Текст книги "Аскетика. Том I"

Вопрос 583. Сия слышав, прослави Бога, и рече старцеви: отче, понеже новоначален есмь, и ничтоже вем, что повелеваеши рещи братии?

Ответ. Рцы им сия: Господу Иисусу Христу пекущуся о вас, Тому рекшу: «не оставлю вас сиры: прииду к вам» (Ин. 14, 18), внемлите себе со всяким смиренномудрием и любовию к Богу; и благословит вас, и будет вам покров и вождь. Рцы же им: да не скрыет кто помысла; понеже радость духовом злым есть, еже сокрыти помысл да погубят душу. И аще кто от них речет ти помысл свой, то рцы своему помыслу: Господи! что-либо ни есть у Тебе на спасение души, даждь ми, да возглаголю тому, и да Твое возглаголю, а не мое. И приходящее тебе рцы, глаголя в себе: яко несть мое слово. Писано бо есть: «аще кто глаголет, яко словеса Божия» (1 Пет. 4, 11).

Вопрос 584. Егда благословляются братия от мене, дам ли тем руку мою, или ни? Глаголет же ми помысл, да лобызаю главы их; добро ли убо есть?

Ответ. Егда благословляются, даждь руку, и рцы тем: яко смотрите, яко по вере вашей, творит Бог с вами. Да не убо по человекоугодию. Сам Господь рече: «приемляй пророка, во имя пророче, мзду пророчу приимет, и приемляй праведника, во имя праведниче, мзду праведничу приимет» (Мф. 10, 41). Аще убо будет пророк и праведник, и не приимет кто его, яко пророка и праведника, мзды не имать. Аще ли же и не будет пророк, ниже праведник, и приимет его, яко пророка и праведника, то мзду пророчу и праведничу приимет. Глав же их не подобает лобызати: лицемерие бо имать вещь сия человекоугодия.

Вопрос 585. Каков должен есмь быти ко братии?

Ответ. Имей себе под всеми, и паки управителя всех, истязуемь чина (имея дать ответ за сан…), егоже приял еси, милосерду быти ко всем; якоже рече апостол: «друг друга тяготы носите» (Гал. 6, 2); вразумляйте безчинныя, утешайте малодушныя (1 Сол. 5, 14), да не кто зло за зло воздаст (Рим. 12, 17), но благое. Аще ли же кто не повинуется, сего назнаменуйте (2 Сол. 3, 14). Тойжде апостол да вразумит тя прочим от малаго слова моего (да вразумит тебя о прочем, что не означено в малом слове сем).

Вопрос 586. Каков должен быти канонарх и иконом ко братии?

Ответ. Долготерпилив, да возможет носити немощнаго.

Вопрос 587. Аще кто от братии согрешит, како его обличу, на едине, или при братиях?

Ответ. Аще будет дело жестокое, при братиях: но прежде рещи ему должно, яко, аще не исправишися, то и при братиях имам рещи; яко тако заповеда Господь: «обличи его между тобою и тем единем, и, аще обратится, приобрел ecи брата твоего; аще ли же ни, пойми с собою еще единаго, или двоих» (Мф. 18, 15) и прочая. Аще ли же мало будет погрешение, то наедине обличи его и ктому наложи епитимию.

Вопрос 588. Аще кто претерпит во общежитии, киим образом спасается? и что множае имать живущии на месте, идеже суть святии отцы?

Ответ. Аще умрет кто во смирении и послушании, сей Христом спасается. Господь бо Иисус слово (ответ) дает за него. Аще ли же имать волю, и, овогда притворяет послушание и смирение, cие суд Божий есть. Покоя же ради телеснаго, а не пользы ради душевныя, по воли cвоей пребывающаго, таковаго подобает единою (раз и два) увещавати, хотящаго ради всем человеком спастися и в разум истины приити (1 Тим. 2, 4). Аще ли же пребудет во своей воли, претерпите его, донележе усрамится, или от своея воли отторгнет себе. Аще ли же раждает вред братии, засвидетельствовати ему, яко, аще пребудеши в деянии сем, то зде со братиею не можеши быти; ибо естеством не может человек понести, да будет покой единому, и повредити многих. Пребываяй же с верою благою и по Богу во обители, приемлет покров от Бога, и назидается; и егда уснет (умрет), cие имеяй делание, обрящет покой. А еже множае имети живущему на месте, в немже живут святии отцы, cиe есть: еже имети веру со благим деянием, и веровати силе отцев; зане многа может молитва праведнаго поспешествуема (Иак. 5, 16), еже не везде обретает кто. Рече бо Господь о апостолах: «егда бех с ними, Аз соблюдах их: ныне же к Тебе гряду: соблюди их во имя Твое» (Ин. 17, 12), яко Твоя есть слава вовеки. Аминь.

