илии, и разделяхуся воды сюду и сюду, и бысть ему сух путь, иже мокрый, во образ воистину Крещения, имже мы текущее жития преходим шествие. Христос явися во Иордане освятити воды.

Во струях днесь Иорданских быв Господь, Иоанну вопиет: не убойся крестити Мя, спасти бо приидох Адама первозданнаго.

Всех, Христе, Благоутробне, отемляй прегрешений множество, милости ради безмерныя, Иорданскими водами креститися грядеши, яко Человек, одеждею мя одевая, славы древния обнажена люте.

Боже и Господи сил и всея твари Содетелю, Иже за милосердие безприкладныя милости Твоея Единороднаго Сына Твоего, Господа нашего Иисуса Христа, низпославый на спасение рода нашего, и честным Его Крестом рукописание грех наших растерзавый, и победивый тем начала и власти тьмы, Сам, Владыко Человеколюбче, приими и нас, грешных, благодарственныя сия и молебныя молитвы и избави нас от всякаго всегубительнаго и мрачнаго прегрешения и всех, озлобити нас ищущих, видимых и невидимых враг. Пригвозди страху Твоему плоти наша и не уклони сердец наших во словеса или помышления лукавствия, но любовию Твоею уязви души наша, да к Тебе всегда взирающе и еже от Тебе светом наставляеми, Тебе, Неприступнаго и Присносущнаго зряще Света, непрестанное Тебе исповедание и благодарение возсылаем, Безначальному Отцу со Единородным Твоим Сыном, и Всесвятым, и Благим, и Животворящим Твоим Духом, ныне, и присно, и во веки веков. Аминь.

Владыко Господи, Иисусе Христе, Боже наш, долготерпевый о наших согрешениих и даже до нынешняго часа приведый нас, воньже, на Животворящем Древе вися, благоразумному разбойнику иже в рай путесотворил еси вход и смертию смерть разрушил еси, очисти нас, грешных и недостойных раб Твоих, согрешихом бо и беззаконновахом и несмы достойни возвести очеса наша и воззрети на высоту Небесную, зане оставихом путь правды Твоея и ходихом в волях сердец наших. Но молим Твою безмерную благость: пощади нас, Господи, по множеству милости Твоея и спаси нас имене Твоего ради Святаго, яко исчезоша в суете дние наши. Изми нас из руки сопротивнаго, и остави нам грехи наша, и умертви плотское наше мудрование, да ветхаго отложивше человека, в новаго облецемся и Тебе поживем, нашему Владыце и Благодетелю, и тако, Твоим последующе повелением, в вечный покой достигнем, идеже есть всех веселящихся жилище. Ты бо еси воистинну истинное веселие и радость любящих Тя, Христе Боже наш, и Тебе славу возсылаем со Безначальным Твоим Отцем и Пресвятым, и Благим, и Животворящим Твоим Духом, ныне, и присно, и во веки веков. Аминь.

6/19 января

Святое Богоявление.

Крещение Господа Бога и Спаса нашего Иисуса Христа.

Преставление преподобного Лаврентия Черниговского (1950).

Двунадесятый праздник.

Господи Иисусе Христе, Сыне Божий Единородный, от Отца прежде всех век рожденный, Свете от Света, просвещаяй всяческая, в последняя же лета от Пресвятыя Девы Марии нетленно воплощенный и в мир сей на спасение наше пришедый! Ты бо не потерпел еси видети от диавола мучима рода человеча и сего ради в пресветлый день Богоявления Твоего пришел еси на Иордан ко грешником и мытарем креститися от Иоанна, бегрешен сый, да исполниши всякую правду и да возьмеши в водах Иорданских грехи всего мира, яко Агнец Божий, во еже понести я на Себе и искупити Крещением крестным, пречистою Кровию Твоею. Сего ради погрузившуся Тебе в водах, отверзошася Тебе небеса, Адамом заключенная, и Дух Святый сниде на Тя в виде голубине, просвещение и обожение носяй естеству нашему, и Пребожественный Отец Твой возвети Тебе небесным гласом благоволение Свое, зане сотворил еси волю Его и человек грехи восприял еси и Себе на заклание уже предуготовал еси, якоже Сам рекл еси: «Сего ради любит Мя Отец, яко Аз душу Мою полагаю, да паки прииму ю», и тако во всесветлый день сей, Ты, Господи, положил еси начало искупления нашего от грехопадения прародительскаго. Сего ради вся силы небесныя радуются и вся тварь веселится, чающе свобождение свое от работы истления, глаголюще: Прииде просвещение, благодать явися, избавление наста, мир просветися и людие радостию исполняются. Да веселится ныне небо и земля и мир весь да играет; реки да плещут; источницы и озера, бездны и моря да срадуются, яко Божественным Крещением освятися днесь естество их. Да радуются днесь и пеловеков собори, яко естество их взыде ныне паки к первому благородию и вси с радостию да поют: Богоявления время. Приидите мысленно на Иордан, видение велие в нем узрим: Христос ко Крещению грядет. Христос ко Иордану приходит. Христос наши в воде погребает грехи. Христос овча похищеннаго и заблуждшаго приходит искати и обрет е вводит в рай.

