Текст книги "Помощь небесных покровителей. Полный сборник молитв на каждый день года (зима)"

Жизнь вашу мученически совершивше, исповедания венцы украсившеся, к небесным востекосте, Михаиле премудре, с доблим Феодором, молите Христа Бога, сохранити Отечество наше, град же и люди, по велицей Его милости.

Блаженнии, апостолов равночестнии, прияли есте венец от Христа, занеже того достоини, Михаиле Богомудре и Феодоре дивне, мир мирови испросите и душам нашим велию милость.

Троичнаго Божества осиянием просветився, страстотерпче великий княже Михаиле, с премудрым болярином ти Феодором, самозванна к подвигом устремистася, сквозе огнь не идоста, кусту же и идолом не поклонистася, но оплеваста и нечестиваго царя обличиста, Христа же Единаго от Троицы Бога Суща исповедаста, и Того ради кровей своих струями обагристася, славная. Темже и венцы от Него победная прияста, и нас свыше назираста, молим вас, святыя, молите Того, яко да вашими молитвами избавит нас от всяких обстоящих ны зол и подаст нам вся благая, Иже Един Сый прославляемый во святых Своих.

Царство земное в ничтоже вменив, славу, яко преходящую, оставил еси, самозван пришед к подвигом, Троицу проповедал еси пред нечестивым мучителем, страстотерпче Михаиле, с доблим Феодором, Царю сил предстояще, молите без вреда сохранити Отечество наше, град же и люди, да вас непрестанно почитаем.

Верою укрепльшеся, святии, мучения претерпесте и кровьми своими погасисте пламень сопротивных безбожия, Христа же исповедасте, с Отцем и Духом, Михаиле и Феодоре, Его молите за всех нас.

Вышних ища, нижняя оставил еси, колесницу на небеса кровь свою сотворил еси, тем собеседниче первомучеником бысть, Михаиле и Феодоре, с нимиже Христа Бога моля непрестанно за вся ны.

Яко светило в Руси возсиявше, мучения лучами славными отразисте, страстотерпцы славнии, Михаиле и Феодоре, тем вопиясте: ничтоже нас отлучит от любве Христовы.

Величаем вас, страстотерпцы святии Михаиле и Феодоре, и чтим честная страдания ваша, яже за Христа претерпели есте.

Величаем тя, благоверный Михаиле, и с боярином твоим Феодором, и чтим святую память вашу, иже за Христа кровь свою излиясте, и ныне молите за нас Христа Бога нашего.

15/28 февраля

Виленской (перенесение в Вильно в 1495 году) иконы Божией Матери.

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и преклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене раба Твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайстом моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуся, Благодатная; радуйся, Обрадованная; радуйся, Преблагословенная; Господь с Тобою.

О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящияся Тебе, и сотвори предстательством Твоим и заступлением у Сына Твоего и Бога нашего, да никтоже отидет от места сего тощь упования своего и посрамлен в надежде своей, но да приимет кийждо от Тебе вся по благому изволению сердца своего, по нужде и потребе своей, во спасение души и здравие телу. Моли, милосердая Владычице, пренебеснаго Бога, да присно Церковь Свою святую соблюдет, вышним Своим благословением архиереи наша православныя укрепит, миром оградит, и святей Своей Церкви целых, здравых, честных, долгоденствующих и право правящих слово Своея истины дарует, от всех же видимых и невидимых враг, со всеми православными христианы, милостивно избавит, и во Православии и твердей вере до конца веков непоступно и неизменно сохранит. Призирай благосердием, Всепетая, и призрением милостиваго Твоего заступления на все царство наше всероссийское, царствующия грады наша и град сей, святую обитель сию, храм сей и духовный вертоград зде сущий, и на сия богатыя Твоя милости неоскудно изливай, Ты бо еси всесильная помощница и заступница всех нас. Приклонися к молитвам и всех раб Твоих, ко святей иконе Твоей зде притекающих, услыши воздыхания и гласы, имиже раби Твои молятся на святем месте сем. Аще же и иноверный и иноплеменник, зде преходя, помолится, услыши, чадолюбивая Госпоже, и сего человеколюбне, и милостивно соделай, яже к помощи ему и ко спасению. Ожесточенныя же и разсеянныя сердцы своими во странах наших на путь истины настави: отпадшия от благочестивыя веры обрати и паки святей Православней Кафоличестей Церкви сопричти. В домех людей Твоих и во братии святыя обители сея мир огради и соблюди, в юных братство и смиренномудрие утверди, старость поддержи, отроки настави, в возрасте совершеннем сущия умудри, сирыя и вдовицы заступи, утесненныя и в скорбех сущия утеши и охрани, младенцы воспитай, болящия уврачуй, плененныя свободи, ограждающи ны присно от всякаго зла благостию Твоею, и утеши милостивным Твоим посещением и вся благодеющия нам. Даруй же, Благая, земли плодоносие, воздуху благорастворение и вся, яже на пользу нашу, дары благовременныя и благопотребныя, всемощным Твоим предстательством пред Всесвятою Живоначальною Троицею, в Еяже храме предстоим вси, нам помогающи. Прежде отшедшия отцы и матери, братию и сестры наша, и вся от лет древних ко святей иконе Твоей сей припадающия, упокой в селениих святых в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезненну, непостыдну, мирну и Святых Таин причастну, да и в будущем веце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа и Спаса нашего Иисуса Христа, Емуже подобает всякая слава, честь и поклонение, со Отцем и Святым Духом, во веки веков. Аминь.