589. Прошение. Повели изъявити братии о терпении и послушании: зане слово приемлют. И изъяви старец братии сия.

Братие, не приидосте на покой, но на скорбь. Зане тако заповеда Господь апостолом: яко «скорбь на земле и печаль имате» (Ин. 16, 33). Аще последуете Господу Иисусу, то и Той с вами есть; аще же отвергнете его, то и Той отвергнет вас. Хотяй убо обрести благословение от Бога, слушает его, яко Сам рече: «храняй слово Мое, не умрет во век» (Ин. 8, 51). Ищай убо жизни вечныя, ищет сохранити слово Его до излияния крове, во еже отсещи волю свою. Никтоже бо, ища воли своея, не угодныя Богу, часть имать со Христом. Внимайте убо ceбе со страхом Божиим, и покрыет вас Господь молитвами святых. Аминь.

Вопрос 590. Рцы ми, отче, как должен есть cретати входящих – или мирских, или отцев, или братий?

Ответ. В премудрости ходя, всех приемли, без преткновения (не подавая соблазна), по рекшему апостолу, иже угоден бяше и иудеом, и еллином, и церкви Божией (1 Кор. 10, 32). Любве же ради Христовы напоминаю Господину моему, яко время уклонися на покой телесный, и в насыщение чрева, яже раждают вся страсти, да храниши себе от приходящих таковыя ради вины, или мирских, или братий, или отцев. И аще будет приити им, то ниже да умастиши, ниже да отвержеши; аще же будет человек на сие самое упраздняйся, отсецы. И не невеси устроение аввы, како устроеваше с приходящими: полезно ти есть наречену быти: «скуп», не сущу такову, нежели наречену быти: «сластолюбец». Прочее с честностию (с благопристойной сановитостию) приемли, творя притворности о себе (принимая на себя степенный вид), да обрящешися без мала (не совсем сыт). Аще ли же принуждати будет кто, глаголи ему: апостол глаголет: «не упивайтеся вином, в немже есть блуд» (Еф. 5, 18). Отцы глаголют: молим всякаго человека, спастися хотящаго, и дати покаяние Богови, сохранити себе от многа вина, еже раждает вся страсти. Сохрани убо себе от глаголющих: аще ты не пиеши, то и аз не пию, и аще не яси, ни аз ям; и со всяким смиренномудрием проси его, глаголя: яко апостол рече: «ядый, да не укоряет не ядущаго, Господеви бо не яст: и не ядый ядущаго да не осуждает (Рим. 14, 3), Господеви бо яст, и славит Бога». Темже оба честни суть у Бога: понеже во славу Божию творят обе части. Прочее единою, любве ради Божия, кийждо да сотворит требование свое: а со мною сотворите любовь; яко немощен есмь, и не могу. Ибо и апостол рече сице: несть Царство Небесное пища и питие (Рим. 14, 17), но любы, и чистое сердце, и прочая.

Прочее, имей мудрость ко приходящим, да о коемждо имаши разумение и премудрость познати, чесо ради, и како прииде? Бога ли ради, или брашен ради? И прочее, елико можеши, да не даси себе в словеса плотскаго поучения к приходящим, аще не имать кто нужды слово Божие услышати: (даст бо ти Бог разум); но (но потщися…) беседу творити от жития отец, от Евангелиа, от апостол, от пророков. И не послаби им проглаголати мирскаго дела: понеже (иначе), и брашно, и вся плотская будут (будут занимать вас). Сия же, яже рекох, не суть плотскаго учения; елика бо за мирская дела (по заботе о мирских делах…) глаголются, сие не (не прилично вам…) глаголати, учение бо плотско есть. И рцы ему: авво! рече Господь: «воздадите кесарева, кесареви: и Божия Богови» (Мф. 22, 21). Аще же Бога ради пришел еси, то, яже суть Божия, можем советовати. Мир свое любит; не согласен же есть мир согласию Божию. Аще ли же ни, то наказани будем, не по воли Божией советующе. Апостол бо рече: «мудрование плотское вражда на Бога, воли бо Божией не покаряется, ниже бо может» (Рим. 8, 7).

