Текст книги "Греческий молитвослов. Молитвы на всякое время дня, недели и года"

Последование об умершем

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

Псалом[90

Живы́й в по́мощи Вы́шняго в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́, я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́щет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твоей ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́, я́ко Ангелом Свои́м запове́сть о тебе́, сохрани́™ тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. я́ко на Мя упова́ и изба́влю й, покры́ю й, я́ко позна́ и́мя Мое́. Воззове́т ко Мне и услы́шу его́, с ним есмь в ско́рби, изму́ его́ и просла́влю его́, долгото́ю дний испо́лню его́ и явлю́ ему́ спасе́ние Мое́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́йя, аллилу́йя, аллилу́йя, сла́ва Тебе́, Бо́же.

(Трижды, с поклонами)

Го́споди, поми́луй. (Трижды)

Тропарь об усопшем, глас 8

Глубино́ю му́дрости человеколю́бие вся строя́ и поле́зная всем подава́я, еди́не Соде́телю, упоко́й, Го́споди, ду́шу раба́ Твоего́: на Тя бо упова́ние возложи́, Творца́ и Зижди́теля и Бога на́шего.

Слава, и ныне: Богородичен: Тебе́ и сте́ну и приста́нище и́мамы, и моли́твенницу благоприя́тную к Бо́гу, Его́же родила́ еси́, Богоро́дице безневе́стная, ве́рным спасе́ние.

Затем канон, глас 8

Песнь 1

Ирмос: Во́ду проше́д я́ко су́шу и Еги́петскаго зла избежа́в, изра́ильтянин вопия́ше: Изба́вителю и Бо́гу на́шему пойм.

Поко́й, Го́споди, ду́шу усо́пшаго раба́ Твоего́ (имярек).

Отве́рзи уста́ моя́, Спа́се, и сло́во ми пода́ждь моли́тися, Милосе́рде, о преста́влением рабе́ Твое́м (имярек), да поко́иши ду́шу его́, Влады́ко.

Поко́й, Го́споди, ду́шу усо́пшаго раба́ Твоего́ (имярек).

Мертв быв пло́тию, Спа́се, и во гро́бе полежа́в с ме́ртвыми, ду́шу раба́ Твоего́ поко́й на ме́сте зла́чне, я́ко милосе́рд.

Слава, Троичен: Моле́бный глас мой услы́ши, Бо́же Трисоста́вне, и учини́ ду́шу преста́вленнаго в не́дрех Авраа́мовех, Изба́вителю.

И ныне, Богородичен: Ты, Пречи́стая Богоро́дице, Его́же без иску́са му́жеска заче́нши, моли́ Сы́на Своего́ пода́ти поко́й рабу́ Своему́ преста́вленному.

Песнь 3

Ирмос: Небе́снаго кру́га верхотво́рче Го́споди и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколюбие.

Поко́й, Го́споди, ду́шу усо́пшаго раба́ Твоего́ (имярек).

В ме́сте зла́чне, в ме́сте поко́йне, иде́же ли́цы святы́х веселя́тся, ду́шу раба́ преста́вленнаго поко́й, Христе́, еди́не ми́лостиве.

Поко́й, Го́споди, ду́шу усо́пшаго раба́ Твоего́ (имярек).

Иде́же ли́цы святы́х, ту учини́, Влады́ко, ду́шу послужи́вшаго Ти ве́рно все́м сердцем и поноси́вшаго и́го Твое́ на ра́ме си, я́ко еди́н Влады́ка животу́ и сме́рти.

Слава, Троичен: Небе́сный О́тче Вседержи́телю и Сы́не Единоро́дне и Ду́ше Святы́й исходя́й, пре́зри уме́ршаго согреше́ния и в Це́ркви пе́рвенец сотвори́ его́ сла́вити Тя со все́ми уго́ждшими Тебе́.

И ныне, Богородичен: я́ко Ма́ти Свята́я Пресвята́го Го́спода, Мари́е Влады́чице, со все́ми святы́ми Сего́ моли́ ду́шу поко́ити раба́ Своего́ (имярек) в Небе́сных селе́ниих.

