Текст книги "Аскетика. Том I"

И внимая разуму (знанию) их, и премудрости, не вопроси Бога о сих, аще истинна суть. Се слышасте всю мою глупость: безмолвствуйте прочее, и упразднитеся в Бозе: и преставше от празднословия, внимайте страстем вашим, о нихже истязани будете слова (потребуется от вас ответ) в день судный. О сих бо не будете истязани, почто не весте сих, или изучисте сия. Плачите прочее, и рыдайте. Изследуйте следы отец наших, Пимена, и прочиих, и тецыте, да постигнете (1 Кор. 9, 24), о Христе Иисусе Господе нашем. Емуже слава вовеки. Аминь.

Вопрос 611. Воистинну, отче, вожди есте слепым, и свет о Христе омраченным, и вами истина нам явлена бысть. Ибо обретаем и в книгах старец: яко бе некий велик старец, и от простоты глаголаше: яко несть хлеб, егоже причащаемся, тело Христово, но воображение (образ). И аще не бы прежде помолился Богови о сем, то не бы познал истину. И ин же велик и той старец, непщева Христа быти Мелхиседека, и егда Богови помолися, тогда Бог ему открыл есть. Но прости мя, отче, Господа ради. Дерзаю бо вопрошати, яже паче мене. Но понеже Бог наш твоею святынею просветил есть нас на незаблудный путь истины: прошу о сем совершенно нам сказати, да чист будет ум, от еже о сих испытания, и немощное наше сердце. Чесого ради остави Бог таковых мужей заблудити? Аще бо тии и не просиша, то почто не дано туне сие, на истребление вреда чтущих по сих? Аще бо тии во правой вере и добродетели и не преткнушася, но убо подобнии мне, слаби и нерадиви, достоверность тех во уверение приемше, удобно отсюду вредятся: не ведуще, яже рекосте, яко не вся возмогоша святии таинства постигнути: и яко не помолишася Христу о извещении, аще истинна сия суть. Открый убо мне и сие, отче благоутробне, снисходя немощи моей.

Ответ. Чадо, не остави Бог таковых мужей заблудити. Оставивый бо заблудити есть вопрошаемый о пути, и не глаголяй ему истины. Не вопросиша убо Бога о сем, да приимут от Него истину. Аще ли же глаголеши, яко, почто Бог благодатию Своею не возбрани им, пользы ради чтущих по них тая: то можеши сие рещи и о всяком грешнице: яко ведая Бог, яко аще согрешит, образ будет многим, почто благодатию не возбрани ему, да не от него вредяся мнози? И будет насилована, а не самовластна жизнь в человецех. И что убо возбраняет Богу сим образом спасти всякаго человека? Что бо? И в Писании не суть ли глаголи претыкания неученым и непознавающим разум духовен Писания? Должни ли убо есмы рещи: почто духовнаго разума Писания явно не рече Бог, да не вредятся человецы: но остави сущим по временам святым труд, еже истолковати взыскуемая? Сего ради суть учители и толковники (1 Кор. 12, 28, 30), якоже глаголет апостол: да не заблудиши убо о нихже вопросил еси мужех. Аще бо быша просили Бога, то могли бы прияти. Глаголет бо: «всяк просяй приемлет, и ищай обретает» (Мф. 7, 8). И якоже чрез пророков и апостолов явил есть путь живота Бог, тако кийждо глагола частне. И чрез единаго точию не глагола, но аще что остави сей, то глагола оный по воли Божией. Тако сотвори Бог и во иже по них святых. И аще что глаголют первии имущее сомнение, то толкуют последнии, да всегда славится Бог святыми Своими. Той бо есть Бог первых и последних. Тому слава вовеки, аминь.

Вопрос 612. Прости ми, отче человеколюбиве Господа ради, яко отнюдь скорблю. Прочтох бо книгу догматическую, и зрю сердце мое смущенно и открыти вам о сем боюся, и молчати не могу от помыслов. Что убо повелиши да сотворю, отче святый?

Ответ. Понеже диавол хощет тя ввергнути в празднословие безполезное, рцы, еже хощеши Бог же не даст тому.

