Текст книги "Антология хожений русских путешественников XII-XV века"

Церкви же во Иеросалиме: первая Святая Святыхь, ту же крестиане входять, другая святый Сион, третия святое Воскресение. У святаго же Воскресения два верха: един верх съ маковицею и со крестомь надъ пупом земнымь, а други верхъ надъ гробомь божиимь, си же верх не покрыт. А надъ гробомь божиимь храмина камена, яко церковка клетски, со алтаремь, а безъ притвора; въ первы двери влезши на праве руце лежить камень, коли аггел пришед, отвали отъ двери гроба. И во другие двери влезше, яко во олтарекъ наклоняся, и само гроб божий возле стену, яко коникь, а надъ нимь написан Спас пофряжьски на стене. А вверху надъ нимъ горять двенадцать поникадил сткляных, а на томь месте тако же два на десять поникадил горять, коли его со креста сняли и положили его на томь месте.

А поклонитися гробу божию дати седмь златых денег венетическихь фролин, ты и еще колико на пути арапомь давати откупати пути; идучи от Рамля ко Иерусалиму ты и еще сторжемь давати, пятнадцать бо стражев у гроба божиа приставлено лютыхь саракин.

Отъ Рамля итьти пять верст равно и красно до Иерусалима, а опять полести въ горы.

Град бо Иеросалим въ горах стоить на прислоне противу встока, а гора Елеонская противу ему стоить. Град бо Иеросалима издалеча не видети, нолни близу его пришед, то же увидимь. А стоить на стрелице съ сю сторону съ прихода, Удол Асафатов пришелъ къ Мертвому морю, а об ону страну у потока Кедрьски. А где ся сошли въ место на самой той стрелице Силуямля купел есть, а противу на оной стране есть Удол Асафатова село Скуделниче.

Четвертая же церкви Михаил архистратиг, сербьски монастырь, въ нем же игумен Пасии, икономь Макарьи сырианин. Отъ Сионскиа горы пятая церкви Ияковъ, брать божий, сию же церковь Арменове взяли за себя. Шестая церкви Одигитрие монастырь черници. Седмая Успение и черницы же. Осмыи Иверски монастырь черницы же. Девятая метохи Иердана оть Предтечева монастыря. Десятая метохии же оть Савина монастыря. Се же внутрь града Иерусалиму.

Есть въ дому Давыдове полата не отворяется.

И поидохь изъ града въ Вифанию, иде же гроб четверодневнаго Лазаря. И оттоле идохь съ три версты есть Христов камень, на нем же почиваше Христос. Отъ Иерусалима ходя на Иердан ко Иоану въ пустыню и посещаше его. И оттоле итьти съ три версты потокомь Кисовымь, и оттоле съ пятнадцать верст есть пустыни Христова, иде же четыредесять дни постися Христос. И ту е близь гора, на ней же диавол его искушал. И оттоле спущаяся съ горы град Ерихон. И оть Ерихона съ пять верст Предтечев монастырь. А ити оть Ерихона до Предтечева монастыря равно и красно. И оттоле съ версту до Иердана. И быхь въ Предтечев монастыри неделю и хождахь на Иердань искупахся доволно многажды въ томь месте, яде же Христос крестился. Ту стоить церкви святая Троица, был монастырь, ныне же оть злых арапов разорена. И взят оть перьсти святаго Иордана подножие Христово, и оттоле поидохь за Иердан въ поток Хоривски при реце Иерданстеи въ пещеру, иде же Предтеча жил. И коли Иван игумен пошел в Синайскую гору и ял его познои и влезе въ сию пещеру, и разболеся. И явися ему Иоан Креститель и глаголеть ему: "Далече ли, калугере, идеши?" Онъ же отвеща: "Въ Синайскую гору". Креститель же ему глаголеть: "Да не изыдеши, калугере, отсюду, здрав будеши". Си бо вертеп боле Синаискиа горы многа божды мене (?) господь и посещаше въ семь месте. Он же встав и нарядил монастырь.

