Текст книги "Аскетика. Том I"

Ответ Иоанна. О смерти есть. Может же испросити ему живот, аще извещение приимет от Бога.

152. И сия услышавше, молиша великаго старца испросити ему живот.

Ответ. Бог мой, Благий и Милосердый, еще и еще да исполнит вы радости Святаго Духа, аминь. О брате же: довлеет ему, аще что сподобился прияти: яко внезапу богат сотворися: и от раба свободен. Но благословен благоволивый и приемый моление Бог. Ничтоже убо рцыте брату, да не оскорбится. Но вы сохраните тайну сию. Несть бо ему смерть, но прехождение от смерти в живот вечный и от скорби в покой. Радуйтеся, чада возлюбленная о Господе.

153. Паки брату отягчавшу, и зело болезнующу, молиша тогожде великаго старца, да сотворит Бог, умолен быв от него, с братом скорую милость.

Отвеща великий старец:

Сего ради замедли в болезни, да не оставит себя бывшее о нем моление: и Бог полезное ему сотворил есть и творит молитвами святых, аминь.

И по ответе сем скончася с миром брат оный.

154. Старец некий авва Евфимий безмолвствуяй, послал есть молитву сию к томужде великому старцу: да чрез него Бог сотворит к нему ответ, противу вопросов сущих в молитве.

О Светодавче! Путь сущих во тме (просвети и нас сущих во мгле), Ты бо рекл еси, Святе: «просите и приимете; толцыте и отверзется вам» (Ин. 16, 24); и понеже хощеши и нам дверь отверсти спасения, ускори, начал бо еси. Аще бо не хотел был еси нас спасти, то не бы явил еси нам, яже от нас убо не возможна: от Тебе же Бога возможна. Сказал еси нам Святе: очисти себе, аще хощеши да прииду; и аз рех, Святе, яко брение очистити себе не может. И паки рекл еси нам Владыко: хотяй Моих сподобитися дарований, да уразумеет стези Моя во всех; и како может уразумети от рождества слепый родивыйся, аще не отверзутся его очи? Слепый ищет вождя, да не како обрящет себе малое служение. Ибо сын Тимеов Вартимей, седяше при пути прося милостыни: и егда услыша яко Свет правды путем тем мимоходит, воззва, глаголя: «Сыне Давидов! помилуй мя» (Мк. 10,47), и егда умилосердися благость Твоя, и призвал еси его, и рекл еси: что хощеши да сотворю ти? Он же рече: Учителю, да прозрю; и абие благость Твоя рече: прозри: и прозре, и виде Твоя следы, и последова Тебе. И аз хощу воззвати, и претит мне присно хотяй омрачити очеса видящих. Аще хощет благость Твоя призвати и мене и рещи, что хощеши, да сотворю тебе? Воззову и аз по оному: Господи, да отверзутся мои очи. Ибо прокаженный оный, аще бы могл себе очистити, то не бы воззвал: Господи, аще хощеши, можеши мя очистити, но очищал бы сам себе. И аз по оному зову: даждь и мне тойжде святый глас: хощу, очистися, и абие отыдет от мене проказа. И прозрев очищен быв, тогда уразумею следы Твоя еже ходити в след Тебе, яко Ты еси путь заблуждших. И тебе отца моего молю: ей, отче, помолися Владыце моему Христу, да отверзет мои очи, яко тебе имам руководителя приводяща мя Владыце Иисусу, яко Тому есть слава, со Отцем и Святым Духом, во веки веков, аминь.

