Текст книги "Аскетика. Том I"

Ответ 61, тогожде великаго старца к томужде, ублажавшу его за таковую добродетель, и рекшу речи от писания, и вопросившу: подобает ли оставити овощи? и верно и благообразно по отцех жити? и о молитве, еже просветитися разболевшимся его очесема.

Брате, на мне исполнися тобою Писание, глаголющее: «людие мои, блажащии вас: льстят вы» (Ис. 3, 12) и прочая. Таковое блаженство не оставляет нас видети студа дел наших. Вредит бо, якоже мню, и достигших в меру, и от яже в Бога веры отлучает. Глаголет бо: «како можете веровати в Мя, славу друг от друга приемлюще» (Ин. 5, 44)? Разумеваяй смирение апостолово, изберет паче буйство, да послежде будет мудр. Показуяй бо себе разумна, а не паче духовна, удивляюся, избежит ли осуждения за кичение уставленнаго? О смиренных же пишет, яко приемлют благодать. Аще кто исповедает сладость словес Божиих, не вкушает же тоя, таковый горьку тую показует. Не горько ли слово оно, яко «аще кто хощет по Мне ити, да отвержется себе, и возмет крест свой, и по Мне грядет» (Мф. 16, 24). Аще ли же сладко, то чесо ради, хотяще исполнити свою волю, отвергаем тое? Показуяй себе ведуща путь, ведущий во град, или аки презирая вопрошает, или искушает насмеваяся. Аще ли же весть путь, и не хощет ходити по нем, таковый яко ленивейший осуждается. Имеяше же и авва Арсений разум, но не являше. Смиренномудрствуя бо глаголаше: «хощу спастися, и не вем како». Аще убо покажет кто брату своему путь оный, и вознерадит ходити путем тем, повинен обрящется. Сей же есть путь: да проходимая и созади пометаемая нами не привлекут нас вспять: понеже обретаемся на месте, отнюдуже изыдохом, осуждения достойни, и всуе сотворше труд. Хотяй бо познати совершенно путь, аще не шествует с ведущим совершенно путь той, то никогдаже достигнет во град. Поверзи волю свою созади себе, и смиряйся во всем животе твоем, и спасешися. О овощи же, да не взыщеши от себе: аще ли же дадут ти, приими и яждь, воздыхая за осуждение сладости. Аще же приводиши святых, то подражай и совершенству отвержения, и срастворенней в делех вере их. Без дел бо, рече, яко мертва есть. И понеже глаголеши, благообразно: то не обрящеши благолепнейша дела, бываемаго с покорением: послушание бо есть. И рече некто, яко сын послушлив в живот. О очесех же, силен есть Создавый тая просветити со внутренними очесы, имиже аще разумеваем по гласу Спасителеву, то не имамы нужды в сих, аки зрящих суету мира. Силен убо Бог сотворити, да обрящемся и мы со спасающимися, во славу всесвятаго имене Его. Аминь.

Ответ 62, тогожде великаго старца ктомужде, вопросившу с другими, кто даде диаволу началство и власть?

Аще уразумети хощете то, еже есть вам не нужно, сиречь, кто даде диаволу началство и власть, от сего уразумейте, и да не сотворите за неразумие ваше Бога виновна быти злых: от себе приимите пример. Аще кто от вас своим произволением уклоняется на злое, то властительски творит зло оно, и судим бывает от Бога, яко сотворивый злое своею властию. Кто же власть даде ему? Не Бог ли? Чесо убо ради его осуждает? Да не покажете за строптивость врага Бога волителя быти злу. Несть бо сие, да не будет. Но аще и рекоша нецыи от святых, обаче вы совершенно не разумеете, како рекоша. По сему бо речено бысть, яко Бог даде ему начальство и власть, от еже не удержати его, или возбранити от совершения зла. И уразумейте от сего: «аз ожесточих сердце фараона» (Исх. 7, 3; 10, 20). Аще убо сие есть, то како его осуждает? Но сие глаголет, яко не прежде наказа и. Паки от книги Иова сие возможно познати кому, содержит бо, яко диавол погубил его имения, и чада: и разсуди его глаголюща: «Господь даде, Господь отъят, якоже Господеви изволися, тако и бысть: буди имя Господне благословенно вовеки» (Иов. 1, 21; 2, 6). Почто убо не именует погубившаго, но Долготерпевшаго, и Могущего возбранити и удержати тое злое? И вонми, яко не за ино что рече ему: «се даю его в руце твои», точию, яко Бога порицаше виновна быти исповеданию праведника онаго, о бывших на нем благодеяниих. Не удержав убо Бог, именуется аки давый ему начальство и власть. Бог бо от начала, доброе начальство ему вверил есть; и дав не отнял есть: он же, приимь отверже, и вместо того облечеся в начальство злых. Невозбранивый убо Бог, именуется яко давый. Не пишет: «и не восхоте благословения, и удали е от него Бог», но: «и удалится от него» (Пс. 108, 17). Вы убо, да не имеете Бога виновна быти злым: понеже осудит вас сие: но он сам себе избра начальство злых, и не возбрани ему Бог. Ибо глаголет: «и возлюби клятву, и приидет ему», а не глаголет, яко Бог даде ту ему. Вы убо стойте непоколебими о Господе, верующе, яко начальник жизни нашея и всех благих есть Той. И простите мя влекома от вопрошений детских, и оставлша предлежащее совершенство. Чада, да благословит, и да умножит плоды ваша Господь Иисус Христос, о имени Отца, со Святым Духом.

