Текст книги "Аскетика. Том I"

228. Тогожде к томужде великому старцу. Сотвори милость со мною владыко, и рцы ми, како могу спастися в сие время? Яко помысл боязни взыде на сердце мое. Что убо повелеваеши, да сотворю?

Ответ. На всякое время аще возможет человек отсещи свою волю во всех, и имети смиренное сердце, и смерть выну пред очима, то может спастися благодатию Божиею: и идеже аще будет, не пообладает им боязнь. Таковый бо задняя забыл есть, и в предняя простирается. Твори сия, и спасешися без попечения, Богом.

229. Брат некий юнший, имея веру к томужде брату, учащаше к нему аки пользы ради души. И единою потребы его творяше, аки служа ему. А брат оный неуразумев полезное, ничесоже о сем вопрошаше. Старец же от Бога познав, яко прозорлив, пишет ему от себе сия:

Увещание Варсануфия. Брате, первая согрешения бывшая, долготерпением Божиим, Бог молитвами святых и аввы твоего простил ти есть, к явлению плодов правды, да исполнится на тебе Писание, глаголющее: «идеже умножися грех, преизбыточествова благодать» (Рим. 5, 20). Почто убо паки предпосылаеши огнь внити в дубраву твою? Понеже не оставляют тя познати, дондеже не поймут тя в руки своя, и тогда исполнят на тебе волю свою: вещь бо сия пользы не имать, но беду: внимай убо, яко со оправданием творят тя учителя: да приимеши запрещение апостола, глаголющаго: «научая иного, себе ли не учиши» (Рим. 2, 21). Слыши, брате, разслаблен ли был еси, яко хощеши служим быти от иного? Не веси ли, яко осуждение есть, наипаче юнейшу могущему послужит инем? Веру ми ими, яко аз худейший, дондеже не извести ми Бог безмолвствовати, сам себе служих: и в болезни творях себе малое варение и теплоту. Не твори тако: понеже умреши зле. Но требованию бывшу, да не лишше возглаголеши что когда ли кому-либо паче искомыя вещи: не наздавый бо свою келлию, како другаго созиждет? Не веси ли яко Господь рече: «Сын Человеческий не прииде да послужат Ему, но послужити» (Мф. 20, 28), да не прельстишися совратитися от сих: «зане кровь твоя на главе твоей» (Иез. 33, 4). Рцы же со смирением, якоже есть истина, вопрошающим тя о чем-либо: простите мя, яко прельщаюся: вопрошах бо и слышах, яко юный юнаго не пользует, аще и силу всего Писания подаст ему аки питие. Аще убо сотвориши силу свою, и аз даю ти слово пред Богом, яко не изглажден будеши от моего сердца, но силу мою творю, моля Бога, да изведет тя от лютыя сея тмы во свет неизглаголанный: от прелести бесовския, в познание Христово: от вторыя греха смерти, в жизнь вечную. И аще хощеши спастися, да не презриши реченная. О, да увижду тя плодоносяща, в винограде Владыки нашего Иисуса Христа, в тридесять, в шестдесят и во сто, во славу Отца, и Сына, и Святаго Духа. Аминь.

227. Прошение тогожде к томужде великому старцу.

Господа ради, прости мя отче, яко не ведя поруган бых. И помолися о мне, да положу начало.

Ответ. Обретаем брате, яко, егда прихождаху нецыи ко Владыце Христу с истинным покаянием, приемляху оставление грехов, якоже рече оней грешнице: отпущаются тебе греси твои мнози. И аз ти глаголю: аще сотвориши силу твою, сотворити от мене тебе глаголемая, то помилует тя помиловавый Давида и простивый ему и грешнице. И понеже рекл еси, яко положити хощу начало, то и мене радостотвориши. Начало же есть смирение и страх Божий. А страх Божий начало премудрости. Что же есть начало премудрости? Разве еже удалятися от всех ненавидимых Богом. Какоже удаляется кто сих? Разве от еже не творити что без вопрошения и совета, или глаголати что от неподобающих, и с сими имети себе буия, и неслана, и уничиженна, и ничтоже суща отнюд. Не яко праведен сый глаголю ти, еже хощу глаголати, брате: Бог весть, но аще имаши веровати, по вере твоей сотворит с тобою Господь. Писано бо есть: Много может молитва праведнаго поспешествуема. Сотвори убо силу твою положити во влагалище твое сто динариев, и аз положу в не тмы моих талантов. И да невознерадиши о сих, зане велий будет ти плач. Всегда же поминай и сохрани сия, и верую, яко не вотще будет труд твой, ниже мой о тебе бывший. Аще соблюдеши бисер, обогатити имаши в нем, о Христе Иисусе Господе нашем, Емуже слава вовеки. Аминь.

