Текст книги "Молитвы в трудных жизненных ситуациях. Для сомневающихся и искушаемых"

Канон преподобному Паисию Великому

Об избавлении от мук умерших без покаяния

Песнь 1-я, глас 6-й

Помощник и Покровитель бысть мне во спасение, Сей ми есть Бог, и прославлю Его. Бог отца моего и вознесу Его, славно бо прославися.

Припев: Преподобне отче Паисие Великий, моли Бога о нас.

Иже вся умудряющему Богу молися, преподобне отче о рабе своем, да отверзет ми устне недостоинии, и двигнет ми язык недоуменный, тесноту же и худогласие, отче, разверзи благодатию, иже в тебе Святаго Духа, к пению чудес твоих.

Припев: Преподобне отче Паисие Великий, моли Бога о нас.

Начну убо достохвальное и душеполезное житие твое от младенства, иже древле Египет великаго во пророцех произнесе Моисея, иже к Богу присвоением и великими чудесы прославися, тако и ныне вторицею прославлен показася Египет тебе ради, отче Паисие, честным именем твоим и многими добродетельми обогатися, еже дарова тебе Господь, Егоже моли, да спасет души наша.

Слава: В Царство Небесное вшед узким путем и прискорбным по заповеди Владыки своего Христа, преподобне отче Паисие, широкий и пространный путь возненавидев, распространьшийся мрак ума моего отжени, да возмогу малое сие моление принести в пречестную память твою.

И ныне: Дух сокрушен подаждь ми, Благая, смиренно сердце, уму же чистоту и житию исправление и прегрешением оставление.

Песнь 3-я

Утверди, Господи, на камени заповедей Твоих подвигшееся сердце мое, яко Един Свят еси и Господь.

Припев: Преподобне отче Паисие Великий, моли Бога о нас.

Каменю веры – Петру апостолу – уподобился еси, распятся мирови во всей жизни своей, преподобне Паисие, и нозе свои невозвратно к небесному шествию управил еси, и горняго Иерусалима достигл еси, со святыми предстоя Святей Троице, моли о мне Единаго Благаго Человеколюбца.

Припев: Преподобне отче Паисие Великий, моли Бога о нас.

Благочестиваго корени пресветлая отрасль, тебе избра Господь, Ангел рече матери твоей, сей Богу угоден. Ты же, от младенства крест свой взем, невозвратным путем Тому последова, и возрасташе леты и разумом, купно и благодатию Божиею. Моли дати ми отпущение грехов.

Слава: О Владыко Господи Иисусе Христе, кто не удивится Твоему человеколюбию, егда прииде желание преподобному иноческое житие получити к деланию заповедий Твоих, Твоею благодатию яко агнец непорочен иэведеся в пустыню, и достиже словесных овец, и введеся к пастырю блаженному Памве, и облечеся во иноческий образ, в немже утверди и мене Господи, молитвами преподобнаго Паисия, к деланию заповедей Твоих.

И ныне: Лютых мя мук, и тьмы кромешныя и геенны, Твоими молитвами свободи, Дево, имаши бо волю и силу, Господа рождшая единаго Преблагаго.

Седален, глас 2-й

Душу связав любовию Христовою, земная возненавидев вся, мудре, водворился еси, отче преподобне, в пустынях и горах, разумнаго древа вкусив славне, ангельски просиял еси. Темже и мрак прошед плоти своея, тьму отгнал еси бесов, Паисие, инокующим первый, моли Христа Бога, грехов оставление подати чтущим любовию святую память твою.

Слава Отцу и Сыну и Святому Духу. И ныне и присно и во веки веков. Аминь.

Скорый покров и помощь и милость покажи на рабе Своем, Чистая, и волны укроти суетных помышлений, и падшую ми душу возстави, Богородице, вем бо, вем яко можеши, елико хощеши.

Песнь 4-я

Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.

Припев: Преподобне отче Паисие Великий, моли Бога о нас.