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Не имамы иныя помощи, не имамы иныя надежды, разве Тебе, Владычице: Ты нам помози, на Тебе надеемся, и Тобою хвалимся: Твои бо есмы раби, да не постыдимся.

Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Пред иконой Пресвятой Богородицы «Виленская» молятся об облегчении и исцелении своих недугов.

16 февраля/1 марта[2]2
  Даты по новому стилю с 1 по 13 марта указаны для обычных лет. В високосные годы даты по новому стилю с 1 по 13 марта сдвинуты на один день, т. е.: 16 февраля ст. ст. (28 февраля н. ст.); 17 февраля ст. ст. (1 марта н. ст.); 18 февраля ст. ст. (2 марта н. ст.) и так до 13 марта по новому стилю. Далее для всех годов как указано в тексте.


[Закрыть]

Кипрской иконы Божией Матери.

Нескверная, неблазная, нетленная, пречистая, чистая Дево, Богоневесто Владычице, яже Бога Слова человеком преславным Твоим Рождеством соединившая, и отринувшееся естество рода нашего небесным совокупльшая, яже ненадежных едина надеждо и боримых помоще, готовое заступление к Тебе притекающих, и всех христиан прибежище! Не гнушайся мене грешнаго, сквернаго, скверными помыслы и словесы и деяньми всего себе непотребна сотворша, и разумом лености сластей жития раба бывша. Но яко человеколюбиваго Бога Мати, человеколюбне умилосердися о мне грешнем и блуднем, и приими мое еже от скверных устен приносимое Тебе моление; и Твоего Сына и нашего Владыку и Господа, Матернее Твое дерзновение употребляющи, моли, да отверзит и мне человеколюбныя утробы Своея благости, и презрев моя безчисленная прегрешения, обратит мя к покаянию, и Своих заповедей делателя искусна явит мя. И предстани мне присно, яко милостивая и милосердая и благолюбивая, в настоящем убо житии теплая предстательница и помощница, сопротивных нашествия отгоняющи, и ко спасению наставляющи мя, и во время исхода моего окаянную мою душу соблюдающи, и темная зраки лукавых бесов далече от нея отгоняющи, в страшный же день суда вечныя мя избавляющи муки, и неичреченныя славы Твоего Сына и Бога нашего наследника мя показующи; юже и да улучу, Владычице моя, Пресвятая Богородице, Твоим ходатайством и заступлением, благодатию и человеколюбием Единороднаго Сына Твоего, Господа и Бога и Спаса нашего Иисуса Христа, Емуже подобает всякая слава, честь и поклонение, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Кипрская» молятся об исцелении неизлечимых болезней и тяжких телесных недугов, об исцелении страждущих параличом и расслабленных, об избавлении от эпидемии и чумы, от моровых поветрий и холеры.

17 февраля/2 марта

Великомученика Феодора Тирона (ок. 306).

Священномученика Ермогена, патриарха Московского и всея России, чудотворца (1612).

О святый угодниче Божий Феодоре! Подвигом добрым подвизався на земли, восприял еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславном скончании жительства твоего и чтем святую память твою. Ты же, предстоя престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавлынеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и присно и во веки веков. Аминь.

Велия веры исправления, во источнице пламене, яко на воде упокоения, святый мученик Феодор радовашеся, огнем бо всесожжегся, яко хлеб сладкий Троице принесеся. Того молитвами, Христе Боже, спаси души наша.

Веру Христову яко щит внутрь приим в сердце твоем, противныя силы попрал еси, многострадальче, и венцем Небесным венчался еси вечно, Феодоре, яко непобедимый.

Величаем тя, страстотерпче святый Феодоре, и чтим честная страдания твоя, яже за Христа претерпел еси.