Толкование

Представляет сими ясно тако богоносный отец, яко не подобает отнюд вопрошати разума ради тщащемуся спастися. Разум бо кичит, якоже глаголет апостол. О страстех обаче вопрошати: и како подобает свое провождати житие, сиречь о том, како подобает спастися, зело прилично есть: нужно бо, и во смирение ведет. Смирение же есть спасение сокращенно. «Смирихся бо, и спасе мя Господь» (Пс. 114, 5). Глаголет же и некий от святых: монах смиренномудр, не возлюбопытствует не изреченна: гордый же возлюбопытствует судбы.

63. Между сими и к больницы призирателю, вопросившему, аще подобает во врачебных книгах поучатися, рече:

В сих подобает паче поучатися, а не в страстех. Понеже, глаголет, не у приидохом в совершенство, да совершение пременимся от пленения страстей.

Обоим убо прилично и разсудительно отвеща святый. Рек же: простите мя влекома вопрошении детскими, гадательствует, или паче, явно показует: яко воистинну детска смысла и неразумия многа суть исполнена таковая вопрошения, ктому же и лютыя гордости.

Вопрос 64, тогожде ко иному старцу: что сотворю, отче, яко скорблю, яко оставих чада и жену за еже быти им без промышления.

Ответ. Писано есть в старчестве: яко обидим быв некий от некоего, отыде ко старцу, глаголя: яко обидим есть от некоего, и хощу себе отмстити. И рече ему: ни, чадо, но Богу отмщение да оставим. Егда же не увещал есть его, рече: сотворим молитву. Бываемей же молитве, старец нача глаголати, слушающу брату: Боже, не ктому Тя требуем, да печешися о нас, мы бо сами себе отмщаем. Он же, умилився о словеси, рече: прости мя, авво, не ктому бо отмщаю себе. Сие же глаголю ти, брате: аще мы печемся о жене и чадех, то Бог о них не ктому печется. Аще ли же оставим, то Бог попечется и ими и нами. Да не убо возмнится ти пещися или молитися о них: да не приимеши я в память, и будет страсть в души твоей.

Вопрос 65, тогожде к томужде старцу: что убо сотворю, яко пребывает во мне зело печаль о разлучении жены?

Ответ. Писано есть о муже и жене, яко «будета оба в плоть едину» (Мф. 19, 5; Быт. 2, 24). Якоже убо от плоти твоея аще отсечена будет часть некая, болезнует прочее тело, донележе исцелится язва, и престанет болезнь: тако и о сем, нужда ти есть, аки плоти отсекшейся болезновати.

