Текст книги "Аскетика. Том I"

Вопрос 384, тогожде. Еда может вера инех пользовати иного, не совнесша, веры, якоже разслабленнаго пользова вера носящих?

Ответ. Аще не бы верен был и разслабленный, то не бы попустил им носити и свесити себе. Темже вера обою спасе и. Аще убо не совнесет человек веры Богови, никакоже пользуется. Прочее, да не извинишися в том, яко ничтоже твориши, возлагая на других бремя свое все. Ибо Иеремия веруя, яко милует Бог люди, моляшеся о них: и понеже не совнесоша ему веры, не услышан бысть. И где бяше вера пророка? Не имеяше ли, якоже и носящии разслабленнаго? Но всячески вина людей бяше. Тако убо и в подобных. Не праздне бо глаголется: много бо может молитва праведнаго поспесшествуема.

Вопрос 385, тогожде. Молю тя, отче, рцы ми, чим споспешествова дщи жены хананейския и раб сотника, яко исцелеша? Но и другий разслабленный, о здравии точию просив тела, прият прежде оставление грехов? В чем убо зде споспешество? И Господь же глаголет апостолам: «Елика аще разрешите на земли, будут разрешена на небеси» (Мф. 18, 18). «И, емуже аще отпустите грехи, отпустятся» (Ин. 20, 23) и не рече: аще споспешествуют. Прочее изъясни ми сия, молю.

Ответ. Брате, скорбь есть не ведущим вещей како суть. Дщи хананеяныни, и раб сотника, не бяху при разуме, ова убо от неистовства, ов же от бедства недуга онаго, и не можаху верою споспешествовати молящимся о них. Разслабленный же оный, веру о здравии тела совнес, сподобися большаго, Владычним человеколюбием. При Спасителе бо, яко да веруют человецы, яко прииде, знамения, без поспешества из начала бываху, и исцеляхуся человецы туне, да исполнится пророческое оно слово, яко «Той недуги наша прият, и болезни понесе» (Ис. 53, 4). Неповинни убо бывше грехом человецы, благодатию Его исцеляхуся, не истязуеми о споспешестве, разве во еже сохранити посеем, якоже глаголет: «Се здрав был еси, ктому не согрешай, да не горше что постраждеши» (Ин. 5, 14). И о Самом же паки Иоанн глаголет: «Се Агнец Божий, вземляй грехи мира» (Ин. 1, 29). Навыкни, что глаголет: «всего мира». Не приемшии же Его не получиша исцеления. И исполняется о них: «Аще ли неверный отлучается, да разлучится» (1 Кор. 7, 15). И яко даде апостолам власть целити и оставляти грехи споспешествующих молитве их. Сам Иаков, приемый таковую власть, да уверит тя, глаголя: «Много может молитва праведнаго, поспешествуема» (Иак. 5, 16). При Спасе же, не тако: но елицы прияша Его, спасахуся, и исцелеваху; не приимшии же, но отринувшии Его погибаху. Утвердимся убо верою, и спасемся о имене Бога, Емуже слава вовеки, аминь.

Вопрос 386, тогожде. Молю тя, владыко, да уразумею, кая бе вина ученику святаго Елиссеа, яко не воста мертвец, и чесо ради, провидя пророк, посла его? Или послав не прежде исправи его?

Ответ. Не уничижая ученика Елиссей посла; ни, но научая, яко добро есть, еже не уничижати кого, и приводя его в покаяние, еже веровати и воскресити. И пребысть в тождестве; и за неверие не воскреси. И ведяше пророк, яко не воскресит; но, да отымет всякий ответ от него, наказуема и неразумевша, посла. Якоже и Господь ведяше предателя Иуду, и не уничижи и, до последняго издыхания, но вразумляше и не отверже и, дондеже погибе совершенно: зане самовластии суть человецы. И да покажется, яко несть вина злых Бог, ниже святии, но человецы суть виновни своих зол, остави им самовластие, яко да будут безответни в день суда, обличаеми от друг друга.

Вопрос 387. Нецыи, живущии в монастыре, и многих избавлшиися искушений молитвами святых отец, слышавше о нашествии разбойников, хотяху отыти из монастыря, и вопросиша о сем великаго старца.