Монастырь же таков: наряжен ни каменемь, но въ горе ископан, въ вертепе томь церковь доспета, а келий въ берегу ископаны. Ныне развалено и засыпано оть злыхь лютыхъ арапов. И ту бихь челомь и поидохь на он пол потока Герахова и на гору Кормилскую, идеже Илиа жил враномь питаемь. Ту также монастырь был царици Елена поставила. Ныне же развален оть арапов же. Оттуду поидохь на гору, иде же взят былъ Илиа на колесници огнены на небо. Въ сем же потоце трестникь бяше силень, и ту живяше зверие лютые и серны, и свинии, и пардуси, и осли дивии, бяше бо место то пажитно. И паки хотех поитьти тамо, иде же Мариа Египетская жила въ пустыни на горы велици, пропасти, изнемогохь итьти и паки возвратихся и преидохь Иордань и внидохь въ гробницю, иде же кладутся святии отци исъ Предтечева монастыря, и ту бихь челомь и лобызахь мощи святыхь старцев и святаго старца Зосимы, еже Марию Египетскую причащал. И оттоле идохь въ Герасимов монастырь, ему же лев работал, иже Ердане поприще едино. И ту поклонихся и бяше пуст и не можаше бо никаки чернець жити злыхь ради арапов. И бяше монастырь чюден и хорошь при Иердане.

Ерданъ же река быстра и велми и глубока, а не широка, бережиста, а вода въ ней белаа, иловата, вступив въ ней ино по колену. А иде съ нощи на полудние, а идеть въ Мертвое море, потому зовется Мертвое море потопило Содома и Гомора. И поидохь възле Мертвое море и наидоша на ны злые арапове и возложиша на мя раны доволно и оставиша мя вь полумертва, отидоша въсвояси. Аз же не моги, едва возмогохь доитьти Савина монастыря на Удол Асафатов и быхь ту 8 дни и упокоите мя святии старци. Старцев бо бяше тридесять.

И оттуду идохомь въ Сихемь, аральски же зовется Рахиль, иде же гроб Авраама, и Исаака, и Сарры, и Ревеки. И оттоле возре име горе стоить дуб Мавреиски, иде же учреди Авраам святую Троицю, и есть гроб подъ темь дубомь Иевва Псидейскаго и Ионы пророка. И привел царь Соломон воду со Сихеми, сиречь изъ Халила, въ церковь Святая Святыхь. И до ныне та есть вода Святая Святыхь.

И оттоле поидохь ко адовымь вратомь и видехь адова врата. И оттуде поидохь къ Дйоклитианове полате, иде же святаго великомученика Георгиа Диоклитиан мучил523523
  …Георгия Диоклитиан мучил… – Речь идет о легендарном сирийском святом мученике – Георгии. Легенды о нем получили широкое распространение как у христиан, так и у мусульман. Большой популярностью эти легенды пользовались и на Руси. Мучения святого связывались с именем императора Диоклетиана (284-305).


[Закрыть] и съ горы пущал на острые железа. Есть в томь месте полата Диоклитианова велми велика съ город невеликь есть. И есть въ томь месте и ныне церковь святый Георгии и есть в церкви той чепь железна велми велика, чемь его мучили, води вделана въ стену. И сею же чепию знаменаются болящи и исцеляются.

И оттуду поидохь въ дом Захариин въ погорие. И есть въ томь месте: только девица испиеть тое воды, а не сохранивши детства иное, и уста позлатеють. Се же зовется водообличениа. Къ сему кладезю Иосиф приводил пречистую Богородицю на искушение, откуду бысть во чреве ея. Вода же бе горка, и как пречистая испила, и такь доспелася сладка.

И оттуду поидохь камени, иде же Елизаветь скрыся со младенцемь отъ иродовыхь слуг. И оттуду поидохь въ Вифлеем, ту стоить церковь святое Рожество Христово, чюдна велми, надъ вертьпомь и надъ яслями, кде Христос родился, ни во Иеросалиме такое нет. Есть въ ней внутри сорок столпов отъ краснаго мрамора чюднаго аспида. Пещера же бе ясли съ левую руку подъ олтаремь, держить же ея каплан фряжьски, сиречь поп. И лезучи въ пещеру самыхь двери съ левую руку есть кладязь, въ немь видится во дне яко звезда, и ту бихь челомь и целовахь пещеру и ясли.

И оттуду доидохь ко гробу Рахилину. Гроб же Рахилин стоить межу Вифлеомомь и Еросалимомь на египетской дорозе.