Ответ 66, великаго старца к томужде, о томже вопрошении:

Аще вся возможна верующему, то где есть вера? Аще место мертвеца избрал еси себе, вопроси мертваго, вожделевает ли своея жены или судится за ню, аще та отшедши соблудит? Аще оставил еси мертвыя погребсти своя мертвецы, то почто не благовествуеши царствия своего? Доколе спиши? Бодрствуй, и возгласи с Давидом: «не уклони сердце мое в словеса лукавствия, непщевати вины о гресех» (Пс. 140, 4), аще паче всех учащих тя разумел еси? Познавают же лукавии беси, влагающии в сердце твое, яко зелнее приложится брань жены. Где утаися от тебе слово Писания: «яко верен Бог, иже не оставит нас искуситися» (1 Кор. 10, 13) и прочая; аще ли же от немощи нашея сия страждем, то никтоже, слеп сый, виновно да творит солнце, не просветившо, или не помогшо ему. Аще веруеши по писанному, яко истает яко паучина душа человека, наказуемаго за беззакония, то почто разслабевают руце твои, прежде даже не начнеши браней? Аще силен есть сый с нами, о нас сокрушити враги вся, почто показуем его отстояща от нас, неверствием нашим и безделием? Аще сильнейший Его никтоже есть, и хвалишися глаголя: «яко Ты со мною еси» (Пс. 22, 4): имея убо с собою Сильнаго, кого боишися и трепещеши? Но сотворив любовь, приими мало от небеснаго огня, егоже прииде воврещи на землю Владыка всяческих: да егда всеваются от врага плевели, сожжет огнь оный и пояст я. Покади убо от онаго огня, да обоняет твоих кадил Бог, и пренесет Своему Отцу и Животворящему Духу: и обитель у тебе сотворит в твоем храме, в немже поставил еси пред Ним жертву живу, святу, благоугодну Ему. И тогда, согревся от таковаго огня, присно вожделееши, спутшественник, и согражданин, и снаследник исправлших сия святых быти: «идеже око не виде, и ухо не слыша, и на сердце человека не взыдоша, яже уготова Бог любящим его» (1 Кор. 2, 9).

Вопрос 67, тогожде ко иному старцу: что сотворю, отче, яко боюся в нощех?

Ответ. Дотоле боятся граждане варваров, во елико не имут помощи от царя. Егда же известятся, яко приспе во град вождь или стратилат, то не ктому пекутся, ведуще, яко они попечение имут о них. Но аще и услышат, яко подступиша варвары, не пекутся, имуще поборающаго по них. И мы убо аще веруем в Бога, то не боимся бесов: посылает бо нам помощь Свою.

Вопрос 68, тогожде к великому старцу, послан писании:

Прости мя, отче: «накажет мя праведник милостью, и обличит мя» (Пс. 140, 5), глаголет Божественное Писание, якоже врач режущ или жгущ познавает, яко исцеление больный приимет: тако и болезнуяй, весть убо яко режем болит, исцеления же ожидает. Се Богови и святыни вашей себе предаю. Аз бо мню, яко от себе зде не приидох. Прочее убо, сам яже о мне вся ведый, яви, преподобие отче, понеже в смущении мнозе страстей и помыслов сердце мое пребывает. Вся бо готов есмь яже от тебе, Богу хотящу, прияти усердно с радостию, молящутися о мне. И аз же, якоже повелел еси пишу, или глаголю, через господина авву.

Ответ. Брате, се второе тебе сие послание посылаю, повелевающу Богу: имже молю твою о Бозе любовь, возбуди мысленное твое око воздремавшее от уныния, да не уснеши в смерть. И ты убо бодрствуй, да уразумеет ум обходити землю твою благую, да не когда возрастут терния и подавят семя по реченному: «окрест нечествии ходят» (Пс. 11, 9). Но крепок есть, могий иго и рог их сокрушити вскоре, аминь.

Вопрос 69. Тогожде великаго старца к некоему безмолвнику, вопросившу о служащем ему, и о смятении помыслов, и о иже по плоти сродницех.

Ответ. Брате, якоже души моей глаголю тебе. Писано бо есть: «да не когда разум ваш, преткновение будет немощным братиям» (1 Кор. 8, 9). Брат оный служащий тебе простоту имать: да не восхощеши научити его мудрости, понеже воздвизаеши нань гнев. Но доволен буди за него тем, еже бы сотворити потребу твою, не подавая ему о мудрости помысла. Добре есть: да не смутиши сердце его. Совершенных есть, еже оставити помысл свой внити, и паки изгнати и. Прочее ты да не введеши светлости, попалити дубраву свою. Не остави взятым быти одеждам твоим, да не со сваром восприимеши я. Да не искусиши себе смутитися: не бо постоиши в таковом искушении. Прочее внемли себе, и молися о мне. А о иже по плоти сродницех, рекшу Господу: «Кто есть мати Моя? и кто суть братия Моя?» (Мф. 12, 48) не можеши преступити заповедь Божию и имети содружество с плотскими братиями. Аще ли же одеяний требуют, чесо ради не помянул еси нищих, паче, и Самаго Христа глаголющаго: «наг бех, и одеясте Мя» (Мф. 25, 36)? Но наругаем от бесов, в память паки приходиши тех, яже оставил еси Бога ради, яко да преступник будеши. Горе нам, брате! Како делают с нами? Хощеши ли любве их, юже и ко всем имети должен еси? Молися о них, да и таи спасутся благодатию Христовою. Внемли убо себе, не ктому поруган быти: оставлше бо склады, на азбуку возвратихомся.