228. Прошение тогожде к томужде великому старцу.

Понеже, владыко, скорблю на авву, аки имущаго различие большее мене к некиим братиям, и соблазняюся нань за сие, якоже и брань прияти ми ненавидети и: помолися о мне, и скажи ми, что да сотворю.

Ответ. Брате, сам себе искушаеши. Не веси ли, яко кийждо от своея похоти искушается, прелщаем? Внимай себе, яко скоро взыска диавол поколебати тя от преданнаго тебе вразумления: да не даст ему Бог места. Рече Господь Петрови: «Се сатана просит вас дабы сеял яко пшеницу: Аз же молихся о тебе Отцу Моему, да не оскудеет вера твоя» (Лк. 22, 31). Брате, не внимай никомуже иному, но самому себе, и не любопытствуй, не пользует бо сие тя ни в чемже. За ничтоже ли смутил есть тако сатана сердце твое? Блюди, да не суетно покажеши мое о тебе моление, еже ко Богу. И аще и не бы пришел еси ныне, то явити тебе имел бых сия. Согрешил ли еси? Умолкни: и не помышляй злая, но благая. Благий бо благая помышляет, а злый злая. Господь да простит ти. Востани паки, держимь рукою Божиею: и да не вериши помыслом своим: якоже бо хотят бесове, показуют тебе вещи, ограждайся от них, люти бе суть, и не истовятся на тя. Да упразднит я Господь скоро от тебе, брате. Аминь.

233. Тойжде брат, еще от техже помыслов стужаемь, послал есть паки, моля тогожде великаго старца, послати ему слово живота. Он же восписа ему сия:

Брате, зле смущают тя помыслы оны и бесове на авву твоего, по злой своей хитрости, да возненавидиши его, любяща тя, и оскорбиши его, хотяща тя покрыти, якоже свою душу: да исполнят на тебе реченное: «Вместо еже любити мя оболгаху мя. И положиша на мя злая за благая, и ненависть за возлюбление мое» (Пс. 108, 4–5). Многажды бо уверяет тя, яко любит тя, и не веруеши: но зависть диаволя ослепляет сердце твое, да помышляеши злая вместо благих и горькая вместо сладких: «да восприимеши оное горе со глаголющим доброе лукавое, и сладкое горькое, полагающим тму свет, и свет тму» (Ис. 5, 20). Окрадают тя, «несмысленне и косне сердцем» (Лк. 24, 25), и не разумееши, яко в погибель души хотят тя привести: и утаеваеши у себе, и презираеши словеса моя, и препобеждаеши я. Не пользуют тя сия, не пользуют. Аще ли же извещается твое сердце, неси человек, но диавол. Той бо в неверии стоит, и в непокорении, и непокоряющиися диаволами, якоже и он, бывают. Не разумееши ли, что твориши, брате мой? Яко многажды приводиши авву своего в преогорчение, и той носит твое неудобство? И многажды утешает тя, яко сына истиннаго и возлюбленнаго, яко имать тя поистине, и на время умягчавается сердце твое, и паки не стоиши во благом, но пременяешися паки, якоже луна. Ко Владыце моему Богу имею: тако ми Владыки Бога моего, яко глаголю тебе ничтоже без Бога, ко спасению души твоея. И многократно исках послати ти слово о движениих твоих, и помышлениих сердца твоего, и долготерпех до сего дне, ожидая, да познаеши сам пользу твою. Ей чадо, послушай мя худейша, и удали от себе злыя мысли, и восприими благая: незлобие, любовь, долготерпение, смирение, истощающее весь тул диавольский и прохлаждающее главу стяжавающих е, привлекающее к себе благодать Божию. Возбудися, бодрствуй, благодушествуй, утешися в сем и возжелай спастися. Возненавиждь зависть, ревнование, рвение и оглаголание и подобная сим: и буди овча незлобиво стада Христова: уд честен общежития, сосуд освящен, сын царствия, наследник славы, яко да по заповедем Самаго Христа жительствовав, получиши живот вечный и славное воскресение. Свидетель бо ми есть Бог, яко молюся о спасении души твоея. Да даст ми, како хощу ти спастися и в разум истины приити. Аще бы поучался еси в моих словесах часто, то не имел бы еси поползнутися, ниже заблудити, но ходити тесным по Богу путем, ведущим в живот вечный, иже о Христе Иисусе Господе нашем. Бог да вразумит тя, брате, к воли Своей.