Вопрос 613. О воскресении телес святых, рцы ми, в сем ли телеси востанут, в немже есмы ныне, имущем кости и жилы, или будет воздушно и кругло? Ибо и о Господнем телеси глаголют, яко таково имать быти в будущем воскресении, отрицающии яко Господь воскресе из мертвых в нашем телеси, еже от Святыя Богородицы и Приснодевы Марии, нашего ради спасения, прият. И яко глаголют, cиe то быти, еже глаголет апостол: «иже преобразит тело смирения нашего, яко сему быти сообразну телу славы его» (Флп. 3, 21). И паки глаголют: апостол рече: «яко плоть и кровь Царствия Божия наследити не могут» (1 Кор. 15, 50). Cиe глаголюще: яко не может тело cиe быти вечно, от пищи бо стоит, и в будущем веце не возможно ясти и пити. И паки глаголют: яко о Господе нашем Ииcycе Христе глаголет апостол: «Егда покорит Ему всяческая: тогда и Сам Сын покорится покоршему Ему всяческая, да будет Бог всяческая во всех» (1 Кор. 15, 28). И паки произносяще реченное Екклесиастом: «уже бысть в вецех бывших прежде нас» (Еккл. 1, 10) производят отсюду предбытие. И (приводя) реченное во Евангелии, яко «не изыдеши оттуду, дондеже воздаси последний кодрант» (Мф. 5, 26), утверждают нам конец быти муце. Изъяви убо мне сия, Господа ради, владыко: да не прельстит мя враг, и впаду от неведения в сети его лукавыя. Яко отвсюду от несмысльства моего колеблюся. Понеже не удержах святых твоих словес и не отступих из начала от взыскания вещей сих, яко велико имут бедствование душевно (опасность для души). И помолися о мне, отче благий, да прочее изтрезвлюся и попекуся о плачи грехов моих. И прости мне, яко дерзнух о сих вопросити. Но яко ведущее вся, повелесте мне рещи.