Понудися убо умрети, аще спастися хощеши. Невменяемость держи, и тецы на предлежащее: да не виною оправдания принесет ти диавол безвременно попечение. Буди без попечения от всякия вещи, и либо живи суть, либо мертви, да не послеши тамо. Помяни Господа глаголюща: остави мертвыя погребсти своя мертвецы. Себе внемли. Они бо не избавят в день оный страшный. Множицею глаголю тебе: пробудися от глубочайшаго сна, не веси бо, в кий час Господь приидет, да обрящет тя готова. О блазнениих же: падение есть души. Возлюби Иисуса от всего сердца твоего, и не падеши вовеки. Мир ти в любви Божией, мир ти в целовании святем.

70. Некий отец безмолвствующ, моли сего же великаго старца помолитися о нем.

Ответ. Егда посылает человек схоластика некоего сотворити слово за него к царю, то присно молится о нем, да услышан будет, не ктому схоластик той, но прошение, еже посла к цареви. Такожде убо и вы молитеся, да услышан буду. И показуя вам послушание, молюся кратко о здравии и спасении души и тела вашего. Аще бо услышан буду (послушает же всячески Бог), то сие припишу вашим молитвам. Ниже бо схоластик бых, еже словом ходатайствовати, то есть праведен, ниже дерзновение имам, но имам себе аки раба посылаема. Господь убо да услышит молитвы оны. И о окаянстве моем помолитеся.

Вопрос 71, тогожде к томужде великому старцу.

Отче, како подобает молитися, глаголати ли: Отче наш, якоже рече Господь или якоже рече авва Макарий скитский, иже глаголет, яко несть потреба многословити, но простирати руце и глаголати: Господи, якоже хощеши и якоже веси, помилуй мя. Аще ли же належит брань, то: Господи, якоже волиши, помози? Еда како совершенным точию единем повелеся глаголати: Отче наш и прочая?

Ответ. Отче наш и совершенным, и грешным повелеся: яко да совершеннии убо, познавше, чии быша сынове, потщатся не отпасти Его. Грешнии же, со стыдением нарицающе Его отца, от них множицею досаждаемаго, усрамятся и приидут в покаяние. Но, якоже мню, более грешным приличествует; еже бо рещи: остави нам долги наша, грешных есть. Кии бо долги имут совершеннии, сынове бывше сущаго на небесех Отца? А еже рещи, не введи нас во искушение, но избави от лукаваго: равносилно есть

глаголом онем аввы Макария, рекшаго: помилуй и помози.

Ответ 72, тогожде великаго старца к томужде, просившу благословения и о безстрастии вопросившу.

Брате! Бог весть полезное. Просил еси хлеб прияти от моея немощи, и выше учиненных ми триех хлебов в седмицу, не вниде в гробницу мою: ныне же по смотрению негли Божию, еже никогдаже от себе сотвори, и прежде неже услышати от мене, оный сладчайший меда сын болезней моих, вся имеяй едонодушны и пользу всех яко свою помышляяй, взыде нося хлеб. И не возмогох возвратити, глаголя: полезно и в сем отсещи свою волю, и преломих и, и послах любви твоей, осуждая себе, яко недостойна того, еже сотворих. Господь же, по вере твоей, той сотворит и мене да не осудит. Аще же будет слово о сем, то даже до тебе и входящих к тебе двоих братий попущено ти есть явити им. О безстрастии же: сие дарование есть Божие: и хотящему подает тое. Бог да подаст руку (помощь) в няже себе простираеши, по страху и по воли его. Аминь. Помолися о мне, брате.

Вопрос 73, тогожде к иному старцу: почто, отче, назва келлию свою гробницею добрый старец?

