Текст книги "Аскетика. Том I"

183. Тогожде к томужде великому старцу: отче, устави ми правило, аки новоначальну, не у приимшу образа иноческаго. И помолися о мне, яко оскорбляет мя брат, и иного упокоевает.

Ответ. Брате вожделеннейше, написал ми еси вещь выше силы твоея, еже уставити тебе дело, егоже не можеши понести. Рекл бо еси, да наложу ти правило, аки новоначальну, и не у приимшу образа монашескаго. Чин же новоначальнаго сей есть: пребывати во смирении мнозе, не вменяти себе в некоей вещи, не глаголати: что есть сие? или чесо ради сие? Но в послушании и покорении мнозе, не сравняти себе с некиим, не глаголати: почитаем бывает онсица, чесо ради не почитают и мене? Упокоевается по всему, почто упокоения лишаюся? Презираему во всех, не негодовати. Сия суть дела истиннаго новоначальна, хотящаго по истине спастися. И сия ныне тяжко ти есть понести, и за немощь телесную, и за еже доспети тебе в старость. Ты убо тяжкое взыскал еси понести: аз же легшее налагаю ти, не по принуждению, но по советованию. Имей брата своего, аки чадо, якоже рекох ти, якоже и имееши его.

И аще по искушению упокоит кого множае тебе, или негли онаго хощет Бог упокоити, тебе же утеснити, и известил ему тако сотворити: то ты претерпи, и да не скорбиши. Терпением бо скорбей стяжаваем души наша и не бываем сообщницы страстей Христовых, аще не терпением скорбей. Благодарение во всех держи, яко сие ходатайствует о немощех пред Богом. Правило твое есть, еже седети внимающу помыслом, и страх Божий имущу: како имам усрести Бога? Како преидох время мимошедшее? Покаюся ноне ныне, егда приближися мой исход, и потерплю ближняго моего, и яже от него скорби и искушения, дондеже сотворит, со мною Господь милость, и приведет мя во устроение безгневия, и ижденет от мене зависть, яже есть рождение диаволе. Провождай малыя дни своя, испытуя помыслы, и сопротивляяся приносящим смущение: наказуя сына своего со страхом Божиим, и напоминая ему прегрешения его, ведый, яко и той человек есть, подлежащий искушениям. Господь Иисус, Сын Бога Живаго, да даст нам мирное устроение и житие со страхом Его. Удивляюся же, како читаете Писание глаголющо: «Братие, радуйтеся, егда во искушения впадаете различна» (Иак. 1, 2), а ничтожная смущают вас. Разумейте ноне, где есте, и какову имате силу, и да смирится железная выя, и мир Божий будет с вами. Простите мя, и помолитеся о мне, да не услышу: «научая иного, себе ли не учиши?» (Рим. 2, 21). И что сотворю любви? Обаче милость есть Владыки нашего Бога.

Вопрос 184, тогожде к томужде великому старцу.

Глаголет ми помысл: рекл еси единою и десять крат брату: остави его прочее творити, что хощет, и без попечения буди, якоже рекоша отцы.

Ответ. Брате вожделеннейше и единодушне, мир ти буди, егоже даде Господь учеником Своим. Мир бо перво даде им, изгоняя от них вся плотския помыслы, и всякое разумение диаволско, да чиста обрящутся сердца их и чисто да приимут учения и заповеди своего Владыки. Тако и ты, возлюбленне, прием грозный мир сей не от мене, но от Спаса Иисуса Христа, разумно и немятежно уготови себе еже послушати и сотворити. Веси бо, како хощу тя прияти и вперити в небо. Отвсюду диавол обходит смутити тя завистию, гневом, и не обрете места, а в ничтожных обрете тя поругаема: и теми брань творит на тя, и смущает тобою и брата. И паче, яко писах ти в первых посланиих, рещи брату погрешности его, и наказовати и. Или зле рекох аз, и ты презрел еси; или добре, и ты побежден еси от брани. И радуется прочее о тебе диавол, и приходит, имея горькая оправдания, и глаголет ти: рекл еси единою, и десятижды, но остави его творити тое, якоже хощет, и без попечения буди, якоже рекоша отцы, и ругается тебе и в сем; отстоиши бо меры сея, якоже отстоит небо от земли. И хощеши ли уразумети? Господь рече о древесех, яко и тая раждают плоды: поразумей, что рождает ти, еже от диавола, молчание? Смущения, гневы: егда бо сам от себе устремляешися на дело без вопроса, то уловляем бывавши скоро. Тако бо страждут простии, яко не наказаннии. И явно ти сотворю, яко долготерпение твое несть по Богу: яко сокровиществуя на многи дни, но един день истощеваеши мешец свой, и обретается тощь. Долготерпение же по Богу не глаголет отнюд до конца. И подобен еси, господине брате, аки владыка к своему рабу, вместо еже дати ему на всяк день по единой пощечине, глаголя ему погрешения его, и се мир: долготерпиши на многи дни, и последи даеши ему единою по хребту (или смертоносный удар) и вземлеши душу его. Аминь.