Ответ. И ныне время есть благоприятно, еже воспети слово евангельское: «яко не требуют здравии врача, но болящии» (Лк. 5, 31). Аще убо болящий приидет ко врачу, достоит ему сохранити повелеваемая от врача. По рекшему: «веровати подобает приходящему к Богу, яко есть: и взыскующим его мздовоздатель бывает» (Евр. 11, 6). Верен бо есть рекий: «Воздам вам в нынешний век сторицею, и в будущий живот вечный» (Мк. 10, 30). Приходящии убо к великому нашему Врачу, просвещаются от Него, и врачует вся мысленныя их страсти. Да не похвалимся убо глаголюще: яко верни есмы: зане осудимся аки лицемери и невернии человецы. От видимых бо является неявляемая вера, живущая в сокровенных сердцах. Аще веруем Спасителю Христу глаголющему: «яко по вере твоей буди тебе», да речет и ныне к сущей в теле нашей души, яко «дерзай дщи, вера твоя спасе тя» (Мф. 9, 28). Темже убо не еже рещи, и провещавати устнами, сия есть вера наша: но совершенная наша вера от исцеления является. Аще убо веровал еси, и исцелился, ходи и да непреткнешися, и да не храмлеши. Исцелился ли еси? То яви, яко удержася ток твоея крове. И аще имаши сия, о человече! недалече еси, еже услышати Спаса глаголющаго к чистейшей твоей душе и краснейшей: «вся добра еси, ближняя моя, и порока несть в тебе» (Песн. 4, 7), и паки апостолу глаголющу: «не имущи скверны, или порока, или нечто от таковых» (Еф. 5, 25). Отверзеся убо нам дверь, и протяжеся путь вводящий в живот; и яко многими скорбми подобает нам внити в Царствие Небесное; и да претерпим в делании труда нашего. Воистину бо недостойны страсти нынешняго времене к хотящей славе явитися в нас. И несть неправеден Бог забыти толиких трудов, аще до конца удержим послушание: глаголет бо: претерпевый до конца, той спасется, о Христе Иисусе Господе нашем, аминь.

151. Тогожде к томужде великому старцу, вопрос аки в молитве, о скверных помыслех и о воскресении. Животе и Воскресение, посети ны, яко Твое создание есмы, и очисти ны от легиона злаго, Святе, яко умилосердился еси о создании Твоем, и изгнал еси легиона, и искаху бесове внити во свиния. Еда ли в безсловесныя свиния, или в мене словеснаго? яко приях я, и приидох по брегу в море, и биют мя волны, и не разумею. Ныне же бодет мя некто извнутрьуду возбудити кормчия, яко да подаст ми руку, и измет мя из глубины якоже сотворил есть Петру: и речет ко мне: «Почто усумнился еси, маловере?» – и понеже обещал ми еси угодником твоим Варсануфием во ответех его, положити нас во единой раце, еда ли купно и востанем? Боюся бо рекшаго: «два будета на селе, един поемлется, а другий оставляется: две мелюще в жерновах, едина поемлется, и едина оставляется» (Мф. 24, 40–41). И понеже от сотворения мира почивают человецы, и обретаются многажды телеса святых и грешных купно во едином гробе, еда ли и в воскрешение купно востанут? Егда приидут избраннии твои Ангели, возставити праведныя вся, или ни? Но едини ли избраннии? И сего ради бояся аз, молю чрез угодника твоего, да якоже явил еси, яко во единой раце уснем, тако да покажеши яко и купно воскресиши нас. И отца моего Варсануфия молю: яко прияхом нивы пожати аз и он: и аз изнемогох и не могу жати, да подвигнется и той аки силен, еже принести тебе Владыце и о мне рукояти правды. Ибо и у древних отец видим таковый пример: яко изыдоша три жати, и един от них якоже аз разболе, и возвратися в келлию свою, а тии ободришася, и прияша жатву: егда же исполниша жатву приидоша в домы своя, принуждаху и прияти мзду: он же вопреки глаголаше: кую мзду? за нюже не потрудихся, но вы потрудистеся? И понеже судишася с ним да приимет мзду, предпочтоша и отцы да приимет, и ублажен бысть суд их. Ты убо, Владыко Христе Боже, утверди моление мое сие: яко Твоя есть слава вовеки. Аминь.

Ответ Варсануфия. Яко человек домовит поставляет себе верны домостроители, дав им и ключи и имения своя, и весь дом: и от вернаго домостроителя есть, еже како уснути, и еже како пищу прияти, и еже како почтену быти от своего Господина: и с ким соводворятися, или со упивающимися, или со живущими честно; и овому убо предлежит мука, овому же блаженство. Тако и Бог наш, предпостави Себе верныя человеки домостроители, и ключи своя даде им, еже заключати и отверзати, сиесть самовластие. Оно же еже быти верными, зане крещаются вси христиане: и еже добре строити уверенная им, сиречь дела крещения, спасения ради своего. Аще убо совратится кто от них сего праваго пути? Бывает с пияницами часть его, упивающимися вином беззакония: таковый свиния есть словесная. И весте, что имать пострадати, пришедшу Владыце. Аще ли же добре устроит преданная ему, еже от Владыки блаженство ведают вси. Глаголет бо: «во всю землю изыде вещание их, и в концы вселенныя глаголы их» (Пс. 18, 5). О воскресении же: гумно есть век сей, и купно плевелы с пщеницею суть. Воскресению же бывшу, евангельский глас учит нас, яко смешенни востанут, сим, еже рещи: «и разлучит их друг от друга, якоже пастырь разлучает овцы от козлищ» (Мф. 25, 32). А яже о двою жену, и двою мужу, о скончании рече: о вере и неверии: яко напоследок едина восприемлется, и в единой стоит человек. А еже о жатве братий, от обою составися благое. Сам бо возболевый, имеяше произволение еже соделати, но воспряти его болезнь: тии же имеяху, яко молитвами брата болящаго укрепил есть их Господь. И обоих постиже благодать Святаго Духа, якоже убо Господь рече ко апостолом: «не радуйтеся, яко повинуются вам беси, но радуйтеся яко имена ваша написана суть на небесех» (Мф. 10, 25): тако и мы, да не взыскуем, все ли купно востанем, но услышати: «приидите благословеннии Отца Моего, наследуйте уготованное вам Царствие от сложения мира» (Мф. 25, 34): и еже быти купно со Иисусом, якоже рече Отцу. Яко тому слава вовеки, аминь.