Ответ. Яко ночи от всех страстей, умре бо совершенно греху. И келлия его, в нейже жив уловлен есть аки во гробе, имене ради Иисусова, место упокоения есть: идеже не ходит демон, ниже князь его диавол: святилище бо бысть, яко вместила есть жилище Божие. Во всех убо прославим вси единодушно Бога.

Вопрос 74, тогожде к томужде старцу:

Понеже в житиях святых писано есть: яко ов убо творяше молитв сто, ов же толико: должни ли есмы и мы молящеся имети меру или ни? И како подобает творити молитвы оны: простертыя (продолженныя) ли, или глаголати Отче наш, и седети на рукоделии? и внегда делати, что подобает творити? Подобие о вечерних и нощных часех, како должен есть проводити и пребываяй на едине, и подобает ли глаголати песни или хваления?

Ответ. Часове и песни церковныя суть предания, и добре умышлена быша, соглашения ради всех людей: и во общежитиях такожде, согласия ради множества. Скитяне же ниже часов имут, ниже песней глаголют: но на едине, рукоделие, и поучение и по мале молитву; стоя же на молитве, должен еси молити, свободитися от ветхаго человека, или глаголати Отче наш или и обоя, и сести на рукоделие. А о еже простерти молитву егда стоиши: аще непрестанно молишися по апостолу, не подобает простерти егда востаеши: чрез весь бо день ум твой в молитве есть. Аще же седиши на рукоделии, подобает изустно читати или глаголати псалмы: и на конце коегождо псалма молитися седящу, яко «Боже, помилуй мя окаяннаго». Аще же стужаемь еси помыслами, то и приглаголати: «Боже, Ты видиши скорбь мою, помози ми». И егда сотвориши три ряды на мреже, востани на молитву, и преклонь колена, такожде и стоя, твори реченную молитву. О вечерних же: дванадесять псалмов глаголют скитяне, и на концы коегождо вместо славословия, аллилуиа глаголюще, и творяще едину молитву. Подобие же и в нощи дванадесять псалмов: и по псалмех седают на рукоделие. И аще кто хощет, глаголет из уст псалмы. Другий испытует помыслы своя и жития святых отец. Ов же прочитая пять или семь листов, глаголет, и паки вземлет рукоделие. Егда же поет, или изустно читает, должен есть устнами пети, аще несть близ его ин, хотяй назирати: яко да никтоже увесть, что творит.

Вопрос 75, тогожде к томужде старцу, о сне, колико подобает спати и

колико бдети? и коликими подобает доволну быти одеждами?

Ответ. О сне нощнем: молися два часа с вечера, считая сия от захождения солнца, и славив, спи шесть часов: и востани на бдение, и сотвори оставшияся четыре часы. И в жатву такожде: обаче сокращеннее в жатву, и мало псалмов, умаления ради нощей. И о одеждах: немощный, за слабость тела своего, должен есть имети зимния и летния. Доспевый же апостолова слова: «еже алкати, и жаждати, и наготствовати» (1 Кор. 4, 11) преходит время свое в единой ризе. Прочее, брате, да не высокомудрствуем, но смиренными да водимся, и да не ропщем, имуще по две или по три одежды.

Вопрос 76, тогожде к томужде старцу: понеже рекл ми еси отче, яко шесть часов бди; како могу познати, яко шесть часов побдех?

Ответ. Аще со опасством уразумети хощеши часы: уснув во един день за изнеможение тела, и бдев едину нощь от вечера до утра, разсмотри, сколько прочитаеши изустно Псалтыря, на часы же разделив известно. И в жатву сотвори тако, и явленни ти будут часове.

77. Тогожде к великому старцу:

Отче, помолися о мне, яко болю, и да возмогу с радостию болезнь понести, и рцы ми, како омыю скверны?

