Текст книги "Аскетика. Том I"

Ответ. Брате, не принуждай мя глаголати, хотящаго безмолвие и молчание лобзати. Убо утверди в Господе сердце твое, и претерпи не поколебимо. Ибо позавидевый Адамови исперва, и изринувый из рая, завидит еже о Христе единомыслию нашему. Но рекий: «яко видех сатану, яко молнию с небесе спадша» (Лк. 10, 18), да упразднит его от нас и да расторгнет сети его. Ты убо да не будеши прехитрен от него в чем, еже поколебатися от места твоего, сице бо и Малха прехитри: огорчается бо зело на нас. Но аще смиримся упразднит его Господь. Мы убо на себе поречение да приносим выну: яко сия есть победа. И о еже помыслити отыти в пустыню, рекоша отцы, яко три главы суть: и аще кто сохранит тыя, то может жити и между людьми, и в пустынях, и идиже аще не пойдет: еже укоряти себе, и еже поврещи созади волю, и еже имети себе под всею тварию. Да увесть же любы твоя, яко весь подвиг диаволь есть, еже разлучити нас от друг друга. Видит бо известно писание сбывающеся в нас, яко брат от брата помогаем, яко град тверд и огражден. Да не даст ему Господь исполнити свою волю в нас: но да сокрушит и, по истому словеси, под ноги наша вскоре. Ты убо да не усумнишися, уповаю бо, яко во единой раце положени будем (якоже уже предрекох ти) вкупе оба. И Бог в сие собра нас, пользоватися друг от друга: и сия искушения образ бывают, в пользу и утверждение многих. Убезмолвися убо, брате, и помолися, да прейдем прехождение сие: яко да не всуе иждиваем дни наша. Ибо приближися время, и неистовится враг. Не за суетен убо вменил Бог труд твой, – да не будет! Но Сам «хотяй всем человеком спастися, и в разум истины приити» (1 Тим. 2, 4), хощет тя внити в совершенство. Рече бо апостолом: «тогда рцыте, яко непотребни раби есмы» (Лк. 17, 10). И тако себе удержим, и сотворит с нами милость, имене ради Своего, нареченнаго в нас. Тому слава, вовеки, аминь.

161. Неверию всеянну в помысле вопрошающаго старца, на тогожде великаго старца, по зависти диавольской, пользы ради ответов его: он сердечная его познав, явил есть ему сия:

Ответ. Первое и прежде всего, славлю Святую и Живоначальную Троицу, глаголя: слава Отцу, и Сыну, и Святому Духу, и ныне, и присно, и во веки веков. Аминь. Не безвременноже предзнаменовах в начале таковое славословие, но показуя добра ненавистнику бесу, яко в являемых от него мечтаниих, ничтоже является от таковаго славословия: но смущение, и печаль, и уныние. Прочее, брате, приидем на благодарение Богу, о избавлении великаго искушения, постигшаго нас, яко не разумных, и не оставило есть человеколюбие Его погибнути нас до конца. Присно бо истинен есть рекий: «живу аз, глаголет Господь, яко не хощу смерти грешника, яко еже обратитися, и живу быти ему» (Иез. 18, 23). Убо спасшему нас, и присно спасающему, да воздаем благодарение выну. Емуже благодарят Ангели, Силы премирнии, Воинства небесная, Херувими, и Серафими благолепнейшими гласы непрестанно и неоскудно вопиюще, взывающе, и глаголюще: «Свят, Свят, Свят, Господь Саваоф» (Ис. 6, 3) и прочая. Поразумевающе убо и мы возблагодарим Тому, Емуже небо престол и земля подножие, Емуже вся тварь работает. И от преобразования сего написаннаго начнем: и мы возблагодарим Отцу, яко помилова мир, и не пощаде послати Единороднаго Своего Сына Спасителя и Избавителя душ наших. Возблагодарим Сыну, яко «смири Себе, бых послушлив даже до смерти, смерти же крестныя» (Флп. 2, 8), нас ради человеков. Возблагодарим Святому Духу, Животворящему, глаголавшему в законе и пророцех и учителех. Показавшему Петра покаявшася, и повелевшу ему ити к Корнилию, и прославльшему его, и давшему власть ему воздвигнути мертвыя, якоже и Тавифу, предваряющему присно, и сокрушающему сети вражия от призывающих Его, по пророчеству Давида, глаголюща: «Сеть сокрушися, и мы избавлени быхом. Помощь наша во имя Господа, сотворшаго небо и землю» (Пс. 123, 7). Се убо помилова нас, и исцелил есть нас от толикаго недуга. Услышим Его глаголюща: «Се здрав был еси, ктому не согрешай, да не горшая постраждеши» (Ин. 5, 14). Да приидем во всех в терпение. Смиренный бо на земли лежит, и лежай на земли, камо имать пасти? Явно же есть, яко сый на высоте, удобно падает. Аще обратихомся убо и исправихомся, не от нас сие, Божий дар. «Господь бо, глаголет, возводит низверженныя, и умудряет слепцы» (Пс. 145, 8) и прочая. А еже написати ми оно, «кто ны разлучит от любве Христовы», то великия меры есть слово оное: се бо мало не прервахом уже любве, за еже умрети и удалится от корабля Христова. Но да не отрешу печати, и пустословлю много, добре есть. Убодает бо мя некто глаголя: идеже суть мудри, не мудрися. Оставляю прочее слово. Аки любимцу искренну написах. Сия же творя, достигнеши пути, вводящаго в жизнь вечную, о Христе Иисусе, Господе нашем, с Ним же Отцу, и Святому Духу слава, честь, держава, вовеки, аминь.

