Текст книги "Аскетика. Том I"

Ответ 205, тогожде великаго старца к томужде, просившу, иже от Бога разума. И о техжде.

Брате Андрее, рече Владыка наш Христос Марфе: «Аще веруеши, узриши славу Божию» (Ин. 11, 40). И ты убо веруй, и увидиши Лазаря воскресша из мертвых, и обедующа со Иисусом. И увидиши Марию, седящую при святую ногу Его, освобождшуюся попечения Марфинаго: и веруй, яко всячески будут ти, яже аз недостойный просих Бога, еже подати любви твоей. Ничесого убо истязует от тебе Бог, точию терпения и благодарения: и отверзет ти сокровища, сущия в Нем премудрости и разума. Целую тя о Господе, о Немже здрав буди душею и телом, и помолися о мне.

Ответ 206, тогожде великаго старца к томужде.

Брате Андрее и любимиче, послушай! Приемлющий новыя златницы от царя, аще со тщанием и прилежанием сохранят, то светлы пребывают и чисты: аще ли же вознерадят, то не точию яко ржавеют, но негли и погибают. Сего ради некий мудрец рече: сребро твое завяжи. Аз же ти не точию завязати глаголю верою не сумненною, но и запечатати смирением и долготерпением терпения, имже спасается терпяй. Дерзостне глаголю, допущающу ми Богу. Глаголет ти мною худейшим Великий Ходатай Иисус, Сын благословеннаго Отца, Податель Святаго Духа: оставляются ти греси твои мнози, бывшии от рождества твоего до ныне. Прием убо радость сию велию и неизглаголанную возлюби Его всею силою, показуя плод, достоин покаяния, вопия со святым Павлом, сладкопения она: «кто ны разлучит от любве Христовы; скорбь ли, или теснота, или гонение, или глад, или нагота, или беда, или страх, или меч» (Рим. 8, 35). Глаголя Ему: «Яко тебе ради умерщвляеми есмы весь день: вменихомся якоже овцы заколения. Но во всех сих препобеждаем за возлюблшаго ны. Известихся бо, яко ни смерть, ни живот, ни Ангелы, ни начала, ни власти, ни настоящая, ни грядущая, ниже силы, ни высота, ни глубина, ни ина тварь кая возможет нас разлучити от любве Божия, яже о Христе Иисусе Господе нашем» (Рим. 8, 36–39). Сия да не точно усты явиши поучаяся, но делы. Глаголет бо: «В терпении вашем стяжите души ваша» (Лк. 21, 19). Великаго достоинства был еси, великая и достойная дела покажи терпения и благодарения, имиже есть чаяние совершенства, егоже да будем достойни о имени Отца, и Сына, и Святаго Духа, аминь. Размягчивай сия часто, и действительно, и вкушай их сладости, како благоухание дают души твоей, и могущих прилучитися. Мужайся о Господе, и крепися о благоговейнейше!

Ответ 207, тогожде великаго старца к томужде.

Брате Андрее, рече Господь: яко «Илия уже прииде» (Мф. 17, 12), и аз ти глаголю, яко мысленный твой Лазарь уже воскресе, и разрешен есть от уз, и исполнися на нем: «растерзал еси узы моя» (Пс. 115, 7). Прочее ты и сам должен еси пожрети жертву хваления Разрешившему, да не паки за нерадение впадеши в первыя узы, по словеси Спасителя глаголюща: «Се здрав был еси» (Ин. 5, 11) и прочее. Благодари Бога, той бо радит и печется о тебе и управляет во всех, аще и ты пребудеши хотяй. Здравствуй душею и телом, и помолися о мне.

209. Тойжде таковое получив дарование, проси и предания себе, и сущим с ним.

Ответ. Рабе Бога вышняго Андрее, срабне же мне худейшему, мир ти, и прочим срабным нам, от Бога Отца и Господа нашего Иисуса Христа. Явно вам творю, яко прежде прошения вашего, уже аз предах вас святой и поклоняемей, и единосущней, животворящей же и безначальней Троице, в предании охранения от всякаго зла. Не хощу же вас не ведети и сего, яко есть иное преставление предание грознейшо, нужнейшо, и страшно, вожделеннейшо, и рачително, честнейшо, и славнейшо. И кое есть, услышите. Егда постыдится добра ненавистник враг наш, слыша блаженный оный и животворящий глас Спаса нашего к нам, исполненный радости и веселия и радования, просвещающ неизглаголанною светлостию, и глаголющ: «Приидите благословеннии Отца моего, наследуйте уготованное вам Царство, от сложения мира» (Мф. 25, 34): тогда будет великое его предание, егда предастся царство Богу и Отцу. Сие есть, и разве сего другаго несть. И како бывает услышите: кийждо святых приводя сыны, ихже спасе, Бог, светлым гласом со многим и великим дерзновением, удивляющимся святым Ангелом, и всем небесным силам, глаголет: «Се аз и дети, яже ми даде Бог» (Ис. 8, 18). И неточию тыя, но и себе предает Богу: и тогда бывает Бог вся во всех. Помолитеся убо, да достигнем. Блажен бо чающий и достизающий. Помолитеся о мне, возлюбленнии.