Вопрос 591. Рцы ми, отче, како бывает плотское вопрошение? И како иже ктому по Богу ответ?

Ответ. Се прихождаху к нам нецыи, вопрошающе о воинствовании, и ответствовахом им, яко вещь сия неправду имать. Не помогает убо Бог неправде. Аще ли же кто вопросит о плотских, даждь ему в ответ, еже есть истинное, а не тяжестное; то есть, еже по Богу, а не плотское.

592. Прошение. Владыко! молю щедроты твоя: испроси со святым старцем, да избавлюся высокомудрия, и во смиренном сердце и со страхом Божиим глаголю ответ комуждо: якоже просил есть, и о, иже во святых, отце нашем авве Макарии.

Ответ. Благословен Бог! буди тебе по воли твоей; и Бог, вся богатне даруяй, да дарует тебе, молитвами святаго старца, в Дусе Святе глаголати во страсе Его, и со всяким смиренномудрием и недостоинством давати ответ комуждо, якоже есть нужда. Идеже убо постигнеши (и так, что ни встретишь), проси в мысли твоей святаго старца: яко, авво, что возглаголю? И не пецыся, что речеши, по заповеди Господней глаголющей: «не пецытеся, что возглаголете, яко, не вы будете глаголющии, но Дух Отца вашего, Иже на небесех, глаголяй в вас» (Мф. 10, 19).

Вопрос 593. Како должни есмы употребляти (оказывать страннолюбие) страннолюбия и исполняти заповедь о нищих? И аще должни есмы всех приходящих скоро приимати? И понеже стужают нам за одеяния, аще конечно избыточествуем, подобает ли давати, и кому?

Ответ. Страннолюбия и заповедь (о нищих должни есте исполняти) по силе соумеряюще с делом терпения. Аще и множае обрящете в руках, то и тако употребляйте с соразмерением, да не обычай некий возобладает и приидет скудость, и паки тогожде взыщет (нуждающийся); прилежно испытующе то, чесого ради приходяй приходит. Аще бо будет и тать, яко-же рекоша отцы, дайте благословение (хлеб благословенный) и отпустите. И понеже суть нецыи зде приходящии отяготити, не даждь им дерзновения; ибо за скупость приходят отяготити, не имуще нужды. Одежды же никомуже дайте, якоже прилучися, разве точию будет человек зело боящийся Бога, и срамляется просити. Испытующе убо истину, аще отнюд не стяжателен будет, и требуяй Бога ради, а не за невоздержание, то спостраждите ему.

Вопрос 594. Почто не должно приимати праздношатающихся во общежитие?

Ответ. Понеже входяще приносят скорбь; того ради подобает благословение дати и отпустити.

Вопрос 595. Что убо, яко любопрятся (домогаются) внити? Приимем ли их, или ни?

Ответ. Егоже не должно приятии, аще и вема любопрится, да не приимеши, якоже рекоша старцы; но аще будет нужда ему мало что, больше даждь и отпусти: сие бо полезно есть.

Вопрос 596. Аще не знаем кто отнюд, и не веемы каков есть, приимем ли того, или ни?

Ответ. Не знаемаго приими прежде единожды, и уразумееши, каков есть человек; да не оставиши же скоро кого уснути, да не будет искушение от него, и возскорбите, не могуще стерпети.

Вопрос 597. Некий иногда священноинок, приходя во общежитие, вредит братию и глаголя и творя соблазны: и желает жити близ, яко за два поприща, аможе бывает прохождение братии: что убо повелеваеши? Допустим ли внити во общежитие и жити близ в реченном месте, или ни?

Ответ. Возбрани ему внити во общежитие, глаголя ему: господине аввo, соблазнил еси братию, и не потребно внити зде, да не паки испустиши соблазн в них. И да не вознепщуеши яко по ненависти тя отвергаем: «ненавидяй бо брата своего, человекоубийца есть» (Ин. 3, 15); но за соблазн. Но ниже близ можеши жити, за вред братии. Cия рцы ему сам собою aбиe: да не посрамити его чрез другаго: причетник бо есть.

Вопрос 598. Ин некий пришед во общежитие, сотвори дело лестно и безместно: поят бо вещи именем блаженнаго аввы без него: и cие уведав авва, повеле не входити ему во общежитие; и слышав cиe, вниде с лестию в притвор, и видев его дверник, возвести авве. И рече ему: изведи его вон.