162. Сия приим старец, в плач и слезы на многи дни себе вдаде. И пишет ему великий старец, утешая его тако:

Брате, елика преидоша, повержим созади, по апостольскому словеси, глаголющу: «древняя мимоидоша, се быша вся нова» (2 Кор. 5, 17). Впрязем себе единодушно во благое иго Христово, и утвердим себе в любви Христовой. Глаголет бо: «Бог любы есть» (Ин. 4, 8). Аще убо кто себе глаголет имети любовь, да не имать ничесогоже, ненавидимаго Христом. Потщимся убо очистити сердце наше от страстей ветхаго человека, ихже ненавидит Бог. Яко храми Его есмы, и в храме оскверненном страстьми, Бог не живет. Внидем убо и сотворим малое наше безмолвие (довольное бо уже бысть) и помолимся, да по Его воле будет безмолвное наше житие, славяще Пречистую и Святую Троицу. Вниди убо и мене предаждь Богови, и да не стужиши в нынешних, еже вопросити мя, или написати, упраздняюся бо отныне. Аналав послах ти по повелению твоему: ведый, яко ничтоже есмь, разве земля и пепел. Не убо яко достоин послах: есмь бо нечист и должник во всех, но да не отвергу заповеди глаголющия, яко «всякому просящему у тебе дай» (Лк. 6, 30). И любве ради, яже во Христе, послах ти. Прием убо, помолися о мне, и помолися да не вотще будет наш труд, но о Христе Иисусе, Господе нашем, Тому слава, вовеки, аминь.

163. Старец некий немощен, Андрей именем, безмолвствуя во общежитии, возвести томужде великому старцу некая от сокровенных своих, купно же и благодаря ему, о еже сподобися близ его жити, и о немощи телесней.

Ответ. Аще воистинну веруеши, яко всеконечно Бог приведе тя семо, увери Ему попечение свое, возверзая нань всю свою печаль, и Той устроит, яже о тебе, якоже хощет. Аще ли же имаши попечение о коей-либо вещи, или о телесной немощи, или о душевных страстех, то должен еси пещися и о всех, якоже веси. Двоедушие бо, егда вся оставит кто Богови, аще оскорблен будет мало, присно глаголет: аще негли сотворил бых прилежание о теле, не бых имел оскорблен быти тако. До смерти убо, предавый себе Богови, от всего сердца должен есть себе предати Тому: множае бо нас весть, что на пользу есть нам, души же и телу. И елико оставит тя поскорбети в теле, толико облегчение сотворит согрешенных тобою. Ничтоже убо истязует от тебе Бог, разве благодарения и терпения, и моления о оставлении грехов. Смотри же, колико есмь горд, яко наругаем от бесов, и непщуя любовь имети ко Богу, побеждаюся рещи ти, приемлю половину бремене твоего ныне: и в преднее Бог паки имать помощи, яко не в мудрости глаголах. Вем бо себе слаба и немощна, и нага всякаго дела блага: но обаче безстудие мое не оставляет мя отчаятися; имею бо Владыку благосерда, милостива, и человеколюбива, и простирающа руку грешному до последняго издыхания. Тому прилепися и Той о всякой вещи устроит, паче неже просим или помышляем. Тому слава вовеки, аминь. Прости мя брате и помолися о мне.

