Текст книги "Семь смертных грехов. Наказание и покаяние"

Молитва 1

Ангеле Христов святый, к тебе припадая, молюся, хранителю мой святый, приданный мне на соблюдение души и телу моему грешному от святаго крещения, аз же своею леностию и своим злым обычаем прогневах твою пречистую светлость и отгнах тя от себе всеми студными делы: лжами, клеветами, завистию, осуждением, презорством, непокорством, братоненавидением, и злопомнением, сребролюбием, прелюбодеянием, яростию, скупостию, объядением без сытости и опивством, многоглаголанием, злыми помыслы и лукавыми, гордым обычаем и блудным возбешением, имый самохотение на всякое плотское вожделение. О, злое мое произволение, егоже и скоти безсловеснии не творят! Да како возможеши воззрети на мя, или приступити ко мне, аки псу смердящему? Которыма очима, ангеле Христов, воззриши на мя, оплетшася зле во гнусных делех? Да како уже возмогу отпущения просити горьким и злым моим и лукавым деянием, в няже впадаю по вся дни и нощи и на всяк час? Но молюся ти припадая, хранителю мой святый, умилосердися на мя грешнаго и недостойнаго раба твоего (имя), буди ми помощник и заступник на злаго моего сопротивника, святыми твоими молитвами, и Царствия Божия причастника мя сотвори со всеми святыми, всегда и ныне и присно и во веки веков. Аминь.

Молитва 2

Ангеле Христов, хранителю мой святый и покровителю души и тела моего, вся ми прости, елика согреших во днешний день; и от всякаго лукавствия противнаго ми врага избави мя, да ни в коемже гресе прогневаю Бога моего; но моли за мя грешнаго и недостойнаго раба, яко да достойна мя покажеши благости и милости Всесвятыя Троицы и Матере Господа моего Иисуса Христа и всех святых. Аминь.

Молитва 3

Ангеле Божий, хранителю мой святый, на соблюдение мне от Бога с небесе данный, прилежно молю тя: ты мя днесь просвети и от всякого зла сохрани, ко благому деянию настави и на путь спасения направи. Аминь.

Молитва 4

Святый ангеле, предстояй окаянней моей души и страстней моей жизни, не остави мене грешнаго, ниже отступи от мене за невоздержание мое. Не даждь места лукавому демону обладати мною насильством смертнаго сего телесе; укрепи бедствующую и худую мою руку и настави мя на путь спасения. Ей, святый ангеле Божий, хранителю и покровителю окаянныя моея души и тела, вся мне прости, еликими тя оскорбих во вся дни живота моего, и аще что согреших в прешедшую нощь сию, покрый мя в настоящий день, и сохрани мя от всякаго искушения противнаго, да ни в коем гресе прогневаю Бога, и молися за мя ко Господу, да утвердит мя в страсе Своем, и достойна покажет мя раба Своея благости. Аминь.

Молитва 5

О, святый ангеле, хранителю и покровителю мой благий! С сокрушенным сердцем и болезненною душею предстою ти, моляся: услыши мя, грешнаго раба своего (имя) с воплем крепким и плачем горьким вопиющаго: не помяни моих беззаконий и неправд, ими же аз окаянный прогневляю тя по вся дни и часы, и мерзостна себе творю пред Создателем нашим Господем, явися мне милосерд и не отлучайся мене сквернаго даже до кончины моея, возбуди мя от сна греховнаго и пособствуй твоими молитвами прочее время живота моего без порока прейти и сотворити плоды достойны покаяния, паче же от смертных падений греховных соблюди мя, да не погибну во отчаянии, и да не порадуется враг о погибели моей. Вем воистину и усты исповедую, яко никтоже таков друг и предстатель, защититель и поборник, якоже ты, святый ангеле: предстоя бо Престолу Господню, молишися о мне непотребном и паче всех грешнейшем, да не изымет Преблагий души моея в день нечаяния моего и в день творения злобы. Не престай убо, умилостивляя Премилосердаго Господа и Бога моего, да отпустит согрешения моя, яже сотворих во всем житии моем, делом, словом и всеми моими чувствы, и имиже весть судьбами да спасет мя, да накажет мя зде по Своей неизреченной милости, но да не обличит и не истяжет мя онамо по Своему нелицеприятному правосудию, да сподобит мя покаяние принести, с покаянием же Божественное Причащение достойне прияти, о сем паче молю и таковаго дара всеусердно желаю. В страшный же час смерти неотступен буди ми, благий хранителю мой, прогоняя мрачныя демоны, имущия устрашити притрепетную душу мою, защити мя от тех ловления, егда имам преходити воздушная мытарства, да, храним тобою, безбедно достигну рая ми вожделеннаго, идеже лицы святых и горних сил непрестанно восхваляют Всечестное и Великолепое имя в Троице славимаго Бога, Отца и Сына и Святаго Духа, Емуже подобает честь и поклонение во веки веков. Аминь.

