Текст книги "Аскетика. Том I"

Вопрос 419, тогожде. Рекл еси, отче, егда о долготерпении вопрошах, яко и сие, и всякое благое дело дар Божий есть. И ныне о молитве рекл еси, яко несть от Бога помощь. Изъясни убо ми, кое сих различие?

Ответ. Аще с начала убо по тщеславию бысть дело благое, сиречь молитва, диаволско без сумнения есть. Аще ли же в начале не имел еси тщеславия, последи же приял еси е, тамо бывшее добре разорил еси ради тщеславия: якоже зиждяй стену, и обращся разоряет ю. Аще же тщеславие боряше, ты же не приял еси, то ни мало тя повреди.

Вопрос 420. Многажды, егда пою, ощущаю себе аки, высокомудрствующа: что убо должен есмь рещи помыслу?

Ответ. Егда возносится сердце в псалмопении, поминай, яко писано есть: «преогорчевающии да не возносятся в себе» (Пс. 65, 7). Преогорчити же есть, еже не пети разумно, со страхом Божиим. И испытай, аще не парит помысл твой, внегда пети. И всячески обрящеши, яко парит, и преогорчеваеши Бога.

Вопрос 421. Егда отягощаюся в помыслех, или псалмопении, или кроме псалмопения, и призываю имя Божие в помощь, влагает ми враг, яко возношение имать вещь, яко мнится добро творити в непрестанной памяти Божией. Како убо подобает имети о сем?

Ответ. Вемы, яко болящии всегда требуют врача и врачеваний его, и обуреваемии непрестанно текут ко пристанищу, да не когда постигнет их потопление. Сего бо ради вопиет и пророк, глаголя: «Господи, прибежище был еси нам в род и род» (Пс. 89, 1). И паки: «Бог нам прибежище и сила, помощник в скорбех, обретших ны зело» (Пс. 45, 1). Аще же прибежище наше есть, помянет, яко глаголет: «призови мя в день скорби твоея, и изму тя, и прославиши мя» (Пс. 49, 15). Навыкнем убо, яко належащей скорби, призывати подобает, непрестанно милостиваго Бога. Призывающе же имя Божие, да не вознесемся помыслом. Аще бо не будет кто безумен, то отмщаем от некоего, не возносится. Требующии убо Бога, призываем имя Его в помощь на сопротивныя. И аще не буи есмы, то не должни есмы возноситися помыслом: требующе бо, призываем: и скорбяще, прибегаем. Над всеми же сими разумеем, яко еже непрестанно именовати Бога врачевание есть убивательно не точию всех страстей, но и самаго деяния. Яко же бо снискивает врач врачевание, или пластырь на рану страждущаго, и действует неведущу недугующему еже како: тако и имя Божие именуемо убивает, и нам неведущим, еже како, вся страсти.

Вопрос 422. Егда мнится, яко безмолствует помысл, и есть без скорби: еда ли несть добро и тогда поучатся в призывании имене Владыки Христа? Понеже глаголет ми помысл, яко ныне, отнележе мир имеем, несть потреба сего.

Ответ. Не должни есмы имети сего мира, аще имамы себе грешных. Речено бо есть: «несть мира грешником, глаголет Господь» (Ис. 48, 22). Аще убо несть мира грешником, то сей мир каков есть? Убоимся, яко писано есть: егда рекут: мир и утверждение, внезапу нападет на них всегубительство, якоже болезнь во чреве имущей, и не имут избежати. Есть же, егда и с хитростию творят врази, еже тиху быти сердцу вмале, якоже не быти призываему имени Божию. Не неведят бо, яко разслабевают от призывания Его. Ведуще убо, сие да непрестанем призывати имя Божие на помощь. Се бо молитва есть. И глаголет: непрестанно молитеся. А еже непрестанно конца или меры не имать.

Вопрос 423. Егда похваляют мя человецы, или помысл в сердце, и вижду себе отягощаема от него: что должен есмь сотворити к нему?