164. Сия услышав от него, яко «половину восприемлю бремене твоего», оскорбев, яко не совершенне обеща ему оставление: вторицею проси, моля его и умилостивляя, еже бы совершенное отпущение подати Христом.

Ответ. Удивляюся любви твоей, брате, како не разумеваеши дел, яже по Бозе любве. В первом убо чине, Бог весть, яко имам себе землю и пепел, ничтоже суща отнюд. Аще ли же что паче меры моея беседую кому, или паче силы моея, то подвизаем от любве Христовы, беседую, познавая, якоже рех, себе ничтоже суща и не потребна раба. Понеже убо не уразумел еси, что рех ти, сообщника сотворих тя. Рех бо ти, яко приемлю половину твоих согрешений, и не рех ти, яко третию часть ношу, и не оставих тя вящше мене носяща и отягчаема. И паки, изгоняя самолюбие, рех, еже рех. И не рех ти две части, аки бы показуя сам себе сильнейша тебе. Тщеславие бо бе образ: и не рех ти все ношу. Совершенных бо есть творити сие, сделавшихся братиями Христа иже положи душу свою о нас, и возлюбил есть возлюбльшия ны совершенною любовию. И паки, чужда тя творил бых духовнаго делания: аще не бых сице рекл. Ни тщеславлюся убо, приписуя себе все, ниже завидую тебе, сообщника тя сотворив добраго обращения. Аще братия есмы, богатство отца нашего равно да разделим, и не обрящется посреде неправда. Аще ли же хощеши все на мене возложити, то послушания ради, и сие восприемлю. Прости, яко многая любы в суесловие мя приводит. Обаче да будет ти в веселие, о Христе Иисусе, Господе нашем. Емуже слава, вовеки, аминь.

165. Прошение тогожде к томужде великому старцу, яко да помолится о нем, належащия ради ему немощи.

Ответ великаго старца. Писание глаголет: «проидохом сквозе огнь и воду, и извел еси ны в покой» (Пс. 65, 12). Подобает хотящим угодити Богу проити сквозе малых скорбей. Како святые мученики ублажим за страдания, яже Бога ради претерпеша, аще огневицы не можем стерпети? Рцы души твоей скорбящей: не лучше ли тебе огневица паче геенны? Да не пренемогаем в немощи, яко апостол глаголет: «егда немоществую, тогда силен есмь» (2 Кор. 12, 10). Блюдите, яко сердце и утробы испытует Бог. Претерпим, понесем, будем ученицы апостола, глаголющаго: «скорби терпяще, благодаряще Бога о всех» (Рим. 12, 12). Да и на нас исполнится оное: «исповестся тебе, егда благосотвориши ему» (Пс. 48, 19). И аще имел еси телесное угождение и ко искусу обрел еси малую скорбь: почто не помышляеши Иова, глаголюща: «аще благая прияхом от руки Господни, злых ли не стерпим» (Иов. 2, 10)? Виждь, яко хотящии по всему покоя, услышати имут: яко «восприясте благая ваша в животе вашем» (Лк. 16, 25). Да не ослабеем: милостива Бога имамы, множае нас ведуща немощь нашу. И аще, искушая нас, наводит на нас немощь, но имамы апостола подающа нам обязание, глаголющаго: «верен Бог, иже не оставит вас искуситися паче, еже можете, но сотворит со искушением и избытие, яко возмощи вам понести» (Евр. 13, 5). Господь да укрепит и болящаго, и служащия: и будут оба ваша делания во славу Божию. На конец терпения внемлите: да не пренеможете, ни да стужите. Близ бо есть Бог, глаголяй: «не имам тебе оставите, ниже имам от тебе отступити» (Евр. 13, 5; ср. Нав. 1, 5). Веру ми имите, братие, яко пообладало мя тщеславие. Никогдаже болен быв, возлегах, ниже оставлях рукоделие мое, аще и великии прихождаху ми болезни. И мало прежде ухитри тщеславие, егда внидох в келлию его, не оставило болезни ми приити, и скорблю хотя терпения: и что терпети, не вем. Не приходит ми скорбь, и истаеваю слыша: «претерпевый до конца, сей спасен будет» (Мк. 13, 13). Но молитеся, да пребуду держа надежду спасения моего, еже о Христе Иисусе, Господе нашем, Емуже слава, вовеки, аминь.

