Текст книги "Аскетика. Том I"

Вопрос 488. Что убо, яко аще и раскается, но постыдится возвратитися?

Ответ. Аще раскается и понесет укорение свое, глаголя: яко аз виновен есмь во всех, тогда Бог, рекий пророком: «глаголи беззакония твоя прежде, да оправдишися» (Ис. 43, 26): видя, яко укротися сердце его, наставит и во страсе Своем к пользе его. Глаголет бо: «наставит кроткия на суд, научит кроткия путем Своим» (Пс. 24, 9). И аще на месте своем первом пользовашеся множае, уверит сердце свое со смирением возвратитися тамо.

Вопрос 489. Брат воинствуяй в мире, прииде во общежитие. И вопросил есть тогожде великаго старца, может ли покаятися?

Ответ Варсануфия. Брате, Бог никогоже отвергает, но всех призывает на покаяние. Должен убо приступаяй к Нему, от всего сердца приступити, и сеяти на уповании еже бы пожати, и ожидати искушения до последнего издыхания.

Вопрос 490. И ныне, заступит ли его Бог?

Ответ. Чадо, поприще отверсто есть. И хотяй спастися, слышит Иисуса вопиюща к нему и глаголюща: «Приидите ко Мне вси труждающиися и обремененнии, и Аз упокою вы». И: «научитеся от Мене, яко кроток есмь, и смирен сердцем, и обрящете покой душам вашим. Иго бо Мое благо, и бремя Мое легко есть» (Мф. 11, 28–30). Виждь, что слышиши: кроток и смирен. Да сего научимся от Него. Не должен есть ослабевати и боятися приступаяй к Богу. Зане николиже положит начало в путь свой: Бог бо сердцу его внемлет и предложение судит. И Той весть немощь человека, яко от себе сотворити не может ни чесоже, но «Той есть все» (Сир. 43, 29) и «Той дает достойному силу, еже сотворити силу» (Пс. 59, 14) Зане, аще удержит силу крепкого, то где обретается окаянный человек? И аще удержит премудрость премудраго, и изменит сердце его, то обретается премудрость его, яко невежды и безумна. Надеющеся убо да приступим к Нему: ведуще, яко Той есть приподаваяй нам силу. На подвиг убо приуготови душу твою: не точию же, но и ко еже увенчану быти. Господь да поможет ти по воли Своей, молитвами святых, аминь.

491. Моление тогожде к томужде великому старцу. Понеже помыслы мои мечтательно показуют мне мир, поощряюще мя к нему возвратитися: сотвори милость со мною, да буду покровен молитвами вашими. Понеже в техжде гресех еще сый; молихся Богу, под покровом вашим удостоитися ЖИТИ.

Ответ Варсануфия. Чадо возлюбленное! мужайся о Господе. Бог призвал тя есть: да не ослабееши, но дерзай. Начало еже по Богу делания брани имать. Но Господь сокрушает я. Воинство мира сего тьма есть: и достояние его, мука вечная: Божие же, свет есть, и наследие его жизнь вечная. Размягчи ныне сии две крупицы: и тогда избери, еже хощеши. И приидет к тебе Некто велегласно, и возбудит сердце твое еще студеное, и сотворит тя быстро ступати, якоже подобает. Не ужасайся: есть бо руководяй тя ко Владыце Богу.

492. Прошение тогожде к томужде великому старцу. Понеже стужение ныне подвигшияся мне брани от мене бысть, помилуй мя, Владыко, да молитвы твоя упразднят ю. Погубих бо еже во мне доброе, хваляся купно с пришедшими ко мне по плоти братиями моими. Пребых бо мечтая беседу их, и непщуя купно с ними сопребывати. Но помози мнозей немощи моей, и боязни яже к пути спасительному. Како бо молити Бога, призвавшаго мя, не вем, потщався удалити Его от мене, и в един час забыв все благодеяния Его. Темже молю, помилуй мя, яко много согреших: и брани, от моея немощи и маловерия бываемыя, не отступают от мене. И аще мощно и полезно ми есть удалити от себе моих, да не приходят ко мне, за еже не приносити ми прельщений мирских. И сие вы весте. Студену бо еще сущу сердцу моему, на смущение точию, и путь брани приходят ко мне. Мало же отступльшим помыслом вчера от мене, покровительства ради вашего, днесь, яко седох мало наедине, да изучу един псалом, толико налегоша на мя, яко от пренемогания и потети ми. Темже молюся, да не оставиши мя врагом моим, но твоею силою немощь мою укрепи, и оныя упраздни, ако довольно насытишася мене. И ты видиши сердце мое, яко брани не сладце ношу. Да не побежден буду за немощь мою и за еже не ведати ми лукавства их! Да не в сети их впаду, в нихже прежде, неже приити к вам, валяхся. Прости мя и помолися о мне, отче благий.