Ответ. Егда похваляет тя помысл, и не можеши без вреда прейти и, потщися призывати имя Божие, и рцы ему: писано есть: «людие мои, блажащии вас прельщают вас и стезю ног ваших возмущают» (Ис. 3, 12). И яко похвала сия, брате, ничтоже есть, но прелесть, вопиет пророк, глаголя: «яко всяк человек трава, и всяка слава человека, яко цвет травный» (Ис. 40, 6). И яко приемляй похвалу человеческую непользуется, глаголет Сам Владыка: «како можете веровати в Мя, славу от человек приемлюще?» (Ин. 5, 44). Аще же нечто по Бозе бывает, должни есмы поминати: яко хваляйся о Господе да хвалится. Ибо апостол, доспев в великия меры, в себе нехваляшеся, но вопияше, глаголя: «Благодатию же Божиею есмь, еже есмь» (1 Кор. 15, 10). Тому бо воистинну слава, и великолепие вовеки. Аминь.

Вопрос 424. Аще убо пою, или молюся, или чту чтение, и возникнет зол помысл, вонму ли ему, и пресеку псалмопение оно, или молитву, или чтение, да и таковыми помыслы воспротивлюся тому.

Ответ. Вознеради о нем, и вонми со испытанием псалмопению, и молитве, и чтению, во еже возмощи силу прияти от глаголемых. Аще бо восприимем упражнятися в помыслех врага, то николиже возможем что-либо благо содеяти еже он глаголет. И егда видиши союзоплетение их таковое суще, якоже и псалмопению препинание сотворити, или молитве, или чтению, то ниже тако да возлюбопришися с ними. Несть бо сие твоея силы. Но потщися призывати имя Божие, и приидет во твою помощь, и упразднит ухищрения врагов. Того бо есть сила, и слава, вовеки. Аминь.

Вопрос 425. Како стяжавает кто умиление в молитве, и чтении, и псалмопении?

Ответ. Умиление от непрерывнаго воспоминания приходит человеку. Егда убо молится кто, должен, моляся, привести деяния своя на память себе: и како судятся творящии таковая: и страшный оный глас, яко «идите от мене проклятии во огнь вечный» и прочая (Мф. 25, 41). Память же грехов глаголю, не каждаго особь: да не когда и привложением введет супостат он иное пленение, но еже помянути точно, яко повинии есмы грехом. И по сих аще пребудет жестокость, да не усумнимся. Бывает бо множицею от Бога пождание на искушение человеку, претерпит ли. А о чтении и псалмопении, еже разбудити ум свой во яже от него глаголемая, и восприяти во свою душу силу лежащую в них: аще убо от благих, да ревнует во благое; аще же о воздаянии злых, да убежит чаемаго прещения творящим злая. И пребывая в воспоминаниях онех, да не ослабееши, аще пребудет и еще жестокость она. Милостив бо есть и щедр Бог, и долготерпелив, приемляй наше тщание. Поминай же присно глаголющаго Псалмопевца: «терпя потерпех Господа, и внят ми» и прочая (Пс. 39, 1). Поучаяся же в сих, уповай, яко постигнут тя милости Божия вскоре.

Вопрос 426. Егда ищу со испытанием (с тщанием) внимати силе речений псалмопевца, случается множицею из них приходити ми злым помыслом.

Ответ. Егда увидиши, яко от самых глаголов псалмопения ухитрил есть враг подати тебе брань, то не леть со испытанием объяти силу глаголемых, но трезвенне и непарительне сия пети. Аще бо глаголеши точию глаголы псаломские, врази силу их ведят и не могут ти противустати. И будет тебе псалмопение тое вместо моления к Богу и в побеждение врагов.

Вопрос 427. Аще на псалмопении буду, или с человеки, и стужение имею от помыслов, и возыменую Бога в сердце, не могий усты, или помяну Его точию: еда не довлеет ми сие в помощь?

Ответ. Аще, стоящу ти во время псалмопения, или с человеки, приидет ти возыменовати Бога, да невозмниши, яко, аще не речеши усты, не именуеши Его. Но поминай, яко Сердцеведец есть, и на сердце внимает. И возыменуй Его в сердце твоем. Сие бо есть, еже рече Писание: «затвори двери твоя, и помолися Отцу твоему, Иже в тайне» (Мф. 6, 6). Да затворим уста, и в сердце да помолимся Ему. Затворяяй убо уста, и именуяй Бога, или моляйся Ему в сердце своем, глаголющую сие заповедь исполняет. Аще ли же и невозыменуеши в нем, помянеши же точию, то сие паче быстрее есть сего, еже возыменовати, и довлеет ти на помощь.

Вопрос 428. Убо добро ли есть еже кому в сердце своем выну размышляти или молитися, не содействующу отнюд языку его? Егда же случается мне сие, углубляется помысл мой, и ощущаю тяжесть: и непщую видети аки вещи, и мечтания, и аки в сониих пребываю.

