Текст книги "Помощь небесных покровителей. Полный сборник молитв на каждый день года (зима)"

О великий угодниче Божий и Богоприимче Симеоне! Предстоя престолу Великаго Царя и Бога нашего Иисуса Христа, велие дерзновение имаши к Нему, во обятиих твоих нашего ради спасения носитися изволившему. К тебе убо, яко многомощному предстателю и крепкому о нас молитвеннику, прибегаем мы, грешнии и недостойнии. Моли благость Его, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире живот наш, и во всем благом благое поспешение испроси, вся яже к животу и благочестию потребная нам даруя. Якоже древле Великий Новград явлением чудотворныя иконы твоея от губительства смертнаго избавил еси, тако и ныне нас и вся грады и веси страны нашея от всяких напастей и бед и напрасныя смерти предстательством твоим избави, и от всех враг видимых и невидимых покровом твоим защити. Яко да тихое и безмолвное житие поживем во всяком благочестии и чистоте и, тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает со Отцем и Пресвятым Его Духом, ныне и присно и во веки веков. Аминь.

О великий угодниче Божий и Богоприимче Симеоне! Услыши нас грешных, молящихся тебе и ко святей иконе твоей припадающих, и множества ради грехов наших не отими покров твой святый от обители, в нейже от лет древних многими знаменьми и чудесы прославися святая сия и чудотворная икона твоя, но соблюди ю тверду и непоколебиму от всех враг видимых и невидимых, и от всех напастей и бед невредиму сохрани. Буди помощник благий всем благочестно живущим и добре труждающимся в ней, и избави нас от недугов и глада, от потопления и огня, от напрасныя смерти и смертоносныя язвы и от всякаго зла. Отжени от нас мысленнаго волка губителя, ищуща пожрати и во ад свести души наша, огради нас от искушений и соблазнов мирских и от развлечений суетных и душевредных. Утверди сердца наша в смирении, кротости, послушании, безмолвии, воздержании, терпении, непамятозлобии и любви, яже о Христе Иисусе, Господе нашем, и во всяцем деле блазе и подвизех иноческих укрепи. Упаси убо, яко пастырь добрый, на пажитех Христовых в мире вся словесныя овцы Христовы, во дворе твоем собранныя, яко да, благочестно поживше во обители на земли, с миром отидем во обители Небеснаго Царствия, идеже сонми праведных и святых купно с тобою непрестанно славят пресвятое и благословенное имя Отца и Сына и Святаго Духа, и ныне и присно и во веки веков. Аминь.

О великий угодниче Божий и Богоприимче Симеоне! Призри на мя грешнаго, ко святей иконе твоей припадающа и просяща твоего заступления и помощи. Скорбь бо обдержит мя от обстоящих мя ныне бед и зол, и утешения не имам многоболезненней душе моей. Исках бо помощи от человек, и не обретеся. Вопиях ко Господу, и не услыша мя, зане прогневах пречистую благость Его беззаконьми моими и множеством многих грехов моих преогорчих человеколюбную утробу Его. И кто ми ныне помощь явит? Кто ми скорбь утолит? Кто даст отраду и успокоение многомятежней душе моей? К тебе, великий угодниче Божий, прибегаю, грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих и твоего заступления и помощи требующих. Моли убо Человеколюбца Господа, яко да, простив ми безчисленная моя прегрешения, не отвратит милость Свою от мене, но, яко Благ и сострадателен, явит и мне безконечное Свое милосердие и в лютем напастей и бед моих озлоблении подаст ми всесильную помощь Свою и преогорченней души моей ослабу, мир, укрепление, утешение и успокоение дарует. Ей, великий угодниче Божий! Вознеси богоноснеи руце твои ко Иже на обятиих твоих носитися изволившему Христу Богу нашему, и моли благость Его, да не отринет моления сердца моего, недостоинства ради моего, но явит мне благовременне милость Свою, во славу безконечных щедрот Своих и многомощнаго предстательства твоего, о Немже подобает Ему всякая слава и благодарение купно со Отцем и Пресвятым Его Духом, ныне и присно и во веки веков. Аминь.