185. Тойже иного старца вопроси таяжде.

И должен ли прейти из келлии, негли бо престанет брань.

Ответ Иоанна. Аще бы внял еси и последовал ответу старца, глаголюща ти, да не вмениши себе в чесом, да не взыщеши равенства с другим: почити имел бы еси, а не приити в смущение. И не была бы потреба мене, ниже иного кого вопросити. Блюди, брате, яко наругаем еси от бесов. Глаголеши прегрешения брата того быти истинна, и рцы ми, известно ли веси, яко суть истинна? Еже бо рещи прегрешения чия от подозрения: иногда не обретаются истинна прегрешения она. О киих убо рече Господь человеком: «Аминь, глаголю вам: аще не отпущаете человеком согрешения их, ни Отец ваш Небесный, отпустит вам согрешений ваших» (Мф. 6, 15)? О киих же глаголаше? О истинных ли, или бываемых от подозрения? Всячески о истинных. И како судиши, и осуждавши брата своего, о согрешениих триех седмиц? И не веси ли, яко во осуждение велие влагаеши себе? Ибо аще истязуеши от брата твоего сия, имать Бог истязати от тебе, яже от юности твоея даже до ныне, где есть глаголяй: «Солнце да не зайдет во гневе вашем» (Еф. 4, 26)? Где есть: «Друг друга тяготы носите» (Гал. 6, 2). Где есть послание старцево, могущее тя управити? Вместо благодарения, сия ли? Не веси ли, что глаголеши? «Воздаша ми злая возблагая» (Пс. 34, 14) и прочая. И како служит вам брат, не ради ли Бога и любве ради его? И како поражаете помысл его? Вонми, яко близ есть исход твой, якоже и слышал еси, и исповедуеши, и не оставляют тя бесове удержати не вменяемость, и почити.

Брань сотвори на приносящия тебе смущения помыслы, якоже и старец сказа и обрящеши помощь. Прочее, аще обратишися на безчисленная ухищрения, аще что-либо ни сотвориши, аще прейдеши, егда брань и искушение есть не отыдет от тебе, аще не подвигнешися на помыслы. Аще имаши от своих трудов мало что, смеси с молением святых: много бо может, егда будет поспешествуемо. Рцы помыслу своему: заутра умреши. Держи не вменяемость, и почиеши. Господь да даст ти мир свой. Аминь.

186. Тогожде к томужде. Отче, наставлях с любовию Божиею брата, и не прият, и смутихся. Что убо сотворю? Аще собеседую с ним иже повелел еси братиями, рцы ми, ни един ли от сего приемлет помыслы?

Ответ. Понеже не разумеем, что глаголем, всякое наказание оставляющо смущению внити в сердце человека, сие наказание по Богу несть, но от действа диаволя, смешано со оправданием. Аще по Богу наказовал еси ближняго, како смутился еси? Наказание бо по Богу не попускает смутитися кому. Но аще и отыдет наказуемый, и оклевещет и, то не смущается, но носит тяготы его. Явленна бо бысть и вам вещь, яко искушение бысть: но Бог упразднил есть тое, и упразднит. Господь да даст вам здравие души и тела, еже разумети, что суть козни лукаваго, и избыти от них. Молитеся о мне. О беседе же братии, ихже рекл еси, егда по любви Божией бывает, не оставляет соблазну быти посреде, но в наказание.

Вопрос 187, тогожде к томужде. Авво, весьма оскорбляет мене брат, и, аще возможно, со удовольствием хотел бых его изменити. Глаголет же ми помысл, яко аще бых был на едине, не имел бых скорбети, но паче спастися: рцы убо ми, полезно ли есть тако?