Ответ Варсануфия. Искус Владыки и человеколюбиваго Бога нашего имамы, яко от всех скорбей и искушений избави нас: и ныне да не усумнимся, яко избавит и покрыет нас от всякаго зла. Все убо попечение наше и надежду да возверзем нань. И идеже аще пребываете, молитвами святых не пецытеся о некоем зле. Стойте убо верою Христовою тверди, поя со пророком Давидом: «Господь мне помощник, и не убоюся, что сотворит мне человек» (Пс. 117, 6) и прочая; и оное: «Господь сохранит тя от всякаго зла, сохранит душу твою Господь: Господь сохранит вхождение твое и исхождение твое отныне и до века» (Пс. 120, 7, 8). Блюдите, да не узнают человецы, яко имуще Бога, человек боитеся. «Аще бо и пойду посреде сени смертныя, не убояся зла, яко Ты со мною еси» (Пс. 22, 4). Рцыте сумнящейся души, да приимет дерзновение: «Господь сил с нами, заступник наш Бог Иаковль» (Пс. 45, 8). Вси целуем вас о Господе, глаголюще: «Аз есмь, не бойтеся» (Мф. 14, 27).

Вопрос 388. Брат некий, слышав о ответе сем, яви томужде старцу: молю тя, должен ли кто имея упование сие, жити и в разбойническом месте без страха?

Ответ Варсануфия. Всегда должни есмы уповати на Иисуса, яко не оставит нас искуситися паче еже можем. Но понеже научи нас, глаголя Сам: «Молитися, да не внидете в напасть» (Лк. 22, 46); не подобает ввергати себе самех, и будет преступление заповеди Божия, самих бо себе предадим на смерть; но подобает охранятися. Аще же в мирном месте живем, и услышим о нашествии разбойник, то не должни есмы смутитися, имуще покров Божий. Видит бо Бог, яко мы не введохом себе по искушение, ниже заповедь Его преступихом. Но паче сию храняще, вопием день и нощь: не введи нас во искушение, но избави нас от лукаваго. Аще убо молящимся нам о сих, приидет искушение, или нахождение разбойник, да не ослабнем. Ко искусу бо нашему бывает, и попущением Божиим, к пользе нашей. И аще по попущению будет, имамы утверждение апостола, глаголюща: «Верен Бог, иже не оставит нас искуситися паче же можем, но сотворит со искушением и избытие, яко возмощи нам понести» (1 Кор. 10, 13). Ибо аще от слуха, имамы бежати с места на место, может диавол не оставити нас на месте едином поседети. Егда же известно ведаем о месте, яко подозрение имать бедства; то должны есми предоградити себе. Егда же место убо мирно есть, внезапу же найдет искушение; Бог видит, яко не от нас вина, и покрыет нас по Своей воли. Есть бо искушение от нас, и есть по попущению Божию. Еже от нас, на вред есть души, и о нем-то взываше Иаков апостол глаголя: «Никтоже искушаемь да глаголет, яко от Бога искушаемь есть: Бог бо несть искушаемь злыми, не искушает же Той никогоже» (Иак. 1, 13). А еже попущением Божиим, на пользу есть души: ко искусству бо бывает человека, а искусство ведет человека во упование, упование же не посрамит, по писанному. Не посрамляемый же спасен есть, о Христе Иисусе Господе нашем, Емуже слава вовеки. Аминь.

Вопрос 389, тогожде. Понеже убо речено есть: «искуси ми Господи, и испытай мя» (Пс. 25, 2); и паки: «радуйтеся, егда во искушения впадаете различна» (Иак. 1, 2), и инде же: «не введи нас во искушение, Господи» (Мф. 6, 13), и паки: «молитеся, да не внидете в напасть»; и мнится, аки противна суть: молю, уразумети различие искушений.

Ответ Варсануфия. Еже рещи: искуси мя, Господи, и испытай мя, подвизающагося человека есть, и просяща искуситися искушением, по попущению Божию наводимым, аще убо сохранит терпение в скорби искушения того. Терпение бо, якоже речено есть, во искусство и прочая благая ведет человека; и отсюду известно бывает радость и успеяние. Не содействует бо воля подвизающагося, но паче противляется, и в труд влагает себе человек, якоже не быти побеждену искушением онем. А еже рещи: не введи нас во искушение, сие знаменует: не попусти нам от своея воли и своего желания искушенным быти. От еже бо впасти в таковое искушение, смерть есть: и о сем-то Спас глаголет: «молитеся, да не внидете в напасть». Сего ради праведник оный сугубою молитвою молится: прося убо еже искушену быти по попущению Божию, во искус спасения, прося же паки и не искушену быти от своея воли и своего желания в погибель души.

