Текст книги "Аскетика. Том I"

Вопрос 17, тогожде к томужде великому старцу. Вем, отче, яко сия бывают ми за грехи моя: и яко безумен есмь и виновен зол. Приводяй же мя в сию скорбь есть авва, яко нерадит и презирает вещи, и потребляются виною его, и не терплю. Что же сотворю, яко отвещаваю противу помыслов, и не приемлю силы? И прости ми, яко единою возглаголах: второе же не приложу. Удивляюся же, како устуде оная теплота любве, юже имех ко братии, и молися о мне Господа ради.

Ответ. Брате, поминай, яко рече учеником Своим Господь, яко «аще ли и вы без разума есте» (Мф. 15, 16)? Писах ти глаголя: яко прилежно твори испытания с помыслы твоими. Аще бы потрудился еси еже испытатися опасно, то уразумети могл бы еси, яко силу, ихже ныне написал ми еси ты, прежде написах тебе аз, и не бы мне потреба была писати, но обаче приложу ти к повторенным вопрошением. Прежде же обличаю тя: рекл бо еси себе грешна, а делами не имаши себе тако. Имеяй бо яко грешен есть и виновен зол, вопреки не глаголет кому, не сварится, ни гневается на кого: но имать всех лучших себе и разумнших. И аще ругаяся глаголют тебе помыслы тако быти, како воздвигают сердце твое на лучших тебе? Внемли, брате: несть истина, еще бо не достигохом, имети себе грешных. Аще кто любит обличающаго его, премудр есть. Аще же кто любит и не творит, яже слышит от него, то сие паче ненависть есть. Аще грешен еси, почто укоряеши ближняго, и обвиняеши его, яко чрез него бывает тебе скорбь? Не веси ли, яко кийждо искушаемь бывает от своея совести, и то раждает ему скорбь? И сие есть, еже написах тебе о братии, яко да не покажут тебе (помыслы твои) велбудом быти комара, и прочая. Помолися же паче, да сопричастницы будете во страсе Божии. А яко рекл еси себе неразумна: да не поруган будеши, но испытан, и обрящеши, яко неси тако. Аще бо держиши тако, то ниже разгневатися должен еси, не могий разсудити, добре ли, или зле бысть вещь: безумный бо буй нарицаем бывает: а безумный и буй сказуется не слан: не сланый же како инех засладит и осолит? Виждь, брате, яко наругаеми, глаголем устами точию: а дела показуют иное. Егда отвещаваем к помыслом, не приемлем силы: понеже прежде приемлем еже осудити ближняго, и ослабевает наша сила духовная, и обвиняем брата нашего, сами виновни суще. Аще содержиши, яко милующа Бога есть все, и ниже хотяща, ниже текуща, то почто не разумеваеши и не любиши брата твоего совершенною любовию? Колицы бо хотяху нас старцев, и течаху, и не дано бысть тем: а сему седящу, посла нас к нему Бог, и чадо присное нам его сотвори: внутреннее бо произволение любит Бог. А еже рещи: единою глаголах, и прочая: аще имаши подвизатися стяжати, блажен еси: не всем бо дано есть. И о прочих помыслех: возложи на Бога всякий помысл, глаголя: Бог весть полезное: и почиеши. И помалу приидет тебе сила еже претерпети. И да не отнюд отсечеши возглаголати. Аще же и возглаголеши, и не будеши услышан, ниже обрящеши благодать в слове твоем, да не опечалишися: пользует бо тя паче. А о немже удивляешися: Совершенная любы есть непадателна, и стяжаваяй сию, пребывает в теплоте, возгораяся любовию ко Богу и ко ближнему. А о молениях, о нихже при конце написал еси, должен еси доволен быти речением оным, еже написах тебе: и яко нощь и день молюся о тебе непрестанно ко Богу. Излише убо и сие написал еси. Имаши убо от мене образ по Богу на многое время: пожди, и потерпи Господа, о Христе Иисусе Господе нашем: Тому слава вовеки. Аминь.

Ответ 18, тогожде великаго старца к томужде, вопросившу: откуду есть теплота и студеность, и жестосердие, и о телесной брани.

