Текст книги "Святая Мария"

Канон святой преподобной Марии Египетской

Тропарь, глас 8

В тебе, мати, известно спасеся, еже по образу, приимши бо крест, последовала еси Христу, и деющи, учила еси презирати убо плоть, преходит бо, прилежати же о души – вещи безсмертней; темже и со Ангелы срадуется, преподобная Марие, дух твой.

Канон, глас 4

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеевыми рукама Амаликову силу в пустыни победил есть.

Припев: Преподобная мати Марие, моли Бога о нас[3]3
  Этот припев повторяется перед первыми двумя тропарями в каждой песне канона.


[Закрыть].

Скверну прегрешении очисти смиренныя моея души, Твоею милостию, Христе, мглу и омрачение страстей отжени молитвами преподобныя Твоея.

Страстьми плотскими осквернивши душевное благородие, воздержанием паки, о честная, твой ум просветила еси, тучами слез твоих душу уяснивши.

Слава: Египта страстей избегла еси, яко от греховна источника, и, фараона избавльшися лютаго осквернения, безстрастия ныне землю наследовала еси, и со Ангелы ликуеши присно.

И ныне, Богородичен: Зрящи Твою икону, Владычице, Богородительнице Чистая, и рождшагося Слова от Твоея пречистыя, Дево, утробы, и Поручницу Тя к Сему тепле просит преславная.

Песнь 3

Ирмос: Веселится о Тебе Церковь Твоя, Христе, зову щи: Ты моя крепость, Господи, и прибежище, и утверждение.

Возсмердешася душевныя и согнишася твоя раны, но источником слез твоих сия омыла еси тепле.

Побеждени быша тобою демонстии полцы, и страстная взыграния слезами уранила еси.

Слава: Яко утренний облак и якоже капля, каплящи, была еси всем, проливающи воды покаяния спасительнаго.

И ныне, Богородичен: Тя Предстательницу, Чистая, и спасение, и крепость имущи, Креста святаго Древу, честная, поклонися.

Кондак, глас 3

Блудами первее преисполнена всяческими, Христова невеста днесь покаянием явися, ангельское жительство подражающи, демоны Креста оружием погубляет. Сего ради Царствия невеста явилася еси, Марие преславная.

Седален, глас 8

Взыграния вся плотская обуздавши болезньми постническими, мужественное показала еси души твоея мудрование: Креста бо возжелевши образ видети, себе, приснопамятная, миру распяла еси, отонудуже и к ревности жития непорочного усердно воздвигла еси себе, всеблаженная, Марие преславная. Моли Христа Бога грехов оставление подати чествующим любовию святую память твою.

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

Удалилася еси, бежавши, сущих в мире и сладких всех, едина же Единому чисто приобщилася еси крайним воздержанием и терпением дел твоих.

Телесная движения и разжжения воздержанием поистинне изсушила еси, отонудуже душу украсила еси, Марие всеславная, Божественными видении и детельми.

Слава: Добродетельною твоею силою, слезами и постом крайним, молитвою же и варом, зимою и наготою приятелище была еси Святаго Духа честно.

И ныне, Богородичен: К Твоей иконе прибегши, и из Тебе Рожденнаго, Марие Дево, Тобою ныне обрете жизнь безсмертную, в Раи ликующи.

Песнь 5

Ирмос: Ты, Господи, мой свет в мир пришел еси, Свет Святый, обращаяй из мрачна неведения верою воспевающия Тя.

В след Христа последовала еси, радующися, носящи крест свой на раме, Марие, и демоны уранила еси.

Показала еси нам покаяния лечбу, показала еси и стезю, ведущую паки к жизни негиблющей.

Слава: Ты буди ми, честная, заступница непобедима и избави страстей мя, болезни же всякия мольбами твоими ко Господу.

И ныне, Богородичен: На Твою, Владычице Чистая, икону взираше, Тебе всегда молящися, страстей нападания преподобная посрамляше.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Потом греховную скверну омыла еси, к нетленней же славе твоею мыслию смотряющи, ныне обрела еси благоплодие болезнем твоим, славная.

