Текст книги "Аскетика. Том I"

Ответ Иоанна. Внимати подобает сретающим тя вещем: и тако в пользе души коеждо творити; сице обаче, аки преступаяй заповедь, а не аки добро творяй: тако бо известится авва простити тя.

Вопрос 355, тогожде. Аще особно повелит ми авва не сотворити коея вещи, и, яко человек, преступлю, что должно есть быти?

Ответ Иоанна. Покайся Богу и авве. И потщися прочее исправитися. И Бог простит ти согрешение.

Вопрос 356. Брат, имый вверена себе врата монастырская, и утруждся един, вопроси великаго старца, подобает ли прияти и другаго брата к себе, или ни?

Ответ Варсануфия. Брате, аще кто хощет приити ко Иисусу и ходити путем спасительным, искушений и скорбей должен есть чаяти на всяк час. Глаголет бо: чадо, аще приступаеши работати Господеви, уготови душу твою во искушение. И Господь рече: «Грядый ко Мне, да отвержется себе, и возмет крест свой на всяк день, и по Мне грядет» (Мф. 16, 24). Хотяй убо ученик Его быти, даже до смерти должен есть творити послушание. Еже убо быти едину и трудитися мало, пользует тя множае, нежели приити другому. Нужде же бывшей, присно поможет ти другий. Не тако бо умножается дерзновение, аще помогает ти, якоже умножается, аще купно будет всегда. Аще же не уныеши от труда, обрящеши смирение. И аще обрящеши смирение, то приимеши и оставление грехов. Глаголет бо: «виждь смирение мое, и труд мой, и остави вся грехи моя» (Пс. 24, 18). Аще смиришися, приимеши благодать, и поможет ти благодать. Потрудився бо святый Павел паче всех апостол, глаголаше: «не аз, но благодать Божия, яже со мною» (1 Кор. 15, 10). Аще веруеши не сумненно, имаши укрепитися, и сотворити не точию потребу вратарства, но еще и другая потребы. В надежде убо внимай делу Божию. И, якоже не веси, управит Бог вещь. Господь с тобою.

Вопрос 357, тогожде. Испроси ми, отче, молитвами твоими, силу и разум от Бога, яко невежда есмь и немощен. И понеже случается, егда исхожду держа нечто из поварни, или от ключни, и сретаю некиих отцев, или благородных мужей, что сотворю? И, от приключающихся ми осквернений, помолися, да избавлюся.

Ответ Варсануфия. Аще веруеши, яко от неплодных каменей может Бог воздвигнути чада Аврааму, и яко Отверзый уста ослу может отверсти и тебе, и упремудрити, и вразумит, и укрепит тя. Вся даст ти Бог, брате. Не веси ли вещей? Врата монастырская, врата суть Божия. И весть Бог, яко требует премудрости и разума, вежества и силы, помощи и разсуждения раб Его вратарь. Весть бо, глаголет, Отец ваш Небесный, ихже требуете, прежде прошения вашего. Аще пождеши и претерпиши, блаженна будет душа твоя. Егда же случится идущу ти, или носящу нечто, срести некия от отец, или и великих мира сего: без всякаго смущения положи, еже держиши, и приими их со смирением и страхом Божиим. И Бог сотворит твое сретение, во славу имене Своего, и в назидание всех, молитвами святых. Аминь. О осквернениих же, еще смирится сердце твое, и вмениши себе землю и пепел, то по Бозе покрыет тя смирение.

358. Брат вопроси инаго старца, глаголя: рцы ми, отче, кого подобает вопрошати о помыслех? И подобает ли о техжде иному приносити вопрос?

Ответ Иоанна. Вопрошати подобает, к немуже имаши веру, и познал еси, яко может понести помыслы, и веровати ему, аки Богу. А еже вопросити инаго о томжде помысле, неверия есть дело и искушения. Аще бо имаши, яко Бог глагола Святому Своему, то кая потреба искушения? Или кая потреба искусити Бога, о томжде инаго вопрошающу?

Вопрос 359. И аще пребудет помысл оскорбляя некоего по ответе отец?

Ответ Иоанна. Празден пребысть, яко услышав, ни чисто, ниже прилежно, сотворил есть повеленное ему. И должен есть восприяти грех, и сотворити чисте то, еже слышал есть. Аще бо Бог есть, глаголяй во святых, то не лжет.

Вопрос 360. Еда ли тогожде подобает о томжде второе вопросити, или ни? Вем, отче, яко речено ми бысть не сотворити сея вещи. И, отче, вопросих тогожде о томжде и речено ми бысть сотворити вещь. И что есть сие?