Ответ. Брате любезнейший, радость твориши мне твоими словесы: яко паче по мне еси, не разумевая глаголемых тобою. Рекл еси себе грешна в прошениих: а грешный зол есть раб; и ныне рекл еси, яко имаши болезнь: а болезнь наказание есть исповедуемо. Темже убо, наказание оно послано есть злому рабу. Аще убо тяжестно ти есть приимати наказание, престани быти зол. Аще же зол еси, то приими наказание: аще ли же радуешися наказуемь, то неси зол. Не сый же зол, возлюблен есть. Егоже бо любит Господь, наказует, виждь убо по истине, кто еси? и избери себе едино от реченных тебе. Знает же Бог, яко аще и мое презираю спасение, но творю по силе моей о вас, бояся заповеди. Скверны же аще хощеши омыти, слезами омый: всяку бо скверну омывают чисто: вопий Иисусови, дондеже измолкнет гортань твой: «Наставниче, спаси, погибаем» (Лк. 8, 24; Мф. 8, 25). Возми пепел от сердца твоего, и возжги огнь той, егоже Господь прииде воврещи на землю, и пояст вся сия, и благозвенящо изнесет злато твое и искусно горнило. Трезвения многа треба.

Вопрос 78, тогожде к томужде старцу:

Молю уразумети, откуду бывает слабость тела и истаяние сердца? и чего ради не стою во едином уставе пищи?

Ответ. Брате, удивляюся и изумляюся, како иже в мире желающе приобретати, или воинствовати, нерадят и о дивиих зверех, и о наветах разбойник, и о бедствиях моря, и о самой смерти, и не пренемогают душею желаемаго ради богатства: и сие неизвестно имуще! Мы же окаяннии и ленивии, приемшии власть наступати на змии и на скорпии, и на всю силу вражию, и слышавшия: «Аз есмь, не бойтеся» (Ин. 6, 20), явно ведяще, яко не нашею силою ратуемся, но силою укрепляющаго и вооружающаго нас Бога, пренемогаем и унываем! И откуду сие? Понеже не пригвоздишася плоти наша страху Его, и николиже забыхом снести хлеб наш от гласа воздыхания нашего: сего ради прелагаемся от сего в сие, и от единаго устава пищи в другий устав: яко не прияхом совершенно огня, егоже Господь прииде воврещи на землю: зане той имел бы сожещи и поясти терние от мысленныя нашея нивы: слабость наша и нерадение, и телолюбие не оставляют нас возникнути. И свидетель ми есть Господь, яко вем человека, и зде есть в благословенном обществе сем: и да не речет кто, яко о себе глаголю, и имать мя нечто, ничтоже суща: яко аще пребудет сей якоже есть, ничтоже ядый, ни пияй, ниже одеждою облачимь, до дне посещения Господня к нему, не востребует сих во век. Пища бо его и питие и одеяние, Дух Святой есть. Аще хощеши убо поревновати, трудися, потщися, бойся Бога, и сотворит волю твою. Рече бо, яко «волю боящихся его сотворит» (Пс. 144, 19). И аз бо, аще и ничтоже есмь, но заповеди ради творю по силе моей. Божие же есть еже утвердит, и крепость подати, и возвести во всякое дело благое, и сохранити от всякаго зла, и спасти во Своем Царствии. Тому слава, аминь. Помолися о мне, и умоли старца такожде помолитися с тобою.

Вопрос 79, тогожде к томужде великому старцу:

Молютися, отче, рцы ми: како стяжавает кто смиренномудрие, или молитву совершенную? И что творя кто не мнится парити; и что полезно есть читати?

Ответ. Еже стяжати совершенное смиренномудрие, брате, научи Господь, глаголя: «научитеся от Мене, яко кроток есмь, и смирен сердцем, и обрящете покой душам вашим» (Мф. 11, 29). Аще убо стяжати хощеши совершенный покой, уразумей, что Он претерпел есть, и претерпи, и отсецы во всех волю твою. Сам бо рече: «снидох с небесе, сотворити не волю Мою, но волю Отца Моего, Иже на небесех» (Ин. 6, 38). Сие же есть совершенное смиренномудрие, еже сносити укоризны и поношения, и елика пострада Учитель наш Иисус. Молитва же совершенна есть, еже глаголати Богови без парения, внегда собирати вся помыслы с чувствами. Наставляет же в сие человека, еже умрети от всякаго человека, и умрети мирови, и всем сущим в нем. И ничтоже вящше должен еси глаголати Богови в молитве, разве сие: избави мя от лукаваго, да будет воля Твоя во мне: имети же ум, яко Богови предстояй, и Тому глаголяй. Познавается же егда пременяется от парения, и видит, яко веселится ум, просвещся во Господе. Знамение же, яко коснуся тоя, яко не ктому смущается, аще и напаствует его весь мир. Совершенне же моляйся есть умерщвляяй себе мирови и покою его. Творяй же Бога ради прилежне дело свое, сие несть парение, но тщание по Богу. Полезно же есть чести жития отец. Тако бо просвещается ум во Господе.