Ответ Варсануфия. Брате возлюбленне, книжицу имать Владыка наш Бог, в ней же написуются приступающии работами Ему чисте: и вена (приданное, дары) написуются от перваго дне. Молих Того, не хотящаго «смерти грешника, но еже обратитися и живу быти ему» (Иез. 33, 11), да вчинит тя в ню со спасающимися. И помилова и тебе со мною, и абие вчини тя. «И же всем человеком хотяй спастися и в разум истины приити» (1 Тим. 2, 4). «Туне убо приял еси» (Мф. 10, 8). В тебе прочее залежит то еже не быти в таковом написании или еже быти. Тебе бо хотящу помогает Глаголяй: «Аще хощете и послушаете Мене, благая земли снесте» (Ис. 1, 19) и прочая. Се рех: вонми, да не отпадеши от таковаго воинства, да не когда неисцелною язвою возболиши. Сего бо отпад, ниже в мире потребен будеши. Господь да покрыет тя от лукаваго и сохранит в вечную жизнь. Аминь. Чадо, «остави мертвых погребсти своя мертвецы» (Мф. 8, 22). И узриши како прославляется Бог в совете святых.

492. Моление тогожде к томужде великому старцу.

Авво, Господа ради помилуй мя. Понеже, наедине почивающу мне, востают на мя мечтания: еще же и туга, аки некиим нападающим на мя: якоже и спящу ми одержиму бывати, и не мощи почити мне. И занеже боязлив есмь естеством, множае брань востает на мя и не попускает мне уснути, разве мало: и сие, якоже рех, в тузе: и малодушии: якоже от сего ощущати и изнеможение в телеси, и почти не мощи подвигнути себе. Прочее, Владыко, полезное ты веси: и сие сотвори со мною, отче благий. Прости мне грешному и много болящу

Ответ Варсануфия. Брате, прославити Бога должен еси, яко показует писание истинствующа: глаголет бо: «Верен Бог, иже не оставит вас искусится паче, еже можете» (1 Кор. 10, 13). По силе убо твоей оставляет тя обучатися. Великих же, по силе их, во великих искушениях искушает, и радуются. Во успение бо приводит человека искушение. Идеже бо предлежит благо, тамо и брань бывает. Да не убоишися убо искушений, но возрадуйся, яко во успеяние ведут тя. Приобиди убо е, и поможет ти Бог, и покрыет тя.

493. Прошение тогожде к томужде. Отче святый, немощен и грешен сый, не имам дерзновения воспросити чесого от благоутробнаго Бога. Темже припадаю ти, да помолишися о мне грешнем, да сподоблюся работати Ему, да подаст мне силу и разум: всех бо сих, якоже весть и сердце твое требую, ничтоже сый по всему. Верую бо, отче благий, яко молитвы твоя довольны суть умолити Бога о гресех моих, да презрит я, и достойна мя да сотворит, еже начати благословенный путь: да в разуме наставлением милости твоея, благословение, шествуя, возблагодарю обычно человеколюбивому Богу, тобою всех благих сподоблшему мя. Прости безумию моему и дерзновению, и молися о мне.

Ответ Варсануфия. Брате, паче же чадо: Бог небесе и земли да укрепит тя во святем звании Своем, имже призва тя и да сподобит тя чина сыноположения, егоже мали сподобляются. И да утвердит сердце твое, якоже сердце Аннино, да родиши плоды благоприятны Богови, подобны Самуилу, и да воспоеши с ним песнь нову Богови. И да преуспееши в делех благих в предлежащем ти пути, и да поработаеши Ему чисто, яко искусен воин. Да не уныеши убо, ниже да разслабишися, но тецы усердно град святых и избранных наследити. Веру, надежду и любовь стяжи, и приведут тя во святое смирение, матерь всех добродетелей. И спасешися во веки веков. Аминь.

