Текст книги "Аскетика. Том I"

Ответ. Брате, о всех возницающих помыслех не должно вопрошати: мимоходяще бо суть; но о пребывающих и борющих человека. Якоже бо человек от многих досаждаемь, небрежет тех досаждений, и бывает без попечения от всех их: аще ли же кто востанет нань, или ратует его, тогда доносит ко князю: тако и вещь сия. О молитве же и псалмопении: не точию умом, но и устнами потребно есть пети. Зане пророк Давид глаголет: «Господи, устне мои отверзеши, и уста моя возвестят хвалу твою» (Пс. 50, 17). И апостол такожде, показуя, яко ищутся устне, рече: «сердце и плод устен» (Евр. 13, 15) и прочая. И о нихже видел еси, или слышал, или содеял, и помышляеши та: ничтоже отсецает сия, разве молитва со смирением и со труды и слезами бываемая, не имущая воли отнюд. Исправлшии бо сие отцы без трудов и слез и отсечения воли, не исправиша. А еже обучатися, вменяемость есть и равность: вопрошати же и веровати ответом, смирение есть, и успеяние о Господе. Помолися о мне, брате.

91. Ин некий старец вопроси тогожде старца:

Како кто блюдет сердце свое? и киим образом бывает брань вражия? и должен ли кто вопреки глаголати к борющему? и о помысле блуднем, подобает ли заградити вход его? аще ли же внидет, то что подобает творити? и о пище, унгиями ли должен кто употребляти ю или разумом и хранением?

Ответ. Блюсти сердце есть, еже имети трезвен ум, и чист от помысла наводящаго брань. Первее же бывает в презрении помысл его, и егда видит враг презоривость, тщится ввести брань. И аще разумети хощеши, враг ли есть или друг, сотвори молитву и вопроси и: наш ли еси или от супостатов? И отвещает ти истину. Предателство убо бывает от нерадения. Не пререкуй же, сего бо хотят, и не престанут: но приступи ко Господу на них, повергая пред Ним немощь свою: и Той может неточию отгнати, но и упразднити их. О бесе же блуднем: добро убо есть весьма, еже заградити вход его: аще ли же восхищаешися, и внидет, то подвизайся противу ему, повергая немощь твою пред Богом и моляся Ему, и ижденет и. А о снеди, о ней же рекл еси: от разума и хранения устави житие свое и помолися о мне, любве ради.

92. Тогожде к томужде старцу. Откуду отягчается сердце мое, и есть во мне сон безмерный, и ни едино есть ми умиление?

Ответ. Сия приходят безмолвствующему всячески да уныв бегает подвига и отчает себе. Мы же повержем неможение наше пред Могущим вся сотворити по преизбыточествию, ихже просим или разумеем: дондеже сокрушит сонмища аммореов пред нами, и не оставит Мадиама, и Амалика, и сынов восточных, потребити плоды наши, но потерпим помощию Владыки нашего Бога, силнейш бо есть тех: и спасемся.

Вопрос 93, тогожде к томужде: Откуду нощию во инех лицах мечтания бывают ми, днию же во инех брань приемлю? Случается же, яко и кроме лица: и паки случается, яко со сластию, и кроме сласти мечтанию бывати.

Ответ. Ратующии днию, тии ратуют и нощию: являюще, яко еще имут тя в руках своих: и тиижде преобразуются во ина и ина. А еже овогда убо со сластию бывати, овогда же без сласти, от преобразования тех есть, якоже уже рех: да приидет человек той в недоумение и смятение. Сугуба же есть нощная брань: есть от сластей пострадати сие, и есть от искушения диаволя, во еже привести кого во отчаяние, яко мнети ему не ктому имети спасение. Егда убо случится тебе искушение брани сея, твори седмижды по седми коленопреклонений, сиречь 49 коленопреклонений, глаголя на коемждо: «Господи, прости мя за имя Твое святое». Аще же належит немощь, или неделя, егда не достоит творити коленопреклонения, глаголи слово сие седмьдесят крат, вместо 49-ти коленопреклонений. Различие же искушений сие есть: еже искуситися от диавола, от возношения бывает, а еже от сластей, от чревообъядения.

Вопрос 94, тогожде к томужде: Аще бывшу нощному мечтанию, будет за утра святое причащение, что подобает сотворити?