Вопрос 390, тогожде. Како могу стяжати страх Божий, в жестоком моем сердце, непоколебим? И понеже, внегда творити ми вещь, прежде даже окончу ю, преношу ум от тоя во ино, виною аки бы страха Божия: убо добро ли есть сие, или ни?

Ответ. Аще кто хощет всегда имети страх Божий в сердце непоколебим, от сего примера может уразумети: егда хощет кто когда отыти, обувает сапоги. Глаголет бо Писание, яко сапоги знамение суть приуготовления, и писано есть: «уготовихся и не смутися» (Пс. 118, 60). Аще убо усмотрит себе кто, яко имать дело сотворити, то от телеснаго приуготовления, должен есть поразумети духовное и прияти духовныя сапоги, сиесть приуготовление страха Божия, и помянути, яко вся со страхом Божиим должен есть содеяти, и уготовити сердце призвати Бога, за еже приподати ему страх Божий. Аще бо предложит себе таковый страх пред очесы во всякой вещи, рождается ему непоколебим в сердце. Внимати же подобает не преносити ума от предлежащия вещи во ину, извиняяся аки бы во страх Божий. Не бо прав есть той путь его, но парение и прелесть вражия. Но во всякой главизне подобает тщание творити, имети в себе тойжде страх Божий. Должно же и святым отцем прилеплятися; и от зрительства их и беседы, и воздыхания их, и добраго их жития, исполнимся еже по Бозе умиления. Овцы бо Иаковли, внимающе сущим в водах жезлом, зачинаху и раждаху по жезлом. И аще вообразим себе примеры их, во еже темжде образом употребляти вещи; то не закосним ходити в пути с ними.

Вопрос 391. Понеже многажды приходит ми память страха Божия, и абие, поминая суд оный, умиляюся: како должен есмь прияти сию память?

Ответ. В кий час приходит ти память, сиречь умиление, о нихже согрешил еси в ведении, или в неведении? Вонми, да не когда тебе сие от действа диаволя будет на большее осуждение: и аще глаголеши, како познаю истиную и яже от диавольскаго действа; слыши: егда приидет ти таковая память, и тщишися делы показати исправление; то сия есть истинная, еюже прощаются греси. Аще же видиши, яко помянув умиляешися, и в тыяжде или горшия грехи впадаеши; разумно буди тебе, яко сия есть сопротивнаго память, и ко еже осудити душу, влагают таковую память. Се убо имаши явныя два пути. Аще хощеши убо убоятися осуждения, бегай дел его.

Вопрос 392. Когда же время имать, еже приимати во ум память Бога, и память страха Его, во еже от них умилятися, на исправление согрешений.

Ответ. Огнь горячее имать естество. И хотяй употребити огня, не всегда возгнещает; но хощет имети его сокровенна, да егда восхощет, возгнетит и согреется. Тако и зде подобает творити. Входят бо вины от врага, и сеет безвременно, преобразуя во страх Божий, хотя или воврещи кого в печаль, или смутити его ум, не упраздняющся разсудити яже суть в помысле, ради предлежащия вины настоящаго ему делания. Таковая бо есть хитрость и окрадающих домы человеческия. Аще бо не обрящут их упраждняющихся, то не могут победити их. Присно же поминай Екклесиаста, глаголюща: время всякой вещи, и глаголи себе: сотворю ныне со страхом Божиим предлежащее, и тогда упразднюся, тебе ради, сотворити счет твой, не моею премудростию, но силою сердца и утробы испытующаго Бога нашего. Буди же ти время пристойно сие, утренняго и вечерняго часа, в разсуждение помыслов, тако: како прейде нощь или день? И аще видиши некое согрешение, потщися исправитися, Христу помогающу.

Вопрос 393, тогожде. Понеже многажды многших моих согрешений память погубляется забвением находящим ми, иногда же и тех совершенно отнюд не памятствую: что сотворю?

