Текст книги "Аскетика. Том I"

Вопрос 520. Аще кто злоимствует к обычному брашну, что подобает сотворити?

Ответ. В злоимстве стомаха, иногда может кто мало понудити помысл той: аще ли же не может, то да снизойдет мало: недуг бо есть. Потщися, брате, не в забвении положити сия, и верую, яко молитвами святых обретаешися от Бога помогаемь и спасаемь.

Вопрос 521. Прости мя, господине авво. Понеже отцы глаголют презирати тело и паки глаголют разсуждением управляти тело: молю уразумети различие сих.

Ответ. О нихже вопросил еси, апостол глаголет различие обою: внегда глаголати ему: «плоти угодия не творите в похоти» (Рим. 13, 14). И паки тойжде глаголет: «Никтоже бо (когда) свою плоть возненавиде, но питает и греет ю» (Еф. 5, 29). Аще убо видиши, яко делается сласть, тогда презри тело. Аще же увидиши болезненно и бедствующо тело, тогда грей и питай во страсе Божии: да послужит тебе в (духовной) службе.

Вопрос 522. Понеже рекосте, яко подобает болезненное тело грети правильным употреблением пищи, убо подобает ли удалятися вредящих, или ни?

Ответ. Аще благочинствовати будет человек от вредящих его брашен, то несть сие грех. Аще ли же кто приимет что-либо, аще приидет ему нерадя о вреде тела Бога ради, то больший онаго есть, аще не окраден будет дверию, сиречь высокомудрия. Должен же блюстися, еже бы не по страсти прияти. Сие бо побеждение есть и вредит паче, нежели пользует. Здравие же и страдание тела, от Бога есть рекшаго: «Азь убию, и жити сотворю. Поражу, и Аз исцелю: и несть иже измет от руку моею (Втор. 32, 39). Егда убо хощет Бог, устроивает здравие чрез врача. И егда хощет, то словом единем. А еже закоснети страсти или не закоснети, то сие предведения Божия есть. Оставлшии убо себе совершенно Богови, без попечения бывают, и Той, якоже хощет, и якоже полезно есть, творит. Кийждо убо, якоже может, паче же якоже имать веру, употребит.

Вопрос 523. Что есть оно, якоже имать веру? Изъясни мне тое.

Ответ. Аще Бог освятил есть вся и очистил в причащение верным, то со благодарением должен кто приимати от обретающихся, ничто же сумняся. Святая бо и чистая никогоже вредят: разве точию совесть его и подозрение внегда непщевати, яко вредится: таковый бо обретается сумняйся верою, и сего ради преизбыточествует в нем страсть. Аще убо верует во Пришедшаго и Исцелившаго всякий недуг и всяку язю в людех, то силен есть Той не точию телесныя страсти исцелити, но и яже суть внутренняго человека. Аще ли же усумнится, тогда отмещет вредящая, осуждая себе, яко не возмогл понести, но побежден бысть помыслом, и не обретеся тверду имый веру. Но и тако сохранится еже не по страсти прияти, понеже вредится душею и телом.

Вопрос 524. Аще веру имать кто, яко невредится, ощутит же себе мучима от страсти: что должен есть помышляти, да не в неверие впадет?

Ответ. Аще с верою снесть, пребудет же болезнь, то да не усумнится. Ведый бо Бог, яко болезнь сия изменяет его многих душевных страстей, остави его при той страсти. Тамо убо да поминает апостола глаголюща: «Егда немоществую, тогда силен есмь» (2 Кор. 12, 10). И да не вознепщует сие ему быти от брашен, мнящихся яко вредят: но попущение Божие есть. Аще бо причастится и мнимых добрых и полезных, то ничтоже может воспользовати его без повеления Божия.

Вопрос 525. Аще веры потреба есть, то како рече авва Исаиа: яко, аще внидет брашно на трапезу и вредит тя, понуди себе снести е? Вере бо предлежащей вреждашеся.

Ответ. Схоластику некоему рече авва Исаиа, здравствующему телом и могущему прияти от обретающихся, да отсечет волю свою. Господь да помилует тя, чадо, и да укрепит тя.

Вопрос 526. Рцы ми, отче: иже в болезни врачбы и брашна презирающии, еда суть в мере совершенства?

Ответ. Презирающии врачбы и брашна, в меру достигоша веры, а не совершенства.

