Текст книги "Аскетика. Том I"

Вопрос 275, тогожде к томужде. Что есть, отче, смирение? И что есть уничижение? И что есть сокрушение сердца? И аще стяжавает кто смирение, сам себе в сердце уничижая? Или требе есть и внешних яже от человек поношений и досад? И худейших дел? Еще же и должен ли есть смиренномудрый смиреннословити, или и дела ухищряти смиренна?

Ответ. Смирение есть, еже не счисляти себе ни в коейже вещи отнюд, и еже отсецати свою волю во всех, и еже повинутися всем, и носити без смущения находящая отвне: сие есть истинное смирение, в немже не обретает места тщеславие. Не должен же есть смиренномудрый ухищряти еже смиреннословити; но довлеет глаголати: прости мя, или помолися о мне. Ниже тещи самому о себе на худейшая делания: обоя бо тщеславия приносят, и не оставляют предуспети кого-либо; и зло паче есть, нежели полезно. Но еже повеленну быти, и не сопротив глаголати, но творити с послушанием: сие проводит в предуспеяние. Уничижения же во двою образу бывают. Едино убо от сердца, а другое от внешних наносимых поношений. Темже большее есть еже от внешних наносимое уничижение, паче сердечнаго: не тако бо имать труд еже от сердца уничижение, елико еже от человек, понеже сие болезнь большую творит в сердце. Сокрушение же сердца есть, еже блюсти свое сердце, и не оставити е разтицатися в чуждая помышления.

Вопрос 276, тогожде к томужде. Аще кто похваляем бывает от кого, не должен ли есть ответствовати, яко смиренно глаголя?

Ответ. Молчати, паче полезно есть. Аще бо отвещает, аки приемляй похвалу обретается: и сие, тщеславие есть. Подобне и оно еже мнит смиренно глаголати во ответе, тщеславие есть. Сия бо, яже той мнит глаголати о себе, аще от инаго услышит, не может понести.

Вопрос 277, тогожде к томужде. Но случается оному, мнящу от молчания яко прият похвалу, соблазнитися: что убо подобает творити?

Ответ. О неизвестных должен есть подвизаяйся оставити Богу, да известит слышащему. Откуду бо весть, яко не паче пользовася от молчания его, аки не приемша похвалы, он же непщует яко соблазнился есть? Аще же сам хотяй соблазнтися явит сие, тогда со смиренномудрием должен известити ему глаголя: прости мя, брате, яко нитоже благо в себе свем, и сего ради не обретох; что тебе отвещати; но Господа ради помолися о мне.

Вопрос 278, тогожде к томужде. Случается же некоему грешну сущу со смиренномудрием рещи истину, а не по тщеславию: еда убо ниже тако должен есть отвещати?

Ответ Иоанна. Ниже тако должен есть отвещати. Аще бо той на время и смиренномудрствует, но слушаяй имать смиренномудра, и тяжесть ему есть. Господь бо рек: «Горе вам, егда добре рекут вам человецы» (Лк. 6, 26), о грешницех глаголет похваляемых, а дела не имущих.

Вопрос 279, тогожде к томужде. И како обретаем некия от святых, яко, внегда хвалими бываху, ответствоваху смирением?

Ответ. Отцы, доспевше в меру, юже рече Господь: «яко егда сотворите сия вся, рцыте яко раби неключими есмы» (Лк. 17, 10) и поистине тако имуще себе, яко же имут, отвещавают. Аще же и от инаго сия услышат, не негодуют, но и благословляют, аки глаголюща истину.

Вопрос 280, тогожде томужде. Аще кто благодетельствован будет от некоего, и молится о нем, причитая ему благодеяния, еда убо ниже тако должен есть оный ему отвещати?

Ответ. Молчание добро убо есть по всему. Но да не возмнится, яко отвергает молитву, должен есть со смирением рещи: прости мя, авво, и помолися о мне Господа ради: имея в сердце своем, яко ничтоже сам сотвори: благодетельствуяй бо всем Господь есть. И да молится Богу, еже не осуждену быти во глаголемых.

Вопрос 281, тогожде к томужде. Помолися о мне, отче, да избавлюся от языка, и от дерзновения, и от чрева.

Ответ. О языце, и дерзновении, и чреве, яко же просил еси помолитися, тако и ты сотвори по силе своей воздержатися: без болезни бо сердечныя, и трезвения, и плача, не порабощаются: поминая, яко много может молитва праведнаго поспешествуема. Всем же страстем соодолевает смирение: и трудом всяк стяжавает е. Бог да даст ти силу, брате, с разсуждением и страхом Божиим.

