Текст книги "Антология хожений русских путешественников XII-XV века"

О пещере, идеже преданъ бысть Христосъ

А отъ гроба святыя Богородица есть сажень 10 до пещеры, идеже преданъ бысть от Июды жидомъ на 30 сребреницехъ. И есть пещера та обонъ полъ потока Кедарьскаго при горе Елеоньстей.

И ту есть место близь пещеры тоя, яко довержеть человекъ каменемь малымъ, и есть къ полуденью лиць место то, идеже помолися Христосъ отцу своему в нощи, въ нюже преданъ бысть на распятие Июдеемъ и рече: Отче, аще возможно есть, да минеть чаша сия отъ мене. И есть на месте томъ ныне создана церквица мала.

А оттуда есть дострела вдалее до гроба Асафатова395395
  …до гроба Асафатова… – Иосафат – библейский царь Израиля.


[Закрыть]; и то есть былъ царь Июдейскъ и потому зоветься та дебрь Асафатова. И ту есть близь въ той же дебри гробъ святаго Иякова, брата господня. Елеоньскаа же гора есть отъ Иерусалима на летний восток лиць. Отъ Гепсимании полести есть на гору Елеоньскую высоко вельми, яко можеть на ню 3-жды встрелити едва.

О пещере, идеже нача Христосъ ученикы своя учити.

И ту есть создана церкви велика и пещера подо олтаремъ есть исподи; въ той пещере Христосъ научи ученики своя пети "Отче нашь". А оттуда верха самого Елеоньскыя горы, идеже есть вознесение господне, есть сажень 90.

О горе Елеоньстей

Вознесение же господне есть на верхъ Елеоньския горы прямо къ стоку и есть яко горка мала, и на той горце былъ камень круголъ выше колена; съ того камени вознеслъся Христосъ богъ нашь на небеса; и есть место то оздано все комарами около, и верхъ на комарахъ техъ созданъ есть, яко дворъ камень кругомъ и помощенъ есть весь двор-отъ мраморными досками. И посреди того двора есть созданъ аки теремець кругло, и есть безъ верха, та ко и во дне теремца; и въ томъ теремци, подъ самымъ верхомъ темъ непокрытымъ, лежить камен-еть святый, идеже стоясте и нозе пречистеи владыки нашего и господа.

И есть подъ каменемъ темъ трапеза сделана досками мраморными, и на той трапезе литургисаютъ ныне. Есть исподи подъ святою трапезою камен-етъ, оделанъ весь около досками мраморными, толико верхъ его видети мало, и ту целують вси християне. Двери же имать 2-й теремеце-тъ, възлести же есть по степенемъ ко вознесению господню, и есть же степеней техъ 22.

И есть гора Елеоньскаа высока надъ градомъ Иерусалимомъ и видети съ неа все въ граде Иерусалиме, и Святаа Сиятыхъ, и до Содомскаго моря и до Иордана съ нея дозрети, и всю ту землю, и обонъ полъ Иордана все съ неа видети: вышьши бо есть всехъ Еленьскаа гора сущихъ горъ около Иерусалима.

О граде Иерусалиме

Иерусалимъ же градъ есть великъ и твердъ стенами всямокаченъ на 4 углы крестьнымъ образомъ созданъ есть; дебри суть многи около его и горы каменыя. Безводно место то есть; ни реки, ни кладязя, ни источника несть близъ Иерусалима, но токмо едина купель Силоамля; но дождевою водою живуть вси людие и скоти въ граде томъ. И жита добра ражаються около Иерусалима въ камении томъ безъ дожда, но тако божиимъ повелениемъ и благоволениемъ родиться пшеница и ячмень изрядно: едино бо кадь всеявъ и взяти 90 кадей, а другоици 100 кадей по единой кади; но несть ли то благословение божие на земли той святей? Суть винограда мнози около Иерусалима и овощнаа древеса многоплодовита; смокви и агодичия, и масличие, и рожци, и ина вся различнаа древеса безъ числа по всей земли той суть.

И на той же горе Елеоньстей есть пещера глубока, близь вознесения господня на полудне лиць, и въ той пещере и гробъ святыя Пелагии блудници; и ту есть столпникъ близь, мужъ духовенъ вельми.

О пути к Ердану

И есть путь отъ Иерусалима къ Иордану чресь Елеоньскую гору на летний востокъ лиць, и есть путь-ть тяжекъ велми и страшенъ и безводенъ: суть бо горы высокы камены, и суть разбои мнози, и разбивають въ горахъ техъ и в дебрехъ страшныхъ. И есть отъ Иерусалима до Иордана 20 верстъ великихъ, 15 верстъ до Кузивы, идеже постился святый Иоокимъ неплодства ради своего; и есть место то въ потоце глубоко у пути близь на левой руце тамо идуче.