Ответ. Брате преднаписах тебе, яко безвременное празднословие насея в тебе диавол. Время бо твое есть плакати и рыдати о грехах своих. Но обаче да не оставлю тя помыслом. Аще хощеши уразумети о воскресении мертвых, аще веруеши пророком, то показа нам Бог воскресение, како будет, чрез Иезекииля пророка, како совокупися кость к кости, и состав к составу, и жилы, и плоть, и кожа, и тако восташа (Иез. 37, 7–8). И апостол, ведый, яко востанем со телесы, научи, глаголя: «подобает бо тленному сему облещися в нетление, и мертвенному сему облещися в безсмертие» (1 Кор. 15, 53). Да не заблудшии: с костьми, и жилами, и власы телеса восстанут: и тако будут во век. Но обаче светлейша и славнейша, по гласу Господа, глаголющаго: «тогда праведницы просветятся, яко солнце во Царствии Небесном» (Мф. 13, 23). Славу прилагает, яже в телесех. Якоже что глаголю: человек входит ко царю простый, и творит его стратилатом (воеводою), и исходит прославлен. Не тойжде ли есть? Еда ли телом изменися? Или якоже человек диакон, и внезапу рукоположен во епископа, и обретается абиe прославлен: тако и зде. И что бо? Якоже суть ныне человецы в теле, не бывают ли богоносцы? И како Моисей виде Господа? Пред ним же Авраам и Иаков, Стефан в Деяниих повествуемый, и прочии: еда безтелесни бешa? Тако будет и в воскресение. Cия убо телеса, нетленна же, и безсмертна, и славиша. Сего-то ради глаголет апостол о человеческом телеси: «Сеется не в честь, востает в славе: cеется тело душевное, востает тело духовное» (1 Кор. 15, 43–44). Сия глаголет: яко мнози от святых, не суть явлени человеком, но паче безчестни в очесех их. И егда приимут тамо славу, аки хиротонию, явится всем, яко духовни суть. Сего ради глаголет: сеется тело душевное у человек, востает тело духовно славно, и удивляются вси. Cиe же глаголет апостол: «иже преобразит тело смирения нашего, во еже быти сему сообразну телу славы Его» (Флп. 3, 21). Понеже световидна творит сия, яко Свое тело. Якоже рече апостол Иоанн: яко «егда явится, тогда подобии Ему будем» (1 Ин. 3, 2). Яко Свет есть Сын Божий, и тии «сынове Божии суть» (2 Кор. 6, 18), по апостолу, «и сынове Света» (1 Сол. 5, 5). Посему глаголет: яко преобразит. А о еже глаголати: «егда покорит Ему всяческая, тогда и Сам Сын покорится Покоршему Ему всяческая» (1 Кор. 15, 28): прежде уразумей, кому написа сия? Коринфяном. И еще еллинство бяше. И обычай бе у некиих от еллин тако: егда прихождаше сын царя их в возрасте, то воставаше и убиваше своего отца. И да не, приемлюще проповедь апостолову, имут по обычаю своему и о Сыне Божии тожде помыслити, изгна причастие сие от них, глаголя им: егда покорит Ему всяческая, тогда и Сам покорится Покоршему Ему всяческая. Но егда врази Его, связани под ноги Его приидут, диавола глаголет, и силы его, и последующих хотениям его. Сего убо ради глаголаше апостол: «не у видим всяческая покорена Ему» (Евр. 2, 8). Доколе? Дондеже приидут Ангели Бога и Отца, рекшаго Ему: «седи одесную Мене, дондеже положу враги Твоя подножие ног Твоих» (Пс. 109, 1). Сих-то врагов на суд ведет Сына Божия. «Отец бо, глаголет, не судит никомуже, но суд весь даде Сынови» (Ин. 5, 22). И да уразумееши, како предает царство Богу и Отцу, слыши: Сын Божий воплотився, прииде призвати и освятити святою Своею Кровию «язык свят, люди избранны, ревнители добрым делом, царское священие» (1 Пет. 2, 9). И разумей, по еже покорятся Ему врази Его, и судит им, то и Сам, аки образ покорения предаст царство, еже стяжа (сиречь) народ свят, Богу и Отцу, глаголя: «Се Аз и дети, яже дал Ми еси» (Евр. 2, 13). И да разумееши равность. Отец суд дал есть Сынови весь. А Сын яже призвал есть даде Отцу. И тако слово исполняется оно: «егда покорит Ему всяческая, тогда и Сам Сын покорится Покоршему Ему всяческая». О вецех же, о нихже глаголет, яко рече Екклесиаст: веждь, яко все время человека, век его есть. Сего ради не рече, яко уже бысть в вецех бывших прежде мира сего, но в вецех мира сего бывших прежде нас (Еккл. 1, 10). И аще хощеши уразумети, яко неучении и неутверденнии развращают Писания и толкуют по учению диавольскому, апостол рече: «брашна чреву и чрево брашном: Бог же и сие, и сия упразднит» (1 Кор. 6, 13), о чревообъядении и неразнственности (о том, чтобы без разбора принимать всякую пищу) и невоздержании глаголя: темже убо упразднил есть брашна и чрево от сосудов. Ведый убо апостол, рекий сие, како рече, яко за страсти глаголет и яко упразднил есть от него и от подобных ему, начать глаголати: «Ниже аще ямы, осуждаемся: ниже аще не ямы, оправдаемся» (1 Кор. 8, 8). Сила же глагола тако есть. О будущем же тако рече Бог: яко равни будут человецы Ангелом (Лк. 20, 36): ни ядуще, ни пиюще, ниже похотевающе. И не невозможно Ему (Богу) ничесоже. Показа бо сие Моисеем, яко сотвори четыредесять дней, и четыредесять нощей. И сотворивый сие может сотворити и вся лета века тако быти человеку. Аще ли же суеслове кто речет (о Моисеи): яко послежде яде, и о Спасителе, то тако пример будущих от части показал есть, якоже и о воскресении, яко воскреси мертвыя, и чрез апостолы, показуя нам, яко будет воскресение. И аще по сих умроша, то не должни есмы не веровати воскресению. Но обаче глаголет: «не о хлебе едином жив будет человек, но о всяком глаголе исходящем (Мф. 4, 4) Духом Божиим». Что имаши рещи на сие? Разве развратити сие, яко же и прочая Писания? А о том: «плоть и кровь Царствия Божия не наследят, ниже тление нетления» (1 Кор. 15, 50): плоть и кровь глаголет нечистоту, и лукавство, и похотения. И хощеши ли уразумети, яко сущии в теле человецы бывают духовны? Слыши Господа, глаголюща Никодиму: «Подобает вам родитися свыше» (Ин. 3, 73). Последи же рече: «водою и Духом» (Ин. 3, 5), а рождаеми от Духа духовни суть. И паки глаголет: «Ни от кровей, ни от похоти мужеския (ни от похоти плотския), но от Бога родишася» (Ин. 1, 13) и: «Бог Дух есть» (Ин. 4, 24). Якоже убо зде еще сущии быша духовни, родившеся от Бога: и тамо не может ли сотворити их духовных? Оное же: «не изыдет оттуду, дондеже воздаст последний кодрант» (Мф. 5, 26), назнаменуя муку их вечную, рече: понеже откуду воздаст? Аще ввержен будет убог должник в темницу, и повелен будет от князя не изыти, дондеже воздаст должный долг, то можно ли судити, яко всячески изыдет? Несть тако. Да не заблудшии, яко безумен. Никтоже тамо преуспевает: но аще кто имать что, отсюду имать: или добро, или гнило, или приятно. Ocтави прочее буесловия сия, и да не последуеши демоном и учению их. Единою бо емлют, единою низлагают долу. Смирися убо пред Богом, плача грехов своих и рыдая страсти своя. Помяни Писание: «И ныне Израилю» (Втор. 10, 12). И паки: «ныне начах» (Пс. 76, 11). Вонми себе (1 Тим. 4, 16). Прочее, Бог да простит тебе, где клонит сердце твое еже испытовати.