494. Прошение тогожде. Понеже грешен есмь, и несмь доволен, яко немощен телом, что-либо сотворит благо и угодно Богу: молю тя, Владыко, ты помолися о мне прогневавшем Его, и ничтоже якоже рех, могущем сотворити, немощи мне возбраняющей.

Ответ Варсануфия. Блажен еси, брате, аще отнюд ощущаеши, яко имаши грехи. Ощущаяй бо, всяко гнушается их и удаляется от них. И часть есть покаяния, еже ощущати я, и просити помощи от отцев молитвами ко Богу избавитися от них и от ожидающих его мук. Мы убо молимся, а ты сотвори силу твою стяжати смирение и покорение. И да не удержиши себе волю в чесом-либо: от того бо гнев раждается. И да не судиши, ниже да уничижиши кого: от сего бо изнемогает сердце и ослепевает ум: а оттуду приходит нерадение и рождается жестосердие. Но трезвися выну в поучении Божественнаго закона, от негоже согревается сердце небесным огнем. Глаголет бо: «и в поучении моем разгорится огнь» (Пс. 38, 4). И да не возпечалуеши: от Бога бо есть звание твое, брате: и да не уныеши, ниже да разслабеешии: не бо истязует тя Бог паче силы твоея, но по возможности. Сохрани уста твоя от праздна словесе, и суесловия, и еже не поучатися в сердце твоем в злых словесех. И повержи силу свою с молитвою святых пред Богом, глаголя: «Милостив буди мне грешному» (Лк. 18, 13). И помилует тя, и сохранит тя, и покрыет тя от всякаго зла, еже приити от тмы во истинный свет, от прелести во истину, от смерти в живот, о Христе Иисусе Господе нашем, Емуже слава вовеки, аминь.

495. Прошение тогожде к иному старцу. Авво, Господа ради прости безстудству моему и безумию и помози ми множества ради грехов моих. Аще бо един грех содеваяй пред Богом требует многаго покаяния, что сотворю аз совоспитан со грехом, иже прогневляти Бога не престах по силе моей, и требую ваших молитв, да отступит от мене грех? И понеже требую часто учитися пути сему, человек от сретаний, и многих злых семо пришедый по многому благоутробию Божию: молю тя, отче преподобне, сотвори милость со мною и, якоже веси, настави мя. И помолися о мне, во еже хранити святыя твоя заповеди, яже мне повелеваеши творити.

Ответ. Брате, понеже к Распеншемуся нас ради приступил еси, то и ты возми крест свой и последуй Тому, возвергая на Него свое попечение творящаго по преизбыточествию, ихже просим или разумеем. Той бо печется о нас. Да не ужаснешися убо и поможет ти Христос. Точию же, чадо, имей во уме своем слово Божественнаго Писания и приуготовление, еже глаголет: «Сыне, аще приступаеши работати Господеви, уготови душу твою во искушение» (Сир. 2, 1). И: «яко муж без искушений непотребен». И паки: «блажен человек иже претерпит искушение: зане искусен быв» (Иак. 1, 12) и прочая. Не устрашая тя, брате, сия глаголю тебе, но утверждая сердце твое во страсе Божии на пути Божии. Тако бо преуспеша вси святии, искушении и скорбми многими, и благоугодиша спомогающей им благодати Божией. Да не убоишися, ниже да ослабееши. Веруем бо, яко Бог есть насаждаяй тя, и напояяй, и возращаяй, молитвами святых. Аминь.

Вопрос 497. Что сотворю, отче, яко стражду от блуда?

Ответ. Елико можеши, озлобляй себе, сие же есть по силе твоей. И не буди надеяся на сие, но на любовь и покров Божий. И да не уныеши, уныние бо во всякое начало зло влагает себе.

Вопрос 498. Понеже, аще глаголю братови моему, множицею со гневом глаголю слово: аще ли же аки с любовию восхощу, то абие со сладостию скверною и движением тела зле колеблюся, ниже на лице братнее воззрети без сих могий: что сотворю, отче?

Ответ. Еже возглаголати со гневом братови, или движущуся телу с любовию, сия оба смерть суть. Оставив убо обоя, по обычаю глаголи братови твоему: и поможет тебе Бог. И со всеми сими сохрани очи свои, и помолися о мне.

Вопрос 499. Что сотворю стужаем от брани чревобесия, и инех страстей, и сребролюбия?