Седален, глас 5

Поко́й, Спа́се наш, с пра́ведными раба́ Твоего́, и сего́ всели́ во дворы́ Своя́, я́коже есть пи́сано, презира́я я́ко благ прегреше́ния его́ во́льная и нево́льная, и вся я́же в ве́дении и не в ве́дении, Человеколюбие.

Слава, и ныне: Богородичен От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй нас.

Песнь 4

Ирмос: Услы́шах, Го́споди, смотре́ния Твоего́ та́инство, разума́х де́ла Твоя́ и просла́вих Твое́ Божество́.

Поко́й, Го́споди, ду́шу усо́пшаго раба́ Твоего́ (имярек).

Сше́дый в преиспо́дняя, Христе́, совоздви́же вся́ уме́ршия, и преста́вльшагося от на́с поко́й, Спа́се ще́дрый.

Поко́й, Го́споди, ду́шу усо́пшаго раба́ Твоего́ (имярек).

Никто́же без греха́ есть, но то́кмо Ты еди́н, Влады́ко, сего́ ра́ди преста́вленнаго грехи́ оста́ви и в ра́й всели́.

Слава, Троичен: Услы́ши, Тро́ице Свята́я, гла́сы моле́бныя, приноси́мыя Ти́ в це́ркви о усо́пшем, и богонача́льным Твои́м све́том озари́ ду́шу, омраче́нную су́етными приверже́нии.

И ныне, Богородичен: Родила́ еси́, Пречи́стая, без му́жеска Се́мене Бо́га сверше́нна и Челове́ка сверше́нна, взе́млющаго грехи́ на́ша, Де́во: Того́ моли́, Госпоже, преста́вльшемуся рабу́ Твоему́ пода́ти покой.

Песнь 5

Ирмос: Просвета́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколюбие.

Поко́й, Го́споди, ду́шу усо́пшаго раба́ Твоего́ (имярек).

Имы́й животу́ и сме́рти вла́сть, преста́вленнаго от нас поко́й, Христе́ Бо́же, я́ко Ты еси́ всем Спа́се поко́й и живо́т.

Поко́й, Го́споди, ду́шу усо́пшаго раба́ Твоего́ (имярек).

На Тя, Спа́се, наде́жду возло́ж, уме́рый оты́де от нас. Ты же, Го́споди, уще́дри его́ я́ко Бог многоми́лостив.

Слава, Троичен: Просвета́ нас, трисвя́то воспева́емый Влады́ко, моля́щих Ти ся, мир Небе́сный прия́-ти и в према́рных се́лех ду́шу учина́, отше́дшую от вре́менных о наде́жди безконе́чных.

И ныне, Богородичен: Шу́яго стоя́ния, Пречи́стая, изба́вити преста́вленнаго умола́ Сы́на Своего́, Де́во Госпоже́, я́ко Спа́са и Бо́га на́шего Ма́ти су́щи.

Песнь 6

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя́ напо́лнися и живо́т мой а́ду прибли́жися. Но молю́ся, я́ко Ио́на: от тли, Бо́же, возведи́ мя.

Поко́й, Го́споди, ду́шу усо́пшаго раба́ Твоего́ (имярек).

Ада испрове́рг, Влады́ко Христе́, воскреси́л еси́ уме́ршия от ве́ка, и ны́не преста́вленнаго от нас на ло́не Авраа́мли, Бо́же, всели́, прегреше́ния же его́ отпусти́ я́ко милосе́рд.

Поко́й, Го́споди, ду́шу усо́пшаго раба́ Твоего́ (имярек).

За́поведь, ю́же ми дал еси́, преступи́х, Христе́, и сме́ртен бых. Но Ты, Бо́же, сше́дый во гроб и спя́-щия ду́ши и́же от века воскреси́вый, не возста́ви, Влады́ко, на муче́ние, но на поко́й, преста́вленный вопие́т Ти с на́ми, Многоми́лостиве.

Слава, Троичен: Мо́лим Тя, безнача́льне Отче и Сы́не и Ду́ше Святы́й, зло́бою ду́шу зло́бнаго ми́ра озло́бленую и к Тебе́, Зижди́телю, прише́дшую во а́дово дно, не отри́ни, Бо́же Спа́се наш.