Всем грешником, Марие, житие твое образ показася, безмерно согрешившим, в житии востати и скверну очистити слезами.

Слава: Ущедри смиренную мою душу, Человеколюбче, юже оскверних, дея нечистая хотения плоти моея, но Ты мя преподобныя молитвами помилуй.

И ныне, Богородичен: Всею твоею душею и сердцем возлюбила еси от Девы рожденнаго Бога Слова, живаго и воплощенна, глас тебе, преподобная, принесша.

Кондак, глас 4

Греха мглы избежавши, покаяния светом озаривши твое сердце, славная, пришла еси ко Христу, Сего Всенепорочную и Святую Матерь Молитвенницу милостивную принесла еси. Отонудуже и прегрешений обрела еси оставление и со Ангелы присно срадуешися.

Икос

Змия, древле во Едеме запеншаго Еве прелестию древа, низвергла еси в ров Древом Крестным, славная Марие, и, отбегши сласти, чистоты возжелала еси, отонудуже и с девами сподобилася еси внутрь чертога внити твоего Владыки, с сими насладитися достойно. Того убо прилежно моли, яко да многих грехов разрешение подаст и Своея жизни нас сподобит со Ангелы присно радоватися.

Песнь 7

Ирмос: В пещи Авраамстии отроцы персидстей, любовию благочестия паче, нежели пламенем опаляеми, взываху: благословен еси в храме славы Твоея, Господи.

Скорбную и тесную шествовавши стезю яве, добротою добродетелей уяснивши душу, Небесную достигла еси жизнь некончаемую, идеже Свет безконечный есть Христос.

Яже в мире поправши временная вся, ныне ликуеши со всеми воинствы ангельскими, воспевающи: благословен еси в храме славы Твоея, Господи.

Слава: Коварства вражия и оружия оскудеша вся крепким постом и молитвою твоею, преподобная, и слезами, и ныне убо отгонятся и страстей настояния, Марие честная.

И ныне, Богородичен: Неискусобрачно Яже Бога безплотна порождши воистинну и Дева пребывши поистинне, Твоею силою, Всечестная, отгнала еси страстей и демонов воинства.

Песнь 8

Ирмос: Руце распростер, Даниил львов зияния в рове затче: огненную же силу угасиша, добродетелию препоясавшеся, благочестия рачители отроцы, взывающе: благословите, вся дела Господня, Господа.

Весь сиянием добродетелей озаривши ум, Марие славная, Богу беседовавши, плоть бо истнивши постом многим и помыслом благочестивым, пела еси, радующися: благословите, вся дела Господня, Господа.

Креста знамением себе оградивши, Иорданския ногами немокренными твоими воды преплывши, Марие, верно и Небеснаго Христа, Телу и Крови Его, причащшися, – ныне отпущаеши рабу Твою, – рекла еси.

Слава: Священник Божественный Зосима, таинник благодати, быстрину яко виде тя Иорданскую, славная, прешедшу немокренными ногами, страхом и трепетом одержим быв, радуяся, пояше: благословите, вся дела Господня, Господа.

И ныне, Богородичен: Тобою, Пренескверная, тлю и скверну всю оттрясе, и облечеся, Владычице, в ризу безсмертну, и Тобою Твоему Сыну преподобная вопияше: благословите, вся дела Господня, Господа.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества, тем, веселящеся, Тя, Богородице, величаем.

Ныне нетленною и Божественною воистинну пищею насыщаема и Светом наслаждающися мысленным и Невечерним в Небесных селех, идеже Ангельстии Чини о нас Бога молят.

Славы текущия и тленныя же возгнушавшися, Марие, славу и жизнь наследовала еси блаженную. Христа моли о совершающих твою всесвятую память всегда.

Слава: Виждь мою скорбь, преподобная, и стенание сердца, виждь тесноту жизни моея, спаси мя от греха моего и душу мою ущедри твоими ходатайствы ко Господу.

И ныне: Владычице Чистая Богородице, грешников спасение, приими мольбу сию, избави мя от грех моих, Твоему Сыну прибегающа, молитвами преподобныя Твоея.

