Текст книги "Аскетика. Том I"

Вопрос 822. Монах некий от схоластик искаше рукоположение прияти пресвитерства, в церкви святаго града Иерусалима, и спомоществованием некиих совосхитився. Епископ рукоположи его в диакона, внемля имени схоластика: молим же бяше и во пресвитера рукоположити его. И раскаявся о бывшем, посла вопросити тогожде старца: добре ли сотвори о первом поставлении диаконства? И подобает ли пресвитера его сотворити?

Ответ. Он же рече: отныне еже бысть, бысть. Да не возпечалуеши убо о сем: силен бо есть Бог по воли Своей привести брата в познание истины. О пресвитерстве же, в нынешнее время да не совосхитишися сотворити его. Аще бо покажет плоды достойны дела того, тогда известит Бог о нем. Несть бо далече от нас. Не должен же еси внимати имени схоластика, или единой премудрости мирской. Аще бо не имать человек вышния духовныя премудрости, то всуе имать сию. Аще же и сию имать, и оную, то блажен есть таковый. Глаголет бо всяк книжник научився Царствию Небесному, подобен есть человеку богату, иже износит от сокровища своего новая и ветхая. Блюди же не всяким ветром обносися. Тлят бо обычаи благи беседы злы.

Вопрос 823. Аще ли же не вем, киих подобает рукоположити в церквах стяжаний (сел, принадлежащих помещикам): что должен есмь сотворити?

Ответ. Засвидетельствуют иже от села того (господие, или жители). И веруя свидетельству тех, и суд свидетельств вергая на них, рукоположи представляемых от них. И тии убо узрят: ты же неповинен будеши.

Вопрос 824. Аще имать весь довольныя причетники, и свидетельствуют жители веси тоя о других, хотяще и тех, еда подобает послушати их, и сотворити выше потребы?

Ответ. Аще имать церковь довольныя, то множае потребы не должни есте сотворити, да не и смятение будет. И идеже есть довольно, не подобает послушати людей свидетельствующих о других. Что бо, аще имать весь тая других десять достойных, свидетельствующим людем, должни ли суть рукоположени быти? Ни: но всем со устроением подобает бывати. Аще ли же требуют поистине другаго клирика, и свидетельствуют о нем, то аще и отрицается, должни есте сотворити.

Вопрос 825. Весь, требующая причетников, засвидетельствова о двою: от нихже един двоебрачен есть и богат, другий же убог: коего подобает сотворити?

Ответ. Не должни есте рукоположити двубрачнаго, яко не по правилу есть, но убогаго: и приумыслити, откуду собрати ему мало, за убожество его Бога ради.

Вопрос 826. Понеже суть нецыи рукоположени от нас причетницы служащии: друзии же рукоположени инуде в чин поставляются по соизволению веси в причте тоя, суще и тии служащии: есть же, яко и по принуждению сильных определяются нецыи от них без соизволения: еда подобает тем всем подлежати и мирской службе телесной и дани, или ни?

Ответ. Рукоположеннии, или учиненнии по соизволению веси, не должни бы подлежати ниже службе телесной, ниже дани. По принуждению же некиих, или убеждению учиненни, телесне не должни служити, но от имений: аще и слышано будет, яко даянием рукоположени быша. Должен бо есть вменен быти образ по нужде в некоем деле. И той узрит носяй осуждение.

Вопрос 827. Рукоположение творя, оставих некоего по бывшей печали, и сокрушаюся и аз, яко не вем, добре ли сотворих, или ни?

Ответ. Аще убо праведне опечалился еси за нерадение его, или за ино погрешение, добре сотворил еси. Аще ли же за печаль плотскую сицевое воздаяние сотворил еси, то должен еси паче покаятися, и от себе рукоположити его.

Вопрос 828. Понеже много мне стужения бывает от различных лиц, просящих рукоположения некиих; разсудих прочее никогоже рукоположит. И некто христолюбец возлюблен и истинен нам, и много Бога ради труждаяйся к сильным людем о нас, проси некоего рукоположити мирянина, свидетельствуя о нем, яко добр есть человек: еда должен есмь его ради сотворити?