А отъ Кюзивы до Иерихона 5 верстъ, а от Иерихона до Иордана 6 верстъ великыхъ, все по равну въ песце, путь тяжекъ велми; ту мнози человеци задыхаються отъ зноя и ищезають от жажди водныя умирають; ту бо море Содомское близь отъ пути того, изходитъ духъ зноенъ смердящь, зноитъ и попаляеть всю землю ту.

И ту есть, недошедше Иордана, близь на пути, монастырь свята– го Иоанна Предтечи и есть горе возделанъ.

О горе Ермоньстей

И ту есть гора Ермонъ близь у монастыря того вдалее яко 20 сажень; и есть на левей руце тамо идучи у пути близь; и есть песочна горка та не велика, но мала.

А отъ Ермона до ветхаго монастыря Иоаннова вдалее дващи дострелити гораздо и ту есть была церкви велика создана во имя Предтечи Иоанна…

О Ердане

Иорданъ же река течетъ быстро, бреги же имать обонъ полъ прикруть, а отсуду пологы; вода же мутна велми и сладка пити и несть сыти пиюще воду ту святую; ни съ нея болеть, ни пакости во чреве человеку.

Всемъ же есть подобенъ Иорданъ къ реце Сновьстей, и вшире, и вглубле, и лукаво течетъ и быстро велми, яко же Сновь река396396
  …Сновь река – приток Десны.


[Закрыть]. Вглубле же есть 4 сажень среди самое купели, яко же измерихъ и искусихъ самъ собою, ибо пребродихъ на ону страну Иордана, много походихомъ по брегу его; вшире же есть Иорданъ яко же есть Сновь на устий.

Есть же по сей стране Иордана на купли той, яко леей древо не высоко, аки вербе подобно есть, и выше купели тоя по брегу Иорданову стоитъ яко лозие много, но несть якоже наша лоза, но некако аки силяжи подобно есть; есть же и тростие много; болоние имать яко Сновь река. Зверь многь ту и свинии дикий бещисла много, и пардуси мнози ту суть Львове же обонъ полъ Иордана.

Горы высоки каменыя и суть подаль отъ Иордана; а подъ теми горами другыя горы близь суть белы, и ты суть близь Иордана; и то есть земля Заулоня и Неффалимьля обонъполъ Иордана.

О пещере Иоанна крестителя

И ту есть близь место къ востоку лиць, яко двою дострелу вдалее отъ реки, идеже Илиа пророкъ въсхищенъ бысть на колесници огньней. Ту же и пещера святаго Иоанна крестителя. И ту есть потокъ, воды исполненъ, и течетъ красно по камению во Иорданъ; и вода та студена зело и сладка вельми, и ту воду пилъ Иоанна предтечя Христовъ, егда жилъ въ пещере той святей.

О пещере Ильи пророка

И ту же есть другая пещера дивна, идеже жилъ, святый Илия пророкъ с Елисеемъ, человекомъ его. И то все благодетию божиею видехомъ очима своима грешныма и недостойныма. И сподоби мя богъ трижды быти на святемь Иордане, и въ самы водокрещный праздникъ быхомъ на Иордане, видехомъ благодать божию, приходящюю на воды Иорданьскыя, и множьство народа бесчисла тогда пришедшихъ къ воде; всю нощь ту пение бываетъ изрядно и свещь бесчисла горящихъ и въ полунощи бываетъ крещение воде; тогда бо и духъ святый приходить на воды Иорданскиа и видять достойнии человеци добрии, а вси народи не видять ничтоже, но токмо радость и веселие бываеть тогда въ сердци всякому християнину, и егда рекуть: «во Иордане крещыпутися господи», тогда вси людие въ воду и крестяться въ полунощи въ Иерданьстей реце, яко же и Христосъ въ полунощи крестился есть.

И ту есть гора, высока зело, обонъполъ Иордана; видети ю есть отвсюду издалеча, и на той горе пророкъ Моисий преставился есть, видевъ землю обетованную.

А отъ монастыря святаго Иоанна до Гарасимова монастыря есть верста едина, а отъ Гарасимова монастыря до Каламонии, до манастыря святыя Богородица, есть верста едина.

И на томъ месте святая Богородица съ Иисусомъ Христомъ, и съ Иосифомъ, и съ Ияковомъ, егда бежаху въ Египеть, то на томъ месте нощлегъ створиша; тогда святаа Богородица нарече имя месту тому Каламонии, еже ся протолкуетъ "Доброе обителище". Ту ныне сходить духъ святый ко иконе святыя Богородица. И есть манастырь-то на устьи, идеже входить Иорданъ въ море Содомское, и есть градомъ оделанъ весь около монастыря-то; черноризець же въ немъ 20. А оттуда до манастыря Иоанна Златоустаго версте две, а тый манастырь такоже градомъ оделанъ весь и есть богатъ вельми. О граде Иерихоне.