Законострадальческое житие от мягких ногтей восприем богомудре Паисие, даже до конца пребыл еси, яко божествен доблественник, венец приял еси победы от всех Царствующаго, молитвами своими избавляти от муки грешники, от них же первый есмь аз, не забуди мене.

Припев: Преподобне отче Паисие Великий, моли Бога о нас.

Имуще молитвенника крепка, блаженне Паисие, и обещника печальным, предстателя и поборника, и ходатая благочестна, от всяких спасаемся бед, напастей и обстояний.

Слава: Велию судеб бездну имеяй, Той тебе рече: се, бо даю ти дар, да вся еже просиши от Отца Моего во имя Мое, дастся тебе, о коем-либо грешнике помолишся, оставятся греси того; сего ради припадаю ти, отче Паисие, имея бездну согрешений, да отпустит твоими молитвами, иже тебе обетова, яко Благ и Человеколюбец.

И ныне: Глагол провещай, егда право имам судитися, Богородительнице, к Сыну Твоему, Пренепорочная, да обрящу Тя тогда прибежище и заступление, мук всех избавляющи.

Песнь 5-я

От нощи утреннююща, Человеколюбче, просвети, молюся, и наставии мене на повеления Твоя, и научи мя, Спасе, творити волю Твою.

Припев: Преподобне отче Паисие Великий, моли Бога о нас.

Постом удручая тело свое, отче Паисие, иногда по причащении Тела и Крови Христовы, яко Ангел седмьдесят дней без пищи телесныя пребыл еси, божественную державу неизреченную имущи, и возмогши в себе животную содержати силу благодатию Твоею, паче пищнаго укрепления; слава державе Твоей, Господи.

Припев: Преподобне отче Паисие Великий, моли Бога о нас.

Яко Иоанн Креститель, узким и прискорбным путем ходити произволил еси, но той на Иордане узрев Зиждителя своего, устрашися и вопияше: не смею приступити сено, Огню; ты же, отче Паисие, в пустыни иногда явльшагося Господа, не могий пречистаго лица Его зрети, паде трепетом одержим. Он же ти рече: не устрашайся, сию пустыню наполню постниками тебе. С нимиже молимся, отче: не забуди нас, молитвенник твоих, помилованных быти.

Слава: Аз бо в начале моя пред Тобою зрю согрешения и о моих беззакониях молю Твое милосердие, да простиши и покрыеши благоутробием Твоим множество грехов моих, и даждь ми прочее жизни сея время безгрешно проводити, да удобь на спасения стезю потек, безпреткновенно к доброму концу достигну Твоею помощию, кроме бо Твоея помощи и наставления ничтоже благо совершити, и милость у Тебе получити кто может.

И ныне: Рабское приношу Ти моление неразумный аз, и к Твоему прибегаю благоутробному милосердию, не отврати мене, Чистая, посрамлена.

Песнь 6-я

Возопих всем сердцем моим к щедрому Богу, и услыша мя от ада преисподняго, и возведе от тли живот мой.

Припев: Преподобне отче Паисие Великий, моли Бога о нас.

Бездушная тварь Иордан, своего Творца устыдеся, вопияше: не могу Безгрешнаго омыти. Святый же виде Господа, прием воду, прикоснуся Неприкосновенному, умы нозе Его и, пив воду, прия дар целити недуги и прогонити от человек бесы, сего ради и мы припадаем к тебе, отче, молитвами твоими помилуй нас от всяких бесовских наведений.

Припев: Преподобне отче Паисие Великий, моли Бога о нас.

По слову Господа нашего Иисуса Христа, обретохом тя, отче Паисие, великое прибежище, и заступника, и тепла молитвенника о гресех наших, якоже первее инока преставльшася, и христианства отчуждившася и во глубину адову пагубным безверием низведся, и, егда ощутився, притекша к тебе, да умолиши Всемилостиваго. Щедрый же Господь явися тебе и глагола: угодниче Мой, добро есть Моей любви подобяся, печешися о грешных, изволяяй муки прияти за их избавление.