Ответ Иоанна. Брате, судбы Божия бездна многа. Противу сердцу вопрошающаго, Бог влагает во уста глаголющаго ему. Или ко искусу; или яко сердце его пременися, и удостояется слышати инако. Или убо друзии нецыи пременяются, суще в тойжде вещи, и ради тех инако Бог глаголет во Святем Своем. Яко же чрез Исаию глаголаше ко Езекии царю. Потом бо, еже рече ему: заповеждь дому Твоему, умреши бо, пременилося сердце царево, и опечалися. И сим же паки Исаиею рече ему: «се приложи Бог к летом твоим других лет пять надесять» (4 Цар. 20, 1). Аще убо глаголал бы чрез инаго, имела бы вещь соблазн, яко инако глаголют святии. И паки противу сердца ниневитяном глаголаше Ионою, и рече: «яко по триех днех превращу град» (Ин. 3, 4). И егда преложися на покаяние сердце их, показа Бог многое Свое долготерпение, и остави град, яко пременися на благое. И сего ради не должен кто пременити когда вопрошаемаго святаго, но тогожде паки вопрошати. Еда како потреба будет, да пременит Бог ответ оный вине бывшей, и бывает чрез него, да не обрящется соблазн.

Вопрос 361, тогожде. Владыко, имех дело с некиим, и бысть нужда, да поиду с ним ко князю. И приях совет от отец о деле том. И речено ми бысть, что, отшед, должен есмь сотворити: и сотворил, якоже мню, по силе моей, еже не преступити реченная мне от них. И обретая, яко не сретает мя дело по их ответу, скорбех зело. И не ведах, что сотворю. Преступити ли? Бояхся преслушания. Пребыти ли? Не обретах сбытия подобнаго ответу. Что есть сие, отче? И что подобаше ми сотворити, или помыслити в таковое недоумение впадшу, и нужду? Егда некое прегрешение от мене бе, и не ведах?

Ответ Иоанна. Приближается сей ответ первому. Како? Слыши. Приял еси ответ о деле, яко сия сотвори, и обрел еси противность. Прежде убо укорити себе должен еси. Да не како усладися сердце твое в деле том, и сего ради не оставил еси все Богови. И сего ради не остави Бог быти делу по ответу отцев. И от тебе бывает вина, ты же приписуеши ответу их. Елисей бо посла ученика своего воскресити мертвеца и не воскресе; но не бе вина пославшаго, но посланного. Зане како сам послежде воскреси и? Должен убо еси творити по силе твоей сохранити, да будет по ответу. Аще ли же не случится быти по оному, разумей, яко пременение бысть во единой от частей. И сего ради Бог пременяет событие ответа онаго. Яко же что глаголю: есть кто должен тебе десятию пенязми, и не имать вся отдати. И вопросил еси старца: что востребую у него? И рече: по правде, вся десять. И сие извещен бысть старец рещи тебе, еже не простити ему, зане бе жестокосерд. Слышав же, яко имать истязан быти о тех, раскаяся, и помолися Богу, глаголя: Владыко, не имам силы отдати вся десять. Но извести князю, да не принудит мя отдати вся исполненне, и потщуся угодити Тебе останок живота моего. И благоутробный Бог пременяет суд, а ты не веси. Прочее, тогда понеже несть близ тебе плотию его же вопросил еси, помолися Богу, именуя тогожде старца, и глаголя: Боже онсицы, не остави мя заблудити от воли Твоея, ниже от ответа раба Твоего. Но извести ми, что сотворю? И аще что известит тебе, сотвори, веруя, яко Бог святым Своим глагола тебе, и настави тя, ведый, яко всячески пременение некое бысть. И сего ради Бог премени сбытие ответа.

Вопрос 362. Владыко мой, коликожды подобает молитися, да извещение приимет помысл о сем?

Ответ Иоанна. Егда не можеши вопросити старца онаго, то трижды подобает помолитися о всякой вещи. И по сих смотриши, где преклоняется сердце, поне до власа: и сие сотворити. Явно бо есть извещение, и всячески является сердцу.

Вопрос 363, тогожде. Еже помолитися трижды, како подобает? В разных ли временех? Или в самом том же часе? Понеже случается ниже отложение имети вещи той.

Ответ Иоанна. Аще имаши свободу времене, в триех днех третицею помолися. Аще же належание будет, то, яко же во время предания Спасителева, имей Той Образец, яко отшед третицею, тожде рече слово, моляся. И аще по видимому и не услышан бысть, понеже подобаше быти всячески смотрению оному. Учит бо сим нас не печаловати, егда молимся, и не бываем тогдаже услышани. Той бо множае нас весть полезное нам. Обаче благодарения да не отступаем.

Вопрос 364, тогожде. Аще по молитве закоснит приити извещение, что подобает сотворити ми? Аще же и от моея вины будет, и крыется от мене сие, откуду уразумею?