Ответ. Приступим, яко уязвленнии, и не яко преобидяще, но яко требующе врача: и исцелит нас Исцеливый кровоточивую. И возлюбим много, да и нам вставится много. И егда хощеши причаститися, глаголи сие: да не будут ми Святая сия, Владыко, в суд или во осуждение: но во освящение души и тела. И тогда приступи со страхом: и человеколюбив есть Владыка наш Бог, еже сотворити с нами милость Свою. Аминь.

Вопрос 95, тогожде к томужде: Понеже рекл ми еси, отче, во ответе, яко в нощи случающаяся человеку, ова убо суть от возношения, по искушению диаволю; ова же от сластей чревообъядения: убо возможно ли есть диаволу воздвигнути сие в человеце от зависти точию, ниже возношающуся тому, ниже сластолюбствующу? И како должен есть кто познати, естественне ли бывает в нем движение в нощи? И естественное движение страждут ли совершении? И должно ли преклоняти колене в Пятидесятнице или ни?

Ответ. Может убо подвигнути диавол от зависти: но не сущу от нас возношению, или сласти, не может на мнозе. Якоже бо кто хотя создати дом, аще не обрящет служащих веществ, всуе труждается: тако и диавол. Знамение же естественнаго движения есть, егда видит кто, яко ниже от возношения, ниже от сласти, ниже от зависти диаволи случается ему движение. А еже уразумети, яко несть от зависти, но от естественности, егда надеявся, и со многими молитвами уснет кто, именуя Cвятую и Единосущную Троицу, назнаменуя себе крестным знамением, и постраждет сие. Совершеннии же не страждут ниже сего: угасиша бо и естественное. Яко скопиша себе духовне, Царствия ради Небеснаго, сиречь умертвиша уды своя. О преклонении же колен в Пятидесятнице уже речено ти есть во ино время, яко преклоняти в своей келлии. Помолися о мне, брате.

Вопрос 96, тогожде к томужде: Како хощу удержати чрево свое, и приити во умаление пищи, и не могу? Но аще и прииму со умалением, паки по мале прихожду в первую мою меру: и в питии такожде.

Ответ. Бог да помянет любовь твою, брате мой, яко елики имам страсти, рекл ми еси: и аз бо таяжде стражду. И никтоже освобождается сих, точию пришедый в меру глаголющаго: «забых снести хлеб мой, от гласа воздыхания моего, прильпе кость моя плоти моей» (Пс. 101, 5–6). Таковый вскоре приходит во умаление пищи и пития: слезы бо хлеб бывают тому. И прочее приходит, еже питатися Духом. Веру ми ими, брате, яко вем человека (егоже Господь весть) таковыя меры: и в седмицу, единою или дважды, и множае пленяется в духовную пищу, и от сладости тоя забывает чувственную пищу, егда приходит прияти, якоже некто пресыщен и гадлив, не хощет прияти; приемля же осуждает себе, глаголя: почто всегда несмь тако? И желает еще успети. Где есмы, брате? Идем, да умрем. Прости мя, яко не обретая, чим от своих похвалится, чуждыми труды хвалюся; и сие на свое осуждение.

97. Тогожде к томужде вопрос: Молю тя, отче, да явленну ми сотвориши силу вещи: како приходит кто во яже рекл еси? Аз бо не вем. Елижды бо начах умаляти пищу, уныние и слабость не оставиша мя, дондеже приидох паки в первую свою меру. И како рекл еси, яко приходяй в меру рекшаго: «прилпе кость моя плоти моей», сей приходит в малое требование? И како прежде умаления пищи, прилипает кость плоти?

Ответ. Брате, понуждаеши мя глаголати, яже суть превыше меры моея, и боюся, да не како осужден буду, глаголя чуждая исправления. Писано есть, яко прилпе кость моя плоти моей, сие есть, яко бывают кости вся человека едино по Богу. И тогда бывает плоть она последующи сущему по Богу помыслу; и бывает радость Духа в сердце, питающи душу ону, и утучняющи тело, и укрепляющи обоя, и ктому не ослабевает, ниже унывает. Иисус бо прочее бывает ходатай, и поставляет человека близ преддверия: отнюдуже отбеже всякая болезнь, печаль и воздыхание; и исполняется на нем слово писанное: «идеже сокровище твое, ту и сердце твое» (Мф. 6, 21). Приводит же человека в меру сию совершенное смирение.

Вопрос 98, тогожде к великому старцу: Како приходит кто в воздержание, и како познается естественная немощь, и яже от бесов, и колико подобает ясти?