Ответ. Аще бы еси имел всю надежду на Бога, то не бы попечение имел о ком. Аще ли же еще требуеши человеков, то должен еси и ты благодать воздати за благодать: писано бо есть: «якоже хощете, да творят вам человецы, и вы творите им такожде» (Лк. 6, 31). Обаче аще добр есть (якоже глаголеши) просяй тебе, и добр есть и оный, о немже свидетельствует, не должен еси вознегодовати о свидетельстве или о рукоположении. Той бо понесет суд. Аще же веси, яко не есть добр хотяй рукоположен быти, но недобрым слухам подлежит в нечесом, не должен еси послушати еже сотворити его. Понеже ты понесеши суд той.

Вопрос 829. Понеже нецыи явишася, яко манихеи суть и бедства бегающе, отыдоша инуде, якоже случися, крестится: что повелеваеши, да сотворю?

Ответ. На явных манихеев должен еси написати, яко возбраняяй, и являяй хотящим их крестити, яко таковии суть: и в них есть еже крестити их, или не крестити. Не вси бо, якоже подобает, внимают вещем: и не ведят, яко многа тщания и долга времене, и слышания Божественных словес, и оглашения благочестивых священников еще требуют таковии, во еже приятым им быти, а не абие, ниже якоже аще случится. Страшно бо есть дело. И идеже несть желания по Богу, тамо должни есмы помянути Владыку нашего, глаголюща: «не дадите святая псом» (Мф. 7, 6) и прочая.

Вопрос 830. Повеление провозглашено бысть от царя, повелевающо еллином не совершати праздников своих: подобне и раскольником. И нецыи еще по святой Пасце приидоша, ови убо креститися, ови же общитися. Еда подобает их прияти, и когда подобает их сподобити крещения и святаго общения?

Ответ. Хотящих просветитися подобает прияти: дати же им святое крещение во святую Четыредесятницу, или на святое Вознесение Спасово, и обрящутся имуще седмицу ту яко праздник. Аще ли же кто из них познавается яко от умышления, или просто рещи за страх повеления творит сие, рцы ему: аще убо повеления ради приступаеши, грех есть. Аще же со страхом Божиим своея ради жизни, то два добра тебе будут: и польза жизни вечныя, и польза телесная. Тожде же должно рещи и хотящим общитися церкви. И аще рекут, яко Бога ради приступаем, приими их абие: христиане бо суть.

Вопрос 831. Понеже ят бысть некто от иноверных в стране верных, и мнози глаголют, яко должен есть убиен или сожжен быти: еда добро есть, или ни?

Ответ. Не подобает убиену или сожжену быти тому: несть бо сие дело христиан, но биену тщету прияти. Сия бо касаются человеков и предати некоему боящемуся Бога, яко да научит его пути Божию, и тако просветит его.

Вопрос 832. Многу, отче, обретаю тяжесть от человек текущих во еже обиждати: и противоглаголя им, бываю враг, и не обретаю помощи от кого, и скорблю, и хощу отыти от церкве.

Ответ. Рцы ми, грех ли есть еже преступити заповедь апостольскую, или ни? Явно есть всяко, яко грех есть. Аще убо грех есть, то апостол глаголет: «Привязался ли еси жене? не ищи разрешения» (1 Кор. 7, 27). И ты убо жену взял еси церковь: да не взыщеши отступити от нея, зане всяко имаши искушен быти, и каятися о вещи. Вся убо находящая тебе доблественне претерпи, и послежде обрящеши милость от Бога. Глаголет бо: «претерпевый до конца, той спасен будет» (Мф. 10, 22). Стани противу злобы, и Господь приведет враги твоя под ноги твоя, и вопреки, друзи тебе будут. До смерти сподвизайся о истине, и Бог поборет по тебе. Да не взыщеши убо помощи от человек: имеяй бо на человека надежду, скоро падает. Больша бо есть помощь Божия паче помощи тем человек. Глаголет бо: «Господь мне помощник, и не убоюся, что сотворит мне человек?» (Пс. 117, 6). Утверди убо сердце свое в Господе, и мужайся, и крепися, и Господь будет с тобою.

833. Прошение тогожде к великому старцу: еже аще ни повелеваеши ми, владыко, не противлюся. Но помолися о мне, да получу юже от Бога помощь, и покровен буду от восстающих на мя искушений.