170. Тойжде старец еще в недузе сый, моли тогожде великаго старца помолитися о нем, да получит, юже от Бога, помощь.

Ответ. Имея Бога, да не убоишися: но все попечение твое возверзи нань, и Той имать попещися о тебе. Не веси ли, яко аще земная наша храмина тела разорится, создание от Бога имамы, «храмину нерукотворенну вечну на небесех» (2 Кор. 5, 1)? Несумненно веруй, и поможет ти Бог: милостив бо есть. Тому слава вовеки, аминь.

171. Тойжде старец, пребывая с некиим братом, и, изнемогшема обема, проси инаго старца о нею помолитися.

Ответ Иоанна. Господь рече: «в терпении вашем стяжите души ваша» (Лк. 21, 19). И апостол, последуя Ему, рече: «терпения бо имате потребу» (Евр. 10, 36). И пророк: «терпя потерпех Господа, и внят ми» (Пс. 39, 1). Сладчайший же паки Владыка, наш Бог, рече: «претерпевый до конца, той спасется» (Мк. 13, 13).

Оба пребудите в терпении, благодаряще, и зряще святую Божию силу свыше бываемую вам: ко искусу бо вашему суть сия вся. Бдите во глаголемых от вас: «испытай мя Господи, искуси мя» (Пс. 138, 23). Помолитеся о мне прошу, за сущую по Богу любовь.

Вопрос 168, тогожде к великому старцу. Понеже помысл глаголет ми, яко не могу спастися, помолися о мне, отче милостиве, и рцы ми, что сотворю воспящаемь поститися?

Ответ. Бог небесе и земли, да даст тебе и мне недостойному, обрести милость в час оный и стати со дерзновением на страшнем и славнем судищи Его. Возлюбленне брате, имея таковаго Бога милостива, да не повержеши себе во отчаяние. Сия бо есть велия радость диаволу. Буди убо надеяся на Господа, яко никтоже претерпеваяй до конца своего на месте сем, изгоним бывает из ограды овец Христа Бога нашего. Суть бо нецыи на месте сем имуще многое дерзновение ко Богу. И о сем тщатся, молящеся Ему, да не отлучимся от них мы, сопребывающии с ними на благословенном месте сем: но да якоже купно пребывают на месте, еже избра Себе Бог, во еже призываему быти имени Его на нем, тако да будут купно и в будущем. Да не убоишися убо, честнейше! Аще бо аз немощен есмь и худейший, и тако известихся, яко причислен и совписан еси со благословенным стадом Христовым: колми паче святии Божии отцы, и достойнии Его известишася о сем. Потерпи убо Господа и уповай на Него. И о посте чувственном да не скорбиши: ничтоже бо есть без духовнаго; не входящая бо без сладости в человека сквернят человека, но изходящая из него; и паки, разсуждение Бог даде управителя иноку. Разсуди убо, возлюбленне, от кого Бог истязует милостыни, от убогаго ли или от богатаго? Тако бо глаголет: «не престай благотворити требующему, якоже обретает рука твоя» (Еккл. 9, 10). От немощных убо телом не истяжет Бог пощения, но от сильных и здравых телом. Снизойди убо мало телеси, и не будет то грех. Не бо истязует от тебе сего Бог, весть бо немощь, юже послал ти есть. Во всем убо благодари Его: яко благодарение ходатайствует немощи человечестей ко Богу. Совлецыся убо ветхаго человека, тлеемаго с похотми прелестными: и облецыся в новаго, созданнаго по Богу. И радуйся о Господе веселяся, со святыми Его соутешаемь выну. Кто представит, или кто может изследити радость святых неизглаголанную, и неизреченное оное веселие, и свет безприкладный? Како, якоже суть, зде открывает им таинства Своя дивная, преславная, пребывающую им славу и упокоение? И како отрешает ум их от мира сего, и всегда зрят себе на небеси, со Христом и Ангелы? Ни алчба оскорбляет их, ни жажда, ни ина земная вещь: свободишася бо от всех сущих в житии укоризн и страстей, и грехов, и инако да реку словом Писания, «идеже сокровище их, тамо и ум их есть» (Мф. 6, 21). Достигнувый в сия, весть, что слышит. И что имам сотворит, ниединоже благо сотворивый? Но не отчаяваюся: силен бо есть Бог учинити нас со имущими обрести милость, о Христе Иисусе, Господе нашем, с Нимже Отцу, со Святым Духом, слава во веки веков. Аминь. Господь да услышит истыя своя рабы, и да послет вам вскоре велию Свою милость, и мне да даст разумевати, еже приити в познание истины. Молися о мне, и целуй (приветствуй) сослужащаго тебе брата, прося его тожде творити о моем непотребстве.