Вопрос 614. Ин брат вопроси тогожде великаго старца, глаголя: рцы ми, отче: се вижду некоего творяща дело, и повествую тое кому, и глаголю, яко не осуждаю его, но точию беседуем: убо несть ли оглаголание в помысле?

Ответ. Аще имать движение страстно, то оглаголание есть. Аще же свободен от страсти, то несть оглаголание. Но да возрастет (аще) зло глаголет.

Boпрос 615. Что есть оно: «со строптивым развратишися» (Пс. 17, 27)?

Ответ. Рече Господь: «Аще тя кто ударит в десную твою ланиту, обрати ему и другую» (Мф. 5, 39). Тако подобает развращатися со строптивым.

Вопрос 616. Что есть: «будите мудри яко змии, и цели яко голубие» (Мф. 10, 16)?

Ответ. Иже бо мудрость змиеву ко злу, с целостию голубя к добру смесивый, ниже мудрость оставит лукаву быти, ниже простоту несмысленну.

Вопрос 617. Кии суть имущии грех и злое по произволению, и кии без произволения?

Ответ. По произволению имущии зло, сии суть: подающии свое хотение злобе, и соуслаждающиися, и содружащиися. Сии мир имут с сатаною, а не творят брани с ним в помыслех. Без произволения же имущии злое сии суть, иже противную силу имут противовоюющую во удех своих (Рим. 7, 23), по апостолу: и есть мрачная сила, и покрывало, но в помыслех, с нимиже ни соглашаются, ниже соуслаждаются, ниже послушают, но пререкуют, противостоят, противувещают, сопротивляются, гневаются сами на себе. Сие много суть лучши и честнши у Бога от онех, иже своим произволением волю свою подают злобе, и соуслаждаются.

Вопрос 618. Что есть, еже рече Господь самаряныне: «пять бо мужей имела еси, и ныне, егоже имаши, несть ти муж» (Ин. 4, 18)?

Ответ. Ясен есть глагол сей. Закон бо есть древний, женам, елицы убо смертию мужей своих лишаются безчадни оставшеся, до пяти сходитися с мужи. По пятом же, или родит (жена), или ни, преставати. Аще ли же кая по пятих и с шестым совокупится, не мужа того быти, но прелюбодея, яко кроме закона совокупляющася. Еже убо и на сей случися жене. Аще же и таинственнее кто хощет рещи, то пять мужей законных естественная чувства да речет: зрение, обоняние, слышание, вкушение и осязание, имиже нам все прилучшееся познавается, что есть. Шестаго же и беззаконна, неверстие, имже держима бяше жена от неведения и кроме естества. Рече убо ей Христос, яко «право рекла еси: пять бо мужей имела еси», аки бы пять чувств твоих, аки мужей, имела еси, покаряющих тя, и водящих по своей их воле. Сиречь, яко доволно насытилася еси похотей, яже естественными пятию чувствами привходят: яже уже отвергла еси, мертвости ради бывшия от старости. А егоже ныне имаши, сиречь неверстие, несть твой муж: си есть, не естественно тобою обладает, но странно и чуждо.

Вопрос 619. Ответствование святаго и великаго старца Варсануфия

к новоначальну, немощствующу, и не терпящу скорби немощи.