210. Тойжде мечтания и искушения претерпевая от бесов, и удивляяся, яко по толиком человеколюбии и будущих благ обещаниих сим подпаде. Вопроси тогожде великаго старца о сем, и стоят ли еще печати обетований?

Ответ. «Мир мног любящим Господа, и несть им соблазна» (Пс. 118, 165). Мир ти будет в Бозе, честнейше брате и единомудренне Андрее: да не разслабит тя стужение бесовских страстей и мечтаний. Но веруй, яко ничтоже совершат стужающе и искушающе: но паче умножают добродетель, аще прилежно внимаем, еже подати малое терпение. Глаголет бо о спасающемся верою праведнице: «яко аще усумнится, не благоволит душа моя в нем» (Аввак. 2, 4). Да не послабим убо ужа, да не погубим данных нам от человеколюбца и благосердаго Бога: Того бо есть еже подати, а наше сохранити. И не удивляйся, аще по святых обетованиих и не раскаянных дарованиих, паки движут на тя безчестныя своя страсти, чающе окрасти безмерное богатство. Но поминай безстудие их оно, еже по засвидетелствовании самаго Владыки нашего Бога о святом и славном Иове, колика искушения и козни подвигоша, во еже низложити столп, но непреодолеша, ниже окрасти возмогоша сокровище светлыя его веры и благодарения. Светлейшо бо показася от сообщения со огнем злато, си есть от премножества искушений праведник: оставил бо есть Бог, и допустил, и после особнаго Своего о праведнице засвидетельствования, искушену быти рабу, к болшей чести и славе Владыки и безответию врагов. Не унывай убо, стоят бо печати обетований, но потерпи Господа. Претерпевый бо до конца той спасен будет, о Христе Иисусе Господе нашем. Аминь.

Ответ 210, тогожде великаго старца к томужде, всеявшуся в нем помыслу, яко еже не воздержатися от брашен, возбраняет его доспети во обетованная ему.

Не яко уничижая воздержание и пощение, глаголю присно любви твоей творити требование тела, якоже подобает: да не будет. Но яко, аще не внутреннее делание поможет по Бозе человеку, всуе труждается во внешнем. Сего бо ради рече Господь: «яко не входящая во уста сквернят человека, но исходящая из уст» (Мф. 15, 11). Ибо внутреннее делание с болезнию сердца приносит истинное безмолвие сердца, и таковое безмолвие приносит смирение, и смирение творит человека быти селение Богу, и от вселения сего изгоняются лукавии беси, и сих начальник диавол с безчестными их страстми, и обретается человек храм Богу освященн, просвещен, очищен, и исполнь всякаго благовония, и благостыни, и радования. И обретается Богоносец человек той, паче же и бог, рекшаго ради: «Аз рех: бози есте и сынове Вышняго вси» (Пс. 81, 6). Да не убо смятет тя помысл, паче же лукавый, яко телесная брашна возбраняют тя доспети во обетования: свята бо суть: и не возможно от добра злу произыти. Но исходящая из уст, возсылаемая от сердца, та удерживают и возбраняют человека скоро приити в предлежащая ему обетования. Творя убо потребу телесную, да не усумнишися: но сотвори по силе внутренняго человека, еже потрудитися смирити помыслы своя. И тогда отверзет Бог очи сердца твоего, еже видети свет истинный и разумети рещи, яко благодатию есмь спасен, о Христе Иисусе Господе нашем, Емуже слава вовеки. Аминь.

Вопрос 211, тогожде к томужде.

Понеже, владыко, якоже вси, немощен есмь душею и телом: молю тя: помоли Бога подати ми силу и помощь на терпение, да благодарно претерплю находящая ми.