Ответ. Вем, яко ничтоже есмь, и молитвы, якоже хощет Бог, не имам: но обаче просяй кого молитися о нем, должен и сам мал труд совнести молитве молящагося. Писано бо есть: «Много может молитва праведнаго поспешествуема» (Иак. 5, 16), сиречь помогаема от испросившаго молитву. Ведати убо должен есть Ангел ваш, яко немало покры тя Бог, и покрывает молитвами святых. Но внемли, како молится о тебе диакон, глаголя слово апостолово: «право правяща слово твоея истины» (2 Тим. 2, 15) и право прави и ты. И да не усрамишися человека, ниже человекоугодиши кому, и обрящеши благодать пред Богом и человеки: и ничтоже да мудрствуеши по человеку. Всяко бо дело человеческо мерзко есть пред Богом. И да не обидит кого церковь, но образ да будет всякой правости: и будет Бог в тебе, и ты в Бозе, и сохранит тя от всякаго зла и от всех сетей вражиих. Господь наш Иисус Христос со духом твоим. Аминь.

834. Тойжде, презрев некая права церкве, ко человекоугодию некиих, и сего ради, по допущению Божию, искушению предан быв, и скорбя, посла вопросити тогожде великаго старца о сем.

Он же отвеща ему тако: просто без Бога не бысть сие предательство. Испытаем убо сердца наша, кую заповедь преступихом Божию: и разумеем, яко тоя ради предахомся.

835. Прошение тогожде. Отче святый, вем, яко тщету сотворих и моей душе и святей Божией Церкви. И приидоша на ню трудная дела. Мнози бо суть и сильни борющии ю. Аще и восхощу сопротивитися, то тщета последует: и елико по человеку, не имам исправления. Но Богу вся возможна суть. Припадаю убо тебя, владыко, испроси ми прощение, и помози и мне и той, и воззови скорбь сию, яко же хощеши, можеши бо.

Ответ. Аще вся возможна суть Богови, и тако веруем, то сотворим Ему по силе нашей, и Той потребит востающия на ны. «Той бо разоряет советы язык, и отметает советы князей. Совет же Божий пребывает во век» (Пс. 32, 10–11). Постави истину, и подвизайся о ней: и Бог имать ратоватися за тя с соперниками ея. Тии противостоят плотски, а ты стани духовне: си есть молитвами и моленми о всяком деле, прося от Бога помощи Его. И обличи со дерзновением, и запрети, и умоли, якоже подобает духовному учителю. И да не убоишися их: многшии бо суть иже с нами – тех иже с ними. Они со диаволом, и с подобострастными себе человеки; мы же с Богом и святыми Его. Мы на Бога имеем надежду, глаголющаго: «Не имам тебе оставити, ниже имам от тебе отступити» (Евр. 13, 5), и сотворит по преизбыточествию ихже просим, или разумеем: и исполнится на нас: «блажен, емуже Бог Иаковль помощник его, упование его на Господа Бога своего» (Пс. 145, 5), а тии на человеки имут надежду, «в нихже несть спасения» (Пс. 145, 3). Аще убо мала тщета последует, то да презрим, и да не уступим, или постыдимся лица человеча, зане Бога прогневаем, но станем во истине, и не замедлят сопротивнии приити к ногам твоим: и прославится, иже всегда славимый Бог рабы Своими. Имей убо святыя споборники молитвами о вас к Богу. Право прави, якоже слышал еси, слово истины, яко епископ Божий, и припадут ти человецы, яко рабу Божию истину, со страхом и трепетом и любовию. Страшни бо суть человеком боящиися Бога, якоже и Ангели Его бесовом. Да не убоишися убо, с тобою бо Бог, и благодать Его. Приими свыше силу, юже прияша святии апостоли, благодатию Христа Бога нашего, и пребудет благодать Его с тобою до последняго издыхания. Целую тя целованием святым. Целую тя в Дусе Святе, прося помолитися о мне за любовь.

Вопрос 836. Понеже, отче, по словесам вашим святым, многу возымела помощь от Бога церковь моя: и нецыи от обидевших ю и нашедших на человека ея, купно просят быти миру и обещаются нас удовольствовати, и поисправити наши обиды, и уцеломудрити яже на ны человеки: что повелеваеши, прииму ли их, или ни?

Ответ. Аще просят, приими их, Рекшаго ради прощати друг другу: и допусти уцеломудрити с пощадением, а не нещадно и несострадательно, и образ подати, во еже коемуждо сохранити собственная (своя) праведная.

Вопрос 837. Добро ли есть творити счеты церковныя?