152. Тогожде подобне.

Господи Иисусе Христе, Врачу уязвленных душ, молитвы Тебе приносим от святых Твоих словес, яже приими угодника ради твоего. Ты бо рекл еси, Святе: «не требуют здравии врача, но болящии» (Лк. 5, 13). Напомянул же о сем и угодник твой Павел: «да не хромое совратится, но паче да исцелеет» (Евр. 12, 13). Рекл еси, Святе, в едином ответе от сих: аще исцелел еси, почто храмлеши? Исцелевый же не храмлет, но право ходит. Аз понеже хром есмь, и уязвлен, сего ради и вопию да посетиши и мене, якоже посетил еси исходящаго во Иерихон и впадшаго в разбойники. Ибо и аз в тыяжде разбойники впадох и уязвлен есмь: да обвяжеши и моя струпы, и всадиши на святый свой скот, си есть веру благую, и приведеши мя во святую свою гостиницу, и да прилежание сотвориши о мне, идеже прилежиши всем страждущим. Владыко: кровоточивая жена созади Тебе приступлши, и прикоснувшися края риз Твоих, спасеся: аз же по всяк день от святых Твоих удес приемлю врачевание, сиесть, Святаго Тела и Крове, и воду нашедшую от святаго ребра Твоего: и еще страсть моя кипит: понеже рекл еси, Святе, приходяй ко врачу, и хотяй исцеление прияти, повеленная от врача сотворит, посли ми Владыко, елика хощеши врачевания, жжения, обязания: точно устави смердяще мое течение, сиесть нечистый помысл, и понеже рекл еси Господи: яко дверь отверзеся, но пси отвсюду блюдух, и не оставляют приближитися двери той: благий дому Владыка, видя издалеча нищаго грядуща, и стужаема от псов, посылает дверника, да отженет псы тыя, и да приближится нищий и приимет милостыню от благости. Отче, еже написал еси нам, лет седмицу едину поживый, видети имать, яже не быша от сложения мира, и что сотворим мы юнейшии, како имамы спастися? Помолися Господеви, да скажет нам горы оныя святыя, аможе рече бежати и спастися, кия суть? Мысленныя ли суть, или видимы сия горы? Да увемы и мы: и егда приидет часть, бежим тамо и спасемся: во имя Отца, и Сына, и Святаго Духа, вовеки. Аминь.

