Текст книги "Аскетика. Том I"

552. Брат вопроси тогожде старца глаголя:

Понеже авва страждет отвещание за мя, како должен есмь вопрошати его о деле? Что повелеваеши, сотворю ли сию вещь?

Ответ. Да не глаголеши волю в вещи, но глаголи: что повелеваеши, да сотворю? Имеяй бо волю, и вопрошаяй о вещи, аще и повелено ему будет сотворити ю, сам носит беду свою: своею бо волею творит.

Вопрос 553. Что убо, яко имам убо волю, не вопросих же особно о вещи, но сам авва о себе повелел ми есть сотворити ю: не вменяется ли мне в волю?

Ответ. Рцы ему, яко имам волю в той вещи: что убо повелеваеши? И аще речет ти сотворити ю, то в воли его обретается. Аще ли же ино ти подаст дело, то с радостию сие приими.

Вопрос 554. Аще ли же не имам воли в нем, но непщуя угодити авве, реку ему о сем, ведый, яко любит быти тому: сиречь, аз по случаю повелен бых тое сотворити, и не совершися, и напомянух, да совершится; еда ли и сие безместно есть?

Ответ. Лучше есть еже пождати услышати от него. Аще же видиши его недоумевающася, кому повелети, и речеши ему, хотя ему угодити, то несть безместно. Аще ли же и ты повелен быв что сотворити, и не совершил еси е, то напомяни, яко не совершено есть, и до сего точию; и не обрящешися имый волю в вещи.

Вопрос 555. Понеже глаголет Писание: «аще взыдет на тя помысл владеющаго, места твоего не остави» (Еккл. 10, 4): что есть сие?

Ответ. Вместо сего, да не попустиши ему взыти на тя, ниже глаголи с ним, но прибегай к Богу. Аще бо хощеши дати ему ответ, обретаеши размышление о нем и воспящает тя от теплоты молитвы.

Вопрос 556. Брат вопроси тогожде старца: аще услышу о некоем, яко зле глаголет о мне, что сотворю?

Ответ. Абие востани, и сотвори молитву первее о оном, потом о себе, глаголя: Господи Иисусе Христе! Помилуй сего брата, и мене непотребнаго раба Твоего, и покрый нас от лукаваго молитвами святых Твоих. Аминь.

Вопрос 557. Аще кто положит начало оклеветати кого, и истрезвится: что должен есть сотворити?

Ответ. Аще начнет кто оклеветати, должен есть скоро пресещи и пременити слово оно на полезную беседу. И ниже в сей закоснети, да не како от многословия впадет во оклеветание.

Вопрос 558. Аще кто не оклеветает кого, сладце же слышит оклеветание, не осуждается ли от сего?

Ответ. И еже послушати сладце оклеветания, и то оклеветание есть, и тоежде вмать осуждение.

Вопрос 559. Уныние откуду бывает? И что подобает творити сему приходящу?

Ответ. Есть уныние естественно от безсилия, и есть уныние от беса. Аще убо хощеши искусити сия, тако искуси: бесовское приходит кому прежде еже требует покоя. Егда бо положит кто начало в делание, прежде неже сотворити треть, или четверть того, гонити человека оставити дело тое и востати. Не должен убо есть послушати, но сотворити молитву, и седети на деле, и претерпети. Видя же враг, яко сего ради творит молитву, престает. Ниже бо хощет дати вину молитвы. Естественное же уныние есть, егда трудится человек паче силы своея и понуждается еще более дела приложити: и тако устрояется естественное уныние, от безсилия телеснаго. Должно убо зде искусити силу и упоити тело по страху Божию.

Вопрос 560. Что убо, яко и самое то место, идеже бесовско уныние бывает, знойно есть весьма, и содействует унынию, и множае отягчает человека, и не может обоим сопротивитися? Убо не должен ли в час брани оттуду отступити?

Ответ. Добро убо есть еже подвизатися не отступити от места во время брани. Аще же видит, яко побеждается, отягчаемь от труда, да уступит. И облегчився от единыя тяжести, подвизается на самое уныние призывая имя Божие: и получит от Бога помощь. Еже бо уныния ради отходити, не сущей тяжести от места, множае отягощает, и множится паче брань: и бывает души твоей вред. Аще бо возобладает, то многим трудом отгонится от него, аще и молитвы о нем бывают.