Ответ. Аще по третией молитве не приидет ти извещение, веждь, яко от тебе есть вина. И аще не явится ти согрешение, укори себе, и помилует тя Бог.

Вопрос 365, тогожде. Како должен есть кто поступати, вопрошая отцев: еда вся вопросы, яже вопрошает, непреступно должен есть совершити?

Ответ Иоанна. Не вся, но по заповеди ему подаваемыя. Ино бо есть простый по Богу совет, и ино заповедь. Совет есть научение кроме нужды, показующее человеку правый путь жизни: заповедь же непреступное имать иго.

Вопрос 366, тогожде. Рекл ми еси, отче, различие заповеди и сущаго по Богу совета. Рцы ми и знамения коегождо, и откуду познаваются, и кая обоих их сила?

Ответ Иоанна. Аще ты сам приступаеши ко отцу духовному, вопрошая о вещи, не яко хотя заповедь прияти, но по Богу ответ услышати, и речено ти будет, что подобает сотворити: то должен еси и тако сохранити всячески. Аще ли же и сотворив, вкусиши от них скорби, да не смутишися, к пользе бо твоей тое бывает. Аще ли же не восхощеши сотворити, не мнел еси убо, яко преступаеши заповедь: не бо по заповеди приял еси, но изволися тебе презрети полезное: и должен еси осуждати себе в сем. Подобает бо имети, яко вся, исходящая из уст святых, к пользе слышащих суть. Тожде самое есть, аще и тебе ничтоже отнюд вопросившу, сам от себе рече ти, движимь помыслом иже по Богу. Еже и некогда случися. Некий бо иногда от старец искаше внити во град. А другий старец сам от себе рече ему, яко аще внидеши, то падеши в блуд. И преслушав, вниде, и паде. Аще же вопрошаеши о вещи особне: заповедь хощу прияти, то должен еси сотворити метание и просити, да дастся тебе заповедь, и данной бывшей паки сотворити метание, да благословит тебе сию давый, глаголя ему: благослови мя, отче, сверх заповеди, и помолися, да соблюду ю. Сие же разумей, брате, яко не праздно подает подаваяй заповедь, но помогает молением и молитвами, яко да возможеши сохранити. Аще ли же от совосхищения не сотвориши ему метания, во еже прияти, благословение, да не возмниши праздну быти заповедь, сильна бо есть и тако, но безобразно и не последованно приял еси ю. И аще возможеши потрудитися, то да не обленишися поити, воздати метание и испросити благословение. Аще же не возможеши сего сотворити, то имей себе, яко с невниманием приемша заповедь.

Вопрос 367. Аще аз убо вопрошу прияти заповедь, старец же не имать намерения дати, или напротив, аз убо не прошу прияти, а он заповедь дает: еда ли вменяется в заповедь? И подобает ли всячески сохранити? Аще, понеже суть правила церковная; и глаголи отец, писменно лежащии: еда ли и сия, якоже заповедь, нужду имамы сохранити?

Ответ Иоанна. Аще вопрошенный не имеяше намерения дата заповедь, не вменяется ти в заповедь, аще и ты сего просил еси. Аще же той разсуди дати тебе заповедь, аще и ты сего не просил еси: заповедь есть, и потреба сохранити. И оное яко заповедь подобает прияти, егда догматная правила что определяют, или отцев ответ будет, яко со определением речен. Но сия по вопросу отцев утверди в своем помысле; не бо всячески право разумееши силу глаголов. Вопроси убо их, и в сем паче повинися, и сохрани непреступно, помогающу ти человеколюбцу Богу, молитвами святых. Аминь.

Вопрос 368, тогожде. Аще от искушения преступлю заповедь, что сотворю?

Ответ Иоанна. Аще приемь заповедь от святых, преступиши ю, да не смутишися, ниже да отчаешися, во еже упразднити ю; но поминай глаголюща о праведнем, яко седмерицею на день падет и востанет, и Господа, глаголюща Петрови, яко «седмьдесят крат седмерицею простиши брату твоему» (Мф. 18, 22). Аще убо человеком заповеда тако прощати, колми паче Сам, богат сый в милости, и щедротами препобеждаяй вся! Иже чрез пророка на всяк день вопиет: «обратитеся ко Мне, и обращуся к вам» (Зах. 1, 3). «Милостив бо есмь» (Иер. 3, 12). И паки: «и ныне, Израилю» (Втор. 4, 1). Блюди же, да не услышав, яко не упраздняется обленишися, и приидеши в нерадение. Тяжка бо есть вещь сия. Но ниже в мнимых малых вещех презирай заповедь. Но аще явится в них нерадение, то потщися поисправитися. От таковаго бо нерадения приходит кто в большая согрешения.

Вопрос 369, тогожде. Глаголет ми помысл не вопрошати святых, да не когда уразумев и презрев от моея немощи, согрешу?