И ныне, Богородичен: С Небе́с сше́дшаго я́ко дождь на руно́ на Тя, Де́во Пречи́стая, Христа́ Бо́га на́шего моли́ пода́ти преста́вленному (имярек) от нас, поко́й на Небеса́х со все́ми святы́ми.

Кондак, глас 8

Со святы́ми упоко́й, Христе́, ду́шу раба́ Твоего́, иде́же несть боле́знь, ни печа́ль, ни воздыха́ние, но жизнь безконе́чная.

Песнь 7

Ирмос: От Иуде́и доше́дше о́троцы в Вавило́не иногда́, ве́рою Тро́ическою пла́мень пе́щный попра́ша, глаго́люще: оте́ц на́ших Бо́же, благослове́н еси́.

Поко́й, Го́споди, ду́шу усо́пшаго раба́ Твоего́ (имярек).

Влады́ко Христе́ Бо́же, егда́ хо́щеши суди́ти ми́ру, пощади́ ду́шу раба́ Твоего́, его́же от на́с прия́т, ве́рно Ти́ вопию́ща: оте́ц на́ших Бо́же, благослове́н еси́.

Поко́й, Го́споди, ду́шу усо́пшаго раба́ Твоего́ (имярек).

В сла́дости ра́йстей, иде́же пра́ведных ду́ши веселя́тся послужи́вших Тебе́, причти́ с ни́ми, Христе́, ду́шу раба́ Твоего́, вопию́щаго Ти ве́рно: оте́ц на́ших Бо́же, благослове́н еси́.

Слава, Троичен: И́же иуде́йския три о́троки спасы́й во огни́, И́же в трие́х ли́цех воспе́тый, изба́ви огня́ ве́чнаго усо́пшаго, воспе́вшаго Ти ве́рно: оте́ц на́ших Бо́же, благослове́н еси́.

И ныне, Богородичен: Влады́ку Христа́ ро́ждшая вся́ческих Бо́га, вла́сти те́мныя возду́шнаго кня́зя изба́ви, Де́во, ду́шу преста́вльшагося в ве́ре и воспе́вшаго: оте́ц на́ших Бо́же, благослове́н еси́.

Песнь 8

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: де́ти, благослови́те, свяще́ннии, воспо́йте, лю́дие, превозноси́те Его́ во ве́ки.

Поко́й, Го́споди, ду́шу усо́пшаго раба́ Твоего́ (имярек).

Сконча́в житие́ свое́ и к Тебе́ прибе́г, Го́споди, вопие́т ны́не: прегреше́ния моя́ оста́ви, Христе́ Спа́се, и не осуди́ мене́, егда́ хо́щеши суди́ти все́м, вопию́щаго Ти: де́ти, благослови́те, свяще́ннии, воспо́йте, лю́-дие, превозноси́те Его́ во ве́ки.

Поко́й, Го́споди, ду́шу усо́пшаго раба́ Твоего́ (имярек).

Носи́вшаго, Влады́ко, йго и бре́мя Твое́ ле́гкое на ра́му свою́ а́ще и не всегда́, в ме́сте пра́ведных Твои́х всели́ ду́шу его́, воспе́вшаго Ти, Христе́ Спа́се: де́ти, благослови́те, свяще́ннии, воспо́йте, лю́дие, превозноси́те Его́ во ве́ки.

Слава, Троичен: Безнача́льная Тро́ице Свята́я, Бо́же О́тче и Сы́не и Ду́ше Святы́й, в лик святы́х причти́ ду́шу преста́вленнаго раба́ Твоего́, огня́ ве́чнаго изба́вив, да Тя хва́лит вопия́: де́ти, благослови́те, свяще́ннии, воспо́йте, лю́дие, превозноси́те Его́ во́ веки.

И ныне, Богородичен: Тя Де́во проро́честии ли́цы прореко́ша: ов у́бо жезл нарече́ Тя, а ин дверь восто́чную, ов же го́ру. Мы же испове́даем Тя вои́стинну Богоро́дицу, Бо́га вся́ческих ро́ждшую, Его́же моли́ упоко́ити преста́вленнаго во ве́ки вся.

Песнь 9

Ирмос: Ужасе́ся о сем не́бо и земли́ удиви́шася концы́, я́ко Бог яви́ся челове́ком пло́тски, и чре́во Твое́ бы́сть простра́ннейшее небе́с. Тем Тя Богоро́дицу Ангелов и челове́к чинонача́лия велича́ют.

