Текст книги "Антология хожений русских путешественников XII-XV века"

Идеже уби Давидъ Голиафа

И есть ту место близь Иерусалима, на встокъ лиць отъ столпа Давидова, яко дострелить, и на томъ месте уби Давыдъ Голияда403403
  …уби Давыдъ Голияда… – Имеется в виду библейское предание о единоборстве пастуха Давида с тяжеловооруженным воином-великаном Голиафом. Давид убил этого воина из пращи и впоследствии стал иудейским царем.


[Закрыть]. И есть место подобно близь истерны, и ту есть ныне нива добра.

И оттуда дострела есть вдалее до пещеры, и въ той пещере лежать мощи многихъ святыхъ мученикъ, избиеныхъ въ Иерусалиме, во царство Ираклиево; и зовется место то Агапа Мамила.

Идеже взрасте честное древо

И отъ того места до честнаго Креста есть верста едина; и есть место за горою, на западъ лиць отъ Иерусалима, и на томъ месте посеченъ есть подножекъ Христовъ, на немъ же пригвоздиша пречистеи нозе господа нашего Иисуса Христа. И есть место то градомъ оделано, и посреде града того создана есть церкви, велика вверхъ, во имя честнаго Креста, исписана есть добре вся. И подъ великымъ олтаремъ, подъ трапезою глубоко, и есть пень древа того честнаго, и утвержено есть вельми, и покрыто есть надъ пнемъ темъ дъсками мрамора белаго. И оконце проделано противу древу тому, и есть кругло. И то есть монастырь Иверьскый.

О дому Захарьине

И отъ того манастыря до дому Захариина суть версты 4, и есть место то подъ горою, къ западу лиць отъ Иерусалима. Вь тотъ домъ Захариинъ прииде святая Богородица въ подгорие къ Иелисавети и целова Иелисаветь; и бысть, яко услыша Иелисаветь целованье Марьино, и взыграся младенець радущами въ утробе ея, и рече Иелисаветь: откуду се прииде ко мне мати господа моего? Благословенна еси въ женахъ и благословенъ плодъ утробы твоея.

Въ томъ же дому Иоаннъ Предтеча родился есть. И есть ныне на месте томъ создала была церкви вверхъ; идуще въ церковь ту, на левей руце, подъ малымъ олтаремъ, есть пещерка мала, и въ той пещере родился Иоаннъ Предтеча. И есть место то было оделано градомъ каменымъ все.

О горе, идеже бежа Елисаветь съ Предтечею

А оттуда есть полъверсты чресь дебрь горы, въ нюже гору прибеже Иелисаветь и рече: горо, приими матерь съ чадомъ! И абие разступися гора и приять ю. Слуги же Иродовы, иже гна въ вследъ ея, пришедше до места того, не обретоша ничтоже и возвратишася томлены. И есть место то знати на камени томъ и до нынешняго дне. И есть надъ местомъ темъ ныне создана церквица мала; исподи подъ церковцею тою пещерка мала и церквица другая, предъ пещеркою тою приздана.

Изъ тоя пещеры исходить вода добра зело, и ту воду пила святаа Иелисаветь, съ Иоанномъ, ту сущи въ горе той; ту бо есть была до умертвия Иродова, ангелъ бо то ю набдяше въ горе той. И есть же гора та велика вельми и лесъ по ней есть многъ, и около ея дебри суть многи, и есть на западъ отъ Иерусалима; имя месту тому – Орини. Въ туже гору вбеглъ Давидъ пророкъ изъ Иерусалима, отъ Саула царя.

О Раме

А отъ тоя горы къ западу лиць есть две верьсте до Рамы, и о той Раме пророкъ Иеремея глаголеть: Гласъ въ Раме слышанъ бысть, плачь и рыдание во ушию ею, Рахиль плачющюся чадъ своихъ и не хотяше утешитися, яко не суть. И есть Рама та дебрь велика, и по дебри той седела села многа. И та земля вся около дебри тоа ныне зоветься Рама, и то есть область Вифлеемьскаа. И ту Иродъ царь посла воя своа въ Раму избить святыхъ младенець.

О Ельмаусе

А отъ Рамы къ западу лиць суть версты 4 до Елъмауса, и ту Христосъ въ 3-тий день по въскресении явися Луце и Клеопе, идущима има отъ Иерусалима на село, и ту познася има Христосъ въ преломлении хлеба. И есть ту было село то велико; на месте же томъ была церкви создана, ныне же есть разорено все отъ поганыхъ и село то есть Елъмаусъ пусть. И есть сторонь пути того, за горою, было то, на правой руце тамо идуще отъ Иерусалима къ Яфу.

О Лидде

А отъ Елмауса до Лидды суть 4 версты, по полю все дойти Лидды. И ту есть былъ градъ великъ велми, имя ему Лидда, ныне же зовется Рамбилий. И въ той Лидде Петръ исцелилъ есть Ению на одре лежаща.