Ответ Иоанна. Сей помысл есть зело лютый, да не послушаеши его. Аще бо уразумев кто согршит, то осуждает себе всячески. Аще ли же не уразумев кто согрешит, то ни колиже осуждает себе, и неисцельны обретаются его страсти. Сего ради таковая кому приносит диавол, во еже пребыти страстем его неисцельным. Егда же глаголет ти сие помысл, яко, не можеши исполнити ответа по немощи, тогда тако вопрошай: понеже хощу сие сотворити, рцы ми, отче, что есть полезно. И вем убо, яко аще и речеши ми, не могу сотворити и сохранити глаголемаго; но за сие точию едино хощу научитися, во еже осуждати себе, яко презрех полезное. Сие же и смирение ти есть. Господь да сохранит сердце твое, молитвами святых. Аминь.

370. Ин брат вопроси тогожде старца, глаголя: что есть лжеименный разум.

Ответ Иоанна. Лжеименный разум есть, еже поверити своему помыслу, яко тако есть вещь. И аще кто хощет сего избыти, да не верует своему помыслу, но да вопрошает своего старца. И аще отвещает старец, и обрящется ответ его якоже мысляше брат; ниже тогда должен есть поверити своему помыслу, глаголя: аз от бесов поруган бых, да повинуся помыслу, яко истинен имею разум, и да поверовавша мя во ина низвергнут стремглав. Старец бо рече истину, яко от Бога глаголет, и той не бывает наругаемь отнюд от бесов. Яко же имех рекох и тебе, братови моему. Прочее не вем, аще тако есть. Помолися о мне.

Вопрос 371, другаго. Брат вопроси тогожде старца. Егда отягощаюся от помыслов, и прошу старцев помолитися о мне, и слышу глаголемая от них, абие почивает душа моя.

Ответ Иоанна. Егда обуревается корабль волнами, аще имать кормчаго, той данною ему премудростию от Бога, спасает корабль, и радуется всадник спасаему кораблю. И больнаго несредственно веселит память врача, паче же художество. И бедствующаго на пути от находящих нань разбойников укрепляет глас блюстителей, а колми паче присутствие их. И аще сия тако суть, толико должен подати веселия ответ Отец всякому слышащему! Паче же, егда срастворися протяженною молитвою к рекшему Богу: молитеся друг за друга, яко да исцелеете. И егда, присвояюще себе страдание своего их уда, зовут ко Иисусу своему Владыце, глаголюще со сладчайшими слезами: «Наставниче, спаси ны, погибаем» (Лк. 8, 24); како не сотворит сие веселия слышащему, аще «много может молитва праведнаго поспешествуема» (Иак. 5, 16)? Да не обленимся убо просити их помолитися о нас. Аще бо мы и недостойни есмы, но Той приемлет лице рабов Своих, яко же уже и сотвори: «волю бо боящихся Его сотворит» (Пс. 144, 19) и прочая. Многажды, брате, услышавше разбойницы ответы и глас сильнейших, бежаша. Тако, егда услышат мысленнии разбойницы ответы и гласы сильнейших, слышавших от Владыки и наставника своего Иисуса: «Дерзайте, Аз победих мир» (Ин. 16, 33), и паки: «се даю вам власть наступати на змии и на скорпии, и на всю силу вражию, и ничесоже вас вредит» (Лк. 10, 19); бежат с трепетом, стыдящеся. Да просим убо святых помолитися о нас, и присвояим их себе: не средственно бо пользуемся от сих. Помолися убо и о мне, яко да и аз сотворю сие, аще не пообладает мною шуйцы делание. Господь с тобою, аминь.

Вопрос 372, тогожде. Понеже рекл ми еси иногда, яко и в вопросе помыслов, и в самых вещех свобода добра есть, рцы ми: како бывает свобода вопроса?

Ответ. Свобода в помыслех есть, егда вопрошающий обнажит совершенно свой помысл вопрошаемому, и не сокрыет что от него, ниже притворит что срама ради, ниже от лица инаго изречет той, но от своего лица, якоже и есть. Вредит бо наипаче еже притворятися.

Вопрос 373, тогожде. Рцы ми, Владыко: какова есть в вещех свобода? И како подобает тую употребляти?