Вопрос 527. Аще кто не имать таковыя веры, то должен ли есть устроевати брашна пользующая немощь его, или точно вредящих да отрицается? И аще случится что ниже вредяще, ниже весьма пользующе, должен ли есть небоязненно от того причащатися?

Ответ. Вредящих точию да отрицается. Аще же обрящется ниже вредящо, ниже пользующо, то да не приимет в насыщение, но мало. Аще бо в сытость приимет кто, то и от пользующаго вредится.

Вопрос 528. Аще ли же случатся два брашна равносильна, едино малоценное, а другое многоценнее того, то должен ли малоценным сотворити потребу свою? Аще ли же и малоценное приятнее будет, то которое должен есть прияти?

Ответ. Аще два предлежат брашна, равна, то от обою прияти по малу. Аще ли же не предлежат два, то менее ценное да употребит. Аще ли сластно будет сие и предлежит вящше ценное, то паче от сего да приимет. Аще ли же не предлежит, то менее ценное и сластное да употребит, и да приимет от того, подвизаяся прошву сладости: храня же еже быти без мала. Что бо? Не ребует ли недуг многажды вещи, имущия неприятность многу? И онуждается тую прияти человек во здравие свое? Тако и аще имать сладость вещь тая, и потреба будет тоя, то подобает прияти ю. Внимати же должен есть точию человек, якоже рехом, еже не победитися бы сладостию тою. Но обаче тако да преходит, укоряя себе и осуждая уже тогда.

Вопрос 529. Понеже употребляти врача о имени Божии, якоже рекосте, несть отметно, и паки еже с верою и смиренномудрием оставити все Богови, лучше есть: глаголет же мне помысл, яко, аще случится тебе телесный недуг, то должен еси показати врачу: несть бо меры твоя без врачевств исцелети, и паки помысл глаголет ми, не сия употребити, но паче освящение святых, и сим единем довольну быти: молю тя, отче милосердый, рцы ми: что паче от сих да удержу?

Ответ. Брате, понеже вижду тя много пекущася о врачевании недугов телесных, непщую, яко отцы о сих попечения не творяху Вторый убо помысл твой лучший есть перваго: веру бо имать совершенну в Бога, а той, неверие. Ов убо имать терпение, вводящее во искусство, из негоже раждается упование оно не посрамляющее; ов же имать пренемогание, сестру малодушия, в ней же живет маловерие, матерь сумнения, отчуждающая от Бога и низводящая в погибель человеки. Ов убо, другами Божиими творит человеки; ов же врагами. Ов убо Царствия Небеснаго ходатай, ов же геенны. Ов убо возносит главу и дерзновение ко Богу и Владыце нашему дает; ов же со студом творит преклонити главу, и бездерзновенна поставляет пред Богом человека. Ов убо собирает ум, еже все свое попечение возврещи на Господа; ов же в пленение и ина зла и размышления влагает сердце человека. Ов убо в назидание творит бываемую вещь; ов же на разслабление зрящих. Ов убо разума исполнен есть, яко может Видяй сокровенныя страсти исцелити и мою страсть; ов же неразумия исполнен о Бозе: или исцелит, или ни. Ов убо мирное устроение имать и учит не унывати; ов же смущенно. Ов убо приближатися к селом и весем творит человеки, ов же удалятися сих всех. Ов убо печаль влагает в сердце и истаевати творит е; ов же благодарение, добре ходатайствующо о спасении человеков к великому Врачу, носящему недуги наша. Аз же доселе, брате мой искренне, зане ленив бых, не показах себе врачу, ниже врачевание прилагах язве: не за добродетель, но за леность, бегая от еже приближитися во грады и веси, и еже отяготити кого и сотворити, да стужает мною недостойным: бояся имущаго быти ответа в чаемую годину подобным мне. Могий же за добродетель претерпети, блажен есть: сопричастник бо бывает терпения Иова святаго. Памятствую же, яко и жены многи претерпеша, страждущия в телесных недузех, оставльшия все Богови. И стыждуся аз, именем муж нарицаяся. Кровоточивая, оставлши первое свое устроение, уразумевши, яко ничимже возмогоша ю воспользовати врачеве телеснии, имже и вся своя издаде, восприяла есть ино устроение, и притече к великому и духовному Врачу Небесному, души и телеса исцеляющему; и прежде повеления, убоявшися страсть она отбеже. И жена хананейска остави человеки мира сего, чародеи, чревоволшебники, волхвы, видящи, яко суетно бысть художество их: и пристает ко Владыце, зовущи: «помилуй мя, Сыне Давидов» (Мф. 15, 22). И от конец земли до конец ея, проповедано есть всем бывшее ей от человеколюбнаго Врача. Оставлю прочия, и поучаюся в сих, негли како возмогу позде некогда достигнути в веру онех и блаженства да не погрешу. Довлеют мне две сии на обличение студа, и несть потреба привести на среду веру и смирение сотника, яко не точию оставль врачев и инех, ко Владыце прииде, но и суди себе недостойна, еже ввести Его в дом свой, и с верою глаголаше Ему: «Слово едино рцы, и исцелеет отрок мой» (Лк. 7, 7). Велия вера, и от Спасителя нашего похвалена бысть. Сия же глаголю, себе самаго постыждая: яко не желанием желаю, не ревную, не тщуся, не припадаю: и не вем окаянный, когда постигнет мя изречение оное: когда будет призывание мое: когда приидет страшный и нещадный Ангел с прещением взяти окаянную душу мою: внегда затворится дверь и пребуду зовый с пятью девами, и никтоже мя услышит. Яко убо снедают мя ныне сия, яви есть: и яко побеждает мене уныние и леность, несть тайно. Что убо? Отчаю ли себе? Да не будет! Сей бо грех есть в смерть. Но умилостивися, брате, яко над мертвым и гробом смердящим, пролити надо мною горько слезы твоя. Вемы бо, колико пользуют, яко научил есть искус плача Петрова. И помолися о мне, сия глаголющем, не творящем же ничтоже благо. Да и на мне умилосердится благой врач и исцелит страсти моя душевныя и телесныя. Тому слава вовеки. Аминь.