Вопрос 561. Аще дремание от него приидет, и запинает предлежащему делу, убо должно ли есть стати? Или пребыти седя?

Ответ. Да станет, и да не престанет молитися Богу: и упраздняет тое Господь молитвою.

Вопрос 562. Егда найдет ми лукавый помысл, движется сердце мое с яростию нань, якоже и гласа употребити: случается же, егда и в присутствии некиих сие творю убо добре ли, или ни?

Ответ. Несть добре тако творити, да не будет обычай, и обрящется на вред человеком, и на соблазн зрящим. Подобает же не смущенне призывати имя Божие, и отгонится.

Вопрос 563. Брат изшед от общежития, и возвратився, яви томужде старцу, глаголя: понеже согреших, поруган быв от бесов, и от матере моея отлучихся и покрова вас отец моих: молю учинен быти с новоначальными, не приемшими образа.

Ответ. Ради сего, еже быти тебе на последнем месте, несть твое сего взыскати, но разсуждения есть аввы твоего: твое же есть, еже уготовити себе в послушание.

564. Прошение некоего от безмолвствующих отцев к томужде старцу.

Молю тя, отче, помолися о мне Господа ради, яко зело бедствую, и от лености моея, и от стужения вражия. Аще бо не Бог молитвами вашими подаст ми силу, и оному запретит, то не вем, приидет ли когда ладия моя во пристанище. Но якоже Моисей толик народ испроси не погибнути вовсе во гневе Божии, тако и ты, преподобне отче, испроси окаянную мою душу. Бог бо есть благий и любит, егда просят от Него святии спасения душ. И вам прилично есть таковое прошение. Моли же и господина авву, да не тако на нас смотрит, яко зело люблю его, но и требую от него утверждения.

Ответ. Аще о нас малейших написа любы твоя, яко не хощем кому погибнути, то что речеши клявшемся Собою: «яко живу Аз, глаголех Господь, яко не хощу смерти грешника, но яко, еже обратитися и живу быти ему» (Иез. 33, 11)? О Немже свидетельствует апостол, глаголя: «Иже хощет всем человеком спастися, и в разум истины приити» (1 Тим. 2, 4). Брате, да не обленишися приступити ко Иисусу, глаголя: Наставниче, спаси, погибаем (Мф. 8, 25). И увидиши, что творит на враги. Беседуй к Нему, глаголя: Господи, Боже мой! покажи еже от Тебя отмщение в них, яко к Тебе взях душу мою (Пс. 85, 4). А о еже претерпевати скорби и искушения, не требе писати тебе, ведущему, что глаголет апостол о сем и кий есть конец терпения. Да не стужаем си, брате возлюбленне! Ибо пекийся о нас Господь, велий есть еже помощи нам, дерзновенны бо нас творя, глаголаше: «Аз есмь, не бойтеся» (Мф. 14, 27), и паки: «Дерзайте, Аз победих мир» (Ин. 16, 33). Да не вознерадим убо припадати к Нему и молити Его благость. Той бо творит по преизбыточествию, ихже просим или разумеем. Помяни, яко идеже труд, тамо и мзда. И идеже искусство, искушения, тамо есть и венец победы. И идеже любовь к Богу, тамо и еже взыти с Ним на крест, за еже спострадати и спрославитися с Ним, за еже умрети купно и жити с Ним. Восходяй убо на крест, облегчися от земли; умре мирови, горняя убо должен есть мудрствовати, идеже Христос одесную Отца. О авве же: помолися, да покрыет его Господь, многи бо суть стужения. Но веруем, яко покрывает и помогает ему Господь. Рех же ему: яко зело закоснел еси. И отвеща, якоже и тебе известна сотвори. Молитвы же ради, вем яко ничтоже есмь, но и разрушити любовь не могу. Но и ты помолися о мне Господа ради.

565. Моление аввы общежития к томужде старцу.

Понеже время тяжко есть, помолися, отче, да Господь е пренесет, и да покровени будем раби твои от всякаго искушения грехов наших.

Ответ. Аще благо сотворим, то пренесет Бог тяжкое время; а аще ли же паки приложим злая, то соберем нам самем прежде времене погибель. Вы же аще пребудете во благом, то послет Бог Ангела своего, и назнаменует нас, яко грядущему и держащему меч, прейти нас молитвами святых. Аминь.

