Текст книги "Помощь небесных покровителей. Полный сборник молитв на каждый день года (зима)"

Блаженств Христовых причастницы, честнаго супружества и попечения о чадех добрый образе, праведнии Кирилле и Марие, плод благочестия, Сергия преподобнаго нам явившии, с нимже усердно молите Господа низпослати нам дух любве и смиренномудрия, да в мире и единомыслии прославим Троицу Единосущную.

Днесь, вернии, сошедшеся, восхвалим двоицу блаженную, благовернаго Кирилла и Марию добронравную, тыя бо молятся вкупе со возлюбленным сыном своим, преподобным Сергием, ко Единому во Святей Троице Богу отечество наше в правоверии утвердити, домы миром оградити, юныя от напастей и соблазнов избавити, старость укрепити и спасти души наша.

Ублажаем вас, преподобнии Кирилле и Марие, и чтим святую память вашу, наставницы монахов и собеседницы Ангелов.

О преблагий великий угодниче, праведный Афанасие! Услыши мя грешнаго, молящагося тебе и призывающаго имя твое святое. Виждь мя убогаго, в толицей беде погружаема: виждь мя немощнаго, отвсюду уловляема и всякаго блага лишена и умом от малодушия помрачена. Потщися, святче Божий, плененнаго мя свободити, не остави мя грешнаго врагом в радость быти и в лукавых моих деяниих умрети: моли о мне грешнем и блуднем, и Содетеля моего, Владыку и Господа, Емуже ты со безплотными лики предстоиши, милостива ко мне сотвори в нынешнем веце и в будущем, да не воздаст по делом моим злым и по нечистоте сердца моего, но по Своей благости да воздаст ми. Се аз на твое предстательство уповаю, и тобою хвалюся, и имя твое святое на помощь призываю, и к цельбоносному твоему гробу припадаю: избави мя, светильниче Христов, от злых бед находящих на мя, и возстающия волны укроти, да не обымет мя напасть, и не погрязну в пучине глубоцей и в тимении греховнем: моли, праведный Афанасие, даровати мне грешному от Господа Бога милость во веки веков. Аминь.

Владыко Человеколюбче, Царю Небесный, Господи Иисусе Христе, Боже наш! Услыши нас грешных, молящихся Тебе, и помилуй, и даруй нам сего праведнаго угодника Твоего Афанасия славити и на помощь призывати, образу его святому покланяющимся и ко святому гробу его с верою припадающим. О предивный в чудесех, святый и праведный Афанасие! Молися Христу Богу о нас грешных, и помилуй вся приходящия и на помощь в скорбех тя призывающия, и буди нам помощник и исцелитель скор, и даруй нам здравие неоскудно и помощь Его премногу: буди наставник сиротам и вдовицам, и всем подаждь яже ко спасению прошения, сохрани и соблюди от всех зол и болезней и навет вражиих: и тако, престолу Господню предстоя, моли непрестанно о нас грешных Христа Бога нашего. Яко Тому подобает всякая слава, честь и поклонение и велелепие, со Отцем и Святым Духом, ныне и присно и во веки веков. Аминь.

Божественною благодатию просветився, и по смерти даруеши исцеления притекающим к раце мощей твоих, премудре Афанасие. Темже и мы ныне чтим честных мощей твоих явление, веселяще вкупе души и телеса. Тем вси вопием: слава Давшему ти крепость, слава Венчавшему тя, слава Действующему тобою всем исцеления.

Вышния красоты желая, нижния сласти телесныя тощно оставил еси, нестяжанием суетнаго мира, ангельское житие преходя, скончався Афанасие, блаженне; с нимиже Христа Бога моли непрестанно о всех нас.

Ублажаем тя, святый праведный Афанасие, и чтим святую память твою, ты бо молиши за нас Христа Бога нашего.

О преподобне и богоносне отче наш Афанасие, ангеле земный и человече небесный, изрядный угодниче Христов, и Владычицы нашея Богородицы добрый чтителю, всем же, с верою и любовию к тебе притекающим, известный заступниче! Испроси нам вся к житию сему временному потребная и к вечному нашему спасению полезная. Пособствуй предстательством твоим, угодниче Божий, православным христианом, на враги видимыя и невидимыя, да в мире глубоце пребудет Святая Церковь Христова, и царство Российское во всяком благочестии и благостроении нерушимо да сохранится. Сице же и всем нам, чудотворче святый, буди скорый во всякой скорби и обстоянии помощник, наипаче же в час кончины нашея явися нам заступник благосердый, да не предани будем на мытарствах воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный, просиявый зарею благодати Божия, украшение сый места сего! Не престани моляся, да николиже благодать Божия и покров Богоматере от места сего отступит, но да сподобимся вкупе с тобою и со всеми святыми в селениих райских славити величие, благодать и милость Единаго в Троице Бога, Отца и Сына и Святаго Духа, во веки веков. Аминь.

