Текст книги "Аскетика. Том I"

Вопрос 625. Аще убо любопрится хотяй дати, глаголя: яко аще не приимеши и раздаси, то не хощу сам раздати ничтоже: убо подобает ли оставити нищих страждущих от глада?

Ответ. Якоже рех любви твоей, яко суть нецыи учинившии себе в сие: ты же аще хощеши плакати грехов своих, не внимай сему чуждему делу: аще и пред келлиею своею увидиши кого удавляема (мучащагося). Да не приобщишися чуждему раздаянию, и отщетиши себе от плача и безмолвнаго седения. Но господин имения, не обретая творящаго ему служение сие, должен есть сам сотворити, во еже не возбранитися делу его.

Вопрос 626. Христолюбец некий вопроси тогожде старца, глаголя: аще кто просит кого, дати ему милостыню, и не имать: еда ли должен есть взаим взяти и дати?

Ответ. Аще кто просит (кого) дати, еже не имать, осуждения не имать. Ибо и апостол Петр, просимь дати милостыню, рече: сребра и злата несть у мене (Деян. 3, 6). И не взят взаим, да подаст. Аще ли же кто и свою точию потребу имать, то ни тако подобает сию, якоже прилучися, истощити, да не оскудеет ему, и оскорбится, не терпя скудости. Аще ли же, стужаемь, речет просящему: прости мне, не имам чесо дати тебе, то се не есть ложь. Не имый бо, разве потребы, сей не имать дати другому.

Точию да речет просящему: прости мя, имущаго точию (за свою) потребу. Помяни пять дев, яже, бывше просимы от инех дати им елеа во светильники их, реша им: еда не достанет нам и вам (Мф. 21, 9). И апостол же Павел, пиша к Коринфяном, глаголет: да будет ваше избыточествие во онех лишение (2 Кор. 8, 14). И не бо да иным убо отрада, вам же скорбь (2 Кор. 8, 13).

Вопрос 627. Скажи ми, отче, яве, яко рекл еси: аще кто потребу (свою) точию имать, не должен есть тую, якоже прилучися, истощити, да не поскорбит. И како бывает поскорбети кому о волею бываемых от него?

Ответ. Вся подобает с разсуждением творити. А еже умерити себе, разсуждение есть, и утверждение помыслу, еже не смутити себе по сих. А еже паче силы творити, или милостыню, или ино что, не разсуждение есть. Послежде бо в смущение, и уныние, и роптание приводит творящаго. Добро бо, и зело добро, якоже и вдова одна, даяти требующему, и несть дело зло, но яко человек паче силы творя, не может понести. И Бог, яже по силе, ищет.

Вопрос 628. Аще убо кто есть богат, и имать паче потребы своея, не требует ли ктому таковаго разсуждения? По силе бо своей творит и той.

Ответ. Ей, требует и той разсуждения (благотворити), да не обрящется творя паче силы помысла своего и раскается о бывшем. Сего ради и Павел рече: не от скорби, ни от нужды: доброхотна бо дателя любить Бог (2 Кор. 9, 7). Совершенная бо совершенных суть, умаленная же умаленных. Совершенный бо и нищету доблественне терпит, и о богатстве нерадит, и вся без смущения носит, по рекшему апостолу: вся могу о укрепляющем мя Христе (Флп. 4, 13). И: мне мир распятся, и аз мирови (Гал. 6, 14). И прочая.

Вопрос 629. А иже из начала не усерден есть на подаяние, что должен есть сотворити, яко да навыкнет подаяти?

Ответ. Воспоминати сам себе должен есть о еже от Бога воздаянии за подаваемая и начинати от последних вещей и всегда вразумляти себе: яко мало подаваяй, мало приемлет. А многая (подаваяй), и сам много приемлет, по реченному: сияй скудостию, скудостию и пожнет. А сеяй о благословении, о благословении и пожнет (2 Кор. 9, 6). И по малу малу вожделевает помысл его воздаяния многих и присно успевает на совершение. И таковый может в совершенныя меры приити, обнажити себе земных вещей и быти духом с небесными.

Вопрос 630. Аще кто, совосхитився неразсудно, истощит в благотворение потребы своя, и (последи) раскается, како должен есть себе утешати, да не диаволею скорбию поглощен будет?

Ответ. Да укорит себе прежде о неразсуждении, и да возведет от печали помысл свой, глаголя: яко внегда на дело благое расточися, то силен есть человеколюбец Бог помиловати мя и устроити мя по воли Своей.