Ответ Иоанна. Брате, да не стужит тебе оправдание, глаголющо: аще бых был сам с собою, не бых имел скорбети, но паче спастися. Зане упраздняеши писание, глаголюще: «многи скорби праведным» (Пс. 33, 20), и паки: «многи раны грешному» (Пс. 31, 10). Аще убо праведен еси, аще грешен, претерпети должен еси укорение: не можем бо быти без скорби. Терпению нас учит, и имам изряднейшна учителя апостола, глаголюща: «скорби терпяще» (Рим. 12, 12). Ибо предлежат скорби хотящим спастися. Господь бо рече: «в мире скорбни будете» (Ин. 19, 33). И паки: «Многими скорбми подобает нам внити в Царство Небесное» (Деян. 14, 22). Виждь, брате мой, яко спасти тебе хотя Рекий: «прискорбна есть душа моя до смерти» (Мф. 26, 38), остави тя мало поскорбети, да обрящеши тамо милость у Него за терпение, в час оный грозный. Аще бо по всему хощем покоя, услышати имамы: «восприясте благая ваша в животе вашем» (Лк. 16, 35). Вся страсти нас ради претерпе Владыка наш, и како мы поминающе я, не претерпеваем, да сообщницы тех будем? Блюди, яко заповедь имамы о всем благодарити: да не привлечет нас добра ненавистник в неблагодарение, и погубим вся. А о еже взяти инаго брата, несть тяжко авве дати тебе иного: тожде бо есть ему. Аще убо достигнеши прияти иного, и обрящется оскорбляя тя в чесом ибо, что паки имаши сотворити? Аще бо и небрежлив есть брат, но имать мало простоты. Не яко возбраняя тя прияти иного, сия тебе глаголю: но еже искусити вся, и удержати доброе советую ти. Якоже бо служит ти кто Бога ради, тако и ты должен еси тяготы его носити: яко да взаимно исполниши закон Христов. Еда ли не хощу твоего покоя? Бог весть, аще бых возмогл, то хотел бых послужити тебе вся дни моя. И что сотворю, яко весь непотребен есмь? Возненавидим покой телесный, мерзок бо есть Богови, да не отчуждит нас от Бога. Сия, яко единодушну, написах тебе: яко от Бога есть нам, поскорбети нам мало. Без скорби бо несть успеяния по страху Божию. Прости мя, страдальче, и помолися о мне, да положу начало. Есмь бо прочее не далече кончины моея.

Ответ 188, великаго старца к томужде. Радуйся, брате, и благодушествуй, и да не смутит тя диавол в неполезных! Что непщует любы твоя, яко без попущения Божия бывает то, еже искушение или стужение прияти кому? Ни; но на пользу душевную попущает нам Бог сим бывати. И видя диавол, яко тако есть, превратил есть нам вещи, якоже и исперва, дондеже изгна нас из святаго мира аки из рая. Что бо не премени нам? Вместо святаго мира, лютаго не вложи ли в нас гнева? Вместо ненависти яже от

Бога, еже ненавидети злая, не вложи ли в нас ненависть злую, еже ненавидети благая и Самаго Бога? Но неразумеваем. И не вемы, яко пресецая от нас Бог всякое помышление скверное, и всякий помысл лукав, и душетленен, рече нам молитися за враги наша, и благословити кленущия ны, и заповеда нам любити враги наша. И аще враги наша заповедано нам любити, то тех, иже ниже небрежливо, ниже тщаливо творят нам служение, кое имамы прощение, не любяще благотворящих и служащих нам, аще и показуют нам бесове служение их бываемо с нерадением? Аще спастися хощеши, и Богу и нам вверил еси душу твою, да не веруеши своему помыслу: злое бо семя сеют бесове, ина вместо иных. Последуй убо и уразумееши путь Божий. Той бо рече: «аще хощете и послушаете мене, благая земли снесте» (Ис. 1, 19) и прочая. Темже убо от нас есть, еже снести и еже не снести. И вскую порицаем ближняго? Да не приносиши вины на некоего в ничесом же отнюд: но во всех благоугоди. И не помышляй зла на кого, понеже бываеши зол: злый бо злая помышляет, а добрый – добрая. А еже помышляти о некиих, яко на мя глаголют, сия брань новоначальных есть. Темже убо от сего аще будут два молящася во единой келлии, или наказующа друг друга, может кто рещи о них противная. И аще помышляет тако, не противу тому истинствует: но просте, не разумеем своим, погибель себе снабдевает таковый. Не имей сих, имать бо брат, яко вас ради обрящет милость. Аще и скорбите от него мало, да стяжете терпение, радуйтеся и веселитеся, яко велия есть мзда терпения. И уже прежде сего уразумел еси от брата Иоанна, яко без Бога не бываем попущаеми поскорбети к нашей пользе. Да не веруеши убо бесовом в нечесом на брата твоего: не бо имать вещь. Но сии суть хотящии тя смутити. Да упразднит их Господь! И еже помыслил еси, яко раб человеков приидох быти, несть смирения. Апостол хваляшеся, яко раб бысть всем, и ты ли глаголеши сия? Когда приидеши в меру сию смирения? Не веси, что рекл еси брате: Господь да простит тя.