Ответ. Сие совершенных есть, могущих управляти ум, и во страсе Божии имети, еже не совратитися и углубитися в парение глубочайшее или в мечтание. Не могий же имети выну сущаго по Богу трезвения восхитит и предаст размышление свое языку. Ибо и плавающии в мори, иже убо художницы от них, смело ввергают самих себе в не: ведуще, яко добре ведущих художество плавания погрузити море не может. Начинаяй же таковое художество, егда ощутит глубину водную, от немощи за еже не утонути, восхищает себе из пучины на брег, и прием мало отдохновение, паки пускает себе в пучину: и испытует, сия творя ко еже познати совершенно художество то, дондеже достигнет в меру прежде его ведущих.

Вопрос 429. Что есть, еже глаголет некий от отец: не еже внити помыслом, есть осуждение, но еже зле направляти я? Авва же Иосиф рече единому от братии: отсецы совершенно помыслы; а иному рече: остави я внити и даждь, и приими с ними, и будеши искусен.

Ответ. Еже внити помыслом еже насеятися есть, и несть осуждения. А еже сложитися есть еже зле направляти я, и есть осуждение. Различие же сего, еже попустити внити помыслом, и еже отсещи я, сие есть. Могущаго воспротивитися и братися и непобедитися есть еже попустити внити: немощнаго же и не могущаго, но слагающагося, сие есть еже отсещи прибеганием к Богу.

Вопрос 430. Егда обрящуся на месте, идеже суть мощи святых мученик, стужает ми помысл, якоже многократно отходити и поклонятися тем. И коликократно аще пройду мимо их, влагает ми главу приклоняти. Еда ли подобает тако творити?

Ответ. Не леть есть тако творити. Но аще единою поклонишися, довлеет ти сие. Да не послушаеши убо его: а наипаче егда случилося без стужения, своим собственным произволением, трижды поклонится. Слышахом бо, яко бываемая с смущением и печалию, и излишняя, сия вся от бесов суть. И еже приклоняти главу, подобне единою довлеет, или, егда много, до трижды. И не кроме нужды, подвлагаемыя помыслом.

Вопрос 431. Есть егда подвлагает ми боязнь, да виною тоя вниду помолитися.

Ответ. Виною боязни да не внидеши, но безвременно входи, виною молитвы, еже помолити Бога и святых Его о своем спасении.

Вопрос 432. Рекл ми еси боязни ради не входити. И егда хощу внити и помолитися о моем спасении, влагает ми боязнь, да возбраню молитву, за еже заповедь мне прияти от вас виною боязни не внити.

Ответ. Ниже тако послушай его: но вниди и помолися, боязнь же за ничтоже отнюд быти вменяй, ниже к молитве побуждающую, ниже от молитвы отвращающую, но вся делай во время и со страхом Божиим.

Вопрос 433. И о еже множицею назнаменоватися, стужает ми в нощи и во дни.

Ответ. Аще трезвимся, то и еже единожды назнаменоватися, или во дни или в нощи, довлеет нам к сохранению и спасению. Аще бо веруем, яко стоит известно первая печать, несть потреба другия. Еже бо искати другия, знаменует, яко не имамы стоящия первыя. И от дел мирских можно сие усмотрети. Аще бо кто запечатает сокровище, и стоит первая печать, то не требует иныя печати. Но сие деют бесове, да в уныние и пренемогание введут нас, еже отнюд с трезвением, ни поне единожды, чисто сотворити что. Сего ради мало со страхом Божиим сотворим, и лучше есть, нежели много с смущением вражиим. Глаголет бо: «лучше малое праведнику» (Пс. 36, 16). Сие же глаголю, егда при трезвении стужение подвлагают, нудяще нас сотворити что безвременно. Понеже, егда узрим помысл, с радостию назнаменующ, ниже за боязнь, ниже по некоему стужению, то употребим сие по возможности со страхом Божиим. Бываемое бо по произволению, угодно есть паче Богови.

Вопрос 434. Аще назнаменую себе, шуйцею, аще не возмогу сего десницею, то не безместно ли будет?

Ответ. Аз ныне, егда хощу знаменати десницу мою, то шуйцею сие творю.

Вопрос 435. Егда молюся о многих винах, убо должен ли есмь поминати куюжде в молитве?