Ответ. Свобода есть истина, явно глаголемая: якоже, например, требует кто пищи, одеяния, или вообще яковыя-либо вещи, и должен есть глаголати могущему подати. Подобает же сей свободе бывати к лицу, не соблазняющемуся о ней, не вси бо назидаются в ней. Имеяй бо разсуждение, назидается и радуется; не сый же таков, соблазняется. Должен же есть употребляяй сию, не страстне употребляти, во еже удовольствовати стужающую ему страсть, но ко исполнению требования. Аще ли же ни лице соблазняется, ниже подлежит страсть, то добра свобода. Внимати же должно, да не пред некиим другим, удобно о ней соблазняющимся, употребляет кто тую. Возможно есть паче особь рещи о искомом могущему подати, и сохранити помысл брата без вреда. Иногда бо, негли от труда, требуеши пораньше вкусити, и слыша некто, соблазняется; или и о вещи просиши, и не назидается брат. Яко же убо речеся, добра есть свобода, со страхом Божиим бываемая. Аще бо, требуя вещи, не речеши, ожидая, да он от себе сотворит, случается, яко не весть, яко требуеши, или ведый, забы, или творит сие, искусити тебе хотя, аще имаши терпение; и обретаешися соблазняемь нань, и согрешаеши. Аще убо явно ему речеши, то ниедино от сих бывает. Предуготови же свой помысл, да, аще вопросив, его же ищеши, не приимеши, да не скорбиши, или соблазнишися, или поропщеши. Но рцы помыслу: или не может ми подати, или несмь достоин аз, и сего ради не попусти ему Бог дати. И блюди, да взирая на бывшее неполучение, сего ради не пресечеши юже к нему свободу, еже не восхотети когда-нибудь, аще нужда тя позовет, паки вопросити чесо у него, но везде сохраняй себе в неполучении несмущенна. Аще ли же и от себе кто вопросит тя о вещи, еяже требуеши, то и тако рцы истину. Аще и совосхитився, речеши: не требую; возвратися и рцы: прости мя, яко раскаяхся, понеже нужду имам прияти.

Вопрос 374, тогожде. Что же сотворю, аще усумневаюся, есть ли лице соблазняющееся о таковой свободе?

Ответ Иоанна. Можеши искусити его, соблазняется ли, или ни. Аще бо случится, и требуеши ясти, да не речеши ему: даждь ми; но яко вижду себе алчуща, таковыя-то ради вины. И слыша той явна сотворит себе: и от сего уразумееши его произволение, соблазняется ли, или ни?

Вопрос 375, тогожде. И како вопрошен быв великий старец от брата Иоанна, аще должен есть отсещи овощие ясти, повеле ему причащатися от подаваемых ему, обаче не просити, да приимет: мнится убо зде, яко возбраняет свободе его.

Ответ Иоанна. Помысл предлагает брату Иоанну вовся не ясти. И вопрошен быв великий старец, рече: яко сие от бесов вложено бысть. И хотя изобличите их, рече: от себе да не ищеши, и разумееши злобу вражию. Глаголяй бо ти не ясти отнюд, той имать подложити тебе роптати, аще мало нечто дастся ти, или ниже отнюд не дастся. Сего убо ради тако ему отвеща. Инакоже и заповедь сию даде. А идиже несть заповедь, тогда пользует свобода.

Вопрос 376, к великому старцу. Брат вопроси великаго старца, глаголя: молютися, господине авво, понеже исполнена есть душа моя, и присно хотех тя просити о сем, и бояхся, глаголя; да не како не сотворю, и искушу Духа Господня. И рече ми авва мой, яко падение велие есть души, еже не вопрошати. Молютися, яко да Господа ради помолишися о мне, и да явиши мне, како спасуся, и прости мя.

Ответ. Брате, позде возбудился еси, по еже возсмердеша и согниша раны твоя. Аще убо спастися хощеши, то покайся, и отсецы смертная она. И рцы со Давидом: «ныне начах» (Пс. 76, 11). Прочее, отныне отсецы вся воли твоя, и оправдания твоя, презорство же и нерадение. И вместо тех, держи смирение, послушание, повиновение. Имей же себе уничиженна во всех, и спасешися. Аще сохраниши сия, имаши сохранен быти от всякаго зла: аще ли же ни, ты узриши. Истязай бо имаши быти в день он страшный. Не ныне точию, егда вопросил еси, за презрение осужден быти имаши, и истязай ради сих всех, но и в будущем. Прочее внимай себе, и да не погубиши мзды (твоея), паче же времене, не радя о своем спасении, еже любит Господь.

Вопрос 377, тогожде. Еже отсещи волю, что есть?

Ответ Иоанна. Се успеяние есть по Богу. А еже отсещи волю, сие есть: яко да в добрых убо свою отсецает кто волю, святых же волю творит; в злых же и сам о себе бегает зла.

Вопрос 378. Егда о тонких помыслех вопрошаю, высокомудрствует мой помысл, аки обстоятельно испытуяй о таковых?