Светилен

Образ покаяния нам дадеся, Марие, твоим бо теплым умилением возврати побеждение, Заступницу стяжавши Богородицу Марию, с Неюже о нас помолися.

Богородичен: Свет возсиявший безлетный от Отца прежде век в лето ныне напоследок из Тебе, Дево, явися на спасение мира, к Немуже не престай о людех Твоих молящися.

Акафист преподобной Марии Египетской

Кондак 1

Избранной Богом от падшаго рода подвигом тяжким стяжавшей велию славу на Небеси, мы, земнороднии, смиренно взываем: святая Марие, моли за нас Господа Бога, да исхитит нас из рова страстей похвальная ти воспевающих:

Радуйся, преподобная мати Марие, от страсти плотския нас избавляющая.

Икос 1

Ангели изумевшася внезапной перемене в тебе, преподобныя мати, како ты во единем часе оставила еси широкий путь, ведущий в пагубу, и вступила на узкую стезю спасения. Приими от нас, угоднице Христова, сие радостное пение:

Радуйся, Чистую Деву молившая, да удостоит припасть ко Кресту;

Радуйся, Божию Матерь просившая, да приведет тебя ко Христу.

Радуйся, Деве Святей обещавшая, выйти из моря страстей;

Радуйся, Деву Святую просившая Заступницей быти твоей.

Радуйся, яко Споручницей скоро в молитве услышана ты;

Радуйся, тотчас свободно смогла ко Кресту подойти.

Радуйся, Древо умильно лобзавшая, на немже распят был Христос;

Радуйся, всем существом трепетавшая, потоки излившая слез.

Радуйся, решение твердо приявшая не возвращатися вспять;

Радуйся, в руце Христовы избравшая, душу свою отдать.

Радуйся, преподобная мати Марие, от страсти плотския нас избавляющая.

Кондак 2

Видя неизреченную любовь Божией Матери к тебе, преподобная, яко по слезной молитве, в тойже час сотвори невозбранный твой вход к Пречистому Древу Креста в праздник Честнаго его Воздвижения и сподоби облобызати оное, ты же в радостном трепете о милости Божией, воспела Ему: Аллилуиа.

Икос 2

Разумом и сердцем своим прияла еси, святая Марие, неуклонное решение отныне не возвращатися на путь страстей, во умилении сердца моляще Пресвятую Богородицу указати ти место спасения и внезапу услышала еси таинственный глас, указующий таковым местом пустыню Иорданскую. Приими от нас, преподобная, похвалу сицевую:

Радуйся, Заступницу мира благодарившая, за невозбранный вход ко Кресту;

Радуйся, Споручницей Деву избравшая, отныне служите токмо Христу.

Радуйся, Чистую Деву молившая, спасения ти путь указати;

Радуйся, от иконы приемшая, местом подвига пустыню избрати.

Радуйся, тотчас отрешившая мира сего суету;

Радуйся, в лодке отплывшая по Иорданову сторону ту.

Радуйся, Божией Материю в пустыне хранимая ты;

Радуйся, миром греховным незримая, избегла его суеты.

Радуйся, наветы диавола Крестом отражавшая вси;

Радуйся, в подвизе тяжцем, со Христом пребывала еси.

Радуйся, страхи и глад Спасителя ради терпевшая;

Радуйся, прелести мира сего ради Него презревшая.

Радуйся, преподобная мати Марие, от страсти плотския нас избавляющая.

Кондак 3

Силою свыше укрепляемая, пребывала еси в пустыне, преподобная мати Марие, помощию Господа хранимая в тяжцей борьбе со страстьми, яко с лютыми зверьми, мучимая жаждой и гладом, выну воспевая Ему: Аллилуиа.