Вопрос 631. Аще приидут два нища, и не имам дати обема, коего от двою предпочту?

Ответ. Немощнейшаго подобает предпочести.

Вопрос 632. Аще ли же хощу дати, и сумнитмися помысл не дати, что сотворю?

Ответ. Вопроси его: и аще обрящеши его, яко по скупости сие творит, даждь и еще мало нечто паче онаго, еже должно было дати, например: едину медницу, и имети будеши милостыню.

Вопрос 633. Скажи мне и сие, господине авво: не имый откуду дати, како будет сопричастник благословения, реченнаго от Спаса к сущим одесную Его: приидите благословеннии Отца Моего, наследуйте уготованное вам царствие от сложения мира: взалкахся бо, и дасте Ми ясти, и прочая?

Ответ. Брате: понеже убо апостоли не имеша имений, не суть ли сопричастницы сего благословения? Чини суть, и ко единому коемуждо Бог глагола по особному его чину. Показа бо блаженствами различие спасающихся, от чувственных бо может кто поразумевати и духовная. Предположи, яко человек, имый влажныя плоды, продает за ягоды масличныя. И другий имать различныя вещи, и продает за ягоду масличную. И между художниками тожде: ов убо древодел, и вземлет един пенязь на день: ин зиждяй, и вземлет и той пенязь: ин ино художество имый, и вземлет туюжде мзду. И художества убо различна, и плоды такожде различии: цена же и мзда, таяжде. Сия же приими мне во спасение души. Имущым убо имения и раздающим нищим не тщеславно, речено будет оно: «Приидите благословеннии Отца Моего, наследуйте уготованное вам Царствие от сложения мира» (Мф. 25, 34–35) и прочая. Внемли же и прочим блаженствам, и обрящеши в них многое различие, едино же спасение души и едино царство. Рече бо: «Блажени нищии духом, яко тех есть Царство Небесное» (Мф. 5, 3). И паки: «Блажени изгнани правды ради, яко тех есть Царство Небесное» (ст. 10). И другии блажени, различи суще, не суть чужди тогожде Царства Небеснаго. Аще убо не будет ти сотворити милостыни, то буди нищь духом, да наследиши со святыми Царствие Небесное. Плачся о гресех своих в мире сем, да утешишися со написанными во Евангелии. Стяжи кротость, да наследиши землю. Взалчи и возжажди правды, да насытишися от нея. Буди чист сердцем, да узриши Бога во славе Его. Буди миротворец сердцем твоим, да сын наречешися Божий. Готов буди делы благими, изгнан быти правды ради из града во град, то есть от лукаваго помысла диаволя во благий помысл Божий, да возвеселишися в наследии Царствия Небеснаго. Претерпи поношение, и гонение, и оглаголание ложное, Господа ради да возрадуешися радостию, многу обрет пред собою мзду на небесех.

Вопрос 634. Понеже убо коеждо блаженство едину добродетель объемлет духовну, довлеет ли, отче, сия едина добродетель ко спасению имущему?

Ответ. Якоже тело едино есть, а мнози уды, и аще оскудеет един от удес, то не будет тело совершенно: тако разумей быти и во внутреннем человеце; уды бо многи имать добродетели. И аще едина от сих оскудеет, то не обретается совершен человек. И якоже художник, ведый художество свое добре, другая художества делает от своего остроумия и не называется художник онех, разве точию от своего художества, тако и зде имый человек вся добродетели, от оныя познавается и именуется, в нейже наипаче сияет благодать Духа в нем.

635. Другий христолюбец даде благословение некоему раздати нищим, яко имый его верна. И рече ему: приими сие, и Богу воздаси слово. Ов же не разуме, яко тяжесть велию возложи нань. И непщеваше, яко аще и не бы рекл ему сего, то отнележе совершенно приял есть, слово имеяше воздати Богови. Вопрошен же быв тойжде старец о сем, рече:

Прельстися приемый, яко всяко дерзнул есть, еже силен быти слово дати Богу о каковой-либо вещи, забыв реченное: (яко) кто похвалится чисто имети сердце? Или кто дерзнет рещи чиста себе быти от грехов? Совершенных бо есть отцев сие дело. Должен бо бяше рещи давшему, яко несмь доволен на сие прияти, еже бы воздати слово Богови, человек грешен сый. Но на сие потщуся, еже совнести всю мою силу в дело сие. Божие же есть, еже поспешити быти по воле Его. И аще бы тако рекл, то смирение ему вменилося бы: и не имеяше его Бог осудити паче силы его. Егда же, яко дерзая слово воздати, прият: тогда со опасением истязан будет о словеси от Бога. Но и дающему не подобаше истязати от брата таковаго слова. Ибо мняй его имети верна, по неразумию неверна того имеяше. Но подобаше единою веровати ему, и оставити вещь на Бога и нань и не усумнетися о человеце: сумняйбося ниже верити может.