Вопрос 234, тогожде к томужде великому старцу.

Прости ми, господине авво, Господа ради. И понеже воспоминаю, яко глаголют отцы: яко, да внидем в келлию, и помянем грехи наша. И егда воспоминаю, не имам болезни о них. Многажды же желаю и умиления, и не приходит. Рцы ми, что есть возбраняюще е, и не приходит.

Ответ. Брате, наругаешися глаголя: хощу, и не хощеши, яко не хощеши со истиною. Еже бо внити в келлию, души есть, и испытати ю, и собрати помысл наш от всякаго человека, и тогда болезнуем и умиляемся. Возбраняяй убо умилению приити тебе, воля твоя есть. Аще бо не отсечет человек волю свою, не болезнует сердце. Неверствие же не оставляет тя отсещи волю свою. А неверствие бывает от еже желати нам славы человеческия: Господь рече: «како вы можете веровати, славу от человек приемлюще, и славы яже от Единаго Бога, не ищуще» (Ин. 5, 44)? Многажды возбраняю воду снити устами твоими во чрево твое, и ты носом черплеши ю. Сие же есть лютое оправдание, низводящее во ад человека. Сего ради убо ругаются ти горчайшии беси: и удобна не удобна тебе творят. Или ты, вопрошая мя, престани от воли твоея, и оправдания, и человекоугодия, или аз престану от тебе. Аще бо не потрудишися отсещи волю свою и не хотящу сердцу твоему, то кая будет польза от вопрошения твоего? Аз рех ти: даждь ты сто динарий, и аз подам тмы моих талант. И се прежняя твоя согрешения отпущена суть, и любопришися оконцем оправдания в горшая впасти: престани, брате, не добр бо есть путь сей. Рече бо матерь Сарра: аще хощу угодити всем человеком, во дверех их обретаюся кающися. И апостол глаголет: «аще бых человеком угождал, Христов раб не бых был» (Гал. 1, 10). Аще поистине хощеши плакати грехов твоих, себе внимай, и умри от всякаго человека. Труд бо есть, брате, еже спастися человеку! Три сия отсецы: волю, оправдание, человекоугодие: и приидет тебе умиление воистинну. И покрыет тя Бог от всякаго зла. Брате, засвидетельствую тебе, внимай себе: радуйся, бием, обличаемь, досаждаемь, наказуемь. Остави коварство змиево от себе, а не мудрость, и держи целость голубину с мудростию, и поможет ти Господь. Се путь спасения. Аще угоден ти есть, шествуй: И Бог даст ти руку. Аще ли же не хощеши, ты узриши. Кийждо бо хотя, имать свою власть. Аще ли же оставиши тую иному, ты без попечения еси, и ин носит твое попечение. Избери, еже хощеши.

Вопрос 235, тогожде к томужде великому старцу.

Что есть коварство, и мудрость, и целость с мудростию?

Ответ. Коварство змиево рех ти, отделяя твою мудрость. Коварство бо диаволе вся злая помышления приносит в человека. И аще пребудет в сих человек, на Бога простирает коварство свое. Вся бо яже коварства, погибель есть души. Всяко бо древо зло плоды злы творит: мудрость же в разсуждение приводит человека. Рех ти, брате, держи целость голубину с мудростию. Ибо помышления сия добра и полезна: «Всяко бо древо добро, плоды добры творит» (Мф. 7, 17). Коварство причиняет зло души и телу человеку, целость же с мудростию во упокоение помыслов, и безмолвие души и тела, и в живот вечный приводит человека. Потщися стяжати сия, и поможет ти Господь, сия бо воля Его есть, сиречь спасение всякаго человека.

Вопрос 236, тогожде к томужде великому старцу.

Молю тя, владыко, глаголет ми помысл: яко кроме безмолвия не можеши покаятися. Аще убо есть возможно, попусти ми мало дней безмолвствовати и помолися, да сохраню е.