282. Тогожде вопрос к томужде. Аще плачем стяжавает кто сия, якоже рекл еси, како могу, входя и исходя посреде человек, и попечение имея, что кому дати от больных, и творя служения, сохранити плач? И есть ли плач сердца, кроме слез?

Ответ Иоанна. Не плач от слез, но слезы от плача бывают. Сый же посреде человек, аще отсечет свою волю, и не внимает согрешениям чуждым, сей стяжавает плач. От сего бо собираются помыслы его, и сице собираеми раждают юже по Богу печаль в сердце, а печаль слезы.

Вопрос 283, тогожде к томужде. Понеже возвергаю помысл мой на авву, и чувствую некия скорбящия о сем, что убо сотворю? Не вреждаюся ли седя, и аки бы ругается ми помысл намерению внимая. Таже, аще намерение мое покровительством вашим и не будет по страсти, еда могу все дело без вреда преити, аз немощен, не ненавидяй страстей моих? Сего ради молю, аще разсуждаеши, не предстательствовати ми вне больницы: да не како чрез сие и в зависть преуспеет вещь и поколеблет мя. Аще же тако полезно ми есть, в руках твоих есть душа моя, како велиши, яви мне, отче?

Ответ. Аще чистым сердцем и за пользу без страсти и тщеславия глаголеши, не вменяй глаголы человек. Подвизайся спомогающим молитвам святых, дондеже достигнеши без вреда всю сотворити вещь. Еже предстательствовати без страсти, якоже рех, добро есть: не всем бо дается еже глаголати авве, ниже полезно есть. Аще по Богу глаголеши, от себе не глаголеши, ниже твориши благо оно, но Бог есть во всех. И благое Божие зависти не рождает, но аще и явится на малое время, скоро угасает. В руках Бога есть душа всех нас, и Той есть покрываяй нас и укрепляяй еже сотворити полезное.

Вопрос 284, тогожде к томужде. Аще ли же вознепщую нечто полезно быти неким, убо аще и не вопрошен буду, должно ли ми глаголати? Аще ли же и болий мене будет, или причетник, реку ли авве? Или умолчу? Аще ли же и вопрошен буду, и что убо имам глаголати? Аще же и на пользу оно, еже и от себе глаголати, како возглаголю? Да не притворяяся обрящуся, сиречь смиреннословствуя, ниже аки со властию уча.

Ответ. Реша отцы, яко еже глаголати Бога ради, добро есть, и еже молчати Бога ради добро есть. Слово же отец сие есть: глаголати, якоже рех ти, без страсти, добро есть, яко сице глаголяй Бога ради глаголет: и видяй, яко по страсти хощет глаголати, аще премолчит, добро есть; яко Бога ради премолча. Аще хощеши по Богу глаголати, не пецыся, что возглаголеши: зане упраздниши заповедь: но возверзи на Бога вещь, и даст во уста твоя еже рещи на пользу. Весть Бог препоясати нас немощных силою, и Той да укрепит тя, брате.

285. Тогожде к томужде. Аще в добрых, или и в средних подобает отсецати волю авве, и в нихже преступление мнится бывати заповеди Божия? И аще паче устроения моего обрящется заповедание, должен ли есмь отрещися, да не скорбь и смущение послежде принесет ми? Еще же, аще кто обрящется потребу имеяй ко авве (да просит нечто у него), и речет ми помощи ему в вещи, и восприиму, не приносит ли ми чести? Яко отнюд вменяю себе?