Припев: Преподобне отче Паисие Великий, моли Бога о нас.

Принесеся молитва твоя и слезы к Богу, яко благовонный фимиам, и жертва непорочна и благоприятна, и мене не забуди ходатайством твоим ко Пресвятей Богородице, слезы умиления даси ми, омый грехов моих бездну, избави мя от смертныя глубины, и не надеющимся подаждь велию милость, и прости им согрешения.

Слава: Весь недоумением одержимь есмь, егда прииму во уме той час страшный испытания Судии и Бога, и плачуся и сетую и рыдаю, поминая бездну зол моих. Темже спаси, Человеколюбче, молитвами Твоего угодника преподобнаго Паисия и избави мя муки, яко Благоутробен.

И ныне: От сердца стенания приношаю Ти, Пренепорочная, Твое прося благопребытное заступление. Помилуй всестрастную ми душу, умилосердися, Мати многомилостиваго Бога, избавити мя Суда и езера огненнаго.

Кондак, глас 2-й

Житейских молв оставль, безмолвное житие возлюбил еси, Крестителю подобяся всеми образы, с нимже тя почитаем, отче отцев Паисие.

Икос

Христов глас услышав, шествовал еси во след Того заповедей, наг жития быв, отверг попечения, и вся стяжания, и имения, и братий своих, и любве матере, богоносне Паисие, един в пустынях Богови беседуя разумом, дарования приял еси, еже ми посли, в песнех поющему, отцев начальниче Паисие.

Песнь 7-я

Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.

Припев: Преподобне отче Паисие Великий, моли Бога о нас.

Многих грехов исполнен аз, и твоя молитва, яко кадило благовонно, исправися отче. Бездну грехов моих потреби, и буяющее море злаго жития изсуши, и напоение гневное отжени, и целомудренный ум молитвами своими утверди, отче Паисие.

Припев: Преподобне отче Паисие Великий, моли Бога о нас.

Наставника тя и молитвенника тепла имуще, и скораго помощника, яко стену тверду и забрало недвижимо, и воеводу крепка и непобедима молим тя: не забуди молитвенник твоих, избавляя от веяния печали и навет вражиих.

Припев: Преподобне отче Паисие Великий, моли Бога о нас.

О чудо велие, во един от дний седящу ти, отче Паисие, в пещере, бысть ти глас глаголяй: мир тебе, возлюбленному Моему угоднику, ты же возстав со страхом, и трепетом одержим, паде, поклонися и рече: се, раб Твой, Господи. Сего ради молим тя: моли Человеколюбца, да спасет души наша.

Слава: Даждь ми, Христе, разум и терпение, еже не осуждати согрешающих с кичением фарисейским, но, яко мытарево покаяние, приими, и, яко блуднаго сына, Боже, вечери Твоей достойна мя яви, молитвами преподобнаго Паисия, и грехов прощение ми даруй.

И ныне: Возникни, о страстная душе, возстани окаянная, бий из глубины в перси и испусти слез источники, да тя помилует, окаянную, милосердая Мати Христа Бога.

Песнь 8-я

Егоже воинство Небесная славят и трепещут Херувими и Серафими, всяко дыхание и тварь, пойте, благословите и превозносите Его во веки.

Припев: Преподобне отче Паисие Великий, моли Бога о нас.

Благодарно приносимое тебе пение сие не презри, отче Паисие, но паче приими и радости духовныя исполни, да без закоснения поклонюся твоему образу, идеже есть написан, исцеления всем подавающ.

Припев: Преподобне отче Паисие Великий, моли Бога о нас.

Всепремудрому житию поревновав богоугодных отец, иже от века поживших, отче Паисие, во смирении и постничестве Христа ради всю жизнь свою мученически скончал еси, и от бесов нападения много претерпел еси, и сих победил. Сего ради молю тя, отче: буйство, ярость и небрежение молитвами твоими отрини от мене.