О теплоте и студености явно есть, яко Господь огнь именовася, согреваяй и разжизаяй сердца и утробы: аще тако, то и диавол студен есть, и от того вся студеность. Аще бо не тако было бы, како глаголет, яко «тогда изсякнет любы многих» (Мф. 24, 10–12)? Оно же: «тогда» что есть? Точию, во время соперника. Аще убо ощущаем студеность, призовем Бога: и пришед согреет наше сердце в совершенную любовь Свою, не точию к Нему, но и к ближнему. И от лица теплоты Его изгонится студеность доброненавистного. Аще бо изсушил есть источник слез от сердца твоего, то увлажнил есть подчревность твою: но учреди Господа в дому твоем, и изсушит сию, и источник слез очистит, к течению воды мысленныя. Хотяй приити во страх Божий, терпением приходит. Глаголет бо: «терпя потерпех Господа, и внят ми, и услыша молитву мою» и что? «и возведе мя от рова страстей, и от брения тины» (Пс. 39, 2–3). От таковаго же рова вменяется и жестосердие. Егоже убо желаеши, стяжи, и спасешися о Христе Иисусе Господе нашем.

Ответ 19, тогожде великаго старца, к томужде, вопросившу о долготерпении.

Рцы братови: написах ти о долготерпении, и ныне глаголю ти: рече Владыка наш Бог Своим учеником: «Се дах вам власть, наступати на змии, и на скорпии, и на всю силу вражию: и ничесоже вас вредит» (Лк. 10, 19). Буди убо якоже Иов, испивая наругание равно питию. Сия сотвори, и в сих поучайся выну.

Ответ 20, тогожде великаго старца к томужде, вопросившу: аще даде Господь власть наступати на змии и на скорпии, како убо смущаюся?

Кто прием власть, наступати на змии и на скорпии, вредится еще от них или обладаем бывает? Испытай убо сердце твое от всякия вещи, и аще может подвигнути сердце твое, ноне во мгновении, то уразумей, яко еще далече еси от еже прияти на сих власть. И да не вознерадиши о себе, да не когда предварит тя время оно: но кую либо аще увидиши вещь бываему (что глаголю о сущих мира сего? зане преходяща суть, но о страшных вещех) или на небеси, или на земли, предложи Бога и суд пред очима твоима, яко мало время имамы в мире пребыти, и упокой кротость в сердце твоем, поминая Овча и Агнца незлобиваго Христа, колика претерпе, неповинен сый, досаждения, биения, и прочая. Мы же, зане и повинни есмы, почто смущаемся на ближняго; ничтоже от него пострадавше? Помяни, яко «любы не превозносится, но долготерпит» (1 Кор. 13, 14), и прочая. И помолися достигнути во предлежащая тебе, да не вотще будет труд твой. Прилепися убо несумненно любящему нас Христу. Тому слава вовеки, аминь.

Ответ 21, тогожде великаго старца к томужде, помыслившу ни единомуже повелети что-либо, но себе определити явну вещь, сиречь, да о себе едином печется.

Брате, елико умножаю еже писати тебе, толико потщися уразумети пишемая тебя от мене, и да не разориши онех: глаголются бо с разумом и устроением души. Веси, брате, яко аще кто не претерпевает досаждений, не видит славы. И аще кто не отлагает желчи, не вкушает сладости. Вдался еси в среду братий и вещей, разжещися и искуситися: аще бо не огнем, то искушено не бывает злато. Отнюд ничтоже себе да уставиши: понеже во брань и попечения приходиши. Но яже прилична суть времени испытуя со страхом Божиим, и ничесоже отнюд по рвению: но творя по силе твоей чужд быти гнева, и образ бывая всем полезен, не судя кому, ниже осуждая, но яко братий присных вразумляя, и паче возлюби искушающия тя: и аз бо множицею любих искушающих мя. Аще бо разумеваем, то таковии приводят нас в предспеяние. Ничто же убо себе да уставиши. Буди послушлив и смирен, и на всяк день себе истязуй: ибо и пророк, назнаменуя оно, на всяк день глаголаше: «И рех, ныне начах» (Пс. 76, 11), и Моисей: «И ныне Израилю» (Втор. 4, 1). Toe убо, ныне, и ты держи. Аще же и бывает тебе нужда повелети кому, испытай помысл твой, не по смущению ли имать изыти. И аще не мнится тебе быти полезен, скрый его под языком, поминая абие рекшаго: «кая польза человеку, аще весь мир приобрящет, душу же свою отщетит» (Мф. 16, 26)? Сие же уразумей, брате мой, яко всяк помысл не имущ предварительне тишины смирения, несть по Богу, но яве от шуих есть. Господь бо наш с тихостию приходит: вся же соперникова со смущением и мятежем. Аще и мнятся облещися во одежду овчу, но зане суть внутрь волцы хищницы, от смущения их являются. Глаголет бо: «от плод их познаете их» (Мф. 7, 15–16). Да даст нам всем Бог разумети, еже не заблудити в правдах их: вся бо ему суть нага и объявлена. Ты убо, возлюбленне, все благопоспешествуемо в руках твоих сотвори, предложив страх Божий пред очима твоима, и благодаря Ему. Того бо есть слава, и честь, и держава, и власть вовеки, аминь.