И изведе и вон. И совершенно отсече его оттуду. Паки аще приидет, попустим ли тому внити, или ни?

Ответ. Не имаши нужды прияти его, не ползует бо тя: но скажи ему чрез инаго, егда приидет, яко не можеши внити семо. Не имать бо ползы душевныя.

Вопрос 599. Ин брат, жив иногда во общежитии, и не пользуя братии изыде: и по времени восхоте возвратитися, и не прият его авва, рек: яко, аще аз и восхощу не могу повредити совесть братии; скорбят бо, аще прииму тя, и несть cиe возможно. Понеже убо прииде, хотя прият быти, что повелеваеши рещи ему?

Ответ. Рцы ему: яко единою и дважды глаголал еси авве о сем, и рече тебе, яко не возможно: прочее да не ожидаеши ниже ныне, ниже по времени жити зде. И отпусти его. Аще же приидет единою и единою, приими его с нищетою яко брата. Аще же часто, рцы ему: не зазирает ли тебе совесть?

Вопрос 600. Аще кто принесет нам вещь, с надеждою прияти множае, что сотворю? Прииму ли, или ни? Случается же, яко и нужду имам вещи тоя.

Ответ. Аще нужды не имаши, то да не приимеши; аще ли же нужду имаши, рцы ему: яко, аще прииму, цену дам, и потщися дати ему равное.

Вопрос 601. Понеже иногда приходят к нам жены по вере, и матери же братий наших, и приемлем я в келлию надворную (вне монастыря), и имать оконца в монастырь: должен ли есмь сквозе оконца беседовати с ними, или ни? И понеже баба моя не восхоте пребывати при племянницех своих, и вся своя даровала мне, повелеваеши ли да, егда единою приходит, беседую с нею и подаю требование ея? Или како сотворю? Како должно быти?

Ответ. Аще будет вина женам приити к нам Бога ради, а не ради видения места, ниже ради воли, но единственно за еже услышати слово Божие, или принести что месту сему, и есть нужда беседовати с ними, беседуй: и понудися еже сохранити очи свои: яко «иже воззрит на жену, во еже вожделети ея, уже любодействова с нею в сердце своем» (Мф. 5, 28). И всякое дело, Бога ради бываемое, Бог покрывает. Не с человекоугодием, не яко иский похвалы: но от чиста сердца простри помысл свой к Богу. И аще будет мати брата (некоего), и приидет по некоей нужде, побеседуй с нею, по заповеди, юже имаши. Понеже без нужды не должно есть. Может бо сын ея дати ей (нужное), вам помогающим (ему) в требовании (его), не в излишестве, но елико нужно есть. С бабою твоею, чрез все время жизни ея, должен еси единаго единою (раз и два, изредка) беседовати, и творити требования ея: во граде ли хощет быти, или в сей веси. Отроком же да не попустиши творити хотения своя, дондеже добре наставиши их на житие. Но управляй их во страсе Божии, питая и одевая их со опасством, да не будет невоздержания и презрения, и еже искати что излишнее, но испытуя требования, и обличая их, и глаголя им: положите у себе, яко несте раби, но свободнии: коликое безпечалие имате, и покой многший паче имущих имения! И аще умрет баба, то свободи их, и даждь им препитание их соразмерное, или зде в сей веси, или где хощеши: несть бо cиe под законом; запрещая им хотящим отчуждити что от твоих и причислити себе.

Вопрос 602. Аще покажется мне, яко нужда поколебати некая даемая мне от вас завещания (вероятно, советы, касающиеся внешних дел): сотворю ли, или ни? И аще не должно, и побеждуся яко человек, что сотворю?

Ответ. Аще взыскует дело по истине, еже поколебати тая, да не возбраниши. Аще ли же ни, и победишися, яко человек, и видиши в вещи, яко мало что нужда бяше, и помысл не может отсещи всего, снизойди помыслу, и проси от Бога прощения, и пренесет (Бог прощает). Не точию же в сем, но и во всякой вещи должно носити укоризну. Аще бо сотвориши, глаголет, небо ново, и землю нову, не можеши без попечения быти.

Вопрос 603. Аще свем (сознаю нужным) пременити от уставленнаго блаженным аввою завещания, или и поисправити нечто во обители, повелеваеши ли, да сотворю, или ни?