19 января/1 февраля

Обретение мощей преподобного Саввы Сторожевского, Звенигородского (1652).

Преподобного Макария Великого, Египетского (390–391).

Преподобного Макария Александрийского или Римского, соподвижника Макария Египетского (394–395).

Преподобного Макария Римлянина, Новгородского (XVI–XVII).

Блаженного Феодора, Христа ради юродивого, Новгородского (1392).

Перенесение мощей святителя Григория Богослова из Арианда в Константинополь (950).

О пречестная и священная главо, небеснаго Иерусалима гражданине, Пресвятыя Троицы обиталище, преподобне отче Савво! Велие имея дерзновение ко Всемилостивому Владыце, молися о стаде ограды твоея и о всех, по духу, чадех твоих: не премолчи вопия за ны ко Господу и не презри верою и любовию чтущих тя. Испроси, предстательством твоим, у Царя царствующих мир Церкви, под знаменем Креста воинствующей: архиереом святительства благолепие, монашествующим доброе в подвизех течение, святей обители сей, граду сему и всем градом и странам охранение, миру безмятежие и мир, глада и пагубы избавление, старым и немощным утешение и подкрепление, юным и младенцем благое в вере возрастание, в евангельском учении твердое обучение и в чистоте и целомудрии пребывание, вдовицам и сиротам милость и заступление, плененным отраду и возвращение, болящим исцеление, согрешающим дух сокрушения, бедствующим и всем, благодатной помощи требующим, благовременную помощь. Не посрами нас, к тебе с верою притекающих: споспешествуй яко чадолюбивый отец чадом, и нам понести иго Христово во благодушии и терпении: и всех управи в мире и покаянии скончати живот свой непостыдно и преселитися, со упованием, во обители Небесныя, идеже ты, по трудех и подвизех, ныне водворяешися со ангелы и святыми, зря и прославляя Бога, в Троице славимаго, Отца и Сына и Святаго Духа. Аминь.

О честная главо, преподобне и богоблаженне отче наш Савво! Не престай молитву творя к Человеколюбцу Богу о стаде твоем, еже от души возлюбил еси и о немже труды многи и поты и болезни претерпел еси. Ты веси отвсюду належащий нам страх, веси и непременную бесовскую на ны рать, веси телесное стужение и злолютство, веси усердия нашего неможение. Сего ради молим тя: якоже в труднем сем и многоболезненнем житии твоем братию зело возлюбил еси и наставник неусыпен ей был еси ко спасению, тако и ныне престолу Божию предстоя, поминай ны чада твоя, яко да избавит нас Господь от тьмы страстей и всякаго обдержания лукавых бесов и злых человек. Помяни, преподобне отче, и мене убогаго раба твоего (имярек), да молитвами твоими в день страшнаго прещения Милостиваго Судию обрящу, Господа нашего Иисуса Христа, Емуже слава и держава, со Отцем и с Пресвятым Духом, ныне и присно и во веки веков. Аминь.

Пустыни явился еси доброе прозябение, преподобне: от юности бо изволил еси чистое житие, духовному твоему учителю последуя, и того учением ум к Небесным вперив, и стаду твоему премудр наставник показался еси, тем и Христос, яко пресветла тя светильника, чудесы обогати, Савво, отче наш, моли спастися душам нашим.

От юности Божественною распаляем ревностию, возлюбил еси чистое житие, презрев мира сего красная и суетная, последовал еси твоему Богомудрому учителю, преблаженному Сергию, в труде и бдении, в посте и подвизе: на Сторожи явлься безмолвия ради и стражи духовныя недремленным на Божественней стражи предстоянием стяжал еси ум, зряй к Богу, и демонския козни и обстояния прозираяй, озарение Пресвятаго Духа в себе восприем, яко звезда пресветлая еси верным. Темже и премудр и светозарен предстоятель и пастырь стаду твоему явился еси, светом твоим просвещай и всех, приходящих к тебе верою, отче наш Савво, и моли Христа Бога, да спасет души наша.

Безмолвия ради и плоти распинания вселивыйся на горе Сторожи, явился еси, преподобне Савво, столп веры непоколебимый, от Пресвятаго Духа осиянный, обитель пречестная Троицы, и непрестанными молитвами, слезными воздыхании и подвигами благодати Божественныя сопричастник; темже и Христос в нетлении мощей твоих прослави тя, и даром чудес украси тя. Мы же радостно ти вопием: радуйся, Савво, великий чудотворче.

Господним желанием распалився, страсти плотския воздержанием оттряс, Божественнаго света незаходимое светило явился еси, чудес лучами всех просвещаеши, притекающих к раце мощей твоих, Савво, преподобне отче наш.