Ответ. Брате, произволение твое приях аз, паче же и Бог, могий и содействовати во благое к пользе твоей, по воле Своей, а не по воле твоей: якоже сам научи нас Господь наш Иисус Христос творити не свою волю, но Его, якоже и Он Отчую. И по Нем, прострох на тя криле моя даже до днесь, и ношу твоя тяготы, и прегрешения, и презорства в словесех моих яже к тебе, и нерадения. И зря покрывах, якоже зрит и покрывает наша грехи Бог, ожидая тя кающася. Ты же был еси, аки человек, иже седяше под древом осеняющим, и изыде от того на солнце, дондеже разгорайся и растлися в погибель. И во всех сих не оставих, жив Господь. И да не удивишися: ибо Бог Собою клятся, яко «не хощет смерти грешника, но еже обратитися и живу быти ему» (Иез. 33, 11). И понеже не обращается, пребывает в погибели. Ты же чадо, кислосладких просил еси, Отца глаголю, воли твоея: и меда, покаяния твоего, глаголя: повели ми безмолвствовати мало дней: аки проявленно ведый полезное: и се высокомудрие есть: вместо еже рещи: настави мя на путь Божии. Бог да просветит очи сердца твоего, познати, како труждаюся о тебе, щадя, еже не погибнути тебе. Но потреба содействия твоего мало, о имени Божий. Се даю тебе заповедь во спасение: юже аще сохраниши, то ношу, еже на тя, рукописание, и не имам тебе оставити, ниже в нынешнем веце, ниже в будущем, благодатию Христовою. Да не прелстишися в насыщении чрева, ниже, вне телесныя потребы, да усладишися приятием ястия или пития. И сохрани, еже не осудити кого: и буди благопокорлив, и приидеши во смирение, и сгорят от тебе вся страсти. И да не стужиши, вменяя сию заповедь быти тяжку. Не возможно бо есть без труда и хранения заповеди спастися кому. Се убо взях от тебе тяготу, и бремя, и долг. И се нов был еси, се не повинен, се чист: пребуди прочее в чистоте. Слыши Спасителя глаголюща: «се здрав был еси, ктому не согрешай, да не горше ти что будет» (Ин. 5, 14). И да не вознепщуеши безтрудно дело быти еже спастися. Потов бо потреба и труда, и понуждения. Да не разслабишися телом: зане низложит тя. Без сомнения бо, и велицыи, аще не внимают, то низлагаеми бывают.

Мужайся прочее, брате мой, и сохрани заповеди моя, паче же Божия, и радость сотвориши ми: и Господь сохранит тя от лукаваго, и обрадует тя во Царствии Своем. Поучайся в сих выну. Возжелай спастися, и спасет тя Бог. Яко Тому слава, во веки веков. Аминь.

Вопрос 237, тогожде к томужде великому старцу.

Прости мя, господине авво, Господа ради. Понеже рече ми святыня твоя, яко се оставлена быша беззакония твоя: авва же Исаиа глаголет: яко дондеже человек имать сладость их, то еще не бывают оставлена. И се имам сладость их. Господа ради убо яве скажи ми сия: стужает бо помысл мой, глаголя: яко таков сый, не должен был еси прияти рукоположение: зане и тщеславие имать вещь, и тяжесть, и усумневаюся прочее в служении. Вкупе же и молю рещи ми: яко глаголет ми помысл, яко оставлен есмь от Бога, за еже отягчену ми быти зело, в прешедшей седмице, от блуда.