Ответ. Аще что видится тебе, яко нужда пременити, со страхом Божиим, да не сумнишися. И елика требуют исправления, да исправятся. Не в пространство (не в обширном размере), но яко же нужда требует. И то мало со утеснением, аки в преселении (как на квартире). Яже бо суть века сего сень (палатка, куща) суть. Егда видиши помысл твой ищущ сотворити вещь некую, рцы ему: чесо ради хощеши сотворити? И аще убо есть вещь потребы сущия (истинно) нуждныя, то да будет. Аще ли же несть нужды, рцы помыслу: что пользуешися из сего? Аще же будет плотский помысл, презри его. Аще же весьма стужити имать тебе, да не отвещаеши ему, но прибегни к Богу.

604. Прошение. Понеже предвозвестил еси, владыко, нам о скончании вашем, и есмь в страхе и печали, да не за недостоинство мое оставлени будем от Бога: даждь ми слово, молю: яко да имже образом помогаеми есмы в жизни вашей, тако имамы помогаеми быти и по вашем к Богу отшествии: и да содействует нам Бог во всех по Своей милости.

Ответ. Бог единою рече: «не имам тебе оставите, ниже имам от тебе отступите» (Евр. 13, 5). И веруем в Бога, яко и множае того, егда бехом с вами, сотворит. И аще убо речеши, и аще не речеши, множае, егоже ищеши, той содействовати имать с вами. Якоже рече апостол: яко «о чесом помолимся, якоже подобает, не вемы» (Рим. 8, 26). Господь наш Иисус Христос, снизшедый спасения ради нашего от Отеческаго престола, Той и да спасет вас, и да устроит, и да сохранит от лукаваго, содействующим вам, молитвами святых. Аминь.

Вопрос 605. Нецыи из общежития старцы вопросиша тогожде старца. Молим, да нам речеши, Владыко, чесо ради, по еже обещаете нам, яко умоляете Владыку Бога оставити по вас блаженнаго авву (Серида), напротив, прият его прежде вас Творяй присно волю боящихся Его (Пс. 144, 19)? И сему, отче, научи нас, почто иногда утаевает Бог дела от святых, якоже при пророце Елисеи? И чесо ради изыдоша струпы углям горящим подобни (глаголемии еллински анфракиа) (карбункул, огневик), на теле аввы, егда имеяше скончатися?

Ответ. Якоже рече авве Антонию: яко сия судьбы Божия суть, и не можеши сих уразумети: сие есть. О углевидных же струпах глаголемых еллински анфракиа, и пременении (рекше смерти его): единою паче меры прият авва славу от человек и от Бога. Но да не обоготворят его человецы (ибо воистинну Духа Свята, и совершенства бе причастен): угаси Бог сею виною славу человеческую, да совершенне преумножится слава Божия. Ниже бо можаше ктому таковыя меры сый пещися о земных, и паки посреде человек не можаше избавитися (славы человеческия), и сего ради прият его Бог. О нас бо чаяхом, яко будет, якоже непщевахом, а бысть по воли Бога, превосходящаго (наши мысли) промыслом спасения. Прочее несть человичо, еже взысковати не постижимая: но всяку мысль, и всяко дело благо возверзати Имущему власть, да по воли Его будет. Господь Ииcyc Христос известны да сотворит вы, отврещи всяко двоедyшие и злобу лукавства. Здравствовати вам молюся о Господе, аминь. Помолитеся о мне, да и аз обрящу милость, и сохранюся от лжезнания и безумия, о Христе Иисусе Господе нашем, Емуже слава вовеки. Аминь.