Шел Ияков изъ Сихема, еже зовется Хараон, а был у отца у Авраама, и пошел въ Палестину и город Рамля. То было Ияковле жилище и тут преставися на дорозе. Надъ гробомь темь стоить мезгить саракинская. И оттоле съ три версты стоить столп, на томь столпе столпникъ сидел и принес къ нему аггел ключь града Иеросалима и велел ему предати градъ Иросалим нечестивымь человекомь, сиречь саракиномь, уже четыреста леть владеють Иеросалимомь и гробомь божиимь саракины.

Аз был грешный Зосима еромонах у гроба божиа в лето 6928, тогда был патриарх Феофил, а во Египте солтан, сиречь царь, и имя ему Татар, а въ Дамасце Цекмак, се бяше сороцинские имена.

И оттоле идохь на гору въ монастырь ко святому Ильи, еже коли изреза жерца Валовы, возбеже на ту гору отъ лица Велзавелина. И оттуду поидохь въ монастырь Иверски, иде же усечено древо кресту господню, то бяше место подъ престоломь. И оттуде поидохь въ место, иде же Авимелехь спал шестьдесят лет. И оттуде поидохь въ пещеру, иже зовется село Скудельниче, иже искупиша сребромь тем, иже Июда на Христе взял, ту же кладутся христиане и во святемь Сионе. Саракины же кладутся повыше Удолиа Асафатова за египетскою дорогою, иже отъ Еросалима къ Египту идеть.

И возвратихся во Иеросалим и внидохь въ те врата, куды Христос на Вербницу воехал, и мимо место то, где Стефана первомученика жидове камениемь побили. Таже въ потокь Кедарски и мимо Гепсаманию. Гепсимании бо стоить межю Иеросалимомь и Елионскою горою въ потоце Кедрийскомь и мимо пещеру, где Христос со ученики водворялся, и мимо то место Христос отходя отъ ученикь своихь моляся отцу своему. И по конець горы Елеонския мимо Висавигию сквозе Вифанию, и мимо Христов камень и потокь Кисов и мимо пустыню, где Христос сорок дни постися и мимо град Ерихон къ монастырю Предтечеву и таже и ко Иердану.

И поидохь отъ Иеросалима съ господиномь патриархомь Феофиломь и его поп Иакимь. Сеи Иакимь умееть грамоту арапьскую, и греческую, любимь патриархомь велми, по немь хочеть патриархомь быти, Офонаси духовникь и Варфоломей. И приидохомь во град Араамля, еже во евангелии писано есть: глас Араме слышан бысть. И оттоле поидохь въ Лиду, иде же великомученику Георгию главы усекнути. И оттоле поидохь во град Яфу, еже во Апостоле зовется Опии. Сеи град стояше при море, иде же Петр апостол виде въ сем граде плащаницю съ небеси висящу. И оттоле поидохь въ корабль и туто бяше присталь корабеленая.

И идохомь триста миль и пристахомь ко острову Кипренскому въ лимень ко граду Киискому; ту бяше Лазарь четверодневныи епископ был. И оттоле поидохь на гору, иде же крест стоить благоразумнаго разбойника, воздухомь держимь. Гора же бяше высока велми, а другая гора възле ту гору, на ней же родится ладан черны, испадаеть съ небеси месяца нуля и августа росою. Суть бо по горамь темь древца мала много ииска съ травою равна, и на техъ древцехь емлють ладанъ той. Въ семь же острове велики город столныи Левкусиа, ту седить рига фряжьски, сирень князь, и обладаеть всемь островомь темь, и брат его арцибискуп, гречески же епископ четыри, а два мирянина, два черныца.

Во всех же церквах фряжских со органы поють на великия праздники. Други город Киринея, въ семь городе родится сахар и рожки, и гроздья, и аспиди, и имуспула. И оттоле есть верст десять село княже, зовется Оморфо, сирень хорошее, ту тако же родится сахар и ту лежить святый Мамае и точить на свои праздникь миро. Четвертый город Сиоурии, пятый Ларнаки, шестыи Пафа, семыи Китея, иде же был Лазарь четверодневныи. И пребыхь въ семь острове во городе Левкуси полтора месяца. Монастырь зовется Бииви.

