![](/books_files/covers/thumbs_240/pomosch-nebesnyh-pokroviteley-polnyy-sbornik-molitv-na-kazhdyy-den-goda-zima-103430.jpg)
Автор книги: Таисия Олейникова
Жанр: Религиозные тексты, Религия
Возрастные ограничения: +12
сообщить о неприемлемом содержимом
Текущая страница: 9 (всего у книги 31 страниц) [доступный отрывок для чтения: 9 страниц]
Притецем, людие, со дерзновением к Милостивой Царице Богородице, и умиленно воззовем к Ней: ниспосли, Владычице, милости Твоя богатыя, сохраняя во здравии и благоденствии грешныя рабы Твоя. Болящия исцели, скорбящия утеши и бедствующим помози. И сподоби нас, Премилостивая, благочестно житие сие земное скончати, христианскую непостыдную кончину получити и Небесное Царствие унаследовати. Град наш избави от всякаго злаго обстояния, ограждая Твоим милостивым заступлением. Мирови мир даруй и спасение душам нашим испроси.
Кондак, глас 6Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.
ВеличаниеВеличаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.
Пред иконой Пресвятой Богородицы «Милостивая» молятся об избавлении от засухи, об исцелении от кровотечения, бесплодия и даровании чадородия, об укреплении в нуждах и печалях, о помощи несения иноческого креста, об исцелении от головной боли, об исцелении расслабленных и в семейных скорбях.
Молитвы ко Пресвятой Богородице пред Ее иконою «Помощь в родах»из акафиста
Царице моя преблагая, надеждо моя Богородице, прибежище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, направи мя яко странна. Обиду мою веси, разреши ту, якоже волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
из акафиста
Пресвятая Дево, Мати Господа нашего Иисуса Христа, Ты веси рождение и естество матере и чада, помилуй рабу Твою (имярек) и помози ей разрешитися от бремене своего в час сей благополучно. О Всемилостивая Владычице Богородице, не требовавшая помощи в рождении Сына Божия, подаждь помощь сей рабе Твоей, помощи требующей, наипаче же от Тебе, Пречистая. Даруй ей благомощие в час сей и младенца, иже имать родитися и внити в свет мира сего, сподоби в благоприятное время и умнаго Света во Святем Крещении водою и Духом. Тебе убо припадаем, Мати Бога Вышняго, молящеся: буди милостива жене сей, ейже приспе время материю быти, и умоли воплотившагося из Тебе Христа Бога нашего, да укрепит ю силою Своею свыше. Аминь.
из акафиста
Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе во чреве носящую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе, молим Тя, Всемилостивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы наша, такожде и родишия их, от тяжкаго недуга и горькия скорби избави; даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою.
О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли и не презри слез и воздыханий рабов Твоих. Услыши нас в день скорби, пред иконою Твоею припадающих, и в день радости и избавления приими благодарная хваления сердец наших. Вознеси мольбы наша ко Престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша, прославим Тя, Милосердную Заступницу и верную надежду рода нашего, во веки веков. Аминь.
из акафиста
О Пресвятая Госпоже Владычице Богородице, в земной жизни нас не оставляющая! К кому молитвы вознесу, к кому слезы и воздыхания принесу, аще не к Тебе, всех верных утешение! Со страхом, верою, любовию, Мати Живота, молю: да вразумит Господь люди православныя во спасение, да даст раждати нам чад Тебе и Сыну Твоему во благоугождение, да соблюдет нас в чистоте смирения, в надежде о Христе спасения, и дарует нам всем, в покровех благодати Твоея, земное утешение. Храни нас под сению милости Твоея, Пречистая, молящимся о родах помози, наветов злых свободи, тяжких бед, напастей и смертей отврати. Даждь благодатное прозрение, дух сокрушения о гресех, даждь зрети всю высоту и чистоту дарованнаго нам Христова учения; храни нас от погибельнаго отчуждения, да вси, благодарне воспевающе величия Твоя, сподобимся небеснаго успокоения и тамо с возлюбленными Твоими, со всеми святыми прославим в Троице Единаго Бога: Отца и Сына и Святаго Духа, ныне и присно, и во веки веков. Аминь.