Ответ. Аще хощеши о тонких помыслех вопрошати некиих от отец и не высокомудрствовати, поминай, яко истязуется первое от человека исправление великих помыслов, запрещенных от апостола: любодеяния, студодеяния, зависти, и таковых; прочее же и тонких не презирати. Тщайся бо о тонких, а не радяй о великих, подобен есть человеку, имущему храмину оскверненну и полну прочих безчестных веществ, посреде же тех имущу и тонкия плевы. И мняся очищати ю, нача износити плевы из храмины и остави камения и другия вещества, о нихже претыкается. Аще убо изнесет плевы, ни единыя красоты приемлет храмина. Аще же изнесет камение и вещества, тогда ниже плевы, может оставити, безобразие бо творят храмине. И посему-то Спас наш поноси фарисеом и саддукеом, глаголя им: «Горе вам, яко одесятствуете мятву, и копр, и кимин, и остависте вящшая закона, яже бе нужда творити, и онех не оставляти» (Мф. 23, 23).

Вопрос 379, тогожде к томужде. Аще кто вопросит старца о вещи, и речет старец, яко она будет; таже от являющияся вещей неудобности и несогласия усумневается: еда ли от сего осуждается, аки неверен?

Ответ. Аще будет вопросивый подвижник, исправляет свое неверие, веруя, яко не лжет Святый Дух, глаголяй усты святых Своих, якоже хощет. Глаголет бо: «Бог возглагола во святем Своем» (Пс. 59, 8). Аще бо не верует, яко Бог есть глаголяй усты вопрошаемаго, таковый неверен есть, и искони осужден есть. Аще же веруя сумнится, подобает исправитися тому, услышавшу Екклесиаста глаголюща: «Седмерицею на день падает праведный, и восстает» (Притч. 24, 16). И паки внимати подобает, яко многократно Бог Божественными Писании глагола о рабех Своих, и повидимому, противная случишася им. Тако, рече Бог: «прославляющия мя прославлю» (1 Цар. 2, 30), и обретаем некия от святых, до кончины в бесчестиих и скорбех многих пребывшия. Можем ли убо рещи, яко таковых не прослави Бог? И по истине зело препрослави их. Но не видящий сердечныма очима, не видят их славы. За сие бо терпение Иов препрославлен бысть. Аще и во очесех человеческих другов его возмнеся по достоинству сия терпети, но послежде слыша от Божественнаго гласа: «Мниши ли Мя инако тебе сотворша, разве да явишися правдив?» (Иов. 40, 3), и Лазарь же оный убогий, лежа при вратех богатаго, в презрении мнозе и скорби тела, зело прослави Бога терпением. И понеже рехом, яко Бог прославляющия Его прославляет, противная мняхуся случитися Лазарю, пребывшу во многих скорбех даже до смерти. Но последи явлено бысть, како прослави его Бог, посадив в недрех Авраама. Что же имамы рещи о святом Павле, сподоблшемся зрения Самаго Сына Божия и слышавшем Божественный Его глас? О немже засвидетельствова Бог, яко будет сосуд избранный, и восхищенном бывшем на небеса, и слышавшем Божественный Его глас, и неизреченныя глаголы, яже никтоже слыша? Но обаче таковый свешен бысть второе оконцем и в кошнице. Еда ли не бысть сие неверным и безразсудным аки достойно соблазна? Аще и сам Павел бысть Божественныя благодати сподоблен; сие же бысть ко искусу многих, аще пребудут таковую веру имуще о апостоле. Тако и в прочих святых бывает к пользе приходящих. И что глаголем о человецех, егда самому Спасителю, молящуся и глаголющу: «Отче, аще возможно есть, да мимо идет от Мене чаша сия» (Мф. 26, 39) апостоли, слышавше, соблазняхуся, не ведуще, яко сие по смотрению к пользе всех человеков бяше? Темже убо и зде тако бываемая, не бывают, за немощь вопрошаемаго, или молящагося, но искуса ради и укрепления веры приходящих: аще до конца пребудут утверждени верою. В сей бо пребывающе, на последняя сбытия вещи взирают, на славу Божию бываемую в них. Суть же нецыи, вопрошающе о уповании, еже получити некую телесную вещь, не ктому ради пользы душевныя: и сии вскоре получают. Чесо же ради не паче внимаем тем яже быша со Ананиею и Азарием? Иже имуще упование на Бога, яко может их спасти от пещи, глаголаху цареви: яко Бога имамы на небесех, могущаго нас избавити от рук твоих, и от пещи огненныя: аще ли же и ни, мы богом твоим не служим (Дан. 3, 17, 18) И не абие прослави их Бог, но остави их, дондеже и в самую пещь себе предаша. И яко явися всем совершенное их на Бога упование, избави их, и прослави их, оставль ими образ пренемогающим к долготерпению Бога, рекшаго: «претерпевый до конца, сей спасется» (Мк. 13, 13). Оставлше убо все Богови, ведущему паче нас, что пользует нам духовне и телесно; да не усумнимся о глаголемых от святых отец. Но в терпении благое и душеполезное приимем от Бога сбытие, поминающе пророка глаголюща: «Судбы твоя бездна многа» (Пс. 35, 7). И яко неизследованны суть Его судбы, яве есть от случившихся израильтянам. Слышавше бо внити в землю, текущую медом и млеком, и на плотская сия взирающе, много искусиша Бога неверием, яко сих не получиша. Не разумеваху бо, яко мед и млеко глаголаше будущая, духовная благая, ихже закон сень бяше, якоже и апостол нам сказа. Над всеми же сими, да веруем человеколюбивому Богу и благому нашему Владыце, промышляющему присно о нашей жизни, паче яже мудрствуем или помышляем. Яко Тому слава, Отцу и Сыну, и Святому Духу, ныне и присно и во веки веков, аминь.