О Богоприимче Симеоне! Услыши нас, грешных раб Божиих (имена), и не отыми покров твой святый от нас, моли благость Господа, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире жизнь нашу и во всем благом благое поспешение испроси, вся к животу и благочестию потребная нам даруя, яко да тихое и безмолвное житие поживем во всяком благочестии и чистоте, и тако в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает, со Отцем и Пресвятым Его Духом, ныне и присно и во веки веков. Аминь.

Симеон старец днесь веселится, восприят на руку свою Младенца Превечнаго Бога, от уз плоти разрешитися прося и вопия: видеста очи мои спасение Твое мирови.

Старец днесь отрешитися от юз молящеся сего жития тленнаго, Христа восприят на руки, Зиждителя и Господа.

Величаем тя, святый праведный Симеоне Богоприимче, и чтим святую память твою, ты бо молиши о нас Христа Бога нашего.

Праведному Симеону Богоприимцу молятся о покровительстве детям, об исцелении и о сохранении здравия младенцев, об освобождении из плена.

О Всепетая Мати, Богородице Смоленская, Одигитрие. Ты еси привела равноапостольного святителя Николая во удаленныя пределы японския проповедати Евангелие Сына Твоего возлюбленнаго. Се исполнил той волю Твою, Владычице. Простри руку Твою благословляющую на рабы Твоя, чада им обращенныя, и на нас, во гресех пребывающих, да его молитвами сохраним Православную веру во веки веков. Аминь.

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святый святителю, равноапостольный Николае Японский. Предстоя у престола всех Царя и наслаждаяся света единосущныя Троицы и херувимски со ангелы возглашая песнь трисвятую, великое и неизследованное дерзновение имея ко всемилостивому Владыце, моли спастися обращенным тобою ко Христу, и всея паствы Христовой людем. Упроси Вышняго, страждущую страну Российскую от лютых безбожников и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, процветание Православия в стране нашей Российстей и в земли Японстей да утвердит; архиереи благолепием святительства да украсит, монашествующия к подвигам добраго течения да укрепит; царствующия грады и вся грады страны добре сохранит. О святителю предивный! Мир весь предстательством твоим умири: от глада, жажды, пагубы и крамолы избави ны, от стихий часто находящих на ны, грех ради наших многих, от тлетворных ветр, губительных язв и от нападения иноплеменных сохрани. Старые утеши, юные настави, безумныя умудри, вдовицы помилуй, сироты заступи, младенцы возрасти, плененныя и в темнице седящия свободи и возврати. Немощствующия исцели, плавающим буди добрый кормчий, и всех везде тепле призывающих тя и с верою притекающих к тебе, и усердно припадающих, и молящихся тебе от клеветы и всяких напастей, враг видимых и невидимых, бед и всякого зла твоим ходатайством свободи. Моли о нас Всещедраго и Человеколюбиваго Христа Бога нашего, да простит нам вся грехи, от юности соделанныя нами, и в день страшного пришествия Его от шуияго стояния избавит нас и радости святых причастники сотворит, да купно с ними славим Единого в Троице Бога, Отца и Сына и Святаго Духа, во веки веков. Аминь.

Апостолов единонравне и сопрестольне, служителю Христов верный и богомудрый, цевнице избранная Божественнаго Духа, сосуде преизливающийся любве Христовы, Японския земли просветителю, святый Николае, иерарше равноапостольне, молися Живоначальней Троице о всем твоем стаде и о всем мире.

Яко апостолом сопричастника в трудех и в возмездиих Церковь тя с любовию почитает, святителю отче Николае равноапостольне. Положив бо многими подвиги начало Православия в Японии язычестей, умножил еси в ней чада спасения, и по кончине прият тя Бог во обители апостол Своих по достоянию. Сего ради молим тя, молися Господеви пребыти и в предняя делу твоему незыблему на веки, и ввестися в лоно Церкве Православныя всем погибнути имущим, умиритися мирови и спастися душам нашим.