Ответ. Брате, хотяй инок быти, не должен есть отнюд волю имети, ни в коей же вещи. И сему научая нас Христос, рече: приидох в мир, не да творю волю Мою и прочая. Хотяй бо ово творити, оваго же отрицатися, или разсудительнейша себе показует паче повелевающаго ему, или от бесов поругаемь есть. Темже убо, во всех должен еси послушен быти, аще и возмнится ти вещь грех имети. Повелеваяй бо ти авва твой, той понесет твой грех, аки истязуемь слова о тебе. Аще же явится тебе тяжко повелеваемое, того вопроси, и его разсуждению остави вещь. Аще ли же братия будут повелевшии тебе, и видиши, или разумееши, яко имать вещь, или паче силы твоея, паки авву вопроси, и еже речет ти, сотвори. Аще бо хощеши, не токмо вещи, но и человеки разсуждати, скорби себе привлачиши. Но иде же мнится добра быти вещь, тамо покажи послушание братии, а идеже сумнится помысл, или паче силы твоея есть, или имать вред, скажи вся авве твоему. И еже разсудит, сотвори: той бо весть, что творит, и како печется о душе твоей, и почиеши. Веруя, яко, аще что-либо глаголет ти, по Бозе есть: все же по Богу бываемое, полезно есть, и скорби или смущения не приносит. От благаго бо ничтоже зло исходит. Всяко бо древо добро плоды добры творит. А о еже просити тя кому помощи ему ко авве, аще потреба будет, сотвори, аки заповедь исполняя, юже слышал еси от аввы сотворити. Аще бо посядит тя авва в дверех, глаголя: возвещай ми о всяком человеце приходящем, не от себе будеши определяти, но повеление исполняти повелевающаго ти. Аще речет ти авва глаголати ему, или не глаголати, ты вещи не имаши.

Вопрос 286, тогожде к томужде. Аще брат вопросит мя о коем-либо словеси или вещи, и не вем того, отвещаю ли ему или ни? Аще ли же и не вопрошен буду, вижду же вещь не добре бываему, убо напомяну ли творящему единою или ни?

Ответ. Вси глаголи вопрошения сего, едину имут силу ответа. Сохранися еже не рещи по тщеславию, но со смирением и страхом Божиим. И о всех, ихже вопросил еси, рцы, потребе бывшей, и помяни: обаче в своем монастыре точию, а не инде. Ибо сущийи единыя киновии, яко едино тело суть. Аще ли же инде обрящешися, от себе ничтоже не глаголи, да не обрящешися яко учитель, но аще вопрошен будеши, рцы со смирением, и Бог вразумит тя, брате.

Вопрос 287, тогожде к томужде. Понеже известил еси ми: аще вопрошен буду о вещи, или и вижду, да глаголю со смирением. И аще вижду сердце мое услаждаемо тщеславием, внегда глаголати ми: или аще тогда и не услаждаюся, поразумеваю же, яко хощет ми быти напоследок, убо премолчу ли, или ни?

Ответ. Еже рещи нечто со смирением кому, есть еже не глаголати яко учащу, но яко слышавшу от аввы или от отец. Аще ли же имать пользу вещь еже глаголати брату, и ратует тя тщеславие, еже усладитися, веждь, яко занята тя хощет, во еже не спользовати брата. И аще послушаеши тщеславия, никогда же спользуется тобою брат, но запрети тщеславию и вознеради о нем, и по внегда речеши, покайся Богови, глаголя: прости мя, Господи, яко тщеславно глаголах. И о последнем подобие тоежде.

Вопрос 288, тогожде. Како, отче, повелел ми еси, аще вижду вещь, и прежде неже вопрошен буду, да глаголю: отцы же глаголют, прежде вопрошения не отвещавати? И авва Нистерой не сего ли ради удивлен бысть, яко во общем житии сый рече: аз и осел едино есмы? Рцы же ми, отче, и еже внимати помыслом, что есть? И аще во время уреченное подобает сие творити? И кое есть сие?

Ответ Иоанна. Брате, противу меры человека глаголют старцы. Есть убо время, егда может человек послужити: и в сие время дела служения показовати должен есть. И будет время, егда той приидет во еже служиму быти. И ины суть меры сего. Совершенна бо совершенным глаголются: другая же, сущим под законом: под пестуном бо еще искушаются. Егда убо умерщвлен будеши от мира, яко же авва Нистерой, тогда можеши рещи, яко осел есмь. Да не высокомудрствуеши, зане повредишися в сем. Уставиша отцы времена внимати помыслом, внегда глаголати самим себе утре: сотвори испытание к себе самому, како прешел еси нощь? И в вечер, како прешел еси день? И посреде же, егда помысл отягощается, вонми.