Вопрос 380, паки тогожде. Отче, молю, изъясни ми вопрошение. Аще бо случится мне вопросити отцев о плодах моего села, аще добри будут; или и врага имам, и вопрошу о нем, аще может мя повредити; и рекут ми о плодах убо, яко будут, о вразе же, яко не вредит мя; и плоди убо не быша, враг же чается вредити; како должен есмь веровати? И аще обрящу помысл, разслабляемь в вере ради противности являемых, како подобает его воззвати и утвердити? Сотвори, отче, и ныне милость свою со мною и просвети мя на правый путь, и помолися о немощи моей.

Ответ Иоанна. Глаголы святых, не должни есмы праздни вменяти, действительни бо суть, и по Богу речени. Но понеже мы к плотским и вещным пригвождаемся, разумети глаголемая от святых не можем. Ибо, якоже Бог радит о спасении душ, тако и святии Его. Егда убо глаголют к нам святии, прежде разсудим о внутреннем человеце, и обрящем, яко аще постигнет скорбь от человек, или тщета доходов, к пользе нашей бывает. И в сем является сила проречений, рекших добр быти доход. Неполучением бо польза бысть души, и отсюду бысть нам доход добр. И о вразе, яко вредит. Бысть бо вражда его вина душевныя нашея пользы, аще благодарно терпим, поминающе рекшаго: «о всем благодарите» (1 Фес. 5, 18) и «молитеся за враги ваша, и за творящих вам обиду» (Мф. 5, 44), и «блажени есте, егда поносят вам, и ижденут» (Мф. 5, 11) и прочая. Аще бо будем праведни, во успеяние нам будет от них искушение; аще ли же грешни, во оставление грехов и исправление, и во искусство, и учение терпения обрящется. Аще же случится, яко да и в самом телесном благоприемлюще будем, или в доходех, или в мире от врагов наших; паки о самом внутреннем человеце разсудим, яко к пользе ему поспешествова молитва праведных. Сим убо тако бывающим, не может добра ненавистник повредити нашу веру. От обою бо яже к пользе внутренняго нашего человека происходят. И аще мирно поживет кто, обрящет сбытие проречения святых, яко к пользе предречено бысть. Господь да вразумит тя и просветит сердце твое.

Вопрос 381. Аще попрошу святых о страсти душевной, или телесной, и верую, яко внезапу исцеление будет: еда ли тако бывает, аще и не на пользу ми есть внезапное исцеление?

Ответ Иоанна. Не добро есть прежде со усилием молитися исцелену быти от страсти, не ведущу, что полезно ти есть, но остави рекшему: «весть Отец ваш Небесный, ихже требуете, прежде прошения вашего» (Мф. 6, 8). Тако убо помолися Богу, глаголя: Владыко, в руках Твоих есмь, помилуй мя по воли Твоей. И аще полезно ми есть, скоро исцели мя. О томжде и святых проси помолитися и несумненно веруй, яко пользующее тя творит Бог. И благодари Ему во всех, поминая оное: «о всем благодарите» (1 Фес. 5, 18); и приимеши пользу душею и телом.

Вопрос 382, тогожде. Отцы же, просимии помолитися о некоем искушении, чесо просят: избавления ли от страсти, или полезное просят? И како авва Сисой, и друзии отцы, о ученице избавления от страсти просиша у Бога? Како же разумеваем, яко вся возможна суть верующему? И паки, никто же ли искушаемь бывает, паче еже может? И искушение оно к полезному ли бывает? И пользуют ли молитвы святых?