Ответ. Аще о многих винах хощеши помолитися, понеже весть Бог, ихже требуем, моляся, глаголя: Владыко Господи, Иисусе Христе, настави мя по воли Твоей. Аще ли же о страстех, глаголи изцели мя по воли Твоей. Аще же о искушениих, глаголи: Ты веси полезное мне, помози моей немощи, и даждь ми по воли Твоей избавление от искушений.

Вопрос 436. Егда косню в молитве, убо тыяжде ли глаголы должен есмь проходити глаголя?

Ответ. Никакоже, но силу их. Сие же точию подобает наблюдати, якоже даяти воле Бога, могущаго вся: да намерение будет и молитвы, еже по воли Божией быти просимому.

Вопрос 437. Аще кто хотя благочестно управити имение, или яко прислати я кому, по угождению Божию, и не весть како должен есть сотворити, и не обретает от отец наставитися, что должен есть моляся глаголати?

Ответ. Тако да молится: Господи в руках Твоих есмь: Ты веси полезное, настави мя по воли Твоей. И да не оставиши мене заблудити, и приити в злоупотребление вещи: Твое бо есть имение, и Ты им владычествуеши. Яко Владыка, устрой быти сему во страсе Твоем. Яко Твоя есть слава, вовеки, аминь.

Вопрос 438. Егда сежу, или на чтении, или на рукоделии, и хощу помолитися, взыскует от мене помысл внимати на востоки. Како леть есть отче творити?

Ответ. Седиши ли, или ходиши, делаеши ли, или яси, или ино что твориши, аще и самую нужду телесную, аще к востоком, аще и к западом случится взирати, да не усумнишися молитися. Непрестанно бо сие творити, и на всяком месте, заповедь прияхом. И паки писано есть: путесотворите возшедшему на запады, Господь имя Ему (Пс. 67, 5). Еже показует яко везде есть Бог. Егда же и главу покровену имаши, да не отречешися молитвы: оное точию наблюдая, еже с трезвением сие творити.

Вопрос 439. Глаголет ми помысл, яко, во всех согрешаеши, и должен еси на коемждо словеси, и деле, и помышлении глаголати, яко согреших: аще бо не исповеси согрешения, то имаши себе не согрешивша. И зело стужаемь есмь во обоих: ниже бо доволен есмь сие глаголати в коемждо: и аще не реку мнится мне, яко согрешаю?

Ответ. Должни есмы всегда извещение имети, яко во всех согрешаем, и в слове и в деле, и в помышлении, а еже в коемждо глаголати, яко согреших, не можем. Но сие есть действо бесов, хотящих нас воврещи во уныние. Подобне и за еже не глаголати, о коемждо имея, яко не согрешихом. Но помянем Екклесиаста глаголюща: «время глаголати, и время молчати» (Еккл. 3, 7). И поутру за нощь, а в вечеру за день рцем в молитве со умилением Владыце Богу: Владыко, вся прости ми имене ради Твоего святого, и исцели душу мою, яко согреших Тебе (Пс. 40, 5). И довлеет ти сие. Якоже бо аще кто имать пременщика, и приемлет от него различне и не может единою подати к нему счета, и тако пополняет: тако и зде.

Вопрос 440. Понеже случается мне, егда пою псалмы парити, или блуждати, что сотворю?

Ответ. Аще заблудиши, то возвратився начни от глаголов, яже разумеваеши предлежащаго псалма. И аще единою, и дважды, и трижды возвратився не обретаеши воспомянути некоего глагола: или воспомянув не обретаеши в предняя предтещи, начни с начала тогожде псалма. Намерение бо врагу есть, еже забвением запяти славословию. И еже рещи от сущих по ряду славословие есть, а еже не парити, есть имущих чиста чувствия. Мы же немощни есмы. Егда же приимем чувства парения, да трезвимся оттоле разумевати: глаголемая, да не будут в наше осуждение.

Вопрос 441. Аще ли же в молитве воспарю, то что сотворю?

Ответ. Аще молишися Богови и воспариши умом, подвизайся донележе непарительно помолишися, и бодрствуй твоим умом не парити. Аще же сие (яко немощни есмы) пребудет, поне в последних молитвы убоди свое сердце, рцы со умилением: Господи, помилуй мя и прости ми вся согрешения моя. И приимеши прощение во всех согрешениих и в парении, бывшем в молитве.

