Текст книги "Молитвы на благополучие и удачу. Изменение жизненных обстоятельств"

Мученикам и исповедникам Гурию, Самону и Авиву

Об устранении семейных неурядиц

О преславнии мученицы Гурие, Самоне и Авиве! Защитите нас, раб Божиих (имена), от напастей, злых человек и козней демонских; оградите нас от нечаянныя смерти, избавите от огня, меча и всякаго душепагубнаго обстояния. Ей, страстотерпцы Христовы, устройте нам молитвами вашими вся благая и полезная, да благочестно житие временное прешедше и кончину непостыдну стяжавше, удостоимся теплым заступлением вашим со всеми святыми одесную Правосуднаго Бога Судии стати и Того непрестанно славити, со Отцем и Святым Духом, во веки веков. Аминь.

Святителю Иоанну Златоустому

О даровании терпения, в отчаянии

О святителю великий Иоанне Златоусте! Многая и различная дарования от Господа приял еси и яко раб благий и верный все данные тебе таланты добре умножил еси, сего ради воистину вселенский учитель был еси, яко всяк возраст и всяко звание от тебе поучаются. Мы же, грешнии (имена), по единому кийждо свое дарование имуще, единения духа в союзе мира не имамы, бываем тщеславне, друг друга раздражающе, друг другу завидяще, сего ради дарования наша разделенныя не в мир и спасение, но во вражду и осуждение нам являются. Темже и тебе, святителю Божий, припадаем раздором обуреваеми, и в сокрушении сердца просим: молитвами твоими отжени от сердец наших всяку злобу, недоброжелательство, гордость и зависть нас разделяющия, да во мнозех удех едино тело церковное невозбранно пребудем, да по словеси твоему молитвенному возлюбим друг друга и единомыслием исповемы Отца и Сына и Святаго Духа, Троицу Единосущную и Нераздельную, ныне и присно и во веки веков. Аминь.

Блаженной старице Матроне

Обо всех житейских нуждах, в болезнях

О блаженная мати Матроно, услыши и приими ныне нас, грешных, молящихся к тебе, навыкшая во всем житии твоем приимати и выслушивати всех страждущих и скорбящих с верою и надеждою к твоему заступлению и помощи прибегающих, скорое поможение и чудесное исцеление всем подавая, да не оскудеет и ныне милосердие твое к нам, недостойным, мятущимся в многосуетном мире сем и нигдеже обретающих утешения и сострадания в скорбех душевных и помощи в болезнех телесных, исцели болезни наша, избави от искушений и мучительства дьявольского, страстно воюющего, помози донести житейский свой Крест, снести вся тяготы жития и не потеряти в нем образ Божий, веру православную до конца дней наших сохранити, упование и надежду на Бога крепкую имети и нелицемерную любовь к ближним; помози нам по отшествии из жития сего достигнути Царствия Небесного со всеми угодившими Богу, прославляюще милосердие и благость Отца Небеснаго, в Троице славимого, Отца и Сына и Святаго Духа во веки веков. Аминь.

Блаженной Ксении Петербургской

О всякой семейной и бытовой нужде

О святая угодница Божия, блаженная Ксение! Призри милостиво твоим оком на нас раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашим оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце, и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость прославим всех благих Источника и Дароподателя и Бога Единаго, в Троице Святей славимаго, Отца и Сына и Святаго Духа, ныне и присно и во веки веков. Аминь.

Апостолу Филиппу

О покровительстве посевов и плодородии

О преславный апостоле Христов Филлипе! Молим тя: сохрани и соблюди нас молитвами твоими от искушений диавольских и падений греховных и испроси нам, рабам Божиим (имена), свыше помощь во время уныния, да не преткнемся о камень соблазна, но неуклонно шествуем спасительным путем заповедей Христовых, дондеже достигнем оных блаженных обителей райских. Ей, апостоле Спасов! Не посрами нас, но буди нам помощник и покровитель во всем житии нашем и помози нам благочестно и богоугодно житие сие временное скончати, христианскую кончину получити и добраго ответа сподобитися на Страшнем суде Христове; да прославим великолепое имя Отца и Сына и Святаго Духа во веки веков. Аминь.