О Опии

А отъ Лидды до Опии есть верстъ 10, все по полю ити. Въ томъ граде по Опии святый Петръ апостолъ Тавифу въскресилъ. Въ томъ же граде поставило Петру на горници въ 9 часъ, виде плащаницю съ небеси сходящу, на 4 край повержено, и пришедшю до него, и възревъ Петръ и видевъ плащаницю ту исполнь сущу четвероногыхъ и всякого гада. И рече ему гласъ съ небеси: Петре, вставъ, заколи и яжь! И рече Петръ: Господи, николиже скверно и нечисто вниде въ уста моя. И рече ему гласъ съ небеси: еже богъ очистилъ, ты не оскверняй. И на томъ месте ныне церкви создана во имя святого Петра. Есть же гряд-отъ Опия у моря близь и приходить море къ стенамъ его, и тако ныне зовется градомъ Яфъ фряжьскииемъ языкомъ. А отъ Яфа до Тарсуфа есть верстъ 6.

О Кесарии Филипове

А отъ Тарсуфа до Кесария Филиповы суть версты 24, все подле море ити. Въ той же Кесарии святый Петръ апостолъ крестилъ Корнилия. Ту же ость близь гора, двою версту вдалее отъ града того на полудне лиць, и въ той горе жилъ отецъ Маркиянъ, къ нему же прииде жена блудница искусить его.

О Капернауме

А отъ Кесария Филиповы до Капернаума града есть верстъ 8. И есть Капернаумъ былъ градъ великъ велми, и людий множество въ немъ было, ныне же есть пусть град-отъ и есть близь моря великаго. И о томъ Капернауме глаголетъ пророк: О горе тебе, Капернауме! Възнеслъся еси до небесъ и до ада снидеши. Изъ того бо града изити хотяшеть антихристъ, да того ради ныне фрязи опустили суть весь град-отъ Капернаумъ.

О горе Карлиньстей

А отъ Капернаума до Карьмильския горы есть верстъ 6. И въ той горе снятый пророкъ Илиа жилъ есть въ пещере и той враномъ бысть той прекормленъ Илия пророкъ; на той же горе жерьци Вавиловы исклалъ ножемъ и рече Илиа: Ревнуя поревновахъ по господи бозе моемъ. И есть гора та Каръмильскаа высока велми, и море великое близь горы тоя, яко версты вдалее; отъ горы Кармильскиа до града до Кифы есть верста едина.

О Акре граде

А отъ Кифы до Акры есть верстъ 15. И есть град-отъ Акра великъ велми и твердъ зданиемъ, и лимень добръ подъ градомъ темъ есть; и то градъ есть срациньский, ныне же фрязи держать. А отъ Акры до Тирова града есть верстъ 10, а отъ Тира до Сидона есть верстъ 10. И ту есть близь село Сарефта Сидонъскаа: въ томъ селе Илиа пророкъ въскресилъ сына вдовича.

О Вирите граде

И отъ Сидона до Вирита града есть верстъ 15. Въ томъ граде жидове прободоша образъ Христовъ копиемъ, изиде кровь и вода; и тогда мнози вероваша и крестишася во имя отца и сына и святаго духа. И въ то же градъ Виритъ Ксенофонтова сына Иоаннъ и Аркадие пошъла бяста учить философии. А отъ Рита до Зевеля 20 верстъ; а отъ Зевеля до Триполя 40 верстъ; а отъ Триполя до реки Судии 60 верстъ.

О Велице Антиохии

На той бо реце есть Антиохия Великаа, и есть отъ моря подале Антиохиевъ градъ 8 верстъ, вдалее Адекия 100 верстъ, таже Малаа Антиохия, таже Каниноросъ, таже Мавроноросъ, таже Сатилия градокъ, таже Хидония островець малъ. И ти вси гради суть подле море да те грады вси минухомъ, по морю не приствающе, и приидохомъ близь къ градомъ темъ; боязни ради ратныхъ не пристахомъ въ Хилидонии. И оттуда идохомъ въ Мира, таже къ Патеру граду; и у того града сретоша нь хусареве въ 4-хъ галиахъ, и яша ны, и излупиша всехъ. А оттуда доидохомъ къ Царюграду и доидохомъ по здраву Царяграда.

О Галилеи и о мори Тривириадьстемъ

И есть путь отъ Иерусалима въ Галилею къ Тивериадьскому морю, и къ Фаорьстей горе, и къ Назарефу; та бо земля около Тивириадьскаго моря вся зовется Галилея, и есть земля та отъ Иерусалима на летний въстокъ лиць. И есть Тивириада градъ 4 дний вдалее отъ Иерусалима пешему человеку итти, и есть путь страшенъ вельми и тяжекъ зело: въ горахъ каменныхъ итти 3 дни, а четвертый день подле Иорданъ по полю итти все къ всходу лиць, олне до верха Иорданова, отнюду же поиде Иорданъ река.