Вопрос 442. Егда стихословит брат во псалмопении, овогда убо мирствует помысл мой, овогда же парит: что убо должен есмь творити?

Ответ. Егда мирствует помысл твой, и видиши себе приемлюща умиление от стихословия братова, держися сего дела: аще же увидиши, яко пленяется ум твой в иная помышления, убоди его внимати словословию братову.

Вопрос 443. Но случается мне яко от еже хотети ми уразумети глаголемая от брата, бывает ми брань к нему?

Ответ. И сие, пленение есть. Преселяет бо враг ум от места на место. Но паки убоди себе, егда видиши брань пришедшу: и рцы себе с запрещением, камо грядеши окаянне? Помяни ожидающия тя муки, яко сия терпят, творящии сия или помышляющии. Не всуе бо и не безвременно приношаше Иов жертвы о чадех своих, глаголя: негли когда помыслиша ничто зло противу Бога в сердцах своих (Иов. 1, 5). И сия глаголя, положи ум свой в стихословие: аще же увидиши и паки, запрети ему, и сие буди тебе до трижды. И аще же пребудет, тогда отыми его (от чтения), и да не оставиши и праздна, но помышляй суд и вечныя муки. И молися святому имени Божию, глаголя сие: Господи Иисусе Христе, помилуй мя.

Вопрос 444. Аще стоя кто на псалмопении с братией, не весть псалмов с ними рещи: что полезнее, слышати ли их или пети от нихже весть?

Ответ. Аще не весть псалмов, яже поют между собою, вместо еже слышати я, полезнее паче да поет от нихже весть. Еже бо слышати имать парение.

Вопрос 445. Понеже егда находит ми лукавый помысл, купно еже ощутити его движется и отскакивает оттуду сердце мое, боящося да не за немощь обладано будет от него: и егда сие творю, ощущаю велию тяжесть в души и утесняемь есмь: благоволи рещи ми, како подобает ми творити во унынии лукаваго помысла и како отгонится?

Ответ. Движение есть еже не повинутися, ниже сложитися лукавому помыслу, но притекати ко Богу безмятежно, и да не речеши, яко да не предварит мя смущаюся. От притчи же сея уразумей силу: аще кто поемлет на кого к некоему о деле, и увесть оглаголуемый, яко не может отвещати к нему, смиряется. Аще же имать землевладельца сильна, то со дерзновением приходит к нему, да отмстит его: и не смущается, упование имея на него. И паки: аще предварит кто иногда на пути впасти в руце разбойника, и аще закоснит сопротивляяся, и не попустит его взяти от него что-либо, се добро есть. Аще же и отымет, познавает точию разбойника и место его, и течет ко князю, и той отмщение творит, и не точию от него отъятая творит взяти ему, но и самаго разбойника наказует. Аще убо внидет помысл, да не смутишися, но поразумей, что хощет содеяти, и сопротивляйся безмятежно, Господа призывая, не бо еже внити разбойнику в храмину есть зло, но взяти яже суть во храмине. Аще же изыдет с безчестием, то сия честь дому владыце есть: безчестие же есть, еже изыти ему ничто же вземшу. Аще убо приидет Господь в землю Иудейскую, то есть в сердце человека, тогда изгонит бесы. Тому убо воззови якоже македоняне Павлу: пришед в Македонию, помози нам (Деян. 16, 9) и якоже ученицы возопий Ему: Наставниче, спаси, погибаем. И возбудится, и запретит ветром мысленным, и утихнут (Мф. 8, 25, 26). Того бо есть сила, и слава вовеки. Аминь.

Вопрос 446. Понеже рекл еси, яко движение есть еже не повинутися лукавому помыслу, но притекати ко Богу безмятежно, молю тя, еще объясни мне о движении.

Ответ. Аще кто оглаголуемь бывает от некоего, и отыдет сам оглаголуемый ко князю: движение глаголется. Глаголет бо: понеже поят нань, подвижеся отыти ко князю. Аще и закоснят истязующеся друг с другом, не воздаст слова за укоснение подвигнувыйся. Последняя бо дела того, и конец избытия ищется. Сие бо есть: и ты блюсти будеши его пяту (Быт. 3, 15). Пята бо конец значит. Да утвердится убо сердце твое молитвами святых. Аминь.

Вопрос 447. Брат вопроси великаго старца, глаголя: сотвори милость и рцы ми, како спасуся? Уставих бо в помысле моем покоритися твоему посланию.