А оттуда до Иерихона есть верста едина. Иерихонъ же тый былъ первее градъ великъ и твердъ велми, того Иерихона Иисусъ Навгинъ взялъ и разорилъ до конца; ныне же ту есть село Срациньское. И ту есть домъ Затхеевъ и пень древа того и до ныне стоить, нанъ же бяше възлезлъ, хотя видети Христоса. Ту же есть былъ и домъ оноя Сумантяныни, идеже и Елесей отрочища воскресилъ.

Есть же около Иерихона земля добра и многоплодна, и поле красно и равно, и около его финици мнози стоять высоци и всякаа древеса многоплодовита суть; и воды многы текутъ, разведены по всей земли той, ти суть воды Иелисеевы, ихъ же ослади Иелисей пророкъ.

И ту есть место близь Иерихона, верста едина вдалее на летний востокъ лиць, и на томъ месте явися святый Михаилъ архистратиг, Иисусу Навгину предъ полкомъ израилевымъ, и возведъ очи свои Иисус виде предъ собою мужа страшна вооружена, и рече Иисусъ: нашъ ли еси, или отъ супостатъ нашихъ? И рече ему архистратигъ: азъ есмь Михаилъ, воевода божий, посланъ есмь на помощь тебе; дерзай и побежай супостаты твоя. И рече ему: изуй сапогъ отъ ногу твоею; место бо, на немъ же стоиши, свято есть. И наде Иисусъ на лици своемъ и поклонися. И есть на месте томъ ныне манастырь и церкви, создана во имя святаго Михаила.

Въ церкви той лежита 12 камени, и то камение тогда есть взято на дне Иорданове, егда раступися Иорданъ людемъ израилевымъ; и взяша камение то иереи, носящей кивотъ завета господня, по числу коленъ сыновъ израилевъ, на память роду ихъ. Имя месту тому Галганий, на томъ бо месте сташа сынове израилевы, прешедше Иорданъ.

О горе Гаваонстей

И отъ того места есть гора высока и велика вельми къ западу лиць, имя горе той Гаваонъ; и надъ тою горою Гаваонъскою солнце ста и пожда, яко полудне, дондеже Иисусъ Навгинъ победи враги своя, егда биашеся съ нимъ отъ, царь Васанескъ и вся царьствия Хананейска. И победи Иисусъ до конца и тогда солнце зайде.

О пещере, идеже Христосъ постися 40 дни.

Въ той же горе Гаваонъстей есть пещера высока зело, и въ той пещере постися есть Христосъ, бог нашъ, 40 дний, последи же взалка; и ту прииде дияволъ, искусити хотя и рече ему: аще еси сынъ божий, рци да камение се хлеби буду.

Ту есть близъ былъ домъ Елисея пророка, и пещера его, и кладязь есть къ востоку лиць отъ Гаваона, а вдалее яко полверсты. И есть отъ Иерусалима верстъ 6 до Федосиева манастыря. Манастыр-етъ на горе градомъ оделанъ былъ и видети отъ Иерусалима. И ту есть пещера велика посреди манастыря, и въ той пещере волсви нощьлегъ сотвориша, егда уклонишася отъ Ирода. И ту ныне лежить святый Феодосие и мнози святии отцы ту лежать; въ той пещере лежить мати святаго Савы и Феодосиева мати ту лежить.

О лавре святаго Савы

И отъ того манастыря до лавры святаго Савы есть верстъ 6. Манастыря же та оба на полуденье лиць. Лавра же святаго Савы есть на дебри Асафатове, во удоли Плачевней, яже дебрь отъ Иерусалима пойдетъ. Отъ Гепсимании бо дебрь пойдетъ сквозе лавру и приходить к Содомьскому морю. Лавра же святаго Савы есть уставлена отъ бога дивно и несказанно: потокъ бе некако страшенъ и глубокъ зело и безводенъ, стены имя бе высоки, и на техъ стенахъ лпять келий прилеплены и утвержены отъ бога некако дивно и страшно. На высоте бо той стоять келий по обема странами потока того страшнаго и лпять на скалахь, яко звезды на небеси утвержены.

Суть же 3 церкви; посреде же келей техъ къ западу лиць, ту пещера дивна подъ скалою каменою. И въ той пещере церкви святыя Богородица, и ту пещеру показа богъ святому Саве столпомъ огнеинымъ преже живущу ему единому въ потоце томъ. И есть же первая келиа святаго Савы, идеже жилъ единъ, подаль отъ лавры нынешняя, яко полверсты вдалее. И оттуда показа ему богъ столпомъ огненнымъ надъ местомъ темь святымъ, идеже есть ныне лавра святаго Савы. И есть дивно место и несказанно отнудь.