И пригоди ми богъ путь-тъ исходите тако: пойде бо князь Иерусалимьский Балдвинъ на войну къ Дамаску путемъ темъ къ Тивириадьскому морю, туда бо есть путь къ Дамаску мимо Тивириадьское море; то азъ уведахъ, оже хощетъ князь путемъ темь къ Тивириаде, идохъ ко князю тому и поклонихся ему и рекохъ: и азъ быхъ хотелъ пойти съ тобою къ Тивириадьскому морю, да быхъ походилъ святаа та места вся около Тивириадьскаго моря; да бога деля пойми мя, княже! Тогда князь-ть съ радостию повеле ми пойти съ собою и приряди мя къ отрокомъ своим. Тогда азъ съ радостию великою наяхъ кони подъ ся. И тако проидохомъ места та страшная съ вой царьскими безъ страха и безъ пакости; а безъ вой путемъ темь никтоже можетъ пройти, но токмо святаа Елена путемъ темъ хожила, а инъ никтоже.

Да се есть путь къ Тивириаде: а отъ Иерусалима до кладязя святыя Богородица верст 10; а от кладезя того до Гельвуньскихъ гор суть версты 4. И на тех горах Гельвуньских убиенъ бысть Саул, царь Июдейский, и сынъ его Анафанъ туже убиенъ бысть; и суть же горы велики, камены, сухи, безводный; несть бо росы на нихъ никогда же.

А горъ техъ до кладязя Давидова есть верстъ две; а отъ кладязя того до пещеры Давидовы суть версты 4; въ той пещере далъ бяше богъ Саула царя въ руце Давидови, и не уби его, оному спящу, но уреза скуть окройница его и взя мечь его и покровъ ручный.

А отъ техъ горъ до Сихемьских горъ и до рова Иосифова суть версты 4; и на техъ горахъ сынове Ияковли пасяху стада отца своего Иякова; на те горы прииде Иосифъ Прекрасный къ братьи своей, отъ отца своего посланъ къ нимъ, нося имъ миръ и благословение отъ отца своего Иякова; они же, видевше брата своего Иосифа, вставше и яша и ввергоша и въ ровъ, иже и до днешняго дне есть ров-отъ, яко и стена глубока создана камениемъ великымъ, и твердъ вельми.

И ту угоди ны ся ночьлегь лежати на месте томъ; есть бо место то близь пути людскаго, на правой руце тамо идучи.

О кладязи Иаковли

И оттуда до вси Иосифовы, иже нарицаеться Сихарь, есть верстъ 10. И ту есть кладязь Ияковль, глубокъ и великъ, и вода студена зело и сладка; и у того кладязя Христосъ беседовалъ с женою Самарянынею; и ту лежахомъ ночьлегь.

О Самарии

И ту есть близь градъ Самария яко полъверсты вдалее отъ кладязя того. Градъ же Самария великъ есть вельми и обиленъ есть всемъ добромъ; град-отъ Самария стоить межи двема горама высокима, источници воднии мнози студени посреде града того текуть красно и древеса овощная безъ числа ту суть всяка: смокви, орешне и рожци, масличие, яко дубравы, яко леей суть по всей земли той около Самария* по краемъ нивы многоплодовиты суть по полемъ темъ; и есть земля та около Самария красна и чюдна зело; и есть место то обильно всемъ добромъ, масломъ и виномъ, пшоницею и овощемъ, и, просто реши, оттуда есть живъ Иерусалимъ всемъ добромъ.

И тъ ныне градъ Самарийский зовется Неаполи. А оттуда есть место, двою версту къ западу лиць отъ града Самария, имя месту тому Севастополи; и есть ту градокъ малъ созданъ, и то есть темница святаго Иоанна Крестителя Христова; и въ той темници усеченъ Иоаннъ Предтеча Христовъ от Ирода царя; и ту есть гробъ святаго Иоанна Предтеча, и есть на месте томъ церковь создана добра во имя Предтеча Иоанна; и есть ныне ту монастырь Фряжьский, богатъ зело.

О Аримафеи граде

А оттуда есть 4 версты до Аримафея, и ту есть гробъ святаго Иосифа и святаго Малелеиля. И есть место къ западу лиць отъ Самария въ горахъ, есть градокъ малъ созданъ надъ местомъ; церкви добра клетьски создана надъ гробомъ святаго Иосифа; и то ся место зоветь Аримафей. А отъ Самария путь есть къ Тивириадьскому морю на въстокъ лиць на летний.