Ответ. О совета лукавых бесов! О прелести началника их, и доброненавистнаго, и человеконенавистнаго исперва, и даже до конца диавола! Зане, якоже он отступи от Бога, тако хощет и вся человеки погубити. Брате, рех ти, яко отпущени суть тебе греси твои преднии, а не яко и брани их отыдоша, но в подвизе стоит человек. И аще и не имел бы еси грехов, то приносил бы тебе сладость их, и яко имел еси, паки тожде творит, принося ти сладость их. Образ же, егоже рече авва Исаия, есть о сладостех и делающих тыя. Ибо ино есть, еже воспомянути кому сладость медвенную, и ино есть еже имети с памятию и вкушение. Темже убо поминающему греховную сладость, не творящу же сластная, но сопротив глаголющу и сопротиво подвизающуся, таковому отпустишася прежнии греси. Но сия суть козни супостата и сопротивника нашего, хотящаго присно поглотити живы человеки: яко да во отчаяние спасения и безнадежие жизни вечныя приведет неутвержденных на твердом камени веры: ея же по мере кийждо приимет. Соблюди убо себе от сих, да не совершенно впадеши в руце диаволи: и помилует тя живый вовеки Господь. О рукоположении же: кто дерзнет себе рещи достойна? Разве беснуяйся поистине и совершенно забывый себе. Прочее, осуждая себе, служи Богу в данном тебе причте, Тогоже есть милость, и помощь, и сила. В служении же поминай, глаголя: работайте Господеви со страхом и радуйтеся ему с трепетом. И: творяй Ангелы своя духи и слуги своя пламень огненный, да не убоишися, неси оставлен от Бога: аще бо мы не оставим Его, той не оставляет нас: воля бо Его есть, еже обратитися нам к Нему и спастися. А еже отягчитися тебе от блуда зело: бывает от еже мыслити злая на ближняго и судити его. Есть же и от еже дерзати, с нимиже рех ти не дерзати. Аще хотящии в мире богатети бедствуют многажды в мори, и путешествиих, и претерпевают: кольми паче мы, чающии Царствия Небеснаго, и нарещися чада Божия: и слышаще: «яко несть наша брань к крови и плоти, но к началом и властем» (Еф. 6, 12). Еще не сопротивился еси даже до крове противу греху: и разслабляешися ли от духа уныния? Что претерпел еси? Что понесл еси? Кая искушения различная радуяся претерпел еси? Ах, спящий иноче! Покажи диаволу, яко живеши Богу, прибегая к Нему, движа руце и нозе, плавая в приражении мысленных волн, восходящих до небес и нисходящих до бездн. Исповедаютися пред Богом, яко простреся с тобою сердце мое, якоже весть создавый е Бог и положивый в нем завет хранимых в нем святых заповедей, еже извести тя от тмы силою Божиею во свет истинный и от смерти осуждения в живот правды. Внимай себе, брате, кроме бо труда и смирения спастися не возможно.

Вопрос 238, тогожде к томужде великому старцу.

Понеже, отче, повеле ми святыня твоя служити, то скажи ми, молю, что должен есмь мыслити или поучатися, представ жертвеннику с пресвитером? Или разделяя святый хлеб, или напаяя святою кровию, или нося причащение и отходя к некоему? И должен ли есмь имети одежду, определенную на потребу служения, или остегны носити окрест тела?

Ответ. Брате, вся духовне иносказуются, а ты плотски сия разумеваеши. Служай, якоже херувими должен есть быти: весь око, весь ум, горняя помышляя и мудрствуя: страх, трепет, славословие. Носит бо тело и кровь безсмертнаго Царя. Приемлет же и лице серафимов, за взывание славословия и за еже рипидою веяти, аки святыми крилами сокровенныя тайны, воспоминая чрез крила, юже от земли и вещественных вещей, легкоту взывая непрестанно умом, во храме внутренняго человека, победную песнь великолепныя славы Бога нашего: Свят, Свят, Свят Господь Саваоф, исполнь небо и земля славы Твоея. От страшнаго же и грознаго гласа проповеди сея, отпадает трепеща диавол от плененныя души. Прогоняются же возмущаеми и постыждаеми бесове, оставлше ю свободну от работы их. И видит прочее, яко возсия ей свет истинный. И внимающи видит лепоту безсмертнаго Агнца: и желает насытитися тела Его и крове, и тогда слышит велегласнаго Давида вопиюща и глаголюща: «Вкусите и видите, яко благ Господь» (Пс. 33, 9), и приступльши со страхом, причастница бывает Тела Его и Крове. И не отъемлемо бывает вкушение тое в ней, храняще ю от всякия страсти. В сих поучайся, аще будеши предстоя Святым Тайнам, аще разделяя, или напаяя, или нося причащение к некоему, или сопрятовая святая: и, просте, всякое служение творя жертвеннику. О одежди же: духовную стяжи хламиду, еюже благоугождается Бог. Остегни же суть, еже умертвити уды. Рцы же ми, брате, аще одеет человек порфиру всешелковую, а будет блудник, то очищает ли его одежда она от блуда или иных страстей? Что убо сотворят достойнии святых таин, и во оскудении суще одежд? О единой ризе повеле Господь, си есть, о одеянии добродетелей, его же да сподобит всех нас Бог, вовеки. Аминь.

Вопрос 239, тогожде к томужде великому старцу.