И ту есть гробъ святаго Савы посредие церквий техъ трий, вдалее отъ великия сажень 4; и есть теремець надъ гробомъ святаго Савы, учинено красно. Ту же лежать мнози святии отци, телесы яко живи: святый Иоаннъ епископъ, Исихаст ту лежить; святый Иоаннъ Дамаскинъ ту лежигь и святый Феодоръ Едесский ту лежить, и Михаилъ сыновець его; Афродитианъ святый ту лежить и инии мнози святии ту лежать, телесы яко живи, и благоухание отъ нихъ исходить несказанно.

И видехъ кладезь святаго Савы, его же показа ему въ нощи ос– ля дикое въ потоце томъ, противу келий его; пихомъ отъ кладязя того воду сладку и студену зело. Въ месте бо томъ нигдеже несть реки, ни потока, ни кладязя, но токмо единъ кладязь святаго Савы; есть бо место то безводно въ горахъ каменныхъ и есть пустыни та вся суха и безводна, но токмо дождевою водою живи суть сущий отцы в пустыни той.

И ту есть близь лавры место па полудне лиць отъ лавры, имя месту тому Рува, и есть близь моря Содомьскаго. И суть горы высоки каменыя и пещеры многы ту суть въ горахъ техъ; и ту суть жили святии отцы въ горахъ техъ, в пустыни той страшней безводней. И ту суть жилища пардусомъ и осли дивни мнози суть.

Море же Содомьское мрьтво есть397397
  Море же Содомьское мрьтво есть… – Содомским морем называли на Руси в средние века Мертвое море. Библейская легенда рассказывает, что когда– то на этом месте находились города Содом и Гоморра, которые из-за развращенности и грешности их жителей провалились под землю.


[Закрыть], не имать въ себе никакоже животна, ни рыбы, ни рака, ни сколии; но обаче внесеть быстрость Иорданьская рыбу въ море то, то не можеть жива быти ни мала часа, по вскоре умираеть; изходитъ бо изъ дна моря того смола чермная верху выды тоя и лежить по брегу тому смола та много; и смрадъ исходить изъ моря того, яко отъ серы горяща; ту бо есть мука подъ моремъ темъ.

О монастыре святаго Евфимья

А от лавры святаго Савы на востокъ лиць за горою манастырь святаго Еуфимья, 3 версты вдалее отъ лавры; и ту лежить святый Еуфимие и ини мнози святии отци ту лежать, телесы яко живи. И есть же монастырь-тъ на удолине месте и горы суть около его каменыя подаль; манастырь же былъ градомъ оделанъ и церкви же была добра вверхъ. И ту есть близь былъ манастырь святаго Феоктиста подъ горою на полудни лиць отъ манастыря Еуфимнева; и то все ныне разорено отъ поганныхъ.

О горе Сионьстей

Сионъ же гора есть велика и высока есть, отъ юга лиць, а отъ Иерусалима полога и равна. И на той горе Сионьстей превое былъ градъ Иерусалимъ ветхий и того града ветхаго разорилъ Навходносоръ, царь Вавилонескъ398398
  …Навходносоръ, царь Вавилонескъ… – При библейском пророке Иеремии царь Вавилонии Навуходоносор II (605-562 гг. до н.э.) захватил территорию Сирии и Палестины, ликвидировал Иудейское царство и разрушил Иерусалим.


[Закрыть], при Еремеи пророце. А ныне Сионъ гора вне стены градныя есть, на югъ лиць отъ Иерусалима Сионъ. И ту есть былъ домъ Иоанна богословца на горе Сионьстей, и на томъ месте создана была церкви велика клетьски; и есть отъ стены градныя яко довержетъ мужъ каменемъ малымъ до церкви святаго Сиона.

И въ той церкви Сионьстей ту есть храмина, за олтаремъ тоа церкви, и въ той храмине Христосъ умы ногы ученикомъ своимъ.

О дому Иоанна Богослова, идеже Христосъ вечерялъ.

И съ тое храмины, на югъ лиць поидучи, възлести есть по степенемъ яко на горницю; ту есть храмина создана красно, яко на столпии и съ верхомъ, исписа мусиею и помещена красно и олтарь имать яко церкви на востокъ лиць, и то есть келиа была Иоанна Богословца, и въ той келий Христосъ вечерялъ со ученики своими; ту же Иоанъ возлежа на перси его и рече: Господи кто есть предали тя? На томъ же месте сошествие святаго духа бысть на апостолы въ Пентикостию.

Въ той же церкви есть другая храмина, доле на земли и низка есть храмина та, на югъ лиць; и въ ту храмину прииде Христосъ ко ученикомъ своимъ, дверемъ затворенымъ, и ста посреде ихъ, и рече: миръ вамъ; ту же и Фому уверилъ есть въ 8-й день. Ту же есть святый камень, принесенъ ангеломъ съ Синайские горы.

А на друзей стране тоа же церкве, къ западу лиць есть другая храмина на земли низка, темъ же образомъ, и ту въ той храмине преставилася святаа Богородица. И то все ся деяло в дому Иоанна Богословца.