Вопрос 169, тогожде к томужде великому старцу.

Понеже нозе и руце болят ми зело от лому, и боюся, да не како от бесов есть: рцы ми, отче, тако ли есть? И что сотворю, яко скорблю зело, яко не могий поститися и яко принуждаемь есмь многократно прияти пищу? Что же есть, еже вижду во сне дивия звери? Прошу, владыко, Господа ради, прислати ми малое благословение от святыя пищи твоея и воды, да от тех прииму утешение.

Ответ. Да не воспечалуеши, любимиче мой, не бо от бесов есть якоже мниши, но болезнь есть наказания Божия нам ко успеянию, внегда нам благодарити Бога. Не был ли друг верен Иов Богови? И что не претерпи благодаря и благословя Бога? И конец терпения во славу безприкладную его приведе. Убо и ты потерпи мало, и узриши славу Божию. О посте же да не возпечалуеши, якоже бо уже рех ти, не истяжет Бог никогоже выше силы. Что бо есть пост? Разве наказание телу, яко да поработит тело здравое, и немощно сотворит страстей ради. Глаголет бо: «егда немощствую, тогда силен есмь» (2 Кор. 12, 10). Болезнь же вящша наказания есть, и вместо пощения, или и вящше вменяется, иже с терпением носящему и благодарящему Бога, и плод спасения обирает от терпения сего: вместо бо, еже немощно сотворити постом тело, само о себе болит. Благодари, яко пременился еси труда пощения. Аще убо яси десятерицею, да не воспечалуеши, не осудишися. Не бо по действу бесовскому есть, ниже по разслаблению помысла, но на искус нам бывает и пользу души. О сониих же дивиих зверей, мечтание есть бесов, хотящих тебе прелстити сими, да повериши, яко страдание твое от самых бесов есть. Но да упразднит их Господь глаголом уст Своих, молитвами святых. Аминь. И да не воспечалуеши: «его же бо любит Господь, наказует: биет же всякаго сына, его же приемлет» (Евр. 12, 6). Верую же яко и за сие телесное страдание имать Бог сотворити с тобою милость Свою, якоже хощет. Господь да укрепит тя и утвердит, еже претерпети, аминь. Мало воды послах ти от сосудца блаженнаго отца нашего Евфимия, послах же и малое благословение моея пищи: да благословиши мне пищу. Помолися о мне, вожделеннейше.

172. Тогожде прошение ко иному старцу.

Помолися, отче, о тяжчайшей моей немощи, и яви мне о употреблении пищи. Не бывает ли некако в соблазн, еже скоро мне и часто приимати? И о псалмопении, како должен есмь проходити? Не могу бо пети. Насади мя, владыко, и напой мя, и скажи ми, еже рече святый отец наш, яко Господь сотворит милость Свою с тобою. Аще о смерти ми рече?

Ответ Иоанна. Аще и умолчал бых, не имый слова, ниже некое добро умолчал бых. Чесо же ради ищещи хлеба от ядущаго рожцы? Сие же глаголю ти, яко аще и ничтоже есмь, сорадуюся тебе о тех, яже написа к тебе благословенный отец наш. Се убо питает тя твердою пищею духовнаго хлеба: почто требуеши водянейшаго моего млека, творящаго гнусность? Не возбранило есть Писание, ниже отцы, снизхождения к телу, не по сласти, но с разсуждением бываемаго. Внегда убо, якоже уже рех тебе, ниже по невоздержанию, ниже по сласти яси и пиеши, не бывает ти во осуждение, ниже в соблазн некиим: о сих бо рече Господь, яко не сквернят человека. О псалмопении же, или службе, не скорби паки: не истязует бо тебе Бог болезни ради. Внимаяй себе оскорбляет себе пощением Господа ради и своего ради спасения. Имаши убо скорбь болезненную вместо скорби пощения. И о немощи же да не пренемогаеши, не оставляет тя Господь: но строит тую, якоже весть, на пользу, яко да не оскорбишися выше силы твоея. О смерти же не рече ныне старец, но о милости, юже хощет Бог сотворити с тобою. Молю убо тя претерпети, якоже рече ти, и узриши воистинну славу Божию. О насаждении же, аще насаждаяй и напаяяй отнюд ничтоже есть, а обоя мне приписал еси, имаши вместо мене, ничтоже сущаго, Бога, Иже растит, и покрывает, и творит с тобою по милости Своей. Наслаждаяся убо Его благости, мужайся в Нем и крепися, и помолися о мне, да и на мне будет милость Его.