Вопрос 530. Се Богови, и во твои руце себе предаю, попецыся убо о мне, отче благоутробне, Господа ради.

Ответ. Брате, тако веруя, неси отвержен от Христа, рекшаго грешнице оной: «Вера твоя спасе тя» (Мф. 9, 22). Все убо остави Богови, яко «Той печется о нас» (1 Пет. 5, 7). Тому слава вовеки, аминь.

Вопрос 531. Брат вопроси тогожде старца, глаголя: аще имать страсть, требующу рукодейства, должно ли рукодейство прияти? И подобает ли сему быти с советом отцев?

Ответ. Должно есть, чадо, имущему кий-либо недуг, вопрошати о нем некоего от отцев, и по совету того творити вся. Иногда бо обретается имый дарование старец и делает потаенно исцеление: и не всегда требует плотских врачей.

Вопрос 532. Аще является мне вещь быти добра, якоже на пример, еже воздержатися, или упражнятися в безмолвии, или дати кому благотворение, и таковая: еда подобает от себе творити? Или быти с советом отцев?

Ответ. Еже не прияти совета отцев о вещи мнящейся добрей, последняя того во зло приходят. И преступает кто заповедь глаголющую: «Сыне, с советом вся твори» (Сир. 32, 21). И оно: «Вопроси отца твоего, и возвестит тебе, старцы твоя, и рекут тебе» (Втор. 32, 7). И нигдеже обрящеши Писание повелевающо кому от себе что творити. Еже бо не прияти совета, гордыня есть. И таковый обретается враг Божий. «Бог бо гордым противится, смиренным же дает благодать» (Притч. 3, 34). И кто будет смирен? Разве точно преклоняяй выю свою ко старцем и приемляй совет их по страху Божию?

Вопрос 533. Аще кто подозревается быти еретик, исповедует же правую веру, убо подобает ли ему веру яти, или ни?

Ответ. Отцы не истязоваху, точию праваго ответствования веры. Аще убо по истине обрящется кто хуля Христа во устех своих и без Него живя, то от сего должно бегати и не приближатися ему. От сердца бо всяк, не храняяй заповедей Христовых, еретик есть. И аще человек не верует в сердце своем, то словеса ничтоже пользуют его.

Вопрос 534. Аще авва чий обрящется имый ересь, еда должен от него отыти брат?

Ответ. Аще совершенно явится, яко имать ересь, то подобает отыти от него. Аще ли же от подозрения единаго, то не подобает отходити, ниже испытовати, яже о нем. Тайная бо суть Самому Богу, а явная человеком.

Вопрос 535. Аще убо авва право мудрствует, на месте же оном чается подвигнутися ересь, и страх, да не когда нужда приидет преступити правую веру, и не хощет преселитися авва той. Брат же, познавая свою немощь, хощет отыти на другое место: еда добре творит, или ни?