Толкование

Зри премудрость старцеву: по внегда бо уведе онаго, рабом себе именовавша, и непщующа, яко велие нечто глаголет, и за исправление сие помышляюща, насмевается, и недостойна сего глагола того называет, всеми к действенному смирению поревая. Бываемое бо словом, гордыни есть рождение, и безчинно сим свою матерь тщеславие раждает. Аще и противно некако есть глаголемое и не последовательно.

Ответ 189, тогожде великаго старца к томужде.

Удивляюся некиим, сущим лета многа в школах, и паки букварь учащим, и по складам чтущим, должным быти прочее совершенными учительми. Тако и коснящим во образе иночестем, и долженствующим разсуждати и инем помыслы глубочайшия, и боримым браньми новоначальных. Вы должны есте наставити заблуждшия на правый путь, аки совершеннии. И паче, вместо еже носити тяготы немощных, отягощаете печалию в потопление. Внемли себе, брате. Еда ли не мало вреждает душу твою сие ныне, яко угнетаеши помысл ближняго? По еже бо сотворити тому труд Бога ради, подаеши ему помыслы, яко сотворил еси, якоже восхотел еси. Человек совершен, немощному ли сия? Не бе твое: но наказовати, управляти, бояся глаголющаго: не давати претыкания брату или соблазна. Кая потреба рещи слово ближнему. Почто же глаголю тебе сия? А и сам тако есмь. Безумие мое не оставило мя удержати слова, дондеже не изнесу е, и смущу душу брата моего. Егда сеет дивол в тебе злыя помыслы, сие дело его есть, всевати ина вместо инех. А помянути о смерти не оставляет. Вскую обуреваеми есте от ничтожных, яко новоначални и не разумни? Где есть, «лишени, скорбяще, озлоблени» (Евр. 11, 39)? Отцы наши избираху себе скорби, а мы не стыдимся ли всякаго упокоения ищуще? Поразумеем, окаяннии, яко сия вся написана суть в вышних диптихах, и истязани будем о сих обстоятельно. Сия пишу, отъята хотя всякую гнилость. Аще ли же оскорбляю вас, простите, и не приложу ктому оскорбляти. Помолитеся о мне, да прииду в познание жизни. О смерти же твоей, многажды рех, и глаголю, не замедлиши в телеси.

190. Тогожде к томужде великому старцу. Веси отче, яко не смею отнюд ни в чимже воспротивитися повелению твоему. Зане что ни глаголеши, живот ми есть: но помолися о мне, яко зело оскорбляет мя брат.

Ответ. Радуйся, любимиче мой, радуйся о Господе! Вем, и известихся о Господе, яко аще реку ти в темнице пребыти лето дней, не противу речеши: ведый, како и кому глаголю, клеврету, и единодушну Не веси ли, како глаголет Иов: «не искушение ли есть житие человеку на земли» (Иов. 7, 1)? Буди убо готов на искушения и скорби всегда, и забывай вся задняя, по апостолу, и в предняя простирайся. Да не глаголющу ти сия на брата твоего, будет ти злопомнение. Господь да сокрушит сатану под ноги ваша вскоре. Благодать Бога, и мир, и любы Его буди с вами до конца. Аминь. И да даст вам радость, веселие, любовь, яже николиже отпадает, да претерпите друг друга в страсе Божии. Смерть бо не закоснит.

190. Тогожде к томужде великому старцу.

Рцы ми, отче, что есть смирение? И помолися, да путь смерти мирен ми будет.