Ответ Варсануфия. Суть нецыи не книжники, и имут совещателей истинных: и верою яже к ним влекоми, аще забудут что, присно глаголют им, яко елико весте должни есмы, отдадим. И ты убо, коего совещателя истиннейша паче Бога можеши обрести, ведуща и не у бывшая? Возложи убо Ему о яже в забвении согрешениих, и рцы Ему: Владыко, понеже и сие погрешность есть, еже забыти своя согрешения: Тебе единому Сердцеведцу согреших во всех, вся ми прости по Твоему человеколюбию: от сего бо является великолепие славы Твоея, внегда не сотворити грешником по грехом их: препрославлен бо еси вовеки, аминь.

Вопрос 394. Иногда соблазняюся о вещи, и абие является яко не право соблазнихся, и от сего посрамляюся: еда убо сие от Бога есть, ко исправлению? Или от лукаваго ко осуждению?

Ответ Варсануфия. Аще вонмем силе преждняго ответа, то обрящется имущ и сей подобие вопрос. Якоже бо во оном речено есть, яко, аще не делы явим память страха Божия и еже от нея умиление, осудимся: тако и зде. Аще убо делы исправим обличение, то от Бога есть, ко спасению нашему: аще ли же ни, от налога бесовска есть, ко осуждению нашему.

Вопрос 395, тогожде. Аще погублю вещь, и бояся осуждения, не осуждаю кого, яко вещь имуща ону, но обаче помышляю нань. Не зло ли есть искусити, истинно ли имать ту, не терплю бо погубити ея?

Ответ Варсануфия. Несть зло испытати имать ли тую. Аще ли же и будет имея ту, то да не потщишися посрамити его, но довольствуйся обретением вещи.

Вопрос 396, или прошение. Христолюбец некий исповеда грехи своя томужде старцу, просив и прощения тем.

Старец же отвещав, рече ему: изъявляяй своя согрешения, оправдается от них, по Писанию глаголющему: «глаголи ты беззакония твоя прежде, да оправдишися» (Ис. 43,). И паки: «рех, исповем на мя беззаконие мое Господеви, и ты оставил еси нечестие сердца моего» (Пс. 31, 5). Прочее утвердим себе брате, а первая простил есть Бог.

Вопрос 397, тогожде. Рцы ми, отче, како душа моя имущи многая язвы не плачет?

Ответ Варсануфия. Чувствуяй, что погуби, имать о том плакати. И желая вещи, многия путешествия и скорби претерпевает, ожидая, да получит желаемое.

Вопрос 398, тогожде. Аще хощет кто сотворити дело добро, обаче своего ради приобретения, или иныя ради своея воли: вменяется ли ему тое в правду?

Ответ Варсануфия. Вемы, яко аще постяся кто когда примесит посту своему нечто от своея воли: или умышляя человеческую славу, и приобретение от нея, мерзок бывает пост его Богу. И израильтяне бо постишася, но за еже обиду творити во днех поста, и исполняти свою им волю, поноси им Бог, Исаиею пророком глаголя: «Не сицеваго поста аз избрах, глаголет Господь» (Ис. 58, 5). Тако убо и зде. Всяко дело добро, бываемо не ради самыя точию любве Божия, но в немже и своя воля смешена обретается, скверно и неприятно есть Богу дело тое. И от Божественнаго же закона возможно есть познати сие. Глаголет бо: «мешеннаго семене да не сееши на селе твоем» (Втор. 22, 9, 11). «Ниже да сотвориши себе ризы от волны и льна». И аще хощем уведати, яко о делателех речено есть, Екклесиаст знаменует, глаголя: «во всяко время да будут ризы твоя белы» (Екк. 9, 8), знаменуя, яко должно дело тое быти всегда чисто. Аще убо имать бываемое что от особныя воли творящаго, осквернено бысть дело тое, и несть угодно Богу. И Господь о делех Своим учеником глаголаше: «Внемлите себе от лживых пророк, иже приходят к вам во одеждах овчих, внутрь же суть волцы хищницы: от плод их познаете их» (Мф. 7, 15, 16). Темже потщимся, не ради чесого инаго творити дело Божие, разве единаго ради Бога. Аще бо не тако будет, то не требует нас Бог, да нами будет. Не оскудеет бо у Бога человек, имже имать бывати непорочно дело Его. Творяще убо благое, трезвимся, да не како воли ради нашея не полезен сотворим труд.

Вопрос 399, тогожде. Понеже, косен сый в учении, скорее изучаю псалмы: еда ли от Бога случися ми сие, или от бесов?