Святителю Василию Великому

При открытии работ на фабрике, в мастерской и т. п.

О великий и пресвятый святителю, отче Василие! Призри от высот небесных на нас, раб Божиих (имена), и умоли Господа, Егоже верный на земли служитель был еси, да дарует нам веры правыя твердое и неизменное сохранение, Церкви Святей послушание, жития нашего исправление и во всех нуждах, скорбех и искушениих скорое поможение, терпение же и укрепление. Подаждь нам твое святое благословение, да оным осеняемии во вся дни богоугодно в мире и покаянии поживем и во Царствии Небеснем сподобимся купно с тобою и со всеми святыми Живоначальную Троицу, Отца и Сына и Святаго Духа, воспевати и славити во веки веков. Аминь.

Благоверным князьям Борису и Глебу

О умиротворении враждующих

О двоице священная, братии прекраснии, доблии страстотерпцы Борисе и Глебе, от юности Христу верою, чистотою и любовию послужившии, и кровьми своими, яко багряницею, украсившиися, и ныне со Христом царствующии! Не забудите и нас, сущих на земли, но яко теплии заступницы, вашим сильным ходатайством пред Христом Богом нас помилуйте, юных во святей вере и чистоте невреждены от всякаго прилога неверия и нечистоты сохраните, и всех нас молящихся от всякия скорби, озлобления и внезапныя смерти избавити, укротите же всякую вражду и злобу, действом диавола воздвизаемую от ближних и чуждих. Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте своим заступлением град сей и вся, чтущая святую память вашу, во веки веков. Аминь.

Святителю Никите, епископу Новгородскому

От пожара и засухи

О архиерею Божий, святителю Никито! Услыши нас грешных, днесь во священный храм сей стекшихся, и честному образу твоему поклоняющихся, и ко священней твоей раце припадающих, и умиленно вопиющих: якоже сидя на престоле святительства в Великом Новеграде сем, и единою належащу бездождию, дождь молитвою свел еси, и паки граду сему огненным пламенем обдержиму, молитвою избаву подал еси, тако и ныне молим тя, о святителю Христов Никито: молися ко Господу, еже избавити царствующий грады, Великий Новград сей и вся грады и страны христианские от труса, потопа, глада, огня, града, меча и от всех врагов видимых к невидимых, яко да изрядных ради молитв твоих спасаеми, славим Пресвятую Троицу, Отца и Сына и Святаго Духа, и твое милостивное предстательство, ныне и присно и во веки веков. Аминь.

Святителю Вонифатию Милостивому

Об исцелении от пьянства

О всесвятой Вонифатий, милостивый раб Милосердного Владыки! Услышь прибегающих к тебе, одержимых пагубным пристрастием к винопитию и, как в своей земной жизни ты никогда не отказывал в помощи просящим тебя, так и теперь избавь этих несчастных (имена). Некогда, богомудрый отец, град побил твой виноградник, ты же, воздав благодарение Богу, велел немногие, сохранившиеся грозди положить в точило и позвать нищих. Затем, взяв новое вино, ты разлил его по каплям во все сосуды, бывшие в епископии, и Бог, исполняющий молитву милостивых, совершил преславное чудо: вино в точило умножилось и нищие наполнили свои сосуды.

О святитель Божий! Как по твоей молитве умножилось вино для нужд церкви и для пользы бедных и убогих, так ты, блаженный, уменьши его теперь там, где оно приносит вред, избавь от пристрастия к нему предающихся постыдной страсти винопития (имена), исцели их от тяжкого недуга, освободи от бесовского искушения утверди их, слабых, дай им, немощным, крепость и силу благоуспешно перенести это искушение возврати их к здравой, трезвой жизни, направь их на путь труда, вложи в них стремление к трезвости и духовной бодрости. Помоги им, Угодник Божий. Угодник Божий Вонифатий, когда жажда вина станет жечь их гортань, уничтожь их пагубное желание, освежи их уста небесною прохладою просвети их очи, поставь их ноги на скале веры и надежды, чтобы, оставив свое душевное пристрастие, влекущее за собою отлучение от Небесного Царства, они утвердились в благочестии, удостоились непостыднои мирной кончины и в вечном свете бесконечного Царства Славы достойно прославляли Господа нашего Иисуса Христа со Безначальным Его Отцем и с Пресвятым и Животворящим Духом во веки веков. Аминь.