Поко́й, Го́споди, ду́шу усо́пшаго раба́ Твоего́ (имярек).

Христе́ Бо́же мо́й Спа́се, Ада́мле Ты взем преступле́ние, сме́рти вкуси́, да челове́ки от нея́ свободи́ши, Милосе́рде. Те́мже мо́лим Тя: преста́вленнаго поко́й во дво́рех святы́х Твои́х, я́ко еди́н пребла́г и милосе́рд.

Поко́й, Го́споди, ду́шу усо́пшаго раба́ Твоего́ (имярек).

Несть никто́же, я́же не согреши́ в челове́цех, но то́кмо Ты, Бо́же, взе́мляй грехи́ всего́ ми́ра. Те́мже очи́стив раба́ Твоего́ от прегреше́ний, учини́ его́, Милосе́рде, у Себе́: Ты бо живо́т еси́ и поко́й и свет и весе́лие всех уго́ждших Ти, Бла́же.

Слава, Троичен: Удиви́ся о Тебе́, Христе́, вся́ко естество́: ка́ко безнача́льнаго Отца́ Сын единоро́дный плоть от Де́вы де́йством Свята́го Ду́ха прия́т, и хотя́ оживи́ти всех, пострада́ я́ко челове́к. Те́мже преста́вленнаго от нас с пра́ведными поко́й, я́ко Человеколюбец.

И ныне, Богородичен: Неве́сту Тя нарица́ем, Пречи́стая, а́нгельскаго Царя́, неви́димаго Бо́га, и Ма́терь воплоще́ннаго Сына из Тебе́, и поко́ище Свята́го Духа, и моле́бницу о усо́пшем рабе́ Твое́м (имярек), и помо́щницу и́мамы любо́вию Тя́ велича́ющий.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Молитвы Святой Троице

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди. Го́споди, поми́луй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Молитва Господня

О́тче наш, И́же еси́ на Небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Яко Твое́ есть ца́рство и сила и слава во веки. Ами́нь.

Тропари об усопшем, глас 4

Со ду́хи пра́ведных сконча́вшагося ду́шу раба́ Твоего́, Спа́се, упоко́й, сохраня́я его́ во блаже́нней жи́зни я́же у Тебе́, Человеколю́бие.

В поко́ищи Твое́м, Господи, иде́же вси святи́и Твои́ упокоева́ются, упоко́й ду́шу раба́ Твоего́, я́ко еди́н еси́ Человеколю́бец.

Слава: Ты еси́ Бог, соше́дый во ад и у́зы окова́нных разреши́вый, Сам и ны́не усо́пшаго раба́ Твоего́ упоко́й.

И ныне, Богородичен: Еди́на Чи́стая и непоро́чная Де́во, Бо́га без Се́мене ро́ждшая, моли́ спасти́ся души́ его́.

Затем:

Поко́й, Го́споди, раба́ Твоего́. (40 раз, с поклонами)

Молитва за усопшего

Помяни́, Го́споди Бо́же, и́же о ве́ре и о наде́жди живота́ ве́чнаго усо́пшаго раба́ Твоего́ (имярек), я́ко благ и Человеколю́бец превосходя́ грехи́ и потребля́я непра́вды. Осла́би, оста́ви, прости́ все во́льное его́ согреше́ние и нево́льное, возставля́я того́ во свято́е второ́е прише́ствие Твое́ в приобще́ние ве́чных Твои́х благ, о ни́хже в Тя еди́наго ве́рова, и́стиннаго Бо́га и Человеколю́бца, я́ко Ты еси́ воскресе́ние и живо́т и поко́й Твоему́ рабу́, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м и Пресвяты́м Ду́хом, ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без нетле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй. (Трижды)

Отпуст

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и все́х святы́х, поми́луй и упоко́й ду́шу раба́ Твоего́ (имярек) в безконе́чныя ве́ки, я́ко благ и Человеколю́бец.

Рабу́ Бо́жию преста́вльшемуся (имярек) ве́чная па́мять. (Трижды)

Последование о православных правителях (Двупсалмие)[388]388
  Может быть прочитано после полунощницы, перед утреней или в любое другое время.