Вопрос 636. Понеже суть нецыи яве и пред собором приемлюще от раздаваемыя милостыни, инии же стыдятся явно взяти благородия ради, а друзии суть немощни, в домех лежаще: еда ли должен есть кто творити некиим от них различие, или всем равно давати яже благословения?

Ответ. Всех яве приемлющих, имей в едином чину, разве аще кто в них есть имый немощь или язву: сему бо подобает приложити мало. Стыдящихся же яве и пред народом взимати, и в немощех лежащих, имей в другом чину: подая им вящше по потребе их, и якоже имать рука твоя и угодно им.

Вопрос 637. Аще подаваяй кому имение раздати, или отцем или нищим, речет ему в нарочитом месте сие подати: обретаются же близу нецыи зело требующии: еда ли безместно есть и онем преподати?

Ответ. Несть безместно, аще зело требуют, и онем подати. Случается бо, яко не ведый он, яко тако требуют, не рече дати и онем. Аще ли же особенно завещает ему, нигдеже инде дати, точию во оном едином месте, то да не преступит заповеди его. Потребно убо есть прежде вопрошати его о сем, и якоже глаголет, сотворити, и обрящется безпечален.

Вопрос 638. Понеже дело сие и споспешествующих требует: аще пойму некия яже мню быти верны, еда ли должен есмь сумнетися вверити им вещь?

Ответ. Аще предварительно имаши их верны, то да не усумнишися уверити им. Богови бо вся явлена суть: и Той весть сердечная наша, и по делом воздает комуждо. Аще ли же коснутся чесому, то сами узрят.

Вопрос 639. Аще ли же познаю, яко коснуся кто от них, что должен есть сотворити? Обличу ли его, и возьму сия, или ни?

Ответ. Аще известно увеси, яко коснуся: то смотри, аще приемлет помысл его обличитися, и тако рцы ему вещь с кротостию, и наказанием еже по Богу: тогда возьми сия от него, яже вверил еси ему. Аще ли же не приемлет обличения, то да не повредиши совести его, да не когда от срама на горшее нечто приидет. Но остави его имети, аще что взят, ибо яже суть Божия, взят. И Сам Бог множае весть, аще требуя взят: и знает, како имать судити дело его.

Вопрос 640. И подобает ли прочее таковому сице вверити что?

Ответ. Аще уведел еси яко и другойцы сие сотворил есть, и тщится повреждати вещь, то ктому да не ввериши и ему ничесоже. Аще ли же, благ сый всегда, ныне от диавола совосхитися, или требуя сих взял есть, то не безместно есть паки вверити ему: всяко бо исправится. Тогда да не соблазниши его.

Вопрос 641. Проходящим мимо дому моего нищим что должен есмь даяти?

Ответ. Яко обретает рука твоя, или мало хлеба, или вина, или две медницы, или денгу, точию без скорби подай, со страхом Божиим. В сем бо прославляется человеколюбивый Бог.

Вопрос 642. Случается, яко имам вещь некую потребншу, а другую хуждшую, или вино, или хлеб: и глаголет ми помысл от потребнейшей дати нищим. И стужаю си сотворити сие, яко да тем паче подам лучшая и удержу хуждшая. Егда же отцы приходят ко мне, то помышляю предпочести их паче нищих, и по силе моей упокоити их: убо добре ли помышляю, или ни?

Ответ. О нищих убо: егда не доспехом имети их равно, ниже любити ближняго, яко себе самех, то по силе твоей сотвори, ведый немощь свою, и подаждь им малоценнейшая. О (приходящих) же отцех: тех предпочитати достоит, яко раби суть Божии. Писано бо есть: емуже честь, честь. Ибо Господь предпочте их.