Ублажаем тя, преподобне отче Савво, и чтим святую память твою, наставниче монахов и собеседниче Ангелов.

О преподобне отче Макарие! Молим тя мы, недостойныя, испроси предстательством твоим у Всемилостиваго Бога нашего нам здравие душевное и телесное, тихое и богоугодное житие и добрый ответ на страшнем суде Христове. Угаси молитвами твоими разжжены стрелы диаволькия, да не прикоснется нам злоба греховная, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

Боже, очисти мя грешнаго, яко николиже сотворих благое пред Тобою; но избави мя от лукаваго, и да будет во мне воля Твоя, да неосужденно отверзу уста моя недостойная и восхвалю имя Твое святое, Отца и Сына и Святаго Духа, ныне и присно и во веки веков. Аминь.

Господи, Иже многою Твоею благостию и великими щедротами Твоими дал еси мне, рабу Твоему, мимошедшее время нощи сея без напасти прейти от всякаго зла противна; Ты Сам, Владыко, всяческих Творче, сподоби мя истинным Твоим светом и просвещенным сердцем творити волю Твою, ныне и присно и во веки веков. Аминь.

Пустынный житель, и во плоти ангел, и чудотворец явился еси, Богоносе отче наш Макарие, постом, бдением, молитвою Небесная дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

В дому Господь воздержания воистину тя положи, якоже звезду непрелестную, световодящу концы, отче отцев, Макарие преподобне.

Блаженную жизнь скончав в житии с мученическими лики, в земли кротких достойно водворяешися, Богоносне Макарие, и пустыню, якоже град, населив, благодать приял еси от Бога чудес, темже тя почитаем.

Ублажаем тя, преподобне отче Макарие, и чтим святую память твою, наставниче монахов и собеседниче Ангелов.

Преподобному Макарию Великому, Египетскому, молятся о прогнании лукавых духов.

О священная главо, земный ангеле и небесный человече, преподобне и богоносне отче наш Макарие! Припадаем ти с верою и любовию и молимся прилежно: яви нам, смиренным и грешным, святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе, молитвенника благоприятнаго, к Нему предлагаем и просим тя со усердием многим: испроси нам у благости Его благопотребныя дары душам и телесем нашим: веру праву, надежду спасения несомненну, любовь ко всем нелицемерну, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на Страшнем Суде Христове. Не забуди, преподобне отче, и пустынное место подвигов твоих, но благоволи о нем и прослави е чудотворении твоими; и всех, приходящих на поклонение мощем твоим святым, от искушений диавольских и всякаго зла милостивно избави. Ей, чудотворче святый! Не лиши нас помощи твоея небесныя, но молитвами твоими вся бы приведи во пристанище спасения, и наследники яви нас всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь.

Пустынный житель и во плоти ангел, и чудотворец явился еси, богоносне отче наш Макарие, постом, бдением, молитвою небесныя дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

Чистотою душевною божественне вооружився, и непрестанныя молитвы яко копие вручив крепко, пробол еси бесовская ополчения, Макарие, отче наш, моли непрестанно о всех нас.

Ублажаем тя, преподобне отче Макарие, и чтим святую память твою, наставниче монахов и собеседниче Ангелов.

Преподобному Макарию Александрийскому молятся об исцелении бесноватых.

О священная главо, земный Ангеле и Небесный человече, преподобне и Богоносне отче наш Макарие! Припадаем ти с верою и любовию и молимся прилежно: яви нам, смиренным и грешным, святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем и просим тя со усердием многим: испроси нам у благости Его благопотребныя дары душам и телесем нашим: веру праву, надежду спасения несомненну, любовь ко всем нелицемерну, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на страшнем суде Христове. Испроси, угодниче Божий, у Царя царствующих и Господа господствующих стране нашей мир, тишину и благостроение, не забуди, преподобне отче, и пустынное место подвигов твоих, но благоволи о нем и прослави е чудотворении твоими; и всех, приходящих на поклонение мощем твоим святым, от искушений диавольских и всякаго зла милостивно избави. Ей, чудотворче святый! Не лиши нас помощи твоея Небесныя, но молитвами твоими вся ны приведи во пристанище спасения и наследники яви нас всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь.

Рим, отечество твое, оставив, в пустыню вселился еси, и тамо, в пусте месте, обрет жилище себе, отбегл еси суеты мира сего, и в безмолвнем пристанищи добре направлял еси себе ко Господу. Сего ради и мы, чтущии тя, притекающе, молим тя, отче Макарие: моли о нас Господа, да помилует нас в день судный.