Тропарь, глас 4К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Кондак, глас 6Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.
ВеличаниеВеличаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
Пред иконой Пресвятой Богородицы «Помощь в родах» («Помогателъница женам чады рождати»), или «Вродах Помощница», молятся о благополучном разрешении беременных женщин и чтобы родить здоровых детей.
27 декабря/9 января
Апостола, первомученика и архидиакона Стефана (34).
Обретение мощей преподобного Ферапонта Можайского, Белоезерского, Лужецкого чудотворца (1514).
Молитва апостолу, первомученику и архидиакону Стефану,чтомая в Стефановской церкви града Ростова Ярославской епархии
Первый во диаконех, первый и в мученицех показался еси, святый Стефане апостоле! Исполнь бо веры и силы во учении и в знаниих велик явился еси, и никтоже возможе противустати премудрости и духу, имиже глаголал еси, лице же твое на сонмищи видено бысть, яко лице ангела. Темже исполнен Святаго Духа быв, видел еси отверстое небо и славу Божию и Сына человеча, Господа нашего Иисуса Христа, одесную стояша Бога Отца. Таже и от жестоковыйных и убийц иудеев камением, пред лицем преблагословенныя и молящияся о тебе Девы Матере Его, побиваем, преклонь колена возопил еси гласом велиим: Господи, не постави им греха сего! И тако дух твой Господу Иисусу радостно предал еси. Сего ради молитвенника и предстателя тя стяжахом, и колена души и сердца нашего преклоныне, тя молим: воздежи руце твои ко Господу, и сподвижи всему роду человеческому предстательницу и ходатаицу к Сыну Своему, Пречистую Матерь Деву, и о нас, присно прогневляющих грехом и леностию, моли благаго Спаса нашего, да подаст нам благодать во благовременную помощь к покаянию, и твоим предстательством и заступлением Пречистыя Матере Своея, в день онь страшный и праведный, да не поставит пред нами грехи наша, но по щедротам Своим, тобою умолен быв, да речет души нашей: спасение ваше есмь Аз во веки веков. Аминь.
Тропарь апостолу, первомученику и архидиакону Стефану, глас 4Подвигом добрым подвизался еси, первомучениче Христов и апостоле, и архидиаконе Стефане, и мучителей обличил еси нечестие. Камением бо побиен от рук беззаконных, венец от яже свыше Десницы приял еси, и к Богу взывал еси, вопия: Господи, не постави им греха сего.
Ин тропарь, глас 3Апостолом совсельник и страстотерпцем первострадалец, Христов служитель, прехвальне Стефане, первее бо совершив мучения течение, безчисленныя роды человек равно Подвигоположнику Христу приведе. Темже яко апостола и страдальца верховнаго чтуще тя, молим: моли Христа Бога даровати нам велию милость.
Ин тропарь, глас 4Царским венцем венчася твой верх от страданий, яже претерпел еси по Христе Бозе, мучеников первострадальче Стефане: ты бо иудейское обличивый неистовство, видел еси твоего Спаса одесную Отца, Того убо моли о душах наших.
Кондак, глас 3Владыка вчера нам плотию прихождаше, и раб днесь от плоти исхождаше; вчера Царствуяй плотию родися, днесь раб камением побивается. Того ради и скончавается первомученик и божественный Стефан.
Ин кондак, глас 6Первый сеялся еси на земли Небесным Делателем, всехвальне Стефане, первый на земли за Христа кровь излиял еси, блаженне, первый от Него победы венцем увязлся еси на небесех, страдальцев начало, венечниче мучеников, первострадальне.
ВеличаниеВеличаем тя, первомучениче архидиаконе Стефане, и чтим честная страдания твоя, яже за Христа претерпел еси.