И ту есть былъ домъ Каиафинъ. И ту ся Петръ отверглъ Христа трижды, дондеже куръ возгласить. И есть место на востокъ лиць отъ Сиона.

Идеже Петръ отвержеся Христа трижды плакася горко.

И оттуда есть близь паки место на стране горы, къ востоку лиць, и ту есть пещера глубока велми, слести въ ню степеней 30 и 2; и въ той пещере плакася Петръ горко отвержениа своего; и надъ тою пещерою церковь есть создана во имя святаго апостола Петра.

О купели Силоамстей

А оттуда, на полудне лиць, доле подъ горою, есть купель Силоамля, идеже Христосъ слепцю очи отверзе.

О селе Скудельничи

И ту есть подъ тою же горою Сионъское село Скудельниче, еже его купиша ценою Христово на погребание страннымъ; и есть обонъ полъ дебри подъ горою Сионьскою, на югъ лиць отъ Сиона. И суть пещеры многи на стране горы у камени изъсечены и въ техъ пещерахъ дне суть гроби устроени, у камени изсечены дивно и чюдно; ту ся погребають страньни пришельци туне такъ; ничто же не даютъ отъ места того свягаго: искуплено бо есть кровию Христовою.

О Вифлеоме

Вифлеемъ же святый399399
  Вифлеемъ же святый… – Город в Палестине, считавшийся местом рождения Иисуса Христа.


[Закрыть] есть на югъ лиць отъ Иерусалима святаго, 6 верстъ вдалее, по полю 2 версте до сседаниа Авраамля.

Идеже отрока своего остави съ ослятемъ Авраамъ и поя сына своего Исаака на жертву, и даде ему дрова понести и огнь, и рече ему: отче, се дрова и огнь, а кое овча? И рече ему Авраамъ: Богъ покажеть, чадо, намъ овча. И идяше Исаакъ радуся путемъ темъ съ Иерусалиму лиць. На томъ же бо месте приведенъ бысть Исаакъ, идеже Христосъ распять бысть.

И оттуда есть верста едина вдалее до места, идеже святаа Богородица виде двои люди, едины смеющася, а другиа плачющася. И ту есть была церкви создана, манастырь былъ святыя Богородица; ныне же разорено есть отъ поганыхъ.

А оттуде до гроба Рахилина, матери Иосифовы, еста версте 2.

О вертепе идеже Христа ради святая Богородица.

И оттуда верста едина есть до места, идеже ссела святая Богородица съ осляти, егда понуди сущее въ чреве еа, хотя изыти. И ту есть камень великъ, и на томъ камени почивала святая Богородица, тогда сседши со осляти; и отъ того камени, вставши, шла есть пеша до вертепа святаго и ту родила есть Христа въ томъ вертепе святая Богородица.

И ту есть близъ Рождество Христово, отъ камени того яко можеть дострелити добръ стрелець.

О церкви Рождества Христова

И есть ту надъ вертепомъ темъ святымъ Рождества Христова создана есть церкви велика крестомъ и верхъ ея клетьски въсперенъ, покрыта же есть вся оловомъ церкви та Рождества Христова, исписана есть мусиею вся; столповъ же имать 8 облыхъ мраморяныхъ; помещена же есть досками мрамора белаго; двери же имать трои; есть же вдалее 50 саженъ до великаго олтаря, а вшире 20 сажень. Есть же вертепъ и асли, идеже было Рождество Христово, подъ великимъ олтаремъ, яко пещера велика, создана красно, и степеней имать 7, куда же слести есть къ дверемъ святаго вертепа святаго; имать двери двои, въ другихъ дверии 7 же степеней. И есть, восточными дверми влезучи въ вертепъ, на левей руце есть место на земли доле и на томъ месте родился Христосъ богъ нашь; и есть надъ местомъ темъ возделана трапеза святая и ту на той трапезе литургисають400400
  …на той трапезе литургисаютъ… – исполняют церковную службу, литургию.


[Закрыть].

О яслехъ Христовыхъ

И ту есть место къ востоку лиць, а противу тому месту на праве руце ясли Христовы, къ западу лиць. Подъ скалою каменою суть ясли Христовы святыа и въ техъ яслехъ положенъ бысть Христосъ богъ, въ рубища повить нашего ради спасениа, все претерпе… Близь же себе еста места та и Рожество и ясли, яко три сажени вдалее межи има еста; въ единой пещере оба места та; исписана же есть пещера та мусиею и помощена же красно. Церкви же исподи дупляста есть вся; и мощи святыхъ ту лежать.