Преподобному Моисею Мурину

Об исцелении от пьянства

О великая сила покаяния! О неизмеримая глубина милосердия Божия! Ты, преподобный Моисей, был прежде разбойником, но потом ужаснулся своих грехов, воскорбел о них и в раскаянии пришел в монастырь и там в великом плаче о своих беззакониях и в трудных подвигах проводил свои дни до кончины и удостоился Христовой Благодати прощения и дара чудотворения. О преподобный, ты от тяжких грехов достиг пречудных добродетелей, помоги молящимся тебе рабам (имена), влекомым в погибель от того, что предаются безмерному, вредному для души и тела употреблению вина. Склони на них свой милостивый взор, не отклони и не презри их, но внемли им, прибегающим к тебе.

Моли, святой Моисей, Владыку Христа, чтобы не отверг их Он, Милосердный, и да не возрадуется диавол их погибели, но да пощадит Господь этих бессильных и несчастных (имена), которыми овладела пагубная страсть пьянства, ведь мы все Божьи создания и искуплены Пречистою Кровью Сына Его.

Услышь же, преподобный Моисей, их молитву, отгони от них диавола, даруй им силу победить страсть, помоги им, простри твою руку, выведи их на путь добра, освободи их от рабства страстей ~а избавь их от винопития, чтобы они, обновленные, в трезвении и светлом уме, возлюбили воздержание и благочестие и вечно прославляли Всеблагого Бога, всегда спасающего свои создания. Аминь.

Праведному Иоанну Русскому, Исповеднику

При психических недугах, наркомании, за больных детей

О всеблаженный исповедниче Христов и великий чудотворче Иоанне Русский! Подвигом добрым подвизался на земли, восприял еси на небесех венец правды, еже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстояй престолу Божию, приими моления наша, раб Божиих (имена), и ко Всемилостивому Богу принеси, о еже простити нам всякое прегрешение и помощи нам стати противу козней диавольских, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во Святых Своих славимаго Бога, Отца и Сына и Святаго Духа, ныне и во веки веков. Аминь.

Преподобной Марии Египетской

От избавления от блудной страсти

О великая Христова угодница преподобная Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находящия напасти, от внезапныя смерти и от всякого зла, в час же разлучения души от тела отжени, святая угодница, всякую лукавую мысли, лукавые бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение со Отцем и Святым Духом во веки веков. Аминь.

Преподобному Сергию, Радонежскому чудотворцу

О помощи в трудном учении; избавлении от гордости

О преподобне и Богоносне отче наш Сергие! Воззри на нас, раб Божиих (имена), милостивно и, к земле приверженных, возведи к высоте небесней. Укрепи наше малодушие и утверди нас в вере, да несомненно уповаем получити вся благая от благосердия Владыки Бога молитвами твоими. Испроси предстательством твоим всякий дар всем и коемуждо благопотребен и вся ны споспешествующия твоими молитвами сподоби в день Страшнаго суда шуйя части избавитися, десныя же страны общники быти и блаженный оный глас Владыки Христа услышати: приидите, благословенные Отца Моего, наследуйте уготованное вам Царствие от сложения мира. Аминь.

Преподобному Антонию Великому

О покровительстве немощных; изгнании бесов

Молитва 1-я

О великий угодниче Божий, преподобный отче Антоние! Яко имея дерзновение ко Владыце Христу и ко Пречистей Его Матери, буди о нас, недостойных (имена), молитвенник теплый, заступая нас от всяких бед и напастей, да твоими молитвами невредимы от враг видимых и невидимых пребудем. Моли милосердие Божие, да спасет нас от прегрешений наших имиже веси судьбами. Моли благость Его, еже милостивно храму (дому) сему потребная даровати, жизнь нашу умирити и вся прихожаны храма сего помиловати и спасти души наша, да непрестанно славим, хвалим, поем и величаем Пречестное и Великолепое имя Отца и Сына и Святаго Духа, ныне и присно и во веки веков. Аминь.