566. Моление иже во общежитии безмолвствующих отец к великому старцу, о мире.

Понеже бедствует мир, молим тя вси, помолися благости Божией, да отымет руку и возвратит во влагалище меч. Стани посреде падших и живых, со святым твоим фимиамом, и престати сотвори всегубителство, воздвигни святый олтарь, на гумне святем Орнине, и престанет гнев Божий. Ей молимся тебе и просим: ущедри мир погибающ. Помяни, яко уди твои есмы вси. Покажи и в настоящем милосердие твое и чудеса Божия, яко Тому есть слава вовеки. Аминь.

Ответ. Брате! во плачи есмь и рыдании, належащаго ради гнева. Ибо вся деем сопротивная. Рече бо: «аще не избудет правда ваша, паче книжник и фарисей, не внидете в Царствие Небесное» (Мф. 5, 20), и преизбысть законопреступление наше множае иноязычников. И суть мнози молящии человеколюбие Божие, престати гневу сему от мира, и никтоже есть человеколюбнее Бога, и не хощет помиловати. И сопротивляется множество бывающих в мире грехов. Суть же три мужи, совершении Богови, иже превзыдоша меру человечества, и прияша власть решити и вязати, и отпустити грехи, и держати. И стоят между пагубою, да невоедино потребит весь мир; и молитвами их, с милостию наказует. И речено бысть тем, яко на мало время пребудет гнев сей. С теми убо молитеся. Сретаются же молитвы сих триех, во входе горняго жертвенника Отца светов; и срадуются друг другу, и свеселятся в небесных. Егда же взирают на землю, то вкупе плачут, и сослезят, и срыдают за злая бывающая и подвижущая гнев. Суть же: Иоанн в Риме, и Илиа в Коринфе, и ин в епархии Иерусалимстей. И верую, яко совершают велию милость. Ей совершают. Аминь. Бог мой да укрепит вас услышати и понести сия; суть бо неразумевающим непостижна.

566. Прошение. Брат посла, прося инаго старца Иоанна, и глаголя: Господа ради, аще требуеши чесого, рцы ми, да подам ти.

Ответ. Брате, Бог да подаст тебе мзду благу за предложение. Обаче никогдаже требуя вещи, рех кому: даждь ми; но егда видит Бог, яко требую, и внушит кому, и принесет ми, приемлю. Понеже аще аз реку, то несть сие нужда, но пожелание.

565. Рече авва о томже старце:

Яко никогдаже не видех осклабляющася старца сего, или смущенна, ниже без слез приобщающася Святаго Причащения, со еже глаголати: Господи, да не в суд ми будут святая сия.

566. Случися некогда томужде старцу рещи нечто авве сотворити.

И отшед от него не далече, авва забы. И егда паки сниде к нему, егда хотяше отпустити и, рече ему: аще воспомниши, сотвори, аще что рех ти. И печален быв авва о забвении, проси прощения. И паки, изшед, забы. И по днех сниде к нему, и подобне, егда хотяше отыти, напомяну ему старец о вещи с кротостию; и зело возскорбе авва и глаголет ему старец: не скорби, но егда воспомниши, сотвори. И яко многажды сие случися, возвести авва великому старцу, просив уразумети, что есть сие? И рече ему старец: попущением Божиим сие бысть: да увидиши терпение и долготерпение старца и будеши того подражатель.

Повесть о авве Сериде

567. О авве Сериде многа имам рещи велия, и чудна и поведания достойна, многшая оставль сокращения ради слова, мало воспомяну, довольна представити мужа сего добродетель. Пребысть целомудр от юности своея, и воздержен зело паче всякаго иного. Тако удручив тело, яко люте уязвлено бяше. Аще же по сих святый старец, Богу помолився, и исцели его, заповедав ему в прочее с разсуждением тело управляти, да послужит духовней службе и понесет труды управления братии.

568. Послушание же велие стяжа, повинуяся во всяцей вещи томужде великому старцу, даже и до смерти. Отвергаяся бо своих волей (якоже сам старец свидетельствова о нем в преднаписанных ответех), совершен бысть послушник. Многа бо от него пострадав и биен быв, и многообразне искушен быв, и жестокими и многообразными делы, аки злато в горниле, обожжен быв, бысть сосуд честен, благопотребен Владыце. Ни в чесомже бо отнюд противорече когда, ниже, яко авву, себе вменяше, но яко ученика старца, и яко должен сый ему совершенное послушание. Еже бе знамение и крайняго его смиренномудрия. Сего ради искренняго сына имеяше его старец.