Толкование

Сими изъявляет сей богоносный отец, яко не всякаго есть рещи, яко осел есмь, но смиренномудрствующа и себе охуждающа. Сие бо несть безчестие, еже рещи: осел есмь, но величайшая честь. Темже глаголет отец: да не высокомудрствуеши. Егда бо кто в меры осла приидет, то бием, якоже оный, поношаемь, отягощаемь, влекомь, вяжемь, и все что-либо страждай, елика подобает ему страдати, и не точию не пререкуя, или памятозлобствуя, или отнюд некое движение имея в сердце, якоже той, но аки нечувствен во всех сый, еже знаменует искомое сугубое умерщвление, или и трегубое, тогда негли дерзнет рещи, яко осел есмь. Но и се, со многим студом, помышляя высоту исправления. Мню же ниже тогда, но и паче тогда по премногу зря себе таковаго устроения лишена, не дерзнет не точию рещи, яко осел есмь, но ниже помыслити, ведый сие сущо высокомудрие: в немже есть падение души и воистинну совершенная погибель.

289. Тогожде к томужде. Аще кто от старец паче мене вопросит мя о вещи, должен ли есмь глаголати, еже мню на пользу быти?

Ответ Иоанна. Несть твое рещи что-либо, не веси бо воли Божия, аще тако полезно есть, но аще вопросит тя кто от них, рцы ему со смирением: прости, яко и аз не вем.

290. Тогожде к томужде. Аще брат творит дело среднее, аз же воли ради моея скорблю о том, что сотворю? Премолчу ли, и не упокою сердца моего? Или реку аки с любовию и пребуду не смущаемь? Аще же иныя оскорбляет дело оное, а не мене, реку ли за инех? Или еда како мнится сие быти дело чуждо?

Ответ Иоанна. Аще будет дело не имущо греха, но среднее, и глаголеши, за еже упокоити сердце твое; побеждение ти есть: яко от немощи немогл еси претерпети. Укори убо себе и молчи. Аще ли же иныя оскорбляет, рцы авве твоему: и, или той речет ему, или тебе отвещает, что рещи, и ты безпечален будеши.

Вопрос 291, тогожде. Аще инех убо ради глаголю авве, домышляюся же, яко смущается брат, что сотворю? Аще ли же и иныя и мене оскорбляет, реку ли инех ради, или премолчу за еже сам извещения не имам? Аще ли же поразумеваю, яко не скорбит, реку ли и себе ради? Или понужу себе в сем?

Ответ Иоанна. О смущении брата, аще речеши авве: ты вещи не имаши. Егда потреба будет рещи инех ради, и печешися, рцы онех ради, себе же ради самаго понудися не рещи.

Вопрос 292, тогожде. Но помысл глаголет ми: яко аще смутится брат на мя, враг ми будет, имея яко оклеветах его ко авве?

Ответ Иоанна. Сей помысл зол есть, хотя возбранити исправлению брата. Да не удержишися еже рещи: по Богу обаче (а не по клевете.) Ибо и на врачев ропщут врачуемии, больнии. Но небрегут врачеве, ведуще яко послежде благодарят им.

Вопрос 293, тогожде. Аще убо вижду помысл мой, яко не ради пользы брата хощу рещи, но за еже оклеветати его, реку ли или премолчу?

Ответ Иоанна. Вразуми помысл свой по Богу рещи, а не по страсти. Аще ли же побеждается оглаголанием, то и тако рцы авве, исповедуя ему и свое оглаголание, яко да оба исцелитися, он убо от согрешения, ты же от клеветы.

Вопрос 294. Аще ли же не попустит ми помысл исповести авве, яко с намерением еже оклеветати брата глаголю, что сотворю, реку ли или ни?

Ответ. Ничтоже да речеши ему. И Господь попечется. Несть бо ти потреба со вредом душевным рещи: и Господь, якоже хощет, исправит брата.

Вопрос 295. Понеже случается, яко творю дело, якоже мнится, с разумом, и исправляет убо оное кто, аз же, елика аще реку ответствуя, глаголю от тщеславия; что должен есмь творити?

Ответ Иоанна. Аще не имать нужды ответ, то молчи. Аще же имать помысл дело брата твоего, запрети тщеславию и уврачуй и.

Вопрос 296. Аще дело творю от средних, и вем, яко аще увесть мя брат творяща то, соблазнится о мне; понуждаюся же от тщеславия укрыти е (стыждуся бо, аще увидит мя): еда должен есмь тщеславия ради не крыти или укрыти соблазна ради? Аще же и не вем известно, соблазняется ли, но подозреваю; что сотворю?

Ответ Иоанна. Аще зазирает твое сердце, яко соблазняется брат твой, укрый и не даждь ему помысла. Аще же известно не веси, но подозреваеши, не пецыся о сем.