Ответ Варсануфия. Брате, разсмотрим, что глаголем: и увидим, яко от словес наших обличение имамы. Приходяй бо ко врачу, аще не благочинствует по завещанию врача, избавиться от страсти не может. И понеже рекл еси: еже прияти и иныя цельбы и врачевания: удивляюся твоей любви, како не поразумеваеши всехитрую премудрость великаго нашего Врача, како пресече вину всякаго человека ищущаго ея: ибо, разгнув врачебныя своя книги всякому человеку хотящему вникнути, во еже спастися, безответны нас показал есть. Идеже бо и жены поют всегда оное: «аз есмь червь, а не человек, поношение человеков и уничижение людей» (Пс. 21, 7), что сотворят мужие? Не яко гнушаяся женами, глаголю. Да не будет! Не бо повелено нам бысть сие: но яко от начала тыя быша виною преступления: и не устрани я от Божественнаго учения Бог. Аще убо угодно есть нам врачевание сие, то почто отвергаем е? Аще наругаеми, мним, яко не отвергохом, но яко имамы е: убо притворно глаголем, и не творим. Ибо истинно есть: аще бо осяжем внутренняго нашего человека, то по истине обрящем, яко ниже обличения, ниже досаждения, ниже уничижения и поношения терпим. И от помысла, егоже имаши ныне, в немже искусих тя иногда, возможно есть уразумети тебе, ибо по содеянии каялся еси, яко не уразумел. Яко искусити хотя твою любовь, она, яже веси, сотворих, и обретох внутрь живуща еще ветхаго человека: но мню, яко не мало пользовася твоя любы от сего. Господь наш совершен есть, и Своих всех хощет совершенных быти; глаголет бо: «будете вы совершенни, яко-же Отец ваш Небесный совершен есть» (Мф. 5, 48). «Терпяй убо жжения сия, спасается: имеяй бо в ноздрех зловоние свое, не обонявает иного, аще станет и верху целых трупов». И от разбойников окраденный преподати что другим не имать. Блюди же, возлюбленне, яко елицы праздностию одержими есмы, всесовершенно без попечения быти не хощем, еже имети себе, якоже есмы, землю и прах. И состарихомся, питающе в себе тщеславие, еже бо имети нам, яко дело наше угодно есть Богу, и яко седение наше назидает всех, и яко избавихомся, еже судити и осуждати: последнее есть тщеславие, и ино ничтоже. Аще убо врачевания и обязание даде нам Великий наш и Небесный Врач: от кого обретается вина пагубы нашея, аще не от немощи произволения нашего? Прежде всех дарова нам смирение, изгоняющее «всяку гордыню, и всяко возношение, взимающееся на разум славы Сына Божия» (2 Кор. 10, 5), – послушание, угашающее вся разжженныя стрелы вражия: еже отсещи во всех волю ближнему. И сие раждает немятежность в сердце, и светлейшее и тишайшее лица устроение, и благопостоянство зрения. Великое же обязание оно, стягающее вся уды, и целящее всякий недуг, и всяку язю, даде нам любовь к Нему. Сам бо образ нам бысть; глаголет бо: «смирил себе», не точию «послушлив быв», но и «даже до смерти» (Флп. 2, 8) – и, полагая о нас душу Свою, научил есть нас, глаголя: «возлюбите друг друга, якоже аз возлюбих вы»: и «о сем разумеют вси, яко мои ученицы есте, аще любовь имате между собою» (Ин. 13, 34–35). Аще убо хощеши не хромати: приими жезл креста, и утвердиши о нем руце твои, и умреши, и не ктому хромати будеши: мертвый бо николиже храмлет. И, аще имаши жезл сей, не требуеши дверника; жезлом бо сим отгониши не точию псы, но и начальника зверей, рыкающаго льва. И Иаков рече: «яко с жезлом моим преидох реку» (Быт. 32, 10), – и паки, «поклонися на верх его» (Евр. 11, 21), – и Моисей жезлом сотвори знамения, – и сему пригвождаяйся, исцеляется всячески от текущия мокроты: умерый бо, греху умирает. И кая по сих чаемая надежда? Точию тридневное воскресение? Довлеет бо распинаему воскреснути со Иисусом. О седмице же различныя скорби и движения будут. А о нихже рекл еси горах, да разумеем Святую Марию Богородицу и прочих святых, во времена тая обретающихся, твердо имущих печать Сына Божия. Той бо, их ради, многая спасает: яко Тому слава вовеки. Аминь.

153. Тогожде подобне.