Ответ. Брате, по малу чешеши открыти вещи сокровенны. И аз, юрод еще, мню, яко еже ты просиши от мене, никтоже может разсудити, точио приходяй в меру сию. Живый бо человек чувство имать студености и теплоты приносимых ему: мертвый же не ощущает сих, погуби бо чувство. И якоже приходит в меру ведения вещей учивыйся сим; и весть сия разсуждати; не научивыйся же, ниже пришедый в сия, тмами аще вопросит – что суть, и услышит: то еще поняти силы их не может: тако есть и сие. Елико ни глаголеши кому, потреба есть паче самаго искуса. О немощи же: аще приемлет тело повседневную пищу, и разслабится, от бесов есть. Аще ли же ни, немощь есть. А еже воздержатися есть еже востати мало ненасыщшуся, якоже уставиша старцы новоначальным. Егда же доспеет человек в меру апостола глаголющаго: «не неразумеваем бо умышлений его» (2 Кор. 2, 11) не может утаитися от него свое, колико подобает ясти; обучен бо есть. Понуждаемь есмь рещи вещи паче мене, и несть потреба; негли же ниже есть могий прияти и уразумети, разве; редцыи нецыи. Бог Отец наших да приведет тя в радость сию, светла бо есть и сладка. Не поминает же телесныя пищи таковый; забы бо снести хлеб свой, и инде имать ум. Вышних ищет, горняя мудрствует, горним поучается, идеже Христос одесную Отца седит. Тому слава, вовеки. Аминь.

Вопрос 99, тогожде ко иному старцу: Добро ли есть, авво, исповедати кому от братий о бываемом мечтании, и сотворити ему метание, да помолится о нем?

Ответ. О нощном мечтании добро есть рещи могущему слышати. Сотворив же кто метание, должен есть просити помолитися о нем. Писание бо глаголет: «исповедайте друг другу согрешения, и молитеся друг за друга, яко да исцелеете» (Иак. 5, 16).

Толкование

Рек бо отец, добро есть рещи могущему слышати: яви, яко не полезно есть всем, и приключшимся таковая глаголати.

100. Некий от отец безмолвствуяй вопроси тогожде: како есть седети в келлии?

Ответ. Еже седети в келлии есть еже поминати своя согрешения, и еже плакати о них и сетовати, и трезвитися; еже не пленену быти уму его, но трудитися, да аще и пленен будет, скорее паки привести его в место его.

Вопрос 101, тогожде к томужде: Помысл глаголет ми, яко поучение творит чистую молитву: убо тако ли есть?

Ответ. Брате, да не поруган будеши от бесов и речеши, яко поучение творит чистую молитву. И како пребывают страсти в человеце, имущем чистую молитву?

102. Тогожде к томужде: Како бывает разум зверохищен?

Ответ. Разум зверохищен бывает, аще не предварит человек, и не укорит себе, и угрызение зубов имать, и потребление ногтей. Прочее врачевания потреба, сиречь покаяния.

Вопрос 103, тогожде к томужде: Подобает ли смежевати очеса в кознех вражиих? и егда востает на мя тело, что подобает творити?

Ответ. Показует диавол человеку вещи и чувственно, и не чувственно. Немощен убо сый, смежевает очеса, да не увидит: силный же и видя, не радит о них. Праведный бо яко лев уповает. О востании же тела: бежи спешно ко Иисусу молитвою, и упокоишися.

Вопрос 104. Откуду случается мне, еже по вопросе осуждати инаго?

Ответ. Еже осуждати инаго по вопросе, страждеши, за еже не умрети оправданию от тебе. Осуждай себе, и отыдет от тебе осуждение инех.

105. Тойже стужимь от разбойник, и зело убоявся, благодатию же Божиею покровен быв от вреждения их, возвести томужде старцу о боязни, прося купно и молитвы, о сохранении на преди.