Великомученику Феодору Тирону молятся об отыскании украденного, от воров, о заступничестве вдов и сирот, о сострадании к нищим, сирым и беззащитным.

О великий угодниче Христов, святителю, отче наш Ермогене! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще. В древнюю годину искушений, всегда обышедше обыдоша страну нашу нечестивии врази, Господь яви тя Церкви Своей столпа непоколебима и людем российским пастыря добра, душу свою за овцы положивша и лютыя волки далече отгнавша. Ныне убо призри и на ны, недостойная чада твоя, умиленною душею и сокрушенным сердцем тебе призывающия. Крепость бо наша в нас оскуде, и вражия ловления и сети обыдоша нас. Помози нам, заступниче наш! Утверди нас в вере святей: научи нас всегда творити заповеди Божия и вся предания церковныя, от отец наших заповеданная. Пастырем нашим буди архипастырь, воином – вождь духовный, болящим – врач, печальным – утешитель, гонимым – заступник, юным – наставник, всем же благосердный отец и за вся теплый молитвенник: яко да молитвами твоими ограждаеми, непрестанно воспоем и прославим всесвятое имя Живоначальныя Троицы, Отца и Сына и Святаго Духа во веки веков. Аминь.

О угодниче Христов, святителю отче наш Ермогене! К тебе, молитвеннику теплому и предстателю непостыдному, усердно притекаем, в нуждах и скорбях наших утешения и помощи просяще. Помози нам, рабам Божиим (имена), заступниче наш! Утверди нас в вере святей, научи нас всегда творити заповеди Божия и вся предания церковная, от отец нам заповеданная, буди нам благосердый отец и теплый молитвенник, яко да прославим имя Живоначальныя Троицы, Отца и Сына и Святаго Духа во веки. Аминь.

Приспе день светлаго торжества, град Москва радуется, и с ним Русь Православная, ликовствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас, яко предстатель наш, великий Ермогене.

Российския земли первопрестольниче и неусыпный о ней к Богу молитвенниче! За веру Христову и паству твою душу свою положив, страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.

Темницею и гладом изнуряемь, даже до смерти верен пребыл еси, блаженне Ермогене, малодушие от сердец людей твоих отгоняя и на общий подвиг вся призывая. Темже и нечестивых мятеж низложил еси и страну нашу утвердил еси, да вси вопием ти: радуйся, заступниче Российския земли.

Величаем тя, священномучениче Ермогене, и чтим святую память твою, ты бо молиши за нас Христа Бога нашего.

Священномученику Ермогену, патриарху Московскому и всея России, чудотворцу, молятся об избавлении от нашествия иноплеменных.

18 февраля/3 марта

Преподобного Космы Яхромского (1492).

О всечестная главо, преподобне отче, блаженне великий авво Космо! Не забуди убогих твоих до конца, но поминай нас всегда во святых твоих и благоприятных молитвах к Богу. Не забуди посещая чад твоих, совершающих священную память твою, но моли за ны, отче благий, избранниче Христов, яко имеяй дерзновение к Небесному Царю. Ты, возшед на высоту добродетелей, яко финикс процвел еси, и яко кедр, иже в Ливане, собрал еси чада твоя, и мирское пристрастие от себе отвергл еси, и Царства Небеснаго достигл еси, и тамо с лики праведных предстоиши Христу Богу радуяся. Не премолчи убо за ны ко Господу, и не презри нас, с верою и любовию чтущих тя. Поминай нас недостойных у престола Вседержителева, непрестанно моляся ко Христу Богу: тебе бо дана бысть благодать молитися за ны. Преподобнии твои руце простри молебне о нас грешных: испроси нам время на покаяние и о еже невозбранно прейти нам от земли на небо, от горьких же мытарств воздушных князей и от вечныя муки избавитися, и Небеснаго Царствия наследником быти со всеми праведными, угодившими Ему, Господу нашему Иисусу Христу, Емуже подобает всякая слава, честь и поклонение, со Отцем и со Святым Духом, ныне и присно и во веки веков. Аминь.

Горняго желая премирнаго жития, дольная возненавидел еси, и взем крест, последовал еси Христу, и в пустыню вселился еси, досточудне, и в ней подвизался еси в пениих, и бдениих, и пощениих. Сего ради в тя вселися Пресвятый Дух. Темже, яко имея дерзновение ко Христу Богу, испроси людем православным здравие и спасение, и не забуди посещая чад твоих, совершающих священную память твою, Космо преподобне, отче наш.