Троице нераздельная, не разлучайся от нас. «Из уст младенец и ссущих совершил еси хвалу» (Пс. 8, 3). Отче добрый, по истине ученик еси истиннаго Врача, дал еси мне врачевания и предохранения. Первое же жжение вельми проби сердце мое, и не могу терпети болезней. Написал бо еси мне пети – аз есмь червь, а не человек: и воистинну пою, и покланяюся, и славословлю, и превозношу вовеки; но не дерзаю рещи, яко червь есмь, а не человек, – человек бо есмь уязвлен от тленнаго червя. Кая же есть сила сего Червя Нетленнаго? Сей Червь мене ради прииде, да избавит мя сего червя тленнаго, растлившаго род человеческий. А понеже тленный сей червь, истлевающий и тлеющий входит во язвы, то соделовает гнилость и смрад: прииде Нетленный оный Червь, о Нем же речено – «червь есмь, а не человек» (Пс. 21, 7). И якоже сей червь входит в язвы: тако и Нетленный Червь низходит в преисподняя земли, и оттуду начат растлевати всякое нечестие ветхаго червя. И тако всех очистив возведе, и сам пребысть нетленен. Сей есть Червь, очистивый Иова от тленнаго червя и рекий ему: «востани, препояши яко муж чресла твоя» (Иов. 38, 3). Сей Червь и змия привлече удицею, висящ на древе. Сему то Червию вся покорена суть, разве Покоршаго ему вся: «вся бо покори под нозе его» (1 Кор. 15, 27). Тленный червь вся растлевает, и не пребывает ничтоже на земли, ниже древеса, ниже брашна, ниже земля, ниже плоть, егоже не истребляет, – кроме соли и елеа. Что же есть соль и елей? Токмо Отец, покоривый Ему всяческая, и создание Свое осоливый милостию Своею, и апостолом давый соль, да осолят мир от зловония бесовскаго, да приидут на благовоние Истиннаго Бога нашего. Аминь.

Кая же есть сила горушицы, яко той уподоби Царствие Небесное, а не маслине, или финику, или никоему от великих древес, но той худой? Занеже лютейша есть, и сжимает сердца наша. Ей, отче, помолися Господеви, яко да покажет нам тайну сию, червя, глаголю, и горушицы; яко да и мы прославим Отца, и Сына, со Святым Духом вовеки. Аминь. Отче, понеже напомянул ми еси давняя, и аз не забых, но присно поминаю оная, яже не сотвори враг, но точию неистовствова, понеже виде, бывший плод на месте сем; но, терпение твое, и человеколюбие Божие, не попусти воле его скверной быти; но есмы даже доселе прославляюще Бога. И понеже рекл ми еси, яко последи каешися, по еже содеяти: о! дабы ноне последи, да не всеконечно пребуду в том. И понеже рекл ми еси, яко впадый в разбойники, и окраден, не имать иному преподати: сего ради молюся, алчущ, да повержете ми вы, имущии, от крупиц ваших, яко да и аз прииму пищу, якоже пес под трапезою вас, имущих. И понеже рекл еси – состарелася есть с тобою гордыня и притворство: помолися о мне, да отыдет от мене. Аминь.

Ответ. Провозгласи Давид глаголя: «возсмердеша и согниша раны моя, от лица безумия моего» (Пс. 37, 6). Темже убо безумие есть влагалище всех зол: безумие бо роди преслушание; преслушание же язву: и по язве тоежде безумие породи нерадение; и нерадение гнилость и смрад содела, и очервивела есть плоть окаянная, и растлися; растленна же бывши, ввержеся в море, и снедь бысть великой рыбе, и вселися во утробе; тоя, – дондеже прииде Небесный Червь, и, ят быв на улице крестной, сниде во чрево великия оныя рыбы, и изведе устнами тоя снедь, юже пожре, со утробою, и, приим плоть, помаза елеем, и омы водою, и испече огнем (глаголет бо: «той вы крестит Духом Святым и огнем» (Лк. 3, 26)) и напита хлебом, и возвеселил есть вином, и осолил есть солию, и изменил есть тления. К сим же приложи ей и горушицу, востягающую всяко тление, и сжимающую и змиевы ноздри, ко еже ниже обоневати ю возмощи, и возмущающу его очи, во еже не воззрети на совершенство смирения ея. Ведуще убо сия вся, не презираем наказания его; да не исполнится и на нас, яко «аще соль обуяет, чим осолится?» (Мф. 5, 13). И кое есть недостаточество сих? Не отсюду ли точию, яко «рече безумен в сердце своем: несть Бог?» (Пс. 13, 1). Аще убо первых не забыл еси, то и последняя веси; услыши рекшаго: яко «ведевый волю господина своего, и не творяй, биен будет много» (Лк. 12, 47). Аще убо ведуще, глаголем и нерадим: то не далече нас отстоит, еже горе в разуме согрешающим. Аще ли же имамы, яко земля и пепел есмы, по Аврааму и Иову: во век не окрадени будем; но присно имамы, еже подати и инем, не злато, не сребро, но образ смирения и терпения, и, яже к Богу, любве. Тому слава вовеки. Аминь.

154. Тойжде, причащаяся хлеба, вопросил есть тогожде великаго старца о употреблении пищи.