Вопрос 643. Другий христолюбец, болен сый, вопроси тогожде старца Иоанна: имать ли жив быти, или умрет? И отвеща ему тако:

Ответ. Аще реку ти жити, или умрети, то не пользует тебе сие. Аще бо реку ти, яко умреши, то яко по нужде будет спасение твое: видя бо себе во устех смерти, яко по нужде отметнеши имения своя. Аще ли же чаеши еще жив быти на многое время, и приидет ти помысл еже спастися, и устроиши тако помысл твой на благое, то аще абие умреши, спасение твое по произволению обрящется, а не по насилованию.

Вопрос 644. Что убо? Аще страха ради смертнаго творит кто дело благо, не бывает ли ему во спасение?

Ответ. Несть подобно спасение, еже по нужде, сущему по произволению спасению. Но обаче лучше есть паче ничтоже творящаго. Погибель бо есть души, еже ниже тогда сотворити, егда не ктому чаем господие быти самим себе. Ведый убо обоя, твори над своими си яко мудр, и не яко буия девы, затворенныя вне чертога, за еже не имети плода милостыни и благотворения.

Вопрос 645. Аще убо кто воспоминает душе своей о смерти и сего ради тщится творити благое, то несть ли сия вольная мзда?

Ответ. Понеже память смертную имать добро есть, да навыкнет ведати, яко смертен есть, а смертен несть вечен; а не сый вечен, неволею оставит век сей. От частыя убо памяти смертныя, навыкает и по произволению творити благое. А еже видети пред очима смерть и творити, несть по сему деянию. Оное бо частым поучением бысть по произволению: сие же ради предлежащаго страха смерти бысть по нужде.

Вопрос 646. Рцы ми, отче, что убо пользует душе вольное? Что же невольное?

Ответ. Вольное совершенно избавляет душу от смерти: невольное же умаляется от благодати сея и меньшо обретается.

Вопрос 647. Аще кто нерадиво живый, имать умрети, и обещается Богови, яко аще жив будет, потщится угодити Ему? Еда ли дарует ему многшу жизнь?

Ответ. Бог сердцеведец есть, и правоте сердечней внемлет. Аще убо увидит, яко по истине от всея души имать покаятися, то даст ему прибавление жизни. Глаголет бо: «даст ти Господь по сердцу твоему» (Пс. 19, 5). Воля бо Божия есть спасение человеков: яко же Сам рече: «Живу аз, яко не хощу смерти, но еже обратитися и живу быти ему» (Иез. 33, 11). Да управим убо сердце наше к Нему, и все Нань попечение возверзем (1 Пет. 5, 7), и Той благопоспешит нам полезная к нашему спасению.

Вопрос 648. Рцы ми, отче, имать ли предел скончание мира сего?

Ответ. Есть убо конец миру сему всячески, Бог же, аще обрящет нас благоугождающих, то прилагает времени. Глаголет бо: «правда прилагает дни. Лета же нечестивых умалятся» (Притч. 10, 27). Повеление бо Божие, предел глаголется и о жизни человечестей. Ибо и апостолом вопросившим, рече: «несть ваше разумети времена и лета, яже Отец положи во Своей власти» (Деян. 1, 7).

649. Ин христолюбец болен быв, и зело палим от огневицы, моли великаго старца помолитися о нем, да облегчится от болезни, посла же и воду, да благословит ю и да пиет, не терпяше бо жжения огневицы. И помолившуся старцу, напися, и абие пресечеся огневица и преста болезнь. И дивляяся брат, и прославляя о сем Бога, поведа некиим действие Божие и благодеяние бывшее святым старцем. И на другий день приложися ему зело паки огневица она и посла ко старцу, моля помиловати его.

И сказует ему старец:

Ответ. Сие пострадал еси, да не будеши пустослов. И облегчен бысть совершенно молитвою святаго старца. Оттоле убо бояшеся возвестити кому, не точно о сем, но и о инех благодеяниих святаго, яже дознал есть.

650. Тойжде брат, видев авву повествующа приходящим братиям дивная сего святаго старца, вопросил есть о сем инаго старца Иоанна. И от него уразумев намерение, не приложи ктому на сие.

Вопрос 651. Тойжде вопроси тогожде старца: что есть, о отче Иоанне, яко по часом вижду авву беседующа о добродетели старцев и тешуся словесами его, яко к назиданию сущими: иногда же мню, яко не назидают сия, но соблазняют. Зане своих отцев сам похваляет, и скорблю. Стражду же сие и на инех отцех, мня (их) всуе глаголющих. Молю убо тя, отче, рещи мне, что есть сие, и помолитися, да избавлюся сего лукаваго помысла.