Вопрос 606. Брат вопроси святаго старца, авву Варсануфия, глаголя: не вем, отче, како впадох в книги Оригена, и Дидима, и в гностическия (писания) Евагрия, и во яже суть учеников его. И глаголют: яко не созданы быша человеческия души купно с телесами, но прежде тех быша умы наги суща, сиесть безтелесни: подобне и Ангели умы наги беша, и бесы умы наги. И человецы убо, преступльше, осуждени быша в тело сие. Ангелы же, соблюдше себе, пребыша Ангели. И елика ина глаголют таковая. И паки, яко подобает будущей муце конец прияти. И имут человецы и Ангелы, и беси, и паки возвратитися якоже бяху, умы наги: еже глаголют новоустроение. Понеже убо сетует душа моя, впадши в двоедушие, истинна ли суть сия, или ни: молю тя, владыко: научи мя истине, да тако держу и не погибну. Ибо ни едино же сих речено есть в Божественном Писании. Якоже и сам Ориген утверждает в толковании своем на послание к Титу, яко несть апостольское, ниже Церкве предание, еже быти души первее состава тела: аки еретика назнаменуя глаголющаго таковая. Но и Евагрий свидетельствует в главизнах своих, еллински гностика глаголемых, яко о сих никтоже возвести, ниже Сам Дух сказа. Имать бо в 64-й главизне вторыя сотницы своих гностических глаголемых: о первших же возвещаяй никтоже, а о вторых, иже в Хориве сказа. И паки в 69-й главизне тояжде сотницы тако глаголет: яко Дух Сятый, ни перваго словесных разднеления, ниже перваго телес сущесва сказа. А о еже не быти новоустроению, ниже концу муки, Сам Господь явися есть во Евангелии, рек: «отыдут в муку вечную» (Мф. 25, 46). И паки: «червь их не умирает, и огнь не угасает» (Мк. 9, 43). Откуду убо, владыко, ниже апостолом предавшим, ниже Духу Святому сказавшу (якоже сами свидетельствоваху), и Евангелием противно имущим, сия изложиша? Сотвори убо милость благоутробия, отче, с немощию моею, и скажи ми, что суть догматы сия?

Ответ. Брате, увы, и горе роду нашему! Что оставихом, и что испытуем и в киих тщание полагаем, и в киих притупляемся? Правыя пути оставихом, и стропотными хощем ходити: да исполнится на нас писанное слово оно: «горе оставляющым пути правыя, еже ходити в путех стропотных» (Притч. 2, 13). Поистине, брате, оставих мой плач, и плачу тебе: камо впал ecи? И (оставих) плач грехов моих, и оплакиваю тебе, яко свое чадо. Небеса ужасаются, что любопытствуют человецы. Земля сотрясается, како изследити хотят непостижимая. Cия еллинов суть догматы. Сия суесловия суть человеков, мнящихся нечто быти. Сия глаголи суть праздных человек. Cия роди прелесть. Глаголет бо: «глаголюще быти мудри, объюродеша» (Рим. 1, 22). И аще хощеши уразумети, вонми: глаголет Господь наш Иисус Христос, Свет наш, Царь наш: «от плод их, познаете их» (Мф. 7, 16). Кия убо плоды имут? Надмение, уничижение, разслабление, леность, претыкание, отчуждение закона, паче же Законоположника Бога. Жилище суть бесов, и князя их диавола. Сия не ведут во свет веровавших тем, но во тьму. Сия бо страх Божий не побуждают, по паче во успеяние диавольско. Сия от тимения не изъемлют, но в тимение утепляют. Сии суть плевели они, яже насея враг на селе дому – Владыки. Cие есть терние, возрастшее на земли проклятей от Владыки Бога. Вся ложь суть, вся тма, вся прелесть, вся отчуждение от Бога. Бегай сих, брате, да не утвердится слово их в сердце твоем. Изсушают слезы, ослепляют сердце, и всесовершенно погубляют внемлющыя тем человеки. Да не стоиши в них, ниже да поучишися в них. Горести исполнена суть, и совершают плод в смерть. О разуме (о ведении же…) же будущих, да не заблудиши. «Яже сееши зде, пожнеши тамо» (Гал. 6, 7). Невозможно по отшествии от здешних успети кому. Не трудно Богу создати купно с человеком и душу его. О небесных же Чинех, заграждает уста Божественное Писание всякому человеку, глаголя: «рече, и быша: повеле, и создашася. Постави я в век, и в век века» (Пс. 148, 5–6). И яже постави Бог, пременяются ли? Несть бо у него пременения (Иак. 1, 17), по Писанию. Где бо обрел еси, яко тщанием сего то Aнгела, приведе его во успеяние? Брате, зде делание, тамо мзда; зде подвиг, тамо венцы. Брате, аще спастися хощеши, не ввергай себе в сия: зане свидетельствую тебе пред Богом, яко в ров впал ecи диавол и в последнюю смерть. Прочее, отступи от сих, и последуй святым отцем. Стяжи ceбе смирение и послушание, плач, пощение (подвижничество), нестяжание, невменяемость (не вменять себя ни во что), и елика суть таковая: и обрящеши в глаголех их и жития. Сотвори же плоды достойны покаяния (Мф. 3, 8). И да не внемлеши мне глаголющему, и не творящу. Но помолися, да и аз прииду некогда в познание истины, во славу Святыя Троицы: ныне и присно, и вовеки. Аминь.

Вопрос 607. Тойжде брат вопроси инаго старца, авву Иоанна.