Ответ. Брате, радуйся о Господе. Моли Бога дати ми терпение совершенное. Начинаю бо вещь, и не веду до конца: но абие колеблюся от установления, и желаю начало положити, и приити на конец, слушая апостола, глаголющаго о начале и конце: «яко начный в вас дело благо, той и совершит е, даже до дне Господа нашего Иисуса Христа» (Флп. 1, 6). И аще ничтоже творю угодно Богу; аз, сожаления достойный, обаче твоего ради повеления, подаю совет, яко брату: приемли по четыре лаитины, аще можеши, в седмицу; а в неделю, немощи ради телесныя, или похлебка, или разогретая. И якоже непщую, добро ти есть приимати я. Аще ли же в безумии глаголю, не вем. Иже бо себе не управляет, иныя како может управити? Прости мя, брате, яко аз должен бых молити тя, мне чин уставити: но еще не попускает ми гордыня, яже есть корень всем злым. Помолися, брате, яко да прейдем предлежащий нам путь: исполнь бо есть волн и бед, и, аки не смыслен, смеюся, и презираю. Но обаче не отсецаю надежды: милостива бо имею Владыку и благоутробна. Подаждь ми убо руку твою любве ради, и привлецы мя к Нему: и тобою спасет мя окаяннаго. Тому слава вовеки. Аминь.

155. Тойжде, не употребив реченныя ему от старца о употреблении пищи, вопроси и второе таяжде. Он же отвеща ему сице:

Брате, понеже обрел мя еси повелеваема от твоея любве, еда ли сего ради отметаеши моя словеса? И сие не от тебе, но вся вина от мене есть, яко словеса моя безплодна суть: не суть бо от деяний потов; сего ради ниже силу имут. Бога раздражает, вопрошаяй и преслушаяй: чрез вопрошение бо, и вражия зависть последует. До сего дне не познахом хитростей бесовских. Непрестанно проповедует апостол, глаголя: «не неразумеваем бо умышлений его» (2 Кор. 2, 11). Дерзай, брате мой. Аще не имел бых тя яко единодушна ми, любве ради Христовы, дати тебе ответа не могл бы: якоже бо и прежде рех, меры сея несмь. Но понеже прилепи мя Бог твоей любве, паки не смысленно глаголю: держи оныя четыре лаитины в седмицу, якоже рех ти; а в неделю, или едину похлебку или разогретая, немощи ради. Не держи же в сердце своем, яко заповедь ти дах: несть заповедь, но совет братний. Отверзеся позорище; тецем, да постигнем: есмы бо тленни человецы, и маловременни на земли: да обрящем милость в час оный страшный и грозный: о Христе Иисусе Господе нашем, Емуже слава вовеки. Аминь.

Ответ 156, тогожде великаго старца к томужде, являющ силу ответа.

Брате, что имам рещи на сия, иже ничтоже сотворивый отнюд? Аще ли же ты и глаголеши, яко сотворил еси и твориши, но аз николиже помню себе, точию всегда прогневляюща Бога делами моими. От дел убо ни чесоже ожидаю; человеколюбия же ради Его, уповаю спастися: умре бо грешныя спасти. Сежу убо во имя Его, дондеже приидет от Себе Сам, и речет ми: «что хощеши, да сотворю ти?» Да реку и аз со онем: «Господи, да прозрю» (Лк. 18, 41). Аще не имел бых и дела, то, бояся осуждения фарисеева, не посмел бых возглаголати. Но обаче глаголю ти брате, яко все мое житие и надежда на Нем висит, и молю день и нощь очиститися от явных и сокровенных страстей. Что убо имамы рещи о исправлениих? Слушая, яко «всяка уста да заградятся» (Рим. 3, 19) и прочая, и паки: «Хваляйся, о Господе да хвалится» (2 Кор. 3, 19). Блажен же очистивыйся от гнева, и прочиих страстей, и сохранивый заповеди вся, и глаголяй, яко «непотребен есмь раб» (Лк. 17, 10). Аще ли же творим едино исправление, а другим погубляем тое, то кая польза нам, еже на всяк день здати и разоряти? Аще кто презирает славу и безчестие, таковый может спастися, о Христе Иисусе, Господе нашем, Тому слава, аминь. Предаждь мя Господеви: и безмолвствуй с надеждою, моляся о мне, окаяннем и смиреннем.