О граде Васаньете

И есть отъ Самариа до Васана града верстъ 30. В томъ граде Васаньете Огъ царь Васаньский былъ, его же уби Иисусъ Навгинъ у Иерихона. И есть место то страшно и гроздно велми; исходить изъ градища того Васаньскаго 7 рекъ, и стоить тростие велико по рекамъ темъ, и финици мнози стоять высоци по градищу тому, яко лесъ частый. И есть место то страшно и неудобь проходно: ту бо живуть срацини силнии погании и биють на рекахъ техъ на бродехъ.

И лвове мнози ту ся ражаютъ; и есть бо место то близь Иордана реки и болоние велико прилежить отъ Иордана къ градищу тому Васаньскому, и ты реки текуть отъ Васана въ Иорданъ; да темъ лвове мнози суть въ месте томъ.

И ту есть близь подъ градомъ темъ къ востоку лиць, пещера дивна, крестнымъ образомъ уродилася; изъ тоя пещеры изходить источникъ; и есть ту купель чюдна, сама уродилася и яко создана отъ бога. Въ той купели самъ Христосъ купался сь ученики своими; и есть знати до днешняго дне место то, идеже Христосъ седелъ на камени; ту купахомся и мы грешнии недостойнии.

Въ томъ же граде Васаньстемъ жидове искаху Христа, показа– ша ему кинисъ, и рекоша: достоитъ ли дань дати или ни? Рече же имъ: чий есть образъ и написание? Въздадите Кесарева Кесареви, а божиа богови! И рече Христосъ, обращься къ Петру: иди верзи удину въ море; юже преже имеши рыбу, разверзи уста ея, изми статиръ и вдай за мя и за ся! У того же града Васана Христосъ ицели два слепца, иже зваста въ следъ его идуща.

О Иордане реце

А отъ Васана до верха Иорданова и до мытници Матфеевы есть верстъ 20. И есть путь-тъ, все по полю ити подле Иорданъ, – пиюще Иорданову воду, сладка зело и чиста, – все къ восходу лиць ити оли до верха Иорданова.

Иорданъ же пойде изъ моря Тивириадьскаго, отъ двою источнику кинить зело чюдно. Имя источнику единому Иоръ, а другому имя источнику Данъ; и оттуда пойде Иорданъ двема реками изъ моря Тивириадьскаго. И еста подале себе, яко трижды перестрелитъ межи има, и пойдета реце те разно себе мало, яко полъверсты вдали, и потомъ соплетася обе реце въ едину реку, и то ся зоветь Иорданъ по имени двою источнику.

Течеть же Иорданъ быстро и чисто водою, и лукаряво велми. И есть всемъ подобенъ Снове реце, въ шире и въ глубину, и болониемъ подобенъ есть Иорданъ Снове реце. И рыбы многи суть на верху его зело. И есть на самомъ верху Иорданове на обою потоку еста 2 моста камена, создана на комарахъ твердо велми, и подъ та моста течеть Иорданъ сквозе комары мосту тою.

О мытии Матфеове

Отъ тою мосту близь была мытница Матьфиева, апостола Христова; ту бо ся сходять путье вси чресъ Иорданъ къ Дамаску и въ Месопотамию. И ту въ тою месту ста обедати князь Балдвинъ съ вой своими. Ту же и мы стахомъ съ нимъ у самово верха Иорданова, купахомся на самомъ верее Иорданове въ мори Тивириадьстемъ. И походихомъ тогда, около Тивириадьскаго моря, безъ страха и безъ боязни, вся та святаа места, куда же Христосъ богъ нашь походилъ своима ногама; туже и мене худаго и грешнаго сподоби богъ походити и видети всю ту землю Галилейскую, его же не надеяхомся николиже видети, то же ми показа богъ видети и обиходити ногама своима недостойныма и видехъ очима своима грешныма всю ту землю святую и желанную.

Не ложно, по истине, яко видехъ, тако и написахъ о местехъ святыхъ. Мнози друзии, доходивше месть сихъ, не могоша испытати добре, блазнятся о местехъ сихъ, а итога, не доходивше месть сихъ, лжуть много и блядуть. Мне же худому богъ показа мужа свята и стара деньми, и книжна велми, и духовна, живша въ Галилеи летъ 30, а у святаго Савы въ лавре живша летъ 20, и тый ми мужь указа все по истине, отъ святыхъ книгъ испытавъ добро; да что въздасть мне грешному толика добра видети?

И ту стояхомъ у мосту тою весь день-ть, и къ вечеру князь Балъдвинь пойде за Иорданъ къ Дамаску съ вой своими, мы же идохомъ въ градь Тивириадьский и ту пребыхомъ 10 дней въ граде томъ, дондеже прииде князь Балъдвинъ съ войны тоа отъ Дамаска; мы же дотоле походихомъ вся места та святаа около Тивириадьскаго моря.