Ответ. Сия премудрость свыше несть: но душевна, бесовска (Иак. 3, 15). Cиe учение есть диавольское. Cиe отводит внимающих тому в муку вечную. Прилежаяй тому еретик бывает. Веруяй тому развратися от истины. Слагаяйся тому, чуждь есть пути Божия. Делателие Христовы не научиша сим. Приемлющии слово истины сих не приемлют. Скоро отступи от них, брате. Да не ожжеши сердца твоего огнем диаволим. Да не вместо пшеницы посееши на земли терние: и вместо жизни, приимеши смерть. И что много глаголю? Да не вместо Христа (приимеши…), диавола. Да не закосниши в них, и да спасешися, аки Лот от Содома, молитвами святых. Аминь.

Вопрос 608, тогожде. Не должно ли убо чести книг Евагриевых?

Ответ Иoaннa. Догматов убо таковых не приемли: прочти же тамо, аще хощеши, яже на пользу души: по притче, яже во Eвангелии, о мрежи, якоже писано есть: «яко добрыя убо вложиша в сосуды, а злыя извергоша вон» (Мф. 13, 48). Тако и ты сотвори.

609. Тойжде брат, вопросивый сия, сумняшеся, в себе помышляя и глаголя: и како нецыи от нынешних отец приемлют тыя, и имамы их, яко добри монаси суть, и внимающии себе? И по днех случися томужде брату, просити великаго старца помолитися о нем. И тогда сказа ему старец от себе о помышлении сердца его, якоже дивитися и ужаснутися брату. Имать же ответ тако:

Понеже рекл еси, и помыслил еси, яко, чесо ради нецыи от отцев приемлют главизны Евагриевы, глаголемыя гностическия: и нецыи братия, аки разумни, приемлют я: и непомолишася Богу, аще истинныя суть. И остави их Бог в своем их разуме (разумении). Но обаче, ниже мое есть дело, ниже твое, сих искати. Но время наше есть испытовати страсти наша, еже плакати и рыдати.

610. Тогожде, и других братий к томужде великому старцу вопрос.

Не ленятся, отче, сия мудрствующии о предбытии (душ), глаголати о святом Григории Богослове, яко и той сказует о предбытии в своих списаниих: и в тех, яже на Рождество Христово, и на день Пасхи, толкующе некая речения по сердцу своему, и минующе реченная тамо ясно о первом человека создании, и души его и тела, по церковному преданию. Глаголет бо сице: cиe убо восхотев показати Художник слово, и животное едино из обоих, невидимаго же, глаголю, и видимаго естества, содевает человека. И от вещества убо приемь тело, уже предбывшаго, от Себе же дыхание вложив: еже убо умну душу и образ Божий весть слово. И в последующих же многа кто обрящет ясно и несомненно им реченная о человеце, созданном из предбывшаго вещества, и души, от Бога данныя. В нихже и много похваляет естество человеческое, и достоин Божий дар называет то, еже спастися телу и душе. А не якоже тии глаголют, яко осуждения ради душа облечена бывает телом, да мучится за прежде согрешенная ею. И во инех же его различных списаниих, намерение его является по всему чисто от таковаго догмата. И о святом Григории, брате великаго Василиа, еще радуются, яко тожде рече, и глаголет оный предбытие: претолковующе и того речения некая. Тойже ясно в тридесятой главизне своего слова о создании человека сопротивляется крепко сему предбытия догмату: и опровергает его, якоже и блаженный Давид, и святый Иоанн, и Афанасий, и прочии вси Церкве светильницы и учители. О новоустроении же ясно глаголет тойже святый Григорий Нисский: но не о сем, еже тии глаголют, яко преставшей муце, имать человек новопременитися во еже бе исперва (сиречь) в чисты умы. Но сие глаголет: яко престанет мука, и конец примет. Рцы убо, отче, чесо ради таков человек неправо глаголет, яко-же прилично есть мужу святу, сподобльшуся беседовати от Духа Свята? Ибо и о раи не согласни суть нецыи отцы и Учителие, не глаголюще его чувственна, но мысленна. И вo инех главизнах Писания возможно есть обрести некиих несогласие. Скажи убо нам сие, владыко, просим: да, от вас просвещшеся, прославим Бога, и не сумневаимся во святых наших отцех.