Ответ Иоанна. Брате, да даст тебе Бог слышати и разумети и привести в дело глаголемая ти. Сие же оправдание есть и осуждение. Оправдание убо, яко вменяеши себе достойна повествования онаго. Осуждение же, яко глаголеши: и како сей повесть творит? И не поминаеши, яко Дух идеже хощет, дышет. Можеши ли рещи мне: чесо ради Господь, целя некиих, запрещаше им никомуже рещи бывшаго? А иному рече: «иди, и покажи себе священнику, и принеси дар» (Мф. 8, 4) за очищение твое. И паки: «во свидетельство им, и повеждь елика сотвори тебе Бог» (Мк. 5, 19). Суть убо глаголемая от аввы, на пользу убо слышащих со страхом, на осуждение же не приемлющих с верою. И еще не могут сия разсуждаема быти от тебе, яко еще прелагается сердце твое. Глаголет бо апостол: «Христово благоухание есмы Богови в спасаемых и в погибающих: овем убо воня смертная в смерть: овем же воня животная в живот: и к сим кто доволен? Несми бо якоже мнози, нечисто проповедающии слово Божие» (2 Кор. 2, 15–17). Аще убо сумнишися на старца, яко запретил есть тебе глаголати, и авве не запрети, то не должен еси усумнетися, яко ничто есть посреде (и должен еси) смирятися сердцем, глаголя: яко мне убо, аки не достойну, запрети старец; сему же, аки достойну, попусти рещи пользы ради слышащих. Помыслим же, како отвсюду приводит нас старец во смирение, еже укоряти себе и имети себе недостойных, а мы не хощем поклонити долу выю свою. Приидем убо во смирение, и Бог открыет нам таинства Своя, да, идеже подобает, беседуем, а, идеже не подобает, присно молчим, яко да будут обоя в пользу нашу же и слышащих. Да не осуждаем убо или уничижаем слышащих, да не вместо еже наздатися нам, осудимся. Аще бо вопросим помысл наш, глаголюще: вемы ли, како глаголет глаголяй, от Духа ли действуем есть: обрящем, яко никакоже вемы. Темже убо, помышляем добрая, а не злая. Злой бо злая помышляет, а добрый добрая. О Христе Иисусе Господе нашем, Емуже слава вовеки. Аминь.

652. Ин христолобец, имея страсть в теле своем, послал есть прося тогожде старца Иоанна помолитися о нем, да получит исцеление. И старец рече: исцелит тя Господь вскоре. Он же закосне исцеление прияти. Имея же веру ко старцу, удивляшеся, глаголя: убо что есть дело сие? Яко старец не лжет. Бог бо в нем глаголет: и аз исцеления не приях. И пришед вопроси о сем великаго старца.

Ответ Варсануфия. Аще веруем, яко не лжет Бог и яко вся возможна верующему, то како не получил еси желаемаго? Не живет ли убо тайно неверие в тебе? Аз верую по истине, яко, что ни глагола тебя Бог чрез брата Иоанна, будет тебе. Молю же христолюбную твою любовь, да не привлачиши мя в коннористательство, состарехся бо. Сия же глаголю тебе, назнаменуя единодушие твое, еже рекл еси имети с нами. Никтоже бо душу свою делит на двое, еже оставити едину часть – в едином, а другую в другом делании. Да увеси же, яко не престаю моляся Богу, дондеже совведет тя со мною во врата своя во исповедании и во дворы свои в песнех.

Слышав же сия, удивися, како старец сказа ему о коннористательстве, и прослави Бога. И прочее удаляшеся таковаго лукаваго позорища.

Вопрос 653, тогожде к томужде великому старцу.

Друга имех возлюбленна, единодушна, на чуждей земли живуща, и тако возрастохом, аки братия, имуще вся обща. Ныне же достигох взяти себе жену, и паки пребыхом тако. И борет мя помысл, глаголя: не сотворил ли брак мой сумнения в сердце его ко мне, и не хранит тогожде залога?

Ответ Варсануфия. Аще хощеши уразумети, что имать сердце его; сим образом уразумей: осяжи сердце твое, по еже взял еси жену, храниши ли тойжде залог к нему. И аще обрящеши, яко не храниши ты, то ниже он. Аще ли же пребысть залог твой: разумей, яко по сердцу твоему обрящеши всегда, Господу поспешествующу.