Ответ. Смирение есть, еже имети себе землю и пепел, делы, а не словесы точию; и еже реши: аз кто есмь? Кто вменяет мя? Дела не имам ни с кимже. А о смерти твоей еще мало время потерпи Господа, и прославит твой исход в радости велицей. Помолися о мне, брате мой. Целую тя о Господе.

191. Тогожде к томужде великому старцу. Авво, се брат сопротивися ми жестоко, и ни единаго сострадания не показа на мне. Что убо повелеваеши ми сотворити?

Ответ. Брате Андрее, чуждуся твоей простоте. Тако ли просте имаши, яко престает диавол еже искушати кого? Еда можем повинны сотворити пометаемыя от бесов и пены точащия? Тако ниже стужаемых от диавола в прекословие, и не сострадание, не можем виновны сотворити, но страсть. Внемли разумно глаголемым: ибо и ты стужаемь еси от диавола, и не смотряеши своя прегрешения, но, яже ближняго, быстрее зриши. Се рекл еси, яже суть брата твоего, а своя не глаголеши. Яко малы дни имаши, вопросив о смирении, и услышав имети себе землю и пепел, и никакоже вменяти себе. Земля убо и пепел и еже не вменяти себе, хощет ли сострадания от кого паче же от человека, стужаема от диавола, ненавистника добру? Таже и яко совершеннейший того еси, и возрастом и во образе иночестем, и в причте. И совершеннейший носити должен есть меншаго, глаголя, яко аз есмь недостойный. Аще же глаголеши, и не претерпеваеши, вотще глаголеши: ты бо кто еси, имеяй очи, зрящия чуждыя страсти? Человек приемый благовествование о безмерных вещех: поучаяся бо в тех, должен был еси забывати снести хлеб твой. Но не у вкусил еси тех, и не быша ти любезна, яко-же подобаше. Воспомяни Лазаря, колико время терпя благодаряше Бога. И не забуди и сих, яже многажды рех ти. Се есть зависть диавола, ведуща, что ти уготовано есть. Аз же верую в Бога, яко ничтоже имать возмощи.

193. Тогожде к томужде великому старцу. Прошение молитвы. Помолися о мне, отче, яко в мечтания впадох.

Ответ. Брате Андрее, воззовем со святым Павлом: «О глубина богатства, и премудрости и разума Божия! яко неиспытани судове Его, и неизследовани путие Его» (Рим. 11, 33). Како и нам возбраняет, еже не вельми хвалитися о луце нашем, ниже имети во уме, яко меч наш спасает нас, но благодать благости Его. Глаголет бо: «яко благодатию есте спасени» (Еф. 2, 8). Сего ради оставляет нас впасти в мечтания и иныя страсти, да познаем немощь нашу, и где еще есмы. И се, от благости своея оставляет нас к пользе нашей, да упование надежды нашея будет Божие, а не от нас. Но блюди, да не вознепщуеши, яко воля есть Божия, да впадем в мечтания, и во ины страсти, но за нерадение наше, оставляет нас таковая страдати, и, по человеколюбию Своему, от злоб наших приводит нас к смирению во спасение. Что убо? Злым страстем припишем спасение наше? Да не будет! Но Его благоутробию и всехитрой премудрости. Разумей убо, како воздвиже отвсюду ум наш, во еже воспомянути рещи: «Аще не Господь помогл бы ми, вмале вселилася бы во ад душа моя» (Пс. 93, 17) и прочая. Ведуще убо, яко немощи ради нашея и нерадения сия страждем, сотворим нашу силу, да не впадем в та. И Его есть милость, еже избавити нас от них. И на Петре сие сотвори, и на Павле, отставив силу Свою на мало время от них, да познают, яко человецы суть. И ов убо во отвержение впаде: ов же в кошнице свешен бысть, да научатся не имети упования на себе, но на всех Владыку. И ты убо уразумей: что еси? И милостив буди к сослужителю, и осуждай себе самого. Смирися по истине, не точию пред Богом, но и пред человеки, и возверзи все свое попечение на Него, могущаго сотворити вся по преизбыточествию, ихже просим или разумеем. И Той исполнит вся тебе обещанная: не бо отвержет, просивших Его искренно, собственных и честных своих братий, Тем и в Нем свободивших себе от всего ветхаго человека, и слышавших от Него с радостию неизглаголанною, яко «елика аще свяжете на земли, будут связана на небесех» (Мф. 18, 18) и прочая. И даде им всякую власть на небеси и на земли. Прочее «работай Господеви со страхом, и радуйся Ему с трепетом» (Пс. 8, 32). И благодари Ему непрестанными усты, яко помилова тя, и иныя многи, рабы Своими. Тому слава вовеки. Аминь.