Прости мя, владыко, и помолися о мне Господа ради, да освятятся чувствила моя. И понеже рече святыня твоя о диаконе, яко аки Херувими и Серафими, должен есть быти: аз же блазнюся в них, что сотворю, да не в суд будет ми служение оно? Окаянен бо есмь, и не могу воздержатися. Бога ради помози ми, да не вовся погублю душу мою.

Ответ. Сотвори по силе своей еже имети всегда память сию: како должен есть быти диакон: и оно, како еси поминая смерть: и како имаши усрести Бога: и внегда осуждати себе непрестанно, умиляется сердце твое, еже прияти покаяние. И рекий чрез Пророка: «Глаголи ты беззакония твоя прежде, да оправдишися» (Ис. 43, 26): Той оправдит тя и неповинна тя сотворит от всякаго осуждения. Глаголет бо: «Бог оправдаяй, кто осуждаяй?» (Рим. 8, 34). Якоже убо различно явих ти: стяжи смирение, послушание же, и повиновение, и спасешися. И да не речеши отнюд сопротив глаголя: Что сие? И чесо ради оное? Но буди благопокорлив, наипаче авве твоему, по Бозе пекущуся о тебе, и емуже вверена есть твоя душа. И аще потщишися сохранити сия, аз по преизбыточествии сотворю силу мою. Господь да сохранит тя и да покрыет тя от лукаваго. Аминь.

Вопрос 240, тогожде к томужде великому старцу.

Рцы ми, отче, что разсуждаеши, да сотворю в малом моем священнослужении, еже имам? Аще бо не от бесов поругаемь бываю, яко присно, то даже до единыя одежды, не могу сладце удержати. Прочее, что ни повелиши, сотворю, яко да помилован буду. Бог бо весть, яко во многом неустройстве есмь и страстех. Помолися о мне Господа ради, яко да не разлучуся от недр ваших, поне в нынешнем веце, рещи бо в будущем стыждуся за страсти моя.

Ответ. Брате, еже понудити себе во всех, и смирение, приводит во успеяние. Ибо апостол сице глаголет: «Во всем скорбяще, но не стужающе си» (2 Кор. 4, 8). И мы егда возвергохом вещь на авву, и не удержахом ничтоже в руках наших, Бог весть, и свидетель есть, яко не имамы чесо ради он благодарите должен есть нам в сих, но мы благодарим ему, яко понесе наше бремя и сотвори нас без попечения. И апостол Петр рече: «Повинующеся всякому человечу начальству Господа ради» (1 Пет. 2, 13). И Иаков рече: «Яко иже весь закон соблюдет, согрешит же во едином, бысть всем повинен» (Иак. 2, 10). И сего ради есть оно, еже не имети кому волю свою, но во всем себе укоряти: и тако обретет милость Божию. Аще ли же поругается ему диавол, велико мыслити, яко добре сотвори, то погубляет вся, елика сотвори. Прочее, творя, еже твориши, смиренномудрствуй, глаголя: прости мя Господи, яко отягчих авву, возверг на него бремя мое. Господь Иисус Христос да спасет нас. Аминь.

241. Ин брат диакон, отрицашеся служити в жертвеннице, воспоминая прежния грехи своя. И вопроси тогожде великаго старца о сем: вкупе же и о телесной своей немощи. И отвеща ему сия.

Ответ. Брате, научило есть нас Писание: Яко хотящии благочестно жити о Христе Иисусе гоними будут. Како же и в нынешнее время возможно есть гонимым быти? От бесов, изгонящих их от страха Божия и от служения Богу. Покаяние же от греха есть еже не ктому творити сего. И еже огребатися от злых оставление есть их. Да не оскорбят тя преждняя. И не удержавай себе диаконствовати, со страхом обаче и трепетом, Богови. И внемли, яко сие есть освящение души твоей. И аще веруеши тако, присно трепещеши, еже не согрешати, да не отпадеши освящения. Претерпи убо страсти и скорби благодарно: яко наказание есть Божие, и помилует тя: и будут во спасение души твоей. Аминь.

242. Ин брат вопроси тогожде великаго старца: рцы ми, отче, естественна ли есть ярость, или чрезъестественна? И кое сея различие?

Ответ. Брате, есть ярость естественна и есть ярость чрезъестественна. Естественна убо сварится, да не исполняются вожделения воли. И сия не требует врачеваний, уврачевана бо есть. Чрезъестественная же, ратует аще не совершаются воли вожделения. Сия требует врачеваний вящших вожделения. Больши бо есть воина приподаваяй ему силу. И аще пресечется, не действен бывает воин той, не обретая силы.