Брате, не быша хвалилися делателие они истязующии от дому владыки мзды, аще бы не о сем, глаголюще: «яко мы вар дне понесохом и тяготу» (Мф. 20, 12). Претерпим убо, чадо, благодарие скорбь, да приидет на ны милость Божия богатне. И да не стужим си, и в пленение впадем уныния: от сего бо бывает начало погибели. Поминай, сыне, яко «претерпевый до конца, той спасется» (Мф. 24, 13). Чадо, есть и немощь ко искушению, и искушение ко искусству (к обнаружению доблести). Муж бо не искушен, не искусен (не оказал на опыте своей доблести). Искушенный же бедами (опасностями) искусен есть, якоже и злато огнем. Искусство бо приводит некоего (кого бы ни было) во упование, упование же не посрамляет (Рим. 5, 4–5). Да не убо разслабит враг предложение (намерение) твое еже по Богу, и да не поколеблет веры твоея, яже во Святую Троицу. Что бо пострадал еси, рцы ми, да тако ослабееши? Поминай, что глаголет апостол: «не у до крове стасте противу греха подвизающеся. И забысте утешение (наставление), еже вам, яко сыном глаголет: сыне мой, не пренебрегай наказанием Господним, ниже ослабей от Него обличаемь. Егоже бо любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец? Аще же, без наказания есте, емуже причастницы быша вси: убо прелюбодейчищи (незаконные дети) есте, а не сынове» (Евр. 12, 4–8). Аще со благодарением терпиши скорбь, то был еси (ты стал быть сыном) сын. Аще ли же ocлaбееши, то был еси (ты стал быть сыном) прелюбодейчищ. Молю тя, чадо, старец – юнаго обветшавый во oбразе иночестем (аще и ничимже потребен бых) новопостригшагося. И да не будет вотще (молитва), Господи Иисусе Христе, ниже всуе. Трезвися, возбудися от пиянства тяжчайшаго сна: востани с Петром и прочими апостолы, зовый ко Спасителю всех Христу светлым (громким) гласом: «Наставниче, спаси, погибаем» (Лк. 8, 24). И всяко приидет и к тебе, и запретит ветром и морю, и утишит бурю от корабля твоего. Бурю, глаголю, от души твоея, и исторгает тя от кровоядца льва, и голубицу твою от чрева змиева, и сеятву твою от града, и маслину твою от червия, и от сланы (смерзшегося инея) вся древеса твоя, да дадят плоды своя во время. И сеятва земли твоея даст плод зрел, по Господню слову: во сто крат, и в шестдесять, и в тридесять (Мф. 13, 7). Внемли, брате, что претерпел еси за имя Божие. Апостол исчислил есть, яко ничтоже ны разлучит от любве Христовы, глаголя тако: «скорбь ли, или теснота, или глад, или гонение, или нагота, или беда, или меч» (Рим. 8, 35), и мала ли немощь поколеблет ум наш от Бога? Да не будет! Но утвердися, чадо, и увидиши юже от Бога помощь. Первое бо искушение есть cиe: аще победиши со Богом, то не ктому тобою обладает; аще ли же (враг) победит тя в сем, то в службу тя приведет. Прочее стани и претерпи. Имаши бо увидети, аще станеши, кая есть милость Господня. Известна же да будет любы твоя, яко не престаю нощь и день моляся Богови, да спасет тя и сохранит всех нас от лукаваго. И тщание мое есть, да наследите со святыми, яко чада их, «ихже око не виде, и ухо не слыша, и на сердце человеку не взыдоша, яже уготова Бог лобящим Его» (1 Кор. 2, 9). Поревнуй сим, и блажен будеши о Христе.

620. Брат погреши, и слышав от аввы, многажды: точию рцы: прости, ожесточився не рече. И сотворив авва молитву со треми коленопреклонении, егда новину его рещи, прости. Отходящу же брату в келлию свою, рече ему авва: брате, испытай сердце твое в келлии твоей о себе, и обрящеши, откуду тебе приключися жестокость сия сердца твоего. И якоже сие сотворил есть брат он, прииде припадая, и исповедаяся авве, и молил есть: да возвестит великому старцу Варсануфию вещь сию, и попросит его сотворити молитву о нем.