Ответ Варсануфия. Елико подает ти Бог, учися со смирением. Еже бо изучити удобно словеса Божия не от диавола бывает: семя бо есть Божие. Но аще кто невнимает Богови, сеет и той плевелы своя. Аще хощеши смирити помысл, рцы ему пример: аще кто приимет от владыки своего сребро, якоже раби онии, и не приобрящет и не умножит, что страждет? И речет ти, яко тоежде еже раб оный, скрывый владыки своего сребро. И рцы ему: убо не высокомудрствуй, исполнив воздух слов безплодных: во осуждение бо ми суть.

Вопрос 400, тогожде. Понеже убо благое от Бога есть, дается ли сие и грешником? И чесо ради дается?

Ответ Варсануфия. Всяко даяние благо, яве, яко от Бога есть. Благу бо сущу Тому, вся благая от Него бывают: праведным убо, яко достойным: грешником же, аки благодеемым приити на покаяние: по святому Павлу глаголющему: «аз бо есмь первый от грешников, но помилован бых, да во мне первом покажет Христос все Свое долготерпение» (Тим. 1, 15).

Вопрос 401, тогожде. Како может кто по достоянию благодарити Богови?

Ответ. Аще человецы, ничто же сущии, прощают кому даже до малыя вещи, или изъемлют его от скорбей лютых: и благодарит, и проповедает благое тое всем: кольми паче мы, иже выну благодеяние приемлем от Бога, киими устами можем Ему возблагодарити, прежде убо всех создавшему нас, таже подавшему нам помощь на сопротивныя, разум сердца, здравие тела, свет очес, дыхание жизни, и, еже есть большее всех, место покаяния, и еже прияти Тело и Кровь Его во оставление грехов и утверждение сердца? «Хлеб бо, глаголет, укрепляет сердце человека» (Пс. 103, 15). И аще мнит кто, яко о чувственном хлебе оное речено есть: то како паки сам Дух глаголет: «яко не о хлебе едином жив будет человек, но о всяком словеси, исходящем из уст Божиих» (Мф. 4, 4)? Аще о чувственных и тленных вещех человецы воздаяния и благодарения творят, то что можем воздати Распеншемуся за ны? Аще хощем создати и мы, должни есмы до смерти претерпевати Его ради. Да не трудишися убо, хотя постигнути достодолжное Богу от человек благодарение, а наипаче грешных: за тех бо умре. Аще всажден будет в темницу человек тебе ради, то не паче ли силы твоея восхощеши возблагодарити ему? Кольми паче Умершему за тя. Сие же разумей, яко николиже по достоинству достигнем благодарити. Но обаче по силе нашей благодарим Ему и устнами, и сердцем: и человеколюбив есть, еже совменити и сочести нас со вдовицы оныя двема лептами. Сия о грешных да рекутся. Праведнии бо, посецаеми и умерщвляеми, паче благодарят, по святому Павлу глаголющему: «благодарите» (1 Фес. 5, 18) сиречь Богови. Тому слава вовеки. Аминь.

Вопрос 402, тогожде. Еда могут бесове благо сотворити кому? И како является, яко бесовско есть? И кое различие есть того и Божескаго блага?

Ответ Варсануфия. Может убо по мнению бывати кому благо к прелести от лукаваго: но всякое благо, бываемое от диавола ко прелести человека, осязаемое со испытанием, обретается преобразование. Лжец бо есть, и истины в нем необрящеши: якоже последняя избытия того свидетельствуют. Последняя бо света его тма, по апостолу, глаголющему о аггелех диаволих, преобразующихся в служители правды, ниже кончина будет по делом их. И якоже Спас глаголет: «от плод их познаете их» (Мф. 7, 16). Аще испытаеши с разумом и с разсуждением, обрящеши всячески в непщуемом от диавола блазе, яко никий-либо след бе блага, но или тщеславие, или мятеж, или ино что таково. А Божие благо присно умножает просвещение и смирение сердца и во утешение приводит человека. Аще же, не ведуще, постраждем нечто от прелести лукаваго, и послежде поразумеем искушение, то да воззовем себе, и притецем к Могущему упразднити искушение тое. Ведати же подобает, яко инем убо абие изначала удобопонятно есть различие: грешником же от избытия. Якоже аще некий искусный златарь возмет злата, то может, прежде даже искусити огнем, рещи, каково есть. Не искусный же, повнегда искусит огнем, тогда познавает.