Сего Божественнаго таинства воспоминание празднующе, усердно молимся Тебе, Человеколюбче Господи: сподоби нам жаждущим по гласу Твоему приити к Тебе, Источнику присноживотныя воды, да почерпем воду благодати Твоея и оставления грехов наших и да отвергшеся нечестия и мирских похотей, целомудренно и девственно, и праведно и благочестно поживем в нынешнем веце, ждуще блаженнаго упования и явления славы Твоея, Великаго Бога и Спаса нашего, да не от дел наших спасеши нас, но по Твоей милости и по обновлению Святаго Духа Твоего банею пакибытия, Егоже обильно излиял еси, да оправдившеся благодатию Его, наследницы будем вечныя жизни во Царствии Твоем, идеже со всеми святыми сподоби нам прославити всесвятое имя Твое со Безначальным Твоим Отцем и со Пресвятым и Благим и Животворящим Твоим Духом ныне и присно и во веки веков. Аминь.

Господи Иисусе Христе, Единородный Сыне, Сый в недре Отчи, истинный Боже, Источниче Жизни и безсмертия, Свете от Света, пришедый в мир, еже просветити его, озари нашу мысль Святым Твоим Духом, приими нас, величество и благодарение Тебе приносящих о яже от века дивных Твоих великодействиих и еже в последния веки спасительном Твоем смотрении, в немже в наше немощное и нищее одеявся смешение и работным мерам снизшедый, Иже всех Царю, еще и рабскою рукою во Иордане креститися претерпел еси, да, водное естество освятив, Безгрешне, путесотвориши нам еже водою и Духом паки рождение и к первому нас устроиши свобождению. Егоже Божественнаго таинства воспоминание празднующе, молимся Тебе, Владыко Человеколюбче, воскропи и на ны, недостойныя рабы Твоя, по Божественному Твоему обещанию воду чисту, Твоего благоутробия дар, во еже над водою сею прошению нас, грешных, благоприятну быти Твоею благостию и благословению Твоему ей, нам же и всем верным людем Твоим дароватися в славу Святаго и покланяемаго Твоего имене. Яко подобает Тебе всякая слава, честь и поклонение со Безначальным Твоим Отцем и Пресвятым, и Благим, и Животворящим Твоим Духом, ныне, и присно, и во веки веков. Аминь.

Велий еси, Господи, и чудна дела Твоя, и ни едино же слово довольно будет к пению чудес Твоих.