Ответ 22, тогожде великаго старца к томужде, утешение имущ, и воззывающ его в духовное веселие, от различно случившияся ему печали.

Напиши братови Иоанну приветствие духовно, веселящо сердце его во Христе Иисусе Господе нашем: и рцы ему: понеже якоже желает елень на источники водныя, сице желаеши нас, но не якоже мы тебе: тако не покрывая, якоже рече божественнейший апостол Павел: написах вашей любви сия от мене реченная, паче же от Бога. О да плодопринесет лоза твоя грозд топчемый и творящий вино духовно, веселящо душу оскорбленну. И да угобзит нива твоя доброе семя, яко посеянное на добрей земли, и сотворшее на сто, и на шестдесят, и на тридесять. И да разжется духовный огнь в сердце твоем выну, егоже рече Владыка Христос: «огнь приидох воврещи на землю» (Лк. 12, 49). И да водворится мир Господень в сердце твоем, по апостольскому словеси. И да возвысится твой финикс в своих белостех, по Давиду глаголющу: праведник яко финикс процветет. И да очистишися от гнева и ярости, лютых сих страстей, якоже совершеннии святии, у нихже отнюд не является сих движение, ниже во мгновении. Да сподобит же Господь душу твою водворитися в незлобии и кротости: якоже быти тебе питомцу Христову, и овчати незлобиву. Да постигнеши же следы наши, якоже следогонитель разумен. Да постигнеши же правила нашего, яко наследник добрый моих дарований. Да видят же очи твои Бога, яко чист сердцем. Буди же долготерпелив в скорбех, яко достигнув во Владычное завещание глаголюще: «в мире скорбь имети будете, но дерзайте, яко Аз победих мир» (Ин. 16, 33). Да достигнеши же непобедимыя любве, вводящия стяжавшия ту в царския дворы, и братиею Христовою сотворшия. Аще убо страждеши со Христом, да прославишися с Ним: аще умираеши с Ним, да воскреснеши с Ним: то да не вознерадиши о предлежащем пред тобою сокровищи: еще бо не постигл еси силы его, что есть. Егда же достигнеши совершеннаго безмолвия, тогда познаеши е, и удивишися дару Христову, коль неизследовани путие Его. Сих бо, с человеки сый, не можеши постигнути: но егда сядеши без попечения, якоже и мы, тогда уразумееши реченная. Молюся бо Богови день и нощь, да идеже есмы единодушно, с нами будеши в радости святых неизглаголанней, и во свете вечнем: яко да обрящеши часть твою во обетовании обетованием святым: идеже око не виде, и ухо не слыша, ни на сердце человеку взыдоша, яже уготова Бог любящим Его. Здравствуй о Господе, радуйся, аминь.

Вопрос 23, тогожде к томужде великому старцу. Молю тя, отче и учителю, не прогневатися на мя о нихже: погрешаю: и дати мне правило, како подобает пребывати во псалмопении, и посте, и молитве, и подобает ли различие имети дней.

Ответ. Брате, аще бы внял еси словесем прошений твоих, то уразумети могл бы еси разума силу. Имея мя отца и учителя, почто и гневлива? Отец бо щедр есть, не имый отнюд гнева: и учитель долготерпелив есть, и чужд гнева. О правиле же, о немже вопросил еси: многими ветвицами умножаеши внити узкими враты в живот вечный. Се вкратце глаголет ти Христос, како подобает внити. Остави человеческая правила, и услыши глаголющаго: «претерпевый до конца, той спасен будет» (Мф. 10, 22). Аще убо не имать человек терпения, не внидет в живот. Да не восхощеши убо устава, не хощу бо тя под законом быти, но под благодатию. Глаголет бо: «праведнику закон не лежит» (1 Тим. 1, 9). Хощем же тя быти с праведными. Разсуждение держи, якоже кормчий, прямо ветром ладию управляяй. И егда немоществуеши, по тому твори во всех, яже написах ти. И егда здраствуеши, такожде. Понеже и егда немоществует тело, то не по обычаю приемлет пищу, убо не действенно есть и в сем правило. И о днех: имей сия равны, святы и добры. Вся убо разумно содевай, и сбудутся тебе в живот вечный о Христе Иисусе, Господе нашем, Емуже слава вовеки, аминь.