80. Тогожде к томужде, прошение молитвы о себе, и иже с ним.

Чада возлюбленная, целую вы о Господе, моляся Ему сохранити вас от всякаго зла и дати вам терпение, якоже Иову; и благодать, якоже Иосифу; кротость, якоже Моисеови; и мужество во бранех, якоже Иисусу Навину; и владение помыслов, якоже судиям; и покорение врагов, якоже Давидови и Соломонови царем; и крепость земли, якоже израилтяном, в примирении Его к вам дати грехов ваших оставление, со здравием телесным, якоже разслабленному; и да спасет вас от волнения, якоже Петра; и да избавит вас от скорби, якоже Павла и прочих апостолов; и да покрыет вас от всякаго зла, яко чада Своя искренняя; и да даст вам прошения сердца вашего, к пользе душевней и телесней, о имени Его. Аминь.

Вопрос 81, тогожде ко иному старцу, якоже явленно сотворити ему о мере воздержания.

Ответ Иоанна. Отцы глаголют о мере воздержания, еже быти без мала, или в ястии, или в питии: то есть наполнено чрево не имети. И ставити должен есть всяк варение и вино. Во время же зимнее, не пиет кто много; и к сему должно быти без мала; и в ястии такожде. Не есть же в сих единых мера воздержания, но и во глаголании, и во сне, и во одеянии, и во всех чувствах. В сих обретается мера воздержания.

Вопрос 82, тогожде к томужде старцу:

Рцы ми, отче, оное «без мала» пищи, или пития, или овощия, колико есть?

Ответ. От всея меры, глаголю же хлеба и иных снедей, или овощия, до единой без мала унгии. О вине же и воде, от обою мнее половины чаши. И аще внимаеши себе, и не трудишися, еже единожды напитися, добро ти есть: аще же не возможно, то дважды, отнюд без мала. В смущениих же и бранех помыслов, от обычнаго подобает уймати без мала: то есть, едину унгию пищи, и половину чаши от всего пития, якоже купно быти мнее двух унгий пищи и мнее единыя чаши пития. Помолися о мне, брате.

Вопрос 83, тогожде к томужде, како кто познает, колико требует ясти и пити?

Ответ. От всея меры, глаголю же хлеба, и иных снедей и овощия, от искуса всех дней возможно есть познати, что приемлет тело пищи и пития: яко пиет кто три чаши в день и яст едину литру хлеба. Аще же увидит, яко требует болше триех тело, без вины, или без труда болшаго, или яко сланая яде, то се есть брань. От триех убо, аще возможет, удержит единыя чаши половину, кроме брани: и в пищи подобне, от литры едину унгию.

Вопрос 84, тогожде, к великому старцу:

Молимся, отче, яко да речеши нам, оно, по силе человеку, колико есть, еже истяжется от Бога: еда како примешает кто в тое от своея слабости, и непщует, яко еже по силе, все творит. Како убо уразумеем тое слово, «по силе», истинно?

Ответ. Дал есть Бог разум человеку разсуждати вещи: аще есть кто от труда путнаго, или от инех тяжчайших дел, таковый не может равность инех дней сохранити, но снисходит мало телеси. Яко яст на день поллитры хлеба: и аще труда ради снесть еще едину унгию, силу свою сотворил есть, еже не ясти вящше. Бдит ли же от полунощи на всяк день? Аще почиет другий един час труда ради, то еже по силе сотворил есть. Труда убо знамение есть, еже препокоити себе мало, якоже речеся: и паки бдети обычно бдение. Еже убо творити елико по силе есть, еже быти без мала, или в пищи, или в питии, или во сне. Аще ли же речеши: и колика есть мера сну? Уставиша отцы пол нощи. О пищи же, еже блюсти себе еще хотяща, и сице выну мало приимати.

Вопрос 85, тогожде к иному старцу:

Кая же должна есть добре быти имущая мера вина и варения на всяк день, пребывающему на едине? И како отцы они жесточайшее правило пищи приемляху? И аще всем тожде правило воздержания должно быти, еже рекосте ми? Или противу устроению вопрошающаго отвещавают и отцы?