Ты бо хотением от не сущих во еже быти приведый всяческая, и Твоею державою содержиши тварь, и Твоим промыслом строиши мир, Ты, от четырех стихий тварь сочинивый, четырми времены круг лета венчал еси. Тебе трепещут умныя вся силы, Тебе поет солнце, Тебе славит луна, Тебе присутствуют звезды, Тебе слушает свет, Тебе трепещут бездны, Тебе работают источницы. Ты простерл еси небо, яко кожу, Ты утвердил еси землю на водах, Ты оградил еси море песком, Ты ко отдыханием воздух пролиял еси. Ангельския силы Тебе служат, Архангельстии лицы Тебе кланяются, многоочитии Херувими и шестокрилатии Серафими, окрест стояще и облетающе, страхом неприступныя славы Твоея покрываются. Ты бо, Бог Сый Неописанный, Безначальный же и Неизглаголанный, пришел еси на землю, зрак раба приим, в подобии человечестем быв, не бо терпел еси, Владыко, милосердия ради милости Твоея зрети от диавола мучима рода человеча, но пришел еси и спасл еси нас. Исповедуем благодать, проповедуем милость, не таим благодеяния: естества нашего роды свободил еси, девственную освятил еси утробу рождеством Твоим. Вся тварь воспевает Тя, явльшагося: Ты бо, Бог наш, на земли явился еси и с человеки пожил еси, Ты Иорданския струи освятил еси, с Небесе низпославый Святаго Твоего Духа, и главы тамо гнездящихся сокрушил еси змиев.

Ты убо, Человеколюбче Царю, прииди и ныне наитием Святаго Твоего Духа и освяти воду сию.

И даждь ей благодать избавления, благословение Иорданово, сотвори ю нетления источник, освящения дар, грехов разрешение, недугов исцеление, демонов всегубительство, сопротивным силам неприступную, Ангельския крепости исполненную, да вси, почерпающии и причащающиися, имеют ю ко очищению душ и телес, ко исцелению страстей, ко освящению домов и ко всякой пользе изрядну. Ты бо еси Бог наш, Иже водою и Духом обновивый обетшавшее грехом естество наше. Ты еси Бог наш, водою потопивый при Нои грех. Ты еси Бог наш, Иже морем свободивый от работы фараони Моисеом род еврейский. Ты бо еси Бог наш, разразивый камень в пустыни, и потекоша воды, и потоцы наводнишася, и жаждущия люди Твоя насытивый. Ты еси Бог наш, Иже водою и огнем пременивый Илиею Израиля от прелести Вааловы.

Сам и ныне, Владыко, освяти воду сию Духом Твоим Святым.

Даждь же всем, прикасающимся ей, и причащающимся, и мажущимся ею, освящение, здравие, очищение и благословение.

И сохрани нас под кровом Твоим в мире, покори всякаго врага и супостата, даруй вся, яже ко спасению прошения, и жизнь вечную, да и стихиями, и человеки, и Ангелы, и видимыми, и невидимыми славится Твое Пресвятое имя, со Отцем и Святым Духом, ныне, и присно, и во веки веков. Аминь.

Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя, и Дух в виде голубине, извествоваше словесе утверждение. Явлейся, Христе Боже, и мир просвещей, слава Тебе.

Явился еси днесь вселенней, и свет Твой, Господи, знаменася на нас, в разуме поющих Тя: пришел еси, и явился еси, Свет непреступный.

Величаем Тя, Живодавче Христе, нас ради ныне плотию крестившагося от Иоанна в водах Иорданских.

Величай, душе моя, Честнейшую горних воинств, Деву Пречистую Богородицу.

Недоумеет всяк язык благохвалити по достоянию, изумевает же ум и премирный пети Тя, Богородице, обаче, Благая сущи, веру приими, ибо любовь веси Божественную нашу: Ты бо христиан еси Предстательница, Тя величаем.

О всехвальный отче Лаврентие, приими сие малое моление, от нас грешных тебе приносимое, и призри милостивно с высот небесных на нас, просящих твоего ходатайства у престола Пресвятыя Троицы, да подаст твоими молитвами мир и благоденствие стране нашей, пастырем силу в молитве, иноком подкрепление на пути совершенства, в подвизех смирения и послушания, вдовицам и сиротам заступление, немощным подкрепление, недугующим духом и душею от бесов избавление, больным исцеление, путешествующим ангела хранителя. Всем чтущим с любовию память твою веру искреннюю и непоколебимую. И по преставлении в жизнь вечную приведи нас ко Христу твоими молитвами, да с тобою прославляем Святую Троицу: Отца и Сына и Святаго Духа, всегда, ныне и присно, и во веки веков. Аминь.

От юности Христа возлюбил еси, и Тому тесным путем последуя, сосуд избран Духа Святаго быв, дар чудотворения и прозрения восприим, сего ради в невечернем свете Пресвятыя Троицы присно радуяся, поминай чад твоих, Лаврентие, преподобне отче наш.