Ответ. Бог не предает кого, глаголяй: «не имам тебе оставити, ниже имам от тебе отступити» (Быт. 28, 5); но неверствие наше есть предающее нас. Обаче же по попущению Божию приходят искушения, ко искусу вере имущих совершенно на Бога упование. Еда многшии суть разбойницы приходящии, неже колесницы и силы фараоновы? И явлено бысть, яко единем глаголом и манием Господним, утопоша внезапу Не помниши ли, како ослепи нашедших на Елисеа? Кто ослепи их? И чесо ради Ведый избавляти от искушения благочестивыя, сия вся сотворил есть, и творит? Како забыхом глаголющее Писание: «Господь сохранит тя от всякаго зла, сохранит душу твою Господь» (Пс. 120, 7)? И како забвению предахом оное: «ваши же и власи главы изочтени суть» (Мф. 10, 30) и «яко птица не падет в сеть без Отца вашего? не много ли паче лучший есть человек птицы?» О боязне, дщере не верствия! камо нас низведе! Лютейша есть зело, ослепляет ум, умягчает сердце, отторгает от Бога человеки, сестра есть безнадежия, изгонит человеки от страха Божия в место погибели. Брате, бежим от нея, и возбудим в нас спящаго Иисуса, глаголюще: «Наставниче, спаси ны, погибаем» (Мф. 8, 25). И востав, запретит приражению ветра их, и будет тишина: нам же речет: «Аз есмь, не бойтеся» (Ин. 6, 20). Оставим тростный жезл, и да восприимем жезл креста, на немже утверждаются хромии, о немже воздвигаются мертвии, о немже похвала апостола: имже свободихомся от предательства, представляюще себе Распеншемуся нас ради. Сам бо тем упасет ны овцы своя и тем отгонит от нас кровоядцы волки: Тому слава вовеки. Аминь.

112. Подобне великий старец вопрошен быв о сем, рече:

Брате спящий, испытай слабое твое сердце, емуже аз удивляюся, боящуся рабов, стоящих вне, и не видящу господий их, пребывающих внутрь. Чувственнии разбойницы раби суть мысленных разбойников, бесов глаголю, действующих в них. Благодарити должен еси пришедшым на тя разбойником: яко пришедше возбудиша господий своих, сиречь спящих в тебе разбойников. Камо отыде далече Иисус, да идеши к Нему, и умолиши Его приити на помощь? Еда не слышит ухо твое, что поют уста твоя? «Близ Господь всем призывающым Его во истине. Волю боящихся Его сотворит, и молитву их услышит, и спасет я» (Пс. 144, 19). Тому прилепися: Той и внутренния владыки, и внешния рабы упразднит от тебе. Тому слава вовеки. Аминь.

107. Тойжде вопроси инаго старца: Два помысла стужиста мне о разбойницех. Един убо осуждает мя, глаголя: яко общежития суть, яже имаши, и грех есть, аще тоя оставиши взяти им, но должен еси клепати, или воззвати. Другий же помысл осуждает мя, глаголя: яко Господь рече, «хотящему ризу твою взяти, отпусти ему и срачицу» (Мф. 5, 7). Како убо повелеваеши, владыко, сотворити ми? понеже сумнюся. И прости мя, яко мысленныя разбойники оставляю входити и исходити, и окрадати сердце мое; а о чувственных вопрошаю. Помолися убо, да предварителне оныя упразднит Господь.

Ответ. Аще не имаши власти на чесом, то не презирай тех, яже приемлеши любовь общежития: зане осуждение имаши: человек бо под властию сый, несть под заповедию. Прочее без смущения клепли и воззови, глаголя: благослови еще сый и помози: и покрыет тя Бог. О мысленных же разбойницех: Господь и сих и онех да упразднит. Мужайся, и крепися, и молися о мне.

108. Тойже прочте в старчестве: «…яко должен есть хотяй по истине спастися, прежде с человеки понести досады, безчестия, тщеты, уничижения, и чувств своих свободитися, и тако приити на совершенное безмолвие, якоже и Господь наш Иисус Христос сотвори: сия убо вся претерпев, тако взыде на святый крест. Еже есть умерщвление плоти и страстей, и покой совершен свят». И рече к себе: аз окаянный ни едино от сих ниже ведех, ни сотворих. Но зане от немощи моея соблазнях всех, отыдох от человек. Темже убо должен ли есть паки внити посреде человек, и Богу помогающу, сотворити, якоже рекоша отцы, и тако приити на безмолвие, да не вотще будет труд мой? И возвести сия великому старцу. И глагола ему великий:

Добре рекоша отцы, и несть инако: но понеже многи бывают вины, в нихже непшует человек добре творити, и обретается вреждаем ради инех вин, подобает охраняти себе. Предварил бо еси сести в келлии: и аще приидеши посреде человек, родится ти тщеславие: и негли ниже постоит с тобою сей помысл, сиречь еже быти посреде, и тако не будеши посреде, и два зла будут. Но аще укоряеши себе, яко не сотворша должнаго восходу на крест, глаголя: яко в неведении седох: весть укоризна досадити и обезчестити себе, и тако по сем привести приемлющаго тую со истиною, в меру креста, о Христе Иисусе Господе нашем! Емуже слава и держава вовеки. Аминь.