Вопрос 24. Сумнению бывшу между аввою и тем о писании, и коемуждо их подвизающуся долготерпети, посла им старец ответ сей, являя: яко не бе чисто смятения долготерпение их: да всегда трезвятся к совершенной несмущенности.

Чадо возлюбленне, да не вознепщуеши, яко от себе познаете вчерашнюю главу ону в послании к Солуняном Павла апостола. Но аз ведый суетное терпения нашего, яко сие со гневом смешено есть, помолихся о вас Богови, яко да уразумеете тую главу, в той бо лежит вся сила посланий оных, написанных от мене тобою братови Иоанну. Не точию же, но внемлите и главам, яже имате днесь прочести, глаголю же апостола Павла, и святаго Евангелия: яко ону имут силу. И прочтите сия трижды, разсуждающе силу словес, пользы ради души: много бо терплю и пекуся о вас по Богу. Спотрудитеся убо ми, и сподвизайтеся отсещи от вас гнев и ярость: подвига бо потреба, спомогающу Богу. Суть же главы сия: от перваго к

Солуняном, от места: «молим вы братие, знайте труждающихся у вас, и настоятелей ваших о Господе» (1 Сол. 5, 12), до конца послания. Якоже и от перваго к Коринфяном послания, от сего места: «О духовных же, братие, не хощу вас неведети: весте, яко егда неверии бесте» (1 Кор. 12, 1), даже до сего: «но в церкви хощу пять словес умом моим глаголати, да и ины ползую, нежели тмы словес языком» (1 Кор. 14, 19). От Матфея Евангелия, от сего места: «Изшед Иисус в виде мног народ, и милосердова о них, и исцели недужныя их» (Мф. 14, 14), даже до сего: «сущии же в корабли, пришедше поклонишася Ему глаголюще: воистинну Божий Сын еси» (Мф. 14, 33).

Ответ 25, тогожде великаго старца к томужде, и ко авве хотящу единою приутвердити правило на братию.

И тебе глаголю чадо, и братови: преднаписано бысть вам о долготерпении. И ныне глаголю: мелзи млеко, и будет масло: аще ли стиснеши руку на сосце, изыдет кровь.

И паки святый Павел глаголет: «бых иудеем яко иудей, да иудеи приобрящу» (1 Кор. 9, 20), и прочая. Послежде глаголет: «всем бых вся, да всяко некия спасу» (1 Кор. 9, 22). Аще бо кто хощет загнути древо, по примеру обруча, или лозу виноградную, по восхождению загибает, и не преломляется. Аще ли единою потягнет крепко, абие преломляется вещь. Разумей глаголемое.

Ответ 26, тогожде великаго старца к томужде, изъявившу некая, о нихже ему заповеда никомуже рещи, и сего ради впадшу во искушение, и о совершенном долготерпении.

Рцы братови: писано есть: «аще кто Духа Божия не имать, сей несть Его» (Рим. 8, 9). Внемли, откуду ти прииде распря тесноты скорби помыслов сих, аще не от бывшаго предательства, преступления заповеди моея. Множицею бо заповедах ти, никомуже глаголати тайну, и разгласил еси сию многим. Еда ли аз есмь Христос, яко егда заповеда никомуже рещи, тогда народом и всем паче пронесоша слово? Но обаче: еже не уязвити помысл ближняго, сей есть путь Христа, со многою кротостию и тихостию пришедшаго на спасение человеков. Аще бо не будет аки крупица человек, жити с человеки не может. Виждь же, яко рече Христос учеником Своим: «не вы Мене избрасте, но Аз избрах вас» (Ин. 15, 16). Аще убо закон любве твоея к нам от Бога, а не от человек есть, потрудися великое терпение стяжати. Написашася бо тебе и прежде писанная: «в терпении вашем стяжите души ваша» (Лк. 21, 19). Положи убо начало паки во блюдение и хранение глаголемых тебе от мене: несть бо времени еже явити ныне. Благодушествуй убо о Господе.