Ответ. Прежде времене еже явитися ереси, наносящей нужду, не должен кто отходити: да не когда исполнится на нем оно: «бегает нечестивый, ни единому же гонящу» (Притч. 28, 1). Аще ли же явлена будет, тогда должен есть с советом отец духовных содеяти сие по страху Божию.

Вопрос 536. Что убо? Яко на месте не суть отцы нецыи, о нихже извещение имать, яко могут разсудити вещь ону: еда подобает ему изыти прочее бедства ради ереси и отыти инде, идеже суть могущий разсудити, и тамо вопросити их о сем?

Ответ. Ей, должен есть тако сотворити и глаголемая от них исполнити.

Вопрос 537. Аще кто от отец имать спутствовати ми, и любопрится понести то, еже аз несу, и не подобает, ниже назидает зрящия, яко болий мене есть: что сотворю?

Ответ. Сотвори метание со смирением, да ты сам понесеши. Аще ли же ни тако восприимет, то сотвори вторицею метание, глаголя: прости мя Господа ради, яко не можем совокупно шествовати: соблазн бо последует зрящим. И аще по метании любопретися будет, то не послушай его: сие бо дело есть диаволе.

Вопрос 538. И еда не полезно есть пресещи любопрение оно, и оставити его понести, аще и соблазн зрящим будет? Видится бо зде любопрение злейшо быти соблазна. От двою же злу, негли подобает меньшее избрати.

Ответ. Любопрение по метании бываемое, являет, яко от диавола есть и не должно последовати ему. Отцы бо глаголют, яко излишняя от бесов суть.

Вопрос 539. Брат вопроси великаго старца: аще полезно есть ему безмолвствовати?

Ответ. Хотяй путем Божиим ходити, да не взыщеши себе чести. Путь же Божий кий есть, разве точию да повержет кто волю во всех созади, и еже имети себе последнейшаго всех и малейша всех? Таковый может ходити путем сим. Аще бо кто не отсечет воли своея и не положит упования своего на Господа, не может. И на нем исполняется слово Евангелия: «Ищите и обрящете. Толцыте, и отверзется вам» (Мф. 7, 7). Жизнь и спасение сие есть: еже стяжати поревнуй. Ин бо путь несть, точию сей. Брате, да не будеши поруган.

Вопрос 540. Что сотворю, отче, яко брани утесняют мя и крепятся на мя? И рцы ми, кое есть знамение, еже имети мне упование на Бога: и кое есть знамение прощения грехов? И како есть, еже седети мне по Богу?

Ответ. Брате, время браней время делания есть, да не разслабееши, но делай. Брань твори: егда крепится брань, крепися и ты, зовый: Господи Иисусе Христе, Ты видиши немощь мою и скорбь мою, помози ми и избави мя от гонящих мя, яко к Тебе прибегох (Пс. 141, 7). И помолися прияти силу работати Богови в сердце чистом. Знамение, яко имать кто упование на Бога, есть, еже оттрясти себе от всякаго помысла попечения плоти, и отнюд не помыслити, яко имать нечто века сего: понеже на тое имать упование, а не на Бога. Знамение прощения грехов есть, еже кому возненавидети я и ктому не творити я. Аще ли же еще поучается в них, и слагается сердце его в них, или и делает, то знамение есть, яко еще не прощени суть ему, но обвиняется в них. Еже седети по Богу, есть, еже осуждати кому себе, егда услаждается сердцем о доброте келлии, или в телесном покои своем, и глаголати: увы мне грешному, яко обретаю вещи на осуждение мне, и не достоин есмь онех: а инии достойнии утесняются, обходяще и не обретающе телеснаго покоя! Господи Иисусе Христе, прости мне и за сие имене ради Твоего, нареченнаго на нас. Господь да укрепит тя и утвердит, чадо, да предуспееши и приидеши в меру совершенну. Аминь.

Вопрос 541. Брат вопроси инаго старца Иоанна: отче, помолися о мне Господа ради. И рцы ми: добро ли есть, еже просити нам отцев многажды молитися о нас: аще уже и увериша нас, яко сие творят? И не мнимся ли некако искушати их?