654. Прошение к томужде. Ин чристолюбец послал есть, прося тогожде великаго старца о себе, яко да Господь помянет его во Царствии Своем.

Ответ. Се Господь Иисус Христос не посрамил есть лица моего, но дарова мне спасение души твоея, и дал есть мне благодать ону, еже помянути тя во Царствии Своем. Приемше убо таковую благодать, аки благодарни, да сохраним, и да не будем, якоже свинии, не могуще разсудити честных бисер. Веси же, яко аще кто почитаем бывает от кого, не должен есть того обезчестити. Почтени убо от Бога, не суще достойни, достойных нас самех сотворим. Почтим Его соблюдением святых Его заповедей. Сам бо рече: «аще отец есмь Аз, то где есть честь Моя? И аще Господь есмь Аз, то где есть слава Моя» (Мал. 1, 6)? Сам же Вседержитель Бог да поможет ти, чадо, слышати и сохранити полезная.

Вопрос 655. Вертоград, принадлежащий племянником моим, далече пребывающим, взяша нецыи на требование молитвеннаго места и велеша мне сотворити цену вертограда со вземшими. И содержим есмь от двою помыслу: и един убо глаголет ми, яко подобает подарити святому месту; другий же глаголет ми сохранити верность заповедавшим мне оценити. И амо уклонитися, не вем. Ибо и Бога боюся, и отщетити онех за грех вменяю. Что убо сотворю, отче?

Ответ. Праведную вертограда того скажи им цену, моля их и глаголя: весте, яко вси должни есмы владыкам нашим, святым. Аще ли убо что возвещает вам Бог принести им от цены, то обретается пред вами. Сия убо напиши, и в них есть сотворити, или не сотворити, и ты не будеши имый поречения от вещи. Зане убо несть (се) тягота, или грех, еже взыскати праведное, аще будет и дом Господень. Полезно же есть, еже имущему власть и господину сущу вещи, и не сущу во оскудении, паче уступити, еже по силе, дому Божию. Много бо больше от сего снискивает. Аще ли же будет не в силах простити, таковаго не истяжет Бог, разве точию благаго произволения. И сия слышав, отыде, радуяся и благодаря Бога.

Вопрос 656. Отче, понеже рабы хощу купии, и усумневаюся, будут ли мне потребни, рцы ми: должно ли взяти их? И что сотворю?

Ответ. Да увемы, яко и мы Владыку имамы. Аще повинемся и мы Владыце нашему: Той сотворит да и нам повинуются раби наши. Се слышал еси. Иди, возьми их о имени Господни.

Вопрос 657. Аще закон Господень повелевает нечто, а закон мира сего определяет противное: что подобает сотворити? Глаголет бо ми помысл: яко по онем, яже суть в законех мирских, гражданство управляемо бывает, и неправдует преступаяй тыя.

Ответ. Закон Божий честнш есть: о спасении бо души беседует. Закон же мирский, плотян сый, плотским беседует.

Вопрос 658. Что есть, еже глаголет: нищаго да не помилуеши на суде?

Ответ. Сие есть, еже глаголет: да судия, судяй о вещех, право судит, а не извинением, еже помиловати нищаго, преобидит правду. А еже упросити соперника его, да сотворит с ним милость, несть неправедно.

Вопрос 659. Аще кто от святых отец, к немуже имею многое извещение, глаголет мне власть имети в деле, а мне не видится быти праведно, что сотворю за преступление реченныя заповеди?

Ответ. Духовнии отцы ничтоже праздно глаголют, но вся на спасение души. Рцы убо ему вещь сию, и, якоже глаголет ти, сотвори, и не преступиши заповеди тоя. Яже бо суть угодна Богу, и праведна суть и полезна.

660. Ин христолюбец имеяше раба непотребна, иже, бежав, по некоем времени прииде паки к нему; и вопросил есть старца Иоанна, должен ли есть имети его? И старцу возвестившу отпустити его, (паки) начат отрок показовати ему нравы добры, и скорбяше отпустите его. И паки посла вопросите о нем, отпустите ли его?