Молитва преподобному Ферапонту Можайскому, Белоезерскому, Лужецкому чудотворцуиз службы
О всечестный и преблаженный отче наш Ферапонте! Тебе дадеся благодать молитися о нас, и вемы, яко, предстоя престолу Господа, присно являеши любовь твою к нам непрестанными о нас твоими ходатайствы. Но понеже мы ежечасно умножающе грехи наша, крайняго твоего отвращения достойни сотворихомся, сего ради в покаянии, со слезами припадающе, молим тя: не премени твоея милости к нам на гнев за нечестия и скверны наша, яви убо нам милость твою до конца и согрешающих нас очисти твоими молитвами, возведи к покаянию, укрепи на дела благая, сохрани в Православии и во всякой святыни. Даруй нам пребывати в мире, тишине и братолюбии, испроси нам времена безмятежна и изобилие плодов земных, избави от огня, и от потопления, и от лютых болезней, и от смертоносныя язвы. Посли труждающимся благий успех, путешествующим путь безпреткновенный, в мори плавающим пристанище тихое, плененным ослабу и освобождение, сирым помощь и заступление, воинству нашему верность, мужество и победу и всем нам вся полезная ко временней и вечней жизни. Да, любовию твоею огражденнии, благодарственная всегда поем прославившему тя Господу Иисусу Христу, Емуже подобает всякая слава и честь со Безначальным Его Отцем и с Пресвятым и Животворящим Его Духом во веки веков. Аминь.
Тропарь преподобному Ферапонту Можайскому, Белоезерскому, Лужецкому чудотворцу, глас 4Житием чистым просветився, в молитвах и постех пустыни явился еси доброе прозябение и, духовному твоему учителю последствуя, ум свой к Небесным управль, стаду твоему наставник был еси, тем тя молим, отче Ферапонте, моли Христа Бога спастися душам нашим.
Кондак, глас тойжеПреблагий Спас наш Христос умножил есть милость Свою к нам, даровав нам в заступника и целителя преподобного отца нашего Ферапонта, иже просвещает нас образом святаго жития своего и ныне молитвами своими ограждает обитель свою от врагов и от разрушения, страну сию от глада и напрасныя смерти, чтущих же память его всех от болезней и от лютых страстей.
Ин кондак, глас тойжеХристовым желанием распалився, страсти плотския воздержанием оттряс, постническое стяжав жительство, преподобне, сего ради Господь труды твоя видев, даром чудес обогати тя, источаеши бо исцеления и молишися о нас к Богу, мы же, радующеся, вопием ти: радуйся, Ферапонте, отче наш.
ВеличаниеУблажаем тя, преподобне отче Ферапонте, и чтим святую память твою, наставниче монахов и собесодниче Ангелов.
28 декабря/10 января
Преподобного Игнатия Ломского, Ярославского (1591).
Молитва преподобному Игнатию Ломскому, Ярославскому,чтомая в Спасо-Ломской церкви Ярославской епархии
О святый преподобие отче Игнатие, первейший веси сея просветителю, иноческаго зде жития законоположителю! Ты убо телом человек был есни, житием же яко ангел явился еси: уста бо твоя, якоже серафимская, Бога день и нощь хваленьми прославляху, пресветлое же житие твое бысть чистоты и целомудрия зерцало. Се аз раб недостойный дерзаю припадати к честным и цельбоносным мощем твоим: не отрини мене, с верою и любовию тебе покланяющагося и тебе, угодниче Христов Игнатие, сице молящагося: буди ми учитель и просветитель, душевныя страсти утишая, и телесныя болезни исцеляя, и на путь спасения наставляя. О преблаженне отче Игнатие! Милостив буди скорбней и грешней души моей, и представи ю ко Господу спасену, под кров твой притекающую, да твоим, отче, ходатайством сохранен буду от враг видимых и невидимых, и восхвалю Бога, в Троице Святей прославляемаго, Отца и Сына и Святаго Духа, ныне и присно и во веки веков. Аминь.