И поидохом въ корабль и идохь пятьсот миль и видехь землю и видехь горы, их же есть ни въ писании слышел (и ходих) по лукоморию и пристахомь ко острову Родосу. Си же остров придали апостоли ко апостольской церкви въ Римь. И седить отъ папы римскаго мистр велики и все у него крестоносци и церковный люди носящи кресты на левыхь плечехь, на портищехь нашиваны. И ту есть митрополит гречески, епископ и поп мирянин. Противу острова того есть град Макри турское место и въ томь городе по всей земли той и по всей Олии до Мур, ту родится темиан черный, зъ древа и лупят его и мажуть его масломъ древянымь и выступаеть, яко мезга, и снимають его острыми железы и яко сокъ, имя древу тому зигиа есть, аки олха образомь, и перетапливають его и чинится черн. И поидохь въ корабль и плыхомь другую пятьсот миль.

И на среди пути найде на нась корабль каталански, разбоиници и разбиша нашь корабль пушками и въскакша на нашь корабль, аки зверие дивии. И разсекоша нашего корабленика (на) части и ввергоша въ море и взяше, яже въ нашемь корабли. Мене жъ убогаго удариша копеинымь ратовищемь въ груди и глаголюще ми: калугере, поне дуката кърса, еже зовется деньга золотая. Аз же заклинахся богомь вышнимь, что нет у мене. Они же взяша мшелець мои весь, мене же убогаго во единомь сукманце оставиша. И скачющи по кораблю, аки зверие дивии, блистающи копии своими и мечи и саблями и топоры широкими немецкими. Мню аз грешный Зосима, яко въздуху устрашитися отъ нихь. Паки взыдоша на свои корабль и отидоша въ море. Мы же пристахомь ко острову Митилину. Ту быхомь не мало дни и оттоле поидохомь въ Костянтин град.

И ту озимихомь и ту быхомь всю зиму. Месяца же мая поидохомь на Чермное море ис Костянтина града и донесе мя бог Рускиа земля гроба своего, милостию и его гроба матери всехь иерусалимскихь мест.

Буди же въ семь намь написание се причащающимся благословение отъ бога и отъ святаго гроба и отъ всехь мест святыхь сихь приимуть бо мзду от (бога) равно съ ходящими до святаго места града Иеросалима и видевшихь места сиа святая. Блажени бо видевши и веровавши, тре-облажении же не видевши и вероваша: верою бо приде Авраам въ землю обетованную. Поистине бо вера равна добрымь деломь.

Но бога деля, братие и отци и господье мои, сынове рустии, не зрите худому моему худоумию и грубости моей, да не будет ми въ пухуление написание се: не мене деля грешнаго человека, но святыхь деля мест. Прочитайте с любовию и верою, да мзду приимете отъ бога Спаса нашего Исуса Христа, да бог мира будеть со всеми вами. Аминь.

А се подъ Египетскимь солтаномь градов524524
  А се подъ Египетскимь солтаномь градов… – Перечень округов и правителей, подчиненных мамлюкскому султану Египта, представляет большую научную ценность, другими источниками не передается.


[Закрыть]: первый град Египет, другой град Иерусалим, третий град Александрея, четвертый град Газ, пятый град Дамаск, 6 град Антиохии, 7 град Веруть, 8 град Ри… девятый град Рамля, в Палестине 10 град Лида, и град Вифлеом. А по Понетскому морю, сиречь по Белому же за Царемь градомь, острове: 1 остров велики Кипреиски, 2 остров Митилин, 3 остров Родос, 4 Ирит, 5 Внетиа, 6 Патмо, 7 Стихиа, 8 Лимнос, 9 Лимбро, 10 Тигри, 11 Марморо, а сего острова 100 миль а до Царяграда.

Се патриарху Ерусалимскому на обедне кличють: игумену и патриарху святаго град Ерусалима, Галилея, Ириа, Аравиа, святаго Иордана, Палестина, полата еци, еже есть много лета.

А десяток гречески: ена, дне, трис, пендие, ексие, ефта, окто, нея, дека, трилъанда, сарамънда, пенианда, окинада, овдомида, егдонда, епининда, акарто.

А се десятокь арапской: вахоть, треин, телять, арба, хамсе, сетьсебя, тимени, писе, аширь, ширин, теллятин, амбрянин, хамсинин, сксетин, севеин, тимнен, тисен, мир.