[Закрыть]

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

Псалом 19

Услы́шит тя Госпо́дь в день печа́ли, защи́тит тя и́мя Бо́га Иа́ковля. По́слет ти по́мощь от Свята́го и от Сио́на засту́пит тя. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́ и весь сове́т твой испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит eго́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех, мы же во и́мя Го́спода Бо́га на́шего призове́м. Ти́и спя́ти бы́ша и падо́ша, мы же воста́хом и испра́вихомся. Го́споди, спаси́ царя́ и услы́ши ны, во́ньже а́ще день призове́м Тя.

Псалом 20

Го́споди, си́лою Твое́ю возвесели́тся царь и о спасе́нии Твое́м возра́дуется зело́. Жела́ние се́рдца его́ дал еси́ ему́, и хоте́ния устну́ его́ не́си лиши́л его́, я́ко предвари́л еси́ его́ благослове́нием благосты́нным, положи́л еси́ на главе́ его́ вене́ц от ка́мене че́стна. Живота́ проси́л есть у Тебе́, и дал еси́ ему́ долготу́ дний во век ве́ка. Ве́лия сла́ва его́ спаса́нием Твои́м, сла́ву и велеле́пие возложи́ши на него́, я́ко да́си ему́ благослове́ние во век ве́ка, возвесели́-ши его́ ра́достию с лица́м Твои́м, я́ко царь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ всем враго́м Твои́м, десни́ца Твоя́ да обря́щет вся ненави́дящия Тебе́. я́ко положи́ши их я́ко пещь о́гненную во вре́мя лица́ Твоего́, Госпо́дь гне́вом Свои́м смяте́т я́, и сна́сть их огнь. Плод их от земли́ погуби́ши, и са́мя их от сыно́в челова́ческих. я́ко уклони́ша на Тя зла́я, помы́слиша сова́ты, и́хже не возмо́гут соста́вити. я́ко положи́ши я́ хреба́т, во избы́тцех Твои́х угото́-виши лица́ их. Вознеси́ся, Го́споди, си́лою Твое́ю, воспое́м и пое́м си́лы Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ва́ки веко́в. Ами́нь.

Аллилу́йя, аллилу́йя, аллилу́йя, сла́ва Тебе́, Бо́же.

(Трижды, с поклонами)

Молитвы Святой Троице

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди. Го́споди, поми́луй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Молитва Господня

О́тче наш, И́же еси́ на Небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Яко Твое́ есть ца́рство и сила и слава во веки. Ами́нь.

Тропари Кресту и о правителях

Спаси́, Го́споди, лю́ди Твоя́, и благослови́ достоя́ние Твое́, побе́ды благове́рным прави́телем на сопроти́вныя да́руя, и Твое́ сохраня́я Кресто́м Твои́м жи́тельство.

Слава: Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю благове́рныя прави́тели на́ша, побе́ды дая́ им на сопоста́ты, посо́бие иму́щим Твое́ ору́жие ми́ра, непобеди́мую побе́ду.

И ныне, Богородичен: и о правителях: Предста́тельство стра́шное и непосты́дное, не пре́зри, Блага́я, моли́тв на́ших, Всепе́тая Богоро́дице, утверди́ правосла́вных жи́тельство: спаси́ ве́рныя прави́тели Твоя́ и пода́ждь им с Небеса́ побе́ду, зане́ родила́ еси́ Бо́га, еди́на благослове́нная.

Господи, помилуй. (40 раз)

Честне́йшую Херуви́м и сла́внейшую без сравне́ния Серафи́м, без нетле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй. (Трижды)

Отпуст

Го́споди Иису́се Христе́, Бо́же наш, моли́тв ра́ди Пречи́стыя Твоея́ Ма́тере, святы́х боговенча́нных царе́й и равноапо́столов Константи́на и Еле́ны, святы́х равноапо́стольных вели́ких князе́й Влади́мира и Ольги, святы́х Ца́рственных страстоте́рпцев и му́чеников и всех святы́х правосла́вных госуда́рей, поми́луй и спаси́ держа́ву на́шу, благочести́вых прави́телей и во́инство ея́, я́ко благ и Человеколю́бец.