Ответ. О вине, здравому и хотящему воздержатися, довлеет едина в день чаша, ничтоже имущу кроме сея. Аще ли же имать часты недуги, да приимет две целии. Подобне и о варении, един вид варения должен есть имети, и будет без попечения о сем. О отцех же оно како имеша жесточайшее правило пищи, яве, яко обретоша телеса своя послушающа. Прочее, иже добре окормляющии себе, с разсуждением противу тела и житие свое устроивают. Помолися о мне.

Брате, яже рех любви твоей о воздержании сущим по нам, и по мере моей глаголах. Аще убо исправим средняя, приходим по преспеянию и в большая: да не ступивше на первый степеник лествицы ногою, абие восхощем на высочайшии. Приходящии бо в меру, яже рече апостол, могут и насыщатися, и алкать: во всех бо научени суть. Ты же веси меры твоя, брате. Егда бо бывает брань, рех ти умалити еще унгию едину, и от пития такожде.

86. Тойжде брате еще вопроси тогожде старца:

Что есть, отче, еже по желанию прияти брашно или еже по естеству?

Ответ. По желанию есть, еже желати прияти брашно не за потребу тела, но чревообъядения ради. Аще же видиши, яко приемлет естество на мало время некоего зелия, вящше от сочива, не по хотению, но по легкости, сие есть различие. Суть же естества приемлющая сладкая, а другая сланая, и ина кислая. И сие несть страсть, ниже пожелание, ниже чревобесие. А еже любити брашно, и желати в похоть: сие есть пожелание, служительница чревобесию. (Се же разумевай, егда держит тя страсть чревообъядения, аще и помыслом облада.) Аще же сопротивляешися тому, и благочинно приемлеши пищу потребы ради, несть се чревобесие.

Вопрос 87, тогожде к томужде:

Что убо, отче, яко не предлежит убо страсть, в самом же времени приятия пищи приходит. Что сотворю, отступлю ли от пищи или ни?

Ответ. Абие не отступай, но сопротивляйся помыслу: поминая, яко зловонием бывает пища, и яко осуждаемся мы ядуще, инем всячески удаляющимся. И аще убо отступит, приими пищу осуждая себе. Аще ли пребывает, призови имя Божие на помощь, и почиеши. Аще же одолеет ти, якоже не мощи ясти благочинно, тогда отсецы пищу. Аще ли же неции седят с тобою, за еже не познати тя онем, взимай по малу. Аще ли же случится ти алкати, сотвори потребу свою от хлеба, или от инаго брашна, на неже не имаши брани.

88. Тогожде к томужде: Знамение чревообъядения каково есть? Явленно сотвори ми.

Ответ. Егда видиши помысл твой услаждающся в брашнех, и понуждающ тя отнюдь предваряти всех, или привлещи пред себе брашно оно; се чревообъядение есть. Внимай убо себе, да не исполниши волю его: и сотвори силу свою удерживая себе, еже не с поспешностию прияти от того, но благочинно: и отринути паче брашно тое пред седящыя с тобою. Не подобает же, якоже рех, виною чревообъядения абие отрицатися причаститися снеди: но достоит хранитися, еже не безчинствовати в восприятии ея. И кроме бо чревообъядения пишут отцы, еже не простирати руки на трапезе пред инем: не прилично бо есть сие, и общаго благочиния чуждо. Егда же таково есть предлежащее брашно, яко не быти яве части пред коимждо, но обще тое всем ясти: тогда не безместно есть приимати кому от него со всеми: обаче со благочинием, за еже не впасти в чревообъядение и в зазрение. Другое же знамение чревообъядения есть, еже прежде времене хотети ясти: еже не достоит творити, аще не некая негли предлежит благословная вина. Во всех же потребно есть призывати Божию помощь, и Бог заступит нас.

Вопрос 89 тогожде к томужде: Востание плоти откуду приходит?

Ответ. Востание плоти приходит от нерадения: ибо нерадение восхищает тя тайно во еже судити и осуждати, и сими предает тя. Егда бо Израиль истинно работаше Богови, то храняше его от врагов его. Егда же нерадяше

о истинном служении, то попущаше Бог враги поразити и.

Вопрос 90, тогожде к томужде: Подобает ли о всех рождаемых в сердце помыслех вопрошати старцев? И подобает ли молящуся и поющу со гласом сие творити? И о памяти всех вещей яже содея кто, или слыша, или глагола, и достоит ли обучатися с братиями?