Ответ Варсануфия. Брате, внемли себя. Ты взыскал еси посеяну быти селу твоему от мене. Никтоже тя убедил есть. Виждь, да не оставиши постоянным быти во пшенице твоей от диавола плевелом, снеди, глаголю, огня. Аз ти глаголю. Ты вопросил мя еси о помыслех твоих. Отцы глаголют: аще вопрошает кто, то до смерти должен есть сохранити. И аще кто не хранит, в погибель будет. Злы и люты имаши крыющияся в сердце твоем помыслы. Что помышляеши смертоносны помыслы, яже не суть? Но диавол есть творяй тебе свет тму и тму свет, и горькая сладка ти показуя, и сладкая горька (Исх. 5, 20). Живот он видиши быти смерть, и смерть ону живот. Обходит бо рыкая враг, хотя тебе поглотити жива (1 Пет. 5, 8), и не разумеваеши, зане аще не бы рука Божия, и молитва святых покрывала тя, то в погибель и прелесть его имел бы еси впасти. И отмещеши Божественная словеса, глаголемая ти от аввы твоего, на пользу и спасение души твоея: яко да никогда же приидеши в познание живота. И яковы труды творит о тебе, якоже о своей его души, моля святыя о томжде помолитися о тебе, яко да избавишися от сетей диаволих и смерти, и спасешися во гнездо Господне. И тако трудится о тебе, и неси ли должен сохранити словеса его, яко зеницу ока, и имети его паче души твоея? Но изобилен был еси, насытився от сопребывания его всегдашняго, егоже не должно было тебе, имети насыщение, но помолитися ти подобаше сподобитися того: и да не будет ти во осуждение, еже быти с ним всегда, и творити заповедаемое от него со тщанием, и великим страхом и трепетом, яко да приидет на тя чрез него благословение от Бога, и избавишися от прелести вражия. Да не сбудется о тебе: яко «яде Иаков, и насытися, и отвержеся возлюбленный» (Втор. 32, 15). И сбудется на тебе: «горе тебе Хоразине, горе тебе Вифсаидо, яко аще в Тире и Сидоне быша силы, бывшия в тебе, древле убо во вретищи и пепле покаялися быша» (Мф. 11, 21). И да не услышиши и ты: «возненавидел еси наказание, и отвергл еси словеса моя вспять» (Пс. 49, 17). Что множицею искушаеши себе, от себе подвизая словеса к некиим, и не терпиши что-либо глаголют, но от зависти и оглаголания ослепевает сердце твое и приносит тебе смущение? И множицею преткнулся еси, и сокрушил еси лице твое, и не срамляется медяное чело твое? И не преклоняется железная выя, якоже и от брата Иоанна речено бысть тебе? Кто же употребил есть сия, и спасеся? Каин от начала употребил есть, и прият клятву от руки Господни, и по нем исполнини, и утонуша в водах потопа: Хам, и Исав, и отвержени быша от святых благословений. Фараон ожесточися, и пожре его вода Чермнаго моря в потопление, и сущих с ним. Иже с Дафаном сопротивишася Моисеови, и пожре их земля и домы их. И аще священника сопротивльшася пожирает земля по Писанию, како ты посмел еси сопротивитися глаголющему ти рещи: прости, и не глаголал еси? И отчуждил еси себе от смирения Божия и от словес отец, глаголющих: во всякой вещи требуем смирения, еже рещи во всяком деле и слове, прости. И слышал еси множицею, и не рекл еси. Но и еже рекл еси послежде, не бе истина, понуждение бо, а не с покаянием и умилением рекл еси. Доколь жестоковыен еси, и необрезан сердцем? Виждь, яко никтоже жесток есть. Почто даеши руку и силу диаволу, на погибель души твоея? Прочее трезвися, брате мой, бодрствуй, возбудися от тяжчайшаго сна, и обдержащаго тя пиянства без вина. Где смирение? Где послушание? Где еже отсещи волю во всех? Аще бо во едином отсецаеши волю твою, а во едином не отсецаеши, то явно есть, яко и в немже отсекл еси, паки ину волю имел еси. Во всех бо повинуется повинующийся. И таковый не печется о спасении своем, яко иному о нем ответствующу: емуже повинуся, и вверил есть себе. Аще хощеши убо спастися и жив быти на небеси и на земли, сохрани сия, и даю слово о тебе брате. Аще ли же нерадиши, ты узриши. Упования да не отсечеши: сия бо радость есть диаволя. Авву сотворих прияти тя в недро свое, якоже и бысть. Отерпеваше бо о непокорении твоем, и не послушании твоем. И увещах его прияти тя со страхом Божиим, яко сына родна, а не яко прелюбодейчища. И ты во страсе Божии ввери себе тому во всех. И свидетель ми есть Отец, и Сын, и Святый Дух, яко ношу всяко попечение твое пред Ним. И от мене взыщет кровь твою, аще не упраздниши словеса мои. От днешняго убо дне положи начало, помогаемь рукою Божиею. Се юноша был еси, сохрани себе, и да не вонмеши буесловиям неполезным. Господь да даст ти разум и силу еже услышати, и сотворити. И аще что хощеши вопрошати от времене, не обленюся отвещати тебе, еже даст Бог во уста моя, извещавая сердце твое, что рещи тебе ко спасению души твоея, о Христе Иисусе, аминь.