Икос 3

Преподобный Зосима, имея велие желание видети воистину избранника Божия, высотою своего жития его превозсшедшаго, егда наступиша дни Святыя Четыредесятницы, отъиде в пустыню за Иордан и обрете волею Божиею, тебе преподобная. Ты же смирения ради, не хотяще явитися людем прежде, бежала еси от него, послежде, умолена быша преподобным, удостоила еси его беседы с тобою. Не возгнушайся и нашей беседы, смиренная угоднице Божия, и приими похвалу сицевую:

Радуйся, покаяние в пустыне приносившая;

Радуйся, слезами сию землю оросившая.

Радуйся, денно и нощно о гресех своих молившая;

Радуйся, подвигом многотрудным Небесной высоты достигшая.

Радуйся, от смрада житейскаго ушедшая;

Радуйся, в пустыне покой обретшая.

Радуйся, за подвиги Христом возвеличенная;

Радуйся, прозорливостью Господом отличенная;

Радуйся, яко по имени Зосиму назвала еси.

Радуйся, прославленная еще на земли;

Радуйся, преподобная мати Марие, от страсти плотския нас избавляющая.

Кондак 4

Бурею священнаго ужаса объят бысть преподобный, яко ты николиже знавшая его, по имени: «Авва Зосима», назвала еси, и он умоли тя разсказати ему житие твое дивное. Ты же, смиренная угоднице Божия, не утаила еси пред ним прежней своей греховной жизни, да прославится в тебе Господь, щедро награждающий кающихся. Мы благодарим Создателя, моляще Его, да не отринет Он и нашего покаяния, и в радостном уповании поем Ему: Аллилуиа.

Икос 4

Слышаше преподобный Зосима, како ты с мужеством перенесла еси вся тяжести пустыннаго жития в борьбе с искушениями и диаволом, удивишася, и со умилением к тебе взываше:

Радуйся, в пустыне только кореньями питавшая тело твое;

Радуйся, на Господа всю печаль возложившая, да не оставит создание Свое.

Радуйся, многия скорби понесшая, в подвизе тяжцем твоем;

Радуйся, в Раи возшедшая, увенчаная светлым венцем.

Радуйся, Божиим Духом в пустыне, Писанию научена ты;

Радуйся, Им Всеблагим, вручены ти дары святой красоты.

Радуйся, Духа Святаго чистейшим сосудом сподобилась быта;

Радуйся, на труднем пути для Бога стремилась пожити.

Радуйся, руку на плуг положившая, не возвратишася вспять;

Радуйся, всем существом Христа возлюбившая, приявшая Его благодать.

Радуйся, прекраснейшим крином в знойной пустыне цвела;

Радуйся, фимиамом благоуханным для Господа Бога была.

Радуйся, преподобная мати Марие, от страсти плотския нас избавляющая.

Кондак 5

Боготочною кровию искупивый ны, Господи, не призвал еси праведныя, но грешныя на покаяние, сподоби и нас подражати житию твоея угодницы Марии, и во веки благодарным сердцем славословите Тя райскою песнею: Аллилуиа.

Икос 5

Видев тя Зосима, преподобная, стоящую на воздусе и молящуюся, трепетом объят бысть недоумевая: како в падении пребывающая ранее, толицей благодати сподобилася еси, и умиленно возблагодарив Господа, воспета таковая:

Радуйся, святостью жизни достигшая дара предвидения ты;

Радуйся, монастырские тайны раскрывшая пред Зосимой своими усты.

Радуйся, Ангелом уподобилась блистанием неземной чистоты;

Радуйся, яко в молитве на воздусе стояти сподобилась ты.

Радуйся, пред Зосимою строгия подвиги скрыла свои;

Радуйся, с Неба явленное многое, пред ним утаила еси.

Радуйся, ради святаго спасения хранила их в сердце вси;

Радуйся, молчать о себе повелевшая, до кончины своей.

Радуйся, прославленной быть не восхотевшая на земли от людей;

Радуйся, сорок семь лет сокрытою пребывала в пустынном своем житии.

Радуйся, такожде со стези покаяния хотяще неведомой всем отойти;

Радуйся, преподобная мати Марие, от страсти плотския нас избавляющая.