Ответ Варсануфия. Брате Андрее, поведати хощу любви твоей, яко вся дарования пришествием Святаго Духа даются, и многочастне, и многообразие бывают. Овогда бо даде Бог Духа апостолом изгоняти бесы: «овогда же исцеления совершати: овогда же прозирати: а иногда воскрешати мертвыя», совершенность же, еже оставляти грехи и свобождати души от тмы, и возводити на свет. Се убо молю Бога да по освобождении души твоей, даст ти Духа Святаго на терпение и благодарение: и да постыдится сопротивный, не имущ на нас отвещания. Споспешествуй и ты мало, понудився стяжати, и даст ти Бог, богатый в милости. Помолися о мне, брате.

Вопрос 212, тогожде к томужде великому старцу.

Молю тя, владыко, поминати мя всегда, и яви мне, како подобает проходити со близ живущим братом нашим?

Ответ. Брате, писано есть: яко аще забуду тебе Иерусалиме, забвена буди десница моя, и прочая. Сия ти о воспоминании. А о еже, како подобает проходити со ближним: хотяй угодити Богу отсецает волю свою ближнему понуждая себе. Глаголет бо: «нуждных есть Царствие Божие, и нуждницы восхищают» (Мф. 11, 12). Уразумей убо, како почивает брат, и тако твори: и обрящеши и ты покой от Бога, о Христе Иисусе Господе нашем, Емуже слава вовеки. Аминь.

213. Сей брат, близ живый сего немоществующаго старца, спострадавый немощи его, проси зело великаго старца помолитися о нем.

Ответ. Брате стужливе, аще бы ведал еси дар Божий, чесо ради от времене до времене наказует раба своего Андрея, аки благоутробен отец, прославил бы еси Бога: да заградит скверная уста змия, да не обрящет нань вины в день судный, великих ради обещаний, обещанных ему от Бога, мною худейшим рабом и непотребным. Что же? Непщуеши ли, яко не состражду ему паче всякаго человека? Ей. Зане где есть: «яко аще страждет един уд, с ним страждут вси уди» (1 Кор. 12, 26)? Аще бы по истине ведал той светлость предлежащих ему, воспети имеяше с Павлом, благодаря, веселяся и глаголя: «яко не достойны страсти нынешняго времене к хотящей славе явитися в нас» (Рим. 8, 18). Бог да укрепит его, и послет ему велию милость. Целую вас о Дусе Святе, зря со Богом успеяние ваше, еже о Христе Иисусе Господе нашем, Емуже слава во веки. Аминь.

214. Тойжде брат, ища сам от себе послужити старцеви по силе со своим служителем, старцу сумнящуся и не хотящу прияти служения от него, за слово аввы Феодора, иже от Фермы, стыдившагося повелевати своему ученику: вопроси инаго старца о сем.

Ответ Иоанна. Бог небесе и земли да приложит к вере твоей, о честнейший и прелюбезнейший брате, и да утвердит любовь твою в страсе Своем, еже исполнити доброе произволение твое к ближнему. Темже, аще потрудишися мало по силе, то не лишит тя Бог мзды труда твоего. Аще убо чим можеши, упокой старца: и угодно будет сие Богу паче боголепнаго служения и жертвы: а чесого не можеши, то да сотворит брат. Не должен же есть старец сумнетися, служимый от вас, немощен сый, но благодарити Бога, и молитися о вас: немощен бо сый, не должен есть удержати слово аввы Феодора, глаголюща о брате, яко несмь общежитию начальник, да повелеваю ему: аще хощет творити, еже видит мене творяща, да творит. Сия бо глаголаше авва Феодор, яко можаше сотворити потребу свою и другим служити. Сей же немощен есть. И кийждо же должен есть противу меры своея и устроения пребывати во страсе Божии благодаря Ему всегда, яко чрез него инии приемлют мзду. Да не убо позавидит хотящему услышати глаголющаго: «болен бех, и послужисте Ми» (Мф. 25, 36). Не истяжет Бог от болящаго, якоже многажды слышахом, разве точию благодарения и терпения: сия бо ходатайствуют о немощи пред Богом. Да не усумнится убо служимый от коего-либо брата, хотяща Бога ради потрудитися, ни да речет: отягощаю сего, или оскорбляю сего: но да речет: можно равну быти служащему со страждущими, егда Бог известил есть ему сотворити себе мзду от мене: Господь да укрепит его, и мене да не осудит. Сия да сохранит, и живите с миром, благодатью Христа Бога нашего. Прежде всех: друг друга тяготы носите, и тако исполните закон Христов. И к сим поминаем, яко смерть не медлит приити. И работайте Господеви со страхом, и ближнему, да чрез него наследите безсмертную жизнь, о Христе Иисусе Господе нашем: в немже имуще надежду, непецытеся о утрии, Той бо сам радит о нас. И аще возверзем попечение наше на Него, то Той нами попечется, якоже хощет. Тому слава, аминь. Целую вас о Господе, прося помолитися о мне любве ради.