157. Тогожде к томужде великому старцу, вопрос. Отче, помолися о мне, яко труждаюся, предже бо даже не прияти ми слово к тебе, аще и что-либо мняхся творити по силе моей, безтрудне творях. А отнележе подал ми еси слово, труждаюся и до изнеможения. И пред сим и о словеси сем написах ти. Но ты вменил мя еси за высокомудрствующа, но фарисей прислал ми еси слово. И аз, отче, не рех ти высокомудрствуя, но по нужде. Молю тя сотвори молитву, да открыет ти Господь, что есть во мне.

Ответ великаго старца. Брате, Божественное Писание глаголет: «вся с советом твори, и без совета ничесоже твори» (Сир. 32, 21). Егда не с советом, но от хотения своего творил еси, то не трудился еси умом: ибо никтоже есть не требуяй советника, точию сам создавый премудрость Бог. Егда же по Бозе взыскал еси отсещи свою волю, приити же во смирение, и прияти мнейшаго твоего брата советником, то поострил еси ненавистника добра беса на зависть, имущаго присно зависть на всех. Видиши ли строптивость вражию? От себе не установих ти ничесоже, но упросил мя еси, и советовах ти, яко брату. И услышав оставил еси, и приложение сотворил еси: и аз ти рех о фарисее. Ибо и той хваляся глаголаше, яже глаголаше. И ты искал еси извещений, и се ничтоже ино есть, разве высокомудрие. Вонми, и увидиши со опасством, како егда полагаеши начало, абие приносит ти вину, и разоряеши е. И паки полагаеши, и скорее разоряеши. И не воспоминаеши, яко «претерпевый до конца той спасен будет» (Мк. 13, 13); и «начный дело благо в вас, совершит е, даже до дне Господа нашего Иисуса Христа» (Флп. 1, 6). Аще покоит тя еже от себе творити, якоже творил еси: аз не скорблю. Ниже бо аввою чиим хощу быти, ниже учителем; имею бо обличающаго мя апостола, глаголюща: «научая убо иного, себе ли не учиши?» (Рим. 2, 21). Брате, спасающихся есть, еже истнити душу, яко паучину. Прочее терпения многа требуем, дондеже скорбьми многими внидем в Царствие Божие, о Христе Иисусе Господе нашем. Аминь. Прости мя, брате, и помолися о мне.

158. Тогожде к томужде великому старцу вопрос. Взыскавый заблуждшее овча, Иисусе, научи и нас, како взыскати пастыря. Отче, едино слово хощу вопросити. Зане писано есть: взыщите Господа, и утвердитеся, взыщите лица его выну (Пс. 104, 4): како может грешный человек взыскати выну Господа? Научи нас словеси сему, ради Умудрившаго тя, да и мы выну ищем лица Господня, яко Тому слава вовеки, аминь.

Ответ. Брате Евфимие, молю любовь твою, спотрудися молению моему, к человеколюбцу Богу. Ибо любы твоя проси мя написати тебе, яко да взыщем пастыря. И от перваго дне до ныне молю Бога о прошении твоем, и глаголет ми: очисти сердце твое от помыслов ветхаго человека, и дарую ти прошения твоя. Моя бо дарования в чистых вмещаются и даются. Елико же движется сердце твое от гнева и злопомнения и подобных страстей ветхаго человека, тамо не внидет премудрость. Аще желаеши Моих дарований, сосуды чуждаго изнеси из себе, и Моя о себе приидут в тя. Еда не слышал еси, яко, не может раб двема господинома работати? Аще убо Мне, то не диаволу, аще же диаволу, то Мне никогдаже. Аще убо кто хощет сподобитися Моих дарований, то следы Моя да разсмотрит. Ибо яко овча незлобиво приях вся страдания, ни вопреки глаголах в чесом-либо: и вам рех имети целость, якоже голубие, и вместо сих имате свирепство страстей. Блюдите, да не реку вам: ходите во свете огня вашего. Сия убо слышав, в плаче есмь и рыдании: донележе умилосердится и на мне благость Его, и избавит мя лютых страстей ветхаго человека, еже прияти вся находящая ми в терпении мнозе: веси бо, что соделовает терпение; и апостол упомянул есть о сем. Помолися убо, брате мой, да приидет ми: и любве ради, обличи мя, аще что преступаю, да исправлюся, ибо безумен есмь, но люблю учащия и обличающия мя, ведый, яко во спасение души будет ми их учение. Еще помолися, да избежу от падения оправдания, яко зело скорблю. И прости ми о всех, яко в труд тя всегда влагаю. Но велику мзду имать дело сие, о Христе Иисусе, Господе нашем, Ему же слава вовеки, аминь.

Вопрос 159. Тогожде к томужде великому старцу.