Ответ. Аще во истину спастися хощеши, послушай делом, подыми от земли ноги твоя, и возведи на небо ум твой, и тамо да будет поучение твое, нощь и день. И елико имаши силы, уничижай себе нощь и день, понуждаяся увидети себе под всяким человеком. Сей есть истинный путь. Кроме бо сего, ин несть хотящему спастися, о укрепляющем его Христе. Да тецет хотяй: да тецет хотяй: да тецет хотяй: тецет да постигнет. Свидетельствуюся пред Богом живым и хотящим жизнь вечную даровати всякому хотящему. Аще хощеши, делай брате.

448. Тогожде к иному старцу. Почто утро и великий старец тое: хотяй да течет?

Ответ Иоанна. Показуя старец потребу сего пути, и яко несть нужднейша, паче его трижды рече слово оно. Ибо и Господь, во Евангелии от Матфея рече единожды, аминь. А во Евангелии от Иоанна, удвоил есть рекий: «аминь, аминь глаголю вам» понеже о нужднейших зде им беседоваше.

Вопрос 449. Молю уразумети, откуду наибольшее в Пятьдесятницу уныние и дремание сверх обычая случается мне?

Ответ. Понеже езеро есмы, а не источник, страждем сия. То есть немощни есмы, а не сильни пребывати в тождестве. Прочее, пременяются воздухи, и увеличиваются дни, и страждем сие. Понеже совершеннии отцы сего не страждут.

Вопрос 450. Аще некоего увежду творяща дело безместно, еда должен есмь судити безместность тую? И како избежу осуждати ближняго, еже бывает от сего?

Ответ. Тое убо дело, еже есть воистинну безместно, не можем не судити безместное. Зане, како избежим иже от сего вреда, по гласу Господню рекшему: «внемлите от лживых пророк, иже приходят к вам во одеждах овчих, внутрь же суть волцы, хищницы, от плод их познаете их» (Мф. 7, 15, 16). Самаго же сие творяща не подобает осуждати за слово оно: «не судите, да не осуждени будете» (Мф. 7, 1). И яко должно нам, самех себе имети грешнейших паче всех. И яко должно согрешение братнее за свое вменяти, и диавола ненавидети прельстившаго его. Якоже бо аще кто ринет некоего в оплот, то самаго ринувшаго порицаем: тако и зде. Случается же и делу бывати от некоего еже зрящим убо видится безместно, по благому же намерению бывает творящаго. Якоже тогда случися святому оному старцу. Мимоходя бо сквозь конскаго ристания, вниде с разумом, и разсмотрив коегождо тщащася предварити, и инаго победити, рече помыслу своему: видиши ли, како иже суть диаволовы усердно подвизаются? Кольми паче мы, суще наследницы Царствия Небесного? И отыде еще усерднейший от таковаго позорища, на духовный путь и подвиг. И паки не вемы, яко покаяние употребляя согрешивый брат, благоугоден будет Богови смиренномудрием и исповеданием. Фарисей бо от своего величания осужден отыде. Сие убо ведуще, подражаим мытарево смирение, и самих себе осуждаим, то и оправдимся. И бежим величания фарисеова, да не осудимся.

Вопрос 451. Христолюбец вопроси тогожде старца. Множицею случается мне с некиими обретающуся стыдетися их, якоже лицу моему изменятися и низпадати, и не мощи взирати на них или беседовати. И от сего утесняется и недоумевает сердце мое: и аще и возглаголю нечто, неразумия и нестроения и тщеславия полно бывает слово то: и смех многажды примешен исходит со словом, ниединыя благодати имый, и аки не хотящу мне бывает, и зело от сего скорблю. Недоумею убо, что сотворю? Аще бо возглаголю, падаю в таковая, и аще умолкну, боюся яко безвременно творю, а наипаче, тем ко мне глаголющим многажды. Что убо есть сие, отче? Святыми молитвам вашим предлежащим?