Вопрос 297, тогожде. Аще реку кому глагол бодущ и, и не поразумеет словесе, еда должен есмь покаятися ему или премолчати и не подати ему помысла?

Ответ Иоанна. Аще не поразумеет брат, яко уязвил еси и, молчи: и не смутиши его. Но потщися Богу покаятися о сем.

Вопрос 298. Аще кто увидит брата согрешивша, и речет авве той нань же речено бысть, како должен есть расположен быти к рекшему нань?

Ответ Иоанна. Аще верен и по Богу житие имать (согрешивый), то, аще и от вражды рече рекий нань, должен есть помыслити, яко хотя брат спользовати мя, сие рече. И исполнится на нем реченное, яко благий человек, от благаго сокровища сердца своего износит благая. И сия помышляя, должен есть паче любити, нежели ненавидети. И в сих пребываяй, обретается преуспевая в Бозе.

Вопрос 299, тогожде. Понеже ощущаю от тщеславия, яко егда творю метание пред некиими, червленеюся мало: убо должен ли есть ухищряти, пред некиими творити метание, или якоже прилучится?

Ответ Иоанна. Еже пред некиими или особь творити метание, не должен еси ухищряти, но якоже прилучится сотвори.

Вопрос 300. Еда же ли и меншим мене должен есмь творити метание? Или словом врачевати их, да не от противныя страны тщеславие привнидет?

Ответ Иоанна. Якоже обретаются человецы велицы и честни должницы суще ничтожным и последнейшим: и нужду имут отдати долг не тщеславящеся, должни бо бяху: тако и ты, аще должен еси некоему меншу себе, сотвори ему метание без тщеславия, ведый яко должен еси.

Вопрос 301, тогожде. Аще взыдет страстен помысл на сердце мое, чим должен есмь отразити его? Убо сим ли еже пререковати? Или еже запретити, и аки бы прогневатися нань? Или тем, еже притещи ко Богу и поврещи немощь свою пред Ним?

Ответ Иоанна. Брате, страсти суть скорби, и не отлучи я Господь, но рече: «и призови Мя в день скорби твоея, и изму тя и прославиши Мя». Темже о всякой страсти, несть ино полезнейшо, разве еже призывати имя Божие. А еже сопротив глаголати, несть всякаго человека, но сильных по Богу, ниже повинуются беси. Аще бо кто от несильных будет сопротив глаголати, ругаются ему бесове, яко сущу под властию их и пререкующу им. Такожде и еже запретити, великих есть и имущих власть над ними. Кого же во святых обретаеши по святому Михаилу (безплотному), и еже запрети диаволу? И се, яко имеяше власть. Несть бо наше немощных, разве бежати ко имени Иисусову. Бесове бо суть страсти, по Писанию, и исходят. И что хощеши вящше сего? Бог да укрепит тя во страсе Своем и да подаст ти одоление.

302. Прошение тогожде. Молю тя, отче, даждь ми слово, яко молишися о мне, якоже и святый старец дал ми есть. И понеже единаго аще побежден буду в вещи, то глаголет ми помысл: зане гордыню имаши, не благоуправляет тя Бог пообладати страстию, да не впадеши в тщеславие пообладав; или яко, аще удобно приимеши, удобно погубиши; или яко да желая прияти, часто притекаеши ко Богу; или инаго ради чесого; или паче от разслабления моего есть, что убо подобает сотворити ми?

Ответ Иоанна. Аще едино есмы вси, смею рещи, яко старец в Бозе, и аз с ним. Аще той дал ти есть слово, и аз чрез него. Вем, яко аз немощен есмь, и последнейший, но удалитися от старца не могу: милость бо творит со мною, еже быти двоим едино. Прочее, брате, внемли себе. Потщися трудитися, во еже сохранити заповеди оны: аще и побежден будеши в вещи, да не ослабееши, ниже да отчаешися, но воспряни паки, и поможет ти Бог. Есть убо и ради первых, яже рекл еси, пострадати, и сего ради не пообладати страстию; есть же и за разслабление пострадати тое: а еже свободитися от обою, есть еже поврещи себе пред благостию Господа с плачем, да свободит тя от тех и инех страстей молитвами святых. Аминь.

303. Тогожде к томужде, прошение пособия, в тех, яже заповеда великий старец.