Кондак 6

Проповедуют Ангелы на Небеси чудное твое житие, блаженная пустыннице, яко ты в немощнем телеси стяжала велию силу духа и сокрушила еси козни сатанинския. Мы вкупе со Ангелы прославляем Господа, давшаго тебе крепость Своею благодатию и поем Ему: Аллилуиа.

Икос 6

Возсия в ти, угодница Божия, велия жажда вкушения Пречистых Таин Христовых и ты просиша Зосиму явитися в будущее лето, в день Святаго Великаго Четверга со Святыми Дарами на берег реки Иордан, да сподобишися ты сего Святейшаго Дара. Мы, прославляя в тебе ревность соединения со Господом нашим Иисусом Христом, похвальная восписуем ти:

Радуйся, жаждой святою томимая, Причастия ради Святых Даров;

Радуйся, в сердце твоем бысть хранимая ко Господу Богу любовь.

Радуйся, яко всю себе уневестила нашему Спасу Христу;

Радуйся, кротость, смирение стяжавшая, и ангельскую чистоту.

Радуйся, скоро с Зосимой простилася, жено святой красоты;

Радуйся, тут же в пустыне скрылася от глаз старца ты.

Радуйся, яко драгую жемчужину, мысль о тебе он унес;

Радуйся, яко весь путь до обители был им омочен от радостных слез.

Радуйся, долго в очах его старческих образ твой чудный стоял;

Радуйся, токмо чрез лето свиданием старец себя утешал.

Радуйся, преподобная мати Марие, от страсти плотския нас избавляющая.

Кондак 7

Хотяще соблюсти устав святыя обители, отпустиша игумен иноцы своя на подвиг молчания и наивящей молитвы в пустыни дальния. Преподобный же Зосима не можаше отправитися болезни ради, о нейже ты предрекала ему, святая Марие, с радостным трепетом ожидаше Великаго Четверга, в онь же день условия ради, ты обещаша причаститися; и преклоняшеся пред непостижимыми судьбами Божиими, воспеша Богу: Аллилуиа.

Икос 7

Новым священным трепетом объята бысть душа преподобнаго старца, егда насташа Великий день совершения Тайныя Вечери Господом нашим Иисусом Христом, и взяше с собою Святейшия Дары, идоша на берег святыя реки причастити тя, мати блаженная. Мы же вкупе со святым старцем благоговеем пред Господом, идущим к тебе в Пречистых Своих Тайнах. И тебе, достойней невесте сладчайшаго Жениха, с любовию шествующей на брак Агнчий, умильно взываем:

Радуйся, яко святым иереем исполнена просьба твоя;

Радуйся, яко со Святыми Дарами прииде на берег он трепеща.

Радуйся, яко в ночь Страсти Христовой хотяще причастницей быти;

Радуйся, яко страданий участница, на Небеси будеши с Господом жити.

Радуйся, яко смути преподобнаго долгим отсутствием ты;

Радуйся, яко в сиянии месяца ты показалась вдали;

Радуйся, знамением крестным Иордан осенила рукой;

Радуйся, по воде яко по суху пошла ты рекой.

Радуйся, видением сим дивным в трепете бысть иерей;

Радуйся, его ты успокоила речью святою своей.

Радуйся, преподобная мати Марие, от страсти плотския нас избавляющая.

Кондак 8

Странники и пришельцы вси есмы на земли, по глаголу Апостола, странницей пребывала и ты в пустыне до дне своего преставления, агнице Христова Марие, да от Иерусалима земнаго переселившеся в Иерусалим Горний, славословиши Творцу святою райскою песнею: Аллилуиа.

Икос 8

Весь сладость, все твое желание бысть Господь Иисус Христос, Егоже ты с трепетом принимаше в Пречистых Тайнах из рук блаженнаго старца. И мы, взирая на тя, поистине, достойную причастницу сего Святейшаго Дара, с любовию зовем ти:

Радуйся, в Тайнах Святых обрученная Женихом;

Радуйся, Им за сие украшенная райским нетленным венцем.

Радуйся, по приятию Божиих Даров предстала в ангельском свете;

Радуйся, яко Зосима без страха не можаше на тя смотрети.