112. Тогожде к томужде великому старцу. Помолися о мне, яко зело скорблю.

Ответ. Бог небесе и земли да даст вам, молитвами святых Своих, прошения, яже прошу Его вам подати. Понеже убо услышати хощете, и возрадоватися, вы есте понуждающии мя рещи, яко да на мне исполнится оное: «бых несмыслен хваляся, вы мя понудисте» (2 Кор. 12, 11). Аз и прежде даже не просити мя, за раздеженную во мне, аки зелнейший пламень огненный любовь Христа, иже рече: взыщи ближняго твоего яко сам себе, от горения и теплоты Духа, не престаю день и нощь моляся Богу, да сотворит вас богоносных, и вселится и да ходит в вас, и ниспослет вам Духа Святаго, Духа истины, да егда приидет, научит вы всему, и наставит вы на истину, еже быти наследником вечных благ онех, ихже око не виде, и ухо не слыша, и на сердце человеку не взыдоша. И бых к вам аки отец, тщайся увоинити чада своя царю в воинства светла, онем без попечения сущим. Да даст же Бог вам горение любве сея.

Известны бо сотворит вы Бог, яко до седмаго небесе возводит человеки имущыя тую, якоже нецыи уже со дерзновением восходят, и благословляются, аще в теле, не вем, аще ли кроме тела, не вем; Бог бо есть ведый, и да разумеете начало пути радости сея, послушайте: прежде приходит человеку Дух Святый, таже научает и всему, и како подобает смиренномудрствовати (яже не можете ныне услышати), таже наставляемь первым горением онем, восходит на небо первое, по сем на второе: и по преуспеянию, даже до седмаго. И тамо есть видети неизреченныя вещи и страшныя, яже никтоже может слышати, точию приходящий в меру сию, ее же Господь да сподобит вас. Умирающий совершенно мирови, терпением, и скорбми многими, могут в сию приити. О брате возлюбленне! Господь крест претерпе, и ты не возрадуешися ли во скорбех, ихже терпение вводит в Царствие Небесное? Добре же рекл еси, яко скорбиши; не веси ли, яко егда кто просит отцев помолитися о нем, или Бога, еже дати ему помощь, тогда множатся ему скорби и искушения ко искусу его. Да не взыщеши убо покоя телеснаго, аще не дает ти того Господь. Мерзок бо пред Господем покой телесный и Господь рече: «в мире скорбь имети будете» (Ин. 16, 33). Бог да поможет ти во всех. Помолися о мне.

113. Тойже вознепщевав смерть тогожде великаго старца близ быти, и прискорбен быв о своем спасении, и всего общежития: яви сие томужде великому старцу. Иже и сказует ему сия:

Брате любезнейший: подвигнувся по любви Божией, глаголал еси глаголы смирения, влекущия на сострадание и немилостивыя человеки, к человеку грешну и худейшу.