215. Брат некий, имея три помыслы и хотя вопросити великаго старца, не ясно вопрос сотвори, но гадании, хотя утаитися аввы. Буквы бо некия написах, и умом размыслив, еже вопросити хотяше: коейждо главе возмневшияся ему буквы в своей мысли вообрази. Бяху же буквы сия: первая, I, еюже во уме вообрази вопрос о безмолвии точном и всесовершенном молчании, о еже ни к единомуже не беседовати отнюд. Вторая, К, о уставе пищи: еюже назнаменоваше подобает ли сухо ясти, и не пити вина, и подобает ли беседовати с своим точию служителем. Третия, Л, еюже привопрошаше: подобает ли сретения творити, и телу в пищи снисходити?

Он же на сия отвеща ему тако:

Не уклонися ни на десно, ни на шуе: дондеже два ободесноручна будут.

216. Тойже брат томужде великому старцу вопрошение другое сотвори: ниже ясно о том вопросив, ниже буквами чрез гадания, якоже первее тое вообразив: но точию умом размыслив. Бысть же о тяжести сна, и немощи душевней, и прошение о помощи и молитве о его спасении: и что есть реченное во ответе: дондеже два оно обадесноручна будут?

К нимже отвеща старец сия:

Первое убо есть притщетно, второе же полезно. И елико притщетно есть первое, толико есть полезнейше второе.

217. О сих паки недоумев брат, просяше уразумети: како притщетно есть? И что подобает творити в помощь? И что есть реченное в ответе о двою?

И отвеща ему тако:

«Вся права суть разумевающим» (Притч. 8, 9): самое естество учит нас. И о еже убо: что суть два, о вас рекох: о вопрошающем, и служащем ответу. О сне же: души и тела есть. Аще бо не поработится телесное, духовному, то не могут изнемощи страсти от него. Сего бо ради приближих помыслы един к другому.

218. Недоумевшу же ему паки: еже приближити помыслы един к другому, что убо то было бы, и сие уразумети просящу: отвеща ему сия:

Простите мя Господа ради: не в мудрости глаголю: Господь рече своим учеником: «Еще ли и вы не разумни есте» (Мф. 15, 16). Глава бо первая и глава вторая едино суть.

219. Сия слышав брат, сказа старцу: отче, повергаю душу мою в щедроты Божия и в руки твоя: помолися о спасении смиренныя моея души.

Ответ писменный. Брате, внимаим себе со вниманием многим. Ибо невозможно скоро внимати вещем. Аще бо апостол достигий, исповедует себе не достигша быти, кольми паче мы, ничтоже суще, должни есмы смиренномудрствовати. Понеже убо, яко возмнеся вам, еже Бога ради прияти мне помыслы в гаданиих, и такожде в гаданиих тебя ответ их дати. Яже жвание духовно творят в словесной души, и паче разумевающим: испытующе бо гадания, обретаем текущую из них пользу. Имуще же бодуща нас апостола, глаголюща: «не высокая мудрствующе, но смиренными ведущеся» (Рим. 12, 16), не ктому гадании присно глаголи твоя помыслы: ибо безумный мой ответ творит тя не уразумети, и в стужение безпрерывное устроевает нас обоих. Воистинну бо ниже полезно есть нам, выну гадателне, беседовати, или писати друг друга: аще и видим, яко даровано есть нам сие от Бога, но по бываемой нужде. А понеже по Бозе уди есмы друг друга, и оное: «брат от брата помогаемь, яко град тверд, имамы» (Притч. 18, 19): явленно рцы твоя помыслы чрез брата, или напиши: и тако услышиши. Се бо обоим смирение есть. Кая бо нужда, рцы ми, высокими глаголати, могущим смирением прейти? И сие же редко твори: пользует бо сердце сокрушение, еже с помыслы, и сие убо, еже рещи ти: покоряю душу и тело. Аще кто Бога ради мудрствует покоритися своему брату, подобает помышляти ему, яко Богу покоряется. Той убо может возбудити нас от сна мысленнаго пиянства. А якоже мене просил еси помолитися, и аз тя прошу о томжде. Писания бо есть слово: глаголет же, яко сие есть исцелительно. Понеже убо обе те главе, яко неудоборазуменне вам суть, се явленно глаголю: еже в первом писании, особно есть о тебе, и о моем сыне Сериде. А другая глава о души и теле: и тоежде разумеется о телесности и духовности. Глаголет бо: аще совещают два от вас, то, что-либо аще воспросят молящеся, приимут. Разумеется же сие и о нас всех. Аще бо не согласуем, то николиже явится в нас пребывание чисто. Помолися убо, брате, да прейдем мирно малыя наши дни. Не бо, якоже прилучися, есть. «Прилепляяйся бо Господеви, един дух есть (с Господем)» (1 Кор. 6, 17). Да даст всем нам сие прохождение пучины прейти без вреда, о имени Его. Тому слава вовеки, аминь. Стяжи смирение, терпение, надежду, и, всех большую в Бога любовь.