Ответ. Егда брань творит с тобою страсть чревобесия, подвизайся, елико имаши силы, Бога ради, не дати телу, елико требует. И в сребролюбии подобне. Дондеже брань стужает тебе, то да не стяжеши излишно что-либо: до ризы, и чрепия, и в самой тонкой вещи подвизайся. А по еже победити со Богом брань ону, стяжи потребу свою по Богу. И во инех страстех тожде твори.

Вопрос 500. Брат вкупе живый с некиим старцем, вопроси тогожде старца Иоанна о мере пищи и сне, и о случающемся ему смятении, егда мнится ему что не право от старца бывати.

Ответ. Старцы глаголют, яко упокоити ближняго, добродетель есть, да и велика: наипаче егда не по причине побеждения или невоздержания творит кто вещь. Ты довольное телу сохрани. Аще яси и трижды, то не вредишися. Что бо, аще ясть человек единою безрассудно? Кая ему польза? Уразумей убо со свободою разум старца. Егда бо по Богу живете оба, то и той по страху Божию должен есть рещи свободу свою, и аще что глаголет, яко покоит его, тое сотвори: и се есть воля Божия. Сон же два образа имать. Есть, егда от многоядения отягощается тело, и есть, егда от безсилия не может кто службу принести, и приходит сон: многоядению же припоследует брань блуда: отягощает бо его в сон, во еже осквернити тело его. Прочее разсудительный поразумевает, како, и откуду бывает ему сие. Сотворити же силу нашу истязуеми есмы, и ничтоже более. А покров Божий и помощь есть укрепити силу нашу. Яко Тому есть слава вовеки. Аминь. Помолися о мне, брате, и сотвори любовь: егда беседуеши со ближним, то разсуждай: аще убо со смирением и разсуждением безмятежно беседуеши (с ним), то беседуй; аще ли же есть нечто не таково, то востягни помысл, и посрами и, и престанет. И да не возмятешися о вещи от него бываемой, глаголя: Бог весть полезное, и почиеши. Обаче напомяни ему со смирением, и остави его, якоже хощет сотворити. Помолися о мне, брате честнейше.

Вопрос 501. Аще пребывает кто со старцем, и не будет доволен старец той отвещавати вопрошаем, утесняемь же бывает брат от помысл: еда должен есть вопрошати инаго старца, или по воле его, или без воли паче, нежели сокрушатися от помыслов?

Ответ. Аще весть, яко имать авва его воспользовати душу его, должен смело сказати ему: яко помыслы имам, что разсуждаеши, да сотворю? И той о себе сам, якоже человек имый сына недугующа, и со тщанием поемляй его ко врачу, не точно же, но и мзды за него подаваяй; тако и той с радостию поймет ученика своего к человеку, имущему сие дарование, или послет и к тому. Аще же весть, яко не может сего понести старец, ничтоже да речет ему: но аще обрящет благовременство, строящу Богу способ к тому, да вопросит инаго старца духовна о помыслех своих, моля того, да не увесть авва его, зане ввержет и во страсть зависти, и будет ему сие на великую скорбь, еже без него вопросити. И да не соблазнится о нем, яко не имущем таковаго дарования: не всем бо дано есть. И аще осяжет, обрящет всяко, яко авва его имать ино дарование: дарования бо Духа различна суть, и человеком разделена, овому убо сице, овому же сице. А донележе не обретает времене вопросити, да потерпит, моля Бога помощй ему.

Вопрос 502. Брат, подвизаемь удобно на гнев, вопроси тогожде старца о сем.

Ответ Иоанна. Аще бы нудился еси еже умрети от всякаго человека и восприяти мало терпения, то имел бы еси почити и свободитися от многих бед. Да смирится сердце твое пред Богом: и благодать Его со заступит нас во всех.

Вопрос 503. Брат вопроси великаго старца, глаголя: помолися о мне, отче, яко немоществую душею и телом, да укрепит мя Господь, во еже благодарим Ему. И о брате сущем со мною, яко и той требует милости.

Ответ Варсануфия. Господь да утвердит тя во всяко дело благо, якоже просил еси. Се и сие дело есть благо, еже помощи сущему с тобою брату по силе. И рекий: «огня приидох во врещи на землю» (Лк. 12, 49), да ввержет его в сердце твое и мое. И да вижду тя растуща, яко кедры оны ливанския, и цветуща, яко финик в раи Божии. Ибо сим тако сущим, и аз вкушаю благих твоих, и веселюся, о Христе Иисусе Господе нашем, Емуже слава вовеки. Аминь.