И что имам ти рещи, человек, не имый сострадания, ниже милосердия? Обдержим есмь от твоих словес, и что дам ти, не имам? Аще бых имел нечто, могл бых ти рещи. Не оставляю вас еще в сих летех, ниже в сие время сирых: но се пребуду с вами, повелением Бога, творящаго к пользе вся, и ко спасению душ наших, рабов Его, не мене ради, но вас ради просивших сего, яко да плод принесете Богови, чрез мене приносяще ваше спасение. И аз реку: «се аз и дети, яже ми дал еси, соблюди я во имя Твое» (Ис. 8, 18; Ин. 17, 11); покрый их десницею Твоею; настави нас в пристанище хотения Твоего и напиши имена их в Твоей книзе: даждь им обручение жизни, радость творя им, и глаголя: «не бойся малое стадо, яко благоизволи Отец ваш дати вам Царство» (Лк. 12, 32). И помолися, да даст ми рещи: Отче, даждь ми, да идеже буду Аз, будут и чада Моя. Веру ми ими, брате: яко дух мой усерден есть рещи моему Владыце, радующемуся о прошении рабов Своих: Владыко, или введи со мною и чада моя в царство твое, или и мене изглади от книги Твоея. Немощь же моя и нерадение возбраняют ми имети таковое дерзновение. Но обаче милость Его велия есть. Имуще убо таковаго Владыку да утешимся, верующе, яко всячески сотворит милость свою с нами. Не имать Бог презрети труда подвигов отец наших усопших и ныне живущих; но речет: пощажду место сие, Мене ради и работающих Мне верно на нем. Аз бо верую несумненно, яко суть нецыи на месте сем, могуще умолити Бога о тмах людей, и не будут отметаеми; волю бо их, сотворит Господь. И упросите могут, да очи Господни будут на месте сем. Молитвы бо их восходят к Нему, яко молния блистающая, и якоже лучи солнечны, о нихже веселится Отец, и радуется Сын, и красуется Дух Святый. Себя убо да внимаем точию, брате, Бог бо печется о месте сем: упокоение бо бысть рабов Его, и на сих исполняется оное: «глас радования и спасения в селениих праведных» (Пс. 117, 15). Прочее, десницы Господни есть, еже сотворити силу, еже дати нам крепость, даровати нам последовати стопам отец наших, сиречь, учению, житию, долготерпению, любви, терпению, гонением, страданием, елика быша им от врага, и чувственне и мысленне. Аще бо не стяжем что от жития их, то како будем чада их? Господу глаголющу: «аще чада Авраамля бысте были, дела Авраамля бысте творили» (Ин. 8, 39). Аще не страждем с ними по силе немощи нашей, како прославимся с ними, в час оный; аще не умрем с ними, отсекающе волю, то како совостанем с ними, во уповании услышати оное: «Приидите благословеннии Отца Моего, наследуйте уготованное вам Царство» (Мф. 25, 34) и прочая. Брате, аще прошения наша даде нам Бог, да имамы отцы наши наставляющыя нас; внимаем, да не леность наша, или мягкость, или нерадение, или неверие наша разлучит нас от них. Глаголет бо: «аще ли неверный отлучается, да разлучится» (1 Кор. 7, 15). Да воспомянем рекшаго, яко «претерпевый до конца, той спасен будет» (Мф. 10, 22). Да молимся Богови непрестанно, о еже ни единому же отлучитися от святых отец наших, ниже в веце сем, ниже в грядущем. Да не оставим света, и взыщем тмы; не оставим сладости медвенныя, и приимем горесть змиеву; да не завидим сами себе, и возлюбим смерть; да не приимем вместо благословения клятвы. Да не прогневаем Христа, угождающе врагу. Трезвимся, бодрствуем, скоро да потечем; готови да будем; пробудимся от глубочайшаго нашего сна. Помыслим, что нам даровал есть Бог, не еже быти нам под ногами святых, но и чадом, и наследником. Блаженна есть душа, вкусившая сих. Блаженна душа, уязвившаяся в таковую любовь. Блаженна душа, прилепившаяся сим. Блаженна душа, приемшая совершенство в сих. Ожидает бо ю радость и веселие, и мздовоздаяние в Царствии Небеснем, во славу Отца, и Сына, и Святаго Духа, аминь. Молися о мне, брате.

111. Прошение молитвы тогожде к томужде великому старцу, яко да дарует ему Бог преуспеяние.

Ответ. Брате, умоли благость «хотящаго всем человеком спастися, и в разум истины приити» (1 Тим. 2, 4) еже дати тебе бодрость духовну, возгневающую духовный огнь, егоже Господь прииде воврещи на землю, Владыка небесе и земли. Молю же купно и аз по силе моей, да дарует ти оную Бог, подаваяй всем с трудом и усердием, просящим благодати, и пришедши наставить тя на истину. Просвещает бо очеса, исправляет ум, отгонит сон слабости и безпечности, уясняет оржавелая в земли лености оружия; просвещает оскверненная в пленении варварском одеяния, и творит еже возненавидети мерзости мертвечин их, и возжелати насытитися духовныя оныя жертвы, жремыя великим нашим Архиереем: о нейже слыша пророк, яко очищает грехи, и отъемлет беззакония, плачущим прощает, смиренным дает благодать: в достойных снискивается, и они живот вечный тою наследуют, о имени Отца и Сына, и Святаго Духа. Аминь. Помолися о мне.

114. Тойже моли великаго старца помолитися о нем, яко да сподобится мертвенности Иисусовой себе в жертву принести.