Радуйся, светом Небесным блистая, Симеона молитву прочла;

Радуйся, ангельский кроткий свой взор к Небу тотчас вознесла.

Радуйся, пищи Небесной вкусившая, земной не хотяще прияти;

Радуйся, дары любве у Зосимы, зерна три решила ты взяти.

Радуйся, преподобная мати Марие, от страсти плотския нас избавляющая.

Кондак 9

Весь Ангельский Чин и человецы благословляху Господа, како Он совершаше силу в немощных людех, укрепляше и тя, многопобедная угоднице Божия, в подвизе твоем пустыннем, терпяще убо в обнажением своем телеси хлад и зной нестерпимый, к тому же и страх, и глад, и многия злохитрыя искушения от диавола, ты же за таковую помощь от Господа выну воспевала Ему: Аллилуиа.

Икос 9

Витийствующий язык не можаше изрещи, яже творишеся в душе праведнаго Зосимы по уходе твоем, таинственная пустыннице. Ты образом своим, исполненным благодати Духа Всесвятаго, вперила духовный взор старца в размышления горняя: како Бог перстнаго человека всемогуществом Своим подымаше до ангельския высоты; приими вкупе с Зосимою и нашу смиренную похвалу:

Радуйся, яко в пустыню стремилася к беседе со Ангелы ты;

Радуйся, душу свою сохранившая, от грешной мирской суеты.

Радуйся, денно и нощно молилася, незримая миром в глуши.

Радуйся, яко от всех удалилася, спасения ради души;

Радуйся, токмо лишь звезды небесныя быша свидетели слез.

Радуйся, в минуты сии чудесныя, взирал на тебя Сам Христос;

Радуйся, яко Споручница дивная руководила тобой.

Радуйся, Ея помощию сильною в вечный достигла покой;

Радуйся, старца просившая, в пустыню чрез лето придти.

Радуйся, в Зосиму надежду вселившая, вновь тебя обрести;

Радуйся, преподобная мати Марие, от страсти плотския нас избавляющая.

Кондак 10

Спастися хотящим нам буди молитвенницей у Престола Всевышняго, преподобная мати, да и мы с помощию твоею, избегши искушений всяческих, сподобимся вкупе с тобою выну славословите Господа и пети Ему: Аллилуиа.

Икос 10

Стена еси всем подвижникам, Пресвятая Богородице, от злохитрых козней диавола, спасла еси избравшую Тебя Споручницей, пред Сыном сладчайшим Твоим, не посрамила еси ея упования, Пречистая, и довела до вожделенных врат Рая. Сподоби нас, грешных, достойно восхвалити святую угодницу Твою Марию песнопениями сими:

Радуйся, яко старец с радостным трепетом ожидаше встречи дня;

Радуйся, сей мыслею сладостной он утешал себя.

Радуйся, яко в поста дни великие, в пустыню с надеждой ушел;

Радуйся, яко до места свидания, в радости шествовал он.

Радуйся, волнений исполненный Зосима искаше тебя;

Радуйся, яко в Небесном сиянии на песце он нашел тебя;

Радуйся, с миром сим разлученная, отошла ты в вечный покой.

Радуйся, в горьком рыдании с молитвой склонился он над тобой;

Радуйся, яко давно пересилилася в дивный и славный чертог;

Радуйся, в вечную радость Небесную, ушла от скорбей и тревог.

Радуйся, преподобная мати Марие, от страсти плотския нас избавляющая.

Кондак 11

Пением ангельским восхваляемая и сонмом их окруженная, вознесеся душа твоя праведная ко Престолу Всевышняго, во гласе радования воспевати Господа богокрасною песнею: Аллилуиа.

Икос 11

Святым Духом Божиим озарен бысть лик твой, преподобная, старец же Зосима в велие смущение прииде, яко не уведе имени твоего, блаженная, абие узре надпись у главы твоея, начертанную бысть на земле «Погреби, авва Зосима, здесь тело смиренной Марии, отдай прах праху. Моли Бога за мя, скончавшуюся в месяце апреле, в первый его день, после приобщения Божественных Таин»:

Радуйся, яко уведе Зосима о преставлении дня;

Радуйся, яко смиренной Марией сама назвала себя.