Ответ Иоанна. Брате, многажды написах тебе о молитве, яко по заповеди Божией должни есмы молитися друг за друга: наипаче, егда и просими есмы от друг друга сие творити, то много паче должники обретаемся. Не можем убо не сотворити силу нашу. А о еже просити молитвы отец наших, полезно есть. Глаголет бо: «молитеся друг за друга» (Иак. 5, 16). И паки: «не требуют здравии врача, но болящии» (Лк. 5, 31). И не подобает нерадети о сем поминая безочство (настойчивость) вдовы оныя к неправедному князю. И понеже весть Отец наш Небесный, ихже требуем прежде еже просити Его, то почто не рече: не просите? Вем бо, чесо хощете, прежде неже вам просити Мя. Но Сам рече: «Просите, и примете» и прочая (Мф. 7, 7). Темже убо, добро есть еже просити, да приимем по Его обетованию. Прося же молитвы, тако рцы: авво, зле стражду: молю тя, помолися о мне, якоже веси, яко требую милости Божия. И якоже хощет, Бог сотворит с тобою милость Свою. Того бо есть человеколюбие и Того есть слава, вовеки, аминь.

Вопрос 542. Аще кто ядый купно с братиею скорее приимет потребу свою, добро ли есть просити авву, да востанет? Или да пребудет, дондеже вси востанут? Аще ли же меру хлеба соразделит на вся варения, кое есть лучшо?

Ответ. Селя кто на трапезе, аще увидит, яко бысть его потреба, и не может седети не ядый, да просит востати. А еже седети и не ясти, больше того есть. А еже распростерти частицу свою на вся варения, сие добрейше есть обою.

Вопрос 543. Братия, хотяще воздержатися, вопросиша авву, аще повелит им востати прежде брати от трапезования, за еже не мощи седящим победити чрева. И авве повелевшу им востати, нецыи соблазнишася и оклеветоваху их, не разумеюще сущую от сего пользу. И послаша вопрошающе тогожде старца о сем.

Ответ. Онии убо, яко делатели и внимающии своим душам, творят сие подвизающеся на воздержание, да не когда, внегда седети, полакомятся еще прияти от предложенных. Совершенных бо есть еже пребыти на трапезе и не победитися чревом. Вы же праздни есте, яко не вразумистеся в словеса отцев, глаголющих: да не речеши, чесо ради сие? Но себе вонми. Иже паки увещавают не оклеветати кого: исполняюще пророческое слово. «Яко да не возглаголют уста моя дел человеческих» (Пс. 16, 4). И впадосте во изречение глаголющее: «злый человек от злаго сокровища своего износит злая» (Мф. 12, 35). Почто паче не помыслисте о братиях онех благая в назидание, яко мы нерадим, а братия наши воздержатся? Якоже тии востающии братия благая помышляют о вас, глаголюще: увы нам! яко от немощи востаем, братия же наши, аще и больше нас ядят, не вредятся. Вся бо с разсуждением творят. И в сем, тии убо избегают прещения онаго глаголюща: «не судите, да не судими будете» (Мф. 7, 1). Вы же впадаете в не, осуждающе братий ваших, сущих превыше вас: преступающе слово апостола глаголющее: «ядый не ядущаго да не укоряет» (Рим. 14, 3). Паче же, должни есте сами, причащающеся больше онех, печалитися убо, яко побеждени чревом: благодарити же Богови о причастии. И может вас благодарением сим свободити от брани чрева, и осуждения, еже на братию. Аще же хощете уразумети, то в разсуждение приходят дела, еже разсудити благое от злаго, по апостолу глаголющему: «вся искушайте, доброе держите» (1 Фес. 5, 20). Разсуждение убо аввы сие дело есть, кроме всякаго противословия.

Вопрос 544. Брат вопроси великаго старца, глаголя: догматическия книги имам, и читая в них, ощущаю, яко преносится ум мой в видение тех от страстных помыслов. Иногда же запрещает мне помысл, глаголя: не должен еси чести, окаянен сый и нечист.

Ответ Варсануфия. Не бых хотел в сих, за неже тыя горе взимают ум, но во словесех старец, яко сия смиряют долу ум. Аз же не яко безчестя тыя рех, но яко советуя: есть бо пища, и пища.

545. Брат некий странный больный, прииде во общежитие врачевания иский. И дан бысть в келлию единаго брата, и тяжце понесе брат той, и уразумев старец, сказа ему сия.

Испытай помысл твой, о брате! И уразумей, аще бы был брат твой по плоти, не восхотел ли бы еси прияти его на вежде свои? Виждь убо, како плотская делаются с тобою. Приял бо еси духовнаго твоего брата: вси бо едино есмы о Христе. Внемли убо себе, брате, во страсе Божии.