О мори Тивириадьстемъ

Тивириадьское есть море обиходичаво, яко озеро, и вода его сладка зело и несть сыти пиюще воду ту; по дле же есть 50 верстъ, а въ преки 20 верстъ. Рыбы же въ немъ много зело и ту есть рыба едина, дивна и чюдна зело, и ту рыбу Христосъ любилъ ясти, и есть сладка въ ядь рыба та паче всякоя рыбы, образом, же есть яко коропичь; и яхъ самъ рыбу ту многажды, ту буда въ граде. Туже рыбу и по въскресении Христосъ ялъ есть, егда прииде къ ученикомъ своимъ, ловящимъ имъ, и рече: дети! имате ли что снедно? Они же рекоша: ни и рече имъ: верзите одесную страну мрежа.

О верее Иорданове

И есть отъ верха Иорданова и отъ мосту тою до бани Христовы, и до бани святыя Богородица, и до бани апостольскиа; есть верстъ 6; а отъ бани святыхъ до града Тивириады есть верста едина.

И есть былъ градъ Тивириада великъ велми, две версте вдалее, а въ шире версты, и есть подале море Тивириадьское. Въ томъ граде многа чюдеса створи Христосъ богъ нашь: ту бо есть место по– среде града того, идеже Христосъ прокаженаго очисти; ту есть былъ домъ тещи Петровы апостола и ту Христосъ вниде въ домъ тый, ицели отъ болезни огньныя тещю Петрову, и ту на томъ месте церкви создана во имя апостола Петра, кругла образомъ; ту есть и домъ Симона прокаженаго былъ, идеже блудница на вечери омочи слезами позе пречистеи господа нашего Иисуса Христа и власы своими отре и прия отпущение бещисленныхъ грехъ. И въ томъ же граде и глухую жену ицели; ту же есть было сотниче чюдо; туже одръ свесиша съ болнымъ отрокомъ, покровъ прокопавше; ту же Ханаоныню помилова; ту есть пещера и вода въ ней сладка зело и студена, въ ту же пещеру Христосъ вбеглъ, егда хотеша и царя поставити въ Галилеи; и ина чюдеса многа Христосъ створи въ граде томъ. Въ томъ граде есть гробъ Елисея пророка, сына Асафатова; туже есть близь при пути гробъ Иисуса Навгипа. И есть ту камень великъ у моря близъ, къ стоку лиць, отъ града вдалее дострела; и на томъ камени стоялъ Христосъ и ту училъ народы, иже бяше пришли къ нему отъ помория Тирьскаго и Сидоньскаго, и Декаполя, и отъ всея Галилея; и оттуда отпусти народы и ученики своя, идоша на ону страну моря въ коряблихъ; и самъ Иисусъ ту оста и последи оттуда преиде по морю, яко по суху, ходивъ ногама своима, и бысть обонъ полъ моря предъ народомъ. Они же пришедше обретоша Иисуса, тамо ходяща, и глаголаша: учителю, когда семо прииде? Онъ же рече имъ: отъ бога вся возможна суть, а отъ человекъ невозможна. Есть верстъ 10 отъ Тивириады до того места по морю и есть место на пригории вдале отъ моря версты единоя.

Идеже Христосъ напита пять тысящь мужъ.

И есть место то равно и травно, и на томъ месте Христосъ питалъ народы 5 тысящь 5-ю хлебъ, кроме женъ и детий, и остася укроховъ 12 коша.

Идеже Христосъ третее явися ученикомъ своимъ, вста отъ мертвыхъ.

И ту есть близь место подъ горою моря того Тивириадьскаго, и на томъ месте явися Христосъ ученикомъ своимъ по въскресении третиее и прииде Христосъ и, ста при езере, рече: дети, имате ли что снедно? Они же рекоша: ни, и рече имъ Иисусъ: възверзите одесную страны мрежа по глаголу моему и обрящете. Они же въвергоша и къ тому не можаху еа привлещи отъ множества рыбъ, извлекоша на сухо мрежу, полну великыхъ рыбъ 100 и 50 и 3, и видеша у мрежи огнь и хлебъ, и рыбу печену, и ту ядъ Христосъ, прочее дасть имъ: ту создана есть церкви во имя святыхъ апостолъ. А оттуда есть близь былъ домъ Марии Магдалыни, ту исцели ю Христосъ отъ 7-ми бесовъ, и то ся место зоветь Магдалия.

О Вивсаиде граде

А оттуда есть близь въ горе Вифсаида градокъ Андреевъ и Петровъ; и ту есть место, идеже приведе Нафанаила къ Петрови и къ Андрею.

Идеже Христосъ приде ко ученикомъ, ловящимъ имъ рыбъ.

И ту есть место на мори, идеже прииде Христосъ къ Зеведееви и къ Андрееви и къ Петрови, они же влечаху мрежа и завязывяху; и ту познаста Христа Андрей и Петръ, и ту остависта лодию и мрежа, идоста въ следъ Христа; и ту селъ былъ близь моря Зеведеева отца Иоаннова и ту есть былъ домъ богословца Иоанна; и ту Христосъ изгна человека легионъ бесовъ и повеле имъ влести въ свиния, и ту истопоша свиниа въ мори. И ту есть близь село Капернаумъ.