Ответ. Всякое прошение благо, радуяся прошу Бога подати вам, и верую, яко подает. Неложен бо есть глаголяй: «просите и дастся вам» (Мф. 7, 7). Бог убо да подает прошения ваша, аминь. Обаче да не будеши без попечения во еже и самому потрудитися мало. Ибо хотящий началств от царя, аще и имут многих предстателей, претерпевают и сами скорби, и беды, и труды, дондеже получат: тако и ты убо, привнеси мал труд, да обрящеши велию милость. «Много бо может молитва праведнаго поспешествуема» (Иак. 5, 16). Рцы брату сущему с тобою, возлюбленному оному о Господе, присно тя наказующему и оттуду подающему милость велию, да не обленится, наказуя. «Егоже бо любит Господь наказует» (Евр. 12, 6). Целую всех вас о Господе и прошу помолитися о мне за любовь.

115. Тойже моли великаго старца помолитися о нем, еже изыти ему от ветхаго человека.

Ответ. Послушай, брате возлюбленне, и даждь сердце твое, еже сохранити глаголемыя тебе Божественныя глаголы, не от человека, но от Духа Свята. Иисус врач есть душ и телес. Аще язву имаши, ввожду тя к нему, и молю его, да исцелит тя, аще и ты восхощеши. Датель бо есть всех благих дарований. Подает же тебе не точно прошения твоя, но паче вся по преизбыточествию, ихже просиши. Сын Божий, и Свет и Сила есть Иисус, от Святыя Девы Марии воплощся, Иже на земли явися и с человеки поживе, и Себе принесе жертву живу, благоугодну Богу, и Отцу нашему, еже сотворити нас Себе люди избранны, ревнители добрым делом, царское священие, язык свят, Иже сия нас ради претерпев, образ нам оставил есть терпения, и радуется, егда просим Его. Прошу Его просветити сердце твое; но спотрудися до пота и ты. Глаголет бо Сын Божий: «приидите ко Мне вси труждающиися и обремененнии, и Аз упокою вы» (Мф. 11, 28). Приступаю убо к Нему о тебе со безстудием многим, но аще и ты не приступиши, то срам есть велик. Иисус никогоже отметает: ибо в единонадесятый час нанят делатели в Свой виноград. Прилепися Ему, и сотвори мал труд, да восприимеши мзду со всеми равную. Человек бысть Сын Божий тебе ради, буди и ты Его ради богом. Ум дал есть тебе Бог, даждь Ему оный на небо, вышних ища, вышняя мудрствуя, идеже Сам есть. Молю бо да тамо достигнеши со всеми любящими имя Его. Таковым бо образом, свобождается кто ветхаго человека. Иисус рече апостолом: «вы есте соль земли» (Мф. 5, 13). Землею тело нарече; глаголет бо: «земля еси, и в землю отыдеши» (Быт. 3, 11). Буди сам себе соль, осоляя и изсушая гнилость и черви, си есть злыя помыслы. И аще сие сотвориши, спотруждуся, и соосолю купно с тобою, да не возсмердят и гнушатися сотворят инем. Спастися хощет нам Бог и Свет наш, но нам подобает вопити непрестанно: спаси мя, Господи, и спасет тя. Ибо возопиша некий, и внидоша в пристанище хотения Его, в неже надеюся тебе прияти, аще ми даси руку посиле. Уразумей реченная, и последовав достигнеши, по рекшему: «тако тецыте, да постигнете» (1 Кор. 9, 24). Молися о мне, брате, да не осужден буду, глаголя, и не творя.

Вопрос 114, тогожде к томужде великому старцу о различных помыслех и о совершении пути Божия.

Ответ. Вся яже написал еси прося Бога чрез мою худость, брате забытливе, во едино клонят, еже избавитися ветхаго человека, и еже обрестися освящению души и тела, и спасену быти со святыми во Царствие Божие. Сия бо то есть мера, юже рех ти, еже изменитися и очиститися от ветхаго человека. По преизбыточествию же ихже просиши, прошу Бога аз, обдержим любовию, да подаст тебе. И аще не воспятиши слабостию своею и нерадением, то почудитися имаши, и прославити Бога, како пременяет тя, от еже не быти, во еже быти. Бог да простит ти яже согрешил еси, и имущими быти по сих, да уготовает тебе прощение. О нощных же мечтаниях: по зависти искушает тя диавол, зане каешися Богу, хотя наругатися тебе, яко ничтоже пользует вся могущее покаяние. Но ты не повинися, ибо великую имаши помощь от молитв святых. Тщание же есть: аще совосхитишися словом, или делом к некоему согрешив, да идеши и сотвориши метание тому. И видя Бог, покрыет тя от врагов твоих. О снедех же: да не весма попецемся о теле. Случается бо, яко бывает сия брань от бесов, да ввергут нас в попечение, и да в сем забавляющеся, оставим предлежащая нам благая. О совершении же пути Божия, не лет есть рещи ныне, да не во отчаяние приведу тя. Но веруй, яко туне тя спасает Бог молитвами святых: могут бо Его умолити. Помолися о мне брате.