ВеличаниеУблажаем тя, преподобне отче Игнатие, и чтим святую память твою, наставниче монахов и собеседниче Ангелов.
29 декабря/ 11 января
Мучеников 14 000 младенцев, от Ирода в Вифлееме избиенных (I).
Тропарь мученикам младенцам, от Ирода в Вифлееме избиенным, глас 1Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
Кондак, глас 4Звезда волхвы посла к Рождшемуся, и Ирод неправедное воинство посла люто, убити мня во яслех, яко Младенца лежаща.
Ин кондак, глас 6В Вифлееме рождшуся Царю, волсви от Персиды с дары приходят, звездою свыше наставляеми, но Ирод смущается и пожинает младенцы, яко пшеницу, и рыдает себе, яко держава его вскоре разорится.
ВеличаниеВеличаем вас, святии младенцы четыренадесяти тысящ, в Вифлееме Иудейстем от Ирода избиеннии, и чтим честная страдания ваша, яже за Христа претерпели есте.
30 декабря/12 января
Святителя Макария, митрополита Московского (1563).
Обретение мощей преподобного Даниила Переяславского (1652).
Молитва святителю Макарию, митрополиту Московскомуиз акафиста
О великий святителю, Церкве Российския первопрестольниче, града Москвы пастырю и учителю, отче наш Макарие блаженне, добре подвиг жития твоего совершивый и дерзновение у Господа стяжавый! К тебе во умилении сердец наших припадаем и усердно молим: буди о нас теплый предстатель у престола Вседержителева и умоли Всеблагаго Бога, да не презрит нас, во многия и лютыя грехи впадшия, но дарует нам вся благая и потребная, яже ко спасению. Вемы бо, яко немощни есмы, но молим тя усердно, святителю Божий, предстательством твоим сохрани невредимо всероссийскую паству, юже во святительстве твоем добре упасл еси. Архиереем и пресвитером у Господа испроси мудрость, во еже право правити слово Божественныя истины, жертвенную любовь и ревность о спасении, да не погибнет ни един от паствы их; иночествующих в подвизех укрепи, в мире живущим истинный и потребный им, иже во Христе Иисусе, образ жительствования покажи; веру нашу укрепи, любви нелицемерней друг ко другу научи, в надежде на милосердие Божие утверди.
Еще же молим тя, святителю, испроси нам у Всемилостиваго Бога духа разума и премудрости, да украсимся истинным боговедением спасительных писаний святых отец и мудростию их творений.
Ей, святителю Божий, о мире всего мира Господа умоли, страну нашу твоим предстательством в мире и безмятежии соблюди; вся люди отечества нашего в добрем расположении друг ко другу сохрани и чужды междоусобных нестроений покажи; вся грады и веси добре сохрани, святую веру в людех непорочну соблюди. Буди всем нам скорый помощник в нуждах наших, да тобою окормляеми, мирно и благочестно поживем в жизни сей, да сподобимся и вечных благ восприятия на небеси, славяще и превозносяще Отца и Сына и Святаго Духа и твое милостивное о нас предстательство во веки веков. Аминь.
Тропарь святителю Макарию, митрополиту Московскому, глас 4Яко великим пастырем единонравна и учителем вселенныяединомысленна, Божии Премудрости служителя изрядна, иже блаженству тезоимениту, днесь, вернии, вси воспоим: Христа Бога моли, святителю Макарие, умирити мир и спасти души наша.
Кондак, глас 3Богомудрым учением и книжным списанием потщался еси, святителю Макарие, люди Российския просветити и святых земли нашея прославити. Сего ради чуден пронаречеся, преемниче первопрестольников российских. Моли сохранитися нам в вере и благочестии невредимо.
ВеличаниеВеличаем тя, святителю отче Макарие, и чтим святую память твою, ты бо молиши за нас Христа Бога нашего.