Вопрос 243, тогожде к томужде старцу. Откуду человек имать страсти?

Ответ. И душу и тело безстрастны создал есть Бог, преслушанием же испадоша в страсти.

244. Другий брат вопроси тогожде великаго старца.

Господа ради, занеже стражду от страстей моих душевных: рцы ми, что сотворю еже освободитися от них? И помолися о мне.

Ответ. Брате, хотяй спастися и любяй быти чадом Божиим, смирение да стяжет велико: послушание же и повиновение и бездерзновенность. Виждь, яко ты рекл еси, рцы ми, что да сотворю: и се рекох ти. И аз поручаюсь, яко не будеши пообладан от врага, ниже от страсти. Сгарают бо от смирения, аки от огня: и утишается сердце, просвещаемо о Христе. Тому слава. Аминь.

245. Тойжде брат, дан от аввы своего жити со старцем и служити ему: вопроси инаго старца авву Иоанна: како должен есмь познати отче, по Бозе ли сежу, или вреждаюся, от еже не быти с братиею во общежитии, но наедине? И страсти же стужают ми. О псалмех же како повелеваеши да сотворю? Подобне же и о сне. Боюся бо, да не како пообладает мя. И о забвении такожде. И понеже много стужает ми скверная страсть, кое есть знамение сложения?

Ответ Иоанна. Аще хощеши уразумети, вредишися ли, или пользуешися, особь седя, имей сие знамение: аще по послушанию седиши, разумей, яко пользуешися. Глаголет бо: лучше послушание, паче жертвы. Аще же противоглаголеши, то вредишися: воля бо есть злая. Не разлучился еси от братии твоея, да не будет! Но Бог устроил есть, да, по немощи тела твоего, сотвориши себе мзду чрез старца. А еже о страстех: не могут не востати на человека, ко искусу его. Муж бо не искушен есть не искусен. Понеже рекл еси, яко един сежу: не имей тако, понеже вредишися. Неси бо един, аще веруеши: но имаши Бога, Емуже предаде тя великий старец, и молитву сего содействующую ти: точию ино не хоти показати, разве послушание: и спасешися. Не вреждаешися убо, не бойся. О псалмех же: якоже творят братия, и ты сотвори: глаголя на едину песнь три псалмы и творя коленопреклонение: и не пообладает ти сон, кроме немощи. Тако на всяку нощь должен еси творити. Забвение погибель есть души: бывает же от презрения и нерадения. О скверной же и ненавистной страсти: труда потребно есть сердечнаго и телеснаго, да искоренится. Сердечнаго, да непрестанно молится Богу (сердце); телеснаго же, да умертвится и поработится по силе человека (тело). Знамение же сложения есть: еже угодной быти вещи человеку, и усладитися в сердце своем, и в той поучитися сладце. Аще ли же кто противоглаголет помыслу и брань творит, о еже неприяти его, то се несть сложение, но брань: и сие приводит во искус и успеяние человека. Господь Иисус Христос да очистит тя от грехов твоих и да укрепит тя благостию Своею в немощи твоей. Аминь.

Вопрос 246, тогожде к томужде.

Что есть послушание? И о чем должен есмь молитися? И аще кто речет ми, помолися о мне: что сотворю? Всегда ли должен есмь поминати его?

Ответ. Послушание отсецает волю. Кроме же труда никтоже может стяжати послушания. Аще послушания ради седиши, а не ради покоя телеснаго, то се несть воля твоя, ниже пристрастие седиши, но паче угождаеши Богови. Аще же услаждаяся упокоением седиши, не угождаеши Богу. О молитве же: глаголи: Господи избави мя от грех моих и от страстей безчестных. И аще кто речет, помолися о мне, рцы в сердце своем: Бог да помилует нас, и довлеет. А еже всегда поминати его, несть твое, но совершенных, могущих молитися о друг друзе.

Вопрос 247, тогожде к томужде.

Молю тя, отче, рещи ми: како познати могу, яко есмь в послушании и оставляю свою волю? И что должен есмь сотворити да сравняюся с братиями? Слышу бо от отец, яко сый в повиновении и своея воли не творяй, но сравняяйся братии во всех, таковый скоро приходит во успеяние. И истязую сердце свое, сежу ли по общему житию, якоже братия, и не извещаюся: зане прежде их разрешаю, и приемлю пищу поранше, и яко ям един: и хощу испытати, могу ли ясти поздее, и боюся за немощь.