Ответ. Сие случается нам от зависти диавола: хотя бо, да ниже мы пользуемся, ниже беседующий с нами, приносит нам плевел сей, ко еже, аще возможно, соблазнити и беседующии с нами. Но страх Божий, кроме смущения, и всякаго неустроения, и всякия молвы есть. Аще убо прежде беседы утвердим себе во страсе Божии и вонмем в сердце с трезвением, чесого ради смущаемся и смеемся? Во страсе бо Божии смеха несть. О безумных глаголет: «яко во смехе возносят глас свой» (Сир. 21, 23). И смущенно есть слово безумных и безблагодатно бывает. О праведном же глаголет: «яко, едва до осклабления». Аще убо приводим себе память Божию, и яко со смирением и безмолвным помыслом должни есмы творити нашу беседу ко братии нашей, и в сих пребываем, и Страшный суд Божий пред очесы имеем: то предуготовление сие изгонит всякое помышление лукаво от сердца нашего. Идеже бо безмолвие, и кротость и смирение, тамо живет Бог. Имамы убо яже о случающейся беседе. Аще ли же пребудет враг брань творя с нами в сих, своим безстудием непщуя уловити и низложити нас, то да не ослабеем, и восхитит ны. Но по первом случае да разумем во втором: и тако прочее. Глаголет бо: «седмерицею днем падет праведный, и восстанет» (Притч. 24, 16). А еже востати, знаменует, яко подвизается. И подвизаяйся же таков есть (сиречь) падаяй и востаяй, донележе послежде явится, каков будет. Над всеми же сими разумеим призывати имя Божие святое. Яко идеже Бог, тамо вся благая. Яве же, яко идеже диавол, тамо вся злая. И явленно есть, яко аще по тщеславию, или по человекоугодию, или по какову-либо злобы образу, смущенно возглаголем, то сия вся от диавола суть. И помянем святаго Павла глаголющего Тимофею, яко «слово твое во благодати да бывает, солию растворено» (Кол. 4, 6). И аще поучимся в сих, то Вседержитель Бог, по благоутробию Своему, даст нам устроение совершенно во страсе Своем: Тому слава вовеки. Аминь.

Вопрос 452, тогожде. Некто иногда моляше некоего от отцев вкусити у него, он же отречеся, аки не могий. Ин же некто умоли его точию сотворити молитву в келлии своей, и яко вниде, принуди его остатися вкусити, и многою нуждею убежден быв оста. Познав же иже из начала его моливый, зело опечалися: убо по Богу ли есть сия печаль?

Ответ. Егда виною аки бы благословнаго дела и душеполезнаго смущается кто и печалует и гневается на ближняго своего, явлено бывает, яко несть сие по Богу. Вся бо, яже суть Божия, мирна суть и полезна, и во смирение ведуща человека, и во еже самаго себе осуждати, Глаголет бо: яко, праведный в первословии себе самаго оглаголник (Притч. 18, 17) бывает. Мняйся бо яко хощет нечто по Богу, и возбраняемь от некоего, таже осуждаяй возбранившаго, и оклеветаяй того, от сего является, яко неимеяше предложения своего по Богу: глаголет бо: «от плод их познаете их» (Мф. 7, 16). Имеяй бо предложение свое по Богу, и возбраняемь, смиряется паче, и мнит себе недостойна, и аки пророка имать возбранившаго его: зане аки провидя недостоинство его, возбрани ему. Аще убо по любви Божией позовеши кого приити в келлию твою, или и воспросиши прияти от кого нечто аки по вере, и не соизволит дати тебе: ин же некто вопросит у него, и соизволит дати, да не попустиши бесу гневному смутити сердце твое, всякое бо дело, имущо смущение, от Бога несть: но паче смирися, глаголя: яко аз недостоин обретохся, и отцем явил есть Бог грехи моя и недостоинство. И даст благодать даяй смиренным. Имеяй бо смирение, не всегда хощет яже о нем, но присно низу течет во смирение. И помысли сотника онаго приступлшаго ко Иисусу о отроце своем и услышавшаго: «Аз пришед исцелю его», текуща во смирение и глаголюща: «Владыко, несмь достоин, да под кров мой внидеши» (Мф. 8, 7, 8). Кто ни восхитил бы сего? Но смирение ниже сего взыска, осуждая себе за недостойна. А сердцеведец Бог, приемляй предложение человеков, похвали веру его, глаголя: «яко ни во всем Израили толики веры обретох» (Мф. 8, 10). И похвалу ему исходатайствовало велию смирение оно, и здравие отроку его подало. И многая суть дарования подаваемая смирению. Тецем в не, да благодать его приимем и похвалу от Иисуса Христа, смирившаго Себе и послушлива бывша даже до смерти, и давшаго нам образ смирения. Тому слава вовеки. Аминь.