Душевныя страсти из корене исторгая, в пустыню вселился еси, преподобне, и неболезненную жизнь в болезнех восприял еси, болезнем же лютым уставляеши озлобления просящим у тебе с верою. Темже разреши болезни наша душевныя и телесныя, да зовем ти: радуйся, Космо Богомудре.

Ублажаем тя, преподобне отче Космо, и чтим святую память твою, наставниче монахов и собеседниче Ангелов.

19 февраля/4 марта

Апостолов от 70-ти Архиппа и Филимона и мученицы равноапостольной Апфии (I).

Апостоли святии, молите милостиваго Бога, да прегрешений оставление подаст душам нашим.

Учениче Павлов и апостоле Христов, Архиппе, Евангелия провозвестниче и Колоссаев учителю, каменное побиение приемый, аки драгоценное украшение, имже венец мучения украсив, вшел еси на веселие Царствия, идеже помяни нас, поющих твою память, апостолов сопрестольниче.

Яко звезду великую тя Церковь имущи, Архиппе, чудес твоих лучами просвещаема, зовет тебе: спаси верою почитающия память твою.

Величаем вас, святии апостоли Филимоне и Архиппе, со равноапостольной Апфией, весь мир ученьми своими просветившия и вся концы ко Христу приведшия.

20 февраля/5 марта

Преподобномученика Корнилия Псково-Печерского (1570).

Священномученика Садока, епископа Персидского, и с ним 128 мучеников (342–344).

Святый преподобномучениче Корнилие, смиренно припадаем к раце мощей твоих и умильно молим тя: милостиво призри на скорби наша душевныя и телесныя и избаву нам подаждь; помози нам, святче Божий, от навета злых человек, от нихже и сам ты невинно на земли пострадал еси. Защити нас от насилия диавола, страстно воюющаго в немощных удесех наших; умоли Господа Бога и Пречистую Его Матерь даровати нам тихое и безгрешное житие, взаимную братскую нелицемерную любовь и мирную христианскую кончину, да чистою совестию предстанем нелицемерному страшному судилищу Христову и в Царствии Его прославим Животворящую Троицу, Отца, и Сына, и Святаго Духа, во веки веков. Аминь.

Псково-Печерская обитель, издревле славная чудесы иконы Богоматерни, многия иноки Богови воспита, тамо и преподобный Корнилий подвигом добрым подвизася, чудную Богоматерь славя, иноверныя просвещая, иноки и многия люди спасая, обитель же свою дивно украшая и ограждая. Тамо и мученичества венец, по многих летах пастырства своего, доблестне прият. Темже воспоим, людие, Христа Бога, и Пречистую Его Матерь возблагодарим, яко дарова нам преподобномученика славна и молитвенника о душах наших достоблаженна.

Светлый светильник Православия и сугубая Псковския земли защита был еси, многобожие искореняя и люди к Богу наставляя. Дом Богоматери тобою укрепися и прославися, добродетельми же украшен, венец мученика приял еси, поминай нас, чад твоих, и у Господа, преподобномучениче Корнилие.

Измлада, Корнилие чудный, трудом и подвигом себе предав, игуменом Псково-Печерстей обители поставлен был еси, образом веры и постническаго жития всем быв, многия люди к Богу привел еси. За своя же великия добродетели завистию от злых гоним, мученически душу свою Богови предал еси. Того ради с верою возопиим: преподобномучениче Корнилие достославный, моли Христа Бога спастися душам нашим.

Ублажаем тя, преподобномучениче Корнилие, и чтим святую память твою, наставниче монахов и собеседниче Ангелов.

О святый священномучениче Садоке! Доблестно управляя паствою своею, к царю зловредному приведеный и отречься от Христа понуждаем, в исповедании Царя царей непоколебимо стоя, лютые страдания претерпел еси. И егда язык твой, мучителями урезанный, абие вырос еси, множество народа, узрев чудо Божие, во Христа уверовали и мечем посечены вкупе с тобою были есте. Ты же, священномучениче, пред кончиною своею молился тако: «верую Господу моему, яко, иже аще призовет Бога имени моего ради, спасение обрящет». И Господь прият молитву твою и даде глас с Небесе. Святый Садоке, пастырю добрый, ты всегда верных утверждал, дабы не боялися смерти, к жизни вечной руководя их. И ныне яви попечение свое о нас грешных, и моли Господа, да не умрем без покаяния, и смерть мгновенная да не приблизится нам. Охрани нас, святый Садоке, да не будем застигнуты смертию, дондеже не ожидаем ея и не приготовлены к исходу. Избавь нас, священномучениче, от страха и скорби, да кончины христианской удостоившись, возблагодарим Бога во веки веков. Аминь.