Вопрос 504. Отче, помолися о мне. И молю уразумети, откуду таковое неможение случается, и в службе моей, и в рукоделии моем. И от пренемогания, во еже ясти и спати преклоняется помысл.

Ответ. О молитве: аще негли имам молитву, не могу помолитися о души моей паче, нежели о твоей: трепещу бо Глаголюща: «Взыщи ближняго твоего, яко сам себе» (Мф. 22, 39). Но аз прежде творю силу мою, Бога же есть милость, иже сотвори с нами уже велию милость и творит. Не отрицаюся, яко сотвори: понеже неблагодарность обрящется. О неможении же: еже единою быти тако, и единою тако, то путь сей тако есть. Ходит кто путем гладким, и паки обретает стремнины, и горы, и приходит паки на правый путь. Но понеже глаголет: «о всем благодарите» (1 Фес. 5, 18), то должни есмы. И о еже ясти и нити, и спати: да предваряет благодарение. Поучися в слове апостольском, яко «аще ясте, аще ли пиете, аще ли ино что творите» (1 Кор. 10, 31): и сохрани оно во всем, и сохранит тя Бог благодарения. Тому слава вовеки, аминь.

505. Тогожде великаго старца к томужде вопросившу, аще подобает употребляти врачбу?

Ответ. Брате, употребляющии врачев и не употребляющии, в надежде Божии употребляют, глаголюще: о имени Господни вверяем себе врачем, яко подаст ими исцеление. И не употребляющии, в надежде имени Его не употребляют, и врачует их. Аще убо употребиши, не согрешил еси, и аще не употребиши, не высокомудрствуй. Сие же да увеси, яко, аще и врачев употребиши, воля Божия бывает, и ничтоже ино. Аще ли же хощеши, то слово (святаго) Илии удержи, еже глаголаше, и будеши в сей день без попечения.

Вопрос 506. Помолися о мне, отче, и рцы ми: что есть, яко нощию, егда хощу пети, то леность ощущаю: и наипаче, егда бывает хладно? И прочее, много нощей седя пою и молюся. Понеже убо боюся, не от разленения ли сия стражду, сподоби мя отче, просвети мя и помолися, да сотворю что-либо аще возглаголеши мне?

Ответ. Еже за друг друга молитися, всем заповедано есть. А о нихже вопросил еси, уразумети хотя, что есть: то есть часть смешана от семене бесовскаго, и часть от немощи телесныя. Темже убо еже пети, или молитися седящу ти со умилением, не возбраняет еже благоугодной быти Богови службе твоей. Аще бо и стоя сотворит сию кто с парением, то ни во чтоже вменяется труд его. Господь да поможет ти, брате. Аминь.

Вопрос 507. Молю святыню твою, отче: понеже немощен есмь душею и телом, имам же довольныя дни телом наипаче боля, якоже во утриих пищу приимати; многажды же и в корыте купальном лежу. И есть, егда благодарит душа моя, глоголющи: яко Бог попусти мне болезнь сию за многая согрешения моя. Иногда же скорблю, глаголя с пренемоганием: яко несмь достоин, якоже вси, ясти хлеб мой единою днем с покоем. И паки глаголет ми помысл: еда достоит противуглаголати Богови? Не весть ли вся? Еда без Него может что быти? Претерпи со благодарением. Молю тя, отче, щедротами Божиими, помолися о мне и яви мне, како должен есмь преити, да не от печали пожерт буду.

Ответ. Святыня твоя святыни моей написа помолитися о боголюбии твоем. И аз же неразумный отец молю тя разумнаго сына тожде сотворити, и помолитися о мне, иждивающем дни своя в суете. Ты убо глаголеши, яко поне единою благодариши Богови: аз же николиже. Но понеже не могу премолчати, якоже непщую, глаголю: яко, аще не за сласть яст кто, но за немощь телесную, то Бог не осуждает его. Пресыщения бо ради и ради взыграний плотских возбраняема бывают брашна: А идже предлежит немощь, тамо предлежит упразднение действия их. Идеже бо немощь, тамо призывание Бога. Разсуждаю убо, яко еже дати требование телу, но истине нужда есть, и еже благодарити в немощи не осуждает человека. Не истязует бо Бог человека паче силы. Якоже имеях, глаголах. Не глаголю отнюд, яко истину глаголю: но то, еже имеяше сердце мое, изъявих. Прочее, искуси и ты, и обрящеши полезное. И прости мя, никогдаже могущаго умолчати.