Ответ. В сем можеши разумети, яко по общему житию седиши, во еже не от своея воли вещь творити, ниже ясти на едине, ниже со братиею, но повелеваемая тебе творити, кроме искания. Вменяй же себе, яко единаго от немоществующих. Еда сии немоществующии внеуду суть общаго жития, яко едини ядят? Да не будет: но немощи ради своея сие творят, по повелению аввы. Тако и тебя Бог даде извинение старца, да не соблазнятся неискуснии, зряще тя ядуща поранше. И еже ясти поздее с неизнемогающими не стоит с тобою. И аще изнеможеши, паки восхощеши о себе попещися, и будет ти скорбь: темже убо извинение обрет, еже не подати помысла кому, да не усумнишися ясти един. Еже бо творити всякую вещь по повелению аввы, а не по своей воле, общежитие и равенство есть сущих во общежитии братий. Не помниши ли, яко брался еси со аввою и не хотел еси восприяти? Како посмел еси безумно пороптати? Еда ли о ядении бе? Не воля ли бе?

Аще пользоватися хощеши, и по общежитию седети, волю свою отсецы во всех, и повинися равно братии: и се общежитель еси с ними, к пользе души твоея наставляемь от отец твоих, великаго старца и прочиих. Последуй советованию их, благодатию Христовою. Вящше бо тебе ведят полезное души твоей, брате.

Вопрос 248, тогожде к великому старцу.

Тойжде брат, не сый причетник, повелеваем от служимаго им старца, причетника суща, творити молитву, или и благословити ядение, или ино что таково: и стужаемь от сего, вопроси великаго старца: подобает ли послушати его в сем?

Ответ. Сохрани себе, да непорадуешися вменяем, и покажи послушание, изгонящее прекословие ненавидимое Богом, и любящими Его. Держи же послушание, возводящее на небо, и подобны Сыну Божию творяще стяжавшия е. Тому слава, вовеки. Аминь.

Вопрос 249, другаго брата к иному старцу.

Понеже имею имения: и ова убо хощу дати общежитию, ова же раздати нищим: рцы ми, отче, аще должен есмь сия чрез авву раздати?

Ответ. Брате, на первыя вопросы, аки человеку, требующу млека еще глаголах тебе. Ныне же, егда о совершенном возглаголал еси отречении, слыши по писанному: разшири уста твоя, и исполню я. Брате, не лет есть от мене худейшаго научитися, что сотвориши. Но слыши писанное в Деяниях апостольских о продававших и полагавших цены при ногах апостол: яко даяшеся коемуждо, егоже аще кто требоваше, не ими самими, но апостолы. Сами же избыша попечения, и имений, и тщеславия. Аще убо желаеши в сию меру приити, и насладитися безпечалия, и упразднитися и без попечения пожити Богови, то сотвори и ты такожде. Брате, зело мала суть твоя противу тех, яже дана быша авве Исаии от неких. Тмы бо пенязей даяху ему: глаголюще: сия управи, якоже веси. Не глаголюще, камо, или како. Сии убо, совершенность сотвориша и без попечения пожиша. Ты же, аще будет воля Божия, еже приити тебе в радость сию, то должен еси благодарити носящему твое бремя, да не когда сеятель злых насеет в тебе мнети, яко приемляй сия, должен есть тебе благодарити. Бог полезное да сотворит с тобою ко спасению души.

250. Тойжде вопроси великаго старца: аще должен есть аввою своим имения раздати? И како раздаст, и кому?

Ответ. Господь да благословит тя, чадо! Хощеши бо без попечения пожити, и не хощеши стужаемь быти от твоея воли. Рцы точию, что хощеши определити на общину и что на благотворение требующим, и буди без попечения. Се бо есть послушание, еже не имети власти своея. Что есть честнейше души твоея, юже рече Господь дражайшу быти всего мира? И аще сию Богу предал еси и духовным твоим отцем, то почто еще усумневаешися вверити им малая? Смотри, како отай тщеславие и неверие брань творит на тя! И аще тако еси, то ниже душу твою уверил еси им поистине, И како чаеши ими помилован быти? Буди без попечения, аще хощеши упразднитися Богови. И аз понесу попечение оно, с нимже повелиши, точию буди ты безпечален к Богу, и прости ми, любве ради.