Ответ. Брате, ни о чемже остави старец ответа некоего, в бывших к тебе ответех его, но загради уста всем. По еже бо рещи ти: сохрани моя словеса, и сохранится мой к тебе завет, что еще хощеши? Сотвори по силе своей, яко да сохранится тобою завет его. В нем бо лежит наследие царствия с раем сладости: и ихже око не виде, и ухо не слыша, и на сердце человеку не взыдоша, яже уготова Бог любящим Его. Должен убо еси и ты совнести свою силу и тщание: и Божий есть покров и милость и подаяние силы. Тому слава, вовеки. Аминь.

Вопрос 304. Что сотворю, яко боюся студа безчестия? И в беседу же аще впаду с некиими, зело привлачаюся в ню, и пленяюся, аки отнюд забывати себе. И аще прииду в себе, стыждуся оставити беседующих и отыти.

Ответ Иоанна. Да не в сия впадет немощствующий и в славолюбие, зело должен есть бегати от многословия и пресекати беседу, извиняяся аввою, яко аки бы повелел есть ему нечто, и спешит. А еже не понести безчестия, неверия есть дело. Иисус человек бысть, и безчестие приял есть, брате: еда болий еси ты Иисуса? Неверие есть сие и прелесть бесовска. Аще кто хощет смирения, якоже глаголет, яко хощу, и не понесет безчестия, прияти того не может. Се слышал еси, да не презриши: зане презрен быти имаши от дела.

Аще помогает в созидание и не бывает пресечение нужнейшаго дела, стой, дондеже беседуют; аще же не полезна есть, рцы: прости, аз немощен есмь. А о студе: помышляя всенародный студ пред Господем, хотящий быти грешным, привременный ни во что же вмениши.

Вопрос 305, тогожде. Егда приходят нецыи в монастырь, или мирстии, или отцы, и глаголет ми помысл о пользе души вопросити или о вещи; что присудиши?

Ответ Иоанна. Брате, иже по истине Христов ученик быти хощет, власти ни единыя имать на себе самаго ко еже творити что-либо от себе. Аще бо и мнится пользоватися от беседы приходящих, но отпадает заповеди глаголющия: «вся с советом твори» (Сир. 32, 21). Что же более хощеши слышати паче того, еже отцы реша: яко, аще будут нецыи и беседуют слово Божие, вопроси авву твоего со смирением: авво, хощеши ли, да пожду и послушаю? Или отыду? И еже речет ти, сотвори с покоем. Аще же и потребы ради хощеши вопросити кого, или инока, или мирскаго, то да речеши авве, и аще разсудит той, вопросит сам то, еже хощеши; аще же речет тебе: вопроси ты, тогда вопроси.

Вопрос 306. Аще же не хощу вопросити, и случится ми с некиим от них срестися, или и той вопросит мя о вещи: како повелеваеши употребити?

Ответ Иоанна. В сретении с некиим, до приветствия точию да будет слово твое, и прочее, помолися о мне, яко на дело иду, и отыди. Аще ли же вопросит тя о вещи, аще веси, рцы, и мимоиди; аще же не веси, рцы: не вем, и мимоиди.

Вопрос 307. Аще же обрящет мя седяща, или и делающа, и сядет купно, или беседовати со мною восхощет, что сотворю?

Ответ Иоанна. Аще обрящет тя негде седяща, и приидет, благословися от него, и тожде сотвори, и рцы ему: помолися о мне. И мало не руками аще тя удержит, рцы ему: прости мя, яко заповедь имам ни с ким же беседовати без воли аввы; но реку ему, и что-либо ни речет ми, сотворю. Аще же и делающу ти приидет кто и сядет, аки имеяй заповедь, изобрящи себе вину и востани.

Вопрос 308, тогожде. И что есть, еже глаголет авва Исаиа, яко, по приветствии страннаго, вопроси его: како имаши, и тако молчи с ним седя?

Ответ. Еже прияти странна, и по приветствии вопросити и, како пребываеши, и прочее седети с ним молчащу, писал еси, яко авва Исаия рече сие: но сие старцу речено бысть преуспевшу и возрастом, и мерою. Истинный же ученик, и желаяй быти инок, хранит себе от таковых бесед: раждаются бо от них нерадения, разслабление, не покорение и лютое дерзновение. Глаголет же негде, яко Иоанн в сих не упраждняется. И се то есть, еже безпечальну быти от всякаго человека.

Вопрос 309. Помысл глаголет ми: отсецы единою, сретения, и избавишися. И паки глаголет ми: по малу пресецы, за еже не чудитися тебе видящим тя. Рцы убо ми, кое есть лучшо?