А оттуда есть близь река велика и та река поиде изъ езера Генисаритьскаго и входить река та въ море Тивириадьское. Езеро же Генисаритское велико вельми; 40 верстъ въ шире, всямокачно, кругло, рыбы въ немъ множество есть; и ту есть близь езера того градъ, имя ему Генисира, да потому ся тако зоветь Генисаритьское.

О граде Декаполии

И ту есть другий градъ веЛикъ зело, имя ему Декаполий. И ту есть место равно близь езера того, и на томъ месте Иисусъ стояше уча народы, пришедша отъ Декаполя и помория Тирьскаго и Сидоньскаго, о томъ бо месте въ Еуангелии глаголетъ; и ина многи чюдеса сотвори Иисусъ около езера того.

О горе Ливанстей

И ту есть об онъ полъ езера того, на летний истокь лиць, гора высока вельми и велика зело, и снези на ней лежать чрезъ лето; имя горе той Ливанъ. На той горе ражается ливанъ и темианъ белый. И съ тоя бо горы Ливаньскыя идета 12 реце велице, и идеть 6 рекь къ встоку лиць, а 6 рекь на угъ лиць, и входятъ рекы ты въ езеро Генисаритьское, а 6 рекь идутъ къ Велицей Антиохии. Да то ся место зоветь Месопотамия, еже есть Средоречие; и ту есть межю теми реками Харъранъ, отнюду же изиде Авраамъ.

Отъ техъ рекъ наполняется езеро Генисаритьское, водь многъ, а изъ того езера идеть река велика въ море Тивириадьское и умножаеться вода тою водою въ мори Тивириадьстемь. А изъ моря того идеть Иорданъ, яко же и преде сказахъ о Иордане, то тако по истине есть.

Горы же тоя Ливаньския не могохъ дойти ногами своими, страха ради поганыхъ, но сказаша ны добре, о горе той, иже водяху ны християне живущий тамо и не даша ны тамо ити къ горе той Ливаньстей; много бо поганыхъ ту живутъ въ горе той; но токмо очима своима видели есмы гору ту и та места около езера того Генисаритьскаго. И есть же близь езера того отъ Тивириадьскаго моря, яко двою версту межи вдалее, есть на летний встокъ лиць отъ Тивириады езеро Генисаритьское.

О Фаворстей горе

Фаворьскаа же гора404404
  Фаворьскаа же гора… – Фаворская гора в окрестностях Иерусалима знаменита тем, что здесь, согласно Библейским преданиям, произошло преображение Господа. Три его ученика увидели, как от Иисуса исходил свет, будто от солнца. И в лучах его по сторонам Спасителя явились пророки Моисей и Илия, а из облаков послышался голос самого Бога отца.


[Закрыть] и Назаретъ отъ Тивириадьскаго моря на западъ лиць, 8 верстъ великыхъ до Фаворьскиа горы ити, токмо едину гору взити, а другую малу гору възлести, а ино все по полю ити, оли до Фаворьскиа горы ити.

Фаворьская же гора чюдно и дивно, и несказанно, и красно уродилася есть отъ бога, поставлено есть красно и высоко велми и велика; и есть посреди поля того краснаго, якоже стогъ кругло, гора та уродилася есть красно и есть кроме всехъ горъ подале; и течетъ река подле гору ту по полю доле. И есть по всей горе Фаворьсте росло древо всякое: смоковь, рожьци и масличие много зело.

Вышши же есть Фаворьскаа гора всехъ, сущи окрестъ ея, и есть уединена кроме всехъ горъ, и стоить посреди поля красно зело, яко стогъ будеть гораздо зделанъ, кругло и высоко велми и великъ ободомъ. Възвыше есть якоже можеть 4-жды с нея стрелити, а еже горе на ню, то ни осмижды не можеть на ню въстрелити. Есть гора та вся камена, лести же на ню трудно и бедно велми по камению, руками на ню лести, путь тяжекъ велми. Едва бо на ню възлезохомъ отъ 3-го часа до 9-го часа, борзо идуще, едва взидохомъ на самый верхъ горы тоя святыа.

И есть же на самомъ верее горы тоя место высоко ко встоку лиць къ зимнему, аки горка камена, мала, островерха; и на томъ месте преобразился есть Христосъ богъ нашь; и ту есть церкви добра создана на месте томъ во имя Преображениа, а другаа, во имя святыхъ пророкъ Моисия и Илии, подаль того места есть создана церкви на северъ лиць отъ Преображения.