Сия слышав брат, умилися зело, и пользу прием, явил есть старцеви глаголя: прости мя, господине авво, и помолися о мне. И приемлю брата моего с великою радостию.

Вопрос 546. Брат быв тогожде старца Варсануфия, прежде неже безмолвствовати ему во общежитии аввы Серида, устранися. И возвращся уничижаше некоего брата благоговейна, аки невежду суща и ничтожна. Пребысть же просяй старца наставити его в первое, рекл: Бог приведе мя до твоей святыни.

Ответ. Глаголет апостол: «Царство Божие не в словеси» (1 Кор. 4, 20). Рече авва Макарий: право верующаго и во благочестии трудящагося, Иисус не предает во страсти в руки бесов. Господь рече, яко многи вдовицы беша во дни Илиины во Исраили, и ни ко единой их послан бысть Илиа, токмо в Сарепту Сидонскую (к жене вдовице), аще и еллинска бяше. И паки рече: мнози прокаженни бяху во дни Елиссеевы во Исраили: и ни един же от них очистися, токмо Нееман Сирианин; аще бо и иноплеменник бяше, но верова. Темже непщевах, яко устранився, оставил еси оправдание и стяжал еси смирение. И яко же вижду от помыслов твоих, яко оный самый еси или и горший. Аще «буяя и уничиженная, и ничтожная мира избра Бог» (1 Кор. 1, 27, 28), то яве есть, яко славная, и имущая похвалу у человек отверже. Не убо угодная человеком, угодна, суть и Богови: но безчестная у человек Бога ради, имут блаженство пред Богом. Якоже глаголет, яко «блажени будете, егда разлучат вы человецы и возненавидят, и пронесут имя ваше яко зло, имене Моего ради: радуйтеся и взыграйте, яко тако творяху пророком отцы их» (Лк. 6, 22, 23). Воспитан был еси купно с нами время не мало: испытай сердце свое, кую вину, кий совет имей еси от нас отсецающий тя от пути Божия? И покров бывший на тебе, откуду тебе бысть? Точию от скорби, юже претерпел еси, яко изгна тя старец на пользу твою. Рцы ми, брате, начало человека Бог ищет, или последних яже сбудутся с ним? Ты убо веси, что притяжал еси во время странствия твоего. Паки веси, яко живущу ти купно со мною тогда, рех: яко аще слушаеши мя в едином, и противоглаголеши мне во едином, то и в немже слушаеши, воля твоя есть в том и не имам осуждения дати за тебе ответ. Аще Бог приведе тя, то Он и управит тя; аще ли же волею своею, то писано есть: «Отпустих я по начинанием сердец их» (Пс. 80, 13). Темже убо помолися о мне и буди без попечения от нас. И аз хощу во всех без попечения быти о Господе.

Вопрос 547. Братия изшедше от общежития некоего купиша себе келлии в пределх, в нихже бе общежитие сие, без совета аввы своего. И прискорбен быв на них авва Серид, яко на преступльших чин, хотяше изгнати их оттуду: они же противоречити начаша. И вопрошен бысть тойжде старец о сем, добре ли сотвориша братия тии и что подобает сотворити?

Ответ. Всюду обретаем, яко прекословие многи человеки погубило есть. Якоже и Дафана и Авирона сопротивльшияся Моисеови: и сие знамение есть зло. Яко, аще аввы своего не устрашишася, то кого имут усрамитися? А еже не срамлятися кому, знамение есть бунтования помысла, а сие бунтование наущения есть диаволя. Из начала бо возбунтовася диавол. И творящии тожде, чада его бывают. И кая вина бывает сим? Таковии изгнанием изгнаша себе от смирения, затыкающе уши своя не услышати глаголюща: «аще гонят вы во граде сем, бегайте в другий» (Мф. 10, 23). И «хотящему судитися с тобою, и ризу твою взяти, отпусти ему и срачицу» (Мф. 5, 40). Они же злу повинушася. А злое ничтоже благо раждает. Глаголет бо: «не может древо зло плоды добры творити» (Мф. 7, 18). Попраша же чин святых отцев, в преступлении своем, отцы бо глаголют: яко, аще отыдеши поселитися на некоем месте, то первее вопроси, да не когда оскорбится кто в поселении твоем. И аще о инех заповедуют тако отцы, кольми паче идеже есть скорбь игумену таковаго человека? Конец же вещи сея, тако должен есть быти: да тии убо, аки согрешшии, поймут и ины, и да просят авву своего простити им и не воздати зла за зло: а сей, да простит им. Писано бо есть: «яко, должни есмы мы силнии немощи немощных носити» (Рим. 15, 1). И Господь глаголет: «аще не отпущаете человеком согрешения их, ни Отец ваш Небесный отпустит вам согрешений ваших» (Мф. 6, 15). И паки: «будите совершени, якоже Отец ваш

Небесный совершен есть» (Мф. 5, 48). И тако прославится Бог, от еже быти ему в назидание многих.