220. Вопроси некто авву Иоанна о вещи, и, прием ответ, посла о тойжде вещи вопрошая авву Варсануфия, не рек, яко уже вопроси инаго старца о том: и отвеща старец: якоже рече ти брат Иоанн, сотвори. И паки по некоем времени случися томужде брату вопросити нечто авву Иоанна, и слышав ответ, посла вопрошая о томжде авву Варсануфия. Старец же отвеща ему, глаголя: довлеет ти прочее. Бог Варсануфиев и Иоаннов един есть. И не ктому приложи он обоих вопрошати когда о тойжде вещи: доволен бывая ответом единаго.

221. Живяше же сей авва Иоанн в первой келлии старца, созданной ему вне обители, лет осмнадесять безмолвствуя, даже до своея кончины: и предвозвести сию, сице глаголя: яко в седминах аввы Серида скончаюся. И нам молящим его не оставити нас сирых, глаголаше: аще бы пребыл авва Серид, имел бых пребыти еще пять лет. Но понеже укрыл есть Бог от мене, и прият и, ктому не пребуду. Тогда авва Елиан, яко новопострижен, и в произвождении своем поставлен игуменом обществу, стужаше авве Варсануфию, многими молении и слезами, даровати нам его. Аки самому авве Варсануфию не ктому подающу ответа. Сие убо познав духом авва Иоанн, паки на другий день, егда снидохом молити его, предварив рече авве Елиану: почто старцеви стужаеши о мне? Не трудися, не бо пребуду. Тогда нам исполншимся плача, и ему припадшим, ятся авва Елиан, и рече: поне две седмицы даруй ми, да вопрошу тя о монастыре, и правлении его. Старец же милосердствовав, и подвижен от живущаго в нем Святаго Духа, рече: и се имаши мя чрез сии две седмицы. Пребысть же авва Елиан вопрошая его о коейждо вещи правления общежития. И двема седмицема исполнившимася, заповеда нам не явити успения своего до дне того. И созвав всю братию и обретшияся в общем житии, целова коегождо, и отпусти их. И отпустив всех, предаде в мире дух свой Богу.

222. Брат вопроси великаго старца: рцы ми, отче, что сотворю в смущении помыслов сердца моего? И подобает ли мне отсещи всесовершенне вино? И седящу спати? И помолися о страсти очесе моего. И подобает ли показати е врачу? И молю тя помолитися Богу, дати ми малое успеяние: и еже не разлучитимися святых ваших следов.

Ответ. Брате, понеже от мене худаго, яже о помыслех твоих, взыскал еси услышати: еда ли не угодна быша ти, яже от брата Иоанна слышал еси? Обаче сия приемлеши смущения, за еже имети ти легкое сердце. И аще, по словеси Спасителеву, «вся возможна верующему» (Мк. 9, 23), то где есть вера твоя? О вине убо: не подобает всесовершенне отсещи, но употребляй по малу. И о седении во сне, во смирение ведет послежде. Но возложи себе Богу по страху Его. О очеси же, да не убоишися, имея просвещающа тя Бога. Аще ли же будет время когда некоему искусну, и покажеши ему, то не погрешиши, ибо и сие смиряет тя. Сия тебе от мене убо глаголана, писана же сыном моим Серидом. Аще убо не будеши боримь уничижити моя словеса сия, реченная от Бога: то помолюся Богу привести тя в большее успеяние, и еже не отлучитися от нас ни в сем веце, ни в будущем. Вразумися убо паче всех учащих тя соблазном бесов, и всегда во благое привлечеши присно душу твою, и помыслы твоя. И да не поставиши с ними завета: вселютейши бо суть и иноплеменницы: и наследиши землю израильтян о Христе Иисусе Господе нашем. Емуже слава вовеки, аминь.