569. И помолися Богу даровати ему дарование разсуждения; еже стяжав, можаше, яже свыше благодатию, и души в живот путеводити, и оскорбленных врачевати, и врачбу исцелительну привносите, еже от Духа слово, и мир сварящимся подавати. Первее бо себе умиротворив, и инем мира бысть виновен. И на нем исполнися оно: «Блажени миротворцы, яко тии сынове Божии нарекутся» (Мф. 5, 6). Бе же долготерпелив, и безмятежен, и кроток к приходящим, и слово его весело с честностию и солию заслажденно. Имеяше бо по Писанию: мудрость и незлобие. Бе же и братии зело превожделенен, души их духовным учения словом увеселяя и побуждая на добродетель, добрым жития и добродетелнаго делания примером: онеми уча, яже деяше, и срастворяя со страхом по Богу кротость, и во время коеждо употребляя; обличая, запрещая, умоляя, по апостолову слову.

570. И якоже к нашей пользе нам исповеда: яко в случившейся ему великой немощи лютою и непрестанною одержимь огневицею, не молил есть Бога подати ему здравие, ниже облегчити его от болезни, но даровати ему терпение и благодарение.

571. Случися же некогда брату благоговейну и потребну, смутившуся по диавольску действу, восхотети отыти. И яко, мнаго поучив его, не убеди пребыти, ста на молитву, и сотвори поклон. И увидев его брат, воста и сам, и тожде сотвори. И обратився авва, назнамена сердце его, и глагола ему: брате, что хощеши ныне сотворити? И отвеща он с мирным устроением: что-либо ты хощеши.

572. Паки овогда нуждне тойжде авва потребу имеяше места, близ суща общежития, вины ради церкве и странноприимницы. И моляше владыку места того уступити по цене, и не послушаше. И стужаемь от братии, и приходящих мирских Христолюбец о куплении места онаго, и не терпя стужения, и недоумевая, что содеяти, возвести иному старцу. И рече ему старец: подобает месту оному всячески приити, но не у время есть. Аще ли оскорбит тя помысл, рцы ему: вознепщуй, ако путь той царский есть; не можем его купити, и тако почиеши. Елижды убо стужаемь бываше от сего помысла, противополагаше себе сия, и почиваше (успокоишься). По некоем же времени, увещася владыка того места уступити. Бе же на том месте монастырь мал, и брат живущ в нем во пришельствии. И поем авва особь брата онаго, вопроси его: не скорбит ли о куплении, известна сотворив его пред Богом, яко аще скорбит, то не купит места онаго, и оному с радостию согласившуся, произыде вещь та. Уведев же сие некий Христолюбец возлюблен сый общежитию, не зело назидательно непщеваше быти снисхождение аввы, рек, не разсудне его сотворша, яко предпочте единому человеку угождение паче толиких братий, требующих церкве, и зело скорбящих от еже сея не имети, и паче приходящих странных, не могущих получити послужения, за еже не обретати, где угоститися. И просив прощения, вопроси его, коею мыслию сие сотворил есть? Исповедав ему и свое оглаголание. Авва же осклабився, рече ему: чадо, не исках оскорбити брата, и вещь сию возвергох на Бога, испытовая посредством того волю Божию. И веровах, яко аще хощет Бог нам ныне прияти место оно, то Сам известна сотворит брата онаго не оскорбитися: аще ли же оскорбится, то явно будет, яко не у хощет (Бог) нам прияти место оно. И се Бог известна сотвори его, и с радостию согласися, и сотворися вещь сия с миром. И удивися он вере аввы, и известней (твердой) на Бога надежде, и сущей к ближнему любви и безпристрастию к вещем мира сего, не бо победило его убеждение и нужность потребы тоя, сотвори ему метание, просив прощения ог гресе, и зело пользовася, и славя Бога о добродетели отец тех, отыде.

Вопрос 576. Брат некий Христолюбив, многу имея веру к святым старцем, ко авве Варсануфию и авве Иоанну, и от них в житии наставитися хотя, посла вопрошая авву Иоанна, глаголя.