Помянник вседневный

Помяни́, Го́споди Иису́се Христе́, Бо́же на́ш, ми́лости и щедро́ты Твоя́ от ве́ка су́щия, и́хже ра́ди и вочелове́чился еси́, и распя́тие и сме́рть спасе́ния ра́ди пра́во в Тя ве́рующих претерпе́ти изво́лил еси́, и воскре́с из ме́ртвых, возне́слся еси́ на Небеса́, и седи́ши одесну́ю Бо́га Отца́, и призира́еши на смире́нныя мольбы́ всем се́рдцем призыва́ющих Тя; приклони́ у́хо Твое́ и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго Тебе́ за вся лю́ди Твоя́ принося́щаго.

И в пе́рвых помяни Це́рковь Твою́ святу́ю собо́рную апо́стольскую, ю́же снабде́л еси́ честно́ю Кро́вию, и утверди́, укрепи́, и разши́ри, и умно́жи, умири́, и непребори́му а́довыми враты́ во ве́ки сохрани́: раздира́ния церкве́й ути́ши, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Ду́ха обрати́. (Поклон)

Спаси́, Го́споди, и поми́луй благове́рных прави́телей на́ших, огради́ ми́ром держа́ву их и покори́ под но́зе их вся́каго врага́ и супоста́та, и глаго́ли ми́рная и блага́я в се́рдцы их о Це́ркви Твое́й свято́й, и о всех лю́дех Твои́х, да и мы в тишине́ их ти́хое и безмо́лвное житие́ поживе́м в правове́рии и во вся́ком благоче́стии и че́стности. (Поклон)

Спаси́, Го́споди, и поми́луй Вели́каго господи́на и отца́ на́шего Святе́йшаго Кири́лла, Патриа́рха

Московского и всея́ Руси́, и Святе́йших Вселе́нских Патриа́рхов, и Преосвяще́нных митрополи́тов, архиепи́скопов и епи́скопов правосла́вных, иере́и же и диа́коны, и весь приче́т церко́вный, и́хже поста́вил еси́ пасти́ слове́сное Твое́ ста́до, и моли́твами их поми́луй и спаси́ мя гре́шнаго. (Поклон)

Если в монастыре: Спаси́, Го́споди, и поми́луй отца́ на́шего архи́мандрита (имярек) или: игу́мена (имярек) со все́ю е́же о Христе́ бра́тнею, и моли́твами их и мене́ окая́ннаго поми́луй. (Поклон)

Спаси́, Го́споди, и поми́луй отца́ моего́ духо́внаго (имярек) и святы́ми его́ молитвами прости́ моя́ согреше́ния. (Поклон)

Если в монастыре: Спаси́, Го́споди, и поми́луй вся служа́щия в труде́х во святе́й оби́тели сей бра́тию на́шу, рукоде́льныя же мирски́я рабо́тники и земледе́льцы монастыря́ сего́, и вся христиа́ны. (Поклон) Здесь поминай родителей твоих, если они живы: Спаси́, Го́споди, и поми́луй роди́теля моя́ (имярек), и бра́тию, и сро́дники моя́ по пло́ти, и вся бли́жния ро́да моего́ и дру́ги, и да́руй им ми́рная Твоя́ и преми́рная блага́я. (Поклон)

Если в монастыре: Спаси́, Го́споди, и поми́луй во святого́рских монастыре́х и в ру́сских, и во ине́х ме́стех живу́щия и пребыва́ющия отцы́ и бра́тию на́шу, и моли́твами их поми́луй мене́ гре́шнаго. (Поклон)

Спаси́, Го́споди, и поми́луй по мно́жеству щедро́т Твои́х и всех священнои́ноков, и́ноков же и и́нокинь, и всех в де́встве же и благогове́нии и по́стничестве живу́щих в монастыре́х, в пусты́нях, в пеще́рах, гора́х, столпа́х, затво́рех, разсе́линах ка́менных, острове́х же морски́х, и на вся́ком ме́сте влады́чествия Твоего́ правове́рно живу́щих, и благоче́стно служа́щих Тебе́ и моля́щих Ти ся. Облегчи́ им тяготу́ и уте́ши их ско́рбь, и к по́двигу я́же от Тебе́ си́лу и кре́пость им пода́ждь, и молитвами их да́руй ми оставле́ние грехо́в. (Поклон)