Ответ Иоанна. Имей убо и еще того отрока, уча его и себе им. И аще исправится, се добре. Аще же пребудет в техжде, и терпиши ему Бога ради, то и сие добре: приимеши бо мзду терпения. Аще же видиши, яко не терпиши, но приходиши во вред себе его ради: отпусти его отыти, воспоминая некоего святых (отец), глаголюща: аще видиши кого утопающа в реце, не даждь ему руки своея, да не спривлечет и тебе; но даждь ему жезл твой, и аще возможеши жезлом спасти его, се добре. Аще ли же ни, пусти жезл, да не и ты погибнеши с ним.

661. По малех же днех хотяше напаствовати господина своего в крадбе вещи: и Господу молитвами святых покрывшу, бежа, и пришед господин его, благодаряше старца о бывшем ему покрове, укоряя себе, яко отнюд по первом ответе не хоте отпустите его. И сказа ему старец сия:

Ответ. Не яко отметая его, рех ти отпустити, но за немощь помысла твоего, яко не бы понесл еси напаствован быти от него. И мы бо грешни есмы, и несть наше отревати кого. Аще бо могл бы еси терпети его ленящася, мзду имел бы еси его ради. Ибо нецыи от отец глаголаху пред аввою Пименом о некоем старце, яко сей терпяше ученика своего ленящася. И рече авва Пимен: «Аще бых, аз был, возглавницу бых положил под главу его». И рекоша ему онии: а Богу что бы глаголал еси (о сем)? Он же рече: глаголал бых Богови, яко Ты Господи Сам рекл еси: лицемере, изми первее бервно из очесе твоего, и тогда узриши изъяти сучец из очесе брата твоего (Мф. 7, 5).

Вопрос 662. Добре ли убо творяше старец, не исправляя брата своего?

Ответ. Брате, не якоже прилучися, остави старец не поучати его, но многажды его поучаше, тойже не приемляше поучения. И зря его неисправлена, остави вещь на суд Божий, глаголя: Бог весть полезное; брат бо лучший мене есть. Сие же творяху совершеннии, не смеюще судити никогоже, на посрамление ничтоже сущих, а всех осуждающих.

Вопрос 663. Егда согрешает раб мой и хощу его наказати, киим образом сие сотворю?

Ответ. Образом любве яже по Богу, да наказанием исправився, престанет согрешати, и будет ему на спасение души. Не подобает же ти со гневом сие творити: от зла бо добро не раждается. Но аще помысл твой смутится, пожди его, дондеже без смущения будет: и тако со благосердием и страхом Божиим накажи его.

Вопрос 664. Но егда хощу наказати его, глаголет ми помысл: яко горше согрешаеши, и како того накажеши, себе самаго не исправляя? И пресецает мя от наказания.

Ответ. Сей помысл от диавола есть, да оный пребудет неисправлен, а ты воздаси слово о нем. Но рцы помыслу тому: яко убо множае согрешаю, явно и известно есть; но не могу слово воздати и за себе, и за него: от мене бо Бог взыщет исправления его. И, по еже наказати его со щадением и со страхом Божиим, рцы сам себе слово апостольское: «научая иного, себе ли не учиши?» (Рим. 2, 21). И тако обретешися со смиренномудрием исправляя его.

Вопрос 665. Аще увижду кого досаждающа чествованию, или хуляща святую веру, аки по ревности, смущаюся на него. Что есть сие?

Ответ. Слышал еси всяко, яко не бывает исправление чрез зло, но паче чрез благое. С кротостию убо и долготерпением возглаголи, досаждающаго научая со страхом Божиим. Аще ли же видиши себе смущающася, то ничтоже подобает рещи.

Вопрос 666. Случается, яко сретаю некоего, и страстне ему внемлю, и уязвляюся душею: и аще будет нужда побеседовати с ним, не могу воззрети нань. И от сего иногда подаю ему помысл, яко презорник. И толико случается мне сие, яко смежати очи, не терпящу зрения. И скорблю, не ведый, что сотворю. Но помолися о мне, Владыко, и поcли ми слово жизни, и врачевства человеколюбия твоего.