О месте, идеже Христосъ преобразися

Место же то святого Преображениа сделано есть около градомъ каменымъ твердо, врата же имать железна град-отъ; и то есть первее было епископиа, ныне же есть монастырь латыньский. И есть предъ градомъ темь полце красно уродилося на верее горы тоя. То есть чюдно и дивно божие устроение, еже есть на толь высоце, иже воде быти ту; много бо воды есть на горе той на самомъ верее, то и нивы суть, и виногради добрии, и древеса овощнаа многа суть по горе той. И видети съ нея далече вельми.

Въ пещере Мельхиседекове

Ту есть на той же горе Фаворстей пещера чюдна зело на равне, тако есть яко погребець малъ въ камении иссеченъ, и оконце мало было на верее пещеры тоя святыя. Трапеза создана дне вь пещере той на встокъ лиць; дверци имать малы, слести же въ пещеру ту по степенемь отъ запада лиць. И предъ дверми же пещеркы тоя сто-; ятъ смоквици малы, около ея стоять дверца мала всякая. Первое же былъ лесъ великъ ту около пещеры тоя, ныне же мала и худа древца суть ту. И въ той пещерици жилъ святый Мелхиседекъ405405
  …в той пещерици жилъ святый Мелхиседекъ… – Легендарный царь древнего Салима. Согласно библейским преданиям, он приветствовал Авраама хлебом и вином и благословил его.


[Закрыть] и ту прииде къ нему Авраамъ и возва 3-жды, и рече: человече божий! Изиде Мельхиседекъ и изнесе хлебъ и вино, и созда жертовникъ ту въ пещере той, створи жертву хлебомъ и виномъ, и абие взяться жертва на небеса къ богу. И ту благослови Мельхиседекь Авраама, и остриже и Авраамъ и обреза нокти его, и бе бо косматъ Мелхиседекъ. И то бысть начатокъ литургиамь хлебомъ и виномъ, а не опресноком. О томъ пророкъ глаголеть: Ты еси иерей въ векы по чипу Мельхиседекову. И есть пещерка та вдале отъ Преображениа, яко дострелить добре, и есть къ западу лиць место то святое.

И ту почьстиша ны добре въ манастыри томъ у святого Преображенья, и ту обедахомъ; и, опочивше добре и вставше, идохомъ въ церковь святого Преображения и поклонихомся на месте святемь, идеже преобразися Христосъ богъ нашь, и, облобызавше место то святое съ любовию и радостию великою и вземше благословение отъ игумена и отъ всее братии, изидохомъ изъ манастыря того святого и обиходивше вся места святаа по всей горе той святей. Туда бо путь есть мимо пещеру ту Мелхиседекову къ Назарету.

Назаретъ есть на западъ лиць отъ Фавора. И второе паки любовию влезохомъ въ пещеру ту святую и поклонихомся святей той трапезе, юже создалъ Мельхиседекъ со Авраамомъ; и есть до днешняго дне трапеза та въ пещере той и ныне приходить ту святый Мелхиседекъ часто и литургисаетъ въ пещере той святей. И почиваютъ вси вернии, иже ту живутъ, въ горе той святе; ти же ми поведаша о томъ по истине. И похвалихомъ бога, снодобешаго насъ, худыхъ и недостойныхъ, видети та святаа места и облобызати устами недостойными. И прочее снидохомъ съ горы Фаворски доловь на поля и идохомъ по полю две версте къ Назарету на западъ лиць.

И есть отъ Фарьския горы до Назарета 15 верстъ великыхъ, по полю две версте, а 3 въ горахъ, путь тяжекъ велми и тесенъ зело непроходенъ: туды бо погании срацини мнози седятъ въ горахъ техъ и по полю тому села суть многа срациньская, и тии биють выходяще изъ селъ техъ въ горе той страшной. И бедно ми ити въ мале путемъ темъ, ноли со многою дружиною, то тако можеть пройти путемъ темъ безъ страха; намъ же не пригодишася дружина. Но сами едини тако толко 8 насъ и тоже худа и безъ оружия, на бога надеющеся проидохомъ, божиею благодетию храними и молитвами святыя владычица нашея Богородица сблюдаеми, безъ пакости по здраву доидохомъ святого града Назрета, идеже бысть святое благовещение святей госпожи Богородици отъ ангела Гавриила, ту же и Христосъ въскормленъ бысть.

О граде Назарете

Назареть же градокъ малъ есть въ горахъ на удолне месте, да оли надшедъ надъ онь тоже узрети. И посреде градка того церкви создана велика вверхъ о трехъ олтарехъ; и, влезучи въ церковь ту, на левей руце есть яко пещерка мала глубока предъ малымъ олтарцем темъ; имать же двери малы двои пещера та, едины дверци отъ запада, а другии дверци къ встоку лиць. Слести по степенемъ въ пещеру ту и во обоихъ дверцихъ техъ; влезучи въ пещеру ту западными дверми, на правой руце есть келия создана, дверци малы имущи. И въ той келийци жила святаа Богородица со Христомъ, ту въскормленъ бысть Христосъ въ святой той храминци; и ту ложица его, идеже лежалъ Иисусъ, ту въ келийци той ложицеею тако низко на земли создано.