Ответ Иоанна. Брате, понеже праздни есмы аз и ты, оставляем страсти наша и ина вместо иных вопрошаем: обаче, о нихже вопросил еси, сие непщую. Отцы совершеннии молятся, да полезное Бог сотворит с человеком. Аще убо полезно ему есть, то оставляет на нем страсть, ради терпения. Аще же полезно избавитися от страсти, творит избавление. И сие предуведению приписуем Божию. Авва убо Сисой, помолися о ученице своем, извещен быв помолитися. И другий старец, паче же и инии по извещению моляхуся. А еже должно имети, яко к пользе суть случающаяся человеку, от сего яве есть, яко апостол глаголет: «о всем благодарите». А еже, вся возможна суть верующему, есть еже во уповании понести скорбь страстей, еже терпети, еже долготерпети, еже вся носити доблественне, яко же Иов. Не искушает же Бог человека, паче еже может, но аще не суть молитвы святых, иногда человек за свою слабость, предатель бывает. Бог да простит суесловию твоему, брате.

Вопрос 383, тогожде. Аще имам предание святых, и случится мне разбойнический преходити путь, или ради особныя моея потребы, или ради благочестиваго дела, или ко отцем святым: рцы ми отче, како должен есмь прейти той? Еда ли без разсмотрения, дерзая на предание? Или киим образом? Аще же и впаду нечаянно в разбойники, како должен есмь быти в помысле? Не точию о себе и сущих со мною, но и о сущих со мною вещех? Аще ли же и случится мне не рещи авве о разбойницех, должен ли есмь возвратитися к нему и рещи?

Ответ Иоанна. Аще предварим прияти предание, рекше молитву, от некоего святаго, посылаеми некамо, должны есмы дерзати, яко совершенно помощь Божию имамы. Аще бо в мирских, егда предаст кто дом свой некоему велику не мало радение имать о нем за честь предавшего ему той: кольми же паче у Бога совершенство приемлет предание святых, еже сохранити предаемаго Ему от них? Глаголется бо о Нем, яко «волю боящихся его сотворит, и молитву их услышит, и спасет я» (Пс. 144, 19). Всяким убо образом должни есмы имети предание святых совершенное, в помощь и во спасение души. Аще же, приемше предание, обрящем и скорбь и озлобление в вещех, или на пути, по попущению Божию, впадем во искушение: да не озлобимся, ниже да держим предавших ны Богу аки немощных, и соблазнимся о них, зане, по предании, бысть нам пагуба вещи, или и язва телу. Но помянем, яко и сам божественный апостол, силен сый, и совершен, и свят, во вся сия впадаше, и хваляшеся, глаголя: «Колики беды претерпех, и от всех избави мя Господь» (2 Кор. 1, 10). И: «яко многи скорби праведным, и от всех их избавит я Господь» (Пс. 33, 20). И: «яко многими скорбми подобает нам внити в Царствие Небесное» (Деян. 14, 22); и паки: «муж без искушения, и неискусен» (Сир. 34, 10), и не потребен. И держим во уме, яко всяко дело благо без скорби не совершается, имать бо сопротивляющуюся зависть диаволю. Аще же случится нам преити без скорби, да не высокомудрствуем, яко достойни суще, спасени быхом от скорби. Но ведый Бог немощь нашу, яко не сильни есмы претерпети скорбь, преданием святых покры от скорби. Ибо о претерпевших в скорби, или во искушении, писано есть: «блажен муж, иже претерпит искушение, зане искусен быв, приимет венец жизни» (Иак. 1, 12). Вонми же, да не яко имея предание святых, с небрежением твориши свой путь. Но должен еси, аще услышиши что-либо на пути, или о разбойницех, или о некоей вещи, утвердити себе, и сотворит по силе своей не впасти в вещи сия. Но, моляся Богу, и поминая предание святых, внимая, или со инеми прейти, или вопрошати, киим способом можеши безопасно проити, или самем тем путем, или инем. Аще же и виною аки бы благочестиваго дела хощеши проити, или ко отцем святым; то и тако, аще услышиши, о разбойницех, или других бедах на пути, да не яко дерзая, вринеши себе преити оный путь к ним, без утверждения, да поне тако избежиши высокомудрия и беды. Не подобает бо кому волею себе воврещи во искушение, но Божиим попущением приходящее благодарно терпети. Обретаем бо, яко и нецыи от святых, хотевшии отыти на посещение других внутреннейших святых, и слышавше о разбойницех и других скорбех, отлагаху отыти. Сие бо смирение нам обретается. Аще же веси, или слышал еси о пути, яко скорбь имать, потщися вопросити авву глаголя: что разсуждаеши, да сотворю? И еже глаголет ти, сотвори. Аще же от забвения не речеши ему, и обрящешися приемь предание, и помянеши на пути, яко последова забвение, и не рекл еси ему; несть потреба возвратится; но помолися Богу, глаголя: Владыко, прости ми и моему нерадению. И за предание святаго Твоего, и благость милосердия Твоего, настави мя по воли Твоей, и спаси мя, и сохрани от всякаго зла и лукавыя вещи: прославися бо Твое имя, вовеки. Аминь.