173. Тойже старец, стужая в болезни своей, паки проси тогожде старца, помолитися о нем.

Ответ Иоанна. Ко искусу есть болезнь твоя, потерпи благодарно: и вскоре помилован будеши от Бога. Целую вы о Господе, просяй помолитися о мне.

174. Тойжде паки проси великаго старца о томже.

Ответ. Се и брат Иоанн рече, яко вскоре помилует его Бог. И аз, последнейший, что имам рещи? Рад бых и днесь: и верую, яко послет ему отраду днесь, молитвами святых Своих. Помолитеся о мне, возлюбленнии!

175. По ответе же сем, абие в тойжде день здрав бысть, и посла благодаря старцу, и возвещая милости Божия, чрез него бывшия.

Ответ Варсануфия. Господь наш, Иисус Христос, рече Своим учеником и апостолом, радость творя им: «Не радуйтеся, яко дуси вам повинуются о имени Моем: но яко имена ваша написана суть на небесех» (Лк. 10, 20). Тако убо и мы, аще о помощи, телу бывшей о имени Бога и Начальника душ наших Иисуса Христа, вопием играюще: что убо будет, егда подастся всесовершенное очищение от всех страстей души нашей, о страшнем и славнем имени Его? Колицы гласи, языцы, уста, сердца и помышления возмогут воздати Ему подобающее славословие? Мню же, яко ниже в безплотных обретается: непостижен бо есть Бог. Тому слава, и власть, и сила, вовеки. Аминь.

174. Сему же старцеви рече некий брат: се молитвами святых обновился еси, о старче. И отвещав рече: елижды рекл ми еси слово сие, мало не в четвертое приметил, яко сокрушают беси тело мое. И вопрошен бысть иный старец о сем:

Ответ Иоанна. Вещь сия зависть имать, и неверие: зависть убо, яко не радуются бесове, да облагодетельствован будет человек; неверие же, яко да зряй немощь усумнится сердцем.

Вопрос 175. Како, рцы отче, яко мы ли имеем неверие, или яко бесове приводят нас в неверие?

Ответ. Бесове от зависти приносят неверие. Аще убо приимем, слуги и сопричастницы их бываем.

Вопрос 176, тогожде к великому старцу.

Егда, отче, облегчаюся от болезни, како подобаете ми молитися и проходити еже на всяк день?

Ответ. Радуйся о Господе: и паки реку, радуйся: возвеселил мя еси ныне вопросом, паче же Бога, и Ангелы Его. А о нихже писал еси, рече Господь: «подобаше и оная творити, и сих не оставляти» (Мф. 23, 23). Сице убо должен еси пребывати: пети мало, изустно глаголати мало, испытовати и блюсти помыслы мало должен еси. Имеяй бо много брашна на обеде, много лакомится ясти: а от единаго брашна ядый на кийждо день, не токмо не лакомится ясти, но негли временем и отвращается от него. Тако убо и зде. Совершенных бо есть, еже обыкнути приимати на кийждо день от тогожде варения, и не возгнушатися. О псалмопении же и прочитании изустнем, не связуй себе, но, елико укрепит тя Господь, твори: и еже прочитати и молитися, да не возбранишися. Мало сице, и мало сице, и проведеши день, угождая Богу. Совершеннии бо отцы наши правилу устава не имеяху; весь бо день правило держаху, мало поюще, мало прочитающе изо уст, мало испытующе помыслы, мало упраждняющеся о пищи, и сие со страхом Божиим. Речено бо: «вся, елика аще творите, во славу Божию творите» (1 Кор. 10, 31). Господь Иисус да сохранит нас от всякаго зла. Аминь.

Вопрос 177, тогожде к томужде великому старцу.

Како подобает испытовати помыслы? И како убегает кто пленения?