Мир оставив, чистоту ангельскую стяжав и мирови любовию послужив, отче наш Лаврентие, помощь благодатную с верою приходящим обильно являя, тем же и в премирная селения достойно вселився, телом нетленным с нами пребывая и, утверждая нас в Православней вере отцев наших, душею светозарною Подателю мира молишися даровати нам мир и велию милость.

Ублажаем тя, преподобне отче Лаврентие, и чтим святую память твою, наставниче монахов и собеседниче Ангелов.

7/20 января

Попразднство Богоявления.

Собор Предтечи и Крестителя Господня Иоанна.

С этого дня по 14 января (ст. ст.) – попразднество Богоявления.

Крестителю Христов, проповедниче покаяния, кающагося не презри мене, но совокупляяся с вои небесными, молися ко Владыце за мене недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего: аз бо есмь вертеп злых дел, отнюд не имеяй конца греховному обычаю; пригвожден бо есть ум мой земным вещем: что сотворю, не вем. И к кому прибегну, да спасена будет душа моя? Токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ибо ты сподобился еси коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний Пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю: не отрини мене от твоего заступления, но возстави мя падшагося многими грехи; обнови душу мою покаянием, яко вторым крещением, понеже обоего начальник еси: крещением омываяй прародительный грех, покаянием же очищаяй коегождо дело скверно; очисти мя грехами оскверненнаго и понуди внити, аможе ничтоже скверно входит, во Царствие Небесное. Аминь.

Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас недостойных рабов, унылых, немощных, во многия грехи впадших. Смерти убо чаем, о гресех же наших николиже поболехом и о Царствии Небеснем не попекохомся; но не презри нас, Крестителю Христов, честный Предтече, болий рожденных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отрини нас просящих твоего заступления, обнови душы наша покаянием, еже есть второе крещение: твоим ходатайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матере, Владычицы нашея Богородицы, спаси нас грешных рабов Твоих, кающихся о гресех. Ты бо еси Бог кающихся, и на Тя Спасителя возлагаем надежду, славяще пречистое имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков. Аминь.

Крестителю Христов, честный Предтече, крайний Пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя падшагося многими грехи; обнови душу мою покаянием, яко вторым крещением; очисти мя, грехми оскверненнаго, и понуди внити, аможе ничтоже скверно входит, во Царствие Небесное. Аминь.

Предтече и Крестителю Христов Иоанне, проповедниче покаяния! Ты неповинне всажден был еси в темницу: аз же, вверженный в злоключение сие, достойное по делом моим приемлю, яко преступник правды и закона. Всели в мое сердце чувство покаяния о гресех моих! Несть бо ни единыя злобы, ни беззакония, ихже аз, окаянный, не содеях; престрашни греси мои. Учителю правды! Научи мя право глаголати о мне самем пред судиями. Не преставаяй и в темнице обличати беззаконнаго Ирода, даруй ми, да наипаче зде обличает мене совесть моя, да от обличений ея не возмогу на долзе времени утаити мое преступление. Аще же осужден буду понести наказание, даруй ми быти терпеливу, якоже ты сам терпеливно несл еси усекновение главы твоея, желанное от Иродиады. Ей, Крестителю Христов! Простри ми, рабу твоему, руку, крестившую Христа Спасителя моего, да мя извлечеши из глубины погибели. Ты бо еси больший всех в рожденных женами, ты еси первый по Богородице, праведник между человеки. Сего ради прибегаю к тебе аз, имеяй потребу в велицем ходатае, яко велик есмь грешник. Убо и да осенит мене, недостойнаго, благодать твоя, Предтече Господень. Аминь.

Память праведнаго с похвалами, тебе же довлеет свидетельство Господне, Предтече: показал бо ся еси воистину и пророков честнейший, яко и в струях крестити сподобился еси Проповеданнаго. Темже за истину пострадав, радуяся, благовестил еси и сущим во аде Бога, явльшагося плотию, вземлющаго грех мира и подающаго нам велию милость.