Ответ Варсануфия. Благословен Бог и Отец Господа нашего Ииcyca Христа: благословивый нас всяким благословением духовным в небесных о Христе, аминь (Еф. 1, 3). Братие, благовременно рещи со апостолом: «Бых не смыслен, вы мя понудисте» (2 Кор. 12, 11), ибо понуждаюся, вас ради, яже паче меры моея испытовати, и глаголати не пользующая душу зело, аще и не вредящая. Оставихом Павла апостола, глаголюща: «всякий гнев, и ярость, и хула, да возмется от вас со всякою злобою» (Еф. 4, 31). Аз же глаголю: с чревобесием, и блудом, и сребролюбиeм, и прочими страстьми. О нихже должни есмы рыдати нощь и день, и плакати непрестанно: да множеством слез скверна сих отнюд отмыется, и да возможем быти из скверных чисти, из грешных праведни, из мертвых живи. Поучимся же в едином словеси, о немже имамы дати ответ. Глаголет бо: «яко Ты воздаси комуждо по делом его» (Пс. 61, 13).

И паки: «яко подобает нам явитися пред cудищем Христовым, да приимет кийждо, яже с телом содела, или благо или зло» (2 Кор. 5, 10). О сих должни есмы тщатися, о нихже и отцы наши, авва Пимен и прочии, тщахуся. Cиe тщание имать невменяемость, еже не измеряти себе, еже имети себе землю и пепел (Быт. 18, 27). Оное же тщание имать, еже имети себе разумна, еже приводите в кичение, еже вменяти себе, и измеряти во всякой вещи, еже отступити от смиренномудрия. Простите мне. Не праздни ли есте, и сего ради приходите в сия? Аще тако есть, снидите на торжище, дондеже приидет Господин дому, и поймет вы в виноград свой. Аще бы был рожен в сердце вашем о cpетении онем страшнем, то не бысте имели помянути сих. Пророк забы снести хлеб свой (Пс. 101, 5), а мы питаемся пространно и нерадим, и от сих впадаем в сия. Не взыскует от нас Бог сего, но освящения, очищения, молчания и смирения. Но понеже оставити вас в помыслех не xoтех, и за еже помолити Бога извещение мне подати о сем, скорбех, содержим от обою, избрах паче себе скорбь, да вас от скорби упокою: поминая глаголющаго: «друг друга тяготы носите» (Гал. 6, 2). И услышите извещение по Богу, бывшее мне прежде триех дней от еже написати вам сей вопрос. Вси отцы, угодившии Богу святии, и праведнии, и раби Божии истиннии, да помолятся о мне. Не мните же, яко аще и святии беша, вся глубины Божия чисте возмогоша поняти. Апостол бо глаголет: «яко отчасти разумеваем, и отчасти пророчествуем» (1 Кор. 13, 9). И паки: овому убо дается Духом то и то: а не вся она в едином человеце. Но ова тако, ова же тако: вся же действует един и тойжде – Дух (1 Кор. 12, 8). Ведый бо апостол, яже Божия, яко суть непостижима, воззва, глаголя: «о глубина богатства, и премудрости, и разума Божия! Яко не испытани судове Его, и неизследовани путие Его! Кто бо разуме ум Господень? или кто советник Его бысть?» (Рим. 11, 33–34) и прочая. Наченше убо быти учители о себе, или от человек понуждени бывше на сие приити, преуспеша зело, и паче учителей своих: и новыя догматы, извещени бывше, изложиша. Купно же пребыша имуще предания учителей своих, учения не права суща. И по сих преуспевше, и духовни учители бывшее, не помолишася Богови о учителех своих, да извещение приимут, Духом ли Святым глаголана быша реченная ими. Но имуще их за премудрых и разумных, не разсуждаху (испытно) словес их. И прочее смесишася учения учителей их с учениями их: и глаголаху овогда убо от учения, емуже научишася от них: овогда же от добраго постижения своего ума. И тако прочее имени их приписана быша словеса. Приемше бо от инех, и преуспевше, и лучшими бывше, глаголаху Духом Святым, что-либо вверено им бысть со извещением от Него. И глаголаху от учений учителей бывших прежде их, не рассуждающе словес их, яко должни извещение пpияти от Бога молением и чтением, аще истинна суть: и смесишася yчeния. И понеже от них глаголана быша, приписано имени их. Аще убо услышиши некоего от них, яко от Духа Свята слышал есть, яже глаголет, то сие извещение, и должни есмы верити. Егда же глаголет о онех словесех, то не обретеши его глаголюща cиe: не бо от извещения, но от учений первых его учителей есть.