Ответ. Еже испытовати помыслы, сице есть: яко да егда приидет помысл, рассмотри, что рождает. Реку же ти например: помысли, яко досади тебе некто, и стужает ти помысл рещи ему нечто. Рцы убо помыслу: аще реку ему, имам смутити его, и скорбети имать на мя: темже убо потерплю мало, и прейдет. Аще ли же помысл не на человека будет, но в себе самом помышляет кто злое, тако должен есть испытовати помысл, и рещи себе, камо отводит еже помышляти злое: и престанет от тебе. И во всех же помыслех подобне твори. Абие же, егда входит помысл, испытай и отсецы его. О пленении же веждь, яко многа трезвения требует. Да, яко же реша отцы, аще возмут ум твой во блуд, да приведеши его во освящение. Аще ли же в чревообьядение, да приведеши его в пощение. Сице и о инех страстех. Не печалуй, имея обрести милость по обетах, ихже имаши. «Аще бо живем, Господеви живем: аще же умираем, Господеви умираем» (Рим. 14, 8).

Вопрос 178, тогожде к томужде великому старцу.

Рцы, отче, еже непрестанно молитися, в коей мере есть? И должен ли есть имети правило?

Ответ. Радуйся о Господе, брате! Радуйся о Господе, возлюбленне! Радуйся о Господе, сонаследниче. Еже непрестанно молитися, в мере есть безстрастия. И тогда познавается пришествие Духа, и учит его всему. Аще ли всему, убо и о молитве. Апостол бо глаголет: «о чесом бо помолимся, якоже подобает, не вемы: но Сам Дух ходатайствует о нас воздыхании неизглаголанными» (Рим. 8, 26). Что убо реку ти о зданиях Рима аз, когда ты еще тамо не бывал еси? Человек безмолвствующ, паче же на одре сый, правила не имать. Но буди, якоже человек ядый и пияй, во елико услаждается: тако егда приходит ти прочести, и видиши умиление в сердце твоем, прочти, елико можеши: и пети такожде. Благодарение же, и, Господи помилуй, держи по силе твоей, и да не убоишися. Непреложна бо дарования Божия.

179. Прошение и вопрос тогожде к томужде: тойжде, по оздравлении, стомахом (желудком) возболев, посла с прошением к томужде великому старцу помолитися о нем, глаголя:

От полунощи засыхают уста моя, и вежди, и руце, и нозе. И егда пробуждуся, трясется, мало не целый час, все тело мое, начиная от стомаха: и прочее разслабляюся, и, яко брение, бываю. И хощу рещи псалом, и не могу усты. И аще восхощу сердцем моим рещи, одолевает мя сон. И прочее, что сотворити не вем. Вижду бо себе запинаема во спасение. Молю убо тя, отче, Господа ради, помолися о мне и яви ми, что суть сия?

Ответ Варсануфия. Имать убо вещь малую немощь от стомаха: имать же и тяжесть от действа бесовскаго. Обоя убо сия преобиди; глаголет бо: «а иже Христовы суть, плоть распяша со страстми и похотми». Се убо молятся старцы о любви твоей: проплачи и ты мало в молитве, благодаря Бога, и моляся помилован быти, и помилует тя, – весьма бо милостива Владыку имамы и щедра отца. И никтоже доволен, ниже от вышних Сил, ниже от нижних истинных рабов Его, рещи, якоже достойно есть, благость Его како желает помиловати род человеческий. Но сего ради долготерпит на нас, да умножит терпение наше, к нашему спасению, якоже научи нас, глаголя: «в терпении вашем стяжите души ваша» (Лк. 21, 19). Не пренемогай убо, брате, нача бо Иисус творити милость Свою с тобою. Тому слава вовеки. Аминь. Помолися о мне.

Вопрос 180, тогожде к иному старцу.

О чесом рече отец наш: начат Иисус творити с тобою милость Свою?

Ответ Иоанна. О великом преспеянии пользы душевныя рече: еже обрестися тебе с таковою дружиною, с неюже имаши совостати в день оный в радости велицей, аще до конца удержиши терпение и благодарение.

181. Прошение тогожде к великому старцу.

Аз верую, яко «елика свяжете на земли, будут связана на небеси: и елика аще разрешите на земли, будут разрешена на небесех» (Мф. 18, 18). Молю тя, отче, щедротами Божиими, помози немощи моей, яко душею и телом повредихся, и стужаю братии, с нимиже живу. И испроси у Бога, да подаст ми самим собою творити потребы моя, да не братия носят моя тяготы. Верую бо, яко елика просиши у Бога, подаст ти. Спостражди моей немощи, отче, и прости мя.