Ответ Иоанна. О еже единою отсещи, и по малу малу, за еже не чудитися видящим тя: аще единою отсечеши, то безпечален будеши: зане вину подаеши и помыслы. Вину убо, еже глаголати, зане беседова он со мною прежде, побеседую и аз с ним: помыслы же, яко, еда нечто имать на мя брат сей? яко прежде беседова со мною, а ныне не беседует? Восхощи вещи, и поспешит ти Бог.

Вопрос 310, тогожде. И понеже иногда нецыи немощнии приходят в монастырь, просяще нечесого из больницы, и повелен есмь от аввы раздавати им: и от сего принужден есмь им беседовати не мнюся ли своим хотением сия творити? Яви мне, отче, и помолися о мне, да обрящу в них покой.

Ответ Иоанна. О приходящих немощных и требующих чесого от больницы. Аще равно подаси, ты безпокойства не имаши. Повелен бо был еси. Должен же еси зело внимати, да не сею виною, разрешиши с ким беседу, или сретение по потребе разшириши, разве егда нужда будет вопросити его о вещи или купли. И сие паки, до сего, – внимая, да не обрящет вины злая воля. Сия сохрани, и обрящеши покой.

Вопрос 311. Помысл глаголет ми, яко безмолвие всего есть нуждне и яко полезно ти есть. Убо добре ли глаголет?

Ответ Иоанна. Безмолвие что есть? Разве еже востягнути кому сердце свое от даяния, и приятия, и человекоугодия, и прочиих действ. Егда же Господь обличи книжника чрез впадшаго в разбойники и привопроси его, кто бысть ближний? Рече: «сотворивый милость с ним» (Лк. 10, 37). Паки рече: «милости хощу, а не жертвы» (Мф. 12, 7). Аще убо имаши единою, яко милость вящши есть жертвы, в милость приклони сердце свое. Ибо вина безмолвия приводит в высокоумие, прежде даже человек не приобрящет себе, сиречь непорочен будет. Тогда бо безмолвие есть, егда понесе крест. Аще убо спостраждеши, обрящеши помощь. Аще же удержиши себе, якоже сиречь взыти паче меры твоея: сие веждь, яко, еже имаши, погубиши. Ниже убо внутрь, ниже вне: но по среде ходи, разумевая, что есть воля Господня, яко дние лукави суть.

Вопрос 312, тогожде. Явлено сотвори ми, отче, что есть ниже внутрь, ниже вне, но посреде? Еда како не явленнии ли дни подобает уставляти безмолвию, и явленнии попечению?

Ответ Иоанна. Еже ниже на безмолвие дерзати, ниже нерадети сущу в попечениих, сей есть средний путь не падательный, но имети в безмолвии – смирение, и в попечениих трезвение, и востягати помысл, несть устава часу, кольми паче дню? Но должен есть всяк терпети со благодарением находящая по нужде, сострадати же подобает всем, сущим во общежитии. Ибо заповедь апостолову исполняеши: сиесть, аще скорбит кто, да поскорбиши с ним, да увещаеши его, да утешиши его. Сие бо есть сострадание: и еже болящим сострадати и врачевании им спомоществовати, добро есть. Аще бо врач мзду имать, пекийся о больнем, кольми паче состраждай во всем ближнему по силе своей? Аще бо кто во всем не состраждет, и в том, еже состраждет, волю свою исполняя обретается.

Вопрос 313, тогожде. Понеже повелел ми еси о еже посреди ходити, и егда случается мне упразднитися и улучити благовремение, еже мало поседети в келлии моей, стужение велие претерпеваю от приходящих, по обычаю, возлюбленных иноков или и мирских. И аще явлюся им, скорблю. Аще же не восхощу явитися, нужда есть пребыти в келлии моей, и возбраняется потреба больницы. Не повелиши ли ми рещи единому от братий, сущих тамо со мною, да егда не явлюся, приидет той и возымеет попечение? Или всячески отыти? Сия, аки человек, помышляю. Аще же оправдание будет в помысле, воля Божия да державствует, а не моя, яко своя не стоит, но в погибель скончавается.