Ответ 194, тогожде великаго старца к томужде, просившу молитвы.

Бог щедрый, вышний и милостивый, да даст вам свыше силу, еже всегда поучатися в писанных вам словесех, и делати дело истинно духовно, си есть, ратоватися с смущающими вас помыслы. И да обрящетеся со приимшими таланты, и усугубльшими, – да услышите, яже тии услышаша, и до понудитеся во еже претерпевати друг друга. И да сотворит земля ваша Богу добры плоды, и благовременны, на сто, на шестдесят, на тридесять. Сия есть молитва моя, бываемая ко Богу, да сохраншим вам сия, увижду вас во Царствии Бога моего, искренния друга, веселящияся о Господе.

Вопрос 195, тогожде к томужде великому старцу. Рцы ми, отче, откуду возрасте нам бывшее искушение? И что изъявляет? И како упраздняется? И помолися, да избавлюся от него.

Ответ. Добра ненавистник диавол, ведый пользу души вашея, и яко инаго седения спасительна несть паче, еже понести друг друга тяготы, позавиде и подвизается сеяти вас. Отсюду убо возрасло есть вам искушение оно, еже да упразднит Господь. Упраздняется же таковое искушение, внегда носити друг друга тяготы, и молитися о человеце, им же искушение бывает. Без подвига же внимательна не бывает избытие искушению. А еже сеяти отшельствие отсюду, то и се искушение есть от зависти его, через оправдание себе, да расторгнет любовь молящихся о тебе святых и лишит тя помощи их. Се вход и исход искушения показах ти. Потерпи мало, и приимеши их облегчения, о Христе Иисусе, Господе нашем. Аминь.

Ответ 196, тогожде великаго старца к томужде, пренемогшу к востающим нань искушениям.

Брате Андрее и единодушне, не пренемогай. Не бо оставил тя есть Бог, ниже оставит: но обетование есть Владыки к общему нашему отцу Адаму, и не прейдет, яко в поте лица твоего снеси хлеб твой. И якоже заповеда внешнему человеку тако и внутреннему человеку, еже в постничестве споспешествовати молитвам святых, и много совершат, да не будет безплоден человек. Якоже бо злато разжигаемо в горниле, и клещицею держимо, и биемо млатом, искусно бывает, и благоприятно в царский венец: тако держимый человек молитвою святых, многомогущею, и совершающею, разжизается скорбьми, и биется искушением, аще претерпевает благодарно, и объявляется сын Царствия. Вся убо на пользу ти бывают, да имаши и ты дерзновение от святых, и от своих трудов, ихже начаток приносити не стыдися. Да не убо, вместо духовныя радости, печаль себе приобрящеши. И имей верна Обещавшагося, яко сотворит. Здравствуй о Господе, возлюбленне.

Ответ 197, тогожде великаго старца к томужде, во многое уныние впадшу.