Вопрос 403. Аще явится мнимое от бесов благо, изъясни ми, како избежит кто яже от него беды?

Ответ. Еже вменяти добрая, аки добра, должни есмы присно. Аще же испытано будет доброе оно бываемое, и обрящется зло, подобает отревати е. Имже бо образом видит кто снедно нечто, и мнит добро быти: вкушая же, обретает тое горько, и абие огревает от уст, и отерпевает от него за горечь: яко же орех, мигдал, и прочая, не имут порока вкуса ради: но аще уразумеет горечь его, и пребудет ядый тое, исполняет чрево свое горечи и виновен сам есть: тако и зде. Аще убо поруган будет человек, и познает, и речет: поруган бых, Владыко Господи, прости мя, то и простит: милостив бо есть. Сие же веждь, возлюбленне, яко Бог не оставляет кого искуситеся паче еже может. Во всем убо приносим Ему моление, и Той разсудит наше истое благое от мнимаго блага. Тому слава вовеки. Аминь.

Вопрос 404. Аще является мне дело, яко по Бозе есть, и сопротивляется ми помысл, возбраняющ мя сотворити то, аки не суще благо: откуду могу уведати, аще есть воистинну благо?

Ответ. Аще видится ти дело некое, яко по Богу, есть сопротивляется же помысл сопротивен: от сего искушается, аще есть воистинну по Богу. Аще бо, нам молящимся, утверждается сердце наше во благое, и растет паче, а не умалевает: тогда, или пребудет сопротивный помысл оскорбляющ нас, или ни, разумеим, яко по Богу есть дело. Благому бо скорбь убо сопротивляется всяко от зависти диаволи: тое же молитвою паче умножается. Аще ли же от диавола вложено бысть непщуемое быти добро, к немуже и сопротивление его есть: тогда и самое то мнимое благо умаливается, вкупе же и мнимое быти сопротивление. Враг бо является сопротивитися помыслу, влагаемому от него, яко да от сего прельстит нас, приимати тое яко добро.

Вопрос 405, тогожде. Что убо? Егда будет благое без скорби, несть ли по Богу? И егда случится малое сотворити благотворение, и обрести помысл без скорби: еда ли безвременно сотворих, и не угодно есть Богови бываемое? Просвети мое сердце, отче, молю тя!

Ответ. Аще кто, благо сотворив, обрящет помысл без скорби, не должен есть обезпечалити себе, яко без скорби имать прейти. Всякое бо дело благо пути Божия есть, и не лжет Глаголяй: «тесный и прискорбный путь вводяй в живот» (Мф. 7, 14). Аще бо во время делания добраго и не приключится скорбь, но по сем не возможно есть не поскорбети человеку. Егда бо со усердием творит кто благое, не ощущает скорби; егда же без усердия творит, тогда ощущает ю. Но ниже паки ведает, яко многообразно скорбь приключается. И аще опасно поищем, всяко обрящем ю, или тщеславием сокровенну (и се бо скорбей вина есть), или некиим лицем, возбраняющим нас, или за еже потом паки требовати данных нами во благотворение. Не обретающе бо что в руку нашею, в раскаяние претворяемся. И тогда где обрящем помысл без скорби? Прежде убо сих не подобает безпечалити себе. Хранит бо скорбь тую неразумным и в бываемом по сих. Разумеваяй же всегда присно чает скорбь обрести, аще не днесь, то утре, и не смущается. «Уготовихся бо, рече, и не смутихся» (Пс. 118, 60). И блажен имеяй пред очима своима всегда, «яко Господня земля, и исполнение ея» (Пс. 23, 1) и помышляяй, яко же хощет, силен есть устроити с рабами своими. Таковый бо не раскаевается о данных. Аще убо и обрящем скорбь, разумеим, яко ко искусу нашему попущает Бог. Понеже никогда же презирает боящихся Его, паче же творящих имене Его ради.

Вопрос 406. Мыслит ли никое благо от своего произволения человек?

Ответ. Случается убо многажды от движения естественнаго помысла помыслити кому благое: но и тако приписывати подобает Богови. Естество бо творение Его есть. Ведати же должни есмы, яко не приводим е в совершенство, разве заповедию Божиею. Егда бо предлагаем сию пред очесы, тогда утверждается в ней сердце наше, исполнити благое.

Вопрос 407. Такожде, егда творю некое благо, како должен есмь смирити свой помысл? И како понесу укорение мое, содеяв благо?