А се богу имена: жидовскиа Данаи, арапскиа Алла, гречески Офеосъ, фряжьски Диосъ, арменски Арьства, татарски Теныри, руски Бог.

Книга хожений: Записки русских путешественников XI-XV вв. / Сост., подгот. текста, вступ. ст. и коммент. Н.И. Прокофьева. М., 1984.

В 1419-1422 гг. совершил хожение иеродиакон Троице-Сергиева монастыря Зосима. По возвращении на Русь Зосима подробно описал все перепетии своего сложного путешествия. Его записки – последнее русское свидетельство о византийской столице до ее захвата турками.

КНИГА ГЛАГОЛЕМАЯ КСЕНОС СИРЪЧЬ СТРАННИК ЗОСИМЫ ДИЯКОНА О РУСКОМ ПУТИ ДО ЦАРЯГРАДА И ДО ИЕРОСАЛИМА

Хожение и бытье гръшнаго инока Зосимы, диякона Сергиева монастыря

Понеж глаголет писание: Тайну цареву хранити добро есть, а дъла Божия проповъдати преславно есть; да еж не хранити царевы тайны не праведно есть и блазнено, а еж молчати дъла Божия, то беду наносит души. Тъм же и аз боюся дъла Божия таити, воспоминая муку раба оного, приимшаго талант Господень, в земли скрывщаго, а прикупа им не стоворша. И никтож ми да не върует от вас рустии сынове, слышавше написание сие; не мнитеж мене гордящася о хожений сем. Аще ли суть етери чтуще книги сия и высоть словеси сему дивящесь и не хотяще въровати, буди им милость Божия. Ти бо, немощь человъческу помышляюще неприятно нами творят. Глаголемая еже о хожений и о бытьи моем, то уже подобает ми начата. От руския страны и столна града Москвы, из великия лавры преподобнаго игумена Сергия потщахся достигнута славный град Киев, иже бъ мати всъм градом руским. И пребых в лавръ, еже зовется Киевская печера, у гроба преподобнаго Антония игумена и Феодосия полълъта, возмыслих и хотъх видъти святая мъста идъже Христос своими стопами походи и святии апостоли послъдоваху Ему и святии отци паки, идъже спасахуся. И поидох от Киева с купцы и велможами с великими и идох 30 миль (а миля по 5 верст), и обрътох реку велику в Подолскои земли еже зовется Буг. И ту стояще град Бряслав; и ту стояхом недълю. И поидохом в поле татарское и идохом 50 миль дорогою татарскою, еж зовется «на великий дол», и обрътохом реку велику под Митеревыми Кышинами, еж зовется Нъстр; ту бяше перевоз и порубежье волоское. Об ону страну Волохове перевоз емлют, а о сю страну Великаго Князя Витофтовы и тамгу емлют и тъм обои делят. И оттоле 3 дни до Белаграда ити по воложскои странъ. И пребыхом в Белеграде 2 недъли. Оттуду 9 верст до моря, и на самом устье Нъстра столп стоит, еж зовется «фонарь», и ту бяше пристань корабленая. И наняхом себе корабль, поидохом на морие и быхом на морие 3 недъль. Едва с нужею доидохом устья цареградскаго, тогда бывает футрина великая и валове страшнии пред Филиповым заговеньем. И достигохом царьскаго града и пребыхом в Царъграде 10 недель, и обходих вся святая мъста.

Первое, поклонихся святой великой церкви Софьи, идъж патриарх живет, и целовав образ Господа нашего Исус Христа, иж пред ним гръхи своя исповъдают, иже срама ради не мощно исповъдатись духовнику, еж зовесь Спас "исповедник", и образ Пречистыа, иж во Иеросалимъ бесъдова к Марии Египтяныни, и святаго Арсенья мощи, патриарха; и гроб Кирика 3-лътнаго и камень во олтари, иже Христос с самарянынею на кладези Ияковли бесъдова, и трапезу Авраамову, на неиже Авраам учреди святую Троицу под дубом Маврииским; и одр желъзныи на немже мученик святых мучили, и до нынъ знати кровь мученическая на нем; и посох Златоустов вверху стоит в стенъ; врата великая церковная Ноева ковчега.