Вопрос 223, тогожде к томужде.

Молю тя, отче, рцы ми: от вас ли есть первый ответ? Понеже помысл рече ми: не от аввы ли есть именем твоим? И рцы ми: како уврачуются страсти моя? И даждь ми заповедь на спасение души моея. И испроси ми оставление грехов. И добро ли есть, якоже глаголет ми помысл, выну взимати поварню?

Ответ. Слыши, чадо: всякой страсти есть врачевание: и всякому греху есть покаяние. Аще отнюд не верен еси, якоже рекл еси, и хощеши от неверия исцелитися, то врачевание сие есть: вера, еже веровати несомненно благому. Аще же неверие пребываеши имея: блюди, да не отпадеши блаженства онаго, еже: «блажени не видевшии и веровавшие» (Ин. 20, 29): писано бо есть: «яко веруйте во свет, да сынове света будете» (Ин. 12, 36).

Се вторый ти ответ послах, не веровавшу первому. Аще бы приял еси пророка во имя пророче, то мзду пророчу приял бы еси, си есть: аще бы от мене и не был первый оный ответ, ты же приял бы еси от мене, то приял бы еси по вере твоей: верен бо рекий: даст ти Господь по сердцу твоему. И еже рещи, яко хощу утвердитися от тебе, а не от аввы бысть первый ответ. Почто уподобился еси искушающим Господа и глаголющим: покажи нам знамение: ихже и отгна аки искусителей, глаголя: «знамение не дастся им» (Мф. 16, 4). И не паче уподобился еси Ахазу, повеленному просити знамение, и отвергшуся, и глаголющу: не имам просити, ниже искусити Господа? Аще бы, услышав, поверовал еси просто, то многую получил бы еси пользу: но, да не сотворит паки с тобою рать неверие, се повелех авве стати при дверех моих, и громким гласом взывати, чтущу написанныя тебе от мене глаголы на постыждение диаволу. Аще бо прочтет сия велегласно, то како может ратовати тя диавол, глаголя: аз не слышу? Аще же слышу, и другий написа тебя, якоже восхоте, почто не порицаю ему? Аще бы имел еси мене прозорлива, и по Бозе познавающа бываемая, то могл бы еси имети, яко никтоже смеяше пременити слово мое, и не познал бых. Но обаче и мене сокровенно умали пред тобою враг, сотворив мя тебе не предвидети что-либо. Аще убо хощеши от мене заповеди во спасение и живот свой, стяжи крайнее смирение и послушание во всех: сия бо суть искоренители всех страстей, и насадители всяких благ. И да не вознегодуеши послушати учений аввы твоего: вражия бо есть сеятва сия. Аще ли же сотворити силу свою делати и хранити, то уповаю на воплощшагося и распеншагося Христа, во еже грешныя спасти, яко не закосниши сотворити плод добр и благ. А о содеянных, о нихже глаголеши: аще сохраниши мою заповедь о Христе Иисусе, веруй несумненно, яко простил есть тебе Господь тая, и аки ныне родился еси в покаянии Божии. А о единой коейждо страсти несть потребно писати тебе: единым бо словом назнаменах ти врачевание сих, Господь бо глаголет: «Вселюся во смиренных» (Ис. 57, 15 по еврейск. тексту). Что убо? непщуеши ли, яко может отнюд что-либо от злобы врага вселитися (тамо), идеже видит живуща Господа? Разумей же сие, яко злодей не может явитися, идеже суть судища князей. О поварниже, не можеши удержати ю до конца: паче бо зависть имать вещь: но егда повелено ти, да не обленишися, ниже воспрекословиши, но усердно сотвори: от сего бо есть ти благодать. О двоих же страстех, забвении глаголю, и нерадении, усердно вопроси брате, и тщаливейше делай; а не по первым вопросам, ихже забвению, и сестре его нерадению предал еси: но возобнови духовныя твоя вопросы, благодатию Святыя Троицы: и согрей твое сердце во страсе Божии, возбуждая е от мысленнаго сна реченных двоих лютых страстей: и тое согревшися, приимет желание о будущих благих и прочее будет о сих твое попечение, и от онаго попечения отступит от тебе чувственный сон. И тогда возглаголеши по Давиду: «и в поучении моем разгорится огнь» (Пс. 38, 4). Вопросив убо о двоих онех страстех, сокращенна услышал еси о всех страстех: аки бо хврастие суть, и сгарают от духовнаго огня. Аще бо о жительствах духовных реку ти, не присущу бодрствованию владычественнаго помысла, всуе вменяются человеку. Возлюби убо потрудитися и поучитися в сих, и обрящеши еже царским путем без боязни ходити о Господе. Сия ти написах, и веру ми ими глаголющу, яко, аще увижду твое тщание в Бозе, молитися имам о тебе ко Господу непрестанно, еже спасти тя от смерти в живот вечный, о Христе Иисусе Господе нашем. Емуже слава вовеки. Аминь.