Понеже, отче, молюся щедротам Божиим, отыти на монашеское житие, и усумневаюся: аще должно мне отсюду абие отврещися и отыти, или первее сотворити устроение дел, и тако изыти, да обрящу в отхождении моем безпопечительство, и паче за попечение о моей бабе (бабушке) и детях, и о продаянии сел. Глаголет же ми помысл подати ей близ племянников ея, и дати им известная села, довольна суща к препитанию ея и домочадцев, и тако пребыти и пещися о продаянии инех сел. Рцы ми, что избрати лучше? И что должен есмь содеяти? Яко вам вся Бог открывает полезная.

Ответ. Прости мя, господине брате, яко человек есмь невежда, не очистивый десницу от шуйцы. Якоже убо, господине, Писание глаголет: «никтоже возложь руку свою на рало, и зря вспять, идет благоуправленне» (Лк. 9, 62). И помяни жену Логову. И паки: лев единем власом удерживается; и орел краем ногтя своего. Даждь убо бабе твоей место близ племянников ея, и присно имети будет безпопечительство, и разчти расходы ея и детей: и даждь им села, и присно подавати имут ей требование от прихода сел онех, имуще и вину надеятися наследити нечто от тех, по успении старицы, за упокоение, еже обретает от них. Вопроси же святаго старца, есть ли потреба остатися, и продати прочая села? И якоже речет ти, сотвори, и будеши без попечения о Господе. Не бо далече есть от нас: но видит, аще управлено есть сердце, и по произволению благоволит. Приемля убо заповедь от старца, со дерзновением неленостно приступи ко глаголемым от него. И по вере твоей Бог благоволит ти вскоре.

577. Вопрошение тогожде к великому старцу.

Вем, яко превышше мене есть cие, еже вопрошати твою святыню о помыслех; но услышав Божественный глас, глаголющ: «яко не требуют здравии врача, но болящии» (Лк. 5, 31), и видя себе содержима от множества злых моих деяний и помышлений, в пучину щедрот твоих себе ввергох, peкшаго ради: яко «живу Аз, глаголет Господь: яко не хощу смерти грешника, яко еже обратитися и живу быти ему» (Иез. 31, 11). Да тобою услышу и аз от Него: «чадо, оставляются греси твои мнози» (Мф. 9, 2). Вем и верую, яко дарова вам Бог, еже знати Духом Своим Святым, прежде неже просити ми вас, что есть, еже хощу, и о киих помыслех вопрошу. Но понеже слышах пророка глаголоща: «глаголи ты прежде согрешения твоя, да оправдишися» (Ис. 43, 26). Сего ради и аз, писанием назнаменуюся, прося не презрети моего окаянства, но прияти моление cие от мене грешнаго. Дана бо есть вам власть от Бога, еже изводити из тмы и cени смертныя, и наставляти ко свету истинному, яко благ есть. Что убо повелевает мне, сотворити? Оставити ли вся единою без попечения, или прежде сотворити распределиние, и тако отыти, да не когда oбрящу попечение оскорбляющее мя во отхождении моем, и смущенны помыслы преподающее ми, иже подавляют духовныя и добрыя плоды; и аще повелеваете еже распределити мне прежде, то повелите мне назнаменати, подобает ли что пещися о продаянии малых моих сел, и испросите мне от Бога помощь. Не яко дерзая на себе, яко могу сотворити повелеваемая от вас, вопрошаю, но имея надежду на молитвы ваша, во еже повелети и помощи. Аще бо воспросите Бога о мне, да благопоспешит мне Господь доброе и полезное, и подаст мне силу, во еже сохранити, не отринет прошения вашего, сие бо едино и дерзостно творит мою немощь.