Странника и пришельца прият тя страна Японская, равноапостольне святителю Николае, в нейже исперва познал еси себе, яко чуждаго, обаче теплоту и свет Христов источая, прелагал еси враги твоя в сыны духовныя, имже раздая благодать Божию, созидал еси Церковь Христову, о нейже ныне молися, и тебе бо сынове ея и дщери взывают: радуйся, пастырю добрый наш.

Твердаго и боговещаннаго проповедателя Евангелия Твоего, Господи, возмездил еси боголепно, труды бо его и болезни приял еси паче всех жертв законных и всесожжений. Того молитвами соблюди нас от неприязни.

Величаем тя, равноапостольне Николае, и чтим болезни и труды твоя, имиже трудился еси во благовестии Христове.

О святый благоверный Романе!

Услыши нас, в час сей тебе моления и похвалы наша во смирении сердец наших приносящих и вопиющих таковая; радуйся, благоверных родителей пречестная отрасле; радуйся, князей Российских благовенчанная красото; радуйся, Божий избранниче; радуйся, сосуде Пресвятаго Духа; радуйся, яко и на земли чудесы твоими сияеши; радуйся, яко град твой Углич и живущия в нем люди от бед спасл еси; радуйся, земли Российстей забрало нерушимое и всем притекающим ко гробу твоему исцелений нескудное сокровище. Помолися убо, святый княже Романе, Владыце Христу Богу нашему, к Немуже многое дерзновение стяжал еси, да исцелит наша недуги душевныя и телесныя, да простит наша прегрешения вольная и невольная, да избавит от будущия вечныя муки, и Небеснаго Царствия да сподобит, идеже с тобою вкупе прославим Всесвятое имя Отца и Сына и Святаго Духа во веки веков. Аминь.

Измлада явился еси, богомудре Романе всеблаженне, Божественный сосуд избран Богови, и ныне точиши нам многая исцеления, и вся недуги потопляеши, и спаси град твой Углеч, и всех верных сохраняй от невидимых и видимых враг, верою, молим, блаженне Романе, моли Христа Бога спастися душам нашим.

От младенства явился еси, правоверный Романе, избран от Бога благочестия столп необорим, веру непорочну соблюл еси, молитвами и милостынею и постом Богу угодил еси; темже и по смерти явися светлость жития твоего, исцеляеши, бо недуги немощствующих, верою притекающих ко святому твоему гробу. Сего ради вопием ти: радуйся, угодниче Божий Романе, града Углеча похвало и утверждение.

Явися, яко звезда пресветлая, благоверный княже Романе, в Богом порученном ти граде Углече, в животе своем просветився воздержанием и всенощным стоянием, постом и молитвою и слезами, моляся ко Всемилостивому Спасу за град свой и за вся страны Русския земли, и по преставлении твоем источаеши исцеления неоскудно приходящим с верою, темже вопием ти: моли Христа Бога спастися душам нашим.

Скончав добрый подвиг, и веру соблюде в сердцы своем, и венец нетленный от Бога приял еси, блаженный Романе, и славе Его сподобился еси, и престолу предстал еси Спасову. Молися Господеви спасти град Углеч и вся грады от нашествия иноплеменных, и междоусобныя брани, и поганых, и, твое честное преставление почитающим, грехов оставление даровати, чтущим любовию святую память твою.

Красоту мира сего, княжение и славу, яко временно помышляя, и сего ради благочестно в мире пожил еси, блаженне княже Романе, милостынею и молитвами Богу угодив, и по преставлении своем чудес дар приим от Христа Бога и светильник явися пресветлый, просвещая своими чудесы, приходящим к тебе с верою здравие подаеши и от бед избавляеши. Темже Христова Церковь славит тя, благочестивый Романе, граду своему Углечу великий поборниче.

Яко многосветлая звезда, всепразднственная память твоя возсия днесь, благоверный княже Романе, созывающи к похвалению люди твоя, песньми славословити честное житие твое и верно торжествовати святое твое успение, в немже молися, святе, ко Христу Богу нашему, еже избавитися нам от всех наветов вражиих, да вси зовем ти: радуйся, Романе пребогате, новый Российский чудотворче.