Молитва преподобному Даниилу Переяславскомуиз службы с акафистом
О преподобне и Богоносне отче наш Данииле, всесмиренно к тебе припадаем и тебе молимся: не отступай от нас духом твоим, но всегда поминай нас во святых и благоприятных молитвах твоих ко Господу нашему Иисусу Христу. Молися Ему, да не потопит нас бездна греховная, и да не будем врагом, ненавидящим нас, в радование; да простит Христос Бог наш твоим предстательством за нас вся согрешения наша, и Своею благодатию водворит среди нас единодушие и любовь, и избавит нас от козней и наветов диавольских, от глада, огня, всякия скорби и нужды, от болезней душевных и телесных и от напрасныя смерти; да сподобит Он нас, притекающих к тебе, в истинней вере и покаянии пожити, христианския непостыдныя и мирныя кончины живота нашего достигнути, и наследовати Царство Небесное, и славити Пресвятое имя Его со Безначальным Его Отцем и Пресвятым Духом во веки веков. Аминь.
Тропарь преподобному Даниилу Переяславскому, глас 4От юности, блаженне, всего себе Господеви возложив, присно повинуяся Богу, противяся же диаволу, страсти греховныя победил еси. Темже сам храм Божий быв, и обитель красну во славу Пресвятыя Троицы воздвигнув, и собранное тобою в ней стадо Христово Богоугодно упас, преставился еси к вечным обителем. Отче Данииле, моли Триипостаснаго во едином существе Бога спастися душам нашим.
Кондак, глас 8Невечерняго Света пресветлое светило, жития чистотою просвещающее всех, явился еси, отче Данииле, образ бо и правило иноком был еси, сиротам же отец, и питатель вдовицам. Сего ради и мы, чада твоя, вопием ти: радуйся, радосте и венче наш; радуйся, многое имый к Богу дерзновение; радуйся, граду нашему велие утверждение.
ВеличаниеУблажаем тя, преподобне отче Данииле, и чтим святую память твою, наставниче монахов и собеседниче Ангелов.
31 декабря/13 января
Отдание праздника Рождества Христова.
Преподобной Мелании Римляныни (439).
Иконы Божией Матери «Звезда Пресветлая».
Молитвы преподобной Мелании Римлянынеиз акафиста
О преславная мати Мелание, скорая наша помощнице и заступнице и неусыпная о нас молитвеннице! Предстояще пречистому образу твоему и тя, яко живу сушу, зряще, припадающе молимся тебе: приими прошения наша и принеси я ко престолу Милосердаго Отца Небеснаго, яко дерзновение к Нему имущая; испроси притекающим к тебе и всем православным христианом вечное спасение и временное благоденствие, на вся благая дела и начинания наша щедрое благословение, от всяких бед и скорбей скорое избавление. Ей, чадолюбивая мати наша, тебе, предстоящей престолу Божию, ведомы нужды наши духовныя и житейския, призри на ня матерним оком, и твоими молитвами отврати от нас колебание всяким ветром учения, злых и богопротивных обычаев умножение; утверди же во всех веры согласное ведение, взаимную любовь и единомыслие, да всем, и словесы и писании и делами, славится среди нас всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава, во веки веков. Аминь.
из акафиста
О святая угоднице Божия, преподобная мати Мелание! Подвигом добрым подвизавшися на земли, восприяла еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.
Тропарь преподобной Мелании Римляныне, глас 8В тебе, мати, известно спасеся еже по образу: приимши бо крест, последовала еси Христу, и деющи учила еси презирати убо плоть, преходит бо, прилежати же о души, вещи безсмертней; темже и со ангелы срадуется, преподобная Мелание, дух твой.
Внимание! Это не конец книги.
Если начало книги вам понравилось, то полную версию можно приобрести у нашего партнёра - распространителя легального контента. Поддержите автора!Правообладателям!
Данное произведение размещено по согласованию с ООО "ЛитРес" (20% исходного текста). Если размещение книги нарушает чьи-либо права, то сообщите об этом.Читателям!
Оплатили, но не знаете что делать дальше?