Ответ 27, тогожде великаго старца к томужде, скорбящу, яко закосне написати ему, и от сего непщующу, яко изъят и от памяти своея.

Напиши по времени братови, прежде радость и веселие, и целование о Господе, и рцы ему: да не вознепщуеши, любимич мой, яко в забвение предах твою память от сердца моего, и в отлагание писати тебе: но внимая твоему обращению, долготерпех до ныне. Сие же известно ти буди, яко, якоже не забывает Бог наш миловати мир, ниже аз любовь твою, моляся нощь и день Богови о спасении души твоея, яко да достигнеши в меры, яже преднаписах тебе, и сие уразумей, яко, егда идеши на послужение общежитию, всячески идет с тобою и сердце мое, соблаговолящу Богу. Не пренемогай убо ни в чем, брате мой: надеюся бо, яко постигнут тя вся, яже написах ти. Не ложен бо есть Бог, глаголяй: «претерпевый до конца, той спасен будет» (Мф. 10, 22). Помысли, что рех, и что уготовано есть тебе. Многими бо скорбми подобает нам внити в Царствие Небесное, радуйся убо о Господе, и паки глаголю: радуйся. Никтоже убо да весть тайну сию: писано бо есть: «и явишася им яко лжа глаголы сия» (Лк. 24, 11). Аще бо не имать кто сердца тверда, понести не может.

Ответ 28. Тойже помысли определити себе, еже не изыти в посты никаможе: и возбранил есть ему старец сие: яко да не скорбит, аки преступаяй предел, аще некая по Богу потреба понудит его изыти.

Рцы братови: не слышал ли еси от мене, яко где-либо отыдеши, и что-либо сотвориши по Богу, сердце мое с тобою идет? И ныне, брате, якоже прежде слышал еси, ничтоже себе да определиши: по нужде бываемой, аще изыдеши, не обрящеши скорби помыслу. Уразумей убо силу пишемых тебе от мене: и тако сотвори, и почиеши. Мир буди ти от мене, паче же от Бога.

Ответ 29, тогожде великаго старца к томужде, утверждающ веру его в тая, яже обещана быша ему: и от таковаго извещения к большему его ведущ усердно.

Рцы братови: покой, и всяко даяние благо, и всяко дарование Божественно, верою приходит человеку. Да не будеши убо не ощущая по всяк день имущую находити на тя силу от Бога, моим смирением: и увеждь, яко не мало удивися пришествие твое к нам. Тецы убо на предлежащая тебе, да постигнеши, и поминай выну, откуду избавил тя есть Бог, и воздавай Ему благодарение за вся, моляся, да исполнит с тобою милость Свою до конца, аминь.

Ответ 30, тогожде великаго старца к томужде, вопросившу, должен ли есть плыти вкупе со братиею рукоделия ради во Египет: бояшебося, яко и сам и братия не искусни бяху моря и мест оных.

Рцы братови: елико вне еси, потрудитися имаши Бога ради с братиею. Представи убо скорби апостола пред очима твоима; претерпевый бо до конца той спасется, и о Христе Иисусе Господь нашем. Аминь.

Ответ 31. Много скитавшимся им во Египте, прежде даже обрести рукоделие, и многу различно подъемшим скорбь и расстройство, и отсюду пренемоганию ему случившуся: предуведев старец сия духом, предуготовляет ему ответ, сущ тако:

Напиши, чадо, глаголемая от мене, паче же от Бога: и уготови сия братови Иоанну: прежде целование о Господе: посем рцы ему: яко пренемогаеши в скорбех, аки человек плотский, не услышав, яко предлежат тебе скорби, якоже и Дух рече Павлови: и прочее моляше сущих с ним в корабли радоватися. Не веси ли, яко многи суть скорби праведным, и в тех искушаеми бывают, якоже во огни злато. Аще убо праведни есмы, искусимся в скорбех. Аще ли же напротив грешни, то яко достойни тех, претерпим: терпение бо искусство соделовает. Приимем во ум всех святых бывших от начала, и смотрим, что претерпеша, и благотворяще, и благоглаголюще, и всею истинною стояще: ненавидима и оскорбляеми бяху от человек, даже и до кончины их: и моляхуся за врагов, и творящих им напасть, по гласу Спасителеву. Еда убо и ты, якоже целомудренный Иосиф, продан был еси? И руце твои в коши поработаете ли? И во два рова сшел ли еси? Или, якоже Моисей, из детска и до старости озлоблен был еси? Что претерпел еси лениве? Или, якоже Давид, гоним от Саула, и своего сына? Плакался ли еси за них умерших? Или, якоже Иона, ввержен был еси в море? Забытливе и любимиче, почто разслабляется помысл твой? Да не устрашишися, ни да убоишися, аки не мужествен: да не когда лишишися Божиих обетований. Да не ужаснешися, аки не верен: но дерзновенны сотвори маловерныя твоя помыслы. Возлюби скорби во всех: яко да будеши сын искусен святых. Поминай терпение Иовле, и прочиих, и поревнуй приити в стопы их. Поминай беды, яже претерпе Павел, и скорби, и узы, и глади, и инех зол множества, и рцы малодушию: чуждь тебе есмь. Поминай написавша тебе: успеет ли вещь пред тобою, или ни, благодари Богови. Помысли вещи, яко тленны и преходящия суть: терпение же по Богу, спасает стяжавшаго и. Се подвизаешися еже принести рукоделие, и соделати. Да покажу убо тебе апостольское слово: яко ни хотящаго, ни текущаго, но милующаго Бога. Се посылает нам Бог человеки, имущия потребу мира, ихже приемше, да не речете, яко возглаголах ради их что-либо: да не како приимут тщеславие. Возлюбите их, яко братию искреннюю. И сотворите помысл ваш, упокоити помысл их. Мир бо презирают, спасти души своя хотяще: и Бог мною (по предуведению пишу) ведет их зде к вам: да уразумеете, яко зело презреша. Ты убо, брате, держимь моею рукою, ходи узким и прискорбным путем, вводящим в живот вечный, о Христе Иисусе Господе нашем, Емуже слава вовеки. Аминь.

Ответ 32, тогожде великаго старца томужде, вопросившу, должно ли самому о себе ясти? и подобает ли среду и пяток не сходити ко Cвятому Причащению, и лет ли ему отступити от дел попечения? И аще случится ему, внегда безмолвствовати, изнемощи: лепо ли есть употребити врачевания некоего, и молившу, да подаст ему заповеди во спасение.

Не хощу любви твоей не ведети о бываемом с тобою благодеянии от человеколюбиваго Бога. Ибо се болезни оныя достигоша, и нача Иисус творити с тобою, и вводити тя по чину, во благословенное Того безмолвие, и в непостыдное терпение. Аще убо и безсилие, или ина немощь привоспоследует тебе, всю надежду твою возложи на твоего Владыку, и почиеши: ибо уповаю на Бога моего, яко не далече еси пути Божия. А о еже самому о себе ясти в келлии твоей, уне ти есть и полезно. Вине же бывшей, еже и со братиею ясти, да не усумнишися, ниже да вознегодуеши: и по малу востягни себе. Причащения же, елико входиши и исходиши, да не возбраниши, соблазн бо имать для иных вещь сия. И вонми, како твориши седение твое, со смирением ли и страхом Божиим и любовию ко всем нелицемерне? И зиждеши храмину твою на твердем и недвижимем камени. Глаголет бо: «камень же есть Христос» (1 Кор. 10, 4). О инех же заповедех некиих уже несть потреба: доволно написашася ти от мене: имут бо довольную силу произвести от человека новоначална в совершенна. Поучайся в тех, и поминай, и не забуди. Целое бо имут книгохранилище. Здравствуй о Господе, выну смиренномудрствуя в словесех, делех, и движениих.

Ответ 33, тогожде великаго старца к томужде, егда иже по плоти его брат, разсмотряя в монашеское житие от^1ти, вопроси через него старца о сем.

Рече Господь наш Иисус Христос: никтоже может прийти ко Мне, аще не Отец небесный привлечет его, и Аз воскрешу его в последний день (Ин. 6, 44) и явлюся ему Сам (Ин. 14, 20). Видите яко нивы плавы суть ко жатве уже и жняй мзду приемлет, и собирает плоды в живот вечный: да жняй радуется и сеяй (Ин. 4, 35–37). О сем бо слово есть истинное, яко ин есть сеяй, и ин есть жняй. Брате, никтоже хотя внити во град, лежит; и никтоже хотя соделати, зря солнце, ленится. И никтоже хотя украсити ниву свою, нерадит. Но хотяй во град внити, ускорит прежде неже обвечерети. И зряй солнце, изыдет на делание с бодростию, да не како возбранен будет. И хотяй поле свое удобрити, потщится прежде неже растлитися ему от ржи. Имеяй уши слышати, да слышит (Мф. 13, 9).