Вопрос 548. Авва сего общежития, в немже быша и ины святии старцы, завеща некоей вещи быти. А нецыи из братий, имуще волю, тяжце понесоша и роптаху. И сие уразумев тойжде великий старец сказа им ответ сей: братие, рече Господь: «Овцы Моя гласа Моего слушают, и по Мне грядут» (Ин. 10, 27) и прочая. Аще кто убо истинен ученик есть, то во всех послушен пребывает авве своему до смерти. И во всех, яже творит авва его, созидается, и не смеет разсудити глаголемая; ниже рещи: почто сие? И на что сие? Понеже не будет ученик аввы своего, но судия. Сия же вся не бывают, разве точию от злейшия воли человечи. Аще убо авва некоего, речет быти вещи некоей, воспрекословит же ученик: то явно есть, яко слово свое хощет поставити и упразднити слово аввы своего. Разсуждает убо таковый, кто есть авва, той ли, егоже упразднися слово, или егоже слово бысть? Аще убо хощет кто волю свою сотворити, то сын есть диаволь. И аще кто творит волю таковаго, то волю диаволю творит. Аще ли же и сотворит сей волю свою, то ни тако приимет покой. И что суть яже посреде? Точию непослушание: еже есть погибель души. Аще убо кто видит себе о авве своем соблазняющася, то должен есть отыти от него, и не погубити душу свою, и понести осуждение за инех, ихже развращает: не ведая, добре ли, или зле сотворил есть авва, но соблазняяся безвременно за волю свою, зане аще и сотворися воля его, праведнее аввы своего никтоже бе. Аще ли же добрее аввы своего весть полезное, то почто еще и ученичествует у него? Да отыдет и сам и да научит инех. Не прельщайтеся от диавола, и не пребудете имуще волю вашу, на вред ваш. Никогдаже бо бывает воля ваша. Злоба бо злобу не отъемлет. Но егда оставите волю вашу Богови, то Той сотворит, якоже хощет. Аз, братие, якоже весть Бог, щадя вас написах вам. Аще убо кто приемлет, будет тому во спасение. И аще кто не приемлет, аще восхощет и плюнути на написанная, в том есть. Якоже уже нецыи в сердце своем, ницыи же и усты клеветаша на ны. Простите ми.

Ответ 549, тогожде великаго старца к некоему от отцев, вопросившу, подобает ли крепкою епитимиею наказати ученика своего прекословящаго?

Брате возлюбленне! Разумей время сие, яко лукаво есть. Понеже добро и чудно есть наказание, и многа имать свидетельства. Глаголет бо: «Егоже любит Господь, наказует» (Евр. 12, 6). И паки: «Блажен человек егоже аще накажеши Господи» (Пс. 93, 12) и прочая. Брат сей от жестосердия ратуем есть. Но претерпи, и спотрудися с ним. И «обличи, запрети, умоли», по апостолову слову (Тим. 3, 2), и аще приимет сие наказание, то паки приобретен будет. Возбуди его от тяжчайшаго сна жестосердия. Аще бо одебелеет кожа терния его, то плач о нем велий и нестерпимый. Аще ли же потрудится восторгнути терния, дондеже суть былия, то может вскоре избавитися таковыя страсти. Аще ли же ожесточится тернийце оно, то трудом и подвигом с болезнми восторгнутися имать. Рцы убо ему внимати себе тщательно.

Ответ 550, тогожде великаго старца ко брату древодельство делающему во общежитии, и от различных помысл ратуемому, и помыслившу: яко ничтоже пользуюся зде, ниже приях зде некую помощь.

Брате, мы есмы не хотящии избавитися от злых дней, и лютых скорбей. Два бо дарования даде Бог человеком, имиже могут спастися, и избавитися от всех страстей ветхаго человека: смирение и послушание.