Ответ. Чадо, яко злое время есть, явно. И могий бежати, спасается, яко-же Лот от Содома. Ибо мир сей во зле лежит (1 Ин. 5, 19), по писанному: и сущих в нем всячески, яко себе делает. Соплетающеся бо с земными, земни бывают: отвергающийся же сих, от земли взыдоша; убо яве есть, яко и небеснии бывают. И не разумеваем, окаяннии, яко, и нехотяще Бога ради отступити от сих, отступити имамы в час смерти и неволею. Чадо, повеление Божие есть, да абие отсечется человек от всех. Приступившему бо к нему человеку, просящу и глаголющу: «иду по Teбе, аможе аще идеши Господи: повели же мне прежде завещание сотворити в дому моем», рече: «никтоже возложь руку свою на рало, и обрящся вспять, управлен есть в Царствии Небеснем» (Лк. 9, 61–62). И паки иному рече: «остави мертвыя погребсти своя мертвецы» (Лк. 9, 60). «Иже любит отца или матерь паче Мене, несть Мене достоин» (Мф. 10, 37). Что же, яко и «свою душу, рече, возненавидети» (Ин. 12, 25)? И како возненавидит кто свою душу? Разве точию тем, еже отсещи свою волю во всех Господеви, глаголя: «не якоже аз хощу, но якоже Ты» (Мф. 26, 39). И аще всеконечне глаголеши cиe, то се воля Его есть, да оставим вся и да по Нем идем (Мф. 19, 27). Что убо, не оставим ли? Но понеже, за немощь нашу, не достигохом в cие поне положим долу выю нашу, познавающе немощь нашу, а останемся распределение сотворити. Да не возвелемудрствуем, яко добре творяще, но яко еще та, яже суть больных, творим. Отвергающиибося совершенно миpa, единою отрясают себе. Темже и ты, чадо, яко немощен, а не здрав совершенно, разположи прежде. Еже не продати убо, а упокоити старицу твою: инако обретеши себе сеть в вещех. Расположи убо яже о ней, по ответу брата Иоанна. А о продаянии села попечется Господь, и устроит житие твое, егда возвергнеши попечение нань. На всяк же день и нощь поминай, еже глаголати Ему: Владыко мой, поспеши мне путь сей по воли Твоей на доброе мне и полезное. Он бо паче всякаго человека весть, како извести нас со отрадою от темницы мрака, от сплетения, глаголю, вещей мира сего суетнаго. Да не разслабится убо сердце твое. Уповаю бо на Бога моего, яко на степени (на стопах) ног моих вижду тя плодоприносяща Богови.

578. Прошение тогожде к томужде великому старцу. Отче преподобне, благодарю Бога, яко не отвратил еси щедрот твоих от мене. Соверши убо милость свою с рабом твоим и помолися Владыце Богу о спасении души моея; и да избавлюся от страстей лукаваго забвения, и да обрящу милость рукама твоима святыма, и в сем веце и в будущем, и да в вашем покрове пребывая, изыду из тела. И просте, да буду раб твой вовеки, по единей благодати благаго твоего жительства наслаждаяся.

Ответ Варсануфия. Чадо, добре написал еси мне о забвении. Аще бо не бы забыл еси написанных тебе от мене, то уразумети имел бы еси от них, яко известно мне сотвори Владыка наш милостивый Оный и Провидец Господь, имети тя сына искренна, духовна. Тайны дерзнух тебе вверити, яже многим не дерзнух, знамением суть усыновления. Кому бо доверяет отец? Точию сыну. И сия постепенно, по его преспеянию, якоже может и носити и сохранити. И все моление мое о тебе есть ко Господу, и молитва моя да избавит тя от всех страстей безчестия, с нимиже вменяется и забвение; и да послет ти Духа научающа тебе о всех (Ин. 14, 26), и да не разлучишися от нас ни в нынешнем веце, ниже в будущем. Богови бо явно есть, яко водружена есть память о тебе в сердце моем; и верую, яко не будет тоя изглаждение во век. Веру ми ими, яко даровал есть уже мне душу твою Бог в живот вечный. Но вонми со утверждением, и да не паки забудеши сохранити несомненно имети память реченных; и да не вознерадиши. Мнози бо, по еже стяжати и запечатлети злато, вознерадеша, и запечатленно тое погубиша. Аще бо не удобрит человек, и не засеет землю свою к приятию дождя, то вси дожди, аще одождят, ничтоже пользуют к плодоношению. Блюди, да не разленишися, зря инаго носяща тяготу твою, и начнеши питатися пространно (1 Тим. 5, 6). Не бо рече: «много может молитва праведнаго поспешествуема», но многая, си есть многая от предлежащих. Сотвори силу твою: мнози бо беша со Иисусом, и отчуждишася от Него. И апостол глаголет: «Аще ли неверный отлучается, да разлучится» (2 Кор. 7, 15). Но да не попустит Бог, да cия на тебе исполнится, но да пребудеши сын искренний, вожделеннейший моих по Христе болезней, овча стада Христова, сосуд освящен (2 Тим. 2, 21), наследник славы; и по заповедем Христовым жительствуя, получиши вечную жизнь. Да не посрамиши моея старости. Бог бо весть, яко творю силу мою о спасении твоем, моляся Ему, да вовеки вчинит тя со Святыми Своими, снаследника будущих им благих: ихже око не виде, и ухо не слыша и на сердце человеку не взыдоша, яже уготова им Бог (1 Кор. 2, 9), в нихже да будет твоя часть и наследие во веки веков. Аминь. И да рекут вышния Силы, и иже долу еще в телеси святии: аминь, аминь, буди, буди. И да запечатлеет Отец, и Сын, и Святый Дух.