Ответ. На смирение помысла, егда сотвориши всяко дело благо и сохраниши вся заповеди, помяни Рекшаго: «егда сия вся сотворите, рцыте, яко раби неключими есмы, яко, еже должни бехом сотворити, сотворихом» (Лк. 17, 10). Кольми паче, яко не у достигохом исполнити и едину заповедь. И тако подобает мудрствовати всегда, и о деле блазе претерпевати укорение; и яко не вем, аще угодно есть Богови. Еже бо сотворити волю Божию, велико есть: а еже исполнити, еще больше: состав бо есть всех заповдей. Еже бо сотворити волю Божию частно есть и меншо от еже исполнити. Сего ради рече апостол: «задняя забывая, в предняя же простираяся» (Флп. 3, 13). Прочее бо, елико простирается, не имать пресечения, но всегда видит себе лишаема, и впред успевает. Той бо рече: «елицы совершении, сие да мудрствуем» (Флп. 3, 15), сиесть: еже предуспевати. Рече же: яко, и еже аще ино что мыслите, и сие вам открыет Господь.

Вопрос 408, тогожде. Егда творю заповедь, како могу избежати высокомудрия, да знаю, яко и благо сотворив, чужд есмь того?

Ответ. Брате, добрая дела добра должни есмы имети и притекати к тем, аки добрым. Не подобает бо доброе имети, яко зло. Но егда не творит кто доброе оно по угождению Божию, то и сие обретается зле бываемо, ради разсуждения творящаго. Тщание кто должен есть имети, о еже всегда доброе творити: и послежде Божиею благодатию приходит ему, еже по страху Божию бывати. Егда убо бывает тобою благое, благодари Подателю благих, аки Того сущу благу оному. Себе же укори глаголя: аще бых добре и аз проходил дело тое, то сопричастник могл бых быти блага онаго. И тогда обретаеши помолитися Богу со умилением, да сподобит тя бывшаго тобою благаго.

Вопрос 409, тогожде к томужде. Аще случится мне подолготерпети в вещи, высокомудрствует помысл. Что убо подобает ми помышляти?

Ответ. И пред сим уже рех ти, яко аще прилучится тебе кое-либо благо сотворити, ведати должен еси, яко се дар Божий есть, по благости Божией. Всех бо милует. Вонми же себе, да не, за свою немощь, погубиши бываемую от Него к тебе милость: яже и на всех бывает грешницех. Аще убо Той добре даде, ты да не погубиши зле. Образ же пагубы вещи тоя есть сей: еже похвалити себе долготерпевша, и забыти благодетельствовавшаго тя Бога. Не точию же, но и осуждение себе самому ходатайствуеши, смея себе сие приписывати, о немже паче подобает благодарение возсылати Человеколюбцу Богу. Глаголет бо апостол: «Что же имаши, егоже неси приял? Аще же и приял еси, что хвалишися, яко не приемь» (1 Кор. 4, 7)? Глаголи же похваляющему тя в яковой-либо вещи помыслу: яко плавающий на мори, аще и случится им тишину имети, но еще в пучине суть, и чают бури, и беды, и потопления, и ничимже их пользова бываемая вмале тишина: тогда бо точию имеют безопасность, да в самое приидут пристанище. Со многими же уже и во устии пристанища погрязе корабль. Тако убо и грешник, во елико есть в мире, трепетати должен есть потопления всегда. Николиже убо прелстися поверити похваляющему тя, помыслу о доброй вещи. Доброе бо Божие есть, и неможем обезпечалити себе, яко пребудет с нами, за наше нерадение. И како посмеем возвысокомудрствовати?

Вопрос 410. Аще же реку помыслу, хотя его смирити, яко ниже от Бога бысть ми долготерпение сие, но от лукаваго ко прелести, во еже высокомудрствовати: не прогневляю ли в сем Бога? Понеже вся добрая от Бога суть.

Ответ. Несть тяжесть глаголати, яко несть тое от Бога. Не бо прогневляется от сего Бог: понеже на низложение лукаваго помысла глаголется от тебе. Ибо и некий от святых рече некиим пришедшим к нему о умершем на пути осле с ними: и чудившеся онии, вопросиша: откуду уведа? И рече им: бесове ми реша. Аще и от Бога бяше ему уведение бывшаго: но к пользе онех сие отвеща, и не прогнева Бога.