Вопрос 115, тогожде к томужде великому старцу: о унынии, и других неких помыслех.

Ответ. Един Бог безгрешен, спасаяй надеющияся нань, да укрепит любовь твою, еже служити Ему в преподобии и правде вся дни живота твоего, во храме жертвенника внутренняго человека, в немже мысленныя жертвы приносимы бывают Богови, злато, и ливан, и смирна, в немже жрется телец упитанный, кропится честная кровь непорочнаго Агнца, в немже воскликновения святых Ангел с согласием бывают: тогда «возложат на олтарь твой телцы» (Пс. 50, 21). Тогда, когда? Егда приходит Господь наш, великий Оный Архиерей, Иже безкровную жертву приносяй и приемляй. Егда во имя Его услышан будет во ушию седящаго у красных врат хромаго, глас радости: «востани и ходи» (Деян. 3, 6), тогда входит во святилище, ходя, и скача, и хваля Бога. Тогда престает сон уныния и невежества: тогда упражняется дремание уныния и лености от веждей; тогда вжигают мудрыя пять девы оны светилники своя, и ликуют с женихом во святем чертозе, согласно поющия между собою без плищя: «вкусите и видите, яко благ Господь: Блажен муж иже уповает нань» (Пс. 38, 9). Тогда упраздняются брани, и осквернения, и движения, и водворяется мир святый Святыя Троицы, и печатлеется сокровище, и некрадомо пребывает. Помолися, да уразумееши и достигнеши, и возрадуешися, о Христе Иисусе Господе нашем, Емуже слава вовеки, аминь.

116. Тогожде к томужде великому старцу: о искушении сокровенном и успеянии.

Ответ. Удивляюся любви твоей, брате, како не поразумеваеши хитростей бесовских! Зане, якоже свидетельствовал есть Бог Иову, раздражишася на него: и яко поразумеша, яко близ бе, еже очиститися отроку, стрясоша его: тако и егда видят никоего во успеяние пришедша, искушают его по зависти. Не искушают же пришедшаго во успеяние от своих дел, сей бо победил есть их; но пришедшаго молитвами святых туне, по попущению Божию, да познает свою немощь, и не возвысится о даровании. Якоже воинства многа суть преимуща друг друга: тако суть, и обители у Отца светов, преимуща едина другую. Аще бо не сице, то почто многи? Бог да укрепит тя в страсе Своем. Помолися о мне.

117. Вопрос тогожде к томужде великому старцу, о успеянии души, и о научении к брату, и о вере к общему отцу.

Ответ. Веру ми ими вожделеннейше, яко, с Богом, не вне стоиши врат Царствия Небеснаго, но стани добре, внимая себе со опасением, еже не быти изриновену оттуду. Божие бо есть, еже ввести человека молящихся ради святых своих: человека же есть, еже пребыти, или изриновену быти. И по восхождению волею Божиею в превосходства тебе веду. Благодушествуй убо о Господе и усердно ходи в пути Его (и приимеши от Него) помощь о имени Его. О брате же: смиренным сердцем приими его, и глаголи ему, аще что послет Бог, в сердце твое, рещи, внемля, яко потребе бывшей, и ослу уста отверзе. И аще от Него есть все, то пользу, тобою бывшую, Тому припиши. И аще увидит твое смирение Бог, тебе приписует мзды научения, давый во уста твоя слово тое. И исполняется на вас писанное: «Брат от брата помогаем, яко град тверд и огражден» (Притч. 8, 9). Господь Иисус Христос да поспешит вам вся во благое. О худейшем же рабе: аще Бог дарова тебе веру, то Той есть, и растяй, и храняй. Не может бо кто худейший открыти тайну человеком, но Бог бывает вся во всех. Прости, брате, и помолися о мне.