Туж близ святыя Софеи и монастырь Одегитрия, в немже чюдо Пречистая творит во всякий во вторник. Близ того монастыря другы монастырь, Лазарь четверодневныи, и в нем мощи его запечатлънны в столпъ, и сестра его Мария, и другы Лазарь, епископ Галасиискии. Туж близь женский монастырь и прочья; ту глава Иоана Златоустаго. Близьже того другии монастырь; святый Кипреян волхв во своем тъле. И ин монастырь святый Андръи Уродивыи Христа ради, иже и до нынъ бесных исцеляет. Тамож близь святыя Софеи монастырь женский Панахран; да тут глава Василья кесариискаго и ступении святаго апостола Павла на камени воображени добръ. Близьже святый Софьи Христос Милостивый монастырь женский; вода есть святая в нем под церьковью: в песок ноги копающе прокаженнии и болящи исцеленье приемлют безчисленно. Близьже того монастыря женски монастырь Панданасыи, и тут часть от страстей Христовых и от риз и от крови и от власов Пречистыя. И туж великий монастырь святый Юрьи Монгана; в немже многи мощи святых.

Пред двермиж святые Софъи столп стоит, не немже царь Устиян стоит на кони; конь мъдянь и сам мъден вылит. Правуюж руку держит распростерту, а зрит на восток; хвалится на сороцинские цари, и сороцинские цари против ему стоят болваны мъдяны, держат в руках своих дань и глаголют ему: Не хвалися на нас, господине, мы ся тебъ ради противити начнем. В друзъиж руцъ держит як яблок злат, а на яблоцъ крест. А оттуду есть, яко стреловище, мъсто, зовесь Подорожье, урыстанье конское, и тут столп на спъ; соп есть человъки с 3 высота его. На спъ том лодыги 4 мраморены, а на лодыгах тъх поставлен столп; высота его 60 сажен, а ширина его 3 сажени: един камень, без става. И ты, человъче, не моги тому подивитись, кто то есть ставил? какие се были люди? И возлъ стоит столп, 3 главы аспидовы, мъдены, сплетены в мъсто, а в них запечатан яд змиин: то, кого ухапит змия внутрь града, прикасаются, исцелают; аще ли внъ града, то нъсть исцеленья. Повышеж Подромыя стоит столп и вверху его крест, где был двор царя Констянтина и в нем запечатанны укрухи Христоты 12 и Ноева съкъра, чем ковчег дълал, и камен, иж из него Моисеи воду источи. И есть столп, идучи к Студийскому монастырю, весь подписан, что на свъте есть: сии столп поставил Царь Аркадеии на память себъ.

Во святъиже апостолстеи церкви стоит столпец, у негож жидове Христа вязали, а други столпец, у негоже плакась Петр апостол, коли отвергься Христа. В тоиже церкви великий Спиридонеи и святый мученик Полиект лежит и гроб царя Костянтина и матери его Елены и многих царев правоверных и образ Господа нашего Исуса Христа, емуж исповъдась мних, впад во блуд, иже в патерице писан: иж пред образом исповъдашесь и паки в блуд впался. И пред враты великими церковными стоит столп велми высок, а на столпъ стоит аггел страшен велик, и держит в руцъ скиптер Царяграда и противу ему стоит Царь Костянтин держит в руках своих Царьград и дает на соблюденье тому аггелу. Монастырьже великий Пандракратов еж зовется по руски Вседержитель; в немже стоит дека, на неиж Христа несли ко гробу на неиж слезы Богородицины и до нынъ знати, бълы яко млеко. Тутже главы Фрола и Лавра, Иякова Перскаго и Стефана Новаго рука и преподобный новый Михаил и судно то во олтари, еж Христос воду в вино претвори в Кана Галилъистеи. И всторонь того монастыря, з два перестрълища зовется монастырь Аполикаптии пред враты монастыря того лежит жаба каменна. Сия жаба при цари при Лвъ Премудром, по улицам ходя, сметие жерла, а метлы мели и востанут людия по ряду а улици чистый. Ту есть монастырь Филастропос в немже мощи Климента Ангирьскаго и Фефания Царя Лва Премудраго Монастырь Кехаритомени ту лежит Иоан Дамаскин.

В Лахернеиж церкви лежит риза Пречистой и пояс и мощи святаго Потапья. В монастыръж Перелептъ рука Предтечи коею Христа крестил, и глава Григорья Богослова и поп Григореи Никомидииски и глава Татьяны мученици; мощи святых многих туж. Того монастыря близ, доспъты два болвана каменны велики: сеж были при Лвъ, царъ премудром, правосудьи.