Спаси́, Го́споди, и поми́луй ста́рцы, и ю́ныя, ни́щия, и сироты́, и вдови́цы, и су́щия в боле́зни, в печа́-лех, беда́х же и скорбе́х, обстоя́нии и плене́нии, темни́цах же и заточе́нии, изря́днее же в гоне́нии Тебе́ ра́ди и ве́ры правосла́вныя от язы́к безбо́жных и ага́рянских, от отсту́пник и от еретико́в су́щих рабо́в Твои́х, и помяни́ их, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь. (Поклон)

Спаси́, Го́споди, и поми́луй благотворя́щих нам, ми́лующих и пита́ющих нас, да́вших нам ми́лостыню, и запове́давших нам недосто́йным моли́тися о них, и упокоева́ющих нас, и сотвори́ ми́лость Свою́ с ни́ми, да́руя им вся я́же к спасе́нию проше́ния, и ве́чных благ восприя́тие. (Поклон)

Спаси́, Го́споди, и поми́луй по́сланныя в слу́жбу, путь ше́ствующия отцы́ и бра́тию на́шу, и вся правосла́вныя христиа́ны. (Поклон)

Спаси́, Го́споди, и поми́луй, и́хже аз безу́мием мои́м соблазни́х и от пути́ спаси́тельнаго отврати́х, к де́лом злым и неподо́бным приведо́х, и боже́ственным Твои́м про́мыслом к пути́ спасе́ния па́ки возврати́. (Поклон)

Спаси́, Го́споди, и поми́луй ненави́дящих, и оби́дящих мя, и творя́щих ми па́кости, и не оста́ви их поги́бнути мене́ ра́ди гре́шнаго. (Поклон)

Отступи́вших от православный ве́ры и поги́бельными ересьми́ ослепле́нных све́том Твоего́ позна́ния просвети́ и Святе́й Твое́й Апо́стольской Собо́рной Це́ркви причти́. (Поклон)

Ме́рзское и богоху́льное ага́рянское ца́рство вско́ре испрове́рзи и правове́рным прави́телем преда́ждь, правове́рие же утверди́, и воздви́гни рог христиа́нский, и низпосли́ на нас милости Твоя́ бога́тыя. (Поклон)

Об усопших

Помяни́, Го́споди, от жития́ сего́ отше́дших правове́рных царе́й и цари́ц, князе́й же и княги́нь, Святе́йших Патриа́рхов, Преосвяще́нных митрополи́тов, архиепи́скопов и епи́скопов правосла́вных, во иере́йском же, в при́чте церко́вном и и́ноческом чи́не Тебе́ послужи́вших, (если в монастыре: и блаже́нных кти́торов святы́я оби́тели сея́), и в ве́чных селе́ниих со святы́ми упоко́й. (Поклон)

Если родители или сродники умерли, здесь их помяни: Помяни́, Го́споди, ду́ши усо́пших рабо́в Твои́х роди́телей мои́х (имярек) и все́х сро́дников по пло́ти, и прости́ им вся согреше́ния во́льная и нево́льная, да́руй им Ца́рствие и прича́стие ве́чных Твои́х благ, и Твоея́ безконе́чныя и блаже́нныя жи́зни наслажде́ние. (Поклон)

Помяни́, Господи, и вся в наде́жди воскресения и жи́зни ве́чныя усо́пшия отцы́, бра́тию и се́стры на́ша, зде и повсю́ду лежа́щия правосла́вныя Христиа́ны, и со святы́ми Твои́ми иде́же присеща́ет свет лица́ Твоего́ всели́, и нас поми́луй, я́ко благ и Человеколю́бец. Ами́нь. (Поклон)

В конце же скажи:

Пода́ждь, Го́споди, оставле́ние грехо́в всем пре́жде отше́дшим в ве́ре и наде́жди воскресе́ния отце́м и бра́тиям на́шим, и сотвори́ им ве́чную па́мять.

(Трижды, с поклонами)

Благоговейный читатель!

Помяни в своих молитвах потрудившихся над этим сборником: недостойного иерея Михаила, Владимира, Татиану, Иоанну и Дионисия.