Вопрос 411. Аще убо бывают явления грешнику, еда не должен есть отнюд веровати, яко от Бога суть?

Ответ. Егда сие бывает грешнику, яве есть, яко от лукавых бесов есть, во еже прелстити окаянную душу в погибель. Не подобает убо николиже веровати им, но познавати своя согрешения и свою немощь и в трепете и страсе всегда пребывати.

Вопрос 412. Убо, и егда во образе Владыки Христа являются, и тогда подобает их отвращатися?

Ответ. Тогда много множае лукавства их и прелести отвращатися подобает и проклинати. Никогда же убо да прелстишися, брате, в таковое бесовское извещение. Святым бо Божеская бывают явления. И присно предыдет тишина, и мир, и благодушие в сердцах их: и обаче истину познавающе, недостойных себе судят. Кольми паче должни грешницы николиже сим верити, ведуще свое недостоинство.

Вопрос 413. Рцы ми, владыко, како смеет диавол, или видением, или мечтанием снов показати Владыку Христа или Святое Причастие?

Ответ. Ни Самаго Владыку Христа, ниже Святое Причастие может показати, но лжет и образ притворяет якова ли бо человека и проста хлеба. Но Святаго Креста не может показати. Не обретает бо его другим образом вообразити. Понеже познаваем Его истинное знамение и образ, и сего употребити не смеет: на нем бо разрушена есть сила его, и тем смертоносную язву приял есть. Владыку Христа по плоти не познаваем: и покушается нас лжею уверити, яко Той есть: яко да прелести, аки истине, поверовавше, погибнем. Егда убо видиши во сне образ Креста, разумей, яко истинен, и от Бога есть той сон. Но потщися от святых приимати его разсуждение и не веруй помыслу своему. Господь да просветит помыслы ума твоего, брате, еже избежати всякия прелести вражия.

Вопрос 414. Глаголет ми помысл, яко, аще явится ти Святый Крест, яко не достоин обретаешися, и имаши возвысокомудрствовати, и боязнь ми и страх влагает.

Ответ. О сем не пецыся. Аще бо воистинну явится ти Крест Святый, той упраздняет надмение высокомудрия. Идеже бо Бог, тамо зла несть.

Вопрос 415. Слышах, яко, аще явится кому сон трижды, то и той истинен есть. Тако ли есть, отче?

Ответ. Несть, ниже тако, ниже подобает внимати таковому сну. Единою бо являяйся кому ложне может и трижды, и многажды сие сотворити. Да не убо поруган будеши, но внимай себе, брате.

Вопрос 416. Иногда вижду в сердце моем, яко злии помыслы окрест моего помысла, аки зверие, и яко ничтоже от них вредит мя. Что есть сие?

Ответ. Сие прелесть вражия, и сокровенно имать высокомудрие, во еже уверити тя, яко ничимже тя могут вредити злии: помысли да тако вознесется сердце твое. Но ты да не прелстишися, но поминай свою немощь и грехи и призывай святое имя Божие в помощь на врага.

Вопрос 417. Может ли кто рещи, яко живет во грешнике Дух Святой? И аще речет, отче, яко не имать, то како хранятся грешницы?

Ответ. Святии сподобляются имети Духа Святаго и храм тому бывают. «Вселюся бо в них, глаголет, и похожду» (2 Кор. 6, 16). Грешнии же чужди сего суть, по реченному: «в злохудожну душу не внидет премудрость» (Прем. 1, 4). Хранятся же благостию Его. Во всех убо возслем благодарение неизреченней Того благости и человеколюбию. Тому слава вовеки. Аминь.

Вопрос 418. Егда скорблю о чем и молюся, и помогает неизреченная Божия благость, возносится помысл мой, яко услышан быв: что убо сотворю?

Ответ. Егда, помолився и получив, вознесешися: яве есть, яко ниже по Богу помолился еси, ниже от Бога помощь приял еси, но от бесов поспешествован был еси, да вознесется сердце твое. Внегда бо от Бога бывает, то не возносится душа, но паче смиряется, и удивляется великой милости Божией, како приемлет миловати грешныя, недостойны сущия и всегда прогневляющия, и благодарит вельми славней и неизреченней благодати Его, яко не по грехом нашим предает нас, но многим Своим незлобием долготерпит и милует, и не ктому возносится, но трепещет и славословит.