Ответ. Аще аки церковныя счеты твориши, то Божия счеты твориши. Иконом бо еси Его, и одолжен еси сотворити счеты тех: да аще пребудет избыток, препитаеши нищия и сиры, ихже Отец и питатель есть Бог, и домы их управиши. Аще ли же не будет избытка, то да попечешися еже прибавити. Аще ли же не тако: не твориши счетов церковных, но аки хотяй себе снабдети: тако же творящу ти, не ктому Богови, но диаволу счеты оны бывают. По Богу убо твори вся, и мзду обрящеши у Него.

Вопрос 838. Понеже различно наведена бысть сия тщета, и скорблю, яко не обретаяй в руку моею, что сотворю?

Ответ. Писание глаголет: яко обидяй вас, не вас обидит, но Духа Святаго живущаго в вас (Деян. 5, 4). Да не воспечалуеши убо о тщете человечестей: не лишит бо тя Господь тех, яже весть, яко требуеши. Той бо рече: яко, весть Отец ваш Небесный, ихже требуете, прежде прошения вашего. Но взыщи Царствия Божия, творя дела Его, и сия вся приложатся ти. Аще и поскорбиши мало за скудость вещей, но имаши обрести пространно пред тобою благая, волею Божиею. Помяни, яко писано есть: «Хотящии благочестно жити, гоними будут» (2 Тим. 3, 12). И паки глаголет: «Радуйтеся о Господе всегда, егда во искушения впадаете различна» (Иак. 2, 2). Сие есть гонение, и сия суть искушения: но доблественне преноси и верно, и имать Бог тобою прославитися. «Терпение бо во искусство ведет человека, искусство же во упование, упование же не посрамит» (Рим. 5, 4–5). Молися о мне.

Вопрос 839. Понеже глаголемии даноемцы приходят во град сей, и присно чают даров от церкве, недоумею, что сотворити: послати ли? Боюся; да не како приражуся Богови, издавая зле, яже суть нищих. Не послати? Имут глаголати о мне зле пред князьями. Что убо повелеваеши?

Ответ. Даноемцы слуги суть властей человеческих: и еже послати им, знамение есть человеча страха. Аще убо хощем не боятися их, то да станем во истине со страхом Божиим. И услышим апостола глаголюща: «Хощеши ли не боятися власти? Благое твори, и имети будеши похвалу от него» (Рим. 13, 3). И да не попечешися о глаголании. Глаголет бо: «О немже клевещут вас, постыдятся злословящии ваше благое о Христе житие» (1 Пет. 3, 16). И паки: «Аще бых человеком угождал, Христов раб не бых убо был» (Гал. 1, 10).

Вопрос 840. Озлобляемым поселяном некиим епархии тоя от воинов Дукса, и восхищаемым тем от пределов святых церквей: совещашася первоначалницы града того со епископом дати знати цареви, и бояхуся Дукса, да не озлобит их. И послаша вопросити великаго старца о сем.

Он же отвеща: аще имате Бога, щадящаго убогих, то станите доблественне в деле сем. Всячески бо щадяй убогих заступает подвизающихся о них. Той бо рече: «Понеже сотвористе единому сих братий Моих менших, Мне сотвористе» (Мф. 25, 40). Блюдите, да не на вас исполнится: «Яко наченше духом, ныне плотию скончаваете» (Гал. 3, 3). Не весте ли, яко дело Божие есть? И не вы точно подвизаетеся о вещи сей, но ини мнози купно с вами подвизаются молитвам своими. Веждь же, яко аще предадите дело Божие, то предати вас имать Бог. О властех же никтоже вас да устрашит, яко воли Божией никтоже может противостати. Всегда поминайте, еже до смерти подвизатися о истине. Господь да противосотворит брань о вас.

841. Тойже епископ вопроси: понеже, отче, тщуся на всяк день поститися до вечера, рцы ми, добро ли есть? И должен ли есмь творити что, прежде неже помолитися?

Ответ. О посте, осяжи сердце свое, не окрадено ли от тщеславия: и аще не окрадено, осяжи второе, не творит ли тя немощнейша в стужении дел: немощь бо сия не должна (быти). И аще ни в сем вреждает тя, то добре есть пост твой. Молитва же свет есть: и должен есть кийждо христианин, прежде неже сотворити что-либо, молитися, а наипаче священник Божий. Дане угождаеши человеком отнюд, и приимеши благодать Божию. Таковии бо чужди суть Бога, и Духа Божия несть в них. Имей Дух Божий, и научит тя всем право: без Него бо исправити что не можеши. Сохрани же себе от смущения и гнева. Аще ли же случится кому смутитися на тя, со смирением и любовию в разуме отвещай ему яже суть истины: и укротит его Бог, молитвами святых. Аминь.