Брате Андрее, да не даст человеколюбивый наш Бог ненавистнику добра врагу насеяти в тебе свою печаль и уныние да не во отчаяние приведет тя, и о обетованных Духом Святым тебе, возлюбленному от Благословеннаго Бога. Но да отверзет твое сердце, еже разумети Писания, якоже отверзе сердце Клеопино. Како Бог, по бывших ко святому и патриарху Аврааму обетованиих, паки искушаше его. Глаголет бо: и по глаголех сих, обетованиих глаголю, друга своего священнодействовавша Ему толикую жертву, достойнаго ничтоже зло пострадати, егоже веру в правду вмени, толикаго остави во искушение впасти, ко искусу его и безответию сил тмы, во еже быти образ верным, яко многими скорбьми имут внити в Царствие Божие, иже своим терпением стяжавают души своя, о всем благодаряще. С сими приими во ум и иже во святых Иова, приснаго друга Божия, истиннаго, и не порочнаго, и праведнаго, благочестиваже и отгребающася от всякия злыя вещи. Како недостойнаго еже пострадати зло, сего предаде искушена быти, ко искусу добродетели, дондеже показа враги своя и клеветники посрамлены и безответны, внегда обличаемым быти от него. Приими же во утверждение веры, и Начальника спасения нашего и Совершителя Иисуса, избавльшаго нас от данныя клятвы: како пришед ко времени креста, показуя нам путь терпения и спасения, глаголаше: «Отче, аще возможно есть, да мимо идет от Мене чаша сия: но обаче не якоже Аз хощу, но якоже Ты хощеши» (Мф. 26, 39). Сие же нас ради сотвори Запретивый Петру, рекшему Ему: «Милосерд Ты еси Господи, не имать быти Тебе сие» (Мф. 16, 22), яко сый готов и благопроизволен пострадати. Но за немощь нашу моляшеся прейти чаши той, да не стужим молящеся, и ныне в молитве не услышаваеми скоро. Осяжем убо Спасителя нашего страсти, человека бывша, и претерпим с Ним поношения, язвы, уничижение, преобидение оплевания, укоризну багряницы, позор тернова венца, оцет с горечию, болезнь вонзения гвоздей, прободение копия, и воду и кровь, и приими отраду болезнем своим: не имать бо оставите тщу быти труду твоему. Но да не зря святыя, в час оный носящия плоды терпения скорбей, и хвалящияся, не причастен сих обрящешися, оставил тя есть малу претерпети болезнь: да сообщник тех, и Иисуса будеши, имея дерзновение пред Ним со святыми. Да не печалуеши убо, не бо забыл тя есть Бог, но печется о тебе, яко о искреннем сыне, а не аки прелюбодейчищи. Добре стоиши, аще внимаеши, себе крепко, еже не отпасти страха и благодарения Божия. Блажен же еси, аще поистине был еси и странен и нищ: таковии бо суть наследницы Царствия Божия. Мужайся и крепися о Господе. Таяжде бо рещи ты не ленюся, яже да подаст тебе Господь. Помолися о мне.

198. Тогожде к томужде великому старцу. Прошение о утверждении сердца и оставлении сущих от рождества его грехов.

Ответ. Господь Иисус Христос будет тебе исцеление и утверждение души и телу, и да утвердит сердце твое, во еже не по обладати тя добра ненавистнику и человеконенавистнику диаволу. О отпущении же грехов твоих от дне рождества даже до сего, сие дарует ти Бог по четыредесятих днех: за еже быти тебе сообщнику молений моих в таковом даровании, чрез малое твое терпение. Мужайся убо о Господе и крепися. Господь с тобою, велий Врач душ и телес. Мир ти о Господе, брате.

Ответ 199, инаго старца Иоанна к томужде.

Аще в мирских ублажают человецы богатящагося, много множае блажу любовь твою, обогатевша по Богу, молении благословеннаго отца нашего. Убо аще не бы молитва его предварила, и (аще не бы) рекл, возмогай, и мужайся, и крепися, в прибедственный недуг имел бы еси впасти, малаго ради нерадения и малодушия, еже бы сохранити долготерпение и пождание с помыслы твоими, и сослужащими тебе, поминая апостола, глаголюща: «Друг друга тяготы носите, и тако исполните закон Христов» (Гал. 6, 20). Яко убо любя тя Господь наказа милостию, молитвы ради раба своего, да малым сим наказанием пособиша молению его, и вменится тебе в делание, да заградятся уста вражия, да не когда речет: аще бы искушен был в наказание, то отступити имел бы. Да не воспечалуеши убо, якоже бо слышал еси от старца, будет ти. Мужайся убо по словеси его и крепися.

200. Тойжде старец, избавлен быв от искушений молитвами святаго старца и духовным его учением, посла благодаря ему; и отвеща старец сице.

Ответ Варсануфия. Богу славы возслем всякое славословие, и воспоем Его вовеки. Аминь. Нам бо не подобает слава, но Тому Единому, и Сынови Его, и Святому Его Духу. Приведе Бог любовь твою к нашей немощи, яко да помощь по Богу имамы друг от друга; хотящ и в нас исполнити писание глаголющо: «брат от брата помогаем, яко град тверд и огражден» (Притч. 18, 19). Буди же вам всем помощь имети от Брата нашего, Великаго Иисуса глаголю: благоволи бо, да братию нас себе сотворит, и есмы и блажими есмы от Ангел. О какова имамы Брата – Сильна, да укрепит нас; Крепка, да разделит нам корысти; Военачальника, да сокрушит во брани ратующия ны враги; Врача, да уврачует внутренняго нашего человека, с внешним человеком, покорившимся ему; Питателя, питающаго нас духовною пищею; Жива, да оживит нас; Милостива, да нас помилует; Щедра, да нас ущедрит; Царя, да нас царьми сотворит, – Бога, да и нас боги сотворит! Ведый убо, яко вся в Нем, Тому помолися. Весть бо ихже требуеши, и прежде даже не просити и. И Той подает ти прошение сердца твоего, аще невозбраниши ты: и Тому всегда словословие возсли. Яко Тому слава подобает вовеки. Аминь. Помолися о мне, брате, да познаю немощь мою, и смирюся.