508. Тойжде боля, и не могий стоя сотворити службу свою, ниже единою ясти, моли тогожде великаго старца помолитися о нем и явити ему о сем.

Ответ. Егда имеяху евреи свободитися от работы египетския, тесноту и скорбь велику терпеша, между морем и варварскими руками. И по онех знамениих и чудесех, яже видеша очи их бывшая во египтянех, и во всей стране их, забыша Бога сотворшаго сия, и приближишася до отчаяния спасения, зряще фараона и всю силу его хотящих напасти на них. Един же точию Моисей оста в них ко всесильному Богу. И понеже близ Господь всем призывающим Его во истине, зовущу от сердца Моисею, и всей двери молчания належащей о устнах его, отвеща Сердцеведец: «Что вопиеши ко Мне? Удари жезлом, иже в руце твоей, море, и расторгнется, и внидут людие, и прославлюся в фараоне, и во всей силе его» (Исх. 14, 15, 16). Тако и зде. Есть болезнь, и есть запинание от бесов. Прочее, скорби и смущение помыслов. Ослабевает прочее тело от болезни, запинается от тяжести бесов. Аще ли же молча возопиет Моисей, си есть, аще бодрствуя воззовет ум, аще седя, аще возлежа, то, слышит его Слушаяй тайная сердца, и исполняется слово оно: «яко, аз сплю, а сердце мое бдит» (Песн. 5, 2). И запрещает морю, глаголя: сотвори путь людем моим. И тогда погрузится фараон со всеми своими, и тишину приимут людие, праздник сотворити Богови. Аще убо стоиши, аще ли седиши, аще возлежиши, да бдит сердце твое совершати службу псалмов твоих. Уклоняйся в молитву, припадая Богови непрестанно, или днем, или нощию. И тогда отыдут постыждени врази, борющии душу. А о еже второе приимати пищу: честен да будет устав пищи твоея и со страхом Божиим. И да не усумнишися, не осудишися бо. Сие же есть еже не прияти по похотению ничесоже, но, аще что обретаеши яко естество приемлет: и еже пребыти алчну и не насыщену по ястии. Молю же помолитися о мне, яко да благодушно и с веселием шествую простертый предо мною путь, равный оный и углажденный и полный мира и радости и веселия, света же и радования, егоже насытитися не мощно есть и егоже кроме инаго несть.

Вопрос 509. Тойжде, облегчен быв от болезни, вопроси тогожде великаго старца: отче, егда причащаюся пищи, зело отягощаюся, и паки не могу поститися. Изнемогает же тело мое, и поты мне бывают. И жестосердие же и гордыня отгоняют от мене слезы.

Ответ. Брате, целую тя о Господе, моляся Ему укрепити любовь твою и дати тебе терпение. Да уразумееши же, яко брань есть бесовская, отягощающая тя в снедех, яко да ввержет тя в разслабление. И со мною бо много время брань творяше, и отягощаше мя зело, и творяше мя блевати всякия нощи: и начах приимати мало, и премени брань тую. И якоже начинах ясти, егда влагах частицу во уста моя, творяше мя изблевати. И творях по два варения, яко да угодно мне будет ястие, но и то ухищрение его бе. Благодатию же Христовою, терпением и благодарением, преста от мене. Бех же бессилен паче же рещи, и не подавахся, но понуждахся, дондеже укрепи мя Господь. Аз убо, брате, немощен сый, сия творях. Ты же множае внимаеши себе, и Бог пребывает с тобою. Никтоже бо есть завидяй тебе, точно един, егоже да упразднит Господь. А о посте, подклони выю твою долу, поминая жития отцев, и бдения, и смирися сердцем. И аще можеши, до девятаго потерпи. Аще ли же ни то, не пецыся: потщися же сохранити пост внутренняго человека, храня заповедь, еже не снести от древа, и внимати себе от инех страстей. И приятен будет сей пост внутренняго человека Богови: и покрыет тя за телесный пост. О слезах же рекл еси, яко жестосердие и гордость отгоняют я от тебе. Истреби тыя, и тогда приидут слезы, содействующим святым. От стужи страждеши потение: согрей себе мало, и поможет тебе Бог. И помолися о мне, яко разслабление мое во многая злая низводит мя. Но обаче не отчаяваюся, Бога имея милостива.