Ответ 34. Паки второе пришедшу брату его к нему, скорбяше о спасении его: и напоминаше ему о первшем его обещании. Той же попросил есть, да знамение ему дано будет о сем от старца, и старец явил есть сия:

О брате же твоем, о немже рекл еси, неверие брань творит с ним: и сия есть фарисейская ересь: к нимже рече Господь, яко «род сей знамения ищет, и знамение не дастся ему» (Мф. 12, 39): не могу рещи ему, но якоже рече апостол: «древняя мимоидоша, се быша вся нова» (2 Кор. 5, 17). И оно: «ныне, Израилю» (Втор. 4, 1), и оно: «не искусиши Господа Бога твоего» (Мф. 4, 7), и оно: «днесь аще глас Его услышите, не ожесточите сердец ваших» (Евр. 3, 7–8). «Имеяй уши слышати да слышит» (Лк. 14, 35). Помолися о мне.

Ответ 35, тогожде великаго старца к томужде, вопросившу о братиях немоществующих телом, и о инех немоществующих помыслом: должен ли есть тех близ себе прияти? и подобает ли рещи авве облегчити мало новоначалных от бдения? и о многовременном его молчании.

Брате, ответ онем трием помыслом, един есть: да не понудиши произволения: но на уповании сей. Ибо Господь наш ни когдаже понудил есть кого: но благовестил есть, и аще кто хотяше, то послушал есть. Вем, яко веси, яко не пренебрегаю, ниже презираю любовь твою: но долготерпение к пользе бывает. Ибо егда молимся, и долготерпит Бог еже услышити, к пользе творит: яко да научимся долготерпению, и да не унываем, глаголюще: яко молихомся, и не услышани быхом. Бог бо весть, что есть полезно человеку. Радуйся о Господе, брате мой, и буди без попечения от всего, и помолися о мне, любимиче мой единодушие.

Ответ 36, тогожде великаго старца к томужде, попущающ ему начати безмолвие со всяким безпопечением. И на помысл нашедший нань, яко последнее время есть, и яко беседовав с неким от отец на мног час, помышляше: добре ли убо сотвори, или ни?

Брате, услыши от мене любящаго тя о Христе Иисусе. О келлии убо рече Господь наш Иисус Христос: «грядет час, и ныне есть, егда мертвии услышат глас Сына Божия и услышавше оживут. Якоже бо Отец имать живот в Себе, тако даде и Сынови живот имети в Себе» (Ин. 5, 25–26). И аз ти глаголю: время оно еже внити тебе со Богом, прииде: устрой себе новую келлию и вниди, имея Бога путеводителя. И егда сядеши, да непопечешися о чем-либо: ибо потреба вещей, и искус зовет сам себе. О всеянном же помысле: празден есть, привносящ тщеславие. Кто бо не позна, яко в последнем времени есмы? О беседе же, егда видиши себе мало не богословяща, разумей яко молчание дивнее и славнее есть тоя. Лишше убо что-либо несть ти нужно, да напишу. От алфа бо до омега тебе написах, якоже весть любы твоя. Предаю же тебе Богови. Того бо есть помощь и милость, аминь.

37. Мирянин некий христолюбив посла вопрошая тогожде авву Иоанна о вещи, и даде тому ответ. И раскаявся, сказа томужде великому старцу, глаголя: прости мне, яко упиваюся, и не вем, что творю.

Множицею тебе глаголю: остави мертвыя погребсти своя мертвецы (Лк. 9, 60), и паче: еще ли не гнушаешися зловонием их? Виждь, что глаголеши: не бо веси, что глаголеши: упиваяйся бо поругаемь бывает от человек, бием, презираем, не считает себе, не подает разумений, не учит иных, не советует о некиих, не разсуждает, яко сие добро есть, или сие зло. Аще устами глаголеши, а ина показуеши делами, в неразумии глаголеши. Да не когда внезапу приидет во уши твои: се жених, изыдите в сретение Его (Мф. 25, 6). И како речеши тогда: не досужно ми есть? Сотворил тя есть без попечения, и не хощеши того? Взял есть твое попечение, и сам ли себе оплетаеши? Упокой тя, и хощеши ли трудитися? Не ждет тебе время, еже рыдати и плакатися грехов твоих. Поминай, яко рече то о дверех, яко затворяются: ускори, да не вне пребудеши с юродивыми девами. Прейди помыслом от суетнаго мира сего, во ин век. Остави земная, и взыщи небесных: остави тленная, и обрящеши нетленная. Бегай мыслию привременных, и приступиши в вечная. Умри совершенно, да поживеши совершенно о Христе Иисусе Господе нашем, Емуже слава во веки веков, аминь.