Ответ. Понеже вопроси любы твоя о еже страстне взирати на предстоящаго, и есть сие проявленно от браней диавола: веждь, яко и умом внимати от того есть. Поминати убо должен еси нетление и смрад естества нашего; како входяще во гробы будем. Что же о тленных сих привожду тебе слово? И не помышляеши ли паче положити пред очесы будущий Страшный cуд Божий быти? И где обрящется наследие деющих сия? И како возможеши понести великий оный студ явления деяний наших пред Ангелы и Архангелы, и всеми человеки, пред Праведным Судиею? И како заградятся уста делателей деяний сих? Да убоимся убо Глаголющаго: «не льстите себе: яко ни блудницы, ни прелюбодеи, ни малакии, ни мужеложницы, Царствия Божия не наследят» (1 Кор. 6, 9—10), и: «всяк воззревый на жену, ко еже вожделети», и прочая, и: «аще око твое соблазняет тя, изми е» (Мф. 5, 28–29). И сия убо должен еси поминати, не учащати же к человеком, к нимже обретаешися имея брань сию. И паки да не явиши им, чесо ради удаляешися от них, да не како и в помыслы ввержеши их, но аще нужда будет беседовати с ними, призови святое имя Божие в помощь, глаголя: Владыко Иисусе, покрый мя и помози немощи моей. И дерзай, яко сокрушит лук врагов: во имени бо Его есть недейство зол. И, вместо многих, глаголи мала: и да не пустиши им слуха и помыслов; но спрятай себе честно и несмущенно, ко еже ни единому же познати бываемаго. Аще ли же и силу приимеши от сих, да не посмееши на враги твоя: безстудни бо суть, и тмами аще побеждени будут, то противу подвизаются паки. Но победоносный Бог, Той есть помогаяй смирению человека, его же ради хотяй воплотися.

Вопрос 667. Что есть реченное, яко – блюди, да не восхитит тя помысл блудный?

Ответ. Сия вещь не в блуде случается точию, но и в других вещах. Сие же страждет ум от парения. И должен кто воззвати самаго себе, глаголя: Господи, прости мя, имене ради Твоего святаго, яко от моего нерадения постиже мя сие. Избави мя от парения и всякия сети вражия, яко Твоя есть слава вовеки. Аминь. Явление же восхищения да будет тебе сие. Аще беседует кто, а ум свой имать в парении, случается, яко о ином беседующу ему, восхищается ум его во ино, и се есть восхищение. И егда делает кто, аще воспарит умом от дела того, то обретается по забвению или потребляя дело тое, или излишно творя нечто от подобающаго: и сие паки восхищение есть. Тойжде образ и о помысле блуда есть. Случается бо, яко беседует кто с некиим, аще постигнет враг отвлещи ум от трезвения Божия, то обретает от парения в себе и похотение блуда, и сие восхищение есть. Не бо по предпоучению, или по воспоминанию бысть, но по забвению совосхитися. И таковый подобен есть человеку путешествующу, иже от некия случившияся ему туги, оставит правый путь свой и на ином обретается. Но подобает истрезвившуся воззвати себе по реченным и притещи к милости Божией: благоутробен бо есть, и приимет его, яко блуднаго онаго сына. Не не вемы бо, како благосердно приял есть. Егда же, и кроме парения, насеется сия брань в помысл, подобает трезвитися, и не усладитися и закоснети в нем, но скорее прибегнути ко Владыце Богу.

Вопрос 668. Аще ищет потреба побеседовати мне с женою, что сотворю? Или како употреблю беседы? Рцы ми, подобает ли виною благочестия или сострадания влагати себе в дело их?

Ответ. По всякому убо образу обретаем, яко не разумевающих в делах Божиих вредит беседа жен. Елико убо возможно, удаляйся, и да не вложиши себе в беседу жен; не пользует бо тя сие, аще и добры нравом суть. Но понеже мира не избыхом, и зовет нас иногда нужда в беседу сих о совещании, или о коей-либо вещи: да предустроим во уме образец сей: яко-же человек, приступаяй ко огню, сотворит своя потребы, внимает крепко, да не ожжется огнем тем, – тако и мы во всех делах к ним употребляем, аки ко огню приступающе, и да утвердим себе всяким образом во страсе Божии, да не когда аки непщующим нам от них прияти пользу, обрящется наша мнимая польза, тщета велия. Аще ли же отнюд Бога ради восхощем прейти, то чрез иное лице да сотворим сие, аще возможно есть. И ниже восприимем, якоже прилучися, взирати противу им, ниже зрения на ня да отрешим, ниже да закосним в беседе их. От сего бо рождается огнь похотения, но да потщимся вскоре избавитися от них, моляще Бога, да спасет нас в час оный нужный от сети диаволи, простертыя пред нами, и непрестанно да поминаем Его. Ибо сила Его велика есть покрыти немощь нашу, о Христе Иисусе, Господе нашем, Емуже слава вовеки. Аминь.