И поидучи изъ церкви на правую руку вылезучи, и есть пещера глубока подъ церковь лиць, и въ той пещере лежали мощи святыхъ младенець и оттуда взяты суть святии младенци въ Царьградъ. Созданъ же есть градокъ высокъ около всея церкви тоя. И есть место то было Рождества Христова на горе, кроме людей, въ пустыни; да то ся зоветь ныне Вифлеемъ, кде то есть ныне Рождество Христово и градок-отъ, а ветхий Вифлеемъ кроме того места былъ напреди, не дошедше Рождества Христова; и ту есть столпникъ ныне, и камень святыя Богородица; то на той горе есть былъ первый Вифлеемъ.

И эта земля вся около Вифлеема зовется Ефрантъ, земля Июдина, и о томъ пророкъ глаголеть: и ты, Вифлееме, земле Июдова, ничимъ же менши еси въ тысящахъ Июдовахъ, исъ тебе бо изыдеть вожь, иже упасеть люди моя Израиля.

И есть земля та около Вифлеема красна зело въ горахъ, и древеса многоплодовита овощнаа стоатъ по пригориемъ темъ красно: масличие, и смоквие, и рожцие много бесчисла, виногради мнози суть около Вифлеема и нивы по удолиемъ многи суть.

И близь церкве Рождества Христова, вне стены градныя, къ полуднью лиць дострела вдалее на горе есть велика пещера, въ той пещере жила святая Богородица съ Христосомъ и со Иосифомъ.

О дому Иесеове отца Давидова

И ту есть место на стране града кь встоку лицъ, отъ града вдалее, яко дострелить; имя месту тому Вифиль. И ту былъ домъ Иесеевъ, отца Давидова, и в тотъ домъ прииде Самоилъ пророкъ и ту по– маза Давида на царство во Израили, въ Саула место.

О кладязе Давидове

Ту кладязь Давидовъ, его же пити древле Давыдъ вжадася.

О месте, идеже благовестиша ангели пастухом Рождество Христово.

А отътуда есть место подъ горою на поли, версты вдалее отъ Рождества Христова, на встокъ лиць; на томъ месте святии ангели благовестиша пастухомъ Рождество Христово. И есть ту была пещера; надъ тою пещерою создана была церкви добра во имя свята– го Иосифа, и ту былъ манастырь добръ; ныне же разорено есть отъ поганыхъ место то.

И есть около места того поле красно вельми и нивы многоплодны, и масличья много, и то ся место зоветъ Агиапимина, еже про– толкуется святаа паства; и ту есть село святаго Савы къ Вифлеему лиць подъ горою.

О пещере и о дубе Мамрийсте

А отъ Вифлеема есть на югъ лиць Хевронъ, пещера Сугубаа и дубъ Мамбрийский. И есть отъ Иерусалима до Хеврона верстъ 28, и есть путь мимо Вифлеемъ къ Хеврону, ити до Вифлеема 6 верстъ, отъ Вифлеема до реки Афамьскиа суть версты 3. Въ той реце Афамьстей пророкъ глаголетъ Давидъ въ псалтыри: Ты исуши реки Афамля, твой есть день и твоя есть нощь. И есть река та ныне суха подъ землею течеть река та и явится у моря Содомьскаго, ту бо входить въ море Содомьское.

И ту есть обонъ полъ реки тоя гора камена высока вельми, лесъ на горе той великъ и часть. И есть путь сквозе гору ту страшную, неудобь проходно есть; есть бо ту твердь велика и биють срацины въ горе той; иже кто въ мале хощеть пройти, то не можеть пройти. Мне же богъ добру дружину и многу зело и тако могохомъ прейти бесъ пакости место то страшное. Ту бо прилежить Асколонь градъ да оттуду да выходять погании и мнози и биють на пути томъ зле.

Въ той же горе, въ томъ же лесе, убиенъ бысть Авесаломъ, сынъ Давидовъ; туда бо бежаше отъ беды отца своего, и ту внесе его мска въ чащю леса того и я главу его за власы и съя съ мщате, и повисе на древе высоко, и ту устреленъ бысть въ сердце 3-ми стрелами, и тако умре на древе томъ.

А оттуда до клятвенаго кладязя Авраамова есть верстъ 10, а отъ кладязя того до дуба Мамъбрийскаго есть верстъ 6.

О томъ же

Есть же дуб-отъ святый у пути на близу, тамо идучи на правой руце, и стоить красенъ на горе высоце; и есть около корения его доле отъ бога помещено мраморомъ белымъ, яко де помостъ церковный немощено есть около дуба того всего добраго, и есть посреде помоста того вырослъ дуб-отъ святый исъ камени того дивенъ есть. На верху горы тоя около дуба того уродилося яко дворище, равно и чисто бесъ камения, и ту стоялъ шатеръ Авраамовъ близь дуба того къ встоку лиць. И есть дуб-отъ не велми высокъ, кроковатъ вельми и часть ветми, и многъ плодъ на немъ есть; ветьви же его близь земли приклонилися суть, яко мужь можеть, на земле стоя, досячи ветви его; втолще же есть двою сажень моихъ около его, а голомя възвыше до ветвей его полуторы сажени.