Вопрос 224, тогожде к томужде великому старцу.

Авво, помысл устрашает мя, яко вопрошаеши и не твориши, и да не како прокленет тя старец. Но помолися о мне, да дарует ми Бог, еже разумети пишемая мне от вас и творити я.

Ответ Варсануфия. Чадо, аще кто слушает и творит, то себе творит и себе пользует. Но понеже рекл еси, яко устрашают тя помыслы, да не проклену тя: како возможно есть боящемуся Бога кляти кого, Господу глаголющу: «благословите, а не кляните»? (Рим. 12, 14). Внимай же, брате, яко хотят тя прелстити в не весма имущая пользу: сиречь, спати седящу, или не положити возглавийцы: яже мятва, и кимин, и копр суть, и остави ти вящшая закона: яже суть угасити гнев, и изсушити ярость, и повинутися по всему. Сия же сеют в тебе, да сотворят изнемощи твоему телу, и приидеши в недуг, и востребуеши постели мягкия и различных снедей. Но доволен буди единою возглавницею, и восклони себе со страхом Божиим. А о еже уразумети глаголемая ти от мене, помолися Богу, и подаст ти разум благ: Давец бо есть всякаго благаго дарования. Сие же имей с верою: яко, аще сотвориши твою силу, в нихже слышал еси, десятократну творю о тебе силу мою, яко да приимеши помощь от человеколюбиваго Бога. Заслади убо горнец твой от мысленных снедей, яже суть: смирение, послушание, вера, надежда, любовь. Имеяй бо сия, учреждает пир небесному Царю Христу. Емуже слава вовеки. Аминь.

225. Прошение тогожде к томужде великому старцу.

Молю тя, отче, понеже чту еллински, и не разумею, что глаголю: помолися, да Господь вразумит мя в чтении. И рцы ми должно ли изучити еллински псалмы?

Ответ. О еллинском чтении: аще, яже по Бозе, и яже к пользе души, взыщем со смирением: есть подаваяй разум Бог, и аще будет даяние Божие, яве, яко и ко спасению бывает души. Множайшии бо от книг на еллинстем наречии обретаются. Аще ли же и псалмы потрудишися изучити на таковом наречии, в помощь ти будет сие при чтениих на сем наречии. Аще убо чтение, аще изучение псалмов, непрестанно поминай глаголющаго Бога: «научитеся от Мене, яко кроток есмь и смирен сердцем, и обрящете покой душам вашим» (Мф. 11, 29). Разумей, яже глаголю ти. И аще потрудишися, благодать имети будет твой труд в жизнь вечную о Христе Иисусе Господе нашем. Аминь.

226. Прошение тогожде к томужде великому старцу.

Молю тя, отче: понеже восхити мя помысл хульный: прости убо мя Господа ради и помолися о мне, еже исправитися ми.