621. Тойжде брат, еще преслушав авву, и вопросив великаго старца: полезно ли есть сохранити кому с клятвою глаголемая во время ярости его, или покаятися, и яже клятвы не содеяти? Отвеща ему старец сия:

Рече Господь к Моисею: «сниди скоро, беззаконноваша бо людие, ихже извел еси из земли Египетския: уклонишася бо с пути, егоже заповедал еси им: и се сотвориша тельца, и поклоняются» идолу тому (Втор. 32, 7, 8). Како, окаянне, прельщен был еси вскоре от послушания, от негоже отчуждити тя диавол хощет, и неистовится на тя? Не сие ли есть, еже рекох тебе, яко безумен еси, и необрезан сердцем? Где повергл еси словеса моя? Почто тщишися власти в яму диаволю? Почто ослепляет тя враг о тех, яже слышал еси? Не заповедано ли бысть тебе предати себе в руце Божии и в руце аввы твоего? Не слышал ли еси, яко хощет спасения души твоея, якоже пользы души своея? И не должно бе тебе преслушати его, аще бы (повеленное им столь тяжко возмнилося тебе, аки бы) рекл тебе и убийство сотворити, за пользу наипаче братии, юже чрез оправдание погубляет от тебе сатана: да ниже ты пользу приимеши, ниже ин тобою. И хощеши прияти горе фарисеев, и стража Иезекиилева о грядущем мечи (Иез. 33, 6). Да будет ти, яко не можеши воспользовати кого, то почто не глаголеши могущему? Что сотворился еси скоро, яко пес, возвращся на свою блевотину, и яко свиния в кал тинный (2 Пет. 2, 22), пребывая непреклонен в жестокосердии твоем? Заповеда тебе вся рещи бывающая, и грех его бы был: и раздражаеши его, яко людие Моисея. Усрамися прочее, отложи твой древний обычай, и обратись, и приимет тя Бог, милостив бо есть. И да не вонмеши человекоугодиям, понеже погибаеши, и не бываеши раб Божий. Внемли себе, окаянне, и убойся Бога. Во гневе же ярости твоея несть полезно тебе сохранити со клятвою реченная и преступити заповедь Бога глаголющаго: не убиеши (Мф. 5, 21). Лучше бо есть покаятися ко Богу, о глаголанном с клятвою еже сотворити, и не сотворити того, и не впасти во осуждение Ирода, иже, за еже поставити нечестивую свою клятву, усече главу Иоанна Предтечи и отпаде от вечныя жизни: и предан бысть горцей и безконечной муце. Но паче полезно есть покаятися и просити у Бога прощения, подати сие могущаго. Зане блажен бы был и Ирод, аще бы сие сотворил: не сотворив же, бысть треокаянен, и проклят во век. Но и Петр, верховный апостолов, клятся три краты и отвержеся, яко не знает Спасителя, но раскаявся с горчайшим плачем и истинным покаянием, разрешил есть грех свой: и прият бысть от человеколюбиваго Владыки Христа и Спаса, и не точию радости сподобися, Ангелу рекшу женам: рцыте учеником Его, и Петрови (Мк. 16, 7): но и Сам Господь, вместо триех отвержений, трижды вопроси его, глаголя: Любиши ли мя (Ин. 21, 17), Петре, показуя ему, яко добрым покаянием исцелися его оный триех отвержений грех. Не ктому убо да кленешися, преступая заповедь Божию. Аще ли же в сем согрешиши, то да не вознегодуеши покаятися. Ибо и Петр аще бы поставил клятву свою не знати своего Владыки, то чужд бы Его имел быти и славы Его.

622. Брат извещение прием о сих, вопроси тогожде великаго старца тако: рече боголюбие твое, яко может грешный грехи своя покаянием разрешити. Что убо? Еда не требует и молитвы святых, но довлеет собою самем? Аще ли же и не покажет истиннаго покаяния сам, святии же помолятся о нем, не разрешаются ли тех ради греси его?