Тропарь, глас 6

Ангеле Божий, хранителю мой святый, живот мой соблюди во страсе Христа Бога, ум мой утверди во истиннем пути, и к любви горней уязви душу мою, да, тобою направляемь, получу от Христа Бога велию милость.

Кондак, глас 4

Явися мне милосерд, святый ангеле Господень, хранителю мой, и не отлучайся от мене сквернаго, но просвети мя светом неприкосновенным и сотвори мя достойна Царствия Небеснаго.

Молитва 1

О, многострадальный и всехвальный мучениче Вонифатие! Ко твоему заступлению ныне прибегаем, молений нас, поющих тебе, не отвержи, но милостивно услыши нас. Виждь братию и сестры наша, тяжким недугом пианства одержимыя, виждь того ради от матере своея, Церкви Христовой, и вечнаго спасения отпадающия. О, святый мучениче Вонифатие, коснися сердцу их данною ти от Бога благодатию, скоро возстави от падений греховных и ко спасительному воздержанию приведи их. Умоли Господа Бога, Егоже ради страдал еси, да простив нам согрешения наша, не отвратит милости Своея от сынов Своих, но да укрепит в нас трезвение и целомудрие, да поможет Своею десницею трезвящимся спасительный обет свой до конца сохранити во дни и нощи, в Нем бодрствующе и о Нем добрый ответ на Страшное судилище дати. Приими, угодниче Божий, молитвы матерей, о чадех своих слезы проливающих; жен честных, о мужех своих рыдающих, чад сирых и убогих, от пианиц оставленных, всех нас, к иконе твоей припадающих, и да приидет сей вопль наш молитвами твоими ко Престолу Всевышняго даровати всем по молитвам их здравие и спасение душ и телес, наипаче же Царство Небесное. Соблюди нас от лукаваго ловления и всех козней вражиих, в страшный час исхода нашего помози прейти непреткновенно воздушныя мытарства и молитвами твоими избави вечнаго осуждения. Умоли же Господа даровати нам к отечеству нашему любовь нелицемерную и непоколебимую пред врагами Церкви Святыя, видимыми и невидимыми, да покроет нас милость Божия в нескончаемые веки веков. Аминь.

Молитва 2

О, святый страстотерпче Христов, воине Царя Небеснаго, земная сладострастия презревый и к Горнему Иерусалиму страданием возшедый, мучениче Вонифатие! Услыши мя грешнаго, приносящаго от сердца молебная пения, и умоли Господа нашего Иисуса Христа простити вся моя согрешения, в ведении и в неведении мною содеянная. Ей, мучениче Христов, образ покаяния собою показавый грешным! Буди ми на злаго сопротивника диавола твоими молитвами к Богу помощник и заступник: много бо поревахся избегнути сетей его лукавых, но удицею греховною уловлен и крепко влачимь от него, не могу избавитися, аще не ты предстанеши ми, во обстояниих горькая терпящему, и колико покушахся покаятися, но ложь пред Богом бых. Сего ради к тебе прибегаю и молюся: спаси мя, святче Божий, от всех зол твоим предстательством, благодатию же Всесильнаго Бога, в Троице Святей славимаго и покланяемаго, Отца и Сына и Святаго Духа, ныне и присно и во веки веков. Аминь.

Тропарь, глас 4

К сословию послан мучеников, мученик был еси истинен пострадав за Христа крепчайше, всехвальне, мощми же возвратился еси верою пославшей тя, Вонифатие блаженне, моли Христа Бога прияти нам грехов прощение.