Ублажаем тя, благоверный Романе, и чтим святую память твою, ты бо молиши за нас Христа Бога нашего.

О многострадальная Мати Божия, превышшая всех дщерей земли по чистоте Своей и по множеству страданий, Тобою на земли пренесенных! Приими многоолезненныя воздыхания наша и сохрани нас под кровом Твоея милости, инаго бо прибежища и теплаго предстательства, разве Тебе, не вемы, но, яко дерзновение имущи ко Иже от Тебе Рожденному, помози и спаси ны молитвами Своими, да непреткновенно достигнем Царствия Небеснаго, идеже со всеми святыми будем воспевати хвалу в Троице Единому Богу, всегда, ныне и присно и во веки веков. Аминь.

О многоскорбная Мати Божия, умягчение злых сердец и превышшая всех дщерей по чистоте Своей и по страданию, на земли Тобою пренесенному! Услыши воздыхания наша и умягчи сердца злых человек, восстающих на ны, и сохрани ны под кровом Твоея милости. Инаго бо прибежища и теплаго предстательства, разве Тебе, не вемы. Но, яко дерзновение имущи ко Иже от Тебе Рожденному, помози и спаси молитвами Своими, да непреткновнно достигнем Царствия Небеснаго, идеже со всеми святыми будем воспевати трисвятую песнь в Троице Единому Богу Всемогущему всегда, ныне и присно и во веки веков. Аминь.

О кто не ублажит Тя, Дево Благодатная, кто не воспоет Твое милосердие к роду человеческому. Тебе молимся, Тебя просим: не остави нас, во зле погибающих, раствори любовию сердца наша и ко врагам нашим пошли стрелу Свою, да уязвляет сердца наша миром к гонящим нас. Аще мир нас ненавидит – Ты простри любовь Свою к нам, аще мир нас гонит – Ты приими нас, подаждь нам Благодатную силу терпения – без ропота перенести испытания, в мире сем бываемая. О Госпоже! Умягчи сердца злых человеков, восстающих на нас, да не погибнут сердца их во зле, но умоли, Благодатная, Сына Твоего и Бога нашего, да умирит сердца их миром, диавол же – отец злобы – да посрамится! Мы же, воспевающе милосердие Твое к нам, злым, непотребным, воспоем Ти, о Пречудная Госпоже Дево Благодатная: услыши нас в час сей, сокрушенная сердца имущих, огради нас миром и любовию друг ко другу и ко врагом нашим, искорени от нас всякую злобу и вражду, да воспоем Тебе и Сыну Твоему, Господу Иисусу Христу нашему: Аллилуйя! Аллилуйя! Аллилуйя!

Умягчи наша злая сердца, Богородице, и напасти ненавидящих нас угаси, и всякую тесноту души нашея разреши, на Твой бо святый образ взирающе, Твоим страданием и милосердием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати Благосердная, в жестокосердии нашем и от жестокосердия ближних погибнути, Ты бо еси воистину злых сердец умягчение.

Восприимши души человеческия и утоливши злый совет, сокруши, Богомати Владычице, и разгони тьму прегрешений, и нас настави на путь смирения, яко да и мы будем во свете дел ходити, и Твоея иконы явлению торжествовати, и на помощь Твою уповати, и умильным гласом звати, Владычице, из глубины: помози, Едина Благословенная.

Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.

Око сердца моего смущает, и злый совет разоряет мя, сих сокруши, Дево Чистая, и не презри мое воздыхание, и супостаты на нас умягчи, Преблагословенная Владычице.

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Пред иконой Пресвятой Богородицы «Семистрелъная», или «Умягчение злых сердец», молятся об исцелении от холеры, хромоты и расслабления, об умиротворении враждующих и об умягчении злых сердец, при вражде или гонениях.

4/17 февраля

Благоверного великого князя Георгия (Юрия) Всеволодовича Владимирского (1238).

Преподобного Кирилла Новоезерского (Новгородского) (1532).