208. Тогожде к томужде великому старцу.

Прошение о бездождии, и долговременном его молчании.

Ответ. Ничтоже безвременно творит Бог: но вся к пользе человеком. Аще и удержал есть дождь, к наказанию их, но и паки помилует, и послет и: тако аще на время и удержано бысть слово, да очувствуются нецыи, но паче не очувствовашася, паки повелевает Бог и глаголется слово по требованию на пользу.

202. Тогожде к томужде великому старцу прошение. Молю тя, отче преподобне, исполнити на мне святыя твоя обеты о оставлении грехов.

Ответ Варсануфия. Благословен Бог и Отец Господа нашего Иисуса Христа, благословивый нас всяцем благословением духовным в небесных, яко аще уготовиши себе к подъятию прошений своих, приимеши многим твоим трудом, и моею немощию: вменяю бо приобретения и пользу всякаго человека, и всякия души, моя быти. Сладце же и горя жрен бываю о душах ваших, якоже весть Сам разумеваяй сердца наша Бог. И вем и надеюся, яко не погубим труда. Имей убо дерзновение, яко приимеши прошения: но приемля, сохрани пребыти у тебе благодати. Мнози бо доспеша прияти, и по приятии испадоша: яко не сохраниша со страхом, аще что и прияша. Буди убо желатель благ, и блюститель, – раб благоугоден Владыце твоему, – ученик смирен, тебе ради Смирившаго себе; послушлив – Послушливаго; незлобив – Незлобиваго; долготерпелив – Долготерпеливаго; милостив – Милостиваго: тяготы нося ближняго, якоже и Той твоя тяготы понесе; любя всех искренне, якоже и Той нас возлюби; последуя Ему во всех, дондеже поймет тя в великий Свой покой, аможе «око не виде, и ухо не слыша, и на сердце человеку не взыдоша, яже уготова Бог любящим Его» (1 Кор. 2, 9). Тому слава вовеки. Аминь. Помолися о мне иноче.

208. Тойжде проси великаго старца о техжде.

Ответ. Брате Андрее, да даст ти прошения твоя вся, о нихже рече Иисус: «просите и приимете» (Ин. 16, 24). Точию уготови дом свой во мнозе чистоте, еже прияти дарования. Во очищенном бо дому сокровиществуются. И идеже несть тимения, благовоние свое испущают. И егда вкушает кто от сих чужд бывает ветхаго человека, распинаем миру и мир тому, живущ о Господе всегда. И елико не ударяют волны вражия, не разбивают его корабля: и прочее страшен бывает сопротивным от видения святыя печати. И елико враг бывает им, толико друг искренний и любезен великому Царю бывает. Прочее, брате, возненавиждь совершенно, да возлюбиши совершенно. Удалися совершенно, да приближишися совершенно. Омерзи сыноположение, да приимеши сыноположение: остави, еже творити хотения, и сотвори хотение. Реж сам себе, и свяжи сам себе. Умертви себе, и оживотвори себе. Забуди себе самаго, и познай себе самаго. И се дела иноческа имаши.

204. Тойжде проси великаго старца о техжде.

Ответ. Брате Андрее, души моея возлюбленне, аще бы ведал еси, якоже подобает, дар Бога, вси власи главы твоея, аще быша были уста, то не быша могли славити его, и благодарити, якоже достойно было бяше. Но верую, яко увеси. И якоже весть Сам Бог, несть мгновение ока, или чека, в немже не имам тебе во уме моем и в молитве. И аще аз тако тя люблю, но Бог, создавый тя, вящше тя любит: и молю Его наставити тя и управити по воле своей. И тако управляет тя к пользе души твоея: аще и долготерпит на тебе, но умножает пользу души твоея. Седи убо тако, благодаря Ему во всех, и уничижая себе во всех, веруя всем реченным ти, яко будут, о Христе Иисусе, Господе нашем, Ему же слава вовеки. Аминь.