579. Повесть тогожде ко иному старцу.

По некoeм времени, хотя ко Богу отыти авва Серид, игумен общежития, постави преемников первых от братий своих, не да вси купно управляют: понеже cиe нестроения виновно было бы, но по чину, первый: и аще скончается той, то другий, и тако прочий по ряду. Написа же последи Христолюбиваго сего брата авву Елиана, яко и ему после всех быти наследником, аще будет инок. Сего же неведяще брат брат оный. Якоже убо по таковом завете преставися ко Господу авва, первый от братии, егоже чин призываше на управительство отречеся сего по многому смирению и мерности нравов, но и прочии по ряду тоежде сотвориша, оному ревнующе. Между же сим найде сему Христолюбивому брату (Елиану) печаль от диавола о скончании миpa и скорбех, аки бы имущих зде постигнути, и о вечных муках. И якоже отягощашеся от помыслов бедствуя во отчаяние впасти: посылает, вопрошая о сем авву Иоанна, и моля его помолитися о нем, и сказати ему слово утешения. Он же посла ему сей ответ: о послушании паче увещавающ. Имеяше бо ему поручити управление общежития, якоже по сих яве бысть.

Ответ Иоанна. Брате возлюбленный! Вера яже в Бога, есть, да аще кто издаст себе Богови, не ктому имать себе в своей власти, но под Его власть ввергает себе до последняго издыхания. Темже и что-либо аще приходит нань, со благодарением приемлет от Бога; и сие есть еже во всем благодарити (1 Сол. 5, 18). Аще бо человек отречется находящих ему от Бога, то преслушает Бога, ища свою волю поставити. Тако бо и иудее, ищуще свою волю поставити (Рим. 10, 3), не возмогоша покоритися закону Божию, ибо вера есть смирение; «ихже бо призва, сих и оправда, и прослави» (Рим. 8, 30). Прочее отвержи тую печаль, яже соделывает смерть. Печаль бо яже по Бозе спасение соделовает (2 Кор. 7, 10). Помолися о мне, и ни мало да уныеши, понеже прогневаеши Бога, держай свою волю. Господь наш Иисус Христос да даст тебе сотворити волю Его и обрести милость пред Ним. Емуже слава и держава вовеки. Аминь.

580. Сей ответ прием, брат свободися убо абие от стужающих ему помыслов; не разумеваше же силы написанных ему, и дивися, яко ино вопроси, и ино старец отвеща. Тогда явно сказа вещь ему старец, повелевая ему восприяти попечение общежития. Брат же удивися, яко сия о нем помысли, имея себе к сему недовольна; не смея же отнюд противорещи повелению его, отписа ему сия, глаголя:

Авво, больше не знаю; весть мя Дух Божий, живущий в вас, и пристращен есмь и трепетен за бедство (опасность) вещи. Аще веси, яко могу в сем обрести милость, имея ваше о Христе покровительство, не противоглаголю. Власть бо имате на мне, и в руках есмь Божиих и ваших.