О богоизбранный чудотворче, преславный угодниче Христов, Церкве Православныя поборниче, царства Российскаго защитниче, великий княже Георгие! Преклоньше колена, молим тя, призри на ны грешныя, прибегающия к твоему заступлению, услыши сие малое моление наше и теплым твоим предстательством умоли милостиваго Бога, Емуже предстоиши с лики ангел и со всеми святыми, да сохранит нас в единении Православныя Церкве, и утвердит в сердцах наших дух правыя веры и благочестия и избавит нас от всякаго злаго искушения. По велицей любви твоей, еюже ближния твоя возлюбил еси, испроси у всещедраго Господа отечеству твоему, и нашему купно, мир и благоустроение; всем же нам недостойным, усердно к тебе припадающим, богоугодное и безмятежное житие. О святый заступниче наш, не остави нас, слабых и безпомощных, молися за ны ко Господу и Пречистей Владычице Богородице, подвигни с собою на молитву о нас богопрославленныя сродники твоя, святыя князи Андрея и Глеба, с нимиже вкупе зде на земли нетленными мощами почиваеши и на небеси у престола Царя Небеснаго предстоиши, да дарует Он, Всещедрый, вся нам, яже к пользе временней и вечней, потребная; да не воздаст нам по делом нашим, но по неизреченному человеколюбию Своему простит согрешения наша, да избавит нас от всякия нужды и печали, скорби и болезни; да ниспослет нам благое намерение и силу подвизатися в исправлении жития нашего и в будущем веце да сподобит нас внити в Царствие Небесное и славити Всесвятое имя Отца и Сына и Святаго Духа во веки веков. Аминь.

О всехвальный, святый, великий княже наш Георгие, создателю святаго Михаило-Архангельского храма, и сего града, благодарно нами обитаемаго, основателю! Взирающе на твой сей лик, от чудотворных мощей твоих к нам пришедший, и в нем самую часть страдальческаго твоего телесе очима нашима благоговейно зряще, мы недостойнии яко истиннаго самаго тя посреде себе зрим духовно. Темже с верою сердечною и любовию к тебе припадаем, и славим, и величаем яко избраннаго воеводы труды и подвиги твоя, сладце же вхождения и исхождения твоя по местом сим поминаем, ублажаем страдания твоя и смерть, юже за Христа и Церковь Его приял еси. Царие и святителие тя ублажиша: град твой и храм твой и вси храмы и обители града твоего о тебе радуются, и славныя воды, зде мимотекущия, тя и кои твоя носившия, о тебе веселятся. Благоговейно убо лик твой вси лобызаем, и в нем святыя мощи твоя почитаем, святую память твою прославляем и молим тя, да тобою подаст нам Господь вся потребная к вечному спасению нашему и ко благобытию временному, да сподобит же нас в мире и покаянии скончати жизнь нашу, и да упокоит пожившия во граде твоем и преставльшияся во всяком чине и возрасте. Тако купно со избранным небесных сил воеводою, святым архангелом Михаилом, и соименным тебе победоносцем, пособствуй, святый княже и страстотерпче Георгие, страну нашу, благосчестием и миром огради, христолюбивому воинству ее соратай непобедиму буди, град твой и жительство его избавляя от належащаго праведнаго прещения, губительства, огня, междоусобия; буди же в нем вдовицам и сирым воспитание и покров, юношам и чадом охранение, старчеству подпора, нищим утешение, всему священному чину и церковному причту защитник и помощник. О святый княже наш Георгие! Предстательством твоим благоустрояй согрешающим нам исправление и покаяние, кающимся грехов заглаждение, веры Православныя возрастание и утверждение, советов нечестивых, лжеучений и соблазнов множащихся разорение, лжи, льсти и коварства всякаго посрамление, во страсе Божии и во всякой добродетели испроси и низпосли преспеяние; да тако избавимся от гнева Божия и муки, и с тобою, яко чада со отцем, славим Пресвятую Троицу, Отца и Сына и Святаго Духа, во веки веков. Аминь.