Молитва 2-я

О преподобне отче Антоние! Молим тя мы, недостойнии, испроси предстательством твоим у Всемилостиваго Бога нашего нам здравие душевное и телесное, тихое и богоугодное житие и добрый ответ на Страшнем суде Христове. Угаси молитвами твоими разжженныя на ны стрелы диавольския, да не прикоснется нам злоба греховная, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

Священномученику Киприану и мученице Иустине

От сохранении от злого очарования, избавлении от чар и вреда со стороны колдунов

О святие угодниче Божии, священномучениче Киприане и мученице Иустина! Внемлите смиренному молению нашему. Аще бо временное житие ваше мученически за Христа скончали есте, но духом от нас не отступаете есте, присно по заповедем Господним шествовати нас научающе и крест свой терпеливо нести нам пособствующе. Се, дерзновение ко Христу Богу и Пречистей Его Матери стяжали есте. Темже и ныне будите молитвенницы и ходатаи о нас недостойных (имена). Будите нам заступницы крепции, да заступлением вашим сохраняеми невредимы от бесов, волхвов и от человек злых пребудем, славяще Святую Троицу, Отца и Сына и Святаго Духа, ныне и присно и во веки веков. Аминь.

Великомученику Феодору Стратилату

О заступничестве и даровании здоровья

О святый, славный и всехвальный великомучениче Феодоре Стратилате! Молим тя пред иконою твоею святой, моли с нами и о нас, раб Божиих (имена), умоляемого от своего благосердия Бога, да милостивно услышит нас, благостыни у Него просящих, и вся наша ко спасению и житию нужная прошения да исполнит. Еще же молим тя, святый победоносче Феодоре Стратилате, разруши силы возстающих на ны врагов, видимых и невидимых. Умоли же Господа Бога всея твари Создателя, избавити нас от вечного мучения, да всегда прославляем Отца и Сына и Святаго Духа и твое исповедуем предстательство, ныне и присно и во веки веков. Аминь.

Преподобным отцам Псковским

О прощении грехов и духовном, душевном и телесном здравии

О преподобнии и богоблаженнии отцы наши Никандре, Иоакиме, Онуфрие, Корнилие, Савво, Евфросиние, Серапионе, Илларионе, Марко, Ионо, Вассиане, Дорофее, Мартирие, Василие, Иоасафе, Досифее, Харитоне, Игнатие, Харлампие, Памфиле, Ниле, Феофиле, Иакове, Авраамие, Корнилие, Иоанне, и прочие чудотворцы Псковские! Приимите ныне нас, к вам усердно молящихся и припадающих ко святым иконам вашим, духом же на небесех предстоящии Святей Троице со ангелы и преподобных отец лики, молитеся о нас, чадех ваших (имена), отцы, да избавимся всяких скорбей, болезней, бед и обстояний, благочестно поживем в настоящем житии, ходяще в заповедех и оправданиях Господних безпорочно. Испросите нам грехов прощение, телесем здравие и вечное спасение, яко да вашим предстательством спасаеми, славу возсылаем Отцу и Сыну и Святому Духу, ныне и присно и во веки веков. Аминь.

Молитва по призывании святых

Боже Святый и на святых почивающий! Вспоминая святых Твоих и их богоугодное похваляя житие, Тебе Самого в них действовавшего, прилежно молю Тя: даждь мне, грешному, последовати их учению, вере, долготерпению, любви, и их молитвенным пособием, паче же Твоею вседействующей благодатию небесныя с ними сподобитеся славы и хвалити Пресвятое имя Твое, Отца и Сына и Святаго Духа во веки. Аминь.