Припев: Преподобне отче Паисие Великий, моли Бога о нас.

Владыко Христе Боже Всещедрый, имиже веси судьбами даждь ми ненавидети деянии лукаваго, Ты бо еси Бог наш, рекий: просите и приимете. Даждь любовь от всея души моея, молитвами преподобнаго отца Паисия, творити волю Твою спасительную.

Слава: Молю ти ся, на мне, грешнем, долготерпи Владыко, и не посецы мене, яко неплодное древо, посечением смертным во огнь отсылая, но плодоносна мя сотвори молитвами преподобнаго умолен бывая, время покаяния ми даждь, яко Человеколюбец.

И ныне: Струи низпосли слез и стенания от души, сотвори ми, Чистая, внегда припадати к Твоему покрову, яко да обрящу разрешение грехов моих, Твоею молитвою.

Песнь 9-я

Безсеменнаго зачатия рождество несказанное, Матери безмужныя нетленен Плод, Божие бо Рождение обновляет естества. Темже Тя вси роди, яко Богоневестную Матерь, православно величаем.

Припев: Преподобне отче Паисие Великий, моли Бога о нас.

Скорый помощник был еси преподобне, еще в жизни сей, иногда у преподобнаго старца ученику в преслушании умершу, и ведену во ад, он же припадаше, прося, да умолиши Всещедраго о ученице его. Ты же яко скорый послушник и любви хранитель, надежду возложи ко Всещедрому Богу, простреся на молитву, и Той, Многомилостив и во обетех неложный, волю к боящимся Его сотвори и, молитву твою услышав, изведе душу от ада. Того ради и аз, недостойный, припадая, молю тя, отче Паисие, молитвами твоими избави мя муки и огня негасимаго.

Припев: Преподобне отче Паисие Великий, моли Бога о нас.

Бывша мя бесом смех, человеком уничижение, праведным рыдание, Ангелом плач, осквернение воздуху и земли и водам, тело окалях и ум оскверних, паче слова деяньми, аз враг Богу бых. Увы мне, согреших! Молитвами преподобнаго Паисия прости мя.

Слава: Яко впадый в разбойники и уязвен, тако и аз впадох от многих грехов, и уязвена ми есть душа. К кому прибегну повинный аз? Токмо к Тебе, милосердому душам Врачу, приими молебника тепла преподобнаго Паисия и молитвами его излей на мя великую Твою милость.

И ныне: Прегрешении мои умножищася, прощению и суду достоин, Чистая, припадая, зову Ти: прежде конца подаждь ми очищение и умиление, и нравом исправление.

Молитва

Страстей победителя, душам помощника, о всех молебника, всем спасения ходатая и наставника, из глубины сердца воздыхая, усердно и пламенно молим тя, Паисие Преподобне! Внемли и помози нам, не отринь и не презри нас, но абие услыши в смирении сердца притекающих к тебе. Ты, преподобне, к спасению ближних прилежно стремился и многих грешников к свету спасения привел еси. Подвиги чрезмерные успокоением считал по себе, пречудне, и, любовью ко Господу всегда горя, явления Христа Спаса сподобился еси, и Ему, за людей умершему, любовию подражая, и об отрекшихся от Христа молился еси. Услыши нас, Паисие прехвальне, ибо недостойны есмы молитися о даровании нам великой милости Господней, понеже грешны есмы, и уста оскверненныя и сердца отягощенныя имеем, и под бременем прегрешений страждем, и не достигает молитва наша до Господа. Сего ради помолися за нас мольбою твоею крепкою и богоприятною, святый Паисие, да избавлены будут скончавшиеся без покаяния сродники, ближние и знаемые наши от муки вечныя, и молитву твою во благоволении приимет Спас наш и милосердие Свое вместо добрых дел их даст им, свободит их, веруем, от страданий и вселит в селениях праведных, и нас в покаянии скончатися удостоит, да прославим вкупе Всесвятое и великолепое имя Отца и Сына и Святаго Духа, во веки веков. Аминь.