Ответ. Аще и человек не сотворит еже по силе и не примешает того к молитве святых, ничимже пользуется молящимся святым о нем. Аще воздерживаются ни за него, и молятся о нем, той же сластолюбствует и безчинствует, что пользует моление их еже о нем? Сбывается бо зде реченное: един созидаяй, а другий разоряяй, что множае успеют, токмо труды (Сир. 34, 23)? Зане, аще бы возможно было сему быти, да тай, о немже бы молилися святии, не внимая себе поне мало что, спасался бы, то не было бы препятствия, да и о всех грешных мира сего сие творят. Но аще мало что потрудится и грешный, требует и молитвы праведнаго. Глаголет бо апостол: много может молитва праведнаго поспешествуема (Иак. 5, 16), то есть: да, егда молится зань святый и праведный содействует и грешный по силе своей, покаянием молению святых, не доволен сый сам един ко отданию долгов. Зане той убо мала совносит, моления же святых многая. Якоже бо, аще кто имать нужду понести десять спуд пшеницы, и ниже два может, обрящет же человека боящася Бога, и той понесет от нея девять спуд оныя и оставит ему един, то соблюдает его, да спасется, а не на пути от разбойник убиен будет: тако и зде. Паки подобен есть грешный человеку должну сушу сто златиц, иже напомянен быв от заимодавца о отдании долга, пойде ко иному человеку благочестиву и богату и моли его дати ему по любви, якоже может; он же, человеколюбив сый и видя скорбь его, милосердовав рече ему: брате, что-либо имам в руку моею, даю за тя, и свободишися от рукописания. В должнице убо есть потщатися малая дати, и многих свободитися. Аще бо не увидит он милосердый человек, яко принесе он десять златиц, не хощет той девять, десять дати: ведый, яко заимодавец не даст рукописания, аще не исполнятся должныя сто.

Вопрос 623. Христолюбец некий вопроси инаго старца Иоанна: молю тя, отче: скажи мне вещь сию, да, исполнен быв веселия, отыду в дом мой: понеже помысл имам сотворити благотворение от имений моих, что полезнейше есть, по малу ли да сотворю, или единою?

Ответ. Брате, аще аз и несмь доволен отвещати тебе, якоже подобает, но имаши вразумление Писания глаголющо: не рцы, отшед возвратися, и за утра дам, сильну ти сущу благотворити. Не веси бо, что породит находящий день (Притч. 3, 28). Меры же суть: и един кийждо по мере своей творит. Есть бо человек, иже может мала от приходов своих даяти и есть другий десятую часть от имения своего; ин четвертую часть, другий третию, а ин половинную; кийждо по своей мере, хотяй же приити в совершенную меру, мене последнейшаго да не вопрошает, но Учителя и Врача душ наших, Господа нашего Иисуса Христа, рекшаго богатому оному: «Аще хощеши совершен быти, иди продаждь имение твое, и даждь нищим, и имети имаши сокровище на небеси, и гряди в след Мене» (Мф. 19, 21). Да укрепит же помысл твой пришествие смерти, сокровенно бо есть от всякаго человека. Потщимся убо сотворити благое, прежде неже отыдем от жизни сея. Не вемы бо, в кий день хощет быти звание наше: еда како не готови обрящемся и останем вне чертога с пятию буими девами, не вземшими елеа в сосудех со светилники своими. Сотворим же силу по немощи нашей, и благ есть всех Владыка, еже ввести нас с мудрыми в чертог Свой, в радость неизглаголанную со Христом. Аминь.

Вопрос 624. Брат вопроси тогожде старца: подобает ли приимати от имех и даяти нищим, за еже быти некиим, на сие убеждающим?

Ответ. Понеже о милостыни есть дело, не вси вмещают понести глаголемая, но доспевшии в безмолвии быти и плакати грехов своих. Суть бо нецыи вручающе себе на таковое служение, и Бог весть, что сотворит с ними о сем. А плачущии не имут праздна времене на сие. И како бо отрекшийся своих си, чуждих взыщут строители быти? И иже во святых, преподобный Иларион, сие сотвори: молен бо быв от некиих немала имения прияти на подаяние, рече молящему и: яко тебе подобает своя раздати, занеже и грады обходиши, и веси познаваеши: аз же оставивый и своя, како прииму раздаяти чуждая? Ибо от сего и вина многажды бывает тщеславия или сребролюбия.