Ответ Варсануфия. Брате, ключ твой отверзает мою дверь, безумен бо есмь и не могу сокрыти чудес Божиих. И прочее, аще кто послушает словес моих, от ужаса ничтоже ино речет, разве яко изумися, и не весть. Непщую сие, яко вся Богу возможна суть, не возможно же Ему ничтоже. Якоже убо действова древними, и воздвиже разслабленнаго, и паки, Тавифу умершую воскреси: тако и нынешними может. Пред Ним глаголю, и не лгу: яко вем некоего раба Божия, в сем роде нашем, в сем времени, и на сем благословенном месте, яко и мертвыя может воскресити, о имени Владыки нашего Иисуса Христа, и бесы отгнати, и недуги неисцелны уврачевати, и силы иныя сотворити, не мнее апостолов, якоже свидетельствует Давый ему дарование, паче же дарования. И сия бо что суть быти о имени Иисусове? Но не употребляет своея власти: по внегда и брани упразднити может, заключит же и отверсти небо, якоже Илия. Всегда бо имать Господь наш верныя рабы, ихже нектому рабы, но сыны нарицает, и аще завидит враг, ничтоже благодатию Христовою может повредити. Корабль бо треволнения прейде, воин – брани, кормчий – злые ветры, земледелец – зиму, купец – разбойники. А инок совершенство улучи во уединении своем. Кто не речет слыша прегордая сия, яко обезумихся? И по истине не в мудрости глаголю: обаче аз не о себе свидетельствую, но о инем. И аще кто хощет рещи, яко изумихся, якоже рех, да речет. Аще убо кто хощет поревновати, еже приити в сию меру, да не обленится. Сия рех любви твоей, уверяя тя, яко возможно быти тому, еже хощеши. Аще бо небесная благая, не изглаголанная и вечная, ихже око не виде, и ухо не слыша, и на сердце человеку не взыдоша, яже уготова Бог любящим его, просихом ти, и дарова тебе Бог, и будут ти сия, хранящу предания: то кольми паче о телесных страданиих несть труда испросити у Бога и прияти благодать, во еже не болети тебе ниединаго дне, ни стужаему быти? Но Иисус весть множае нас, что пользует и помогает человеку; овому убо, да приимет мзду терпения, по Иову: овым же, да приимут мзду служения, по Евлогию схоластику. Ничесого же убо да вопросиши у Бога чрез рабов Его, разве помощи и терпения. «Претерпевый бо до конца, той спасен будет» (Мф. 10, 22), о Христе Иисусе, Господе нашем. Той печется о нас вовеки, аминь. Не веси ли, что рече Господь святому Павлу, просящу взятой быти от него скорби? «Довлеет ти благодать моя» (2 Кор. 12, 9). Еда ли ненавидя его, рече сие? Или ведый, что ему на пользу? Помяни, яко «недостойны страсти нынешняго времене к хотящей славе явитися в нас» (Рим. 8, 18). Простите мя, и помолитеся о мне окаяннем, яко да удержу и аз меры сия до конца. Держай бо сия уже бысть брат Иисусу. Тому слава вовеки. Аминь.

182. Моление тогожде к томужде великому старцу: о еже обрести милость в день оный.

Ответ Варсануфия. Брате Андрее, и возлюбленне о Христе! Удивляюся любви твоей, паче же простоте твоей, сумнящейся о обетованиих. Рече Господь Филиппу: «толико время с вами есмь, и не познал еси мене, Филиппе?» (Ин. 14, 9). Веруй, брате, яко по обетованиям будет нам: и аще восхощете, то и множае: ибо возможно есть обрести малую милость, возможно же обрести и великую милость, и Давид великую избра. Хотяй убо великия, смирением, и кротостию и терпением, и таковыми подобными обретает ю. Еже убо обрести милость, молитвами святых обретаеши, а еже малу или велику, то в тебе залежит: и избери, еже хощеши. Живи в мире и освящении, во смирении претерпевая ближнему, яко инок, и яко состаревшийся образом бывая. Имеяй же брата близу себе чадо и служителя, аще и погрешит, или сокрушит что-либо, поучи его, и скажи ему погрешность, да исправится. И помолися о мне.

Толкование

Зело погрешают презирающии святыя книги и нерадящии, и непотребны творяще, тако сурово и несмысленно. Отсюду бо показуется иже во святынях студ их. «Проклят же, глаголет Божественное Писание, презираяй святая» (Иер. 48, 10).