Ответ. Аще бы можно было наполнити слез сия писания и послати тебе оскорбившему себе, то полезно бы было. И что сотворю человеку не любоукрасившу землю сердца своего, ко еже прията присеянныя глаголы от мене писменными ответы к возсозданию души от ветхости, во обновление жизни вечныя? Аще бо приял бы еси со усердием моя словеса, то вкусил бы еси от них сладости, услаждающия душу и отгонящия лютейшую горькость, всеянную от бесов в тя. От довольна бо времене, ополчися на тя бес злохуления, погубляяй души приемлющия его. И испытай, и обрящеши, яко ни единыя достойныя слова обрет вины, уловил тя есть в гривну уморити тя. О! да не даст ему Бог мой места исполнити свою ему в тебе волю. Аще не отчаемся, то всегда стоит приемляй покаяние Бог. Аще ли же отчаем себе, то самоосуждени обретаемся, кровь имуще на главе своей. Темже убо пробудися от прелести пленения, и воззови чувства, яже пленил есть от тебе враг, Христовыми ученьми, бывшими тебе мною, прежде повелевшим тебе угасити гнев и ярость: ведый яко приводят человека в погибель злохуления бываемаго на Бога: стяжати же смирение, опаляющее бесов; послушание ведущее Сына Божия вселитися в человека; веру, спасающую человека; надежду не посрамляющую; любовь, неоставляющую человека отпасти от Бога. И менше попекся о сих, избрал еси сам себе противная паче: гнев, и ярость, и, совершенность погибели, злохуление оно. Таже и слышав от мене, яко аще сотвориши силу твою, отступити убо сих страстей, прилепитися же сим благим, десятократную и аз о тебе сотворю силу мою: и паче нерадиши, посрамляя моя седины. Обаче благости ради Божия, да уразумееши, коль есть благ, потрудися исправитися. И понеже заповедь имамы прощати: прощена суть тебе мимошедшая: отныне же исправися. Четыредесять же дней о вчерашних покайся Богови: три поклоны творя, и глаголя: прости мя хулившаго на Тя, Бога моего: и исповеждь Ему злохулившими устами, трижды на день, глаголя: Слава тебе Боже мой, и благословен еси вовеки, аминь. И да не паки внидеши в сия, да не горе нечто тебе будет. От жестокости бо сердца пришел еси во гнев: а от гнева, во еже отступити святаго общения: и от еже совершенно пообладану быти, впал еси в ров хулы сия. И аще бы не рука человеколюбиваго Бога, и молитвы святых предварили быша, то в погибель отчаяния испала бы твоя душа. Прочее мною малейшим глаголет ти Бог: согрешил ли еси, то ктому да не приложиши. И о прежних твоих помолися: милостив бо есть Бог, и, хотящим нам, прощает грехи. Над сими же поминай, яко «много может молитва праведнаго поспешествуема» (Иак. 5, 16). Аще угодно ти есть, делай: аще ли же ни, прости мя за вся.

227. Томужде брату, прощения просившу, отвеща паки великий старец:

Смерть и живот наш в руках наших есть; аще убо не содеем прежних наших согрешений, имамы уже от Бога тех прощение, аще не паки усумнимся. Прочее, брате мой, утвердися отныне, да не исполнится и на тебе: «се здрав был еси, ктому не согрешай, да не горше ти что будет» (Ин. 5, 14). Непокорства твоего бежи: неверие же далече сотвори от тебе: безнадежия же отчуждися и прилепися Богови: любя, веруя, надеяся: и имети будеши в Нем жизнь вечную. Аминь.

228. Прошение тогожде к томужде великому старцу.

Отче, помолися о мне, да покровен буду от нощных мечтаний. И аще возможно есть, удостой мя твоего поклонения, и послушати святаго твоего гласа. Верую бо, яко аще сие мне прибудет, то многое от сего покровительство обрящу

Ответ. Глаголет Писание: «яко верный вмале и во мнозе верен есть» (Лк. 16, 10). Аще веровал бы еси мне отсутствующу, то и присутствующу веровал бы еси. Ибо «не видевшия и веровавшия блажит Господь» (Ин. 20, 29). И многажды писах ти о неверствии, и гневе, и жестокости, и вижду, яко аки ни единоюже посылах словеса моя. Понеже убо должен есмь подати, аще что имам, по реченному в Писании: «яко всякому просящему у тебе дай» (Лк. 6, 30), и аз ти глаголю, стяжати смирение, послушание, любовь, надежду: и отвещаю аз человеколюбивому Богу о всех согрешениих твоих. Сие же уразумей, яко, аще не смиришися, то не послушаеши; и аще не слушаеши, то не любиши; и аще не любиши, то не веруеши. И аще не веруеши, то ниже надеешися. Аще убо потрудишися имети сия, то восприемлю на себе согрешения твоя вся. И аще имаши себе прокаженна, верую, яко услышиши и ты от Спасителя: «хощу, очистися» (Лк. 5, 13). И аще грешна, то услышиши: «Оставляются твои греси мнози» (Лк. 7, 47). Аще ли же и слепа, то по вере твоей обрящеши. И сия писах ти прежде, и спиши. Уста твоя сохрани, еже не впасти паки в лютейшее злохуление, аще и до самыя души твоея дойдеши. Много бо пота пролих, умоляя о сем Бога. Аще убо вонмеши и сохраниши, от всея твоея души, реченная: то не точию от мечтаний тя нощных сохранят, но и от всех козней вражиих, помогающу Христу. Аминь.