О гробе Иосифа Обручника

Въ той же пещере, западными дверми влезочи, на левей руце есть гробъ святого Иосифа, обрученика Мариина406406
  …святого Иосифа, обрученика Мариина… – Муж девы Марии, Богородицы.


[Закрыть]; ту его Христосъ самъ погреблъ своима рукама пречистыма. Исходить у гроба его отъ стены яко миро вода святаа бела и взимають на ицеление недужнымъ.

О пещере, идеже седяше святаа Богородица.

Ту есть место въ той же пещере у дверей западныхъ близь, на томъ месте седяше святаа Богородица при дверехъ техъ близь и скаше кокнитъ, еже есть червленица; и ту прииде Гаврилъ Архангелъ, посланъ отъ бога къ девици Марии.

О дому Иосифа Обрученика

И ту есть былъ домъ Иосифовъ, и где то есть пещера та святаа все ся то деяло въ дому Иосифове, обрученика Мариина, и ту есть церкви создана надъ пещерою того святого во имя святого Благовещения. То было место святое опустело первее, ныне же фрязи обновили место то суть и устроили добре; и есть ту епископъ латиньский, богатъ зело, и то владееть местомъ темъ святымъ.

И почьстиша насъ добре питиемъ, и ядениемъ, и всемъ; и лежахомъ ту нощь едину въ градце томъ. И, почивше добре и заутра вставше, идохомъ въ церковь ту и поклонихомся святому тому месту; и, вшедше въ святую ту пещеру, и ту поклонимся святымъ темъ местомъ всемъ. И изидохомъ изъ града того, и поидохомъ мало на летний встокъ лиць, и обретохомъ кладязь чюденъ, и глубокъ, и студенъ зело; и слести есть по степенемъ къ воде той глубоко. И есть надъ кладяземъ темъ создана церкви, во имя архангела Гавриила, и есть кругла образомъ.

О кладязи, идеже ангелъ первое благовести.

Есть же отъ града Назарета вдале, яко дострелити добре, до кладязя того святого; у того бо кладязя бысть первее благовещение святей Богородици отъ архангела. Пришедши бо ей по воду и яко почерпе водоносъ свой, възгласи ей ангелъ невидимо, и рече: радуйся, обрадованнаа, господь съ тобою! Озревся Мария сюду и сюду, ни виде никого же, но токмо гласъ слыша, и, вземше водоносъ свой, идяше дивящися во уме своемъ, рекущи: что се будеть гласъ, еже слышахъ, никого же не видехъ?

И вниде въ Назареть, и вниде въ домъ свой, и седе на прежереченномь месте и начать скати кокнитъ. И тогда явися архангелъ Гавриилъ яве, стоя на прежереченномъ месте, тогда ей благовести рождество Христово.

И есть же отъ Назарета до села Исавова 5 верстъ.

О Капи Галелейстей

А отъ села того до Кана Галилеи полторы версты. Кана Галиа же есть на людскомъ пути и ту Христосъ воду въ вино преложи. И ту обретохомъ дружину многу, идущу въ Акру, и пристахомъ къ нимъ съ радостию великою, идохомъ съ ними въ Акру.

Акра же градъ есть былъ срациньский, ныне же фрязи держать. Есть же градок-отъ Акра на велицемъ мори, и лимень подъ нимъ добръ велми; всемъ обиленъ есть градокъ. А отъ Назарета до Акры есть верстъ 28 великихъ, есть же Акра къ полуденью лиць отъ Назарета.

И ту пребыхомъ во Акре 4 дни, и опочивше ту добре, и обретохомъ дружину многу, идущю въ святый градъ Иерусалимъ, и пристахомъ къ дружине той и поидохомъ съ ними, с радостию веселящеся, и приидохомъ въ Кайфу, а оттуда идохомъ къ горе Каръмильстей, и туда идохомъ. И ту есть въ горе той пещера святого Илии пророка; и ту поклонихомся, а оттуда идохомъ въ Капернаумъ. А отъ Капернаума, приидохомъ въ Кесарию Филипову, и туда есть путь все итти подле великое моря по полю, а другое по пескомъ оли до Кесария. Ту пребыхомъ 3 дни въ граде томъ Кесарийстемъ; и ту есть былъ Корнилие, его же Петръ апостолъ крестилъ.

А отъ Кесариа идохомъ въ Самарию; на лево отъ Кесария въ Самарию путь есть въ горы, есть верстъ 20 отъ Кесария до Самарии. И быхомъ другаго дне полудне въ Самарии, но по тиху идуще и зноа ради и не можаху людие пеши ходите въ зной; и ту нощь прележахомъ предъ градомъ темъ Самариею у кладязя Ияковля, идеже Христосъ беседова съ женою Самарянынею.