Дивно же и чюдно есть толь много летъ стоящу древу тому, на толь высоце горе, не вредися, ни испорохнети, но стоить утверженъ отъ бога, яко то перво насаженъ. И подъ тый дубъ прииде святаа троица401401
  И подъ тый дубъ прииде святаа троица… – Речь идет о дубе Мамврийском, с которым связано библейское предание о том, что Авраам принимал под его сенью трех ангелов. Троица ветхозаветная стала излюбленным сюжетом для иконописцев.


[Закрыть] къ патриарху Аврааму и ту обеда у него подъ темъ дубомъ святымъ; и ту благослови святаа троица Авраама и Сарру, жену его, и вда има родити Исаака на старость; ту и воду показа святаа троица Авраамови, и есть кладяз-етъ и доднесь подъ горою тою у пути близь. И та земля вся около дуба того зовется Мамбрия; да потому зовется дуб-отъ Мамбриский. А отъ дуба того до Хеврона есть две верьсте.

О горе Хевроне

Хевронъ же гора есть велика и градъ былъ на горе той великъ и твердъ велми, и зданиа его суть ветхаа; силно множьство людей седело перво по горе той и ныне же есть пусто. На той бо горе Хевроньстей и первое селъ внукъ Ноевъ, сынъ Хамовъ, Ханаонъ, по потопе пришедъ отъ столпотворения, и населилъ былъ землю ту всю около Хеврона; да тако земля та зоветься Хананея.

И ту земля обеща богъ Аврааму, и еще ему сущу въ Месопотамии и въ Хараоне; ту бо есть былъ домъ отца Авраамля. И рече богъ Авраамови: изиди отъ земля твоея, и отъ дому отца твоего, и иди въ землю хананейскую, и тобе дамъ землю ту и семени твоему до века и азъ буду съ тобою.

И ныне по истинне есть земля та богомъ обетованна и благословена есть отъ бога всемъ добромъ: пшеницею, и виномъ, и масломъ, и всякимъ овощомъ обилна есть зело, и скотомъ умножена есть; и овци бо и скоти дважди ражаются летомъ; и пчелами увязло ту есть въ камении по горамъ темъ краснымъ; суть же и виногради мнози по пригориемъ темъ, и древеса много овощная стоять бесчисла, масличие, смокви, и рожци, и яблони, и черешни, инородия и всякий овощь ту есть; и есть овощ-етъ лучи и болий всехъ овощи и, сущихъ на земли подъ небесемъ несть такого овоща нигдеже. И воды добры суть въ месте томъ и всемъ здрави и есть место то и красотою и всемъ добромъ неисказанна есть земля та около Феврона.

И ту есть былъ домъ Давидовъ на той горе Февроньстей; и ту бо есть былъ Давидъ 8 летъ, егда бяше выгналъ сынъ его Авесаломъ.

А отъ Феврона до Сугубыа пещеры Авраамовы близь яко полъ версты ближе. Сугубаа пещера въ каменей горе есть и въ той пещере есть гробъ Авраамовъ, Исааковъ и Иаковль. Ту бо пещеру Сугубую Авраамъ купилъ у Ефронь Хетфеянина на погребение всему роду своему, егда прииде отъ Месопотамиа въ землю Хананейскую, и ино не притяжа ничтоже первее, но токмо пещеру Сугубую на погребение себе и всему роду своему.

И есть ныне созданъ градокъ малъ около пещеры тоя, но твердъ зело; и есть градокъ созданъ есть великимъ каменемъ, чюдно и несказанно хитростию, и стены его высокы суть велми; посреде градка того дне утвержена есть пещера твердо и помощенъ есть градокъ-тъ весь деками мраморными, белаго мрамора. И есть пещера та подъ мостомъ исподи утвержена вельми, идеже лежить Авраам, Исаакъ, Иаковъ и вси сынове Ияковли, и жены ихъ ту лежать, Сарра, Ревека, а Рахиль кроме лежить на пути у Вифлеема. Суть же въ градце томъ дне надъ пещерою создани гроби разно себе; надъ гробы теми созданы церковци малы круглы; и есть близь себе гробъ Авраамовъ и жены его Сарринъ, и гробъ Исааковъ и жены его Ревекииъ близь себе, гробъ Ияковль и жены его Илиинъ близь себе еста.

О гробе Иосифове

Иосифа прекраснаго гробъ вне градка того, кроме пещеры Сугубыя вдалее, яко довержетъ до градка того; и то место ныне святый Авраамъ. И ту есть близь гора высока, на полудне лиць, отъ Сугубыя пещеры вдалее верста едина; и на ту гору взиде святаа троица со Авраамомъ, до тоя бо горы проводи Авраамъ святую троицу отъ дуба Мамбрийскаго. И ту есть место на верху горы тоя, красно и высоко зело, и на томъ месте Авраамъ, надъ на лици своемъ, поклонися святей троици, моляшеся и глаголаше […]

О гробе Лотове, иже въ Сигоре

А оттуда до Сигора есть две версте. И ту есть гробъ Лотовъ и обою дщерю его, 2 гроба еста. И въ той же горе пещера велика, и въ ту пещеру въбеглъ Лотъ со дщерма своима. Ту есть градищо близь первыхъ людий, и былъ на горе той высокь и то зоветься Сирогъ.