И не восхищаем я, ниже хощем в них жительствовати, ниже прейти теми, да обрящем помощь и избавимся от зол и прилепимся теми ко великому врачу Иисусу, могущему нас уврачевати от запаления их. Почто собираеши вся злая в сокровищи твоем, и смущаешися, и тужиши? Престани от еже быти гневлив, яростлив же, и завидлив. Разумей, яко таковии безчестни, а не почтенни суть. Остави вся развращения, и приклони выю к смирению и послушанию, и обрящеши милость. Аще со смирением и послушанием сотвориши, что-либо слышиши, то не точию дело, еже ныне твориши, благопоспешит Господь в руку твоею, но и вся дела твоя успеют. Путь бо боящихся Его хранит и покрывает шествия их. Что негодуеши? Что любопришися? Милость Божия поможет то, аще пребудеши постоянно, в терпении Божии умри, окаянне, от всякаго человека. Рцы помыслу: кто есмь аз? Земля, и пепел, и пес. Рцы: отнюд вещи не имам: что волхвуеши тебе самому погибель, и не боишися Бога? Не срамляешися ли, глаголя: не приях зде помощи? Ослепляет сатана сердце твое, приводя тебе в неблагодарение, яко не пользуешися во святем месте сем. Неразумне человече! Аще не бы рука Божия и святыя молитвы сущих зде святых сохраняли тя, то где бы имел еси быти? Разве точию во тме кромейшней. Где бы могл еси пользоватися тако? Нигде же. Но диавол хотя отчуждити тя от приискренняго союза со святыми, покрова же их и пользы, сеет в тя семя смерти в погибель, да совершенне приидеши в руки врагов истины, и расторгнут агницу, душу глаголю. Не внимай кому уничижая или ругайся: тебе бо уловляют, о сих тя смущающе, тебе вредят изгнанна тя творяще от тишины и мира, благопостоянства же и разума и всякаго блага. Остави сия, и последуй словесем моим, и буду носити бремя твое: и обрящеши помощь и милость и спасение души твоей. Со трудом спасаемся, брате. Нуждне же сохранися не рещи: что сие? почто сие? почто не имам равная с сими, или с сими? Малое рукоделие твори прилежне со страхом Божиим, о немже не малу имети будеши мзду. И да не отчаешися себе: радость бо диаволя есть сия. Еюже не даст ему Бог возрадоватися, но восплакатися паче о спасении твоем, о Христе Иисусе, Господе нашем, Емуже слава вовеки. Аминь.

551. Тойжде брат вопроси инаго старца.

Помысл глаголет ми: яко аще хощеши спастися, изыде от общежития, и обучайся безмолвию, еже реша отцы; не пользуюся бо в древодельнем сем художестве: многое бо происходит мне из сего смущение и скорбь.

Ответ Иоанна. Брате, уже тебе явлено есть, яко не полезно есть тебе изыти оть общежития. И ныне глаголю тебе: яко аще изыдеши, в падение приидеши. Прочее ты веси, что твориши. Аще ли же со истиною спастися хощеши, то стяжи смирение, послушание и покорение, то есть, еже отсещи свою волю, и жив будеши на небеси и на земли. А о молчании, о немже глаголют отцы: не веси, что есть, ниже мнози. Не бо еже молчати усты, сие есть молчание: есть бо человек, глаголяй тмы словес полезных, и молчание ему вменяется. И есть другий, глаголяй едино слово праздно, и в попрание вменяется ему учений Спасителевых. Сам бо рече, яко «имате воздати слово в день судный о всяком праздне словеси, исходящем из уст ваших» (Мф. 12, 36). И понеже глаголеши, яко не пользуюся в древодельстве, то веру мне ими брате, яко аще пользуешися, не веси. Но то суть наругания бесов, и показуют помыслови твоему что хотят, ко еже составит волю свою и преслушати отцев твоих. Хотяй бо стати во истине, вопрошает отцев, пользуюся ли или вреждаюся? И по оному, еже глаголют, верует, и творит то, еже пользует. Мнози дадоша мзды, да укорени будут, и навыкнут терпения. А ты без пенязца твоего, учишися терпению, Господу глаголющу: «в терпении вашем стяжите души ваша» (Лк. 21, 19). Благодарити должни есмы оскорбляющему нас, яко чрез него стяжаваем терпение. Добре седиши, да не искусит тя диавол. Господь да поможет ти, аминь.