Отче, труды убо мои, яже даю ти, себе приписал еси. И сие премудрии творят: не за еже понести тяготу ближняго единаго точию, но многих ради, в пользу душ наших: наипаче яко ты, аки отец, побуждаеши нас на вопрос о пути живота во многом твоем милосердии. Но молюся (яко пристанище и прибежище посла тя Господь мне), сотвори милость, и умоли Владыку, да сотворит со мною милость и явит ми мало нечто: зане, яко не вем, впадаю, и яви мне, якоже явил еси прежде, да покаюся. И посем покажи ми путь, како да хожду, яко восприял еси душу мою.

Ответ. Брате, яко своей ми души глаголю: связа бо Господь душу твою с моею, глаголя: да не отступиши от него. Понеже не бе мое учити тя, но научится от тебе. Боюся бо глаголющаго: яко научая инаго, себе ли не учиши? И понеже глаголеши, довлеет премудру мание, и паче не довольно бе мне: но ясно хощеши слышати, аще согрешит безумный в слове, прощение имать от всех. Безумен бо есть, и что ни глаголет, не весть. Аще ли же премудр согрешит, прощения не имать: премудр бо есть, и в разуме согрешил есть. Тако убо аще кто от сущих вне братии согрешит в слове, прощение имать, яко со всеми есть: аще ли же мы мнимии затворницы и безмолвницы, и у человеков добри, кое имамы прощение? И понеже познати хощеши явленно вещь ону, глаголю: седиши внутрь, аки умерщвлен мирови: како егда вступиши в беседу, от любве и радости прилагаешися в распрю, и памятозлобие, и порицаеши ближняго, а не себе самаго? И не глаголеши, яко аз есмь недостойный, но и вменяеши себе? Бываемому бо извинению, глаголеши: рцы, яко аз рех, и послушают «сладце». Что имаши себе, яко сладце приимут слово твое? Или яко Илию пророка? Укори себе, и вся бываемая тебе уразумей, яко без воли Божией не бывают, аще ли упокоение ко благодарению, или скорбь к терпению. Где есть слово писанное: яко «приемлете ли аще кто и по лицу биет вы» (2 Кор. 11, 20) и прочая. Сего ради далече есмы от Бога. Аще убо путь той восхощеши уразумети, то сей есть: еже имети биющаго, якоже греющаго, и безчествующаго, яко славящаго, и досаждающего, яко почитающего, и утесняющаго, яко упокоевающаго; и аще по забвению, или негли и по произволению не дадут ти обычнаго, да не скорбиши, но паче глаголи: аще бы была воля Божия, то могло бы приити; и егда приходят, да приимеши тихим лицем радуяся, и глаголя: яко недостойна суща помиловав мя Бог, по Даниилу, яко егда посетил есть его Господь, сие точию глаголаше: «помяну бо мя Бог» (Дан. 14, 38), вменяя себе недостойна, и отложи оправдания. Зане аще речеши нечто, глаголеши: добре рех. И аще постигнеши умом, глаголеши: добре постигох, добре, добре и сие добре. Почто не помышляем еже не оскорбити никогоже, ниже словом, ниже делом? И Бог поможет нам во всех. Понуждался еси сказати помысл братии, за еже исполните волю твою: яко аще не днесь будет дело твое. И поразил еси помысл юнейших, глаголющих: что суть иныя дни два, яко не терпит старец? Рцы ми, по самой истине бысть ли дело? На небеса возшел ли еси? Но просте поразил еси безвременно от диавола, брате. Отныне оставим мертвыя погребсти своя мертвецы, и да благовествуем Царствие Божие, о Христе Иисусе Господе нашем, Емуже слава вовеки. Аминь.

160. Тогожде, аки в молитве, к томужде великому старцу. Животе отчаянных, да не презриши мя, яко во отчаянии лежу. Явление словес твоих просвещает и вразумляет младенцы. Сказал ми еси Святе, яко очисти себе, и изми из себе ветхаго человека. Еда брение само себе может очистити? Или здание может ли само себе украсити, аще не создавый е украсит? Или скудельница, созданная от скудельника, может ли себе выпалить, аще не создавый вложит во огнь, и искусит, аще благопотребна есть? И ты, Святе, аще хощеши спасти создание Твое, посли Божественный Твой огнь, да испечет скуделницу, созданную от Тебе, да приимет от Тебе елей и да не истечет. Яко твоя есть слава и милость вовеки, аминь.