Ответ 38, тогожде великаго старца к томужде, желающу часто приимати от него ответ, в помощь и спасение души, и ищущу уразумети, подобает ли беседовати с кем от братий, или о помысле от них вопрошаему быти?

Понеже вем, кому предах тя, и якову пищу предложих ти, аще разумевши, неучащаю писати тебе. Емуже бо предах тя, и прежде прошения у Него, весть, ихже требуеши (Мф. 6, 8). Слышав убо сия, без попечения буди. Еже бо без попечения быти от всякия вещи, творит тя приближатися ко граду оному, и еже не считатися с человеки, творит тя вселитися во град он, и еже умрети от всякаго человека, творит тя наследити град он и сокровища. И понеже многажды присно хощеши тоежде слово слышати о беседе, или о помысле братий, нужде бываемой, аз ти реку, что сотворити: ты прочее ни о чесомже да попечешися, точию еже совершити путешествие свое. Целую любовь твою непрестанно, и от еже угашену быти по малу от тебе движение лютейшаго гнева, возможно есть тебе уразумети. Мир ти буди, брате мой и любимиче Иоанне.

Ответ 39, тогожде великаго старца к томужде, восхотевшу пресещи беседу и своего служителя, за реченное ему: яко еже без попечения быти, творит тя приближитися ко граду оному, и на тойжде помысл взыскующу вины различно востающих нань искушений.

Рцы братови: пожди еще мало, ибо несть время. Ибо аз пекуся о тебе множае тебе: паче же Бог. Брате Иоанне: да не убоишися ничесого от востающих искушений, ко искусу твоему: не предаст бо тя Бог. Егда убо приидет ти что-либо таково, да не трудишися испытовати вещи, но призывай имя Иисуса, глаголя: Иисусе, помози ми, и услышит. Близ бо есть призывающим Его (Пс. 144, 12). Да не возмалодушествуеши, но тецы усердно, и постигнеши о Христе Иисусе Господе нашем, Емуже слава вовеки, аминь.

Вопрос 40, тогожде к томужде великому старцу, должен ли есть научити своего служителя пленицам? и о некоем брате вопросившем о своих помыслех, не ясне, но в гаданиих, добре ли сотворил есть.

Светлейшо учение Спасителя нашего, сие есть: да будет воля Твоя (Мф. 6, 10). Аще убо глаголет кто молитву сию с чистотою, то собственную волю свою оставляет, и вся на волю Божию возвергает. Темже научити брата, полезно убо: имать же вещь сия зависть. Но может сие быти редко единою, единою, и покрыется вещь совести ради братии. О вопросе же бывшем через гадания, самоумышление есть, не имущо разсуждения, и требует таковый многих молитв: знамения бо не бывают верным, но неверным.

Ответ 41, тогожде великаго старца к томужде, во многи впадшу помыслы и попечения о состоянии монастыря.

Многа суть источающаяся в сердце твоем. И глаголет: изочту их, и паче песка умножатся (Пс. 138, 18). Брате, никтоже весть, камо имать место сие прийти, разве сердцеведец Бог един. И мене известна сотворил есть. Держи убо, яко не оставит его Господь: но сохранить е и прославит, во славу имене славы Своея. Тому слава вовеки, аминь.

Ответ 42, тогожде великаго старца к томужде, вопросившу о случившейся ему немощи, откуду есть, и подобает ли рещи отходящим братиям во Египет, како пребывати, и пещися яже о них, да не како скорбети будут, за неискусство их к местом онем.

Рцы брату: смешаны суть у тебе египтяне и иерусалимляне: но да не печешися: Бог бо печется о тебе. Помышление же твое сотвори со страхом Божиим, и не тужи по братии; но точию помолися, и наставит их Господь по воле своей о всякой вещи. Ибо кроме Бога ничтоже бывает: наипаче на месте сем. Аще бо со страхом Божиим, ко упокоению есть и пользе душ.