Молитва великомученику Димитрию Солунскому

Об укреплении на дела благая

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя с дерзновением Небесному Царю, испроси у Него прощение согрешений наших и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, обитель сию и всякую страну христианскую. Исходатайствуй у Царя Царствующих на враги победу и одоление православным христианам, всей державе православной мир, тишину, твердость в вере и преспеяние во благочестии; нам же, чтущим честную память твою, испроси благодатное укрепление на дела благая, да благоутробное Владыце нашему Христу Богу зде творяще, сподобимся молитвами твоими наследовати Царствие Небесное для вечнаго прославления Его со Отцем и Святым Духом. Аминь.

Молитва святителю Митрофану, Воронежскому Чудотворцу

О жизненном устройстве детей

О святителю отче Митрофане! Се мы грешнии, нетлением честных мощей твоих и многими благодеяньми, чудесно содеянными и содеваемыми тобою, уверившеся, исповедуем, яко имаши велию благодать у Господа Бога нашего, и всесмиренно ко твоему благосердию припадающе, тебе молимся сице: моли о нас Христа Бога нашего, да низпослет всем чтущим святую память твою и усердно к тебе прибегающим богатыя милости Своя; да утвердит во святей Своей Православной Церкви живый дух правыя веры и благочестия, дух ведения и любве, дух мира и радости о Дусе Святе, да вся чада ея, чиста суща от мирских искушений и плотских похотей и злаго действия злых духов, духом и истиною покланяются Ему, и усердно о соблюдении заповедей Его ко спасению душ своих да потщатся. Пастырем ея да даст Господь святую ревность попечения о спасении людей, во еже неверующия просветити, неведущия наставити, сомнящыяся вразумити, отпадшия от Православныя Церкве к ней возвратити, верующия в вере соблюсти, грешныя на покаяние подвигнути, кающияся утешити и во исправлении жизни утвердити, и тако вся люди ко уготованному вечному Царству святых Его привести. Умоли Господа, угодниче Христов, благочестивым правителем нашим мужество, мудрость, одоление на вся враги даровати, благопоспешение во устроении Отечества нашего низпослати, всем же людем православным да дарует благий Бог наш мир, тишину, безмятежие и изобилие плодов земных, паче же ко исполнению заповедей Его тщание неленостное: и да избавит град сей и вся иныя грады и веси, от глада, труса, потопа, огня, меча, нашествия иноплеменных, междоусобныя брани, смертоносныя язвы и от всякаго зла. Ей, святителю Божий, да устроиши молитвами твоими вся благая душам и телесем нашим: да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.

Молитва святителю Иоанну Тобольскому

О наставлении на путь истинный и о покорении своей воли – воле Божией

О пастырю добрый, святителю отче наш Иоанне, праведный путь жития Твоего приведе Тя к вечному Солнцу правды. Ты бо всею душею взыскал еси Бога, возлюбил Его паче сей благовременной жизни. Мы же удалихомся Божия благостыни, ходяще по злой своей воле, возлюбихом суетная наслаждения, вознерадехом о спасении душ наших, затворихом сердце для слышания слова Божественнаго и отвергохомся братолюбия.

О благостный святителю Иоанне! Не попусти нам погибнути в тине грехов наших, но вознеси о нас моление ко Господу, да помилует нас и дарует нам покаяние, да не поглотит нас бездна лихоимства, злобы и измены, да умолкнет междуусобная брань, да избавится земля наша глада и всякаго гнева Божия, да воцарится мир среди мира земнаго.

Услыши нас грешных, святче Божий, яви нам чудное заступление твое, посети нас сирых, нищих, бедствующих и заблудших овец твоего стада: недуги наша исцели, укрепи силы к терпеливому несению креста жизни, внемли стенанию страждущих, рыданию одиноких, призри на слезы немощных и печальных. Мы болезнуем душею и изнемогаем сердцем; молися, поборниче истины, да возвратятся отпадшия в лоно Церкви Христовой, да славится имя Божие в нас, да царствует правда и любовь в земли нашей и мир Христа Бога нашего да сподобимся прияти, радость же о Господе да возсияет в сердцах наших и благословим Пречестное и Великолепое Имя Единосущныя и Нераздельныя Троицы Отца и Сына и Святаго Духа во веки веков. Аминь.