Вопрос 842. Аще сумневаюся о вещи, или должен есмь сотворити тую, или не сотворити, рцы?

Ответ. Егда впадет ти дело, третицею помолися Богови о нем, моляся, да не заблудши: и аще пребудеши в томжде помысле, тогда сотвори яже суть помысла. От Бога бо бывает тебе, а не от себе, еда не имаши удобства вопросити отцев.

Вопрос 843. Егда отцы глаголют ми нечто, и мнится противно быти, брань приемлю от неверия: и присно глаголю помыслу тому, яко тако имать быти, якоже глаголют отцы. Убо сие веры ли есть, или неверия?

Ответ. Еже тако отвещати помыслу, веры есть дело. Но обаче понудися, да егда рекут ти отцы твои… и яко кроме Бога, ничтоже глаголют: потреба же трезвения многа: яко ныне глаголет Бог слово сотворити, и будет ко предлежащему, и помале бывает премена в вещи той. И аще не будет кто утвержден в вере, соблазняется. Тако и во святых. И понеже нецыи незнающе силы и строения Божия бываемаго ими, присно глаголют: чесого ради не реша святии, яко пременение будет, но ко предлежащему глаголют? Аще же по пременении вопрошени будут, иначе глаголют, якоже и Учитель их, рек навести гнев на Ахава: и пременшуся тому, преложися и Бог от гнева своего, глаголя: «не наведу гнева во днех его» (3 Цар. 21, 21). Что убо несмысленнии онии глаголют о Бози, яко и Той имать неведение? Заблуждают, не ведуще, яко судьбы Божия бездна многа, и непостижны суть. Тайны сия верными человецы веруются: и не вси вмещают их. Да разумееши же, брате, яко истиннии отцы не скорбят, егда мнятся быти лживи от некиих, не ведущих таин суть Божиих. Аще бо не пользует их сие, то иже вредит. Ниже бо усвояют себе славу, последуя Владыце своему.

Вопрос 844. Епископа ко иному старцу Иоанну.

Светлейшии граждане хотят новость ввести в церковь при мне, и взимати дань от привозимаго вина на пристанех ея. Нам же нецыи советуют взимати всю дань ту, утверждающе, приобретение то имети много. Повелеваеши ли убо, да возмем?

Ответ. Не подобает церкви взимати дани, мирских бо есть сие дело. Рцы же им: аще христиане есмы человецы, не требуем слышати от человек, но Самому Спасу последовати, глаголющему: «якоже хощете, да творят вам человецы, тако и вы творите им» (Мф. 7, 12). Ведите же, яко яже суть церкве, посвящена суть Богови. И неполезно есть вам что из них умалити. Горе бо тщету творящему ей в чем-либо.

Вопрос 845. Христолюбец вопроси тогожде старца: добро ли есть, да предложу господину епископу, аще непщую на пользу быти ему?

Ответ. Имеяй сердце твое пред Богом чисто, и не вредит тя сие. А еже имети сердце твое чисто, еже не глаголати ничесоже на кого, аки творя тому воздаяние, но за самое доброе. Да не возмниши убо сие быти клевету. Всякое бо дело, бываемое ко исправлению, несть оклеветание. От сего бо ниедино благо бывает, зде же предлежит произыти благу. И сего ради несть се оклеветание.

846. Ответ великаго старца Варсануфия ко отцем общежития.

Еммануил сказуется «с нами Бог». Осяжим убо себе самех, аще истинно есть с нами Бог. Аще бо удалихомся от зол, и странни художнику тех диаволу быхом, то воистинну с нами Бог. И аще горка бысть нам сладость злых, и усладися желание благих дел, и еже всегда имети на небесех жительство, воистинну с нами Бог. Аще вся человеки видим едино, и вся дни равны, воистинну с нами Бог. Аще любим ненавидящих нас, и поносящих, и укоряющих, и презирающих, и тщету творящих, и угнетающих, аки любящих нас, и похваляющих, и приобретение творящих, и упокоевающих, воистинну с нами Бог. Знамение же достигшаго в меру сию есть, еже имети с собою всегда Бога: всегда бо есть с ним Бог. Не сущу же тако, ниже с собою имущу Бога, нужда яже суть противнаго имети. И прочее разумно есть имущим ум.