Пишет убо старец ответ сей:

Господине брате, свидетель ми есть Бог, яко со искренностию люблю тебе, брата моего. И молитва моя есть, да не повредится душа твоя в ничесомже. И верую послушанию твоему, и пекийся о спасении твоем, пособих благому: тайная бо у человеков явна суть у Бога. И ты видиши, брате мой, яко дела многа суть и тяжка. И не неверуеши, яко что-либо ни есть во общежитии, даже до самыя персти, Божие есть. И совокупивый небесная с земными, вся освяти пришествием Своим. Прочее в тебе есть, еже пособити и злопострадати, да общник обрящешися душ спасающихся. Рече бо апостол: «друг друга тяготы носите, и тако исполните закон Христов» (Гал. 6, 2). И паки рече, яко «смиренными ведущеся» (Рим. 12, 16). И Господь рече: «слушаяй вас, Мене слушает: и отметаяйся вас, Мене отметается» (Лк. 10, 16). Сему делу Божию сущу, не можеши отрещися. Ибо аще есть что-либо человеческо, веси. В попечение тя привлекает по Богу, еже не есть попечение, но спасение души. Якоже глаголет Писание, яко «обращаяй грешника от заблуждения пути его, спасет душу от смерти, и покрыет множество грехов» (Иак. 5, 20). Мужайся о Господе и веруй Иисусови, и Той сохранит нас от лукаваго; якоже о апостолех Своих просил есть у Отца. Да не усумнишися убо, но излей сердце твое (Пс. 61, 9) к Богу, и ко Господу Иисусу Христу, и ко Духу истины, и в сем верую, яко обрящеши милость на судищи Божии. Благодать Господа нашего Иисуса Христа, и причастие Святаго Духа, да будет с нами. Аминь.

581. Сие услышав брат сказа старцеви: се раб ваш, буди мне по глаголу твоему. И повелением отцев, сподобися иноческаго образа. И бысть от всех прошение ко епископу, и рукоположен бысть во пресвитера, и тако произведен бысть во игумена обители тоя. И тогда сподобися во первых приити к самому авве Иоанну. И прият его старец, якоже и блаженнаго авву Серида: велико бо бяше старцево смирение. И глагола ему: помолися, авво! Он же стояше безгласен, не смея помолитися над ним. И егда повтори, то да не противоречет, помолися, и, повелен быв, седе. И глагола ему старец: брате, прежде многа времене предвозвести святый старец о тебе, яко имаши быти инок и игумен общежития. И се достиже (сбылось) по благословению Божию. Вонми убо себе, и да утвердится сердце твое во Господе, укрепляющем тя. Аминь.

579. Тойжде убо вопроси старца, глаголя:

Прости мя, отче, за дерзновение: и о нихже вопросити хощу, изъяви мне, чесого ради первии от братий, написаннии преемницы отрекошася управления монастырскаго? И почто послабисте им, ведуще их добродетель же и послушание: и яко чин их зваше, мне же недостойному и никоеже имущу монашескаго устроения дело, поручите таковое правление, онем паче подобающее?

Ответ. Братия отрекошася многаго ради смирения. Имуще бо власть управляти по Богу на основании завета аввы, не притекоша к сему, но возлюбиша паче послушание, и усердно избраша тебе на обличение взыскующих наследия и дара, и мирское имущих сребролюбия мудрование, и предпочитающих земная паче Царствия Небеснаго. Радующеся убо о их смирении, попустихом им отрещися: тебе же судихом восприяти, звания ради еже от Бога, строящаго вся на пользу коегождо, по Своему предуведению. Да не вознепщуеши убо, яко по преслушанию их сие бысть. Ибо и Моисей, повелен быв от Бога приятии управление людей, рече: «худогласен есмь, и косноязычен» (Исх. 4, 10). И прости ему Бог, яко cие рече, не пререкуя, но от многаго смирения. Cие и Иepeмиа пророк сотвори, глаголя: «Владыко Господи, се не вем глаголати, яко отрок есмь аз» (Иер. 1, 6) и не вменися ему в пререкание. Употреби cиe и сотник, рек Спасови: «несмь достоин, да под кров мой внидеши» (Мф. 8, 8); и удивления достойна обретеся вера его, сорастворена смирением. И да не речеши, почто убо Иисус Навин не отречеся старейшинства, и апостоли проповеди? Еда яко не имуще смирения? И кое большее смирения их обретается? Но и отрекшиися послушание имеяху и восприемлющии смирение. Не может бо едино от другаго разделитися; но вся бывают, да судьбы Божия, паче нас сущия, сбудутся. И да покажутся многообразне святых добродетели. Веруй убо, яко вся, яже от Бога суть, добре бывают, и ничтоже множае любопытствуй.

Господь да вразумит тя и просветит мысленныя очи твоя, молитвами святых. Аминь.