Ответ Иоанна. Елико человек низходит во смирение, преуспевает. Еже пребыти тебе в келлии твоей, не искусна тя творит, яко пребываеши без скорби. И тем, еже пребыти без попечения прежде времене, враг уготовляет тебе смущение множае покоя твоего, яко да понудит тя рещи, уне да не бых родился. О стужении же человеков рекоша отцы: есть человек храняй умрети, и внимая дружеством мира сего. И ты убо да не даси, ниже да приимеши с ними, и тако отчуждятся от тебе. И о служении брата: аще творити собою, себе помогаеши; аще же чрез онаго лишше труда твоего, и молитвы твоея, той вземлет. Предрех ти в вышнем ответе о сострадании, и подвизайся, аще веруеши апостолу глаголющу: кто изнемогает, и не изнемогаю аз? Кто соблазняется, и аз не разжизаюся? Со озлобляемыми озлобляеми, аки и сами суще в теле.

Вопрос 314. Како могу, отче, аще воспросит кто вещи, с тихостию подати ему, из начала сумняся? Егда бо с принуждением подаю, обретается душа моя жестока и не довольна.

Ответ Иоанна. Аще уразумееши, яко просяй по потребе просит, даждь ему с радостию, яко от Божиих подавая: и се есть тихость. Аще ли же увеси, яко не по нужде просит, не даждь ему, но рцы: заповедь имам от аввы не даяти ничесоже не имущему нужды; и несть се жестокость. Господь да вразумит тя.

Вопрос 315. Понеже прочтох в постнической книзе святаго Василия, и обретох, яко всяк, иже аще имать что, и даст иному, себе паче, а не онаго благодетельствова, по заповеди Господней. Како убо могу сохранити ю?

Ответ. Сия глава пребывающему на едине речеся, и могущему себе управити с разсуждением. Ибо иже во общежитии сый, под повиновением отца есть, и не имать заповеди; и ни единыя же власти имать сотворити свою волю.

Вопрос 316. Понеже и сие обретох в постнической книзе святаго Василия, яко невозможно учеником Господним быти пристрастну сушу к нечесому настоящих, или приемлющу некоего, аще и на мало отвлекающа и от заповеди Божия. Должни же суть мне сродницы мои малым щетом и хощу и дати нищим, и негли не восхотят того отдати, что сотворю?

Ответ Иоанна. Аще не отсечеши плотскаго мудрования, и не приимеши малое безочство по Бозе, впадеши и в человекоугодие. Бог да подаст ти силу творити волю Его по всему. Аминь.

Вопрос 317, тогожде. Что есть, еже глаголют отцы, неумолчавательность? И како исправляется?

Ответ. Якоже мню, еже не молчати о своих помыслех. Умолчаваяй бо рещи своя помыслы, пребывает неисцелен. Исправляется же частым о них вопрошением отцев духовных. Якоже смыслю, рех и тебе брату моему. Аще ли же ты лучше сие разумеваеши, Господь да даст тебе разум, сущий от Него, и мне, худейшему рабу своему.

Вопрос 318. Что есть, еже сказал ми еси, отче, яко трезвеннаго ни мало вредит сон?

Ответ Иоанна. Хранящему стадо свое, по Иакову, отступает от него сон. И егда восхищает мало, аки бдение инаго бывает ему сон той. Огнь бо жжения сердечнаго не оставляет и низвестися в сон. Воспевает бо с Давидом песнопоя: просвети очи мои, да не когда усну в смерть. Достизаяй меры сея и вкусивый сладости ея разумеет глаголемая. Не упивается бо таковый вещественным сном, но пользуется естественным.

Вопрос 319. Аще просит мя кто внити в келлию свою сотворити молитву, или аз в келлию мою, или восхощу подати руку помощи кому в деле, даже доколе подобает отрицатися, или любопретися? Идеже, сиречь, несть преступления заповеди.

Ответ. Аще внидеши в келлии брата, или той в келлию твою, и речет ти: помолися, даже до трижды рцы: прости. И аще по третием пребудет прося, тогда со смирением сотвори. И ты трижды рцы кому, и аще не восхощет, остави: зло бо есть любопрение. И о всякой же вещи: или да понесеши вещь от некоего, или да подаси руку, даже до трижды проси. И аще не восхощет, престани с миром, и не оскорби его. И сей есть истинный путь Божий. В нем же внемли себе делати нелицемерно и чистым сердцем, Богу дающу тебе руку и помогающу благодатию Своею. Аминь.

Вопрос 320, тогожде. Аще присеет любовь, и дадут ми часть мою, и не имам нужды прияти ю: повелеваеши ли прияти мне ту, да не возмнюся ради воздержания не приимати? И иждиву ли ю требующим в больнице, или ни?