Отечество твое, ветхий Рим, оставив, во страну Российскую пришел еси, преподобне, и в пустыни блатней вселився, тамо пристанище тихое ко спасению обрел еси и безмолвное житие благоугодно провождал еси, направляя себя ко Господу молитвами непрестанными. Сего ради Христос тя возлюби и чудесы прослави, отче Макарие, явив тя пастыря добра словеснаго стада Своего. Темже и мы, притекающе к тебе, умильно глаголем: моли Прославльшаго тя спастися душам нашим.

От Рима возсиял еси, якоже звезда пресветлая, преподобие отче наш Макарие, и, в пустыни вселився, просветил еси чистым житием твоим верно притекающия к тебе. Темже и мы, прославляюще светлую память твою, вопием ти: радуйся, преподобне отче Макарие.

Якоже пресветлая звезда, от Рима возсиял еси, преподобие, и, Богом наставляемь, Российскую страну светом чудес твоих озарил еси духовно, созывая верныя к мощем твоим, от нихже исцеления недужным подаеши. Темже молимся тебе: научи нас, отче, твоему Богоразумию и уврачуй недуги наша душевныя и телесныя, да зовем ти: радуйся, преподобне отче Макарие.

Ублажаем тя, преподобне отче Макарие, и чтим святую память твою, наставниче монахов и собеседниче Ангелов.

О преблаженный и всечестный Христов угодниче, великий Феодоре! Услыши нас грешных, молящихся тебе и честному твоему образу покланяющихся и ко священней твоей раце притекающих. Призри милостивым оком на предстоящия честней твоей раце люди и просящия сильныя твоея помощи, и, яко имеяй дерзновение ко Господу, испроси у Него всем нам мир, Церкви благостояние, воздуха благорастворение и земли плодоносие. Избави же всех, верою несумненною к Богу приходящих, от всяких бед: буди печальным утешитель, недугующим врач, напаствуюмым помощник, нагим покровитель, вдовицам защитник, странствующим путевождь, и исходатайствуй нам вся ко спасению прощения. Моли Святую Троицу за ны многогрешныя, да твоими благоприятными молитвами получим благая душам и телесем нашим, ныне и присно и во веки веков. Аминь.

Православно проповедав, изяснил еси догматы, Бога милостива сотвори, и сего ради во юродство претворися, и шибание велие сотворил еси, и снег, и зной приим на своем телеси, по преставлении же своем даеши многа исцеления с верою приходящим к раце мощей твоих. Сего ради вопием ти, Феодоре блаженне, моли Христа Бога непрестанно о всех нас.

Иже на земли Христа ради в буйство преложився, мира сего красоты отнюдь возненавидев, плотская взыграния увядив, от дождя и снега и прочия воздушныя тягости никогда же уклонился еси, от ненаказанных человек поругание, радуяся, претерпел еси, подобяся Творцу своему и вопия: Господи, не постави им греха сего, душу же предочистив, яко злато в горниле, темже Христос прият ю, и яко светозарную звезду к Своей славе причастну содела. Темже ныне, преблаженне Феодоре, предстоя Святей Троице, моли Христа Бога за град же и люди, почитающия любовию пречестную память твою.

Иже на земли Христа ради волею в буйство преложився, мира сего красоты отнюд возненавидел еси и, плотская играния увядив постом и жаждею и на земли леганием, от зноя же и студени, от дождя и снега и от прочия воздушныя тягости никогдаже уклонился еси, душу же очистил еси добродетельми, яко злато в горниле, отче преблаженне Феодоре, и ныне на Небесех предстоиши престолу Пресвятыя Троицы, но яко имея дерзновение многое, моли Христа Бога спастися душам нашим.

Яко злато в горниле, Феодоре блаженне, мира сего красоту отнюд возненавидев, плоть свою зноем и жаждою увядил еси и от прочия воздушныя тягости никогда же уклонился еси, и сего ради волею в юродство претворися, Феодоре блаженне.

Вышния красоты желая, нижняя сладости и телесное одеяние тощно оставил еси, нестяжание паче суетнаго мира возлюбил еси, ангелом житие проходя, блаженне Феодоре, с нимиже Христа Бога моли непрестанно о всех нас.

Величаем тя, святый праведный Феодоре, и чтим святую память твою, ты бо молиши за нас Христа Бога нашего.

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Григорие! Предстоя у престола всех Царя и наслаждаяся света Единосущныя Троицы и херувимски со Ангелы возглашая песнь трисвятую, великое и неизследованное дерзновение имея ко Всемилостивому Владыце, молися паствы Христовы спасти людей, благостояние святых церквей утверди: архиереи благолепием святительства украси, монашествующих к подвигам добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немоществующия исцели, и везде тепле призывающих тя и с верою притекающих к тебе и усердно припадающих и молящихся от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день страшнаго пришествия Его шуияго стояния избавит нас и радости святых причастники сотворит со всеми святыми во веки. Аминь.