Кондак, глас 4

Священие непорочное самовольно Тебе привел еси, Иже от Девы тебе ради родитися хотящему, святе венценосче, премудре Вонифатие.

Молитва

О, великая сила покаяния! О, неизмеримая глубина милосердия Божия! Ты, преподобне Моисее, был прежде разбойником, но потом ужаснулся своих грехов, возскорбел о них и в раскаянии пришел в монастырь, и там в великом плаче о своих бывших беззакониих и в трудных подвизех поста и молитвы проводил дни своя до кончины, и удостоился Христовой благодати прощения и дара чудотворения.

О, преподобне, ты от тяжких грехов достигл пречудных добродетелей! Помози и молящимся тебе рабом Божиим (имена), влекомым в погибель от безмернаго вина употребления, повреждающаго безсмертную душу и тело – храм Духа Святаго. Склони на них свой милостивый взор и не презри их, но внемли им, прибегающим к тебе.

Моли, святе Моисее, Владыку Христа, чтобы Он, Милосердый, не отверг их безсильных и несчастных, которыми овладела страсть чрезмернаго винопития, и не возрадовался бы диавол их погибели, ибо все мы, как создания Божии, искуплены Пречистой Кровию Сына Его. Услышь же, преподобне Моисее, молитву их и нашу. Отгони от них диавола, даруй им силу победить их страсть, приведи их на путь добра, освободи от рабства страстем, избавь от пагубы безмернаго винопития, дабы, обновленнии, в духовном трезвлении и светлом уме, возлюбили они всяческое воздержание и благочестие и вечно прославляли спасающаго всегда создания Свои Всеблагаго Бога, Емуже подобает слава, честь и поклонение во веки веков. Аминь.

Тропарь, глас 1

Пустынный житель и в телеси ангел, и чудотворец явился еси, Богоносне отче наш Моисее: постом, бдением, молитвою небесная дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою исцеления.

Кондак, глас 4

Мурины заушив и лица демонов поплевав, мысленно просиял еси, якоже солнце светло, светом жития твоего и учением наставляя души наша.

Молитва

О, великий угодниче Христов, святый праведный отче Иоанне Кронштадтский, пастырю дивный, скорый помощниче и милостивый предстателю!

Вознося славословие Триединому Богу, ты молитвенно взывал:

«Имя Тебе – Любовь: не отвергни меня заблуждающагося;

Имя Тебе – Сила: укрепи меня изнемогающаго и падающаго;

Имя Тебе – Свет: просвети душу мою, омраченную житейскими страстями;

Имя Тебе – Мир: умири мятущуюся душу мою.

Имя Тебе – Милость: не переставай миловать меня».

Ныне благодарная твоему предстательству всероссийская паства молится тебе:

Христоименитый и праведный угодниче Божий!

Любовию твоею озари нас, грешных и немощных, сподоби нас принести достойные плоды покаяния и неосужденно причащатися Святых Христовых Таин.

Силою твоею веру в нас укрепи, в молитве поддержи, недуги и болезни исцели, от напастей, врагов видимых и невидимых избави.

Светом лика твоего служителей и предстоятелей Aлтаря Христова на святые подвиги пастырскаго делания подвигни, младенцем воспитание даруй, юное настави, старость поддержи, святыни храмов и святые обители озари.

Умири, чудотворче и провидче преизряднейший, народы страны нашея, благодатию и даром Святаго Духа избави от междоусобныя брани, расточенная собери, прелыщенныя обрати и совокупи Святей Соборной и Апостольской Церкви.

Милостию твоею супружества в мире и единомыслии соблюди, монашествующим в делах благих преуспеяние и благословение даруй, малодушныя утеши, страждущих от духов нечистых свободи, в нуждах и обстояниих сущих помилуй и всех нас на путь спасения настави.

Во Христе живый, отче наш Иоанне!

Приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. Аминь.

Тропарь, глас 1

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Тайн благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкви нашея украшение, моли Всеблагаго Бога умирити мир и спасти души наша.

Кондак, глас 3

Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: «Созижду Церковь Мою и врата адова не одолеют ей».