Радуйся, яко преставилась к Богу в лето прошлое ты;

Радуйся, в день Святаго Причастия сподобилась ты отойти.

Радуйся, к старцу внезапно из пустыни лев подошел;

Радуйся, могучими лапами вырыл могилу он.

Радуйся, яко с молитвой горячей предал земле он твой прах;

Радуйся, яко долго стоял над могилою в умильных слезах.

Радуйся, тихо устами дрожащими старец молитву читал;

Радуйся, в судьбах Непостижимаго с любовию он прославлял.

Радуйся, преподобная мати Марие, от страсти плотския нас избавляющая.

Кондак 12

Благодать испроси нам у Бога, чистая Христова невесто Марие, да помилует он нас в день Страшнаго Суда Своего и да причислит к избранному Своему стаду, и сподобит выну воспевати Ему: Аллилуиа.

Икос 12

Поюще твое покаяние, емуже удивишася Ангелы на Небеси и вси страдания твоя безпримерныя, их же не может изрещи язык человеческий, мы с любовию и радостию вопием ти:

Радуйся, яко за плоть обнаженную чудною ризой покрыта в Раю;

Радуйся, зноем в пустыне сожженная, Небесной прохлады вкушаешь струю.

Радуйся, глад постоянный терпевшая, сладчайшим насыщена хлебом Христа;

Радуйся, всякия скорби понесшая, радости глас произносят уста.

Радуйся, в тяжцей борьбе со диаволом пребывала семнадцать лет;

Радуйся, за эту победу, прославлену, окружи тя дивный свет.

Радуйся, како премудрыя девы, не погасила светильник свой;

Радуйся, яко от Крестнаго Древа ко Господу путь был направлен твой.

Радуйся, Деве Святой обещавшая, Ея помощию не сбиться с пути;

Радуйся, много в пустыне страдавшая, сумела с пути не сойти.

Радуйся, яко знамением крестным разрушила козни врагов;

Радуйся, яко ныне вкушаеши от Божиих щедрот и даров.

Радуйся, преподобная мати Марие, от страсти плотския нас избавляющая.

Кондак 13

О святая, всехвальная и многопобедная угоднице Христова, Марие, покаяния образ преизящнейший! Молим тя, испроси нам у Господа Бога силу Его благодати, загладити и нам тьму грехов наших с сокрушенными слезами о них, и да сподобимся в обители покаявшихся получити утешение вечное по неложному обещанию, и с Лики Ангельскими воспевати Пресвятую Троицу ангельскою песнею: Аллилуиа.

Этот кондак читается трижды, затем икос 1-й «Ангели изумевшася внезапной перемене…» и кондак 1-й «Избранной Богом от падшаго рода…»

Молитва ко святой преподобной Марии Египетской

О святая и великая угоднице Христова Марие! Ангелы удивившая безприменым подвигом своим. Молим тя, блаженная, предстоя ныне у Престола Всесвятыя Троицы, умоли Господа, обретшая велие дерзновение пред Ним, да сподобит Он и нас подобно тебе, покаятися в тмочисленных согрешениях наших, и да простит нас, и да, наказав ны зде, по Своему человеколюбию, не погубит нас и в будущем веце. Моли святая Марие, Пресвятую твою Споручницу, укрепившую тя в подвизе твоем тяжцем, да укрепит Она и нас, Всесвятая, всесильною помощью Своею, на сем земном тернистом пути, и яко ты, облобызав с верою и любовию Всечестный Крест Христов, восприяла благодать Его всесильную в борьбе со диаволом, миром и плотию, упразднив все козни сатаны, тако и мы сподобимся помощию Животворящаго Древа Креста Господня, разрушати преграды греха к достижению Горняго Царствия и, удостоившись вечныя жизни, вкупе с тобою выну воспевати Пресвятую Троицу во Единем существе, Отца и Сына и Святаго Духа во веки веков. Аминь.