Монастырь туж Подром; туто стоят святыя страсти и риза Спасова и копье, чъм его проболи и трость, на чем то было копье насажено и губа, чъм его напоили отцета и желчи и кровь Христова, кою икону жидове проболи во граде Веруте и хлъбец кои на вечерял со усеники своими Господь во святом Сионе, камень, кои клали жидове под главу Христову, и власи пречистыя Богородицыни и млеко. Монастырь женский тут Козма и Дамьян; ту лежит преподобная Елисавет и блаженная Фомаида, посечена от свекра, иж в патерицъ писано: жена была рыболовля, муж ея пошел на рыбу; отець его восхотъ с нею впастись в блуд. Онаж бъ мудра и богобоязнива, не дасться ему; онже, разярився похотью плотскою, посъче ея сь яростью и дасть ей Бог исцелънья: иж кому брань плотская приходит, и притекают и поклоняются гробу ея, и абие отходит брань молитвами ея. Монастырь Вергетис, тут лежит Феодосия дъвица.

Монастырь женьскии Липесии, туто лежит святый Стефан и царици Ирина; туто лежит царица руская Анна, дъщи московскаго Великаго Князя Василья Дмитреевича, внука Великаго Князя Александра литовскаго, зовемаго Витофта. Монастырьже Керамартась, ту лежит Мария Клеопова и Иванн воиник. Монастырь женский Повасильяс, ту лежит святая Калия белица. Муж ея был богат и гостил по морю три лът. Онаж мудра и богобоязнива и милостива, и раздая все имъние без мужа, все; мужже ея пришед и замучи ю. Он творит, что в лихое дъло подая; и дасть ей Бог исцеленье: хромии и болнии гробу ея бьют челом и исцеляются.

Монастырь великий Студийский, тут лежит Еуфимеи патриарх, и миро Дмитреево в рацъ стоит близ врат Студийских и внъ града зовесь Пигии там вода святая Пречистыя исцеленье подает много болящим. И туж близ монастыря церковь святый пророк Данил и гроб внутрь во церкви возлъ стъну на 2 лвах.

Царьград стоит на 3 углы, 2 стъны от моря, а 3-я от западу, приступ ратным. В первом угле от Бълого Моря Студийский монастырь, во 2-м угле святаго Юрья монастырь Монган. Сеи бяше первый градец был мал, зовется Византия, напротив Скутаря. Зовется Скутарь мъсто на оной странъ моря, торговище: сьежжаются турчяне, а с сея страны греки и фрязове и торгуют меж собою. В 3-м угле стоит церковь Лахерна, от лимения повыше мало царева полата, а за лименем стоит фряжской град Галата; бяше град красен и хорош добръ.

Сияж вся сподобихся видити и поклонитись страстем Его и святым Его угодником, якож преж бъх, коли со княжьною во царство благочестиваго царя греческаго Кир Мануила. И в то время венчя сына своего старъишаго Калуяна на царство греческое, состарившуся ему. Имяше убо царь Мануил 6 сынов: 1 [-и] сын Калуян, сиръчь Иоан, иж нынъ царь в Костянтинъ граде; 2[-и] сын его Андроник, деспод Селуня града; 3[-и] сын его Феодор, деспод Амореиския земли; 4[-и] сын его Костянтин, деспод Чермнаго Моря; 5 [-и] сын его Дмитреи, деспод Лимнииския земли; 6[-и] сын его Фома, сеи бяше у отца в полати еще есть. И при святым вселенским патриарсъ Кир Иосифъи, иж много ползоваху учением его. Сииж великий церковници: великий хартофилак; 2[-и] сакиларии; 3[-и] скифилакос; 4[-и] сакилаос. Во святеиже Софъи 7 кладезев, а под нею езеро.

Се аз, грубы ермонах Зосима, смотрих и поклонихся и поминах в молитвъ, кто до меня рускых сынов добр.

И поидох в корабль ис Константина града и…

Majeska G.P. Russian travelers to Constantinople in the Fourteenth and Fifteenth centuries. Wash., 1984. P. 177-195.

Варианты чтений по другим рукописям смотрите в подстрочных примечаниях: Ibid. Р. 166-175.