510. Тойжде в страсть впад, и не терпя болезни, проси тогожде великаго старца о молитве и помощи.

Ответ. Брате мой и любимиче о Господе. Извещения ради духовныя к тебе о Христе любве, открываю тебе тайны Божия. Веси бо, и уверен еси, яко молю Бога день и нощь, да спасет нас от лукаваго во Царствие Свое вечное. И якоже прихожду по обычаю, молити Бога о тебе, рече ми: остави мя искусити его на пользу души его, и телесною страстию да познает, что есть терпение его и что имать наследити молении и болезньми. И рех: убо, Владыко, с милостию яко сына, а не яко прелюбодейчища. И не бе потреба явити сия. Но да уразумееши радость оную уготованную ти, явих тебе. Да не возпечалуеши убо: милость творит с тобою Бог. Аще ли же сумнишися, то положи долу выю твою, ведый, что претерпеша святии мученицы. И приими елей от рож (глаголемый гречески родинон) со освящением. И Бог наш Своим хотением сотворит с тобою милость Свою, якоже хощет. Не сладце имам болети тебе чим, или душею, или телом. Бог да помилует тя. Помолися о мне.

511. Тогожде прошение молитвы, и помощи о тойжде страсти, к томужде старцу.

Ответ. Брате уныле и ропотливе, что скорбиши? Что вопиеши? Почто посылаеши далече, близ имея Иисуса стояща, и желающа быти призываема от тебе в помощь твою? Воззови к Нему: Наставниче! И отвещает ти. Прикоснися воскрилию Его, и исцелит ти не точию страсть сию единую, но и вся твоя страсти. Аще бы был ум твой, идеже должен бяше быти, то ниже угрызения ядометных зверей и скорпий низвести тя могли быша в чувство болезни телесныя. «Забых, глаголет, снести хлеб мой от гласа воздыхания моего» (Пс. 101, 5). Да не скорбиши. Близ есть милость Божия. И целую тя о Господе здрава, вопителю.

511. Тойжде зело отягчен, и люте страждай, моли тогожде великаго старца о исцелении.

Ответ. Да послет ти Бог мой скорое исцеление души и телу. И верую имени Его святому, яко добре еси. Елико убо можеши, держи, еже к Нему, благодарение яко возлюби тя и помилова святым Своим наказанием.

512. Тогожде благодарение. Изшедшу ответу сему от святаго старца, абие исцеле в час той, и возсла благодарение Богу и старцу, купно прося и непрестанныя молитвы о своем успеянии и спасении.

Ответ. Брате прелюбезнейший, Владыце нашему Богу да возсылаем непрестанно славословие: како настоящая нам подает во упокоение жизни. Наказуя бо, приобретает нас и искушая подает избытие и силу к терпению скорбей. Всех нас мертвит и живит позор творя миру, и Ангелом, и человеком. Да обрадуем убо Его смирением нашим, терпением, кротостию, долготерпением, чистотою, миром, благодарением. Да будет ти, о вожделеннейше, елика просил еси о Христе Иисусе, в Неже целую вас: и молюся, да сохранит вас о имени Своем от всякаго зла. Аминь.

510. Тогожде подобне о скорби сердца и откуду еще мала належит ему немощь?

Ответ. Брате уныле: како не оставляеши мертвых погребсти своя мертвецы? Презри червми ядомое тело: ничтоже бо пользует оно, егда предастся тлению. Глаголет бо: «Плоти угодие не творите в похоти» (Рим. 13, 14). И сия убо к поучению. А о нихже писал еси: есть иногда останок желчи и останок от бесов. Стягни убо вмале помысл твой на самаго себе: и аще волею Божию облегчится, иже от бесов, останок: то иже от желчи не повредит. Аз молюся по силе моея немощи, да не отринет Отец мой и Бог мой прошений твоих, но да подаст богатно и человеколюбно. И Того есть милость дати: твое же есть еже помолитися, и не помолитися. Разумей, яже глаголю, и помолися о мне.