Плотскаго Твоего пришествия убоявся, Иордан страхом возвращашеся, пророческое же служение исполняя, Иоанн трепетом спряташеся, ангельстии чини ужасахуся, зряще Тя во струях плотию крещаема, и вси сущии во тьме озаряхуся, воспевающе Тя, явлыпагося и просветившаго вся.

Величаем тя, Предтече Спасов Иоанне, и почитаем вси всечестный собор твой.

Святый великий Иоанне Предтече Господень, моли Бога о нас.

Иоанну Предтече и Крестителю Господню молятся об избавлении от головной боли, при освящении пчельника, за детей, о покровительстве посевам и о плодородии.

8/21 января

Преподобного Паисия Угличского (1504).

О преподобне отче наш Паисие! Не забуди убо нас, чад своих, Богом дарованную ти паству, юже ты сам собрал еси. Без твоей бо помощи ничтоже можем благо сотворити, но, в дому пребывающе Пречистыя Богородицы, во ограде твоей, надеемся Богу угодити. Отче святый, соблюди нас твоими молитвами и заступи нас от находящих зол, да, твоими молитвами соблюдаемы, Царствия Небеснаго сподобимся о Христе Иисусе, Господе нашем. Емуже слава со Отцем и Пресвятым, и Благим, и Животворящим Его Духом, ныне, и присно, и во веки веков. Аминь.

Христовы ради любве отечество и род оставил еси, и, ангельскому житию поревновав, в пустыню вселился еси, в нейже многотрудное житие явил еси и чудес дарования от Бога приял еси, Паисие преподобне, моли Христа Бога спастися душам нашим.

Христовы ради любве отечество и род оставил еси и, ангельскому житию поревновав, духовному отцу твоему, преподобному Макарию, подражатель быв, града Углеча достигл еси и близ того при водах в пустыню, ангелом показанную, вселился еси, и обитель прекрасну Матери Божией воздвигл еси, и множество монахов собрал еси, имже и наставник ко спасению быв, и чудес дарования от Бога приял еси, Паисие преподобне, моли Христа Бога спастися душам нашим.

Слез твоих теченьми пустыни безплодное возделал еси и, иже из глубины воздыханьми, во сто трудов уплодоносил еси, и был еси светильник вселенней, сияя чудесы, Паисие, отче наш, моли Христа Бога спастися душам нашим.

Чистотою душевною божественно вооружився и непрестанныя молитвы, яко копие, имый, крепко ссекл еси бесовское ополчение, Паисие, отче наш, моли непрестанно о всех нас.

Украшен добродетельми, преподобие Паисие Богодухновенне, Церкве Христовы красота был еси, подвиги бо иноческими украси ю, блаженне. Темже молим тя: молися ко Господу сподобити нас от всякия брани борителя, вопиющих ти: радуйся, отче преблаженне.

Ублажаем тя, преподобне отче Паисие, и чтим святую память твою, наставниче монахов и собеседниче Ангелов.

9/22 января

Мученика Полиевкта (259).

Святителя Филиппа, митрополита Московского и всея России, чудотворца (1569).

Воспоминание труса (землетрясения), бывшего в Сигме (869).

О Полиевкте, преславный мучениче! Ни мало мучителей не устрашившись, со дерзновением Христа проповедал и безстрашно во исповедании Его пребывал еси. Ни льстивым утехам и обольщениям не покорившись, ни твоея супруги муками и плачем не разжалобившись, ни друга своего ни послушав, от Христа не отрекся, но во главу за Него усечен был еси. Сего ради молим тя, святый мучениче, помози нам свято сохранять обеты наши пред лицем Господа Бога нашего. И еще просим тя, умилосердись над нами, поспешая на помощь нам и наказуя нарушителей святых клятв, имиже клялись нам ближние в делах житейских, ибо, имя Господне всуе призвавши, не исполнили они обетов своих. От коварства их страдая, прибегаем к тебе, святый мучениче, но не до конца наказуяй их, милостивно вразуми, исправь и на совершение даваемых клятв обрати их, и нас бедствующих утешь, славне Полиевкте, да все вкупе спасаемыя, восхвалим Бога, Отца, и Сына, и Святаго Духа, во веки веков. Аминь.