А оттуда есть веръсты вдалее место на взгорий, къ полуднию лиць отъ Сигора, и ту стоить жена Лотова столпомъ каменымъ402402
  …ту стоить жена Лотова столпомъ каменымъ. – Здесь имеет место пересказ библейской легенды о том, как ангелы выводили Лота и его семью из гибнущего г. Содом в г. Сидор. Согласно легенде, они запретили оглядываться назад, но жена Лота обернулась и превратилась в соляной столб, а Лот и его дочери спаслись в пещере.


[Закрыть]. А отъ жены Лотовы до Содома есть две версте.

И то все видехомъ рчима своима, а ногама своима немогохомъ дойти до Содомскаго места, боязни ради поганыхъ; и не даша ны ити тамо правовернни челонеци, рекоша ны тако: ничтоже вы тамо видети добра, но токмо муку, и смрадъ исходить оттуду, и болети ти будетъ, реша ны: отъ смрада того злаго. Да ту ся възвратихомъ опять къ святому Аврааму и, благодатию божиею съблюдаеми, проидохомъ по здраву въ Сугубую пещеру, въ градокъ, и ту поклоиихся святым местомъ всемъ и почихомъ ту два дни.

Благодатию божиею обретохомъ добру дружину многу, идущу въ Иерусалимъ; и ту пристахомъ мы къ нимъ и идохомъ съ радостию съ ними, безь боязни, и доидохомъ по здраву святаго града Иерусалима и похвалихомъ бога, сподобившаго насъ, недостойныхъ, видети святаа та места, и неизреченаа, и несказаннаа.

И есть на полудне лиць отъ Вифлеема манастырь святого Харитона, на той же реце Афамьстей, и есть близь моря Содомскаго, въ горахъ каменыхъ; и пустыни около его. Гроздно и безводно есть место то, и сухо; есть подъ нимъ дебрь камена и страшна зело; около былъ весь градомъ оделанъ, посреде же града того есть 2 церкви, въ велицей есть церкви гробъ святаго Харитона. Вне же есть града усыпалница, создана гораздо, и въ той усыпалници лежать святии отци, телесы яко живи, и лежить ихъ ту боле 7-сотъ; ту лежить святый Кириякь Исповедникъ, теломъ весь целъ; ту лежита Ксенефонтова сына, Иоаннъ и Аркадие, и благоюхание чюдно отъ нихъ исходить. И ту поклонихомся на месте томъ святомъ и взидохомъ я на гору на угь лиць, отъ манастыря того верста едина вдалее.

И ту место есть равно на ниве, и на томъ месте всхищенъ бысть пророкъ Аваакумъ, идущу ему на поле къ женцемъ съ брашномъ и съ водою, и несе его ангелъ въ Вавилонъ къ Данилови пророку въ ровъ, и ту накормивъ Данила и напоивъ, и паки всхищенъ бысть ангеломъ, в то же часъ, въ томъ же дни, паки опять бысть на томъ же месте у жнець и дасть имъ обедъ. И ныне есть на месте томъ аки теремець созданъ, знамениа ради. Есть же Вавилонъ оттуду вдале 40 дний.

И отъ того места близь церква велика, клетьски создана, во имя святыхъ пророкъ. И ту есть исподи подъ церковию тою пещера велика, и въ той пещере лежита 12 пророка въ трехъ ракахъ: Аввакумъ, Наумъ, Михей, Иезекий, Авдий, Захария, Иезекия, Измаилъ, Савеиль, Варухъ, Амосъ и Осий.

И ту есть близь на горе село велико вельми, и седятъ въ немъ срацини мнози, и христиане суть же ту, въ селе томъ, мнози. И то село есть святыхъ пророкъ, ту ся суть родили святии пророци и то ихъ есть отчина село то. И ту лежахомъ нощь едину въ селе томъ, божиею благодатию храними, и почестиша ны добре въ селе томъ християне. И ту, опочивше добре нощь ту, и заутра вставше рано, идохомъ къ Вифлеему. Старейшина бо срациньский самъ со оружиемъ проводи ны олне до Вифлеема и та места вся тоже ны проводилъ; а лапь не дойти до техъ месть, поганыхъ ради: туда бо ходять мнози срацини и разбивають въ горахъ техъ. И доидохомъ по здраву до святого града Вифлеема и ту поклонихомся Рождеству Христову и, ту почивше, идохомъ съ радостию въ святый градъ Иерусалимъ.