513. Тогожде к иному старцу. Рцы ми, отче, подобает ли помощй телу, аще требует пищи, приличествующия немощи, или к пораньше приимати? Или убо подобает хранити обычное время, и презирати сия вся, аще бы что и трудно имело случитися от сих?

Ответ Иоанна. Даде нам Бог разум от Божественных Писаний, еже наставитися на правый путь. Апостол убо глаголет: «вся искушайте, добрая же держите» (1 Фес. 5, 20). Ничтоже ино должен есть человек, но да не по страсти приимет кую-либо вещь или сотворит. Аще ли же за немощь, или потребу, то не вменяется ему ниже во грех, ниже в разслабление. Еже бо здраву быти и искати телу покоя, в похотение бывает, а еже управляти тело за потребу, обрезтаем е помогающо нам в служение потребы. Аще о животных пецемся за потребу нашу, то колми паче о теле, орудии сущем души? И егда притупится орудие, то запинает художника: аще и умопостижен кто будет и ведущ. Апостол, внемля болезни и стомаху святаго Тимофеа, повеле ему употребити вина: иже рече злопострадати, за еже дело сотворити благовестника. Темже убо, разсуждения потреба: и не скоро поползнется человек. Прости, брате, яко не вем, аще добре глаголах. Но не леть пререковати. Еже аще имех в сердце моем, рех любви твоей. Прочее, аще что разсуждаеши, сотвори.

Вопрос 516. Откуду мног труд ощущаю, аще восстаю нощию на псалмопение, и аки от недуга есмь, и, еже аще творю, с тяжестию творю? Еда сие немощь есть или яко от бесов?

Ответ. Еже убо недуга, явлено есть. Аще бо не приемлет обычныя пищи тело, яве есть, яко недугует, и должен есть служение облегчити. Аще ли же питается, якоже по обычаю, тело и не востает на службу, то яве, яко от бесов есть. И треба понудити себе: по силе обаче, а не паче силы. Аще же бдит сердце, то успение тела ничтоже есть. Обаче бывает, яко почти храплет кто, и аще услышит о нахождении разбойник, то всю силу свою творит, яко да избавится от них. Темже убо, аще разсудим, то тако есмы и мы.

Вопрос 517. Рцы ми, отче, аще приходит недуг от Бога? И откуду сей познавается?

Ответ. Приходит. Егда убо ощущает кто недуг, стужение же страсти прочее не является, таковый недуг от Бога есть и брань разрушает. И треба зде телу малаго снисхождения. Егда же немощь будет, и со стужением страсти, тогда не подобает отнюд снисходити, бесовска бо есть: и снисхождение умножает страсть. Темже полезно есть, идеже брань, озлобляти тело, аще впадет и в недуг. И не да кто, помогая телу, в недуг ввержет душу. Аще же паки явна будет вина смятения, егда от путешествия случится кому: или от ран тяжких изнеможет тело, то должен снисхождение сотворити: честно обаче, а не паче должнаго. Понеже и бесове свое примешивают.

Вопрос 518. Научи мя, Владыко, естества ли суть бываемии от нерадения и безчиния недуги? И от каковыя вины иже от Бога наводятся человеку? И случаи, случающияся кому, по предварительному ли попущению Божию бывают?

Ответ. Иже от нерадения и безчиния недуги, естества суть. Посылаемии же в наказание человеку, от Бога за преслушание посылаются. В тебе убо есть еже вознерадти, или жити нечисто, и впасти в она, дондеже возблагочинствуеши. Избежиши же недугов наказательных покаянием. И случаи (противни) суть паки. И суть от них за нерадение, и от них в наказание к пользе, да покаемся. Духовнаго же человека есть еже разсудити сия от сих.

Вопрос 519. Егда смешавается немощь и от естества, и от бесов, рцы ми, отче, что должен кто сотворити? Прежде же всего помолися о мне Господа ради.

Ответ. Хотяй победити понуждает себе мало, или на пост, или на бдение, или на каковое-либо дело, яко: аще должен кто по обычаю не ядый пребыти до часа девятаго: немощь же требует в третием часе ясти, да понудит себе до часа шестаго. И во бдении такожде. И понуждение обрящется противотолкуще действу бесов. А снисхождение, помощь немощи телесней. И о прочих тако. И преходит кто два дни своя, тая творя с разсуждением по страху Божию. Господь да поможет немощи нашей во всех. Помолися о мне.