Вопрос 453. Понеже убо, отче, сотник превосходящаго онаго смирения употребив, недостойна себе суди пришествия Владычня, и похвалена бысть вера его. Авраам же и убеди, и припаде якоже бы внити ему в кинию, аще и яко человеку приступи, не ведая, яко Владыка бяше. Еда не имеяше смирения Авраам? Но больша ли есть паче патриарховы добродетель сотника? Смирение бо (яко же присно учите) первенство имать добродетелей. Рцы убо мне силу, и различие добродетелей обоих: яко, ов убо не приял есть пришествия, и похвален бысть: ов же зело сие с любовью приял есть, и похвален бысть?

Ответ. Оба тии совершенни бяху верою, яже к Богу. И по приличности времени употребиша веру и смирение. Ибо рече и патриарх Авраам: яко, аз есмь земля и пепел (Быт. 18, 27). И еже вменяти себе тако, показует, яко ниже странноприимства достойна себе вменяше. Но обаче, понеже совершен бяше, всякаго человека приемляше, не разсуждая грешных от святых. О нем бо то речено бысть, и о Лоте: яко «страннолюбия не забывайте: Тем бо не ведяще нецыи, странно прияша Ангелы» (Евр. 13, 2). Аще убо уразумел бы Авраам, яко Владыка есть, то употребити имеяше гласа сотнича. Паче бо вменяющаго себе землю и пепел, ничтоже смиреньше обретаем. И сотник же в приличествующее время употреби смирение, познав Его быти Спаса. Мы же глаголем: яко и дело страннолюбия имеяше: не бо без дел вера его бяше, ниже похваляше Христос праздну веру, сиречь и дела имеяше вера его: и во время странноприимства, употребил бы и той усерднейшаго прошения патриарха Авраама ко всем. Обоих убо совершенных обретаем.

Вопрос 454. Понеже убо аз грешен есмь, ниже смирения имый истиннаго и искренняго егоже ради похвален бысть сотник: ниже страннолюбия любве, еяже ради Авраам Бога угостити сподобися: что должен есмь сотворите? Еда должен есмь, взирая на мое недостоинство, отрицатися святых пришествия, и еже из него отщетеватися приобретения? Или паче притекати не образом страннолюбия, но яко немощен душою и еже от них врачества требуя? Свойственно бо есть немощным, еже искати прилежно врачев пришествия, и не вменяется им сие в страннолюбие. Аще и не призовут их, не мнятся смиренномудрия добродетель имети, но паче безумия. Научи мя убо, отче, должен ли есмь убеждати, яко требуяй, или отрицатися, яко недостоин?

Ответ. Убеждай, яко боляй и требуяй врача: сие же разумей: яко отроча раждаемое не абие бывает в мужа совершенна, но проходит сквозе пищи мягкия, и тогда приходит на твердую пищу. Совершенных бо есть твердая пища. Сего ради и апостол рече: млеком вы напоих, а не брашном (1 Кор. 3, 2). Странноприемлюще убо, да не речем, яко заповедь исполняем: но требующе врачев, якоже болящии. И пребуди в сих, дондеже введет тя Бог в совершенная.

Вопрос 455. Что есть дерзновение и смех нелепотный?

Ответ. Есть дерзновение, и дерзновение. Есть дерзновение от безстудства. И сие есть родительница всех зол. И есть дерзновение от веселости. И сие убо не всяко пользует употребляющего е. Но понеже крепких и сильных есть еже избежати обою: аще не можем мы за немощь нашу обою избежати, то ноне удержим дерзновение веселости, внемлюще, еже бы от сего не подати претыкание брату в соблазн. Сущии бо с человеки, аще не будут совершени, избавитися втораго сего дерзновения не могут. Аще убо не можем, то да будет нам в назидание, а не в соблазн; наипаче, егда потщимся сократити и с сим сопряженную беседу: ибо не весьма пользует многословие, аще и не мнится имети нечто безместно. О смехе же туюжде имате силу: отрасль бо есть дерзновения. Аще убо имать кто дерзновение сквернословия, яве есть, яко и смех имать скверну; аще ли же дерзновение веселости, от сего яве есть, яко и смех имать веселый. И якоже речено есть о дерзновении, яко не пользует еже имети е, тако и во смехе его не должно закосневати, ниже разлиятися, но востягати помысл, еже бы с честностию проити смех той. Ибо разливающиися в него, да разумеют, яко и в блуд впадают вси.