847. Ин старец вопрошен бысть о сих, и отвеща: внимай себе: ниже бо вождь, ниже царь избавится в день суда. Да не послабиши убо дело то, да имееши дерзновение обрести милость пред Богом. И да не убоишися. Не вы бо носите дело сие, но Бог и старец. Аще убо сотворите силу вашу, общницы будете мзды. Аще ли же ни: вы понесете осуждение: помолися о мне.

848. Напиши ему сия: радость нам не мала, и всем боящимся Бога бысть о вступлении вашем в веру Христову. Больши же сея будет, егда увидим духовныя плоды, в вас произницающия. Ибо воистинну радость нам есть, да на вас исполнится евангельское оно слово: «тако да просветится свет ваш пред человеки, яко да видят добрая ваша дела, и прославят Отца вашего, иже на небесех» (Мф. 5, 16). Якоже весть великолепие ваше, новонасажденная (древеса) многи и красны плоды приносят. Понеже убо новокрещени есте, покажите всем на созидание многия и красныя духовныя плоды ваша, во славу святыя и единосущныя Троицы, и в похвалу вашу пред христолюбивыми царьми, от нихже сподобистеся сего великаго просвещения дара. Кии же суть духовнии плоды, паче сего, еже подвизатися о вере Христовой и уставити христианство? Аще бо и наипаче всего Христом стоит, не хощет Бог искусити предложение человеков, в показание всяко, камо стремятся. Ибо разрушится ей невозможно есть. Обещание бо Божие есть, яко «на сем камени созижду Церковь Мою, и врата адова не одолеют (ей)» (Мф. 16, 18). Подобаше убо благому делу приити, и блажен, имже приходит. Восхищайте убо, о христолюбцы, таковое блаженство. Сие же ведати хощу вашему благородию. Яко аще бы был еллин, емуже вручена есть власть, и противник веры, и деял бы нечто, то нечтоже ино могли бы мы сотворити, разве затворити церкви, дондеже отверзены бы были от христолюбивых царей.

Вопрос 849. Понеже имать церковь устав, да не изводится позде позор, ниже в праздники еллинския, и хощет князь сия нарушити: како повелеваеши, да напишем ему?

Ответ. Напиши ему сице: слуга еси Божий, по апостолу, и повелен еси сохраняти заповеди Его, якоже и аз повелен есмь: подобает убо нам хранити права и преимущества Церкве во славу Божию, и похвалу вашу. Любя убо вас, аки нашего друга, напомянух вам. Несть бо праведно человеком христианом и подобным вам христолюбцем предпочести потеху человеческую на вред душ паче служения Богу.

Вопрос 850. Понеже муж некий велик и силен гражданин наш, в Константинополи пребываяй, зело подвизается во еже ввести сия позоры: что повелеваеши, напишу ли ему? И аще восхощет нам наветовати, помолися, да не возможет.

Ответ. Напиши ему тако: чадо, вся молитва наша есть, да умножит Бог веру христианскую, по страху Своему, и да вознесет рог Церкве Своея. Той есть надежда спасения нашего. И уразумей во время нужды, откуду имамы помощь, аще не от Церкве и молитв святых. И приклоняяйся к сим, обретает та во время потребно, позорища же, лавки суть диавола, и тщайся составити сия, падает от стада Христова, и бывает часть диаволя. Вемы же, яко вы чада есте Церкве Христовы, и всегда тщитеся угодная Ему творити. Учения бо не требуете, но напоминания; еже не общатися вам с текущими уставити позорища диавольская. Во время бо нужды ничтоже могут воспользовати, разве точию потопити текущия на ня. Аще же кто имать сердце к Богу, и угодная Ему хощет уставити, таковый со дерзновением призывает Его в день печали, и услышит его Той, подаваяй коемуждо по делом его. Весте, яко образ мира сего преходит, вера же Божия пребывает во век.

Сия напиши, и да не убоишися навета человек, о вере Божией подвизаяся, и имея того помощника. Противляяйся бо Тому, потопляется якоже фараон в Чермнем мори: несумненно же Тому веруяй, ста на твердом камени недвижимь.

Конец ответом святых отец Варсануфия и Иоанна.

Богу в Троице покланяемому слава. Аминь.